ভোজবৃত্তি – পাতঞ্জলয়োগসূত্রম্

 || ভোজবৃত্তি ||

|| পাতঞ্জলয়োগসূত্রম্ ||

ধারেশ্বরভোজদেববিরচিতরাজমার্তণ্ডবৃত্তিসমেতম্

দেহার্দ্ধয়োগঃ শিবয়োঃ স শ্রেয়াংসি তনোতু বঃ |
দুষ্প্রাপমপি যৎস্মৃত্যা জনঃ কৈবল্যমশ্নুতে || ১||
ত্রিবিধান্যপি দুঃখানি যদনুস্মরণান্নৃণাম্ |
প্রয়ান্তি সদ্যো বিলয়ং তং স্তুমঃ শিবমব্যয়ম্ || ২||
পতঞ্জলিমুনেরুক্তিঃ কাপ্যপূর্বা জয়ত্যসৌ |
পুম্প্রকৃত্যোর্বিয়োগোঽপি যোগ ইত্যুদিতো যয়া || ৩||
জয়ন্তি বাচঃ ফণিভর্তুরান্তরস্ফুরত্তমস্তোমনিশাকরৎবিষঃ |
বিভাব্যমানাঃ সততং মনাংসি যাঃ সতাং সদানন্দময়ানি কুর্বতে || ৪||
শব্দানামনুশাসনং বিদধতা পাতঞ্জলে কুর্বতা বৃত্তিং
রাজমৃগাঙ্কসঞ্জ্ঞকমপি ব্যতন্বতা বৈদ্যকে |
বাক্চেতোবপুষাং মলঃ ফণিভৃতাং ভর্ত্রেব যেনোদ্ধৃতস্তস্য
শ্রীরণরঙ্গমল্লনৃপতের্বাচো জয়ন্ত্যুজ্জ্বলাঃ || ৫||
দুর্বোধং যদতীব তদ্বিজহতি স্পষ্টার্থমিত্যুক্তিভিঃ
স্পষ্টার্থেষ্বতিবিস্তৃতিং বিদধতি ব্যর্থৈঃ সমাসাদিকৈঃ |
অস্থানেঽনুপয়োগিভিশ্চ বহুভির্জল্পৈর্ভ্রমং তন্বতে শ্রোতৃঈণামিতি
বস্তুবিপ্লবকৃতঃ সর্বেঽপি টীকাকৃতঃ || ৬||
উৎসৃজ্য বিস্তরমুদস্য বিকল্পজালং ফল্গুপ্রকাশমবধার্য চ
সম্যগর্থান্ |
সন্তঃপতঞ্জলিমতে বিবৃতির্ময়েয়মাতন্যতে বুধজনপ্রতিবোধহেতুঃ || ৭||

অথ সমাধিপাদঃ || ১||

অথ যোগানুশাসনম্ || সমাধি ১||

বৃত্তিঃ —অনেন সূত্রেণ শাস্ত্রস্য
সম্বন্ধাভিধেয়প্রয়োজনান্যাখ্যায়ন্তে |
অথশব্দোঽধিকারদ্যোতকো মঙ্গলার্থকশ্চ | যোগো যুক্তিঃ সমাধানম্ |
যুজ সমাধৌ (ধা০ পা০ ৪.৬৭). অনুশিষ্যতে ব্যাখ্যায়তে
লক্ষণভেদোপায়ফলৈর্যেন তদনুশাসনম্ | যোগস্যানুশাসনং
যোগানুশাসনম্ | তদাঽঽশাস্ত্রপরিসমাপ্তেরধিকৃতং
বোদ্ধব্যমিত্যর্থঃ |
তত্র শাস্ত্রস্য ব্যুৎপাদ্যতয়া যোগঃ সসাধনঃ সফলোঽভিধেয়ঃ |
তদ্ব্যুৎপাদনং চ ফলম্ | ব্যুৎপাদিতস্য যোগস্য কৈবল্যং ফলম্ |
শাস্ত্রাভিধেয়য়োঃ প্রতিপাদ্যপ্রতিপাদকভাবলক্ষণঃ সম্বন্ধঃ |
অভিধেয়স্য তৎফলস্য চ কৈবল্যস্য সাধ্যসাধনভাবঃ | এতদুক্তং
ভবতি —ব্যুৎপাদ্যস্য যোগস্য সাধনানি শাস্ত্রেণ প্রদর্শ্যন্তে |
তৎসাধনসিদ্ধো যোগঃ কৈবল্যাখ্যং ফলমুৎপাদয়তি || ১||
তত্র কো যোগ ইত্যাহ —

যোগশ্চিত্তবৃত্তিনিরোধঃ || সমাধি ২||

বৃত্তিঃ —চিত্তস্য নির্মলসত্ত্বপরিণামরূপস্য যা
বৃত্তয়োঽঙ্গাঙ্গিভাবপরিণামরূপাস্তাসাং নিরোধো বহির্মুখতয়া
পরিণতিবিচ্ছেদাদন্তর্মুখতয়া প্রতিলোমপরিণামেন স্বকারণে লয়ো যোগ
ইত্যাখ্যায়তে | স চ নিরোধঃ সর্বাসাং চিত্তভূমিনাং সর্বপ্রাণিনাং
ধর্মঃ
কদাচিৎ কস্যাঞ্চিদ্ভূমবাবির্ভবতি |
তাশ্চ ক্ষিপ্তং মূঢং বিক্ষিপ্তম্ একাগ্রং নিরুদ্ধমিতি চিত্তস্য
ভূময়শ্চিত্তস্যাবস্থাবিশেষাঃ | তত্র ক্ষিপ্তং রজস উদ্রেকাদস্থিরং
বহির্মুখতয়া সুখদুঃখাদিবিষয়েষু বিকল্পিতেষু ব্যবহিতেষু বা রজসা
প্রেরিতম্ | তচ্চ সদৈব দৈত্যদানবাদীনাম্ | মূঢং তমস উদ্রেকাৎ
কৃত্যাকৃত্যবিভাগমন্তরেণ ক্রোধাদিভির্বিরুদ্ধকৃত্যেষ্বেব
নিয়মিতম্ |
তচ্চ সদৈব রক্ষঃপিশাচাদীনাম্ | বিক্ষিপ্তং তু
সত্ত্বোদ্রেকাদ্বৈশিষ্ট্যেন
পরিহৃত্য দুঃখসাধনং সুখসাধনেষ্বেব শব্দাদিষু প্রবৃত্তম্ |
তচ্চ সদৈব দেবানাম্ |
এতদুক্তং ভবতি —রজসা প্রবৃত্তিরূপং তমসা পরাপকারনিয়তং
সত্ত্বেন সুখময়ং চিত্তং ভবতি | এতাস্তিস্রশ্চিত্তাবস্থাঃ
সমাধাবনুপয়োগিন্যঃ | একাগ্রনিরুদ্ধরূপে দ্বে চ
সত্ত্বোৎকর্ষাদ্যথোত্তরমবস্থিতত্ত্বাৎ সমাধাবুপয়োগং ভজেতে |
সত্ত্বাদিক্রমব্যুৎক্রমে ৎবয়মভিপ্রায়ঃ —দ্বয়োরপি
রজস্তমসোরত্যন্তহেয়ৎবেঽপ্যেতদর্থং রজসঃ প্রথমমুপাদানম্ |
যাবন্ন প্রবৃত্তির্দর্শিতা তাবন্নিবৃত্তির্ন শক্যতে দর্শয়িতুমিতি
দ্বয়োর্ব্যত্যয়েন প্রদর্শনম্ | সত্ত্বস্য ৎবেতদর্থং পশ্চাৎ
প্রদর্শনং
যৎ, তস্যোৎকর্ষেণোত্তরে দ্বে ভূমী যোগোপয়োগিন্যাবিতি |
অনয়োর্দ্বয়োরেকাগ্রনিরুদ্ধয়োর্ভূম্যোর্যশ্চিত্তস্যৈকাগ্রতারূপঃ পরিণামঃ

যোগ ইত্যুক্তং ভবতি | একাগ্রে বহির্বৃত্তিনিরোধঃ | নিরুদ্ধে চ
সর্বাসাং
বৃত্তিনাং সংস্কারাণাং চ প্রবিলয় ইত্যনয়োরেব ভূম্যোর্যোগস্য
সম্ভবঃ || ২||
ইদানীং সূত্রকারশ্চিত্তবৃত্তিনিরোধপদানি ব্যাখ্যাতুকামঃ প্রথমং
চিত্তপদং ব্যাচষ্টে —

তদা দ্রষ্টুঃ স্বরূপেঽবস্থানম্ || সমাধি ৩||

বৃত্তিঃ —দ্রষ্টুঃ পুরুষস্য তস্মিন্ কালে স্বরূপে
চিন্মাত্রতায়ামবস্থানং
স্থিতির্ভবতি | অয়মর্থঃ —উৎপন্নবিবেকখ্যাতেশ্চিৎসঙ্ক্রমাভাবাৎ
কর্তৃৎবাভিমাননিবৃত্তৌ প্রোচ্ছন্নপরিণামায়াং বুদ্ধাবাত্মনঃ
স্বরূপেণাবস্থানং স্থিতির্ভবতি || ৩||
ব্যুত্থানদশায়াং তু তস্য কিং রূপমিত্যাহ —

বৃত্তিসারূপ্যমিতরত্র || সমাধি ৪||

বৃত্তিঃ —ইতরত্র যোগাদন্যস্মিন্ কালে বৃত্তয়ো যা
বক্ষ্যমাণলক্ষণাস্তাভিঃ সারূপ্যং তদ্রূপৎবম্ | অয়মর্থঃ —
যাদৃশ্যো বৃত্তয়ঃ
সুখদুঃখমোহাত্মিকাঃ প্রাদুর্ভবন্তি তাদৃগ্রূপ এব সংবেদ্যতে
ব্যবহর্তৃভিঃ পুরুষঃ | তদেবং যস্মিন্নেকাগ্রতয়া পরিণতে
চিতিশক্তেঃ
স্বস্মিন্ রূপে প্রতিষ্ঠানং ভবতি যস্মিংশ্চেন্দ্রিয়বৃত্তিদ্বারেণ
বিষয়াকারেণ পরিণতে পুরুষস্তদ্রূপাকার ইব পরিভাব্যতে | যথা
জলতরঙ্গেষু চলৎসু চন্দ্রশ্চলন্নিব প্রতিভাষতে তচ্চিত্তম্ || ৪||
বৃত্তিপদং ব্যাখ্যাতুমাহ —

বৃত্তয়ঃ পঞ্চতয়্যঃ ক্লিষ্টাঽক্লিষ্টাঃ || সমাধি ৫||

বৃত্তিঃ —বৃত্তয়শ্চিত্তপরিণামবিশেষাঃ |
বৃত্তিসমুদায়লক্ষণস্যাঽবয়বিনো যাঽবয়বভূতা
বৃত্তয়স্তদপেক্ষয়া তয়প্প্রত্যয়ঃ (অষ্টা০
৫.২.৪২). এতদুক্তং ভবতি —পঞ্চ বৃত্তয়ঃ কীদৃশ্যঃ |
ক্লিষ্টা অক্লিষ্টাঃ | ক্লেশৈর্বক্ষ্যমাণলক্ষণৈরাক্রান্তাঃ ক্লিষ্টাঃ |
তদ্বিপরীতা অক্লিষ্টাঃ || ৫||
এতা এব পঞ্চ বৃত্তয়ঃ সঙ্ক্ষিপ্য উদ্দিশ্যন্তে —

প্রমাণবিপর্যয়বিকল্পনিদ্রাস্মৃতয়ঃ || সমাধি ৬||

বৃত্তিঃ —আসাং ক্রমেণ লক্ষণমাহ —

প্রত্যক্ষানুমানাগমাঃ প্রমাণানি || সমাধি ৭||

বৃত্তিঃ —অত্রাতিপ্রসিদ্ধৎবাৎ প্রমাণানাং শাস্ত্রকারেণ
ভেদনিরূপণেনৈব
গতৎবাল্লক্ষণস্য পৃথক্ লক্ষণং ন কৃতম্ | প্রমাণলক্ষণন্তু

অবিসংবাদি জ্ঞানং প্রমাণমিতি | ইন্দ্রিয়দ্বারেণ
বাহ্যবস্তূপরাগাচ্চিত্তস্য
তদ্বিষয়সামান্যবিশেষাত্মনোঽর্থস্য বিশেষাবধারণপ্রধানা বৃত্তিঃ
প্রত্যক্ষম্ | গৃহীতসম্বন্ধাল্লিঙ্গাল্লিঙ্গিনি সামান্যাধ্যবসায়োঽনুমানম্ |
আপ্তবচনমাগমঃ || ৭||
এবং প্রমাণরূপাং বৃত্তিং ব্যাখ্যায় বিপর্যয়রূপামাহ —

বিপর্যয়ো মিথ্যাজ্ঞানমতদ্রূপপ্রতিষ্ঠম্ || সমাধি ৮||

বৃত্তিঃ —অতথাভূতেঽর্থে তথোৎপদ্যমানং জ্ঞানং বিপর্যয়ঃ |
যথা শুক্তিকায়াং রজতজ্ঞানম্ | অতদ্রূপপ্রতিষ্ঠমিতি |
তস্যার্থস্য যদ্রূপং তস্মিন্ রূপে ন
প্রতিষ্ঠতি তস্যার্থস্য যৎ পারমার্থিকং রূপং ন তৎ প্রতিভাসয়তীতি
যাবৎ | সংশয়োঽপ্যতদ্রূপপ্রতিষ্ঠিতৎবান্মিথ্যাজ্ঞানম্ | যথা
স্থাণুর্বা পুরুষো বেতি || ৮||
বিকল্পবৃত্তিং ব্যাখাতুমাহ —

শব্দজ্ঞানানুপাতী বস্তুশূন্যো বিকল্পঃ || সমাধি ৯||

বৃত্তিঃ —শব্দজনিতং জ্ঞানং শব্দজ্ঞানম্ | তদনুপতিতুং
শীলং যস্য সঃ শব্দজ্ঞানানুপাতী | বস্তুনস্তথাৎবমনপেক্ষমাণো
যোঽধ্যবসায়ঃ স বিকল্প ইত্যুচ্যতে | যথা পুরুষস্য চৈতন্যং
স্বরূপমিতি | অত্র দেবদত্তস্য কম্বল ইতি শব্দজনিতে জ্ঞানে ষষ্ঠ্যা
যোঽধ্যবসিতো ভেদস্তমিহাবিদ্যমানমপি সমারোপ্য প্রবর্ততেঽধ্যবসায়ঃ |
বস্তুতস্তু চৈতন্যমেব পুরুষঃ || ৯||
নিদ্রাং ব্যাখ্যাতুমাহ —

অভাবপ্রত্যয়ালম্বনা বৃত্তির্নিদ্রা || সমাধি ১০||

বৃত্তিঃ —অভাবপ্রত্যয় আলম্বনং যস্যাঃ সা তথোক্তা | এতদুক্তং
ভবতি —যা সন্ততমুদ্রিক্তৎবাত্তমসঃ সমস্তবিষয়পরিত্যাগেন
প্রবর্ততে বৃত্তিঃ সা নিদ্রা | তস্যাশ্চ সুখমহমস্বাপ্সমিতি
স্মৃতিদর্শনাৎ স্মৃতেশ্চানুভবব্যতিরেকেণানুপপত্তের্বৃত্তিত্ত্বম্ || ১০||
স্মৃতিং ব্যাখ্যাতুমাহ —

অনুভূতবিষয়াসম্প্রমোষঃ স্মৃতিঃ || সমাধি ১১||

বৃত্তিঃ —প্রমাণেনানুভূতস্য বিষয়স্য যোঽযমসম্প্রমোষঃ
সংস্কারদ্বারেণ
বুদ্ধাবারোহঃ সা স্মৃতিঃ | তত্র প্রমাণবিপর্যয়বিকল্পা জাগ্রদবস্থাঃ |
তা এব তদনুভববলাৎ প্রক্ষীয়মাণাঃ স্বপ্নঃ var (প্রত্যক্ষায়মাণাঃ )|
নিদ্রা ৎবসংবেদ্যমানবিষয়া | স্মৃতিশ্চ
প্রমাণবিপর্যয়বিকল্পনিদ্রানিমিত্তঃ || ১১||
এবং বৃত্তীর্ব্যাখ্যায় সোপায়ং নিরোধং ব্যাখ্যাতুমাহ —

অভ্যাসবৈরাগ্যাভ্যাং তন্নিরোধঃ || সমাধি ১২||

বৃত্তিঃ —অভ্যাসবৈরাগ্যে বক্ষ্যমাণলক্ষণে তাভ্যাং
প্রকাশপ্রবৃত্তিনিয়মরূপা যা বৃত্তয়স্তাসাং নিরোধো ভবতীত্যুক্তং
ভবতি | তাসাং বিনিবৃত্তবাহ্যাভিনিবেশানামন্তর্মুখতয়া স্বকারণ
এব চিত্তে শক্তিরূপতয়াঽবস্থানম্ | তত্র বিষয়দোষদর্শনজেন
বৈরাগ্যেণ তদ্বৈমুখ্যমুৎপাদ্যতে | অভ্যাসেন চ সুখজনকং
শান্তপ্রবাহপ্রদর্শনদ্বারেণ দৃঢস্থৈর্যমুৎপাদ্যতে | ইত্থং
তাভ্যাং ভবতি চিত্তবৃত্তিনিরোধঃ || ১২||
অভ্যাসং ব্যাখ্যাতুমাহ —

তত্র স্থিতৌ যত্নোঽভ্যাসঃ || সমাধি ১৩||

বৃত্তিঃ —বৃত্তিরহিতস্য চিত্তস্য স্বরূপনিষ্ঠঃ পরিণামঃ
স্থিতিস্তস্যাং যত্ন উৎসাহঃ পুনঃপুনস্তথাৎবেন চেতসি নিবেশনমভ্যাস
ইত্যুচ্যতে || ১৩||
তস্যৈব বিশেষমাহ —

স তু দীর্ঘকালাদরনৈরন্তর্যসৎকারাসেবিতো দৃঢভূমিঃ || সমাধি ১৪||

বৃত্তিঃ —বহুকালং নৈরন্তর্যেণাদরাতিশয়েন চ সেব্যমানো
দৃঢভূমিঃ স্থিরো ভবতি | দার্ঢ্যায় প্রভবতীত্যর্থঃ || ১৪||
বৈরাগ্যস্য লক্ষণমাহ —

দৃষ্টানুশ্রবিকবিষয়বিতৃষ্ণস্য বশীকারসঞ্জ্ঞা বৈরাগ্যম্ || সমাধি ১৫||

বৃত্তিঃ —দ্বিবিধো হি বিষয়ো দৃষ্ট আনুশ্রবিকশ্চ |
দৃষ্ট ইহৈবোপলভ্যমানঃ শব্দাদিঃ | দেবলোকাদাবানুশ্রবিকঃ |
অনুশ্রূয়তে গুরুমুখাদিত্যনুশ্রবো বেদস্তত আগত আনুশ্রবিকঃ |
তয়োর্দ্বয়োরপি বিষয়য়োঃ পরিণামবিরসৎবদর্শনাদ্বিগতগর্ধস্য
যা বশীকারসঞ্জ্ঞা মমৈতে বশ্যা নাহমেতেষাং বশ্য ইতি যোঽযং
বিমর্শস্তদ্বৈরাগ্যমুচ্যতে || ১৫||
তস্যৈব বিশেষমাহ —

তৎপরং পুরুষখ্যাতের্গুণবৈতৃষ্ণ্যম্ || সমাধি ১৬||

বৃত্তিঃ —তদ্বৈরাগ্যং পরং প্রকৃষ্টং প্রথমং বৈরাগ্যং
বিষয়বিষয়ং দ্বিতীয়ং গুণবিষয়মুৎপন্নগুণপুরুষবিবেকখ্যাতেরেব
ভবতি | নিরোধসমাধেরত্যন্তানুকূলৎবাৎ || ১৬||
এবং যোগস্য স্বরূপমুক্ত্বা সম্প্রজ্ঞাতস্বরূপভেদমাহ —

বিতর্কবিচারানন্দাস্মিতারূপানুগমাৎসম্প্রজ্ঞাতঃ || সমাধি ১৭||

বৃত্তিঃ —সমাধিরিতি শেষঃ | সম্যক্ সংশয়বিপর্যয়রহিতৎবেন
প্রজ্ঞায়তে প্রকর্ষেণ জ্ঞায়তে ভাব্যস্য রূপং যেন স সম্প্রজ্ঞাতঃ
সমাধির্ভাবনাবিশেষঃ | স বিতর্কাদিভেদাচ্চতুর্বিধঃ —
সবিতর্কঃ সবিচারঃ সানন্দঃ সাস্মিতশ্চ | ভাবনা ভাব্যস্য
বিষয়ান্তরপরিহারেণ চেতসি পুনঃপুনর্নিবেশনম্ | ভাব্যং চ
দ্বিবিধম্ —ঈশ্বরস্তত্ত্বানি চ | তান্যপি দ্বিবিধানি জডাজডভেদাৎ |
জডানি চতুর্বিংশতিঃ | অজডঃ পুরুষঃ |
তত্র যদা মহাভূতানীন্দ্রিয়াণি স্থূলানি বিষয়ৎবেনাদায়
পূর্বাপরানুসন্ধানেন শব্দার্থোল্লেখসম্ভেদেন চ ভাবনা
ক্রিয়তে তদা সবিতর্কঃ সমাধিঃ | অস্মিন্নেবাবলম্বনে
পূর্বাপরানুসন্ধানশব্দোল্লেখশূন্যৎবেন যদা ভাবনা
প্রবর্ততে তদা নির্বিতর্কঃ | তন্মাত্রান্তঃকরণলক্ষণং
সূক্ষ্মবিষয়মালম্ব্য তস্য দেশকালধর্মাবচ্ছেদেন যদা ভাবনা
তদা সবিচারঃ | তস্মিন্নেবাবলম্বনে দেশকালধর্মাবচ্ছেদং
বিনা ধর্মিমাত্রাবভাসিৎবেন ভাবনা ক্রিয়মাণা নির্বিচার ইত্যুচ্যতে |
এবম্পর্যন্তঃ সমাধিঃ গ্রাহ্যসমাপত্তিরিতি ব্যপদিশ্যতে |
যদা তু রজস্তমোলেশানুবিদ্ধমন্তঃকরণসত্ত্বং ভাব্যতে
তদা গুণভাবাচ্চিতিশক্তেঃ সুখপ্রকাশময়স্য সত্ত্বস্য
ভাব্যমানস্যোদ্রেকাৎ সানন্দঃ সমাধির্ভবতি | তস্মিন্নেব সমাধৌ
যে বদ্ধধৃতয়স্তত্ত্বান্তরং প্রধানপুরুষরূপং ন পশ্যন্তি
তে বিগতদেহাহঙ্কারৎবাদ্বিদেহশব্দবাচ্যাঃ | ইয়ং গ্রহণসমাপত্তিঃ |

ততঃ পরং রজস্তমোলেশানভিভূতশুদ্ধসত্ত্বমালম্বনীকৃত্য যা
প্রবর্ততে ভাবনা তস্যাং গ্রাহ্যস্য ন্যগ্ভাবাচ্চিতিশক্তেরুদ্রেকাৎ
সত্তামাত্রাবশেষৎবেন সমাধিঃ সাস্মিত ইত্যুচ্যতে | ন
চাহঙ্কারাস্মিতয়োরভেদঃ শঙ্কনীয়ঃ | যতো যত্রান্তঃকরণমহমিতি
উল্লেখেন বিষয়ান্ বেদয়তে সোঽহঙ্কারঃ | যত্রান্তর্মুখতয়া
প্রতিলোমপরিণামে প্রকৃতিলীনে চেতসি সত্তামাত্রমবভাতি সাঽস্মিতা |
অস্মিন্নেব সমাধৌ যে কৃতপরিতোষাঃ পরং পরমাত্মানং পুরুষং
ন পশ্যন্তি তেষাং চেতসি স্বকারণে লয়মুপাগতে প্রকৃতিলয়া
ইত্যুচ্যন্তে | যে পরং পুরুষং জ্ঞাৎবা ভাবনায়াং প্রবর্তন্তে তেষামিয়ং
বিবেকখ্যাতির্গ্রহীতৃসমাপত্তিরিত্যুচ্যতে |
তত্র সম্প্রজ্ঞাতে সমাধৌ চতস্রোঽবস্থাঃ শক্তিরূপতয়াঽবতিষ্ঠন্তে |
তত্রৈকৈকস্যাস্ত্যাগ উত্তরোত্তরেতি চতুরবস্থোঽযং সম্প্রজ্ঞাতঃ
সমাধিঃ || ১৭||
অসম্প্রজ্ঞাতমাহ —

বিরামপ্রত্যয়াভ্যাসপূর্বঃ সংস্কারশেষোঽন্যঃ || সমাধি ১৮||

বৃত্তিঃ —বিরম্যতেঽনেনেতি বিরামো বিতর্কাদিচিন্তাত্যাগঃ |
বিরামশ্চাসৌ প্রত্যয়শ্চেতি বিরামপ্রত্যয়ঃ | তস্যাভ্যাসঃ
পৌনঃপুন্যেন চেতসি নিবেশনম্ | তত্র যা কাচিদ্বৃত্তিরুল্লসতি তস্যা
নেতি নেতীতি নৈরন্তর্যেণ পর্যুদসনং বিরামপ্রত্যয়াভ্যাসঃ | তৎপূর্বঃ
সম্প্রজ্ঞাতসমাধিঃ | সংস্কারশেষোঽন্যস্তদ্বিলক্ষণোঽযমসম্প্রজ্ঞাত
ইত্যর্থঃ | ন তত্র কিঞ্চিদ্বেদ্যম্ | অসম্প্রজ্ঞাতো নির্বীজঃ সমাধিঃ |
ইহ চতুর্বিধশ্চিত্তস্য পরিণামঃ —ব্যুত্থানং সমাধিপ্রারম্ভ
একাগ্রতা নিরোধশ্চ | তত্র ক্ষিপ্তমূঢে চিত্তভূমী ব্যুত্থানম্ |
বিক্ষিপ্তা ভূমিঃ সৎবোদ্রেকাৎ সমাধিপ্রারম্ভঃ | নিরুদ্ধৈকাগ্রতে
চ পর্যন্তভূমী | প্রতিপরিণামং চ সংস্কারাঃ | তত্র
ব্যুত্থানজনিতাঃ সংস্কারাঃ সমাধিপ্রারম্ভজৈঃ সংস্কারৈঃ প্রত্যাহন্যন্তে |
তজ্জাশ্চৈকাগ্রতাজৈঃ | নিরোধজনিতৈরেকাগ্রতাজা নিরোধজাঃ সংস্কারাঃ
স্বরূপং চ হন্যন্তে | যথা সুবর্ণসংবলিতং ধ্মায়মানং সীসকমাত্মানং
সুবর্ণমলং চ নির্দহতি | এবমেকাগ্রতাজনিতান্ সংস্কারান্ নিরোধজাঃ
স্বাত্মানং চ নির্দহন্তি || ১৮||
তদেবং যোগস্য স্বরূপং ভেদং চ সঙ্ক্ষেপেণোপায়াংশ্চাভিধায়
বিস্তাররূপেণোপায়ং যোগাভ্যাসপ্রদর্শনপূর্বকমুপক্রমতে —

ভবপ্রত্যয়ো বিদেহপ্রকৃতিলয়ানাম্ || সমাধি ১৯||

বৃত্তিঃ —বিদেহাঃ প্রকৃতিলয়াশ্চ বিতর্কাদিভূমিকাসূত্রে
(১.১৭)ব্যাখ্যাতাঃ | তেষাং সমাধির্ভবপ্রত্যয়ঃ |
ভবঃ সংসারঃ স এব প্রত্যয়ঃ কারণং যস্য স ভবপ্রত্যয়ঃ |
অয়মর্থঃ —আধিমাত্রান্তর্ভূতা এব তে সংসারে [আবির্ভূতা
এব সংসারে তে]তথাবিধসমাধিভাজো ভবন্তি | তেষাং
পরতত্ত্বাঽদর্শনাদ্যোগাভাসোঽযম্ | অতঃ পরতত্ত্বজ্ঞানে তদ্ভাবনায়াং
চ মুক্তিকামেন মহান্ যত্নো বিধেয় ইত্যেতদর্থমুপদিষ্টম্ || ১৯||
তদন্যেষান্তু —

শ্রদ্ধাবীর্যস্মৃতিসমাধিপ্রজ্ঞাপূর্বক ইতরেষাম্ || সমাধি ২০||

বৃত্তিঃ —বিদেহপ্রকৃতিলয়ব্যতিরিক্তানাং শ্রদ্ধাদিপূর্বকঃ
শ্রদ্ধাদয়ঃ পূর্বে উপায়া যস্য স শ্রদ্ধাদিপূর্বকঃ |
তে চ শ্রদ্ধাদয়ঃ ক্রমাদুপায়োপেয়ভাবেন প্রবর্তমানাঃ
সম্প্রজ্ঞাতসমাধেরুপায়তাং প্রতিপদ্যন্তে | তত্র শ্রদ্ধা যোগবিষয়ে
চেতসঃ প্রসাদঃ | বীর্যমুৎসাহঃ | স্মৃতিরনুভূতাসম্প্রমোষঃ |
সমাধিরেকাগ্রতা | প্রজ্ঞা প্রজ্ঞাতব্যবিবেকঃ |
তত্র শ্রদ্ধাবতো বীর্যং জায়তে যোগবিষয় উৎসাহবান্ ভবতি |
সোৎসাহস্য চ পাশ্চাত্যাসু ভূমিষু স্মৃতিরুৎপদ্যতে | তৎস্মরণাচ্চ
চেতঃ সমাধীয়তে | সমাহিতচিত্তশ্চ ভাব্যং সম্যগ্বিবেকেন
জানাতি | ত এতে সম্প্রজ্ঞাতস্য সমাধেরুপায়াস্তস্যাভ্যাসাৎ পরাচ্চ
বৈরাগ্যাদ্ভবত্যসম্প্রজ্ঞাতঃ || ২০||
উক্তোপায়বতাং যোগিনামুপায়ভেদাদ্ভেদানাহ —

তীব্রসংবেগানামাসন্নঃ || সমাধি ২১||

বৃত্তিঃ —সমাধিলাভ ইতি শেষঃ| সংবেগঃ ক্রিয়াহেতুর্দৃঢতরঃ
সংস্কারঃ | স তীব্রো যেষামধিমাত্রোপায়ানাং তেষামাসন্নঃ সমাধিলাভঃ
সমাধিফলং চাসন্নং ভবতি | শীঘ্রমেব সম্পদ্যত ইত্যর্থঃ || ২১||
কে তে তীব্রসংবেগা ইত্যাহ —

মৃদুমধ্যাধিমাত্রৎবাত্ততোঽপি বিশেষঃ || সমাধি ২২||

বৃত্তিঃ —তেভ্য উপায়েভ্যো মৃদ্বাদিভেদভিন্নেভ্য উপায়বতাং
বিশেষো ভবতি | মৃদুর্মধ্যোঽধিমাত্র ইত্যুপায়ভেদাঃ | তে
প্রত্যেকং মৃদুসংবেগমধ্যসংবেগতীব্রসংবেগভেদাৎ ত্রিধা |
তদ্ভেদেন চ নব যোগিনো ভবন্তি —মৃদূপায়ো মৃদুসংবেগো
মধ্যসংবেগস্তীব্রসংবেগশ্চ | মধ্যোপায়ো মৃদুসংবেগো
মধ্যসংবেগস্তীব্রসংবেগশ্চ | অধিমাত্রোপায়ো মৃদুসংবেগো
মধ্যসংবেগস্তীব্রসংবেগশ্চ | অধিমাত্র উপায়ে তীব্রে সংবেগে চ
মহান্ যত্নঃ কর্তব্য ইতি ভেদোপদেশঃ || ২২||
ইদানীমেতদুপায়বিলক্ষণং সুগমমুপায়ান্তরং দর্শয়িতুমাহ —

ঈশ্বরপ্রণিধানাদ্বা || সমাধি ২৩||

বৃত্তিঃ —ঈশ্বরো বক্ষ্যমাণলক্ষণঃ | তত্র প্রণিধানং
ভক্তিবিশেষো বিশিষ্টমুপাসনং সর্বক্রিয়াণাং তত্রার্পণম্ |
বিষয়সুখাদিকং ফলমনিচ্ছন্ সর্বাঃ ক্রিয়াস্তস্মিন্
পরমগুরাবর্পয়তি | তৎপ্রণিধানং সমাধেস্তৎফললাভস্য চ
প্রকৃষ্ট উপায়ঃ || ২৩||
ঈশ্বরস্য প্রণিধানাৎ সমাধিলাভ ইত্যুক্তম্ | তত্রেশ্বরস্য স্বরূপং
প্রমাণং প্রভাবং বাচকমুপাসনাক্রমং তৎফলং চ ক্রমেণ বক্তুমাহ

ক্লেশকর্মবিপাকাশয়ৈরপরামৃষ্টঃ পুরুষবিশেষ ঈশ্বরঃ || সমাধি ২৪||

বৃত্তিঃ —ক্লিশ্নন্তীতি ক্লেশা অবিদ্যাদয়ো বক্ষ্যমাণাঃ |
বিহিতনিষিদ্ধব্যামিশ্ররূপাণি কর্মাণি | বিপচ্যন্ত ইতি বিপাকাঃ
কর্মফলানি জাত্যায়ুর্ভোগাঃ | আফলবিপাকাচ্চিত্তভূমৌ শেরত ইত্যাশয়ো
বাসনাখ্যসংস্কারঃ | তৈরপরামৃষ্টস্ত্রিষ্বপি কালেষু ন সংস্পৃষ্টঃ |
পুরুষবিশেষোঽন্যেভ্যঃ পুরুষেভ্যো বিশিষ্যতে ইতি বিশেষ ঈশ্বরঃ
ঈশনশীল ইচ্ছামাত্রেণ সকলজগদুদ্ধরণক্ষমঃ |
যদ্যপি সর্বেষামাত্মণাং ক্লেশাদিস্পর্শো নাস্তি তথাপি
চিত্তগতাস্তেষামুপদিশ্যন্তে | যথা যোদ্ধৃগতো জয়পরাজয়ৌ স্বামিনঃ |
অস্য তু ত্রিষ্বপি কালেষু তথাবিধোঽপি ক্লেশাদিপরামর্শো নাস্তি | অতঃ
সবিলক্ষণ এব ভগবানীশ্বরঃ | তস্য চ তথাবিধমৈশ্বর্যমনাদেঃ
সত্ত্বোৎকর্ষাৎ | তস্য সত্ত্বোৎকর্ষস্য প্রকৃষ্টাজ্জ্ঞানাদেব | ন
চানয়োর্জ্ঞানৈশ্বর্যয়োরিতরেতরাশ্রয়ৎবং পরস্পরানপেক্ষৎবাৎ |
তে দ্বে জ্ঞানৈশ্বর্যে ঈশ্বরসত্ত্বে বর্তমানে অনাদিভূতে
তেন তথাবিধেন সত্ত্বেন তস্যানাদিরেব সম্বন্ধঃ |
প্রকৃতিপুরুষসংযোগবিয়োগয়োরীশ্বরেচ্ছাব্যতিরেকেণানুপপত্তেঃ |
যথেতরেষাং প্রাণিনাং সুখদুঃখমোহাত্মকতয়া পরিণতং চিত্তং
নির্মলে সাত্ত্বিকে ধর্মানুপ্রখ্যে প্রতিসঙ্ক্রান্তং চিচ্ছায়াসঙ্ক্রান্তে
সংবেদ্যং ভবতি নৈবমীশ্বরস্য | তস্য কেবল এব সাত্ত্বিকঃ
পরিণাম উৎকর্ষবাননাদিসম্বন্ধেন ভোগ্যতয়া ব্যবস্থিতঃ | অতঃ
পুরুষান্তরবিলক্ষণতয়া স এব ঈশ্বরঃ |
মুক্তাত্মনান্তু পুনঃপুনঃ ক্লেশাদিয়োগস্তৈস্তৈঃ
শাস্ত্রোক্তৈরুপায়ৈর্নিবর্তিতঃ | অস্য পুনঃ সর্বদৈব তথাবিধৎবান্ন
মুক্তাত্মতুল্যৎবম্ | ন চেশ্বরাণামনেকৎবম্ | তেষাং তুল্যৎবে
ভিন্নাভিপ্রায়ৎবাৎ কার্যস্যৈবানুপপত্তেঃ | উৎকর্ষাপকর্ষয়ুক্তৎবে
য এবোৎকৃষ্টঃ স এবেশ্বরস্তত্রৈব কাষ্ঠাপ্রাপ্তৎবাদৈশ্বর্যস্য || ২৪||
এবমীশ্বরস্য স্বরূপমভিধায় প্রমাণমাহ —

তত্র নিরতিশয়ং সার্বজ্ঞ্যবীজম্ || সমাধি ২৫||

বৃত্তিঃ —তস্মিন্ ভগবতি সর্বজ্ঞৎবস্য
যদ্বীজমতীতানাগতাদিগ্রহণস্যাল্পৎবং মহৎবং চ মূলৎবাদ্বীজমিব বীজম্ |
তৎ তত্র নিরতিশয়ং কাষ্ঠাং প্রাপ্তম্ | দৃষ্টা হ্যল্পৎবমহৎবাদীনাং
ধর্মাণাং সাতিশয়ানাং কাষ্ঠাপ্রাপ্তিঃ | যথা পরমাণাবল্পৎবস্যাকাশে
পরমমহৎবস্য | এবং জ্ঞানাদয়োঽপি চিত্তধর্মাস্তারতম্যেন
পরিদৃশ্যমানাঃ ক্বচিন্নিরতিশয়তামাসাদয়ন্তি | যত্র চৈতে
নিরতিশয়াঃ স ঈশ্বরঃ |
যদ্যপি সামান্যমাত্রেঽনুমানস্য পর্যবসিতৎবান্ন
বিশেষাবগতিঃ সম্ভবতি তথাপি শাস্ত্রাদস্য সর্বজ্ঞৎবাদয়ো
বিশেষা অবগন্তব্যাঃ | তস্য স্বপ্রয়োজনাভাবে কথং
প্রকৃতিপুরুষয়োঃ সংযোগবিয়োগাবাপাদয়তীতি নাঽঽশঙ্কনীয়ং তস্য
কারুণিকৎবাদ্ভূতানুগ্রহ এব প্রয়োজনম্ | কল্পপ্রলয়মহাপ্রলয়েষু
নিঃশেষান্ সংসারিণ উদ্ধরিষ্যামীতি তস্যাধ্যবসায়ঃ | যদ্যস্যেষ্টং
তত্তস্য প্রয়োজনমিতি || ২৫||
এবমীশ্বরস্য প্রমাণমভিধায় প্রভাবমাহ —

স পূর্বেষামপি গুরুঃ কালেনানবচ্ছেদাৎ || সমাধি ২৬||

বৃত্তিঃ —আদ্যানাং স্রষ্টৃঈণাং ব্রহ্মাদীনামপি স গুরুরুপদেষ্টা
যতঃ স কালেন নাবচ্ছিদ্যতেঽনাদিৎবাৎ | তেষাং ব্রহ্মাদীনাং
পুনরাদিমত্ত্বাদস্তি কালেনাবচ্ছেদঃ || ২৬||
এবং প্রভাবমুক্ত্বোপাসনোপয়োগায় বাচকমাহ —

তস্য বাচকঃ প্রণবঃ || সমাধি ২৭||

বৃত্তিঃ —ইত্থমুক্তস্বরূপস্যেশ্বরস্য বাচকোঽভিধায়কঃ
প্রকর্ষেণ নূয়তে স্তূয়তেঽনেনেতি নৌতি স্তৌতীতি বা প্রণব ওঙ্কারঃ |
তয়োশ্চ বাচ্যবাচকলক্ষণঃ সম্বন্ধো নিত্যঃ সঙ্কেতেন প্রকাশ্যতে
ন তু কেনচিৎ ক্রিয়তে | যথা পিতাপুত্রয়োর্বিদ্যমান এব সম্বন্ধোঽস্যায়ং
পিতাঽস্যায়ং পুত্র ইতি কেনচিৎ প্রকাশ্যতে || ২৭||
উপাসনমাহ —

তজ্জপস্তদর্থভাবনম্ || সমাধি ২৮||

বৃত্তিঃ —তস্য সার্ধত্রিমাত্রিকস্য প্রণবস্য জপো
যথাবদুচ্চারণং তদ্বাচ্যস্য চেশ্বরস্য ভাবনং পুনঃপুনশ্চেতসি
নিবেশনমেকাগ্রতায়া উপায়ঃ | অতঃ সমাধিসিদ্ধয়ে যোগিনা প্রণবো
জপ্যস্তদর্থ ঈশ্বরশ্চ ভাবনীয় ইত্যুক্তং ভবতি || ২৮||
উপাসনায়াঃ ফলমাহ —

ততঃ প্রত্যক্চেতনাঽধিগমোঽপ্যন্তরায়াভাবশ্চ || সমাধি ২৯||

বৃত্তিঃ —তস্মাজ্জপাত্তদর্থভাবনায়াশ্চ যোগিনঃ
প্রত্যক্চেতনাঽধিগমো ভবতি | বিষয়প্রাতিকূল্যেন
স্বান্তঃকরণাভিমুখমঞ্চতি যা চেতনা দৃক্ষক্তিঃ সা প্রত্যক্চেতনা
তদধিগমো জ্ঞানং ভবতীত্যর্থঃ | অন্তরায়া বক্ষ্যমাণাঃ |
তেষামভাবঃ শক্তিপ্রতিবন্ধোঽপি ভবতি || ২৯||
অথ কেঽন্তরায়া ইত্যাশঙ্কায়ামাহ —

ব্যাধিস্ত্যানসংশয়প্রমাদালস্যাবিরতিভ্রান্তিদর্শনালব্ধভূমিকৎবানবস্থিতৎবানি
চিত্তবিক্ষেপাস্তেঽন্তরায়াঃ || সমাধি ৩০||

বৃত্তিঃ —নবৈতে রজস্তমোবলাৎ প্রবর্তমানাশ্চিত্তস্য বিক্ষেপা
ভবন্তি | তৈরেকাগ্রতাবিরোধিভিশ্চিত্তং বিক্ষিপ্যত ইত্যর্থঃ |
তত্র ব্যাধির্ধাতুবৈষম্যনিমিত্তো জ্বরাদিঃ | স্ত্যানমকর্মণ্যতা
চিত্তস্য | উভয়কোট্যালম্বনং জ্ঞানং সংশয়ঃ —যোগঃ
সাধ্যো ন বেতি | প্রমাদোঽনবধানতা সমাধিসাধনেষ্বৌদাসীন্যম্ |
আলস্যং কায়চিত্তয়োর্গুরুৎবং যোগবিষয়ে প্রবৃত্ত্যভাবহেতুঃ |
অবিরতিশ্চিত্তস্য বিষয়সম্প্রয়োগাত্মা গর্ধঃ | ভ্রান্তিদর্শনং
শুক্তিকায়াং রজতবদ্বিপর্যয়জ্ঞানম্ | অলব্ধভূমিকৎবং
কুতশ্চিন্নিমিত্তাৎ সমাধিভূমেরলাভোঽসম্প্রাপ্তিঃ | অনবস্থিতত্ত্বং
লব্ধায়ামপি ভূমৌ চিত্তস্য তত্রাপ্রতিষ্ঠা | ত এতে সমাধেরেকাগ্রতায়া
যথায়োগং প্রতিপক্ষৎবাদন্তরায়া ইত্যুচ্যতে || ৩০||
চিত্তবিক্ষেপকারকানন্যানপ্যন্তরায়ান্ প্রতিপাদয়িতুমাহ —

দুঃখদৌর্মনস্যাঙ্গমেজয়ৎবশ্বাসপ্রশ্বাসা বিক্ষেপসহভুবঃ || সমাধি ৩১||

বৃত্তিঃ —কুতশ্চিন্নিমিত্তাদুৎপন্নেষু বিক্ষেপেষু এতে
দুঃখাদয়ঃ প্রবর্তন্তে | তত্র দুঃখং চিত্তস্য রজসঃ পরিণামো
বাধনালক্ষণো যদ্বাধাৎ প্রাণিনস্তদুপঘাতায় প্রবর্তন্তে | দৌর্মনস্যং
বাহ্যাভ্যন্তরৈঃ কারণৈর্মনসো দৌঃস্থ্যম্ | অঙ্গমেজয়ৎবং সর্বাঙ্গীনো
বেপথুরাসনমনঃস্থৈর্যস্য বাধকঃ | প্রাণো যদ্বাহ্যং বায়ুমাচামতি
স শ্বাসঃ, যৎ কৌষ্ঠ্যং বায়ুং নিঃশ্বসিতি স প্রশ্বাসঃ | এতে
বিক্ষেপৈঃ সহ প্রবর্তমানা যথোদিতাভ্যাসবৈরাগ্যাভ্যাং নিরোদ্ধব্যা
ইত্যেষামুপদেশঃ || ৩১||
সোপদ্রববিক্ষেপপ্রতিষেধার্থমুপায়ান্তরমাহ —

তৎপ্রতিষেধার্থমেকতত্ত্বাভ্যাসঃ || সমাধি ৩২||

বৃত্তিঃ —তেষাং বিক্ষেপাণাং প্রতিষেধার্থমেকস্মিন্
কস্মিংশ্চিদভিমতে তত্ত্বেঽভ্যাসশ্চেতসঃ পুনঃপুনর্নিবেশনং
কার্যঃ | যদ্বলাৎ প্রত্যুদিতায়ামেকাগ্রতায়াং তে বিক্ষেপাঃ প্রণাশমুপয়ান্তি || ৩২||
ইদানীং চিত্তসংস্কারাপাদকপরিকর্মকথনমুপায়ান্তরমাহ —

মৈত্রীকরুণামুদিতোপেক্ষাণাং সুখদুঃখপুণ্যাপুণ্যবিষয়ানাং
ভাবনাতশ্চিত্তপ্রসাদনম্ || সমাধি ৩৩||

বৃত্তিঃ —মৈত্রী সৌহার্দম্ | করুণা কৃপা | মুদিতা
হর্ষঃ | উপেক্ষৌদাসীন্যম্ | এতা যথাক্রমং সুখিতেষু দুঃখিতেষু
পুণ্যবৎস্বপুণ্যবৎসু চ বিভাবয়েৎ | তথাহি —সুখিতেষু সাধুষু
এষাং সুখিৎবমিতি মৈত্রীং কুর্যান্ন তু ঈর্ষ্যাম্ | দুঃখিতেষু কথং
নু নামৈষাং দুঃখনিবৃত্তিঃ স্যাদিতি কৃপামেব কুর্যান্ন তাটস্থ্যম্ |
পুণ্যবৎসু পুণ্যানুমোদনেন হর্ষমেব কুর্যান্ন তু কিমেতে পুণ্যবন্ত
ইতি বিদ্বেষম্ | অপুণ্যবৎসু চৌদাসীন্যমেব ভাবয়েন্নানুমোদনং ন বা
দ্বেষম্ | সূত্রে সুখদুঃখাদিশব্দৈস্তদ্বন্তঃ প্রতিপাদিতাঃ | তদেবং
মৈত্র্যাদিপরিকর্মণা চিত্তে প্রসীদতি সুখেন সমাধেরাবির্ভাবো ভবতি |
পরিকর্ম চৈতদ্বাহ্যং কর্ম | যথা গণিতে মিশ্রকাদিব্যবহারো
গণিতনিষ্পত্তয়ে সঙ্কলিতাদিকর্মোপকারকৎবেন প্রধানকর্মনিষ্পত্তয়ে
ভবত্যেবং দ্বেষরাগাদিপ্রতিপক্ষভূতমৈত্র্যাদিভাবনয়া
সমুৎপাদিতপ্রসাদং চিত্তং সম্প্রজ্ঞাতাদিসমাধিয়োগ্যং সম্পদ্যতে |
রাগদ্বেষাবেব মুখ্যতয়া বিক্ষেপমুৎপাদয়তঃ | তৌ চেৎ
সমূলমুন্মূলিতৌ স্যাতাং তদা প্রসন্নৎবান্মনসো ভবত্যেকাগ্রতা || ৩৩||
উপায়ান্তরমাহ —

প্রচ্ছর্দনবিধারণাভ্যাং বা প্রাণস্য || সমাধি ৩৪||

বৃত্তিঃ —প্রচ্ছর্দনং কৌষ্ট্যস্য বায়োঃ
প্রয়ত্নবিশেষান্মাত্রাপ্রমাণেন বহির্নিঃসারণম্ | মাত্রাপ্রমাণেনৈব
প্রাণস্য বায়োর্বহির্গতিবিচ্ছেদো বিধারণা | সা চ দ্বাভ্যাং প্রকারাভ্যাং
বাহ্যস্যাভ্যন্তরাপূরণেন পূরিতস্য বা তত্রৈব নিরোধেন | তদেবং
রেচকপূরককুম্ভকস্ত্রিবিধঃ প্রাণায়ামশ্চিত্তস্য স্থিতিমেকাগ্রতায়াং
নিবধ্নাতি সর্বাসামিন্দ্রিয়বৃত্তীনাং প্রাণবৃত্তিপূর্বকৎবাৎ |
মনঃপ্রাণয়োশ্চ স্বব্যাপারপরস্পরমেকয়োগক্ষেমৎবাজ্জীয়মাণঃ প্রাণঃ
সমস্তেন্দ্রিয়বৃত্তিনিরোধদ্বারেণ চিত্তস্যৈকাগ্রতায়াং প্রভবতি |
সমস্তদোষক্ষয়কারিৎবং চাস্যাগমে শ্রূয়তে | দোষকৃতাশ্চ
সর্বা বিক্ষেপবৃত্তয়ঃ | অতো দোষনির্হরণদ্বারেণাপ্যস্যৈকাগ্রতায়াং
সামর্থ্যম্ || ৩৪||
ইদানিমুপায়ান্তরপ্রদর্শনোপক্ষেপেণ সম্প্রজ্ঞাতস্য সমাধেঃ পূর্বাঙ্গং
কথয়তি —

বিষয়বতী বা প্রবৃতিরুৎপন্না স্থিতিনিবন্ধিনী || সমাধি ৩৫||

বৃত্তিঃ —মনস ইতি বাক্যশেষঃ | বিষয়া
গন্ধরসরূপস্পর্শশব্দাস্তে বিদ্যন্তে ফলৎবেন যস্যাঃ সা
বিষয়বতী প্রবৃত্তির্মনসঃ স্থৈর্যং করোতি | তথাহি নাসাগ্রে
চিত্তং ধারয়তো দিব্যগন্ধসংবিদুপজায়তে | তাদৃশ্য এব জিহ্বাগ্রে
রসসম্বিৎ | তাল্বগ্রে রূপসংবিৎ | জিহ্বামধ্যে স্পর্শসংবিৎ | জিহ্বামূলে
শব্দসংবিৎ | তদেবং তত্তদিন্দ্রিয়দ্বারেণ তস্মিংস্তস্মিন্বিষয়ে দিব্যে
জায়মানা সংবিচ্চিত্তস্যৈকাগ্রতায়া হেতুর্ভবতি | অস্তি যোগস্য ফলমিতি
যোগিনঃ সমাশ্বাসোৎপাদনাৎ || ৩৫||
এবম্বিধমেবোপায়ান্তরমাহ —

বিশোকা বা জ্যোতিষ্মতী || সমাধি ৩৬||

বৃত্তিঃ —প্রবৃত্তিরুৎপন্না চিত্তস্য স্থিতিনিবন্ধিনীতি
বাক্যশেষঃ | জ্যোতিঃশব্দেন সাত্ত্বিকঃ প্রকাশ উচ্যতে | স প্রশস্তো
ভূয়ানতিশয়বাংশ্চ বিদ্যতে যস্যাঃ সা জ্যোতিষ্মতী প্রবৃত্তিঃ | বিশোকা
বিগতঃ সুখময়সত্ত্বাভ্যাসবশাচ্ছোকো রজঃপরিণামো যস্যাঃ সা বিশোকা
চেতসঃ স্থিতিনিবন্ধিনী | অয়মর্থঃ —হৃৎপদ্মসম্পূটমধ্যে
প্রশান্তকল্লোলক্ষীরোদধিপ্রখ্যং চিত্তস্য সত্ত্বং ভাবয়তঃ
প্রজ্ঞালোকাৎ সর্ববৃত্তিক্ষয়ে চেতসঃ স্থৈর্যমুৎপদ্যতে || ৩৬||
উপায়ান্তরপ্রদর্শনদ্বারেণ সম্প্রজ্ঞাতসমাধের্বিষয়ং দর্শয়তি

বীতরাগবিষয়ং বা চিত্তম্ || সমাধি ৩৭||

বৃত্তিঃ —মনসঃ স্থিতিনিবন্ধনং ভবতীতি শেষঃ | বীতরাগঃ
পরিত্যক্তবিষয়াভিলাষস্তস্য যচ্চিত্তং পরিহৃতক্লেশং
তদালম্বনীকৃতং চেতসঃ স্থিতিহেতুর্ভবতি || ৩৭||
এবংবিধমুপায়ান্তরমাহ —

স্বপ্ননিদ্রাজ্ঞানালম্বনং বা || সমাধি ৩৮||

বৃত্তিঃ —প্রত্যস্তমিতবাহ্যেন্দ্রিয়বৃত্তের্মনোমাত্রেণৈব যত্র
ভোক্তৃৎবমাত্মনঃ স স্বপ্নঃ | নিদ্রা পূর্বোক্তলক্ষণা | তদালম্বনং
স্বপ্নালম্বনং নিদ্রালম্বনং বা জ্ঞানমালম্ব্যমানং চেতসঃ স্থিতিং
করোতি || ৩৮||
নানারুচিৎবাৎ প্রাণিনাং যস্মিন্ কস্মিংশ্চিদ্বস্তুনি যোগিনঃ শ্রদ্ধা
ভবতি | তস্য ধ্যানেনাপীষ্টসিদ্ধিরিতি প্রতিপাদয়িতুমাহ —

যথাভিমতধ্যানাদ্বা || সমাধি ৩৯||

বৃত্তিঃ —যথাভিপ্রেতে বস্তুনি বাহ্যে চন্দ্রাদাবভ্যন্তরে
নাডিচক্রাদৌ বা ভাব্যমানে চেতঃ স্থিরীভবতি || ৩৯||
এবমুপায়ান্ প্রদর্শ্য ফলদর্শনায়াহ —

পরমাণুপরমমহত্ত্বান্তোঽস্য বশীকারঃ || সমাধি ৪০||

বৃত্তিঃ —এভিরুপায়ৈশ্চিত্তস্য স্থৈর্যং ভাবয়তো যোগিনঃ
সূক্ষ্মবিষয়ভাবনাদ্বারেণ পরমাণ্বন্তো বশীকারোঽপ্রতিঘাতরূপো জায়তে |
ন ক্বচিৎ পরমাণুপর্যন্তে সূক্ষ্মে বিষয়েঽস্য মনঃ প্রতিহন্যতে
ইত্যর্থঃ | এবং স্থূলমাকাশাদিপরমমহৎবপর্যন্তং ভাবয়তো ন
ক্বচিচ্চেতসঃ প্রতিঘাত উৎপদ্যতে সর্বত্র স্বাতন্ত্র্যং ভবতীত্যর্থঃ || ৪০||
এবমেভিরুপায়ৈঃ সংস্কৃতস্য চেতসঃ কীদৃগ্রূপং ভবতীত্যাহ —

ক্ষীণবৃত্তেরভিজাতস্যেব মণের্গ্রহীতৃগ্রহণগ্রাহ্যেষু
তৎস্থতদঞ্জনতা সমাপত্তিঃ || সমাধি ৪১||

বৃত্তিঃ —ক্ষীণা বৃত্তয়ো যস্য স ক্ষীণবৃত্তিস্তস্য
গ্রহীতৃগ্রহণগ্রাহ্যেষ্বাত্মেন্দ্রিয়বিষয়েষু তৎস্থতদঞ্জনতা
সমাপত্তির্ভবতি | তৎস্থৎবং তত্রৈকাগ্রতা | তদঞ্জনতা
তন্ময়ৎবম্ | ক্ষীণভূতে চিত্তে বিষয়স্য ভাব্যমানস্যৈবোৎকর্ষঃ |
তথাবিধা সমাপত্তিস্তদ্রূপঃ পরিণামো ভবতীত্যর্থঃ |
দৃষ্টান্তমাহাঽভিজাতস্যেব মণেরিতি | যথাঽভিজাতস্য
নির্মলস্ফটিকমণেস্তত্তদুপাধিবশাৎ তত্তদ্রূপাপত্তিরেবং নির্মলস্য
চিত্তস্য তত্তদ্ভাবনীয়বস্তূপরাগাত্তত্তদ্রূপাপত্তিঃ |
যদ্যপি গ্রহীতৃগ্রহণগ্রাহ্যেষু ইত্যুক্তং তথাপি
ভূমিকাক্রমবশাদ্গ্রাহ্যগ্রহণগ্রহীতৃষু ইতি বোধ্যম্ | যতঃ প্রথমং
গ্রাহ্যনিষ্ঠ এব সমাধিস্ততো গ্রহণনিষ্ঠস্ততোঽস্মিতামাত্ররূপো
গ্রহীতৃনিষ্ঠঃ কেবলস্য পুরুষস্য গ্রহীতুর্ভাব্যৎবাসম্ভবাৎ |
ততশ্চ স্থূলসূক্ষ্মগ্রাহ্যোপরক্তং চিত্তং তত্র সমাপন্নং ভবতি |
এবং গ্রহণে গ্রহীতরি চ সমাপন্নং বোধ্যব্যম্ || ৪১||
ইদানীমুক্তায়া এব সমাপত্তেশ্চাতুর্বিধ্যমাহ —

শব্দার্থজ্ঞানবিকল্পৈঃ সঙ্কীর্ণা সবিতর্কা সমাপত্তিঃ || সমাধি ৪২||

বৃত্তিঃ —শ্রোত্রেন্দিয়গ্রাহ্যঃ স্ফোটরূপো বা শব্দঃ | অর্থো জাত্যাদিঃ |
জ্ঞানং সত্ত্বপ্রধানা বুদ্ধিবৃত্তিঃ | বিকল্প উক্তলক্ষণঃ | তৈঃ
সঙ্কীর্ণাঃ | যস্যামেতে শব্দাদয়স্ত্রয়ঃ পরস্পরাধ্যাসেন বিকল্পরূপেণ
প্রতিভাসন্তে গৌরিতি শব্দো গৌরিত্যর্থো গৌরিতি জ্ঞানমিত্যনেনাকারেণ
সা সবিতর্কা সমাপত্তিরুচ্যতে || ৪২||
উক্তলক্ষণবিপরীতাং নির্বিতর্কামাহ —

স্মৃতিপরিশুদ্ধৌ স্বরূপশূন্যেবাঽর্থমাত্রনির্ভাসা নির্বিতর্কা || সমাধি ৪৩||

বৃত্তিঃ —শব্দার্থস্মৃতিপ্রবিলয়ে সতি
প্রত্যুদিতস্পষ্টগ্রাহ্যাকারপ্রতিভাসতয়া ন্যগ্ভূতজ্ঞানাংশৎবেন
স্বরূপশূন্যেব নির্বিতর্কা সমাপত্তিঃ || ৪৩||
ভেদান্তরং প্রতিপাদয়িতুমাহ —

এতয়ৈব সবিচারা নির্বিচারা চ সূক্ষ্মবিষয়া ব্যাখ্যাতা || সমধি ৪৪||

বৃত্তিঃ —এতয়ৈব সবিতর্কয়া নির্বিতর্কয়া চ সমাপত্যা
সবিচারা নির্বিচারা চ ব্যাখ্যাতা | কীদৃশী | সূক্ষ্মবিষয়া
সূক্ষ্মস্তন্মাত্রেন্দ্রিয়াদির্বিষয়ো যস্যাঃ সা তথোক্তা |
এতেন পূর্বস্যাঃ স্থূলবিষয়ৎবং প্রতিপাদিতং ভবতি |
সা হি মহাভূতেন্দ্রিয়ালম্বনা | শব্দার্থবিষয়ৎবেন
শব্দার্থবিকল্পসহিতৎবেন দেশকালধর্মাদ্যবচ্ছিন্নঃ সূক্ষ্মোঽর্থঃ
প্রতিভাতি যস্যাং সা সবিচারা | দেশকালধর্মাদিরহিতো ধর্মিমাত্রতয়া
সূক্ষ্মার্থস্তন্মাত্রেন্দ্রিয়রূপঃ প্রতিভাতি যস্যাং সা নির্বিচারা || ৪৪||
অস্যা এব সূক্ষ্মবিষয়ায়াঃ কিম্পর্যন্তঃ সূক্ষ্মবিষয় ইত্যাহ —

সূক্ষ্মবিষয়ৎবং চালিঙ্গপর্যবসানম্ || সমাধি ৪৫||

বৃত্তিঃ —সবিচারনির্বিচারয়োঃ সমাপত্ত্যোর্যৎ
সূক্ষ্মবিষয়ৎবমুক্তং তদলিঙ্গপর্যবসানম্ | ন ক্বচিল্লীয়তে
ন বা কিঞ্চিল্লিঙ্গতি গময়তীত্যলিঙ্গং প্রধানম্ | তৎপর্যন্তং
সূক্ষ্মবিষয়ৎবম্ | তথাহি —গুণানাং পরিণামে চৎবারি পর্বাণি
—বিশিষ্টলিঙ্গমবিশিষ্টলিঙ্গং লিঙ্গমাত্রমলিঙ্গং চেতি |
বিশিষ্টলিঙ্গং ভূতেন্দ্রিয়াণি | অবিশিষ্টলিঙ্গাং তন্মাত্রান্তঃকরণানি |
লিঙ্গমাত্রং বুদ্ধিঃ | অলিঙ্গম্ প্রধানমিতি | নাতঃ পরং
সূক্ষ্মমস্তীত্যুক্তং ভবতি || ৪৫||

এতাসাং সমাপত্তীনাং প্রকৃতে প্রয়োজনমাহ —

তা এব সবীজঃ সমাধিঃ || সমাধি ৪৬||

বৃত্তিঃ —তা এবোক্তলক্ষনাঃ সমাপত্তয়ঃ সবীজঃ সহ
বীজেনালম্বনেন বর্তত ইতি সবীজঃ সম্প্রজ্ঞাতঃ সমাধিরুচ্যতে সর্বাসাং
সালম্বনৎবাৎ || ৪৬||
অথেতরাসাং সমাপত্তীনাং নির্বিচারফলৎবান্নির্বিচারায়াঃ ফলমাহ —

নির্বিচারবৈশারদ্যেঽধ্যাত্মপ্রসাদঃ || সমাধি ৪৭||

বৃত্তিঃ —নির্বিচারৎবং ব্যাখ্যাতম্ (১.৪৪). বৈশারদ্যং
নৈর্মল্যম্ | সবিতর্কাং স্থূলবিষয়ামপেক্ষ্য নির্বিতর্কায়াঃ প্রাধান্যম্ |
ততোঽপি সূক্ষ্মবিষয়ায়াঃ সবিচারায়াঃ | ততোঽপি নির্বিচারায়াঃ |
তস্যাস্তু নির্বিকল্পরূপায়াঃ প্রকৃষ্টাভ্যাসবশাদ্বৈশারদ্যে
নৈর্মল্যে সত্যধ্যাত্মপ্রসাদঃ সমুপজায়তে | চিত্তং ক্লেশবাসনারহিতং
স্থিতিপ্রবাহয়োগ্যং ভবতি | এতদেব চিত্তস্য বৈশারদ্যং যৎ স্থিতৌ
দার্ঢ্যম্ || ৪৭, ,
তস্মিন্ সতি কিং ভবতীত্যাহ —

ঋতম্ভরা তত্র প্রজ্ঞা || সমধি ৪৮||

বৃত্তিঃ —ঋতং সত্যং বিভর্তি কদাচিদপি ন
বিপর্যয়েণাচ্ছাদ্যতে সা ঋতম্ভরা প্রজ্ঞা তস্মিন্ ভবতীত্যর্থঃ |
তস্মাচ্চ প্রজ্ঞালোকাৎ সর্বং যথাবৎ পশ্যন্ যোগী প্রকৃষ্টং
যোগং প্রাপ্নোতি || ৪৮||
অস্যাঃ প্রজ্ঞান্তরাদ্বৈলক্ষণ্যমাহ —

শ্রুতানুমানপ্রজ্ঞাভ্যামন্যবিষয়া বিশেষার্থৎবাৎ || সমাধি ৪৯||
[প্রজ্ঞাভ্যাং সামান্যবিষয়া ইতি পাঠোঽপি দৃশ্যতে | ]

বৃত্তিঃ —শ্রুতমাগমজ্ঞানম্ | অনুমানমুক্তলক্ষণম্
(১.৭). তাভ্যাং যা জায়তে প্রজ্ঞা সা সামান্যবিষয়া | ন
হি শব্দলিঙ্গয়োরিন্দ্রিয়বদ্বিশেষপ্রতিপত্তৌ সামর্থ্যম্ |
ইয়ং পুনঃ নির্বিচারবৈশারদ্যসমুদ্ভবা প্রজ্ঞা
তাভ্যাং বিলক্ষণা বিশেষবিষয়ৎবাৎ | অস্যাং হি প্রজ্ঞায়াং
সূক্ষ্মব্যবহিতবিপ্রকৃষ্টানামপি বিশেষঃ স্ফুটেনৈব রূপেণ ভাসতে |
অতস্তস্যামেব যোগিনা পরঃ প্রয়ত্নঃ কর্তব্য ইত্যুপদিষ্টং ভবতি || ৪৯||
অস্যাঃ প্রজ্ঞায়াঃ ফলমাহ —

তজ্জঃ সংস্কারোঽন্যসংস্কারপ্রতিবন্ধী || সমাধি ৫০||

বৃত্তিঃ —তয়া প্রজ্ঞয়া জনিতো যঃ সংস্কারঃ সোঽন্যান্
সংস্কারান্ ব্যুত্থানজান্ সমাধিজাংশ্চ সংস্কারান্ প্রতিবধ্নাতি
স্বকার্যকরণাক্ষমান্ করোতীত্যর্থঃ | যতস্তত্ত্বরূপতয়াঽনয়া
জনিতাঃ সংস্কারা বলবৎবাদতত্ত্বরূপপ্রজ্ঞাজনিতান্ সংস্কারান্ বাধিতুং
শক্নুবন্তি | অতস্তামেব প্রজ্ঞামভ্যসেদিত্যুক্তং ভবতি || ৫০||
এবং সম্প্রজ্ঞাতসমাধিমভিধায়াসম্প্রজ্ঞাতং বক্তুমাহ —

তস্যাপি নিরোধে সর্বনিরোধান্নির্বীজঃ সমাধিঃ || সমাধি ৫১||

বৃত্তিঃ —তস্যাপি সম্প্রজ্ঞাতস্য নিরোধে বিলয়ে সতি সর্বাসাং
চিত্তবৃত্তীনাং কারণে প্রবিলয়াদ্যা সংস্কারমাত্রাদ্বৃত্তিরুদেতি তস্যাং
নেতি নেতি কেবলং পর্যুদসনান্নির্বীজঃ সমাধির্ভবতি যস্মিন্ সতি
পুরুষঃ স্বরূপনিষ্ঠঃ শুদ্ধো ভবতি || ৫১||

তদত্রাধিকৃতস্য যোগস্য লক্ষণং চিত্তবৃত্তিনিরোধপদানাং
ব্যাখ্যানমভ্যাসবৈরাগ্যলক্ষণস্যোপায়দ্বয়স্য স্বরূপং
ভেদং চাভিধায় সম্প্রজ্ঞাতাসম্প্রজ্ঞাতভেদেন যোগস্য
মুখ্যামুখ্যভেদমুক্ত্বা যোগাভ্যাসপ্রদর্শনপূর্বকং
বিস্তারেণোপায়ান্ প্রদর্শ্য সুগমোপায়প্রদর্শনপরতয়া ঈশ্বরস্য
স্বরূপপ্রমাণপ্রভাববাচকোপাসনানি তৎফলানি চ নির্ণীয়
চিত্তবিক্ষেপাংস্তত্তৎসহভুবশ্চ দুঃখাদীন্ বিস্তরেণ
চ তৎপ্রতিষেধোপায়ানেকৎবাভ্যাসমৈত্র্যাদিপ্রাণায়ামাদীন্
সম্প্রজ্ঞাতাসম্প্রজ্ঞাতপূর্বাঙ্গভূতবিষয়বতী
প্রবৃত্তিরিত্যাদীনাখ্যায়োপসংহারদ্বারেণ চ সমাপত্তিং
লক্ষণফলসহিতাং স্বস্ববিষয়সহিতাং চোক্ত্বা
সম্প্রজ্ঞাতাসম্প্রজ্ঞাতয়োরুপসংহারমভিধায়
সবীজপূর্বকনির্বীজসমাধিরভিহিত ইতি ব্যাকৃতো যোগপাদঃ |

ইতি ধারেশ্বরভোজদেববিরচিতায়াং রাজমার্তণ্ডাভিধায়াং
পাতঞ্জলবৃত্তৌ সমাধিপাদঃ || ১||

ইতি সমাধিপাদঃ || ১||

———————————————

অথ সাধনপাদঃ || ২||

তে তে দুষ্প্রাপয়োগর্দ্ধিসিদ্ধয়ে যেন দর্শিতাঃ |
উপায়াঃ স জগন্নাথস্ত্র্যক্ষোঽস্তু প্রার্থিতাপ্তয়ে ||

তদেবং প্রথমে পাদে সমাহিতচিত্তস্য সোপায়ং যোগমভিধায়
ব্যুত্থিতচিত্তস্যাপি কথমুপায়াভ্যাসপূর্বকো যোগঃ স্বাস্থ্যমুপয়াতীতি
তৎসাধনানুষ্ঠানপ্রতিপাদনায় ক্রিয়ায়োগমাহ —

তপঃ স্বাধ্যায়েশ্বরপ্রণিধানানি ক্রিয়ায়োগঃ || সাধন ১||

বৃত্তিঃ —তপঃ শাস্ত্রান্তরোপদিষ্টং কৃচ্ছ্রচান্দ্রায়ণাদি |
স্বাধ্যায়ঃ প্রণবপূর্বাণাং মন্ত্রাণাং জপঃ | ঈশ্বরপ্রনিধানং
সর্বক্রিয়াণাং তস্মিন্ পরমগুরৌ ফলনিরপেক্ষতয়া সমর্পণম্ | এতানি
ক্রিয়ায়োগ ইত্যুচ্যতে || ১||
স কিমর্থমিত্যাহ —

সমাধিভাবনার্থঃ ক্লেশতনূকরণার্থশ্চ || সাধন ২||

বৃত্তিঃ —ক্লেশা বক্ষ্যমাণাস্তেষাং তনূকরণং
স্বকার্যকরণপ্রতিবন্ধঃ | সমাধিরুক্তলক্ষণঃ
(১.১৭). তস্য ভাবনা চেতসি পুনঃপুনর্নিবেশনং
সাঽর্থঃ প্রয়োজনং যস্য স তথোক্তঃ | এতদুক্তং ভবতি —
এতে তপঃপ্রভৃতয়োঽভ্যস্যমানাশ্চিত্তগতানবিদ্যাদীন্ ক্লেশান্
শিথিলীকুর্বন্তঃ সমাধেরুপকারকতাং ভজন্তে | তস্মাৎ প্রথমং
ক্রিয়ায়োগবিধানপরেণ যোগিনা ভবিতব্যমিত্যুপদিষ্টম্ || ২||
ক্লেশতনূকরণার্থ ইত্যুক্তম্ | তত্র কে ক্লেশা ইত্যাহ —

অবিদ্যাঽস্মিতারাগদ্বেষাভিনিবেশাঃ ক্লেশাঃ || সাধন ৩||

বৃত্তিঃ —অবিদ্যাদয়াঃ বক্ষ্যমাণলক্ষণাঃ পঞ্চ | তে
বাধনালক্ষণং পরিতাপমুপজনয়ন্তঃ ক্লেশশব্দবাচ্যা ভবন্তি | তে
হি চেতসি প্রবর্তমানাঃ সংস্কারলক্ষণং গুণপরিণামং দ্রঢয়ন্তি || ৩||
সত্যপি সর্বেষাং তুল্যক্লেশৎবে মূলভূতৎবাদবিদ্যায়াঃ প্রাধান্যং
প্রতিপাদয়িতুমাহ —

অবিদ্যা ক্ষেত্রমুত্তরেষাং প্রসুপ্ততনুবিচ্ছিন্নোদারাণাম্ || সাধন ৪||

বৃত্তিঃ —অবিদ্যা মোহোঽনাত্মন্যাত্মাভিমান ইতি যাবৎ | সা ক্ষেত্রং
প্রসবভূমিরুত্তরেষামস্মিতাদীনাং প্রত্যেকং প্রসুপ্ততন্বাদিভেদেন
চতুর্বিধানাম্ | অতো যত্রাবিদ্যা বিপর্যয়জ্ঞানরূপা শিথিলীভবতি তত্র
ক্লেশানামস্মিতাদীনাং নোদ্ভবো দৃশ্যতে | বিপর্যয়জ্ঞানসদ্ভাবে চ
তেষামুদ্ভবদর্শনাৎ স্থিতমেব মূলৎবমবিদ্যায়াঃ |
প্রসুপ্ততনুবিচ্ছিন্নোদারাণামিতি | তত্র যে ক্লেশাশ্চিত্তভূমৌ
স্থিতাঃ প্রবোধকাভাবে স্বকার্যং নারভন্তে তে প্রসুপ্তা ইত্যুচ্যন্তে |
যথা বালাবস্থায়াং বালস্য হি বাসনারূপাঃ স্থিতা অপি ক্লেশাঃ
প্রবোধকসহকার্যভাবে নাভিব্যজ্যন্তে |
তে তনবো যে স্বস্বপ্রতিপক্ষভাবনয়া
শিথিলীকৃতকার্যসম্পাদনশক্তয়ো বাসনাঽবশেষতয়া
চেতস্যবস্থিতাঃ প্রভূতাং সামগ্রীমন্তরেণ স্বকার্যমারব্ধুমক্ষমা
যথাঽভ্যাসবতো যোগিনঃ |
তে বিচ্ছিন্না যে কেনচিদ্বলবতা ক্লেশেনাভিভূতশক্তয়স্তিষ্ঠন্তি
যথা দ্বেষাবস্থায়াং রাগো রাগাবস্থায়াং বা দ্বেষঃ | ন হ্যনয়োঃ
পরস্পরবিরুদ্ধয়োর্যুগপৎ সম্ভবোঽস্তি |
তে উদারা যে প্রাপ্তসহকারিসন্নিধয়ঃ স্বং স্বং কার্যমভিনির্বর্তয়ন্তি
যথা সদৈব যোগপরিপন্থিনো ব্যুত্থানদশায়াম্ |
এষাং প্রত্যেকং চতুর্বিধানামপি মূলভূতৎবেন
স্থিতাঽপ্যবিদ্যাঽন্বয়িৎবেন প্রতীয়তে | ন হি ক্বচিদপি ক্লেশানাং
বিপর্যয়ান্বয়নিরপেক্ষাণাং স্বরূপমুপলভ্যতে | তস্মাৎ [পা০
তস্যাং চ]মিথ্যাজ্ঞানরূপায়ামবিদ্যায়াং সম্যগ্জ্ঞানেন
নিবর্তিতায়াং দগ্ধবীজকল্পানামেষাং ন ক্বচিৎ প্ররোহোঽস্তি |
অতোঽবিদ্যানিমিত্তৎবমবিদ্যান্বয়শ্চৈতেষাং নিশ্চীয়তে |
অতঃ সর্বেঽপ্যবিদ্যাব্যপদেশভাজঃ | সর্বেষাং চ ক্লেশানাং
চিত্তবিক্ষেপকারিৎবাদ্যোগিনা প্রথমমেব তদুচ্ছেদে যত্নঃ কার্য ইতি || ৪||
অবিদ্যালক্ষণমাহ —

অনিত্যাশুচিদুঃখানাত্মসু নিত্যশুচিসুখাত্মখ্যাতিরবিদ্যা || সাধন ৫||

বৃত্তিঃ —অতস্মিংস্তৎপ্রতিভাসোঽবিদ্যেত্যবিদ্যায়াঃ
সামান্যলক্ষণম্ | তস্যা এব ভেদপ্রতিপাদনম্ —অনিত্যেষু
ঘটাদিষু নিত্যৎবাভিমানোঽবিদ্যেত্যুচ্যতে | এবমশুচিষু কায়াদিষু
শুচিত্যাভিমানো দুঃখেষু বিষয়েষু সুখাভিমানোঽনাত্মশরীর
আত্মাভিমানঃ | এতেনাপুণ্যে পুণ্যভ্রমোঽনর্থেঽর্থভ্রমো ব্যাখ্যাতঃ || ৫||
অস্মিতাং লক্ষয়িতুমাহ —

দৃগ্দর্শনশক্ত্যোরেকাত্মতেবাস্মিতা || সাধন ৬||

বৃত্তিঃ —দৃক্ষক্তিঃ পুরুষঃ |
দর্শনশক্তী রজস্তমোভ্যামনভিভূতঃ সাৎবিকঃ
পরিণামোঽন্তঃকরণরূপঃ | অনয়োর্ভোক্তৃভোগ্যৎবেন
জডাজডৎবেনাত্যন্তভিন্নরূপয়োরেকতাভিমানোঽস্মিতেত্যুচ্যতে |
যথা প্রকৃতির্বস্তুতঃ কর্তৃৎবভোক্তৃৎবরহিতাপি
কর্ত্র্যহমিত্যভিমন্যতে [পা০ যথা প্রকৃতিবতা কর্তৃৎবরহিতেনাপি
কর্তাহমিত্যভিমন্যতে]সোঽযমস্মিতাখ্যো বিপর্যাসঃ ক্লেশঃ || ৬||
রাগস্য লক্ষণমাহ —

সুখানুশয়ী রাগঃ || সাধন ৭||

বৃত্তিঃ —সুখমনুশেত ইতি সুখানুশয়ী | সুখজ্ঞস্য
সুখানুভূতিপূর্বকঃ সুখসাধনেষু তৃষ্ণারূপো গর্ধো রাগসঞ্জ্ঞকঃ
ক্লেশঃ || ৭||
দ্বেষলক্ষণমাহ —

দুঃখানুশয়ী দ্বেষঃ || সাধন ৮||

বৃত্তিঃ —দুঃখমুক্তলক্ষণম্ | তদভিজ্ঞস্য
তদনুস্মৃতিপূর্বকং তৎসাধনেষ্বনভিলষতো যোঽযং নিন্দাত্মকঃ
ক্রোধঃ স দ্বেষলক্ষণঃ ক্লেশঃ || ৮||
অভিনিবেশস্য লক্ষণমাহ —

স্বরসবাহী বিদুষোঽপি তথারূঢোঽভিনিবেশঃ || সাধন ৯||

বৃত্তিঃ —পূর্বজন্মানুভূতমরণদুঃখানুভববাসনাবলাদ্ভয়রূপঃ
সমুপজায়মানঃ শরীরবিষয়াদিভির্মম বিয়োগো মা
ভূদিত্যন্বহমনুবন্ধরূপঃ সর্বস্যৈবাঽঽকৃমের্ব্রহ্মপর্যন্তং
নিমিত্তমন্তরেণ প্রবর্তমানোঽভিনিবেশাখ্যঃ ক্লেশঃ || ৯||
তদেবং ব্যুত্থানস্য ক্লেশাত্মকৎবাদেকাগ্রতাঽভ্যাসকামেন প্রথমং
ক্লেশাঃ পরিহর্তব্যাঃ | ন চাজ্ঞাতানাং তেষাং পরিহারঃ কর্তুং শক্য
ইতি তজ্জ্ঞানায় তেষামুদ্দেশং লক্ষণং ক্ষেত্রং বিভাগং চাভিধায়
স্থূলসূক্ষ্মভেদভিন্নানাং তেষাং প্রহাণোপায়বিভাগমাহ —

তে প্রতিপ্রসবহেয়াঃ সূক্ষ্মাঃ || সাধন ১০||

বৃত্তিঃ —তে সুক্ষ্মাঃ ক্লেশাঃ যে বাসনারূপেণৈব
স্থিতাঃ স্ববৃত্তিরূপং পরিণামং নারভন্তে | তে প্রতিপ্রসবেন
প্রতিলোমপরিণামেন হেয়াস্ত্যক্তব্যাঃ | স্বকারণেঽস্মিতায়াং কৃতার্থং
সবাসনং চিত্তং যদা প্রবিষ্টং ভবতি তদা কুতস্তেষাং নির্মূলানাং
সম্ভবঃ || ১০||
স্থূলানাং হানোপায়মাহ —

ধ্যানহেয়াস্তদ্বৃত্তয়ঃ || সাধন ১১||

বৃত্তিঃ —তেষাং ক্লেশানামারব্ধকার্যাণাং যাঃ সুখদুঃখমোহাত্মিকা
বৃত্তয়স্তা ধ্যানহেয়াঃ | ধ্যানেনৈব চিত্তৈকাগ্রতালক্ষণেন
হাতব্যা ইত্যর্থঃ | চিত্তপরিকর্মাভ্যাসমাত্রেণৈব স্থূলৎবাৎ
তাসাং নিবৃত্তির্ভবতি | যথা বস্ত্রাদৌ স্থূলো মলঃ
প্রক্ষালনমাত্রেণৈব নিবর্ততে | যস্তত্র সূক্ষ্মাংশঃ স
তৈস্তৈরুপায়ৈরুত্তাপনপ্রভৃতিভিরেব নিবর্তয়িতুং শক্যতে || ১১||
এবং ক্লেশানাং তত্ত্বমভিধায় কর্মাশয়স্য তদভিধাতুমাহ —

ক্লেশমূলঃ কর্মাশয়ো দৃষ্টাদৃষ্টজন্মবেদনীয়ঃ || সাধন ১২||

বৃত্তিঃ —কর্মাশয় ইত্যনেন স্বরূপং তস্যাভিহিতম্ |
অতো বাসনারূপাণ্যেব কর্মাণি | ক্লেশমূল ইত্যনেন
কারণমভিহিতং যতঃ কর্মণাং শুভাশুভানাং ক্লেশা এব
নিমিত্তম্ | দৃষ্টাদৃষ্টজন্মবেদনীয় ইত্যনেন ফলমুক্তম্ |
অস্মিন্নেব জন্মনি অনুভবনীয়ো দৃষ্টজন্মবেদনীয়ঃ |
জন্মান্তরানুভবনীয়োঽদৃষ্টজন্মবেদনীয়ঃ |
তথাহি —কানিচিৎ পুণ্যানি দেবতারাধনাদীনি তীব্রসংবেগেন
কৃতানি ইহৈব জন্মনি জাত্যায়ুর্ভোগলক্ষণং ফলং প্রয়চ্ছন্তি
যথা নন্দীশ্বরস্য ভগবন্মহেশ্বরারাধনবলাদিহৈব জন্মনি
জাত্যাদয়ো বিশিষ্টাঃ প্রাদুর্ভূতাঃ | এবমন্বেষাং বিশ্বামিত্রাদীনাং
তপঃপ্রভাবাজ্জাত্যায়ুষী | কেষাঞ্চিজ্জাতিরেব যথা তীব্রসংবেগেন
দুষ্টকর্মকৃতাং নহুষাদীনাং জাত্যন্তরাদিপরিণামঃ | উর্বশ্যাশ্চ
কার্তিকেয়বনে লতারূপতয়া | এবং ব্যস্তসমস্তৎবেন যথায়োগ্যং যোজ্যমিতি || ১২||
ইদানীং কর্মাশয়স্য স্বভেদভিন্নং ফলমাহ —

সতি মূলে তদ্বিপাকো জাত্যায়ুর্ভোগাঃ || সাধন ১৩||

বৃত্তিঃ —মূলমুক্তলক্ষণাঃ ক্লেশাঃ | তেষ্বনভিভূতেষু সৎসু
কর্মণাং কুশলাকুশলরূউপাণাং বিপাকঃ ফলং জাত্যায়ুর্ভোগা ভবন্তি |
জাতির্মনুষ্যাদিঃ | আয়ুশ্চিরকালমেকশরীরসম্বন্ধঃ | ভোগা
বিষয়া ইন্দ্রিয়াণি সুখসংবিদ্দুঃখসংবিচ্চ সুখদুঃখাদীনি
কর্মকরণভাববোধনব্যুৎপত্যা ভোগশব্দস্য | ইদমত্র
তাৎপর্যম্ —চিত্তভূমাবনাদিকালসঞ্চিতাঃ কর্মবাসনা
যথা যথা পাকমুপয়ান্তি তথা তথা গুণপ্রধানভাবেন স্থিতা
জাত্যায়ুর্ভোগলক্ষণং স্বকার্যমারভন্তে || ১৩||
উক্তানাং কর্মফলৎবেন জাত্যাদীনাং স্বকারণকর্মানুসারিণাং
কার্যকর্তৃৎবমাহ —

তে হ্লাদপরিতাপফলাঃ পুণ্যাপুণ্যহেতুৎবাৎ || সাধন ১৪||

বৃত্তিঃ —হ্লাদঃ সুখম্ং পরিতাপো দুঃখং তৌ ফলং যেষাং তে
তথোক্তাঃ | পুণ্যং কুশলং কর্ম তদ্বিপরীতমপুণ্যং তে কর্মণী কারণং
যেষাং তেষাং ভাবস্তস্মাৎ | এতদুক্তং ভবতি —পুণ্যকর্মারব্ধা
জাত্যায়ুর্ভোগা হ্লাদফলাঃ | অপুণ্যকর্মারব্ধাস্তু পরিতাপফলাঃ | এতচ্চ
প্রাণিমাত্রাপেক্ষয়া দ্বৈবিধ্যম্ || ১৪||
যোগিনস্তৎসর্বং দুঃখমিত্যাহ —

পরিণামতাপসংস্কারদুঃখৈর্গুণবৃত্তিবিরোধাচ্চ দুঃখমেব সর্বং
বিবেকিনঃ || সাধন ১৫||

বৃত্তিঃ —বিবেকিনঃ পরিজ্ঞাতক্লেশাদিবিবেকস্য
দৃশ্যমাত্রং সকলমেব ভোগসাধনং সবিষং
স্বাদ্বন্নমিব দুঃখমেব প্রতিকূলবেদনীয়মেবেত্যর্থঃ |
যস্মাদত্যন্তাভিজাতো যোগী দুঃখলেশেনাপ্যুদ্বিজতে | যথা —
অক্ষিপাত্রমূর্ণাতন্তুস্পর্শমাত্রেণৈব মহতীং পীডামনুভবতি
নেতরদঙ্গং তথা বিবেকী স্বল্পদুঃখানুবন্ধেনাপ্যুদ্বিজতে |
কথমিত্যাহ —পরিণামতাপসংস্কারদুঃখৈঃ |
বিষয়াণামুপভুজ্যমানানাং যথায়থং
গর্ধাভিবৃদ্ধেস্তদপ্রাপ্তিকৃতস্য সুখদুঃখস্যাপরিহার্যতয়া
দুঃখান্তরসাধনৎবান্নাস্ত্যেব সুখরূপতেতি পরিণামদুঃখৎবম্ |
উপগৃহ্যমাণেষু সুখসাধনেষু তৎপ্রতিপন্থিনং প্রতি দ্বেষস্য
সর্বদৈবাবস্থিতৎবাৎ সুখানুভবকালেঽপি তাপদুঃখং দুষ্পরিহরমিতি
তাপদুঃখতা |
সংস্কারদুঃখং তু স্বাভিমতানভিমতবিষয়সন্নিধানে
সুখসংবিদ্দুঃখসংবিচ্চোপজায়মানা তথাবিধমেব স্বক্ষেত্রে
সংস্কারমারভতে | সংস্কারাচ্চ পুনস্তথাবিধসংবিদনুভব
ইত্যপরিমিতসংস্কারোৎপত্তিদ্বারেণ সর্বস্যৈব দুঃখানুবেধাদ্দুঃখৎবম্ |
এবমুক্তং ভবতি —ক্লেশকর্মাশয়বিপাকসংস্কারানুচ্ছেদাৎ
সর্বস্যৈব দুঃখৎবম্ |
গুণবৃত্তিবিরোধাচ্চেতি | গুণানাং সৎবরজস্তমসাং যা বৃত্তয়ঃ
সুখদুঃখমোহরূপাঃ পরস্পরমভিভাব্যাভিভাবকৎবেন বিরুদ্ধা জায়ন্তে |
তাসাং সর্বত্রৈব দুঃখানুবেধাদ্ দুঃখৎবম্ |
এতদুক্তং ভবতি —ঐকান্তিকীমাত্যন্তিকীং চ দুঃখনিবৃত্তিমিচ্ছতো
বিবেকিন উক্তরূপকারণচতুষ্টয়াঃ সর্বে বিষয়া দুঃখরূপতয়া
প্রতিভান্তি | তস্মাচ্চ সর্বকর্মবিপাকো দুঃখরূপ এবেত্যুক্তং ভবতি || ১৫||
তদেবমুক্তস্য ক্লেশকর্মাশয়বিপাকরাশেরবিদ্যাপ্রভবৎবাদবিদ্যায়াশ্চ
মিথ্যাজ্ঞানরূপতয়া সম্যগ্জ্ঞানোচ্ছেদ্যৎবাৎ সম্যগ্জ্ঞানস্য চ
সসাধনহেয়োপাদেয়াবধারণরূপৎবাৎ তদভিধানমাহ —

হেয়ং দুঃখমনাগতম্ || সাধন ১৬||

বৃত্তিঃ —ভূতস্যাতিক্রান্তৎবাদনুভূয়মানস্য
ত্যক্তুমশক্যৎবাদনাগতমেব সংসারদুঃখং হাতব্যমিত্যুক্তং ভবতি || ১৬||
হেয়হেতুমাহ —

দ্রষ্টৃদৃশ্যয়োঃ সংযোগো হেয়হেতুঃ || সাধন ১৭||

বৃত্তিঃ —দ্রষ্টা চিদ্রূপঃ পুরুষঃ | দৃশ্যং বুদ্ধিসত্ত্বং |
তয়োরবিবেকখ্যাতিপূর্বকো যোঽসৌ সংযোগো ভোক্তৃভোগ্যৎবেন
সন্নিধানং স হেয়স্য দুঃখস্য গুণপরিণামরূপস্য সংসারস্য হেতুঃ
কারণম্ | তন্নিবৃত্যা সংসারনিবৃত্তির্ভবতীত্যর্থঃ || ১৭||
দ্রষ্টৃদৃশ্যয়োঃ সংযোগ ইত্যুক্তম্ | তত্র দৃশ্যস্য স্বরূপং কার্যং
প্রয়োজনং চাহ —

প্রকাশক্রিয়াস্থিতিশীলং ভূতেন্দ্রিয়াত্মকং ভোগাপবর্গার্থং দৃশ্যম্ || সাধন ১৮||

বৃত্তিঃ —প্রকাশঃ সত্ত্বস্য ধর্মঃ | ক্রিয়া প্রবৃত্তিরূপা
রজসঃ | স্থিতির্নিয়মরূপা তমসঃ | তাঃ প্রকাশক্রিয়াস্থিতয়ঃ শীলং
স্বাভাবিকং রূপং যস্য তত্তথাবিধমিতি স্বরূপমস্য নির্দিষ্টম্ |
ভূতেন্দ্রিয়াত্মকমিতি | ভূতানি স্থূলসূক্ষ্মভেদেন
দ্বিবিধানি পৃথিব্যাদীনি গন্ধতন্মাত্রাদীনি চ | ইন্দ্রিয়াণি
বুদ্ধীন্দ্রিয়কর্মেন্দ্রিয়ান্তঃকরণভেদেন ত্রিবিধানি |
উভয়মেতদ্গ্রাহ্যগ্রহণরূপাত্মা স্বরূপাভিন্নঃ পরিণামো যস্য
তত্তথাবিধমিত্যনেনাস্য কার্যমুক্তম্ | ভোগঃ কথিতলক্ষণঃ | অপবর্গো
বিবেকখ্যাতিপূর্বিকা সংসারনিবৃত্তিঃ | তৌ ভোগাপবর্গবর্থঃ প্রয়োজনং
যস্য তত্তথাবিধং দৃশ্যমিত্যর্থঃ || ১৮||
তস্য দৃশ্যস্য নানাবস্থারূপপরিণামাত্মকস্য হেয়ৎবেন জ্ঞাতব্যৎবাৎ
তদবস্থাঃ কথয়িতুমাহ —

বিশেষাবিশেষলিঙ্গমাত্রালিঙ্গানি গুণপর্বাণি || সাধন ১৯||

বৃত্তিঃ —গুণানাং পর্বাণ্যবস্থাবিশেষাশ্চৎবারো জ্ঞাতব্যা
ইত্যুপদিষ্টং ভবতি | তত্র বিশেষা মহাভূতেন্দ্রিয়াণি |
অবিশেষাস্তন্মাত্রান্তঃকরণানি | লিঙ্গমাত্রং বুদ্ধিঃ |
অলিঙ্গমব্যক্তমিত্যুক্তম্ | সর্বত্র ত্রিগুণরূপস্যাব্যক্তস্যান্বয়িৎবেন
প্রত্যভিজ্ঞানাদবশ্যং জ্ঞাতব্যৎবেন যোগকালে চৎবারি পর্বাণি
নির্দিষ্টানি || ১৯||
এবং হেয়ৎবেন দৃশ্যস্য প্রথমং জ্ঞাতব্যৎবাৎ তদবস্থাসহিতং
ব্যাখ্যায়োপাদেয়ং দ্রষ্টারং ব্যাখ্যাতুমাহ —

দ্রষ্টা দৃশিমাত্রঃ শুদ্ধোঽপি প্রত্যয়ানুপশ্যঃ || সাধন ২০||

বৃত্তিঃ —দ্রষ্টা পুরুষো দৃশিমাত্রশ্চেতনামাত্রম্ |
মাত্রগ্রহণং ধর্মধর্মিনিরাসার্থম্ | কেচিদ্ধি চেতনামাত্মনো
ধর্মমিচ্ছন্তি | স শুদ্ধোঽপি পরিণামিৎবাদ্যভাবেন স্বপ্রতিষ্ঠোঽপি
প্রত্যয়ানুপশ্যঃ | প্রত্যয়া বিষয়োপরক্তানি বিজ্ঞানানি তানি অনু
অব্যবধানেন প্রতিসঙ্ক্রমাদ্যভাবেন পশ্যতি | এতদুক্তং ভবতি
—জাতবিষয়োপরাগায়ামেব বুদ্ধৌ সন্নিধিমাত্রেণৈব পুরুষস্য
দ্রষ্টুৎবমিতি || ২০||
স এব ভোক্তেত্যাহ —

তদর্থ এব দৃশ্যস্যাত্মা || সাধন ২১|| [তদর্থঃ এব ]

বৃত্তিঃ —দৃশ্যস্য প্রাগুক্তলক্ষণস্য য আত্মা যৎ
স্বরূপং তদর্থ এব | তস্য পুরুষার্থভোক্তৃৎবসম্পাদনং নাম
স্বার্থপরিহারেণ প্রোয়োজনম্ | ন হি প্রধানং প্রবর্তমানমাত্মনঃ
কিঞ্চিৎ প্রয়োজনমপেক্ষ্য প্রবর্ততে কিন্তু পুরুষস্য ভোক্তৃৎবং
সম্পাদয়িতুমিতি || ২১||
যদ্যেবং পুরুষ্স্য ভোগসম্পাদনমেব প্রোয়োজনং তদা স্ম্পাদিতে
তস্মিংস্তন্নিষ্প্রয়োজনং বিরতব্যাপারং স্যাৎ | তস্মিংশ্চ পরিণামশূন্যে
শুদ্ধৎবাৎ সর্বে দ্রষ্টারো বন্ধরহিতাঃ স্যুঃ | ততশ্চ সংসারোচ্ছেদ
ইত্যাশঙ্ক্যাহ —

কৃতার্থং প্রতি নষ্টমপ্যন্ষ্টং তদন্যসাধারণৎবাৎ || সাধন ২২||

বৃত্তিঃ —যদ্যপি বিবেকখ্যাতিপর্যন্তাদ্ভোগসম্পাদনাৎ
কমপি কৃতার্থং পুরুষং প্রতি তন্নষ্টং বিরতব্যাপারং তথাপি
সর্বপুরুষসাধারণৎবাদন্যান্ প্রত্যনষ্টব্যাপারমবতিষ্ঠতে | অতঃ
প্রধানস্য সকলভোক্তৃসাধারণৎবান্ন কদাচিদপি বিনাশঃ | একস্য
মুক্তৌ বা ন সর্বমুক্তিপ্রসঙ্গ ইত্যুক্তং ভবতি || ২২||
দৃশ্যদ্রষ্টারৌ ব্যাখ্যায় সংযোগং ব্যাখ্যাতুমাহ —

স্বস্বামিশক্ত্যোঃ স্বরূপোপলব্ধিহেতুঃ সংযোগঃ || সাধন ২৩||

বৃত্তিঃ —কার্যদ্বারেণাস্য লক্ষণং করোতি | স্বশক্তির্দৃশ্যস্য
স্বভাবঃ | স্বামিশক্তির্দ্রষ্টুঃ স্বরূপম্ | তয়োর্দ্বয়োরপি
সংবেদ্যসংবেদকৎবেন ব্যবস্থিতয়োর্যা স্বরূপোপলব্ধিস্তস্যাঃ কারণং
যঃ স সংযোগঃ | স চ সহজো ভোগ্যভোক্তৃভাবস্বরূপানন্যঃ
[পা০ স চ সহজভোগ্যভোক্তৃভাবস্বরূপান্নান্যঃ]| ন হি
তয়োর্নিত্যয়োর্ব্যাপকয়োঃ স্বরূপাদতিরিক্তঃ কশ্চিৎ সংযোগঃ | যদেব
ভোগ্যস্য ভোগ্যৎবং ভোক্তুশ্চ ভোক্তৃৎবমনাদিসিদ্ধং স এব সংযোগঃ || ২৩||
তস্যাপি কারণমাহ —

তস্য হেতুরবিদ্যা || সাধন ২৪||

বৃত্তিঃ —যা পূর্বং বিপর্যাসাত্মিকা মোহরূপাঽবিদ্যা ব্যাখ্যাতা
(২.৪-৫)সা তস্যাবিবেকখ্যাতিরূপস্য সংযোগস্য কারণম্ || ২৪||
হেয়ং হানিক্রিয়াকর্মোচ্যতে | কিং পুনস্তদ্ধানমিত্যাহ —

তদভাবে সংযোগাভাবো হানং তদ্দৃশেঃ কৈবল্যম্ || সাধন ২৫||

বৃত্তিঃ —তস্যা অবিদ্যায়াঃ স্বরূপবিরুদ্ধেন
সম্যগ্জ্ঞানেনোন্মূলিতায়া যোঽযমভাবস্তস্মিন্ সতি তৎকার্যস্য
সংযোগস্যাপ্যভাবস্তদ্ধানমিত্যুচ্যতে | অয়মর্থঃ —
নৈতস্যাঽমূর্তবস্তুনো বিভাগো যুজ্যতে [পা০ নৈতস্য মূর্তদ্রব্যবৎ
পরিত্যাগো যুজ্যতে]কিন্তু জাতায়াং বিবেকখ্যাতববিবেকনিমিত্তঃ সংযোগঃ
স্বয়মেব নিবর্তত ইতি তস্য হানম্ | যদেব চ সংযোগস্য হানং তদেব
নিত্যং কেবলস্যাপি পুরুষস্য কৈবল্যং ব্যপদিশ্যতে || ২৫||
তদেবং দৃশ্যসংযোগস্য স্বরূপং কারণং কার্যং চাভিহিতম্ | অথ
হানোপায়কথনদ্বারেণ উপাদেয়কারণমাহ —

বিবেকখ্যাতিরবিপ্লবা হানোপায়ঃ || সাধন ২৬||

বৃত্তিঃ —অন্যে গুণা অন্যঃ পুরুষ ইত্যেবংবিধস্য বিবেকস্য যা
খ্যাতিঃ প্রখ্যা সাঽস্য হানস্য দৃশ্যদুঃখপরিত্যাগস্যোপায়ঃ
কারণম্ | কীদৃশী | অবিপ্লবা ন বিদ্যতে বিপ্লবো
বিচ্ছেদোঽন্তরাঽন্তরাঽভ্যুত্থানরূপো যস্যাঃ সা অবিপ্লবা |
ইদমত্র তাৎপর্যম্ —প্রতিপক্ষভাবনাবলাদবিদ্যাপ্রলয়ে
বিনিবৃত্তকর্তৃৎবভোক্তৃৎবাভিমানায়া রজস্তমোমলানভিভূতায়া
বুদ্ধেরন্তর্মুখা যা চিচ্ছায়াসঙ্ক্রান্তিঃ সা বিবেকখ্যাতিরুচ্যতে |
তস্যাং চ সন্ততৎবেন প্রবৃত্তায়াং সত্যাং
দৃশ্যস্যাধিকারনিবৃত্তের্ভবত্যেব কৈবল্যম্ || ২৬||
উৎপন্নবিবেকখ্যাতেঃ পুরুষস্য যাদৃশী প্রজ্ঞা ভবতি তাং কথয়ন্
বিবেকখ্যাতেরেব স্বরূপমাহ —

তস্য সপ্তধা প্রান্তভূমৌ প্রজ্ঞা || সাধন ২৭||
[তস্য সপ্তধা প্রান্তভূমিঃ প্রজ্ঞা ইতি বা বহুসম্মতঃ সূত্রপাঠঃ | ]

বৃত্তিঃ —তস্যোৎপন্নবিবেকজ্ঞানস্য জ্ঞাতব্যবিবেকরূপা প্রজ্ঞা
প্রান্তভূমৌ সকলসালম্বনসমাধিপর্যন্তে সপ্তপ্রকারা ভবন্তীত্যর্থঃ
.
তত্র কার্যবিমুক্তিরূপা চতুষ্প্রকারা —১. জ্ঞাতং ময়া
জ্ঞেয়ম্ | জ্ঞাতব্যং ন কিঞ্চিদস্তি | ২. ক্ষীণা মে ক্লেশাঃ | ন
কিঞ্চিৎ ক্ষেতব্যমস্তি | ৩. অধিগতং ময়া জ্ঞানম্ | ৪. প্রাপ্তা ময়া
বিবেকখ্যাতিরিতি | প্রত্যয়ান্তরপরিহারেণ তস্যামবস্থায়ামীদৃশ্যেব
প্রজ্ঞা জায়তে | ঈদৃশী প্রজ্ঞা কার্যবিষয়ং নির্মলং জ্ঞানং
কার্যবিমুক্তিরিত্যুচ্যতে |
চিত্তবিমুক্তিস্ত্রিধা —৫. চরিতার্থা মে বুদ্ধিঃ | গুণা
হৃতাধিকারা গিরিশিখরনিপতিতা ইব গ্রাবাণো ন পুনঃ
স্থিতিং যাস্যন্তি | ৬. স্বকারণে প্রবিলয়াভিমুখানাং গুণানাং
মোহাভিধানমূলকারণাভাবান্নিষ্প্রয়োজনৎবাচ্চামীষাং কুতঃ
প্ররোহো ভবেৎ | ৭. স্বস্থীভূতশ্চ [পা০ সাত্মীভূতশ্চ]
মে সমাধিস্তস্মিন্ সতি স্বরুপপ্রতিষ্ঠোঽহমিতি | ঈদৃশী ত্রিপ্রকারা
চিত্তবিমুক্তিঃ | তদেবমীদৃশ্যাং সপ্তবিধভূমিপ্রজ্ঞায়ামুপজাতায়াং
পুরুষঃ কেবল ইত্যুচ্যতে || ২৭||
বিবেকখ্যাতিঃ সংযোগাভাবহেতুরিত্যুক্তম্ | তস্যাস্তু উৎপত্তৌ কিং
নিমিত্তমিত্যাহ —

যোগাঙ্গানুষ্ঠানাদশুদ্ধিক্ষয়ে জ্ঞানদীপ্তিরাবিবেকখ্যাতেঃ || সাধন
২৮||

বৃত্তিঃ —যোগাঙ্গানি বক্ষ্যমাণানি |
তেষামনুষ্ঠানাজ্জ্ঞানপূর্বকাভ্যাসাদাবিবেকখ্যাতেরশুদ্ধিক্ষয়ে
চিত্তসত্ত্বস্য প্রকাশাবরণরূপক্লেশাত্মকাশুদ্ধিক্ষয়ে যা
জ্ঞানদীপ্তিস্তারতম্যেন সাত্ত্বিকঃ পরিণামো বিবেকখ্যাতিপর্যন্তস্তস্যাঃ
খ্যাতের্হেতুরিত্যর্থঃ || ২৮||
যোগাঙ্গানামনুষ্ঠানাদশুদ্ধিক্ষয় ইত্যুক্তম্ | কানি পুনস্তানি
যোগাঙ্গানীতি তেষামুদ্দেশমাহ —

যমনিয়মাসনপ্রাণায়ামপ্রত্যাহারধারণাধ্যানসমাধয়োঽষ্টাবঙ্গানি || সাধন ২৯||

বৃত্তিঃ —ইহ কানিচিৎ সমাধেঃ সাক্ষাদুপকারকাণি যথা ধারণাদীনি
কানিচিৎ প্রতিপক্ষভূতহিংসাদিবিতর্কোন্মূলনদ্বারেণ সমাধিমুপকুর্বন্তি
যথা যমাদয়ঃ | তত্রাসনাদীনামুত্তরোতরমুপকারকৎবম্ | তদ্যথা —
সত্যাসনজয়ে প্রাণায়ামস্থৈর্যম্ | এবমুত্তরত্রাপি যোজ্যম্ || ২৯||
ক্রমেণৈষাং স্বরূপমাহ —

অহিংসাসত্যাস্তেয়ব্রহ্মচর্যাপরিগ্রহা যমাঃ || সাধন ৩০||

বৃত্তিঃ —তত্র প্রাণবিয়োগপ্রয়োজনব্যাপারো হিংসা | সা চ
সর্বানর্থহেতুঃ | তদভাবোঽহিংসা | হিংসায়াঃ সর্বপ্রকারেণৈব
পরিহার্যৎবাৎ প্রথমং তদভাবরূপায়া অহিংসায়া নির্দেশঃ | সত্যং
বাঙ্মনসোর্যথার্থৎবম্ | স্তেয়ং পরস্বাপহরণং তদভাবোঽস্তেয়ম্ |
ব্রহ্মচর্যমুপস্থসংযমঃ | অপরিগ্রহো ভোগসাধনানামনঙ্গীকারঃ |
ত এতেঽহিংসাদয়ঃ পঞ্চ যমশব্দবাচ্যা যোগাঙ্গৎবেন নির্দিষ্টাঃ || ৩০||
এষাং বিশেষমাহ —

জাতিদেশকালসময়ানবচ্ছিন্নাঃ সার্বভৌমা মহাব্রতম্ || সাধন ৩১||

বৃত্তিঃ —জাতির্ব্রাহ্মণৎবাদিঃ | দেশস্তীর্থাদিঃ |
কালশ্চতুর্দশ্যাদিঃ | সময়ো ব্রাহ্মণপ্রয়োজনাদিঃ |
এতৈশ্চতুর্ভিরনবচ্ছিন্নাঃ পূর্বোক্তা অহিংসাদয়ো যমাঃ সর্বাসু
ক্ষিপ্তাদিষু চিত্তভূমিষু ভবা মহাব্রতমিত্যুচ্যতে | তদ্যথা —
ব্রাহ্মণং ন হনিষ্যামি তীর্থে ন কঞ্চন হনিষ্যামি চতুর্দশ্যাং ন
হনিষ্যামি দেবব্রাহ্মণপ্রয়োজনব্যতিরেকেণ কমপি ন হনিষ্যামীতি | এবং
চতুর্বিধাবচ্ছেদব্যতিরেকেণ কিঞ্চিৎ কদাচিৎ কস্মিংশ্চিদর্থে ন
হনিষ্যামীত্যনবচ্ছিন্নাঃ | এবং সত্যাদিষু যথায়োগং যোজ্যম্ |
ইত্থমনিয়তীকৃতাঃ সামান্যেনৈব প্রবৃত্তা মহাব্রতমিত্যুচ্যতে ন পুনঃ
পরকীয়পরিচ্ছিন্নাবধারণম্ [পা০ ন পুনঃ পরিচ্ছিন্নাবধারণম্ || ৩১||
নিয়মানাহ —

শৌচসন্তোষতপঃস্বাধ্যায়েশ্বরপ্রণিধানানি নিয়মাঃ || সাধন ৩২||

বৃত্তিঃ —শৌচং দ্বিবিধম্ —বাহ্যমাভ্যন্তরং
চ | বাহ্যং মৃজ্জলাদিভিঃ কায়াদিপ্রক্ষালনম্ | আভ্যন্তরং
মৈত্র্যাদিভিশ্চিত্তমলানাং প্রক্ষালনম্ | সন্তোষস্তুষ্টিঃ |
শেষাঃ প্রাগেব (২.১)কৃতব্যাখ্যানাঃ | এতে শৌচাদয়ো
নিয়মশব্দবাচ্যাঃ || ৩২||
কথমেষাং যোগাঙ্গৎবমিত্যাহ —

বিতর্কবাধনে প্রতিপক্ষভাবনম্ || সাধন ৩৩||

বৃত্তিঃ —বিতর্ক্যন্তে ইতি বিতর্কা যোগপরিপন্থিনো হিংসাদয়ঃ |
তেষাং প্রতিপক্ষভাবনে সতি যদা বাধা ভবতি তদা যোগঃ সুকরো
ভবতীতি ভবত্যেব যমনিয়ময়োর্যোগাঙ্গৎবম্ || ৩৩||
ইদানীং বিতর্কাণাং স্বরূপং ভেদপ্রকারং ফলং চ ক্রমেণাহ —

বিতর্কা হিংসাদয়ঃ কৃতকারিতানুমোদিতা লোভক্রোধমোহপূর্বকা
মৃদুমধ্যাধিমাত্রা দুঃখাজ্ঞানানন্তফলা ইতি প্রতিপক্ষভাঅবনম্ || সাধন ৩৪||

বৃত্তিঃ —এতে পূর্বোক্তা হিংসাদয়ঃ প্রথমং ত্রিধা ভিদ্যন্তে
কৃতকারিতানুমোদনভেদেন | তত্র স্বয়ং নিষ্পাদিতাঃ কৃতাঃ | কুরু
কুর্বিতি প্রয়োজকব্যাপারেণ সমুৎপাদিতাঃ কারিতাঃ | অন্যেন ক্রিয়মাণাঃ
সাধ্বিত্যঙ্গীকৃতা অনুমোদিতাঃ | এতচ্চ ত্রৈবিধ্যং পরস্পরং
ব্যামোহনিরাকরণাবধারণায়োচ্যতে | অন্যথা মন্দমতিরেবং মন্যেত ন
ময়া স্বয়ং হিংসা কৃতেতি নাস্তি মে দোষঃ | এতেষাং কারণপ্রতিপাদনায়
লোভক্রোধমোহপূর্বকা ইতি |
যদ্যপি লোভঃ প্রথমং নির্দিষ্টস্তথাঽপি সর্বক্লেশানাং
মোহস্যাঽনাত্মন্যাত্মাভিমানলক্ষণস্য নিদানৎবাৎ তস্মিন্ সতি
স্বপরবিভাগপূর্বকৎবেন লোভক্রোধাদীনামুদ্ভবান্মূলৎবমবসেয়ম্ |
মোহপূর্বিকা সর্বা দোষজাতিরিত্যর্থঃ | লোভস্তৃষ্ণা | ক্রোধঃ
কৃত্যাকৃত্যবিবেকোন্মূলকঃ প্রজ্বলনাত্মকশ্চিত্তধর্মঃ |
প্রত্যেকং কৃতাদিভেদেন ত্রিপ্রকারা অপি হিংসাদয়ো মোহাদিকারণৎবেন
ত্রিধা ভিদ্যন্তে | এষামেব পুনরবস্থাভেদেন ত্রৈবিধ্যমাহ —
মৃদুমধ্যাধিমাত্রাঃ | মৃদবো মন্দাঃ ন তীব্রা নাপি মধ্যাঃ | মধ্যা
নাপি মন্দা নাপি তীব্রাঃ | অধিমাত্রাস্তীব্রাঃ | পাশ্চাত্ত্যা নবভেদাঃ |
ইত্থং ত্রৈবিধ্যে সতি সপ্তবিংশতির্ভবতি | মৃদ্বাদীনামপি প্রত্যেকং
মৃদুমধ্যাধিমাত্রভেদাৎ ত্রৈবিধ্যং সম্ভবতি | তদ্যথায়োগং যোজ্যম্ |
তদ্যথা —মৃদুমৃদুর্মৃদুমধ্যো মৃদুতীব্র ইতি |
এষাং ফলমাহ —দুঃখাজ্ঞানানন্তফলা দুঃখং
প্রতিকূলতয়াঽবভাসমানো রাজসশ্চিত্তধর্মঃ | অজ্ঞানং মিথ্যাজ্ঞানং
সংশয়বিপর্যয়রূপম্ | তে দুঃখাজ্ঞানেঽনন্তমপরিচ্ছিন্নং ফলং
যেষাং তে তথোক্তাঃ | ইত্থং তেষাং স্বরূপকারণাদিভেদেন জ্ঞাতানাং
প্রতিপক্ষভাবনয়া যোগিনা পরিহারঃ কর্তব্য ইত্যুপদিষ্টং ভবতি || ৩৪||
এষামভ্যাসবশাৎ প্রকর্ষমাগচ্ছতামনুনিষ্পাদিন্যঃ সিদ্ধয়ো যথা
ভবন্তি তথা ক্রমেণ প্রতিপাদয়িতুমাহ —

অহিংসাপ্রতিষ্ঠায়াং তৎসন্নিধৌ বৈরত্যাগঃ || সাধন ৩৫||

বৃত্তিঃ —তস্যাঽহিংসাং ভাবয়তঃ সন্নিধৌ
সহজবিরোধিনামপ্যহিনকুলাদীনাং বৈরত্যাগো নির্মৎসরতয়াঽবস্থানং
ভবতি | হিংস্রস্বভাবা অপি হিংসাং ত্যজন্তীত্যর্থঃ [পা০ হিংস্রা
অপি হিংস্রৎবং পরিত্যজন্তীত্যর্থঃ]|| ৩৫||
সত্যাভ্যাসবতঃ কিং ভবতীত্যাহ —

সত্যপ্রতিষ্ঠায়াং ক্রিয়াফলাশ্রয়ৎবম্ || সাধন ৩৬||

বৃত্তিঃ —ক্রিয়মাণা হি ক্রিয়া যাগাদিকাঃ ফলং স্বর্গাদিকং
প্রয়চ্ছন্তি | তস্য তু সত্যাভ্যাসবতো যোগিনস্তথা সত্যং প্রকৃষ্যতে
যথা ক্রিয়ায়ামকৃতায়ামপি যোগী ফলমাপ্নোতি | তদ্বচনাদ্যস্য কস্যচিৎ
ক্রিয়ামকুর্বতোঽপি ক্রিয়াফলং ভবতীত্যর্থঃ || ৩৬||
অস্তেয়াভ্যাসবতঃ ফলমাহ —

অস্তেয়প্রতিষ্ঠায়াং সর্বরত্নোপস্থানম্ || সাধন ৩৭||

বৃত্তিঃ —অস্তেয়ং যদাঽভ্যসতি তদাস্য
তৎপ্রকর্ষান্নিরভিলাষস্যাপি সর্বতো দিব্যানি রত্নান্যুপতিষ্ঠন্তে || ৩৭||
ব্রহ্মচর্যাভ্যাসস্য ফলমাহ —

ব্রহ্মচর্যপ্রতিষ্ঠায়াং বীর্যলাভঃ || সাধন ৩৮||

বৃত্তিঃ —যঃ কিল ব্রহ্মচর্যমভ্যস্যতি তস্য
তৎপ্রকর্ষান্নিরতিশয়ং বীর্যং সামর্থ্যমাবির্ভবতি | বীর্যনিরোধে
হি ব্রহ্মচর্যস্য প্রকর্ষাচ্ছরীরেন্দ্রিয়মনঃসু বীর্যং
প্রকর্ষমাগচ্ছতি || ৩৮||
অপরিগ্রহস্য ফলমাহ —

অপরিগ্রহস্থৈর্যে জন্মকথন্তাসম্বোধঃ || সাধন ৩৯||

বৃত্তিঃ —কথমিত্যস্য ভাবঃ কথন্তা | জন্মনঃ কথন্তা
জন্মকথন্তা | তস্যাঃ সম্বোধঃ সম্যগ্জ্ঞানং জন্মান্তরে কোঽহমাসং
কীদৃশঃ কিঙ্কার্যকারীতি জিজ্ঞাসায়াং সর্বমেব সম্যগ্জানাতীত্যর্থঃ |
ন কেবলং ভোগসাধনপরিগ্রহ এব পরিগ্রহো যাবদাত্মনঃ
শরীরপরিগ্রহোঽপি পরিগ্রহো ভোগসাধনৎবাচ্ছরীরস্য | তস্মিন্ সতি
রাগানুবন্ধাদ্বহির্মুখায়ামেব প্রবৃত্তৌ ন তাত্ত্বিকজ্ঞানপ্রাদুর্ভাবঃ
.
যদা পুনঃ শরীরাদিপরিগ্রহনৈরপেক্ষ্যেণ মাধ্যস্থ্যমবলম্বতে
তদা মধ্যস্থস্য রাগাদিত্যাগাৎ সম্যগ্জ্ঞানহেতুর্ভবত্যেব
পূর্বাপরজন্মসম্বোধঃ || ৩৯||
উক্তা যমানাং সিদ্ধয়ঃ | অথ নিয়মানামাহ —

শৌচাৎস্বাঙ্গজুগুপ্সা পরৈরসংসর্গঃ || সাধন ৪০||

বৃত্তিঃ —যঃ শৌচং ভাবয়তি তস্য স্বাঙ্গেষ্বপি
কারণস্বরূপপর্যালোচনদ্বারেণ জুগুপ্সা ঘৃণা সমুপজায়তে —
অশুচিরয়ং কায়ো নাত্রাগ্রহঃ কার্য ইতি | অমুনৈব হেতুনা পরৈরন্যৈশ্চ
কায়বদ্ভিরসংসর্গঃ সম্পর্কাভাবঃ সংসর্গপরিবর্জনমিত্যর্থঃ |
যঃ কিল স্বমেব কায়ং জুগুপ্সতে তত্তদবদ্যদর্শনাৎ স কথং
পরকীয়ৈস্তথাভূতৈশ্চ কায়ৈঃ সংসর্গমনুভবতি || ৪০||
শৌচস্যৈব ফলান্তরমাহ —

সত্ত্বশুদ্ধিসৌমনস্যৈকাগ্রতেন্দ্রিয়জয়াত্মদর্শনয়োগ্যৎবানি চ || সাধন ৪১||

বৃত্তিঃ —ভবন্তীতি বাক্যশেষঃ | সত্ত্বং প্রকাশসুখাদ্যাত্মকং
তস্য শুদ্ধী রজস্তমোভ্যামনভিভবঃ | সৌমনস্যং খেদাননুভবেন
মানসী প্রীতিঃ | একাগ্রতা নিয়তবিষয়ে চেতসঃ স্থৈর্যম্ | ইন্দ্রিয়জয়ো
বিষয়পরাঙ্মুখাণামিন্দ্রিয়াণামাত্মন্যবস্থানম্ | আত্মদর্শনে
বিবেকখ্যাতিরূপে চিত্তস্য যোগ্যৎবং সমর্থৎবম্ | শৌচাভ্যাসবত
এব এতে সত্ত্বশুদ্ধ্যাদয়ঃ ক্রমেণ প্রাদুর্ভবন্তি | তথাহি —
সত্ত্বশুদ্ধেঃ সৌমনস্যম্ | সৌমনস্যাদেকাগ্রতা | একাগ্রতায়া ইন্দ্রিয়জয়ঃ |
তস্মাদাত্মদর্শনয়োগ্যতেতি || ৪১||
সন্তোষাভ্যাসস্য ফলমাহ —

সন্তোষাদনুত্তমঃ সুখলাভঃ || সাধন ৪২||

বৃত্তিঃ —সন্তোষপ্রকর্ষেণ যোগিনস্তথাবিধমান্তরং
সুখমাবির্ভবতি যস্য বাহ্যং বিষয়সুখং শতাংশেনাপি ন সমম্ || ৪২||
তপসঃ ফলমাহ —

কায়েন্দ্রিয়সিদ্ধিরশুদ্ধিক্ষয়াত্তপসঃ || সাধন ৪৩||

বৃত্তিঃ —তপঃ সমভ্যস্যমানং চেতসঃ
ক্লেশাদিলক্ষণাশুদ্ধিক্ষয়দ্বারেণ কায়েন্দ্রিয়াণাং
সিদ্ধিপ্রকর্ষমাদধাতি | অয়মর্থঃ —
চান্দ্রায়ণাদিনা চিত্তক্লেশক্ষয়স্তৎক্ষয়াদিন্দ্রিয়াদীনাং
সূক্ষ্মব্যবহিতবিপ্রকৃষ্টদর্শনাদিসামর্থ্যমাবির্ভবতি কায়স্য
যথেচ্ছম্ অণুৎবমহত্ত্বাদীনি || ৪৩||
স্বাধ্যায়স্য ফলমাহ —

স্বাধ্যায়াদিষ্টদেবতাসম্প্রয়োগঃ || সাধন ৪৪||

বৃত্তিঃ —অভিপ্রেতমন্ত্রজপাদিলক্ষণে স্বাধ্যায়ে প্রকৃষ্যমাণে
যোগিন ইষ্টয়াঽভিপ্রেতয়া দেবতয়া সম্প্রয়োগো ভবতি | সা দেবতা
প্রত্যক্ষা ভতীত্যর্থঃ || ৪৪||
ঈশ্বরপ্রণিধানস্য ফলমাহ —

সমাধিসিদ্ধিরীশ্বরপ্রণিধানাৎ || সাধন ৪৫||

বৃত্তিঃ —ঈশ্বরে যৎ প্রণিধানং ভক্তিবিশেষস্তস্মাৎ
সমাধেরুক্তলক্ষণস্যাবির্ভাবো ভবতি যস্মাৎ স ভগবানীশ্বরঃ
প্রসন্নঃ সন্নন্তরায়রূপান্ ক্লেশান্ পরিহৃত্য সমাধিং সম্বোধয়তি || ৪৫||
যমনিয়মানুক্ত্বা আসনমাহ —

স্থিরসুখমাসনম্ || সাধন ৪৬||

বৃত্তিঃ —আস্যতেঽনেনেত্যাসনং পদ্মাসনদণ্ডাসনস্বস্তিকাসনাদি |
তদ্যদা স্থিরং নিষ্কম্পং সুখমনুদ্বেজনীয়ং চ ভবতি তদা
যোগাঙ্গতাং ভজতে || ৪৬||
তস্যৈব স্থিরসুখপ্রাপ্ত্যর্থমুপায়মাহ —

প্রয়ত্নশৈথিল্যানন্ত্যসমাপত্তিভ্যাম্ || সাধন ৪৭||

বৃত্তিঃ —তদাসনং প্রয়ত্নশৈথিল্যেনাঽঽনন্ত্যসমাপত্ত্যা চ
স্থিরং সুখং ভবতীতি সম্বন্ধঃ | যদা যদাঽঽসনং বধ্নামীতি
ইচ্ছাং করোতি প্রয়ত্নশৈথিল্যেঽপ্যক্লেশেনৈব তদা তদাঽঽসনং
সম্পদ্যতে | যদা চাকাশাদিগত আনন্ত্যে চেতসঃ সমাপত্তিঃ
ক্রিয়তেঽবধানেন [পা০ অব্যবধানেন]তাদাত্ম্যমাপদ্যতে তদা
দেহাহঙ্কারাভাবান্নাসনং দুঃখজনকং ভবতি | অস্মিংশ্চাসনজয়ে সতি
সমাধ্যন্তরায়ভূতা ন প্রভবন্ত্যঙ্গমেজয়ৎবাদয়ঃ || ৪৭||
তস্যৈবানুনিষ্পাদি ফলমাহ —

ততো দ্বন্দ্বানভিঘাতঃ || সাধন ৪৮||

বৃত্তিঃ —তস্মিন্নাসনজয়ে সতি দ্বন্দ্বৈঃ
শীতোষ্ণক্ষুত্তৃষ্ণাদিভির্যোগী নাভিহন্যত ইত্যর্থঃ || ৪৮||
আসনজয়াদনন্তরং প্রাণায়ামমাহ —

তস্মিন্সতি শ্বাসপ্রশ্বাসয়োর্গতিবিচ্ছেদঃ প্রাণায়ামঃ || সাধন ৪৯||

বৃত্তিঃ —আসনস্থৈর্যে সতি তন্নিমিত্তকপ্রাণায়ামলক্ষণো
যোগাঙ্গবিশেষোঽনুষ্ঠেয়ো ভবতি | কীদৃশঃ |
স্বাসপ্রশ্বাসয়োর্গতিবিচ্ছেদলক্ষণঃ | শ্বাসপ্রশ্বাসৌ নিরুক্তৌ
(১.৩১)তয়োস্ত্রিধা রেচনস্তম্ভনপূরণদ্বারেণ বাহ্যাভ্যন্তরেষু
স্থানেষু গতেঃ প্রবাহস্য বিচ্ছেদো ধারণং প্রাণায়াম উচ্যতে || ৪৯||
তস্যৈব সুখাবগমায় বিভজ্য স্বরূপং কথয়তি —

স তু বাহ্যাভ্যন্তরস্তম্ভবৃত্তির্দেশকালসঙ্খ্যাভিঃ পরিদৃষ্টো
দীর্ঘসূক্ষ্মঃ || সাধন ৫০||

বৃত্তিঃ —বাহ্যবৃত্তিঃ শ্বাসো রেচকঃ | অন্তর্বৃত্তিঃ প্রশ্বাসঃ
পূরকঃ | আন্তরস্তম্ভবৃত্তিঃ কুম্ভকঃ | তস্মিন্ জলমিব কুম্ভে
নিশ্চলতয়া প্রাণা অবস্থাপ্যন্ত ইতি কুম্ভকঃ | ত্রিবিধোঽযং প্রাণায়ামঃ
দেশেন কালেন সঙ্খ্যয়া চোপলক্ষিতো দীর্ঘসূক্ষ্মসঞ্জ্ঞো ভবতি |
দেশোপলক্ষিতো যথা নাসাদ্দ্বাদশান্তাদি নাসামারভ্য
দ্বাদশাঙ্গুলিপর্যন্তমিত্যর্থঃ | কালোপলক্ষিতো যথা
ষট্ত্রিংশন্মাত্রাদিপ্রমাণঃ | সঙ্খ্যয়োপলক্ষিতো যথা ইয়তো বারান্ কৃত
এতাবদ্ভিঃ শ্বাসপ্রশ্বাসৈঃ প্রথম উদ্ঘাতো ভবতীতি | এতজ্জ্ঞানায়
সঙ্খ্যাগ্রহণমুপাত্তম্ | উদ্ঘাতো নাম নাভিমূলাৎ প্রেরিতস্য বায়োঃ
শিরস্যভিহননম্ || ৫০||
ত্রীন্ প্রাণায়ামানভিধায় চতুর্থমভিধাতুমাহ —

বাহ্যাভ্যন্তরবিষয়াক্ষেপী চতুর্থঃ || সাধন ৫১||

বৃত্তিঃ —প্রাণস্য বাহ্যো বিষয়ো নাসাদ্দ্বাদশান্তাদিঃ |
আভ্যন্তরো বিষয়ো হৃদয়নাভিচক্রাদিঃ | তৌ দ্বৌ
বিষয়াবাক্ষিপ্য পর্যালোচ্য যঃ স্তম্ভরূপী গতিবিচ্ছেদঃ
স চতুর্থঃ প্রাণায়ামঃ | তৃতীয়স্মাৎ কুম্ভকাখ্যাদয়মস্য
বিশেষঃ —স বাহ্যাভ্যন্তরবিষয়াবপর্যালোচ্যৈব সহসা
তপ্তোপলনিপতিতজলন্যায়েন যুগপৎ স্তম্ভবৃত্ত্যা নিষ্পাদ্যতে [পা০
নিষ্পদ্যতে]| অস্য তু বিষয়দ্বয়াক্ষেপকো নিরোধঃ | অয়মপি
পূর্ববদ্দেশকালসঙ্খ্যাভিরুপলক্ষিতো দ্রষ্টব্যঃ || ৫১||
চতুর্বিধস্যাস্য ফলমাহ —

ততঃ ক্ষীয়তে প্রকাশাবরণম্ || সাধন ৫২||

বৃত্তিঃ —ততস্তস্মাৎ প্রাণায়ামাৎ প্রকাশস্য চিত্তসত্ত্বগতস্য
যদাবরণং ক্লেশরূপং তৎ ক্ষীয়তে বিনশ্যতীত্যর্থঃ || ৫২||
ফলান্তরমাহ —

ধারণাসু চ যোগ্যতা মনসঃ || সাধন ৫৩||

বৃত্তিঃ —ধারণা বক্ষ্যমাণলক্ষণাস্তাসু প্রাণায়ামৈঃ ক্ষীণদোষং
মনো যত্র যত্র ধার্যতে তত্র তত্র স্থিরীভবতি ন বিক্ষেপং ভজতে || ৫৩||
প্রত্যাহারস্য লক্ষণমাহ —

স্ববিষয়াসম্প্রয়োগে চিত্তস্বরূপানুকার ইবেন্দ্রিয়াণাং প্রত্যাহারঃ || সাধন ৫৪||

বৃত্তিঃ —ইন্দ্রিয়াণি বিষয়েভ্যঃ প্রতীপমাহ্রিয়ন্তেঽস্মিন্নিতি
প্রত্যাহারঃ | স চ কথং নিষ্পদ্যত ইত্যাহ
—চক্ষুরাদীনামিন্দ্রিয়াণাং স্ববিষয়ো রূপাদিস্তেন
সম্প্রয়োগস্তদাভিমুখ্যেন বর্তনম্ তদভাবস্তদাভিমুখ্যং পরিত্যজ্য
স্বরূপমাত্রেঽবস্থানম্ | তস্মিন্ সতি চিত্তমাত্রানুকারিণীন্দ্রিয়াণি ভবন্তি
যতশ্চিত্তমনুবর্তমানানি মধুকররাজমিব মক্ষিকাঃ সর্বাণীন্দ্রিয়াণি
প্রতীয়ন্তে | অতশ্চিত্তনিরোধে তানি প্রত্যাহৃতানি ভবন্তি | তেষাং
তৎস্বরূপানুকারঃ প্রত্যাহার উক্তঃ || ৫৪||
প্রত্যাহারফলমাহ —

ততঃ পরমা বশ্যতেন্দ্রিয়াণাম্ || সাধন ৫৫||

বৃত্তিঃ —অভ্যস্যমানে হি প্রত্যাহারে তথা বশ্যান্যায়ত্তানীন্দ্রিয়াণি
সম্পদ্যন্তে যথা বাহ্যবিষয়াভিমুখতাং নীয়মানান্যপি ন যান্তীত্যর্থঃ || ৫৫||
তদেবং প্রথমপাদোক্তলক্ষণস্য যোগস্যাঙ্গভূতক্লেশতনূকরণফলং
ক্রিয়ায়োগমভিধায় ক্লেশানামুদ্দেশং স্বরূপং কারণং ক্ষেত্রং ফলং
চোক্ত্বা কর্মণামপি ভেদং কারণং স্বরূপং ফলং চাভিধায় বিপাকস্য
কারণম্ স্বরূপং চাভিহিতম্ |
ততস্ত্যাজ্যৎবাৎ ক্লেশাদিনাং জ্ঞানব্যতিরেকেণ
ত্যাগস্যাঽশক্যৎবাজ্জ্ঞানস্য চ শাস্ত্রায়ত্তৎবাৎ শাস্ত্রস্য
হেয়হানকারণোপাদেয়োপাদানকারণবোধকৎবেন চতুর্ব্যূহৎবাৎ
হেয়স্য হানব্যতিরেকেণ স্বরূপানিষ্পত্তের্হানসহিতং চতুর্ব্যূহং
স্বস্বকারণসহিতমভিধায় উপাদেয়কারণভূতায়া বিবেকখ্যাতেঃ
কারণভূতানামন্তরঙ্গবহিরঙ্গভাবেন স্থিতানাং যমাদীনাং
স্বরূপং ফলসহিতং ব্যাকৃত্য আসনাদীনাং ধারণাপর্যন্তানাং
পরস্পরমুপকার্যোপকারকভাবেনাবস্থিতানামুদ্দেশমভিধায় প্রত্যেকং
লক্ষণকরণপূবকং ফলমভিহিতম্ |
তদয়ং যোগো যমনিয়মাদিভিঃ প্রাপ্তবীজভাব আসনপ্রাণায়ামৈরঙ্কুরিতঃ
প্রত্যাহারেণ পুষ্পিতো ধ্যানধারণাসমাধিভিঃ ফলিষ্যতীতি ব্যাখ্যাতঃ
সাধনপাদঃ |
ইতি ধারেশ্বরভোজবিরচিতায়াং রাজমার্তণ্ডাভিধায়াং পাতঞ্জলবৃত্তৌ
সাধনপাদঃ || ২||

ইতি সাধনপাদঃ || ২||

অথ বিভূতিপাদঃ || ৩||

যৎপাদপদ্মস্মরণাদণিমাদিবিভূতয়ঃ |
ভবন্তি ভবিনামস্তু ভূতনাথঃ স ভূতয়ে ||

তদেবং পূর্বোদ্দিষ্টং ধারণাদ্যঙ্গত্রয়ং নির্ণেতুং
সংযমসঞ্জ্ঞাভিধানপূর্বকং বাহ্যাভ্যন্তরাদিসিদ্ধিপ্রতিপাদনায়
লক্ষয়িতুমুপক্রমতে | তত্র ধারণায়াঃ স্বরূপমাহ —

দেশবন্ধশ্চিত্তস্য ধারণা || বিভূতি ১||

বৃত্তিঃ —দেশে নাভিচক্রনাসাগ্রাদৌ চিত্তস্য বন্ধো
বিষয়ান্তরপরিহারেণ যৎ স্থিরীকরণং সা চিত্তস্য ধারণোচ্যতে |
অয়মর্থঃ —মৈত্র্যাদিচিত্তপরিকর্মবাসিতান্তঃকরণেন
যমনিয়মবতা জিতাসনেন পরিহৃতপ্রাণবিক্ষেপেণ
প্রত্যাহৃতেন্দ্রিয়গ্রামেণ নির্বাধে প্রদেশ ঋজুকায়েন জিতদ্বন্দ্বেন
যোগিনা নাসাগ্রাদৌ সম্প্রজ্ঞাতস্য সমাধেরভ্যাসায় চিত্তস্য
স্থিরীকরণং কর্তব্যমিতি || ১||
ধারণামভিধায় ধ্যানমভিধাতুমাহ —

তত্র প্রত্যয়ৈকতানতা ধ্যানম্ || বিভূতি ২||

বৃত্তিঃ —তত্র তস্মিন্ প্রদেশে যত্র চিত্তং ধৃতং তত্র
প্রত্যয়স্য জ্ঞানস্য যা একতানতা বিসদৃশপরিণামপরিহারদ্বারেণ
যদেব ধারণায়ামবলম্বনীকৃতং তদবলম্বনতয়ৈব নিরন্তরমুৎপত্তিঃ
সা ধ্যানমুচ্যতে || ২||
চরময়োগাঙ্গং সমাধিমাহ —

তদেবার্থমাত্রনির্ভাসং স্বরূপশূন্যমিব সমাধিঃ || বিভূতি ৩||

বৃত্তিঃ —তদেবোক্তলক্ষণং ধ্যানং
যত্রার্থমাত্রনির্ভাসমর্থাকারসমাবেশাদুদ্ভূতার্থরূপং
ন্যগ্ভূতজ্ঞানস্বরূপৎবেন স্বরূপশূন্যতামিবাঽঽপদ্যতে স
সমাধিরিত্যুচ্যতে | সম্যগাধীয়ত একাগ্রীক্রিয়তে বিক্ষেপান্ পরিহৃত্য
মনো যত্র স সমাধিঃ || ৩||
উক্তলক্ষণস্য যোগাঙ্গত্রয়স্য ব্যবহারায় স্বশাস্ত্রে তান্ত্রিকীং সঞ্জ্ঞাং
কর্তুমাহ —

ত্রয়মেকত্র সংযমঃ || বিভূতি ৪ ||

বৃত্তিঃ —একস্মিন্ বিষয়ে ধারণাধ্যানসমাধিত্রয়ং প্রবর্তমানং
সংযমসঞ্জ্ঞয়া শাস্ত্রে ব্যবহ্রিয়তে || ৪||
তস্য ফলমাহ —

তজ্জয়াৎপ্রজ্ঞালোকঃ || বিভূতি ৫ ||

বৃত্তিঃ —তস্য সংযমস্য জয়াদভ্যাসেন সাত্ম্যোৎপাদনাৎ
প্রজ্ঞায়া বিবেকখ্যাতেরালোকঃ প্রসবো ভবতি | প্রজ্ঞা জ্ঞেয়ং
সম্যগবভাসয়তীত্যর্থঃ || ৫||
তস্যোপয়োগমাহ —

তস্য ভূমিষু বিনিয়োগঃ || বিভূতি ৬||

বৃত্তিঃ —তস্য সংযমস্য ভূমিষু স্থূলসূক্ষ্মাবলম্বনভেদেন
স্থিতাসু চিত্তবৃত্তিষু বিনিয়োগঃ কর্তব্যঃ | অধরামধরাং
চিত্তভূমিং জিতাং জিতাং জ্ঞাৎবোত্তরস্যাং ভূমৌ সংযমঃ কার্যঃ |
স হ্যনাত্মীঈকৃতাধরভূমিরুত্তরস্যাং ভূমৌ সংযমং কুর্বাণঃ
ফলভাগ্ভবতি || ৬||
সাধনপাদে যোগাঙ্গান্যষ্টাবুদ্দিশ্য পঞ্চানাং লক্ষণং বিধায় ত্রয়াণাং
কথং ন কৃতমিত্যাশঙ্ক্যাহ —

ত্রয়মন্তরঙ্গং পূর্বেভ্যঃ || বিভূতি ৭||

বৃত্তিঃ —পূর্বেভ্যো যমাদিভ্যো যোগাঙ্গেভ্যঃ পারম্পর্যেণ
সমাধেরূপকারকেভ্যো ধারণাদিয়োগাঙ্গত্রয়ং সম্প্রজ্ঞাতস্য
সমাধেরন্তরঙ্গং সমাধিস্বরূপনিষ্পাদনাৎ || ৭||
তস্যাপি সমাধ্যন্তরাপেক্ষয়া বহিরঙ্গৎবমাহ —

তদপি বহিরঙ্গং নির্বীজস্য || বিভূতি ৮||

বৃত্তিঃ —নির্বীজস্য নিরালম্বনস্য শূন্যভাবনাঽপরপর্যায়স্য
সমাধেরেতদপি যোগাঙ্গত্রয়ং বহিরঙ্গং পারম্পর্যেণোপকারকৎবাৎ || ৮||
ইদানীং যোগসিদ্ধীর্ব্যাখ্যাতুকামঃ সংযমস্য বিষয়বিশুদ্ধিং কর্তুং
ক্রমেণ পরিণামত্রয়মাহ —

ব্যুত্থাননিরোধসংস্কারয়োরভিভবপ্রাদুর্ভাবৌ নিরোধক্ষণচিত্তান্বয়ো
নিরোধপরিণামঃ || বিভূতি ৯||

বৃত্তিঃ —ব্যুত্থানং ক্ষিপ্তমূঢবিক্ষিপ্তাখ্যং
ভূমিত্রয়ম্ | নিরোধঃ প্রকৃষ্টসত্ত্বস্যাঙ্গিতয়া চেতসঃ
পরিণামঃ | তাভ্যাং ব্যুত্থাননিরোধাভ্যাং যৌ জনিতৌ সংস্কারৌ
তয়োর্যথাক্রমম্ অভিভবপ্রাদুর্ভাবৌ যদা ভবতঃ | অভিভবো
ন্যগ্ভূততয়া কার্যকরণাসামর্থ্যেনাবস্থানম্ | প্রাদুর্ভাবো
বর্তমানেঽধ্বন্যভিব্যক্তরূপতয়াঽঽবির্ভাবঃ | তদা নিরোধক্ষণে
চিত্তস্যোভয়ক্ষণবৃত্তিৎবাদন্বয়ো যঃ স নিরোধপরিণাম উচ্যতে |
অয়মর্থঃ —যদা ব্যুত্থানসস্কাররূপো ধর্মস্তিরোভূতো
ভবতি নিরোধসংস্কাররূপশ্চাবির্ভবতি ধর্মিরূপতয়া চ
চিত্তমুভয়ান্বয়িৎবেঽপি নিরোধাত্মনাঽবস্থিতং প্রতীয়তে তদা স
নিরোধপরিণামশব্দেন ব্যবহ্রিয়তে | চলৎবাদ্গুণবৃত্তস্য যদ্যপি
চেতসো নিশ্চলৎবং নাস্তি তথাপ্যেবম্ভূতঃ পরিণামঃ স্থৈর্যমুচ্যতে || ৯||
তস্যৈব ফলমাহ —

তস্য প্রশান্তবাহিতা সংস্কারাৎ || বিভূতি ১০||

বৃত্তিঃ —তস্য চেতসো নিরুক্তান্নিরোধসংস্কারাৎ প্রশান্তবাহিতা
ভবতি | পরিহৃতবিক্ষেপতয়া সদৃশপ্রবাহপরিণামি চিত্তং
ভবতীত্যর্থঃ || ১০||
নিরোধপরিণামমভিধায় সমাধিপরিণামমাহ —

সর্বার্থতৈকাগ্রতয়োঃ ক্ষয়োদয়ৌ চিত্তস্য সমাধিপরিণামঃ || বিভূতি
১১||

বৃত্তিঃ —সর্বার্থতা চলৎবান্নানাবিধার্থগ্রহণং চিত্তস্য
বিক্ষেপো ধর্মঃ | একস্মিন্নেবালম্বনে সদৃশপরিণামিতৈকাগ্রতা | সাঽপি
চিত্তস্য ধর্মঃ | তয়োর্যথাক্রমং ক্ষয়োদয়ৌ সর্বার্থতালক্ষণস্য
ধর্মস্য ক্ষয়োঽত্যন্তাভিভব একাগ্রতালক্ষণস্য ধর্মস্য
প্রাদুর্ভাবোঽভিব্যক্তিশ্চিত্তস্যোদ্রিক্তসত্ত্বস্যান্বয়িতয়াঽবস্থানং
সমাধিপরিণাম ইত্যুচ্যতে |
পূর্বস্মাৎ পরিণামাদস্যায়ং বিশেষঃ —তত্র সংস্কারলক্ষণয়োঃ
ধর্ময়োরভিভবপ্রাদুর্ভাবৌ পূর্বস্য ব্যুত্থানসংস্কাররূপস্য ন্যগ্ভাব
উত্তরস্য নিরোধসংস্কাররূপস্যোদ্ভবোঽনভিভূতৎবেনাবস্থানম্ |
ইহ তু ক্ষয়োদয়াবিতি সর্বাত্মতারূপস্য
বিক্ষেপস্যাত্যন্ততিরস্কারাদনুৎপত্তিরতীতেঽধ্বনি প্রবেশঃ ক্ষয়
একাগ্রতালক্ষণস্য ধর্মস্যোদ্ভবো বর্তমানেঽধ্বনি প্রকটৎবম্ || ১১||
তৃতীয়মেকাগ্রতাপরিণামমাহ —

শান্তোদিতৌ তুল্যপ্রত্যয়ৌ চিত্তস্যৈকাগ্রতাপরিণামঃ || বিভূতি ১২||

বৃত্তিঃ —সমাহিতস্যৈব চিত্তস্যৈকপ্রত্যয়ো বৃত্তিবিশেষঃ
শান্তোঽতীতমধ্বানং প্রবিষ্টঃ | অপরস্তূদিতো বর্তমানেঽধ্বনি
স্ফুরিতঃ | দ্বাবপি সমাহিতচিত্তৎবেন তুল্যাবেকরূপালম্বনৎবেন
সদৃশৌ প্রত্যয়ৌ | উভয়ত্রাপি সমাহিতস্যৈব
চিত্তস্যান্বয়িৎবেনাবস্থানম্ | স একাগ্রতাপরিণাম ইত্যুচ্যতে || ১২||
চিত্তপরিণামোক্তং রূপমন্যত্রাপ্যতিদিশন্নাহ —

এতেন ভূতেন্দ্রিয়েষু ধর্মলক্ষণাবস্থাপরিণামা ব্যাখ্যাতাঃ || বিভূতি
১৩||

বৃত্তিঃ —এতেন ত্রিবিধেনোক্তেন চিত্তপরিণামেন ভূতেষু
স্থূলসূক্ষ্মেষ্বিন্দ্রিয়েষু বুদ্ধিকর্মান্তঃকরণভেদেনাবস্থিতেষু
ধর্মলক্ষণাবস্থাভেদেন ত্রিবিধঃ পরিণামো ব্যাখ্যাতোঽবগন্তব্যঃ |
অবস্থিতস্য ধর্মিণঃ পূর্বধর্মনিবৃত্তৌ
ধর্মান্তরাপত্তির্ধর্মপরিণামঃ | যথা —মৃল্লক্ষণস্য
ধর্মিণঃ পিণ্ডরূপধর্মপরিত্যাগেন ঘটরূপধর্মান্তরস্বীকারো
ধর্মপরিণাম ইত্যুচ্যতে | লক্ষ্ণপরিণামো যথা —
তস্যৈব ঘটস্যানাগতাধ্বপরিত্যাগেন বর্তমানাধ্বস্বীকারঃ |
তৎপরিত্যাগেনাতীতাধ্বপরিগ্রহঃ | অবস্থাপরিণামো যথা —তস্যৈব
ঘটস্য প্রথমদ্বিতীয়য়োঃ সদৃশয়োঃ কাললক্ষণয়োরন্বয়িৎবেন |
যতশ্চ গুণবৃত্তির্নাঽপরিণম্যমানা ক্ষণমপ্যস্তি || ১৩||
ননু কোঽযং ধর্মীত্যাশঙ্ক্য ধর্মিণো লক্ষণমাহ —

শান্তোদিতাব্যপদেশ্যধর্মানুপাতী ধর্মী || বিভূতি ১৪||

বৃত্তিঃ —শান্তা যে কৃতস্বস্বব্যাপারা অতীতেঽধ্বনি অনুপ্রবিষ্টাঃ |
উদিতা য অনাগতমধ্বানং পরিত্যজ্য বর্তমানেঽধ্বনি স্বব্যাপারং
কুর্বন্তি | অব্যপদেশ্যা যে শক্তিরূপেণ স্থিতা ব্যপদেষ্টুং
ন শক্যন্তে | তেষাং যথাস্বং সর্বাত্মকৎবমিত্যেবমাদয়ো
নিয়তকার্যকারণরূপয়োগ্যতয়াবচ্ছিন্না শক্তিরেবেহ
ধর্মশব্দেনাভিধীয়তে |
তং ত্রিবিধমপি ধর্মং যোঽনুপতত্যনুবর্ততেঽন্বয়িৎবেন স্বীকরোতি
স শান্তোদিতাব্যপদেশ্যধর্মানুপাতী ধর্মীত্যুচ্যতে | যথা —
সুবর্ণং রুচকরূপধর্মপরিত্যাগেন স্বস্তিকরূপধর্মান্তরপরিগ্রহে
সুবর্ণরূপতয়াঽনুবর্তমানং তেষু ধর্মেষু কথঞ্চিদ্ভিন্নেষু
ধর্মিরূপতয়া সামান্যাত্মনা ধর্মরূপতয়া বিশেষাত্মনা
স্থিতমন্বয়িৎবেনাবভাসতে || ১৪||
একস্য ধর্মিণঃ কথমনেকে পরিণামা ইত্যাশঙ্কামপনেতুমাহ —

ক্রমান্যৎবং পরিণামান্যৎবে হেতুঃ || বিভূতি ১৫||

বৃত্তিঃ —ধর্মাণামুক্তলক্ষণানাং যঃ ক্রমস্তস্য যৎ
প্রতিক্ষণমন্যৎবং পরিদৃশ্যমানং পরিণামস্যোক্তলক্ষণস্যান্যৎবে
নানাবিধৎবে হেতুর্লিঙ্গং জ্ঞাপকং ভবতি | অয়মর্থঃ —যোঽযং
নিয়তঃ ক্রমো মৃচ্চূর্ণান্মৃৎপিণ্ডস্ততঃ কপালানি তেভ্যশ্চ ঘট
ইত্যেবং ক্রমরূপঃ পরিদৃশ্যমানঃ পরিণামস্যাঽন্যৎবমাবেদয়তি |
তস্মিন্নেব ধর্মিণি যো লক্ষণপরিণামস্যাঽবস্থাপরিণামস্য চ
ক্রমঃ সোঽপ্যনেনৈব ন্যায়েন পরিণামান্যৎবে গমকোঽবগন্তব্যঃ |
সর্ব এব ভাবা নিয়তেনৈব ক্রমেণ প্রতিক্ষণং পরিণম্যমানাঃ
পরিদৃশ্যন্তে | অতঃ সিদ্ধং ক্রমান্যৎবাৎ পরিণামান্যৎবম্ | সর্বেষাং
চিত্তাদীনাং পরিণমমানানাং কেচিদ্ধর্মাঃ প্রত্যক্ষেণৈবোপলভ্যন্তে |
যথা সুখাদয়ঃ সংস্থানাদয়শ্চ | কেচিদেকান্তেনানুমানগম্যাঃ | যথা
ধর্মসংস্কারশক্তিপ্রভৃতয়ঃ | ধর্মিণশ্চ ভিন্নাভিন্নরূপতয়া
সর্বত্রানুগমঃ || ১৫||
ইদানীমুক্তস্য সংযমস্য বিষয়প্রদর্শনদ্বারেণ সিদ্ধীঃ
প্রতিপাদয়িতুমাহ —

পরিণামত্রয়সংযমাদতীতানাগতজ্ঞানম্ || বিভূতি ১৬||

বৃত্তিঃ —ধর্মলক্ষণাবস্থাভেদেন যৎ পরিণামত্রয়মুক্তং তত্র
সংযমাৎ তস্মিন্ বিষয়ে পূর্বোক্তসংযমস্য করণাদতীতানাগতজ্ঞানং
যোগিনঃ সমাধের্ভবতি |
ইদমত্র তাৎপর্যম্ —অস্মিন্ ধর্মিণ্যয়ং ধর্ম ইদং
লক্ষণমিয়মবস্থা চাঽনাগতাদধ্বনঃ সমেত্য বর্তমানেঽধ্বনি
স্বব্যাপারং বিধায়াতীতমধ্বানং প্রবিশতীত্যেবং পরিহৃতবিক্ষেপতয়া
যদা সংযমং করোতি তদা যৎকিঞ্চিদনুৎপন্নমতিক্রান্তং বা তৎ
সর্বং যোগী জানাতি | যতশ্চিত্তস্য শুদ্ধসত্ত্বপ্রকাশরূপৎবাৎ
সর্বার্থগ্রহণসামর্থ্যমবিদ্যাদিভির্বিক্ষেপৈরপক্রিয়তে | যদা তু
তৈস্তৈরুপায়ৈর্বিক্ষেপাঃ পরিহ্রিয়ন্তে তদা নিবৃত্তমলস্যেবাদর্শস্য
সর্বার্থগ্রহণসামর্থ্যমেকাগ্রতাবলাদাবির্ভবতি || ১৬||
সিদ্ধ্যন্তরমাহ —

শব্দার্থপ্রত্যয়ানামিতরেতরাধ্যাসাৎসঙ্করস্তৎপ্রবিভাগসংযমাৎসর্বভূতরুতজ্ঞানম্ || বিভূতি ১৭||

বৃত্তিঃ —শব্দঃ শ্রোত্রেন্দ্রিয়গ্রাহ্যো নিয়তক্রমবর্ণাত্মা
নিয়তৈকার্থপ্রতিপত্ত্যবচ্ছিন্নঃ | যদি বা ক্রমরহিতস্ফোটাত্মা
শাস্ত্রসংস্কৃতবুদ্ধিগ্রাহ্যঃ [পা০ ধ্বনিসংস্কৃতবুদ্ধিগ্রাহ্যঃ]|
উভয়থাঽপি পদরূপো বাক্যরূপশ্চ তয়োরেকার্থপ্রতিপত্তৌ সামর্থ্যাৎ |
অর্থো জাতিগুণক্রিয়াদিঃ | প্রত্যয়ো জ্ঞানং বিষয়াকারা বুদ্ধিবৃত্তিঃ |
এষাং শব্দার্থজ্ঞানানাং ব্যবহারে ইতরেতরাধ্যাসাদ্ভিন্নানামপি
বুদ্ধ্যেকরূপতাসম্পাদনাৎ সঙ্কীর্ণৎবম্ | তথাহি —গামানয়েত্যুক্তে
কশ্চিদ্গোলক্ষণমর্থং গোৎবজাত্যবচ্ছিন্নং সাস্নাদিমৎ পিণ্ডরূপং
শব্দং চ তদ্বাচকং জ্ঞানং চ তদ্গ্রাহকমভেদেনৈবাধ্যবস্যতি
ন ৎবস্য গোশব্দো বাচকোঽযং গোশব্দস্য বাচ্যস্তয়োরিদং গ্রাহকং
জ্ঞানমিতি ভেদেন ব্যবহরতি | তথাহি —কোঽযমর্থঃ কোঽযং
শব্দঃ কিমিদং জ্ঞানমিতি পৃষ্টঃ সর্বত্রৈকরূপমেবোত্তরং দদাতি
গৌরিতি | স যদ্যেকরূপতাং ন প্রতিপদ্যতে কথমেকরূপমুত্তরং
প্রয়চ্ছতি |
এবং তস্মিন্নবস্থিতে যোঽযং [পা০ একস্মিন্ বিষয়ে যোঽযম্ |
এতস্মিন্ স্থিতে যোঽযম্ বা]প্রবিভাগ ইদং শব্দস্য তত্ত্বং
যদ্বাচকৎবং নাম ইদমর্থস্য যদ্বাচ্যৎবমিদং জ্ঞানস্য যৎ
প্রকাশকৎবমিতি প্রবিভাগং বিধায় তস্মিন্ প্রবিভাগে যঃ সংযমং
করোতি তস্য সর্বেষাং ভূতানাং মৃগপক্ষিসরীসৃপাদীনাং যদ্রুতং
যঃ শব্দস্তত্র জ্ঞানমুৎপদ্যতে | অনেনৈবাভিপ্রায়েণ তেন প্রাণিনায়ং
শব্দঃ সমুচ্চারিত ইতি সর্বং জানাতি || ১৭||
সিদ্ধ্যন্তরমাহ —

সংস্কারসাক্ষাৎকরণাৎপূর্বজাতিজ্ঞানম্ || বিভূতি ১৮||

বৃত্তিঃ —দ্বিবিধাশ্চিত্তস্য বাসনারূপাঃ সংস্কারাঃ |
কেচিৎ স্মৃতিমাত্রোৎপাদনফলাঃ কেচিজ্জাত্যায়ুর্ভোগলক্ষণা
বিপাকহেতবো যথা ধর্মাধর্মাখ্যাঃ | তেষু সংস্কারেষু
যদা সংযমং করোতি এবং ময়া সোঽর্থোঽনুভূত এবং ময়া
সা ক্রিয়া নিষ্পাদিতেতি পূর্ববৃত্তমনুসন্দধানো ভাবয়ন্নেব
প্রবোধকমন্তরেণোদ্বুদ্ধসংস্কারঃ সর্বমতীতং স্মরতি | ক্রমেণ
সাক্ষাৎকৃতেষূদ্বুদ্ধেষু সংস্কারেষু পূর্বজন্মান্তরানুভূতানপি জাত্যাদীন্
প্রত্যক্ষেণ পশ্যতি || ১৮||
সিদ্ধ্যন্তরমাহ —

প্রত্যয়স্য পরচিত্তজ্ঞানম্ || বিভূতি ১৯||

বৃত্তিঃ —প্রত্যয়স্য পরচিত্তস্য কেনচিন্মুখরাগাদিনা লিঙ্গেন
গৃহীতস্য যদা সংযমং করোতি তদা পরকীয়চিত্তস্য জ্ঞানমুৎপদ্যতে
সরাগমস্য চিত্তং বীতরাগং বেতি | পরচিত্তগতান্ সর্বানপি ধর্মান্
জানাতীত্যর্থঃ || ১৯||
অস্যৈব পরচিত্তজ্ঞানস্য বিশেষজ্ঞানমাহ —

ন চ তৎসালম্বনং তস্যাবিষয়ীভূতৎবাৎ || বিভূতি ২০||

বৃত্তিঃ —তস্য পরস্য যচ্চিত্তং তৎ সালম্বনং
স্বকীয়েনাঽঽলম্বনেন সহিতং ন শক্যতে জ্ঞাতুমালম্বনস্য
কেনচিল্লিঙ্গেনাবিষয়ীকৃতৎবাৎ | লিঙ্গাদ্ধি চিত্তমাত্রং পরস্যাবগতং
ন তু নীলবিষয়মস্য চিত্তং পীতবিষয়মিতি বা |
যচ্চ ন গৃহীতং তত্র সংযমস্য কর্তুমশক্যৎবান্ন ভবতি
পরচিত্তস্য যো বিষয়স্তত্র জ্ঞানম্ | তস্মাৎ পরকীয়চিত্তং
নাঽঽলম্বনসহিতং গৃহ্যতে তস্যাঽঽলম্বনস্যাঽগৃহীতৎবাৎ |
চিত্তধর্মাঃ পুনর্গৃহ্যন্ত এব | যদা তু কিমনেনাঽঽলম্বিতমিতি
প্রণিধানং করোতি তদা তৎসংযমাত্তদ্বিষয়মপি জ্ঞানমুৎপদ্যত এব || ২০||
সিদ্ধ্যন্তরমাহ —

কায়রূপসংযমাত্তদ্গ্রাহ্যশক্তিস্তম্ভে
চক্ষুষ্প্রকাশাসংযোগেঽন্তর্ধানম্ || বিভূতি ২১||

বৃত্তিঃ —কায়ঃ শরীরং তস্য রূপং চক্ষুর্গ্রাহ্যো
গুণস্তস্মিন্নস্ত্যস্মিন্ কায়ে রূপমিতি সংযমাত্তস্য রূপস্য
চক্ষুর্গ্রাহ্যৎবরূপা যা শক্তিস্তস্যাঃ স্তম্ভে ভাবনাবশাৎ প্রতিবন্ধে
চক্ষুষ্প্রকাশাসংযোগে চক্ষুষঃ প্রকাশঃ সত্ত্বধর্মস্তস্যাঽসংযোগে
তদ্গ্রহণব্যাপারাভাবে যোগিনোঽন্তর্ধানং ভবতি | ন কেনচিদসৌ
দৃশ্যত ইত্যর্থঃ | এতেনৈব রূপান্তর্ধানোপায়প্রদর্শনেন শব্দাদীনাং
শ্রোত্রাদিগ্রাহ্যাণামন্তর্ধানমুক্তং বেদিতব্যম্ || ২১||
সিদ্ধ্যন্তরমাহ —

সোপক্রমং নিরুপক্রমং চ কর্ম তৎসংযমাদপরান্তজ্ঞানমরিষ্টেভ্যো
বা || বিভূতি ২২||

বৃত্তিঃ —আয়ুর্বিপাকং যৎ পূর্বকৃতং কর্ম তদ্দ্বিপ্রকারং
সোপক্রমং নিরুপক্রমং চ | তত্র সোপক্রমং যৎ ফলজননায়
সহোপক্রমেণ কার্যকরণাভিমুখ্যেন বর্ততে যথোষ্ণপ্রদেশে
প্রসারিতার্দ্রবাসঃ শীঘ্রমেব শুষ্যতি | উক্তবিপরীতং নিরুপক্রমং
যথা তদেবার্দ্রবাসঃ সংবর্তিতমনুষ্ণপ্রদেশে চিরেণ শুষ্যতি |
তস্মিন্ দ্বিবিধে কর্মণি যঃ সংযমং করোতি —
কিং মম কর্ম শীঘ্রবিপাকং চিরবিপাকং বা —
এবং ধ্যানদার্ঢ্যাদপরান্তজ্ঞানমস্যোৎপদ্যতে | অপরান্তঃ
শরীরবিয়োগস্তস্মিঞ্জ্ঞানমমুষ্মিন্ কালেঽমুষ্মিন্ দেশে মম
শরীরবিয়োগো ভবিষ্যতীতি নিঃসংশয়ং জানাতি |
অরিষ্টেভ্যো বা | অরিষ্টানি ত্রিবিধানি | আধ্যাত্মিকাধিভৌতিকাধিদৈবিকানি |
তত্রাধ্যাত্মিকানি —পিহিতকরণঃ কোষ্ঠ্যস্য
বায়োর্ঘোষং ন শৃণোতীত্যেবমাদীনি | আধিভৌতিকানি —
অকস্মাদ্বিকৃতপুরুষদর্শনাদীনি | আধিদৈবিকানি —অকাণ্ড
এব দ্রষ্টুমশক্যানি স্বর্গাদিপদার্থদর্শনাদীনি | তেভ্যঃ
শরীরবিয়োগকালং জানাতি |
যদ্যপ্যয়োগিনামপ্যরিষ্টেভ্যঃ প্রায়েণ তজ্জ্ঞানমুৎপদ্যতে তথাপি
তেষাং সামান্যাকারেণ তৎ সংশয়রূপং যোগিনাং পুনর্নিয়তদেশকালতয়া
প্রত্যক্ষবদব্যভিচারি || ২২||
পরিকর্মনিষ্পাদিতাঃ সিদ্ধীঃ প্রতিপাদয়িতুমাহ —

মৈত্র্যাদিষু বলানি || বিভূতি ২৩||

বৃত্তিঃ —মৈত্রীকরুণামুদিতোপেক্ষাসু যো
বিহিতসংযমস্তদ্বলানি তাসাং মৈত্র্যাদীনাং সম্বন্ধীনি প্রাদুর্ভবন্তি |
মৈত্রীকরুণামুদিতোপেক্ষাস্তথাঽস্য প্রকর্ষং গচ্ছন্তি যথা সর্বস্য
মিত্রৎবাদিকময়্ঽং প্রতিপদ্যতে || ২৩||
সিদ্ধ্যন্তরমাহ —

বলেষু হস্তিবলাদীনি || বিভূতি ২৪||

বৃত্তিঃ —হস্ত্যাদিসম্বন্ধিষু বলেষু কৃতসংযমস্য
তদ্বলানি হস্ত্যাদিবলান্যাবির্ভবন্তি | তদয়মর্থঃ —
যস্মিন্ হস্তিবলে বায়ুবেগে সিংহবীর্যে বা তন্ময়ীভাবেনাঽযং
সংযমং করোতি তত্তৎসামর্থ্যয়ুক্তং সত্ত্বমস্য [পা০
তত্তৎসামর্থ্যয়ুক্তৎবাৎসর্বমস্য ]প্রাদুর্ভবতীত্যর্থঃ || ২৪||
সিদ্ধ্যন্তরমাহ —

প্রবৃত্ত্যালোকন্যাসাৎসূক্ষ্মব্যবহিতবিপ্রকৃষ্টজ্ঞানম্ || বিভূতি ২৫||

বৃত্তিঃ —প্রবৃত্তির্বিষয়বতী জ্যোতিষ্মতী চ প্রাগুক্তা
(১.৩৫-৩৬). তস্যা য আলোকঃ সাত্ত্বিকপ্রকাশস্তস্য
নিখিলেষু বিষয়েষু ন্যাসাৎ তদ্বাসিতানাং বিষয়াণাং ভাবনাতঃ
সন্তঃকরণেষু ইন্দ্রিয়েষু চ প্রকৃষ্টশক্তিমাপন্নেষু সুসূক্ষ্মস্য
পরমাণ্বাদের্ব্যবহিতস্য ভূম্যন্তর্গতস্য নিধানাদের্বিপ্রকৃষ্টস্য
মের্বপরপার্শ্ববর্তিনো রসায়নাদের্জ্ঞানমুৎপদ্যতে || ২৫||
এতৎসমানবৃত্তান্তসিদ্ধ্যন্তরমাহ —

ভুবনজ্ঞানং সূর্যে সংযমাৎ || বিভূতি ২৬||

বৃত্তিঃ —সূর্যে প্রকাশময়ে যঃ সংযমঃ করোতি তস্য সপ্তসু
ভূর্ভুবঃস্বঃপ্রভৃতিষু লোকেষু যানি ভুবনানি তত্তৎসন্নিবেশভাঞ্জি
পুরাণি [পা০ স্থানানি ]তেষু যথাবদস্য জ্ঞানমুৎপদ্যতে |
পূর্বস্মিন্ সূত্রে সাত্ত্বিকপ্রকাশ আলম্বনতয়োক্তঃ | ইহ তু ভৌতিক
ইতি বিশেষঃ || ২৬||
ভৌতিকপ্রকাশান্তরালম্বনদ্বারেণ সিদ্ধ্যন্তরমাহ —

চন্দ্রে তারাব্যূহজ্ঞানম্ || বিভূতি ২৭||

বৃত্তিঃ —তারাণাং জ্যোতিষাং যো ব্যূহো বিশিষ্টঃ সন্নিবেশস্তস্য
চন্দ্রে কৃতসংযমস্য জ্ঞানমুৎপদ্যতে | সূর্যপ্রকাশেন
হততেজস্কৎবাত্তারাণাং সূর্যসংযমাত্তজ্জ্ঞানং ন শক্যং ভবিতুমর্হতীতি
পৃথগুপায়োঽভিহিতঃ || ২৭||
সিদ্ধ্যন্তরমাহ —

ধ্রুবে তদ্গতিজ্ঞানম্ || বিভূতি ২৮||

বৃত্তিঃ —ধ্রুবে নিশ্চলে জ্যোতিষাং প্রধানে কৃতসংযমস্য
তাসাং তারাণাং যা গতিঃ প্রত্যেকং নিয়তকালা নিয়তদেশা চ তস্যা
জ্ঞানমুৎপদ্যতে —ইয়ং তারাঽযং গ্রহ ইয়তা কালেনাঽমুং রাশিমিদং
নক্ষত্রং যাস্যতীতি সর্বং জানাতি | ইদং কালজ্ঞানস্য ফলমিত্যুক্তং
ভবতি || ২৮||
বাহ্যাঃ সিদ্ধীঃ প্রতিপাদ্যাঽন্তরাঃ সিদ্ধীঃ প্রতিপাদয়িতুমুপক্রমতে —

নাভিচক্রে কায়ব্যূহজ্ঞানম্ || বিভূতি ২৯||

বৃত্তিঃ —শরীরমধ্যবর্তি নাভিসঞ্জ্ঞকং যৎ ষোডশারং
চক্রং তস্মিন্ কৃতসংযমস্য যোগিনঃ কায়গতো যোঽসৌ ব্যূহো
বিশিষ্টরসমলধাতুনাড্যাদীনামবস্থানং তত্র জ্ঞানমুৎপদ্যতে |
ইদমুক্তং ভবতি —নাভিচক্রং শরীরমধ্যবর্তি সর্বতঃ
প্রসৃতানাং নাড্যাদীনাং মূলভূতম্ | অতস্তত্র কৃতাবধানস্য
সমগ্রসন্নিবেশো যথাবদাভাতি || ২৯||
সিদ্ধ্যন্তরমাহ —

কণ্ঠকূপে ক্ষুৎপিপাসানিবৃত্তিঃ || বিভূতি ৩০||

বৃত্তিঃ —কণ্ঠে গলে কূপঃ কণ্ঠকূপঃ | জিহ্বামূলে
জিহ্বাতন্তোরধস্তাৎ কূপ ইব কূপো গর্তাকারপ্রদেশঃ প্রাণাদের্যৎসম্পর্কাৎ
ক্ষুৎপিপাসাদয়ঃ প্রাদুর্ভবন্তি তস্মিন্ কৃতসংযমস্য যোগিনঃ
ক্ষুৎপিপাসাদয়ো নিবর্তন্তে | ঘণ্টিকাধস্তাৎ স্রোতসা ধার্যমাণে তস্মিন্
ভাবিতে ভবত্যেবংবিধা সিদ্ধিঃ || ৩০||
সিদ্ধ্যন্তরমাহ —

কূর্মনাড্যাং স্থৈর্যম্ || বিভূতি ৩১||

বৃত্তিঃ —কণ্ঠকূপস্যাধস্তাদ্যা কূর্মাখ্যা নাডী তস্যাং
কৃতসংযমস্য চেতসঃ স্থৈর্যমুৎপদ্যতে | তৎস্থানমনুপ্রবিষ্টস্য
চঞ্চলতা ন ভবতীত্যর্থঃ | যদি বা কায়স্য স্থৈর্যমুৎপদ্যতে ন
কেনচিৎ স্পন্দয়িতুং শক্যত ইত্যর্থঃ || ৩১||
সিদ্ধ্যন্তরমাহ —

মূর্ধজ্যোতিষি সিদ্ধদর্শনম্ || বিভূতি ৩২||

বৃত্তিঃ —শিরঃকপালে ব্রহ্মরন্ধ্রাখ্যে ছিদ্রে
প্রকাশাধারৎবাজ্জ্যোতিষি | যথা গৃহাভ্যন্তরস্থস্য মণেঃ প্রসরন্তী
প্রভা কুঞ্চিতাকারেব সর্বপ্রদেশে সঙ্ঘটতে তথা হৃদয়স্থঃ
সাত্ত্বিকঃ প্রকাশঃ প্রসৃতস্তত্র সম্পিণ্ডিতৎবং ভজতে | তত্র
কৃতসংযমস্য যে দ্যাবাপৃথিব্যোরন্তরালবর্তিনঃ সিদ্ধা দিব্যাঃ
পুরুষাস্তেষামিতরপ্রাণিভিরদৃশ্যানাম্ তস্য দর্শনং ভবতি | তান্
পশ্যতি তৈশ্চ স সম্ভাষত ইত্যর্থঃ || ৩২||
সর্বজ্ঞৎব উপায়মাহ —

প্রাতিভাদ্বা সর্বম্ || বিভূতি ৩৩||

বৃত্তিঃ —নিমিত্তানপেক্ষং মনোমাত্রজন্যমবিসংবাদকং
দ্রাগুৎপদ্যমানং [পা০ প্রাগুৎপদ্যমানং ]জ্ঞানং প্রতিভা |
তস্যাং সংযমে ক্রিয়মাণে প্রাতিভং বিবেকখ্যাতেঃ পূর্বভাবি তারকং
জ্ঞানমুদেতি | যথোদেষ্যতঃ সবিতুঃ পূর্বং প্রভা প্রাদুর্ভবতি
তদ্বদ্বিবেকখ্যাতেঃ পূর্বং তারকং সর্ববিষয়ং জ্ঞানমুৎপদ্যতে | তস্মিন্
সতি সংযমান্তরানপেক্ষঃ সর্বং জানাতীত্যর্থঃ || ৩৩||
সিদ্ধ্যন্তরমাহ —

হৃদয়ে চিত্তসংবিৎ || বিভূতি ৩৪||

বৃত্তিঃ —হৃদয়ং শরীরস্য প্রদেশবিশেষঃ |
তস্মিন্নধোমুখস্বল্পপুণ্ডরীকাভ্যন্তরেঽন্তঃকরণসত্ত্বস্য স্থানম্ |
তত্র কৃতসংযমস্য স্বপরচিত্তজ্ঞানমুৎপদ্যতে | স্বচিত্তগতাঃ
সর্বা বাসনাঃ পরচিত্তগতাংশ্চ রাগাদীঞ্জানাতীত্যর্থঃ || ৩৪||
সিদ্ধ্যন্তরমাহ —

সত্ত্বপুরুষয়োরত্যন্তাসঙ্কীর্ণয়োঃ প্রত্যয়াবিশেষো ভোগঃ
পরার্থান্যস্বার্থসংযমাৎপুরুষজ্ঞানম্ || বিভূতি ৩৫||
[পরার্থৎবাৎ স্বার্থসংযমাৎ ইত্যেব বহুসম্মতঃ সূত্রপাঠঃ | ]

বৃত্তিঃ —সত্ত্বং প্রকাশসুখাত্মকঃ প্রাধানিকঃ
পরিণামবিশেষঃ | পুরুষো ভোক্তাঽধিষ্ঠাতৃরূপঃ |
তয়োরত্যন্তাসঙ্কীর্ণয়োর্ভোগ্যভোক্তৃরূপৎবাদচেতনচেতনৎবাচ্চ
ভিন্নয়োর্যঃ প্রত্যয়স্যাবিশেষো ভেদেনাপ্রতিভাসনং তস্মাৎ সত্ত্বস্যৈব
কর্তৃতাপ্রত্যয়েন যা সুখদুঃখসংবিৎ স ভোগঃ |
সত্ত্বস্য স্বার্থনৈরপেক্ষ্যেণ পরার্থঃ পুরুষার্থনিমিত্তঃ | তস্মাদন্যো
যঃ স্বার্থঃ পুরুষস্বরূপমাত্রালম্বনঃ পরিত্যক্তাহঙ্কারসত্ত্বে
যা চিচ্ছায়াসঙ্ক্রান্তিস্তত্র কৃতসংযমস্য পুরুষবিষয়ং
জ্ঞানমুৎপদ্যতে | তত্র তদেবং রূপং স্বালম্বনং জ্ঞানং
সত্ত্বনিষ্ঠং পুরূষো [পা০ সত্ত্বনিষ্ঠঃ পুরুষঃ]
জানাতীত্যর্থঃ | ন পুনঃ পুরুষো জ্ঞাতা জ্ঞানস্য বিষয়ভাবমাপদ্যতে
জ্ঞেয়ৎবাপত্তের্জ্ঞাতৃজ্ঞেয়ৎবয়োরত্যন্তবিরোধাৎ || ৩৫||
অস্যৈব সংযমস্য ফলমাহ —

ততঃ প্রাতিভশ্রাবণবেদনাদর্শাস্বাদবার্তা জায়ন্তে || বিভূতি ৩৬||

বৃত্তিঃ —ততঃ পুরুষসংযমাদভ্যস্যমানাদ্ব্যুত্থিতস্যাপি
জ্ঞানানি জায়ন্তে | তত্র প্রাতিভং পূর্বোক্তং জ্ঞানং তস্যাবির্ভবনাৎ
সূক্ষ্মাদিকমর্থং পশ্যতি | শ্রাবণং শ্রোত্রেন্দ্রিয়জং
জ্ঞানং তস্মাচ্চ প্রকৃষ্টং দিব্যং শব্দং জানাতি | বেদনা
স্পর্শেন্দ্রিয়জং জ্ঞানং বেদ্যতেঽনয়েতি কৃৎবা তান্ত্রিক্যা সঞ্জ্ঞয়া
ব্যবহ্রিয়তে | তস্মাদ্দিব্যস্পর্শবিষয়ং জ্ঞানং সমুপজায়তে |
আদর্শশ্চক্ষুরিন্দ্রিয়জং জ্ঞানম্ | আ সমন্তাদ্দৃশ্যতেঽনুভূয়তে
রূপমনেনেতি কৃৎবা তস্য প্রকর্ষাদ্দিব্যং রূপজ্ঞানমুৎপদ্যতে | আস্বাদো
রসনেন্দ্রিয়জং জ্ঞানম্ | আস্বাদ্যতেঽনেনেতি কৃৎবা তস্মিন্ প্রকৃষ্টে
দিব্যে রসে সংবিদুপজায়তে | বার্তা গন্ধসংবিৎ | বৃত্তিশব্দেন
তান্ত্রিক্যা পরিভাষয়া ঘ্রাণেন্দ্রিয়মুচ্যতে | বর্ততে গন্ধবিষয়ে ইতি
বৃত্তের্ঘ্রাণেন্দ্রিয়াজ্জাতা বার্তা গন্ধসংবিৎ | তস্যাং প্রকৃষ্যমানায়াং
দিব্যগন্ধোঽনুভূয়তে || ৩৬||
এতেষাং ফলবিশেষাণাং বিষয়বিভাগমাহ —

তে সমাধাবুপসর্গা ব্যুত্থানে সিদ্ধয়ঃ || বিভূতি ৩৭||

বৃত্তিঃ —তে প্রাক্প্রতিপাদিতাঃ ফলবিশেষাঃ সমাধেঃ প্রকর্ষে
গচ্ছত উপসর্গা উপদ্রবা বিঘ্নাঃ | তত্র হর্ষস্ময়াদিকরণেন [
পা০ হর্ষবিস্ময়াদিকরণেন ]সমাধিঃ শিথিলীভবতি | ব্যুত্থানে
তু পুনর্ব্যবহারদশায়াং বিশিষ্টফলদায়কৎবাৎ সিদ্ধয়ো ভবন্তি || ৩৭||
সিদ্ধ্যন্তরমাহ —

বন্ধকারণশৈথিল্যাৎপ্রচারসংবেদনাচ্চ চিত্তস্য পরশরীরাবেশঃ || বিভূতি ৩৮||

বৃত্তিঃ —ব্যাপকৎবাদাত্মচিত্তয়োর্নিয়তকর্মবশাদেব
শরীরান্তর্গতয়োরেব ভোক্তৃভোগ্যভাবেন যৎ সংবেদনমুপজায়তে
স এব শরীরবন্ধ ইত্যুচ্যতে | তদ্যদা সমাধিবশাদ্বন্ধকারণং
ধর্মাধর্মাখ্যং শিথিলং ভবতি তানবমাপদ্যতে | চিত্তস্য চ
যোঽসৌ প্রচারো হৃদয়প্রবেশাদিন্দ্রিয়দ্বারেণ বিষয়াভিমুখ্যেন
প্রসরস্তস্য সংবেদনং জ্ঞানম্ —ইয়ং চিত্তবহা নাডী | অনয়া
চিত্তং বহতি | ইয়ং চ প্রাণাদিবহাভ্যো [পা০ রসপ্রাণাদিবহাভ্যো
]নাডীভ্যো বিলক্ষণেতি —স্বপরশরীরয়োর্যদা সঞ্চারং
জানাতি তদা পরকীয়ং মৃতং জীবচ্ছরীরং বা চিত্তসঞ্চারদ্বারেণ
প্রবিশতি | চিত্তং চ পরশরীরে প্রবিশদিন্দ্রিয়াণ্যপ্যনুবর্তন্তে
মধুকররাজমিব মক্ষিকাঃ |
অথ পরশরীরপ্রবিষ্টো যোগী স্বশারীরবৎ তেন সর্বং ব্যবহরতি |
যতো ব্যাপকয়োশ্চিত্তপুরুষয়োর্ভোগসঙ্কোচে কারণং কর্ম তচ্চেৎ
সমাধিনা ক্ষিপ্তং তদা স্বাতন্ত্র্যাৎ সর্বত্রৈব ভোগনিষ্পত্তিঃ || ৩৮||
সিদ্ধ্যন্তরমাহ —

উদানজয়াজ্জলপঙ্ককণ্টকাদিষ্বসঙ্গ উৎক্রান্তিশ্চ || বিভূতি ৩৯||

বৃত্তিঃ —সমস্তানামিন্দ্রিয়াণাং তুষজ্বালাবদ্যা
যুগপদুত্থিতা বৃত্তিঃ সা জীবনশব্দবাচ্যা | তস্যাঃ
ক্রিয়াভেদাৎ প্রাণাপানাদিসঞ্জ্ঞাভির্ব্যপদেশঃ | তত্র
হৃদয়ান্মুখনাসিকাদ্বারেণ বায়োঃ প্রায়ণাৎ প্রাণ ইত্যুচ্যতে | নাভিদেশাৎ
পাদাঙ্গুষ্ঠপর্যন্তমপনয়নাদপানঃ | নাভিদেশং পরিবেষ্ট্য
সমন্তান্নয়নাৎ সমানঃ | কৃকাটিকাদেশাদাশিরোবৃত্তেরুন্নয়নাদুদানঃ |
ব্যাপ্য নয়নাৎ সর্বশরীরব্যাপী ব্যানঃ |
তত্রোদানস্য সংযমদ্বারেণ জয়াদিতরেষাং বায়ূনাং রোধাদূর্ধ্বগতিৎবেন
জলে মহানদ্যাদৌ মহতি বা কর্দমে তীক্ষ্ণেষু কণ্টকেষু বা
ন মজ্জত্যতিলঘুৎবাৎ [পা০ ন সজ্জতে.তিলঘুৎবাৎ ]|
তূলপিণ্ডবজ্জলাদৌ মজ্জিতোঽপ্যুদ্গচ্ছতীত্যর্থঃ || ৩৯||
সিদ্ধ্যন্তরমাহ —

সমানজয়াৎপ্রজ্বলনম্ || বিভূতি ৪০||
[জ্বলনম্ ইত্যেব্ বহুসম্মতঃ সূত্রপাঠঃ | ]

বৃত্তিঃ —অগ্নিমাবেষ্ট্য ব্যবস্থিতস্য সমানাখ্যস্য বায়োর্জয়াৎ
সংযমেন বশীকারান্নিরাবরণস্যাগ্নেরুদ্ভূতত্ত্বাত্তেজসা [পা০
অগ্নেরূর্ধ্বৎবাৎ ]প্রজ্বলন্নিব যোগী প্রতিভাতি || ৪০||
সিদ্ধ্যন্তরমাহ —

শ্রোত্রাকাশয়োঃ সম্বন্ধসংযমাদ্দিব্যং শ্রোত্রম্ || বিভূতি ৪১||

বৃত্তিঃ —শ্রোত্রং শব্দগ্রাহকমাহঙ্কারিকমিন্দ্রিয়ম্ | আকাশং ব্যোম
শব্দতন্মাত্রকার্যম্ | তয়োঃ সম্বন্ধো দেশদেশিভাবলক্ষণস্তস্মিন্
কৃতসংযমস্য যোগিনো দিব্যং শ্রোত্রং প্রবর্ততে | যুগপৎ
সূক্ষ্মব্যবহিতবিপ্রকৃষ্টশব্দগ্রহণসমর্থং ভবতীত্যর্থঃ || ৪১||
সিদ্ধ্যন্তরমাহ —

কায়াকাশয়োঃ সম্বন্ধসংযমাল্লঘুতূলসমাপত্তেশ্চাকাশগমনম্ || বিভূতি ৪২||

বৃত্তিঃ —কায়ঃ পাঞ্চভৌতিকং শরীরম্ |
তস্যাকাশেনাবকাশদায়কেন যঃ সম্বন্ধস্তত্র সংযমং বিধায় লঘুনি
তূলাদৌ সমাপত্তিং তন্ময়ীভাবলক্ষণাং বিধায় প্রাপ্তাতিলঘুভাবো
যোগী প্রথমং যথারুচি জলে সঞ্চরণক্রমেণোর্ণনাভতন্তুজালেন
সঞ্চরমাণ আদিত্যরশ্মিভিশ্চ বিহরন্ যথেষ্টমাকাশেন গচ্ছতি || ৪২||
সিদ্ধ্যন্তরমাহ —

বহিরকল্পিতা বৃত্তির্মহাবিদেহা ততঃ প্রকাশাবরণক্ষয়ঃ || বিভূতি
৪৩||

বৃত্তিঃ —শরীরাদ্বহির্যা মনসঃ শরীরনৈরপেক্ষ্যেণ
বৃত্তিঃ সা মহাবিদেহা নাম বিগতাহঙ্কারকার্যবেগা [পা০
বিগতশরীরাহঙ্কারদার্ঢ্যদ্বারেণ ]উচ্যতে | ততস্তস্যাং কৃতাৎ
সংযমাৎ প্রকাশাবরণক্ষয়ঃ সাত্ত্বিকস্য চিত্তস্য যঃ প্রকাশঃ তস্য
যদাবরণং ক্লেশকর্মাদি তস্য ক্ষয়ঃ প্রবিলয়ো ভবতি | অয়মর্থঃ
—শরীরাহঙ্কারে সতি যা মনসো বহির্বৃত্তিঃ সা কল্পিতেত্যুচ্যতে |
যদা পুনঃ শরীরাদহঙ্কারভাবং পরিত্যজ্য স্বাতন্ত্র্যেণ মনসো
বৃত্তিঃ সাঽকল্পিতা | তস্যাং সংযমাদ্যোগিনঃ সর্বে চিত্তমলাঃ ক্ষীয়ন্তে || ৪৩||
তদেবং পূর্বান্তবিষয়াঃ পরান্তবিষয়া মধ্যভাবাশ্চ সিদ্ধীঃ
প্রতিপাদ্যাঽনন্তরং ভুবনজ্ঞানাদিরূপা বাহ্যাঃ কায়ব্যূহাদিরূপা
আভ্যন্তরাঃ পরিকর্মনিষ্পন্নভূতাশ্চ মৈত্র্যাদিষু বলানীত্যেবমাদ্যাঃ
সমাধ্যুপয়োগিনীশ্চান্তঃকরণবহিঃকরণলক্ষণেন্দ্রিয়ভবাঃ
প্রাণাদিবায়ুভবাশ্চ সিদ্ধীশ্চিত্তদার্ঢ্যায় সমাধেশ্চাশ্বাসোৎপত্তয়ে
প্রতিপাদ্যেদানীং স্বদর্শনোপয়োগিসবীজনির্বীজসমাধিসিদ্ধয়ে
বিবিধোপায়প্রদর্শনায়াহ —

স্থূলস্বরূপসূক্ষ্মান্বয়ার্থবত্ত্বসংযমাদ্ভূতজয়ঃ || বিভূতি ৪৪||

বৃত্তিঃ —পঞ্চানাং পৃথিব্যাদীনাং ভূতানাং যে
পঞ্চাঽবস্থাবিশেষরূপা ধর্মাঃ স্থূলৎবাদয়স্তত্র
কৃতসংযমস্য ভূতজয়ো ভবতি | ভূতান্যস্য বশ্যানি
ভবন্তীত্যর্থঃ | তথা হি —ভূতানাং পরিদৃশ্যমানং
বিশিষ্টাকারবৎ স্থূলরূপম্ | স্বরূপপঞ্চৈষাং যথাক্রমং কার্যং
গন্ধস্নেহোষ্ণতাপ্রেরণাবকাশদানলক্ষণম্ | সূক্ষ্মং চ যথাক্রমং
ভূতানাং কারণৎবেন ব্যবস্থিতানি গন্ধাদিতন্মাত্রাণি | অন্বয়িনো গুণাঃ
প্রকাশপ্রবৃত্তিস্থিতিরূপতয়া সর্বত্রৈবাঽন্বয়িৎবেন সমুপলভ্যন্তে |
অর্থবত্ত্বং তেষু এব গুণেষু ভোগাপবর্গসম্পাদনাখ্যা শক্তিঃ |
তদেবং ভূতেষু পঞ্চসু উক্তধর্মলক্ষণাবস্থাভিন্নেষু
প্রত্যবস্থং সংযমং কুর্বন্ যোগী ভূতজয়ী ভবতি | তদ্যথা —
প্রথমং স্থূলরূপে সংযমং বিধায় তদনু স্বরূপে ইত্যেবং ক্রমেণ
তস্য কৃতসংযমস্য সঙ্কল্পানুবিধায়িন্যো বৎসানুসারিণ্য ইব গাবো
ভূতপ্রকৃতয়ো ভবন্তীত্যর্থঃ || ৪৪||
তস্যৈব ভূতজয়স্য ফলমাহ —

ততোঽণিমাদিপ্রাদুর্ভাবঃ কায়সম্পত্তদ্ধর্মাঽনভিঘাতশ্চ || বিভূতি
৪৫||

বৃত্তিঃ —১. অণিমা পরমাণুরূপতাপত্তিঃ | ২. মহিমা
মহত্ত্ব্প্রাপ্তিঃ | ৩. লঘিমা তূলপিণ্ডবল্লঘুৎবপ্রাপ্তিঃ | ৪. গরিমা
গুরুৎবপ্রাপ্তিঃ | ৫. প্রাপ্তিরঙ্গুল্যগ্রেণ চন্দ্রাদিস্পর্শনশক্তিঃ |
৬. প্রাকাম্যমিচ্ছানভিঘাতঃ | ৭. শরীরান্তঃকরণেশ্বরৎবমীশিৎবম্ |
৮. সর্বত্র প্রভবিষ্ণুতা বশিৎবম্ | সর্বাণ্যেব
ভূতান্যনুগামিৎবাত্তদুক্তং নাতিক্রামন্তি | ৯. যত্রকামাবসায়ো যস্মিন্
বিষয়েঽস্য কামঃ স্বেচ্ছা ভবতি তস্মিন্ বিষয়ে যোগিনোঽধ্যবসায়ো
ভবতি | তং বিষয়ং স্বীকারদ্বারেণাভিলাষসমাপ্তিপর্যন্তং
নয়তীত্যর্থঃ | ত এতেঽণিমাদ্যাঃ সমাধ্যুপয়োগিনো ভূতজয়াদ্যোগিনঃ
প্রাদুর্ভবন্তি | যথা পরমাণুৎবং প্রাপ্তো বজ্রাদীনামপ্যন্তঃ প্রবিশতি |
এবং সর্বত্র যোজ্যম্ | এতেঽণিমাদয়োঽষ্টৌ গুণা মহাসিদ্ধয়
উচ্যন্তে |
কায়সম্পদ্বক্ষ্যমাণা (৩.৪৬)তাং প্রাপ্নোতি |
তদ্ধর্মাঽনভিঘাতশ্চ তস্য কায়স্য যে ধর্মা
রূপাদয়স্তেষামনভিঘাতো নাশো ন কুতশ্চিদ্ভবতি নাস্য
রূপমগ্নির্দহতি ন বায়ুঃ শোষয়তীত্যাদি যোজ্যম্ || ৪৫||
কায়সম্পদমাহ —

রূপলাবণ্যবলবজ্রসংহননৎবানি কায়সম্পৎ || বিভূতি ৪৬||

বৃত্তিঃ —রূপলাবণ্যবলানি প্রসিদ্ধানি | বজ্রসংহননৎবং
বজ্রবৎ কঠিনা সংহতিরস্য শরীরে ভবতীত্যর্থঃ | ইতি কায়স্য
আবির্ভূতগুণসম্পৎ || ৪৬||
এবং ভূতজয়মভিধায় প্রাপ্তভূমিকাবিশেষস্যেন্দ্রিয়জয়মাহ —

গ্রহণস্বরূপাস্মিতান্বয়ার্থবত্ত্বসংযমাদিন্দ্রিয়জয়ঃ || বিভূতি ৪৭||

বৃত্তিঃ —গ্রহণমিন্দ্রিয়াণাং বিষয়াভিমুখী বৃত্তিঃ | স্বরূপং
সামান্যেন প্রকাশকৎবম্ | অস্মিতা অহঙ্কারানুগমঃ | অন্বয়ার্থবত্ত্বে
পূর্ববৎ (৩.৪৪). এতেষাং ইন্দ্রিয়াণামবস্থাপঞ্চকে পূর্ববৎ
সংযমং কৃৎবেন্দ্রিয়জয়ী ভবতি || ৪৭||
তস্য ফলমাহ —

ততো মনোজবিৎবং বিকরণভাবঃ প্রধানজয়শ্চ || বিভূতি ৪৮||

বৃত্তিঃ —শরীরস্য মনোবদনুত্তমগতিলাভো মনোজবিৎবম্ |
কায়নিরপেক্ষাণামিন্দ্রিয়াণাং বৃত্তিলাভো বিকরণভাবঃ | সর্ববশিৎবং
প্রধানজয়ঃ | এতাঃ সিদ্ধ্যয়ো জিতেন্দ্রিয়স্য প্রাদুর্ভবন্তি | তাশ্চাস্মিন্
শাস্ত্রে মধুপ্রতীকা ইত্যুচ্যন্তে | যথা মধুন একদেশোঽপি স্বদত
এবং প্রত্যেকমেতাঃ সিদ্ধয়ঃ স্বদন্ত ইতি মধুপ্রতীকাঃ || ৪৮||
ইন্দ্রিয়জয়মভিধায়াঽন্তঃকরণজয়মাহ —

সত্ত্বপুরুষান্যতাখ্যাতিমাত্রস্য সর্বভাবাধিষ্ঠাতৃৎবং
সর্বজ্ঞাতৃৎবং চ || বিভূতি ৪৯||

বৃত্তিঃ —তস্মিন্ বুদ্ধেঃ সাত্ত্বিকে পরিণামে
কৃতসংযমস্য যা সত্ত্বপুরুষয়োরুৎপদ্যতে বিবেকখ্যাতির্গুণানাং
কর্তৃৎবাভিমানশিথিলীভাবরূপা তন্মাহাত্ম্যাৎ তত্রৈব স্থিতস্য যোগিনঃ
সর্বাধিষ্ঠাতৃৎবং সর্বজ্ঞাতৃৎবং চ সমাধের্ভবতি | সর্বেষাং
গুণপরিণামানাং ভাবানাং স্বামিবদাক্রমণং সর্বভাবাধিষ্ঠাতৃৎবম্ |
তেষামেব চ শান্তোদিতাব্যপদেশ্যধর্মিৎবেনাবস্থিতানাং
যথাবদ্বিবেকজ্ঞানং সর্বজ্ঞাতৃৎবম্ | এষাং চাস্মিঞ্ছাস্ত্রে পরস্যাং
বশীকারসঞ্জ্ঞায়াং প্রাপ্তায়াং বিশোকা নাম সিদ্ধিরিত্যুচ্যতে || ৪৯||
ক্রমেণ ভূমিকান্তরমাহ —

তদ্বৈরাগ্যাদপি দোষবীজক্ষয়ে কৈবল্যম্ || বিভূতি ৫০||

বৃত্তিঃ —তস্যামপি বিশোকায়াং সিদ্ধৌ যদা বৈরাগ্যমুৎপদ্যতে
যোগিনস্তদা তস্মাদ্দোষাণাং রাগাদীনাং যদ্বীজমবিদ্যাদয়স্তস্য
ক্ষয়ে নির্মূলনে কৈবল্যমাত্যন্তিকী দুঃখনিবৃত্তিঃ পুরুষস্য
গুণানামধিকারপরিসমাপ্তৌ স্বরূপপ্রতিষ্ঠৎবম্ [পা০
স্বরূপনিষ্ঠৎবম্ ]|| ৫০||
তস্মিন্নেব সমাধৌ স্থিত্যুপায়মাহ —

স্বাম্যুপনিমন্ত্রণে সঙ্গস্ময়াঽকরণং পুনরনিষ্টপ্রসঙ্গাৎ || বিভূতি
৫১||

বৃত্তিঃ —চৎবারো যোগিনো ভবন্তি | তত্রাভ্যাসবান্
প্রবৃত্তমাত্রজ্যোতিঃ প্রথমঃ | ঋতম্ভরপ্রজ্ঞো দ্বিতীয়ঃ |
ভূতেন্দ্রিয়জয়ী তৃতীয়ঃ | অতিক্রান্তভাবনীয়শ্চতুর্থঃ |
তত্র চতুর্থস্য সমাধেঃ প্রাপ্তসপ্তবিধভূমিপ্রান্তপ্রজ্ঞো
ভবতি | ঋতম্ভরপ্রজ্ঞস্য দ্বিতীয়াং মধুমতীসঞ্জ্ঞাং
ভূমিকাং সাক্ষাৎকুর্বতঃ স্বামিনো দেবা উপনিমন্ত্রয়িতারো ভবন্তি |
দিব্যস্ত্রীরসায়নাদিকম্ [দিব্যস্ত্রীবসনাদিকম্ ]
উপঢৌকয়ন্তীতি তস্মিন্নুপনিমন্ত্রণে নাঽনেন সঙ্গঃ কর্তব্যো
নাপি স্ময়ঃ | সঙ্গতিকরণে পুনর্বিষয়ভোগে পততি স্ময়করণে
কৃতকৃত্যমাত্মানং মন্যমানো ন সমাধাবুৎসহতে | অতঃ
সঙ্গস্ময়য়োস্তেন বর্জনং কর্তব্যম্ || ৫১||
অস্যামেব ফলভূতায়াং বিবেকখ্যাতৌ
পূর্বোক্তসংযমব্যতিরিক্তমুপায়ান্তরমাহ —

ক্ষণতৎক্রময়োঃ সংযমাদ্বিবেকজং জ্ঞানম্ || বিভূতি ৫২||

বৃত্তিঃ —ক্ষণঃ সর্বান্ত্যঃ কালাবয়বো যস্য কলাঃ প্রভবিতুং
ন শক্যন্তে | তথাবিধানাং কালক্ষণানাং যঃ ক্রমঃ পৌর্বাপর্যেণ
পরিণামস্তত্র সংযমাৎ প্রাগুক্তং বিবেকজং জ্ঞানমুৎপদ্যতে | অয়মর্থঃ
—অয়ং কালক্ষণোঽমুষ্মাৎ কালক্ষণাদুত্তরোঽযমস্মাৎ পূর্ব
ইত্যেবংবিধে ক্রমে কৃতসংযমস্যাত্যন্তসূক্ষ্মেঽপি ক্ষণক্রমে যদা
ভবতি সাক্ষাৎকারস্তদাঽন্যদপি সূক্ষ্মং মহদাদি সাক্ষাৎকরোতীতি
বিবেকজ্ঞানোৎপত্তিঃ || ৫২||
অস্যৈব সংযমস্য বিষয়বিবেকোপক্ষেপণায়াহ —

জাতিলক্ষণদেশৈরন্যতানবচ্ছেদাত্তুল্যয়োস্ততঃ প্রতিপত্তিঃ || বিভূতি
৫৩||

বৃত্তিঃ —পদার্থানাং ভেদহেতবো জাতিলক্ষণদেশা
ভবন্তি | ক্বচিদ্ভেদহেতুর্জাতিঃ | যথা গৌরিয়ং মহিষীয়মিতি |
জাত্যা তুল্যয়োর্লক্ষণং ভেদহেতুঃ | ইয়ং কর্বুরেয়মরুণেতি |
জাত্যা লক্ষণেনাভিন্নয়োর্ভেদহেতুর্দেশো দ্রৃষ্টঃ |
যথা তুল্যপ্রমাণয়োরামলকয়োর্ভিন্নদেশস্থিতয়োঃ | যত্র
পুনর্ভেদোঽবধারয়িতুং ন শক্যতে যথা একদেশস্থিতয়োঃ শুক্লয়োঃ
পার্থিবয়োঃ পরমাণ্বোস্তথাবিধে বিষয়ে ভেদায় কৃতসংযমস্য
ভেদেন জ্ঞানমুৎপদ্যতে তদা তদভ্যাসাৎ সূক্ষ্মাণ্যপি তত্ত্বানি ভেদেন
প্রতিপদ্যতে | এতদুক্তং ভবতি —যত্র কেনচিদুপায়েন ভেদো
নাবধারয়িতুং শক্যস্তত্র সংযমাদ্ভবত্যেব ভেদপ্রতিপত্তিঃ || ৫৩||
সূক্ষ্মাণাং তত্ত্বানামুক্তস্য বিবেকজন্যজ্ঞানস্য সঞ্জ্ঞাবিষয়স্বাভাব্যং
ব্যাখ্যাতুমাহ —

তারকং সর্ববিষয়ং সর্বথাবিষয়মক্রমং চেতি বিবেকজং জ্ঞানম্ || বিভূতি ৫৪||

বৃত্তিঃ —উক্তসংযমবলাদেবাঽন্ত্যায়াং ভূমিকায়ামুৎপন্নং জ্ঞানং
তারকমিতি তারয়ত্যগাধাৎ সংসারসাগরাদ্যোগিনমিত্যান্বর্থিক্যা সঞ্জ্ঞয়া
তারকমিত্যুচ্যতে | অস্য বিষয়মাহ —সর্ববিষয়মিতি | সর্বাণি
তত্ত্বানি মহদাদীনি বিষয়োঽস্যেতি সর্ববিষয়ম্ | স্বভাবশ্চাস্য
সর্বথাবিষয়ৎবম্ | সর্বাভিরবস্থাভিঃ স্থূলসূক্ষ্মাদিভেদেন
তৈস্তৈঃ পরিণামৈঃ সর্বেণ প্রকারেণাঽবস্থিতানি তত্ত্বানি বিষয়োঽস্যেতি
সর্বথাবিষয়ম্ |
স্বভাবান্তরমাহ —অক্রমং চেতি |
নিঃশেষনানাবস্থাপরিণতস্যাত্মকভাবগ্রহণেনাস্য [পা০
নিঃশেষনানাঽবস্থাপরিণতদ্বিত্র্যাত্মকভাবগ্রহণে নাঽস্য]ক্রমো
বিদ্যত ইত্যক্রমম্ | সর্বং করতলামলকবদ্যুগপৎ পশ্যতীত্যর্থঃ || ৫৪||
অস্মাচ্চ বিবেকজাৎ তারকাখ্যাজ্জ্ঞানাৎ কিং ভবতীত্যাহ —

সত্ত্বপুরুষয়োঃ শুদ্ধিসাম্যে কৈবল্যম্ || বিভূতি ৫৫||

বৃত্তিঃ —সত্ত্বপুরুষাবুক্তলক্ষণৌ (২.৬,
২.১৮, ২.২০). তয়োঃ শুদ্ধিসাম্যে কৈবল্যম্ | সত্ত্বস্য
সর্বকর্তৃৎবাভিমাননিবৃত্যা স্বকারণানুপ্রবেশঃ শুদ্ধিঃ | পুরুষস্য
শুদ্ধিরুপচরিতভোগাভাব ইতি দ্বয়োঃ সমানায়াং শুদ্ধৌ পুরুষস্য
কৈবল্যমুৎপদ্যতে | মোক্ষো ভবতীত্যর্থঃ || ৫৫||
তদেবমন্তরঙ্গং যোগাঙ্গত্রয়মভিধায় তস্য চ সংযমসঞ্জ্ঞাং
কৃৎবা সংযমস্য বিষয়প্রদর্শনার্থং পরিণামত্রয়মুপপাদ্য
সংযমবলোৎপদ্যমানাঃ পূর্বান্তপরান্তমধ্যভবাঃ সিদ্ধীরুপদর্শ্য
সমাধ্যভ্যাসোপপত্তয়ে [পা০ সমাধ্যাশ্বাসোৎপত্তয়ে ]বাহ্যা
ভুবনজ্ঞানাদিরূপা আভ্যন্তরাশ্চ কায়ব্যূহজ্ঞানাদিরূপাঃ প্রদর্শ্য
সমাধ্যুপয়োগায়েন্দ্রিয়প্রাণজয়াদিপূর্বিকাঃ পরমপুরুষার্থসিদ্ধয়ে
যথাক্রমমবস্থাসহিতভূতজয়েন্দ্রিয়সত্ত্বজয়োদ্ভবাশ্চ
ব্যাখ্যায় বিবেকজ্ঞানোপপত্তয়ে তাংস্তানুপায়ানুপন্যস্য তারকস্য
সর্বসমাধ্যবস্থাপর্যন্তভবস্য স্বরূপমভিধায় তৎসমাপত্তেঃ
কৃতাধিকারস্য চিত্তসত্ত্বস্য স্বকারণানুপ্রবেশাৎ কৈবল্যমুৎপদ্যত
ইত্যভিহিতমিতি নির্ণীতো বিভূতিপাদস্তৃতীয়ঃ |
ইতি ধারেশ্বরভোজদেববিরচিতায়াং রাজমার্তণ্ডাভিধায়াং
পাতঞ্জলবৃত্তৌ বিভূতিপাদস্তৃতীয়ঃ |

ইতি বিভূতিপাদঃ |

অথ কৈবল্যপাদঃ

যদাজ্ঞয়ৈব কৈবল্যং বিনোপায়ৈঃ প্রজায়তে |
তমেকমজমীশানং চিদানন্দময়ং স্তুমঃ ||

ইদানীং বিপ্রতিপত্তিসমুত্থভ্রান্তিনিরাকরণেন যুক্ত্যা
কৈবল্যস্বরূপজ্ঞাপনায় [পা০ জ্ঞানায় ]
কৈবল্যপাদোঽযমারভ্যতে |
তত্র যাঃ পূর্বমুক্তাঃ সিদ্ধয়স্তাসাং
নানাবিধজন্মাদিকারণপ্রতিপাদনদ্বারেণৈবং
বোধয়তি —মদীয়া যা এতাঃ সিদ্ধয়স্তাঃ সর্বাঃ
পূর্বজন্মাভ্যস্তসমাধিবলাজ্জন্মাদিনিমিত্তমাত্রৎবেনাঽঽশ্রিত্য
প্রবর্তন্তে | ততশ্চানেকভবসাধ্যস্য সমাধের্ন
ক্ষতিরস্তীত্যাশ্বাসোৎপাদনায় সমাধিসিদ্ধেশ্চ প্রাধান্যখ্যাপনার্থং
কৈবল্যোপয়োগার্থং চাহ —

জন্মৌষধিমন্ত্রতপঃসমাধিজাঃ সিদ্ধয়ঃ || কৈবল্য ১||

বৃত্তিঃ —কাশ্চন জন্মনিমিত্তা এব সিদ্ধয়ো যথা
পক্ষ্যাদীনামাকাশগমনাদয়ঃ | যথা বা কপিলমহর্ষিপ্রভৃতীনাং
জন্মসমনন্তরমেবোপজায়মানা জ্ঞানাদয়ঃ সাংসিদ্ধিকা গুণাঃ |
ওষধিসিদ্ধয়ো যথা পারদাদিরসায়নাদ্যুপয়োগাৎ | মন্ত্রসিদ্ধির্যথা
মন্ত্রজপাৎ কেষাঞ্চিদাকাশগমনাদিঃ | তপঃসিদ্ধির্যথা বিশ্বামিত্রাদীনাম্ |
সমাধিসিদ্ধিঃ প্রাক্প্রতিপাদিতা |
এতাঃ সিদ্ধয়ঃ পূর্বজন্মক্ষয়িতক্লেশানামেবোপজায়ন্তে | তস্মাৎ
সমাধিসিদ্ধাবিবাঽন্যাসাং সিদ্ধীনাং সমাধিরেব জন্মান্তরাভ্যস্তঃ কারণ্ম্ |
মন্ত্রাদীনি নিমিত্তমাত্রাণি || ১||
ননু নন্দীশ্বরাদিকানাং জাত্যাদিপরিণামোঽস্মিন্নেব জন্মনি দৃশ্যতে | তৎ
কথং জন্মান্তরাভ্যস্তস্য সমাধেঃ কারণৎবমুচ্যত ইত্যাশঙ্ক্যাহ

জাত্যন্তরপরিণামঃ প্রকৃত্যাপূরাৎ || কৈবল্য ২||

বৃত্তিঃ —যোঽযমিহৈব জন্মনি নন্দীশ্বরাদীনাং জাত্যাদিপরিণামঃ
স প্রকৃত্যাপূরাৎ | পাশ্চাত্ত্যা এব হি প্রকৃতয়োঽমুষ্মিঞ্জন্মনি
বিকারানাপূরয়ন্তি জাত্যন্তরাকারেণ পরিণমন্তি || ২||
ননু ধর্মাধর্মাদয়স্তত্র ক্রিয়মানা উপলভ্যন্তে | তৎ কথং
প্রকৃতীনামাপূরকৎবম্ ইত্যাহ —

নিমিত্তমপ্রয়োজকং প্রকৃতীনাং বরণভেদস্তু ততঃ ক্ষেত্রিকবৎ || কৈবল্য ৩||

বৃত্তিঃ —নিমিত্তং ধর্মাদি | তৎ প্রকৃতীনামর্থান্তরপরিণামে
ন প্রয়োজকম্ | ন হি কার্যেণ কারণং প্রবর্ততে | কুত্র তর্হি তস্য
ধর্মাদের্ব্যাপার ইত্যাহ —বরণভেদস্তু ততঃ ক্ষেত্রিকবৎ |
ততস্তস্মাদনুষ্ঠীয়মানাদ্ধর্মাদ্বরণমাবরণকমধর্মাদি তস্যৈব
বিরোধিৎবাদ্ভেদঃ ক্ষয়ঃ ক্রিয়তে | তস্মিন্ প্রতিবন্ধকে ক্ষীণে
প্রকৃতয়ঃ স্বয়মভিমতকার্যায় প্রভবন্তি | দৃষ্টান্তমাহ —
ক্ষেত্রিকবৎ | যথা ক্ষেত্রিকঃ কৃষীবলঃ কেদারাৎ কেদারান্তরং জলং
নিনীষুর্জলপ্রতিবন্ধকাবরণভেদমাত্রং করোতি | তস্মিন্ ভিন্নে জলং
স্বয়মেব প্রসরদ্রূপং পরিণামং গৃহ্ণাতি ন তু জলপ্রসরণে তস্য
কশ্চিৎ প্রয়ত্নঃ | এবং ধর্মাদের্বোদ্ধব্যম্ || ৩||
যদা সাক্ষাৎকৃততত্ত্বস্য যোগিনো যুগপৎ
কর্মফলভোগায়াঽঽত্মীয়নিরতিশয়বিভূত্যনুভবাদ্
যুগপদনেকশরীরনির্মিৎসা জায়তে তদা কুতস্তানি চিত্তানি
প্রভবন্তীত্যাহ —

নির্মাণচিত্তান্যস্মিতামাত্রাৎ || কৈবল্য ৪||

বৃত্তিঃ —যোগিনঃ স্বয়ং নির্মিতেষু কায়েষু যানি চিত্তানি তানি
মূলকারণাদস্মিতামাত্রাদেব তদিচ্ছয়া প্রসরন্তি | অগ্নের্বিস্ফুলিঙ্গা
ইব যুগপৎ পরিণমন্তি || ৪||
ননু বহূনাং চিত্তানাং ভিন্নাভিপ্রায়ৎবান্নৈককার্যকর্তৃৎবং স্যাদিত্যাহ

প্রবৃত্তিভেদে প্রয়োজকং চিত্তমেকমনেকেষাম্ || কৈবল্য ৫||

বৃত্তিঃ —তেষামনেকেষাং চেতসাং প্রবৃত্তিভেদে ব্যাপারনানাৎব
এঅকং যোগিনশ্চিত্তং প্রয়োজকং প্রেরকমধিষ্ঠাতৃৎবেন |
তেন ন ভিন্নমতৎবম্ | অয়মর্থঃ —যথাত্মীয়শরীরে
মনশ্চক্ষুঃপাণ্যাদীনি যথেচ্ছং প্রেরয়ত্যধিষ্ঠাতৃৎবেনৈএবং
কায়ান্তরেষ্বপীতি || ৫||
জন্মাদিপ্রভবৎবাৎ সিদ্ধীনাং চিত্তমপি তৎপ্রভবং পঞ্চবিধমেব |
অতো জন্মাদিপ্রভবাচ্চিত্তাৎ সমাধিপ্রভবস্য চিত্তস্য
বৈলক্ষণ্যমাহ —

তত্র ধ্যানজমনাশয়ম্ || কৈবল্য ৬||

বৃত্তিঃ —ধ্যানজং সমাধিজং যচ্চিত্তং তৎ পঞ্চসু
মধ্যেঽনাশয়ং কর্মবাসনারহিতমিত্যর্থঃ || ৬||
যথেতরচিত্তেভ্যো যোগিনশ্চিত্তং বিলক্ষণং ক্লেশাদিরহিতং তথা
কর্মাপি বিলক্ষণমিত্যাহ —

কর্মাশুক্লাকৃষ্ণং যোগিনস্ত্রিবিধমিতরেষাম্ || কৈবল্য ৭||

বৃত্তিঃ —শুভফলদং কর্ম যাগাদি শুক্লম্ | অশুভফলদং
ব্রহ্মহত্যাদি কৃষ্ণম্ | উভয়সঙ্কীর্ণং শুক্লকৃষ্ণম্ | তত্র
শুক্লং কর্ম বিচক্ষণানাং দানতপঃস্বাধ্যায়াদিমতাং পুরুষাণাম্ |
কৃষ্ণং কর্ম দানবানাম্ [নারকানাম্ ]| শুক্লকৃষ্ণং
মনুষ্যাণাম্ | যোগিনান্তু সংন্যাসবতাং ত্রিবিধকর্মবিপরীতং যৎ
ফলত্যাগানুসন্ধানেনৈবানুষ্ঠানান্ন কিঞ্চিৎ ফলমারভতে || ৭||
অস্যৈব কর্মণঃ ফলমাহ —

ততস্তদ্বিপাকানুগুণানামেবাভিব্যক্তির্বাসনানাম্ || কৈবল্য ৮||

বৃত্তিঃ —ইহ হি দ্বিবিধা কর্মবাসনাঃ স্মৃতিমাত্রফলা
জাত্যায়ুর্ভোগফলাশ্চ | তত্র জাত্যায়ুর্ভোগফলা একানেকজন্মভবা
ইত্যনেন পূর্বমেব (২.১২–১৩)কৃতনির্ণয়াঃ | যাস্তু
স্মৃতিমাত্রফলাস্তাস্ততঃ কর্মণো যেন কর্মণা যাদৃক্ শরীরমারব্ধং
দেবমনুষ্যতির্যগাদিভেদেন তস্য বিপাকস্যাঽনুগুণা অনুরূপা যা
বাসনাস্তাসামেব তস্মাদভিব্যক্তির্বাসনানাং ভবতি | অয়মর্থঃ —
যেন কর্মণা পূর্বং দেবতাদিশরীরমারব্ধং জাত্যন্তরশতব্যবধানেন
পুনস্তথাবিধস্যৈব শরীরস্যারম্ভে তদনুরূপা এব স্মৃতিফলা
বাসনাঃ প্রকটীভবন্তি | লোকান্তরেষ্বেবার্থেষু তস্য স্মৃত্যাদয়ো
জায়ন্তে | ইতরাস্তু সত্যোঽপি অব্যক্তসঞ্জ্ঞাস্তিষ্ঠন্তি ন তস্যাং দশায়াং
নারকাদিশরীরোদ্ভবা বাসনা ব্যক্তিমায়ান্তি || ৮||
আসামেব বাসনানাং কার্যকারণাভাবানুপপত্তিমাশঙ্ক্য সমর্থয়িতুমাহ

জাতিদেশকালব্যবহিতানামপ্যানন্তর্যং স্মৃতিসংস্কারয়োরেকরূপৎবাৎ || কৈবল্য ৯||

বৃত্তিঃ —ইহ নানায়োনিষু ভ্রমতাং সংসারিণাং কাঞ্চিদ্যোনিমনুভূয়
যদা যোন্যন্তরসহস্রব্যবধানেন পুনস্তামেব যোনিং প্রতিপদ্যতে তদা
তস্যাং পূর্বানুভূতায়াং যোনৌ তথাবিধশরীরাদিব্যঞ্জকাপেক্ষয়া
বাসনা যাঃ প্রকটীভূতা আসংস্তাস্তথাবিধব্যঞ্জকাভাবাত্তিরোহিতাঃ
পুনস্তথাবিধব্যঞ্জকশরীরাদিলাভে প্রকটীভবন্তি |
জাতিদেশকালব্যবধানেঽপি তাসাং স্বানুরূপস্মৃত্যাদিফলসাধন
আনন্তর্যং নৈরন্তর্যম্ | কুতঃ | স্মৃতিসংস্কারয়োরেকরূপৎবাৎ | তথাহি

অনুষ্ঠীয়মানাৎ কর্মণশ্চিত্তসত্ত্বে বাসনারূপঃ সংস্কারঃ
সমুৎপদ্যতে | স চ স্বর্গনরকাদীনাং ফলানাং চাঙ্কুরীভাবঃ
কর্মণাং বা যাগাদীনাং শক্তিরূপতয়াঽবস্থানম্ | কর্তুর্বা
তথাবিধভোগ্যভোক্তৃৎবরূপং সামর্থ্যম্ | সংস্কারাৎ স্মৃতিঃ
স্মৃতেশ্চ সুখদুঃখোপভোগস্তদনুভবাচ্চ পুনরপি
সংস্কারস্মৃত্যাদয়ঃ | এবং চ যস্য স্মৃতিসংস্কারাদয়ো
ভিন্নাস্তস্যাঽঽনন্তর্যাভাবে দুর্লভঃ কার্যকারণভাবঃ | অস্মাকং তু
যদানুভব এব সংস্কারীভবতি সংস্কারশ্চ স্মৃতিরূপতয়া পরিণমতে
তদৈকস্যৈব চিত্তস্যানুসন্ধাতৃৎবেন স্থিতৎবান্ন কার্যকারণভাবো
দুর্ঘটঃ || ৯||
ভবৎবানন্তর্যং কার্যকারণভাবশ্চ বাসনানাম্ যদা তু
প্রথমমেবানুভবঃ প্রবর্ততে তদা কিং বাসনানিমিত্ত উত নির্নিমিত্ত
ইতি শঙ্কাং ব্যপনেতুমাহ —

তাসামনাদিৎবং চাঽঽশিষো নিত্যৎবাৎ || কৈবল্য ১০||

বৃত্তিঃ —তাসাং বাসনানামনাদিৎবম্ | ন বিদ্যত আদির্যস্য তস্য
ভাবস্তত্ত্বং তাসামাদির্নাস্তীত্যর্থঃ | কুত ইতি | আশিষো নিত্যৎবাৎ |
যেয়মাশীর্মহামোহরূপা সদৈব সুখসাধনানি মে ভূয়াসুর্মা
কদাচন তৈর্মে বিয়োগো ভূদিতি যঃ সঙ্কল্পবিশেষো বাসনানাং
কারণং তস্য নিত্যৎবাদনাদিৎবমিত্যর্থঃ | এতদুক্তং ভবতি —
কারণস্য সন্নিহিতৎবাদনুভবসংস্কারাদীনাং কার্যাণাং প্রবৃত্তিঃ
কেন বার্যতে | অনুভবসংস্কারানুবিদ্ধং সঙ্কোচবিকাশধর্মি চিত্তং
তত্তদভিব্যঞ্জকবিপাকলাভাৎ তত্তৎফলরূপতয়া পরিণমত ইত্যর্থঃ || ১০||
তাসামানন্ত্যাদ্ধানং কথং ভবতীত্যাশঙ্ক্য হানোপায়মাহ —

হেতুফলাশ্রয়ালম্বনৈঃ সঙ্গৃহীতৎবাদেষামভাবে তদভাবঃ || কৈবল্য
১১||

বৃত্তিঃ —বাসনানামনন্তরানুভবো হেতুস্তস্যাপ্যনুভবস্য
রাগাদয়স্তেষামবিদ্যেতি সাক্ষাৎ পারম্পর্যেণ হেতুঃ | ফলং শরীরাদি
স্মৃত্যাদি চ | আশ্রয়ো বুদ্ধিসত্ত্বম্ | আলম্বনং যদেবানুভবস্য
তদেব বাসনানাম্ | অতস্তৈর্হেতুফলাশ্রয়ালম্বনৈরনন্তানামপি
বাসনানাং সঙ্গৃহীতৎবাৎ | এষাং হেৎবাদীনামভাবে জ্ঞানয়োগাভ্যাং
দগ্ধবীজকল্পৎবে বিহিতে নির্মূলৎবান্ন বাসনাঃ প্ররোহন্তি ন
কার্যমারভন্ত ইতি তাসামভাবঃ || ১১||
ননু প্রতিক্ষণং চিত্তস্য নশ্বরৎবোপলব্ধের্বাসনানাং
তৎফলানাং চ কার্যকারণভাবেন যুগপদভাবিৎবাদ্ভেদে
কথমেকৎবমিত্যাশঙ্ক্যৈকৎবসমর্থনায়াহ —

অতীতানাগতং স্বরূপতোঽস্ত্যধ্বভেদাদ্ধর্মাণাম্ || কৈবল্য ১২||

বৃত্তিঃ —ইহাত্যন্তমসতাং ভাবানামুৎপত্তির্ন যুক্তিমতী
তেষাং সত্ত্বসম্বন্ধায়োগাৎ | ন হি শশবিষাণাদীনাং ক্বচিদপি
সত্ত্বসম্বন্ধো দৃষ্টঃ | নিরুপাখ্যে চ কার্যে কিমুদ্দিশ্য কারণানি
প্রবর্তেরন্ | ন হ্যসন্তং বিষয়মালোচ্য কশ্চিৎ প্রবর্ততে | সতামপি
বিরোধান্নাভাবসম্বন্ধোঽস্তি | যৎ স্বরূপং লব্ধসত্তাকং তৎ কথং
নিরুপাখ্যতামভাবরূপতাং বা ভজতে ন বিরুদ্ধং রূপং স্বীকরোতীত্যর্থঃ
.
তস্মাৎ সতামভাবাসম্ভবাদসতাং চোৎপত্ত্যসম্ভবাৎ
তৈস্তৈর্ধর্মৈর্বিপরিণমমানো ধর্মী সদৈকরূপ এবাবতিষ্ঠতে |
ধর্মাস্তু ত্র্যধ্বকৎবেন [পা০ অধিকৎবেন ]ত্রৈকালিকৎবেন
তত্র ব্যবস্থিতাঃ স্বস্মিন্ স্বস্মিন্নধ্বনি ব্যবস্থিতাঃ ন
স্বরূপং ত্যজন্তি | বর্তমানেঽধ্বনি ব্যবস্থিতাঃ কেবলং
ভোগ্যতাং ভজন্তে | তস্মাদ্ধর্মাণামেবাতীতানাগতাদ্যধ্বভেদাৎ
তেনৈব রূপেণ কার্যকারণভাবোঽস্মিন্ দর্শনে প্রতিপদ্যতে |
তস্মাদপবর্গপর্যন্তমেকমেব চিত্তং ধর্মিতয়াঽনুবর্তমানং ন
নিহ্নোতুং পার্যতে || ১২||
ত এতে ধর্মধর্মিণঃ কিংরূপা ইত্যাহ —

তে ব্যক্তসূক্ষ্মা গুণাত্মানঃ || কৈবল্য ১৩||

বৃত্তিঃ —য এতে ধর্মধর্মিণঃ
প্রোক্তাস্তে ব্যক্তসূক্ষ্মভেদেন ব্যবস্থিতাঃ গুণাঃ
সত্ত্বরজস্তমোরূপাস্তদাত্মানস্তৎস্বভাবাস্তৎপরিণামরূপা ইত্যর্থঃ |
যতঃ সত্ত্বরজস্তমোভিঃ সুখদুঃখমোহরূপৈঃ সর্বাসাং
বাহ্যাভ্যন্তরভেদভিন্নানাং ভাবব্যক্তীনামন্বয়ানুগমো দৃশ্যতে |
যদ্যদন্বয়ি তত্তৎ পরিণামরূপং দৃষ্টম্ | যথা ঘটাদয়ো
মৃদন্বিতা মৃৎপরিণামরূপাঃ || ১৩||
যদ্যেতে ত্রয়ো গুণাঃ সর্বত্র মূলকারণং কথমেকো ধর্মীতি ব্যপদেশ
ইত্যাশঙ্ক্যাহ —

পরিণামৈকৎবাদ্বস্তুতত্ত্বম্ || কৈবল্য ১৪||

বৃত্তিঃ —যদ্যপি ত্রয়ো গুণাস্তথাপি
তেষামঙ্গাঙ্গিভাবগমনলক্ষণো যঃ পরিণামঃ
ক্বচিৎ সত্ত্বমঙ্গি ক্বচিদ্রজঃ ক্বচিচ্চ তম
ইত্যেবংরূপস্তস্যৈকৎবাদ্বস্তুনস্তত্ত্বমেকমুচ্যতে | যথা —ইয়ং
পৃথিবী | অয়ং বায়ুরিত্যেবমাদি || ১৪||
ননু জ্ঞানব্যতিরিক্তে সত্যর্থে বস্ত্বেকমনেকং বা বক্তুং যুজ্যতে | যদা
চ বিজ্ঞানমেব বাসনাবশাৎ কার্যকারণভাবেনাবস্থিতং তথা তথা
প্রতিভাতি তদা কথমেতচ্ছক্যতে বক্তুমিত্যাশঙ্ক্যাহ —

বস্তুসাম্যে চিত্তভেদাত্তয়োর্বিবিক্তঃ পন্থাঃ || কৈবল্য ১৫||

বৃত্তিঃ —তয়োর্জ্ঞানার্থয়োর্বিবিক্তঃ পন্থা বিবিক্তো মার্গো
দেশ ইতি যাবৎ | কথম্ | বস্তুসাম্যে চিত্তভেদাৎ | সমানে
বস্তুনি স্ত্র্যাদাবুপলভ্যমানে নানাপ্রমাতৃঈণাং চিত্তস্য ভেদঃ
সুখদুঃখমোহরূপতয়া সমুপলভ্যতে | তথাহি একস্যাং রূপলাবণ্যবত্যাং
যোষিতি উপলভ্যমানায়াং সরাগস্য সুখমুৎপদ্যতে সপত্ন্যাস্তু দ্বেষঃ
পরিব্রাজকাদের্ঘৃণেত্যেকস্মিন্ বস্তুনি নানাবিধচিত্তোদয়াৎ কথং
চিত্তকার্যৎবং বস্তুন একচিত্তকার্যৎবে বস্ত্বেকরূপতয়ৈবাঽবভাসেত
.
কিঞ্চ চিত্তকার্যৎবে বস্তুনো যদীয়স্য চিত্তস্য তদ্বস্তু কার্যং
তস্মিন্নর্থান্তরব্যাসক্তে তদ্বস্তু ন কিঞ্চিৎ স্যাৎ | ভবৎবিতি
চেন্ন | তদেব কথমন্যৈর্বহুভিরুপলভ্যেত | উপলভ্যতে চ
তস্মান্ন চিত্তকার্যম্ | অথ যুগপদ্বহুভিঃ সোঽর্থঃ ক্রিয়তে তদা
বহুনির্মিতস্যার্থস্যৈকনির্মিতাদ্বৈলক্ষণ্যং স্যাৎ | যদা তু বৈলক্ষণ্যং
নেষ্যতে তদা কারণভেদে সতি কার্যভেদস্যাভাবে নির্হেতুকমেকরূপং
বা জগৎ স্যাৎ | এতদুক্তং ভবতি —সত্যপি ভিন্নে কারণে যদি
কার্যস্যাভেদস্তদা সমগ্রং জগন্নানাবিধকারণজন্যমেকরূপং
স্যাৎ | কারণভেদাননুগমাৎ স্বাতন্ত্র্যেণ নির্হেতুকং বা স্যাৎ |
যদ্যেবং কথং তেন ত্রিগুণাত্মনা চিত্তেনৈকস্যৈব প্রমাতুঃ
সুখদুঃখমোহময়ানি জ্ঞানানি জন্যন্তে [পা০ কথং তেন
ত্রিগুণাত্মনাঽর্থে নৈকস্যৈব প্রমাতুঃ সুখদুঃখমোহভয়ানি জ্ঞানানি
ন জন্যন্তে]| মৈবম্ | যথাঽর্থস্ত্রিগুণস্তথা চিত্তমপি
ত্রিগুণম্ | তস্যার্থপ্রতিভাসোৎপত্তৌ ধর্মাদয়ঃ সহকারিকারণম্ |
তদুদ্ভবাভিভববশাৎ কদাচিচ্চিত্তস্য তেন তেন রূপেণাভিব্যক্তিঃ
.
তথা চ —কামুকস্য সন্নিহিতায়াং যোষিতি ধর্মসহকৃতং
চিত্তং সত্ত্বস্যাঙ্গিতয়া পরিণমমানং সুখময়ং ভবতি |
তদেবাঽধর্মসহকারি রজসোঽঙ্গিতয়া দুঃখরূপং সপত্নীমাত্রস্য
ভবতি | তীব্রাধর্মসহকারিতয়া পরিণমমানং তমসোঽঙ্গিৎবেন
কোপনায়াঃ সপত্ন্যা মোহময়ং ভবতি | তস্মাদ্বিজ্ঞানব্যতিরেকেণাস্তি
গ্রাহ্যার্থঃ [পা০ গ্রাহ্যোঽর্থঃ]|
তদেবং বিজ্ঞানার্থয়োস্তাদাত্ম্যবিরোধান্ন কার্যকারণভাবঃ | কারণাভেদে
সত্যপি কার্যভেদপ্রসঙ্গাদিতি জ্ঞানাদ্ব্যতিরিক্তৎবমর্থস্য ব্যবস্থিতম্ || ১৫||
যদ্যেবং জ্ঞানং চেৎ প্রকাশকৎবাদ্গ্রহণস্বভাবমর্থশ্চ
প্রকাশ্যৎবাদ্গ্রাহ্যস্বভাবস্তদা যুগপৎ সর্বানর্থান্ কথং ন গৃহ্ণাতি |
ন স্মরতি চেত্যাশঙ্কাং পরিহর্তুমাহ —

তদুপরাগাপেক্ষিৎবাচ্চিত্তস্য বস্তু জ্ঞাতাজ্ঞাতম্ || কৈবল্য ১৬||

বৃত্তিঃ —তস্যার্থস্যোপরাগাদাকারসমর্পণাচ্চিত্তে বাহ্যং বস্তু
জ্ঞাতমজ্ঞাতং চ ভবতি | অয়মর্থঃ —সর্বঃ পদার্থ আত্মলাভে
চিত্তং সামগ্রীমপেক্ষতে | নীলাদিজ্ঞানং চোপজায়মানমিন্দ্রিয়প্রণালিকয়া
সমাগতমর্থোপরাগং সহকারিকারণৎবেনাপেক্ষতে | ব্যতিরিক্তস্যার্থস্য
সম্বন্ধাভাবাদ্গ্রহীতুমশক্যৎবাৎ |
ততশ্চ যেনৈবার্থেনাস্য স্বরূপোপরাগঃ কৃতস্তমেবার্থং
তজ্জ্ঞানং ব্যবহারয়োগ্যতাং নয়তি | ততঃ সোঽর্থো জ্ঞাত উচ্যতে |
যেন চাঽঽকারো ন সমর্পিতঃ স ন জ্ঞাতৎবেন ব্যবহ্রিয়তে |
যস্মিংশ্চানুভূতেঽর্থে সাদৃশ্যাদিরর্থঃ সংস্কারমুদ্বোধয়ন্
সহকারিতাং প্রতিপদ্যতে তস্মিন্নেবার্থে স্মৃতিরুপজায়ত ইতি ন সর্বত্র
জ্ঞানং নাপি স্মৃতিরিতি ন কশ্চিদ্বিরোধঃ || ১৬||
যদ্যেবং প্রমাতাপি পুরুষো যস্মিন্ কালে নীলং বেদয়তে ন তস্মিন্ কালে
পীতাদিমতশ্চিত্তসত্ত্বস্যাপি কদাচিৎ গ্রহীতৃরূপৎবাদাকারগ্রহণে
পরিণামিৎবং প্রাপ্তমিত্যাশঙ্কাং পরিহর্তুমাহ —

সদা জ্ঞাতাশ্চিত্তবৃত্তয়ঃ তৎপ্রভোঃ পুরুষস্যাপরিণামিৎবাৎ || কৈবল্য ১৭||

বৃত্তিঃ —যা এতাশ্চিত্তস্য প্রমাণবিপর্যয়াদিরূপা বৃত্তয়ঃ,
তাস্তৎপ্রভোশ্চিত্তস্য গ্রহীতুঃ পুরুষস্য সদা সর্বকালমেব
জ্ঞাতাঃ [পা০ গ়্যেয়াঃ]| তস্য চিদ্রূপতয়াঽপরিণামিৎবাৎ
পরিণামিৎবাভাবাদিত্যর্থঃ | যদ্যসৌ পরিণামী স্যাৎ তদা পরিণামস্য
কাদাচিৎকৎবাৎ তাসাং চিত্তবৃত্তীনাং সদা জ্ঞাতৎবং নোপপদ্যেত |
অয়মর্থঃ —পুরুষস্য চিদ্রূপস্য সদৈবাধিষ্ঠাতৃৎবেন
ব্যবস্থিতস্য যদন্তরঙ্গং নির্মলং সত্ত্বম্ তস্যাপি
সদৈবাবস্থিতৎবাদ্যেনার্থেনোপরক্তং ভবতি তথাবিধস্যার্থস্য সদৈব
চিচ্ছায়াসঙ্ক্রান্তিসদ্ভাবস্তস্যাং সত্যাং সিদ্ধং জ্ঞাতৃৎবমিতি ন
কদাচিৎ কাচিৎ পরিণামিৎবাশঙ্কা || ১৭||
ননু চিত্তমেব যদি সত্ত্বোৎকর্ষাৎ প্রকাশকম্ তদা
স্বপরপ্রকাশরূপৎবাদাত্মানমর্থং চ প্রকাশয়তীতি তাবতৈব
ব্যবহারসমাপ্তিঃ | কিং গ্রহীত্রন্তরেণেত্যাশঙ্কামপনেতুমাহ —

ন তৎস্বাভাসং দৃশ্যৎবাৎ || কৈবল্য ১৮||

বৃত্তিঃ —তচ্চিত্তং স্বাভাসং স্বপ্রকাশকং ন ভবতি
পুরুষবেদ্যং ভবতীতি যাবৎ | কুতঃ | দৃশ্যৎবাৎ | যৎ কিল দৃশ্যং
তৎ দ্রষ্টৃবেদ্যং দৃষ্টং যথা ঘটাদি | দৃশ্যং চ চিত্তং
তস্মান্ন স্বাভাসম্ || ১৮||
ননু সাধ্যাবিশিষ্টোঽযং হেতুঃ | দৃশ্যৎবমেব চিত্তস্যাসিদ্ধম্ |
কিঞ্চ স্ববুদ্ধিসংবেদনদ্বারেণ হিতাহিতপ্রাপ্তিপরিহাররূপা বৃত্তয়ো
দৃশ্যন্তে | তথাহি —ক্রুদ্ধোঽহং ভীতোঽহমত্র মে রাগ
ইত্যেবমাদ্যা সংবিৎ বুদ্ধেরসংবেদনে নোপপদ্যত ইত্যাশঙ্কামপনেতুমাহ

একসময়ে চোভয়ানবধারণম্ || কৈবল্য ১৯||

বৃত্তিঃ —অর্থস্য সংবিত্তিরিদন্তয়া ব্যবহারয়োগ্যতাপাদনম্ |
অয়মর্থঃ সুখহেতুর্দুঃখহেতুর্বেতি | বুদ্ধেঃ সংবিদহমিত্যেবমাকারেণ
সুখদুঃখরূপতয়া ব্যবহারক্ষমতাপাদনম্ | এবংবিধং চ
ব্যাপারদ্বয়মর্থপ্রত্যক্ষকালে ন যুগপৎ কর্তুং শক্যং বিরোধাৎ | ন
হি বিরুদ্ধয়োর্ব্যাপারয়োর্যুগপৎ সম্ভবোঽস্তি |
অত একস্মিন্ কাল উভয়স্য স্বরূপস্যাঽর্থস্য
চাবধারয়িতুমশক্যৎবান্ন চিত্তং স্বপ্রকাশকং ভবতি | কিন্তু
এবংবিধব্যাপারদ্বয়নিষ্পাদ্যস্য ফলদ্বয়স্যাসংবেদনাদ্বহির্মুখতয়ৈব
স্বনিষ্ঠৎবেন চিত্তস্য স্বয়ং বেদনাদর্থনিষ্ঠমেব ফলং ন
স্বনিষ্ঠমিত্যর্থঃ || ১৯||
ননু মা ভূদ্বুদ্ধেঃ স্বয়ং গ্রহণং বুদ্ধ্যন্তরেণ
ভবিষ্যতীত্যাশঙ্ক্যাহ —

চিত্তান্তরদৃশ্যে বুদ্ধিবুদ্ধেরতিপ্রসঙ্গঃ স্মৃতিসঙ্করশ্চ || কৈবল্য ২০||

বৃত্তিঃ —যদি হি বুদ্ধির্বুদ্ধ্যন্তরেণ বেদ্যতে সাঽপি বুদ্ধিঃ
স্বয়মবুদ্ধা বুদ্ধ্যন্তরং প্রকাশয়িতুমসমর্থেতি তস্যা গ্রাহকং [
পা০ বোধকম্ ]বুদ্ধ্যন্তরং কল্পনীয়ং তস্যাঽপ্যন্যদিত্যনবস্থানাৎ
পুরুষান্তরেণার্থপ্রতীতির্ন স্যাৎ | ন হি প্রতীতবপ্রতীতায়ামর্থঃ
প্রতীতো ভবতি |
স্মৃতিসঙ্করশ্চ প্রাপ্নোতি —রূপে রসে বা সমুৎপন্নায়াং
বুদ্ধৌ তদ্গ্রাহিকাণামনন্তানাং বুদ্ধীনাং সমুৎপত্তের্বুদ্ধিজনিতৈঃ
সংস্কারৈর্যদা যুগপদ্বহ্বয়ঃ স্মৃতয়ঃ ক্রিয়ন্তে তদা
বুদ্ধেরপর্যবসানাদ্বুদ্ধিস্মৃতীনাং চ বহ্বীনাং যুগপদুৎপত্তেঃ
কস্মিন্নর্থে স্মৃতিরিয়মুৎপন্নেতি জ্ঞাতুমশ্ক্যৎবাৎ স্মৃতীনাং সঙ্করঃ
স্যাৎ | ইয়ং রূপে স্মৃতিরিয়ং রসে স্মৃতিরিতি ন জ্ঞায়েত || ২০||
ননু বুদ্ধেঃ স্বপ্রকাশৎবাভাবে বুদ্ধ্যন্তরে চাসংবেদনে কথময়ং
বিষয়সংবেদনরূপো ব্যবহার ইত্যাশঙ্ক্য স্বসিদ্ধান্তমাহ —

চিত্তেরপ্রতিসঙ্ক্রমায়াস্তদাকারাপত্তৌ স্ববুদ্ধিসংবেদনম্ || কৈবল্য
২১||

বৃত্তিঃ —পুরুষশ্চিদ্রূপৎবাচ্চিতিঃ সাঽপ্রতিসঙ্ক্রমা |
ন বিদ্যতে প্রতিসক্রমোঽন্যত্র গমনং যস্যাঃ সা তথোক্তা |
অন্যেনাসঙ্কীর্ণেতি যাবৎ | যথা গুণা অঙ্গাঙ্গিভাবলক্ষণে পরিণামে
অঙ্গিনং গুণং সঙ্ক্রামন্তি তদ্রূপতামিবাঽঽপদ্যন্তে | যথা বা লোকে
পরমাণবঃ প্রসরন্তো বিষয়মারূপয়ন্তি [পা০ আরোপয়ন্তি ]
নৈবং চিতিশক্তিস্তস্যাঃ সর্বদৈকরূপতয়া সুপ্রতিষ্ঠিতৎবেন
ব্যবস্থিতৎবাৎ |
অতস্তৎসন্নিধানে যদা বুদ্ধিস্তদাকারতামাপদ্যতে চেতনেবোপজায়তে
[পা০ চেতনোপজায়তে ]বুদ্ধিবৃত্তিপ্রতিসক্রান্তা চ
যদা চিচ্ছক্তির্বুদ্ধিবৃত্তিবিশিষ্টতয়া সংবেদ্যতে [পা০
বুদ্ধিবৃত্ত্যাবেশাত্তথা সম্পদ্যতে ]তদা বুদ্ধেঃ স্বস্যা আত্মনো
বেদনং সংবেদনং ভবতীত্যর্থঃ || ২১||
ইত্থং স্বসংবিদিতং চিত্তং সর্বানুগ্রহণসামর্থ্যেন
সকলব্যবহারনির্বাহক্ষমং ভবিষ্যতীত্যাহ —

দ্রষ্টৃদৃশ্যোপরক্তং চিত্তং সর্বার্থম্ || কৈবল্য ২২||

বৃত্তিঃ —দ্রষ্টা পুরুষস্তেনোপরক্তং তৎসন্নিধানেন তদ্রূপতামিব
প্রাপ্নোতি দৃশ্যোপরক্তং বিষয়োপরক্তং গৃহীতবিষয়াকারপরিণামং
যদা ভবতি তদা তদেব চিত্তং সর্বার্থগ্রহণসমর্থং ভবতি |
যথা নির্মলং স্ফটিকদর্পণাদ্যেব প্রতিবিম্বগ্রহণসমর্থম্ | এবং
রজস্তমোভ্যামনভিভূতং সত্ত্বং শুদ্ধৎবাচ্চিচ্ছায়াগ্রহণসমর্থং
ভবতি | ন পুনরশুদ্ধৎবাদ্রজস্তমসী |
তন্ন্যগ্ভূতরজস্তমোরূপমঙ্গিতয়া সত্ত্বং
নিশ্চলপ্রদীপশিখাকারং সদৈকরূপতয়া পরিণমমানং
চিচ্ছায়াগ্রহণসামর্থ্যাদামোক্ষপ্রাপ্তেরবতিষ্ঠতে |
যথাঽযস্কান্তসন্নিধানে লোহস্য চলনমাবির্ভবত্যেবং
চিদ্রূপপুরুষসন্নিধানে সত্ত্বস্যাভিব্যঙ্গ্যমভিব্যজ্যতে চৈতন্যম্ |
অত এবাস্মিন্দর্শনে দ্বে চিচ্ছক্তী —
নিত্যোদিতাঽভিব্যঙ্গ্যা চ | নিত্যোদিতা চিচ্ছক্তিঃ
পুরুষসন্নিধানাদভিব্যক্তমভিব্যঙ্গ্যচৈতন্যং সত্ত্বম্ | অভিব্যঙ্গ্যা
চিচ্ছক্তিস্তদত্যন্তসন্নিহিতৎবাদন্তরঙ্গং পুরুষস্য ভোগ্যতাং
প্রতিপদ্যতে | তদেব শান্তব্রহ্মবাদিভিঃ সাঙ্খ্যৈঃ পুরুষস্য
পরমাত্মনোঽধিষ্ঠেয়ং কর্মানুরূপং সুখদুঃখভোক্তৃতয়া
ব্যপদিশ্যতে |
যত্ত্বনুদ্রিক্তৎবাদেকস্যাপি গুণস্য কদাচিৎ কস্যচিদঙ্গিৎবাৎ ত্রিগুণং
প্রতিক্ষণং পরিণমমানং সুখদুঃখমোহাত্মকমনির্মলং তত্তস্মিন্
কর্মানুরূপে শুদ্ধে সত্ত্বে স্বাকারসমর্পণদ্বারেণ সংবেদ্যতামাপাদয়তি
তচ্ছুদ্ধমাদ্যং চিত্তসত্ত্বমেবেতি প্রতিসঙ্ক্রান্তচিচ্ছায়মন্যতো
গৃহীতবিষয়াকারেণ চিত্তেনোপঢৌকিতমাকারং চিৎসঙ্ক্রান্তিবলাৎ
চেতনায়মানং বাস্তবচৈতন্যাভাবেঽপি সুখদুঃখস্বরূপং
ভোগমনুভবতি | স এবং ভোগোঽত্যন্তসন্নিধানেন
বিবেকাগ্রহণাদভোক্তুরপি পুরুষস্য ভোগ ইতি ব্যপদিষ্যতে |
অনেনৈবাভিপ্রায়েণ বিন্ধ্যবাসিনোক্তম্ —সত্ত্বতপ্যৎবমেব
পুরুষতপ্যৎবমিতি | অন্যত্রাপি —প্রতিবিম্বে
প্রতিবিম্বমানচ্ছায়াসদৃশচ্ছায়োদ্ভবঃ প্রতিবিম্বশব্দেনোচ্যতে |
এবং সত্ত্বেঽপি পৌরুষেয়চিচ্ছায়াসদৃশচিদভিব্যক্তিঃ
প্রতিসঙ্ক্রান্তিশব্দার্থ ইতি |
ননু প্রতিবিম্বং নাম নির্মলস্য নিয়তপরিণামস্য নির্মলে দৃষ্টম্ |
যথা মুখস্য দর্পণে | অত্যন্তনির্মলস্য ব্যাপকস্যাপরিণামিনঃ
পুরুষস্য তস্মাদত্যন্তনির্মলাৎ পুরুষাদনির্মলে সত্ত্বে কথং
প্রতিবিম্বনমুপপদ্যতে |
উচ্যতে —প্রতিবিম্বনস্য স্বরূপমনবগচ্ছতা ভবতেদমভ্যধায়ি |
যৈব সত্ত্বগতায়া অভিব্যঙ্গ্যায়াশ্চিচ্ছক্তেঃ পুরুষস্য
সান্নিধ্যাদভিব্যক্তিঃ সৈব প্রতিবিম্বনমুচ্যতে | যাদৃশী পুরুষগতা
চিচ্ছক্তিস্তচ্ছায়াপ্যত্রাবির্ভবতি |
যদপ্যুক্তমত্যন্তনির্মলঃ পুরুষঃ কথমনির্মলে সত্ত্বে
প্রতিসঙ্ক্রামতীতি তদপ্যনৈকান্তিকম্ | নৈর্মল্যাদপকৃষ্টেঽপি
জলাদাবাদিত্যাদয়ঃ প্রতিসঙ্ক্রান্তাঃ সমুপলভ্যন্তে |
যদপ্যুক্তমনবচ্ছিন্নস্য নাস্তি প্রতিসঙ্ক্রান্তিরিতি তদপ্যয়ুক্তং
ব্যাপকস্যাপ্যাকাশস্য দর্পনাদৌ প্রতিসঙ্ক্রান্তিদর্শনাৎ | এবং সতি ন
কাচিদনুপপত্তিঃ প্রতিবিম্বদর্শনস্য |
ননু সাত্ত্বিকপরিণামরূপে বুদ্ধিসত্ত্বে
পুরুষসন্নিধানাদভিব্যঙ্গ্যায়াশ্চিচ্ছক্তের্বাহ্যাকারসঙ্ক্রান্তৌ
পুরুষস্য সুখদুঃখরূপো ভোগ ইত্যুক্তম্ তদনুপপন্নম্ | তদেব
চিত্তসত্ত্বং প্রকৃতাবপরিণতায়াং কথং সম্ভবতি কিমর্থশ্চ
তস্যাঃ পরিণামঃ |
অথোচ্যেত পুরুষস্যার্থোপভোগসম্পাদনং তয়া কর্তব্যম্ | অতঃ
পুরুষার্থকর্তব্যতয়াঽস্যা যুক্ত এব পরিণামঃ | তচ্চানুপপন্নম্ |
পুরুষার্থকর্তব্যতায়া এবানুপপত্তেঃ | পুরুষার্থো ময়া কর্তব্য
এবংবিধোঽধ্যবসায়ঃ পুরুষার্থকর্তব্যতোচ্যতে | জডায়াশ্চ
প্রকৃতেঃ কথং প্রথমমেবংবিধোঽধ্যবসায়ঃ | অস্তি চেদধ্যবসায়ঃ
কথং জডৎবম্ |
অত্রোচ্যতে —অনুলোমপ্রতিলোমলক্ষণপরিণামদ্বয়ে
সহজং শক্তিদ্বয়মস্তি | তদেব পুরুষার্থকর্তব্যতোচ্যতে |
সা চ শক্তিরচেতনায়া অপি প্রকৃতেঃ সহজৈব | তত্র
মহদাদিমহাভূতপর্যন্তোঽস্যা বহির্মুখতয়াঽনুলোমঃ পরিণামঃ | পুনঃ
স্বকারণানুপ্রবেশনদ্বারেণাস্মিতাঽন্তঃ পরিণামঃ প্রতিলোমঃ |
ইত্থং পুরুষস্য ভোগপরিসমাপ্তেঃ [পা০ আ ভোগপরিসমপ্তেঃ]
সহজশক্তিদ্বয়ক্ষয়াৎ কৃতার্থা প্রকৃতির্ন পুনঃ পরিণামমারভতে |
এবংবিধায়াং চ পুরুষার্থকর্তব্যতায়াং জডায়া অপি প্রকৃতের্ন
কাচিদনুপপত্তিঃ |
ননু যদীদৃশী শক্তিঃ সহজৈব প্রধানস্যাস্তি তৎ কিমর্থং
মোক্ষার্থিভির্মোক্ষায় যত্নঃ ক্রিয়তে | মোক্ষস্য চানর্থনীয়ৎবে
তদুপদেশকশাস্ত্রস্যানর্থক্যং স্যাৎ | উচ্যতে —যোঽযং
প্রকৃতিপুরুষয়োরনাদির্ভোগ্যভোক্তৃৎবলক্ষণঃ [পা০
ভোক্তৃভাবলক্ষণঃ ]সম্বন্ধস্তস্মিন্ সতি ব্যক্তচেতনায়াঃ
প্রকৃতেঃ কর্তৃৎবাভিমানাদ্দুঃখানুভবে সতি কথমিয়ং
দুঃখনিবৃত্তিরাত্যন্তিকী মম স্যাদিতি ভবত্যেবাধ্যবসায়ঃ | অতো
দুঃখনিবৃত্ত্যুপায়োপদেশকশাস্ত্রোপদেশাপেক্ষাঽস্ত্যেব প্রধানস্য |
তথাভূতমেব কর্মানুরূপং বুদ্ধিসত্ত্বং শাস্ত্রোপদেশস্য বিষয়ঃ |
দর্শনান্তরেষ্বপ্যেবংবিধ এবাবিদ্যাস্বভাবঃ শাস্ত্রেঽধিক্রিয়তে [
অভিধীয়তে ]|
স চ মোক্ষায় প্রয়তমান এবংবিধশাস্ত্রোপদেশং সহকারিণমপেক্ষ্য
মোক্ষাখ্যং ফলমাসাদয়তি | সর্বাণ্যেব কার্যাণি প্রাপ্তায়াং
সামগ্র্যামাত্মানং লভন্তে | অস্য প্রতিলোমপরিণামদ্বারেণৈবোৎপাদ্যস্য
মোক্ষাখ্যস্য কার্যস্যেদৃশ্যেব সামগ্রী প্রমাণেন নিশ্চিতা
প্রকারান্তরেণানুপপত্তেঃ | অতস্তাং বিনা কথং ভবিতুমর্হতি |
অতঃ স্থিতমেতৎ —সঙ্ক্রান্তবিষয়োপরাগমভিব্যক্তচিচ্ছায়ং
বুদ্ধিসত্ত্বং বিষয়নিশ্চয়দ্বারেণ সমগ্রাং লোকয়াত্রাং নির্বাহয়তীতি |
এবংবিধমেব চিত্তং পশ্যন্তো ভ্রান্তাঃ স্বসংবেদনং চিত্তং
চিত্তমাত্রং চ জগদিত্যেবং ব্রুবাণাঃ প্রতিবোধিতা ভবন্তি || ২২||
ননু যদ্যেবংবিধাদেব চিত্তাৎ সকলব্যবহারনিষ্পত্তিঃ কথং
প্রমাণশূন্যো দ্রষ্টাঽভ্যুপগম্যত ইত্যাশঙ্ক্য দ্রষ্টুঃ প্রমাণমাহ

তদসঙ্খ্যেয়বাসনাভিশ্চিত্রমপি পরার্থং সংহত্যকারিৎবাৎ || কৈবল্য
২৩||

বৃত্তিঃ —তদেব চিত্তং সঙ্খ্যাতুমশক্যাভির্বাসনাভিশ্চিত্রমপি
নানারূপমপি পরার্থং পরস্য স্বামিনো ভোক্তুর্ভোগাপবর্গলক্ষণমর্থং
সাধয়তীতি | কুতঃ | সংহত্যকারিৎবাৎ সংহত্য সম্ভূয়
মিলিৎবাঽর্থক্রিয়াকারিৎবাৎ | যচ্চ সংহত্যার্থক্রিয়াকারি তৎ
পরার্থং দৃষ্টম্ | যথা শয়নাসনাদি | সত্ত্বরজস্তমাংসি চ
চিত্তলক্ষণপরিণামভাঞ্জি সংহত্যকারীণি চআতঃ পরার্থানি | যঃ
পরঃ স পুরুষঃ |
ননু যাদৃশেন শয়নাসনাদীনাং পরেণ শরীরবতা
পারার্থ্যমুপলব্ধং তদ্দৃষ্টান্তবলেন তাদৃশ এব পরঃ সিধ্যতি |
যাদৃশশ্চ ভবতাং পরোঽসংহতরূপোঽভিপ্রেতস্তদ্বিপরীতস্য
সিদ্ধেরয়মিষ্টবিঘাতকৃদ্ধেতুঃ |
উচ্যতে —যদ্যপি সামান্যেন পরার্থমাত্রে ব্যাপ্তির্গৃহীতা
তথাঽপি সত্ত্বাদিবিলক্ষণধর্মিপর্যালোচনয়া তদ্বিলক্ষণ
এব ভোক্তা পরঃ সিধ্যতি | যথা চন্দনাবৃতে শিখরিণি
বিলক্ষণাদ্ধূমাদ্বহ্নিরনুমীয়মান ইতরবহ্নিবিলক্ষণশ্চন্দনপ্রভব
এব প্রতীয়তে | এবমিহাপি বিলক্ষণস্য সত্ত্বাখ্যস্য ভোগ্যস্য
পরার্থৎবেঽনুমীয়মানে তথাবিধ এব ভোক্তাঽধিষ্ঠাতা
পরশ্চিন্মাত্ররূপোঽসংহতঃ সিধ্যতি |
যদি চ তস্য পরৎবং সর্বোৎকৃষ্টৎবমেবং প্রতীয়তে
তথাপি তামসেভ্যো বিষয়েভ্যঃ প্রকৃষ্যতে শরীরং
প্রকাশরূপেন্দ্রিয়াশ্রয়ৎবাৎ | তস্মাদপি প্রকৃষ্যন্তে ইন্দ্রিয়াণি |
ততোঽপি প্রকৃষ্টং সত্ত্বং প্রকাশরূপম্ | তস্যাপি যঃ প্রকাশকঃ
প্রকাশ্যবিলক্ষণঃ স চিদ্রূপ এব [পা০ ইব ]ভবতীতি
কুতস্তস্য সংহতৎবম্ || ২৩||
ইদানীং শাস্ত্রফলং কৈবল্যং নির্ণেতুং দশভিঃ সূত্রৈরুপক্রমতে —

বিশেষদর্শিন আত্মভাবভাবনানিবৃত্তিঃ || কৈবল্য ২৪||

বৃত্তিঃ —এবং সত্ত্বপুরুষয়োরন্যৎবে সাধিতে যস্তয়োর্বিশেষং
পশ্যতি —অয়মস্মাদন্য ইত্যেবংরূপম্ —তস্য
বিজ্ঞাতচিত্তরূপসত্ত্বস্য চিত্তে যাঽঽত্মভাবভাবনা সা নিবর্ততে |
চিত্তমেব কর্তৃ জ্ঞাতৃ ভোক্ত্রিত্যভিমানো নিবর্ততে || ২৪||
তস্মিন্ সতি কিং ভবতীত্যাহ —

তদা বিবেকনিম্নং কৈবল্যপ্রাগ্ভারং চিত্তম্ || কৈবল্য ২৫||

বৃত্তিঃ —যদস্যাজ্ঞাননিম্নপথং বহির্মুখং বিষয়োপভোগফলং
চিত্তমাসীত্তদিদানীং বিবেকনিম্নং বিবেকমার্গমন্তর্মুখং
কৈবল্যপ্রাগ্ভারং কৈবল্যপ্রারম্ভং সম্পদ্যত ইতি || ২৫||
অস্মিংশ্চ বিবেকবাহিনি চিত্তে যেঽন্তরায়াঃ প্রাদুর্ভবন্তিতেষাং
হেতুপ্রতিপাদনদ্বারেণ ত্যাগোপায়মাহ —

তচ্ছিদ্রেষু প্রত্যয়ান্তরাণি সংস্কারেভ্যঃ || কৈবল্য ২৬||

বৃত্তিঃ —তস্মিন্ সমাধৌ স্থিতস্য ছিদ্রেষ্বন্তরায়েষু
যানি প্রত্যয়ান্তরাণি ব্যুত্থানরূপাণি জ্ঞানানি প্রাগ্ভূতেভ্যঃ
ব্যুত্থানানুভবজেভ্যঃ সংস্কারেভ্যোঽহং মমেত্যেবংরূপাণি
ক্ষীয়মাণেভ্যোঽপি প্রাদুর্ভবন্তি | অন্তঃকরণোচ্ছিত্তিদ্বারেণ তেষাং
হানং কর্তব্যমিত্যুক্তং ভবতি || ২৬||
হানোপায়শ্চ পূর্বমেবোক্ত ইত্যাহ —

হানমেষাং ক্লেশবদুক্তম্ || কৈবল্য ২৭||

বৃত্তিঃ —যথা ক্লেশানামবিদ্যাদীনাং হানং পূর্বমুক্তম্
(২.১০–১১)তথা সংস্কারাণামপি কর্তব্যম্ | যথা তে জ্ঞানাগ্নিনা
প্লুষ্টা দগ্ধবীজকল্পা ন পুনশ্চিত্তভূমৌ প্ররোহং লভন্তে তথা
সংস্কারা অপি || ২৭||
এবং চ প্রত্যয়ান্তরান্তরানুদয়ে স্থিরীভূতে সমাধৌ যাদৃশস্য
যোগিনঃ সমাধেঃ প্রকর্ষপ্রাপ্তির্ভবতি তথাবিধমুপায়মাহ —

প্রসঙ্খ্যানেঽপ্যকুসীদস্য সর্বথা বিবেকখ্যাতের্ধর্মমেঘঃ সমাধিঃ || কৈবল্য ২৮||

বৃত্তিঃ —প্রসঙ্খ্যানং যাবতাং তত্ত্বানাং যথাক্রমং ব্যবস্থিতানাং
পরস্পরবিলক্ষণস্বরূপবিভাবনম্ | তস্মিন্ সত্যপ্যকুসীদস্য
ফলমলিপ্সোঃ প্রত্যয়ান্তরাণামনুদয়ে সর্বপ্রকারবিবেকখ্যাতেঃ
পরিশেষাদ্ধর্মমেঘঃ সমাধির্ভবতি | প্রকৃষ্টমশুক্লকৃষ্ণং
ধর্মং পরমপুরুষার্থসাধকং মেহতি সিঞ্চতীতি ধর্মমেঘঃ | অনেন
প্রকৃষ্টধর্মস্যৈব জ্ঞানহেতুৎবমিত্যুপপাদিতং ভবতি || ২৮||
তস্মাদ্ধর্মমেঘাৎ কিং ভবতীত্যাহ —

ততঃ ক্লেশকর্মনিবৃত্তিঃ || কৈবল্য ২৯||

বৃত্তিঃ —ক্লেশানামবিদ্যাদীনামভিনিবেশান্তানাং কর্মণাং চ
শুক্লাদিভেদেন ত্রিবিধানাং জ্ঞানোদয়াৎ পূর্বপূর্বকারণনিবৃত্যা
নিবৃত্তির্ভবতি || ২৯||
তেষু নিবৃত্তেষু কিং ভবতীত্যাহ —

তদা সর্বাবরণমলাপেতস্য জ্ঞানস্যানন্ত্যাজ্জ্ঞেয়মল্পম্ || কৈবল্য ৩০||

বৃত্তিঃ —আব্রিয়তে চিত্তমেভিরিত্যাবরণানি
ক্লেশাস্ত এব মলাস্তেভ্যোঽপেতস্য তদ্বিরহিতস্য জ্ঞানস্য
গগননিভস্যানন্ত্যাদনবচ্ছেদাজ্জ্ঞেয়মল্পং গণনাস্পদং ভবতি |
অক্লেশেনৈব সর্বং জ্ঞেয়ং জানাতীত্যর্থঃ || ৩০||
ততঃ কিমিত্যাহ —

ততঃ কৃতার্থানাং পরিণামক্রমসমাপ্তির্গুণানাম্ || কৈবল্য ৩১||

বৃত্তিঃ —কৃতো নিষ্পাদিতো ভোগাপবর্গলক্ষণঃ পুরুষার্থঃ
প্রয়োজনং যৈস্তে কৃতার্থাঃ | গুণাঃ সত্ত্বরজস্তমাংসি | তেষাং পরিণাম
আপুরুষার্থসমাপ্তেরানুলোম্যেন প্রাতিলোম্যেনাঙ্গাঙ্গিভাবঃ স্থিতিলক্ষণঃ |
তস্য যোঽসৌ ক্রমো বক্ষ্যমাণস্তস্য পরিসমাপ্তির্নিষ্ঠা | ন
পুনরুদ্ভব ইত্যর্থঃ || ৩১||
ক্রমস্যোক্তস্য লক্ষণমাহ —

ক্ষণপ্রতিয়োগী পরিণামাপরান্তনির্গ্রাহ্যঃ ক্রমঃ || কৈবল্য ৩২||

বৃত্তিঃ —ক্ষণোঽল্পীয়ান্ কালস্তস্য যোঽসৌ প্রতিয়োগী
ক্ষণবিলক্ষণঃ পরিণামাপরান্তনির্গ্রাহ্যোঽনুভূতেষু ক্ষণেষু
পশ্চাৎ সঙ্কলনবুদ্ধ্যৈব যো গৃহ্যতে স ক্ষণানাং ক্রম উচ্যতে |
ন হ্যননুভূতেষু ক্রমঃ পরিজ্ঞাতুং শক্যঃ || ৩২||
ইদানীং ফলভূতস্য কৈবল্যস্যাসাধারণস্বরূপমাহ —

পুরুষার্থশূন্যানাং গুণানাং প্রতিপ্রসবঃ কৈবল্যং স্বরূপপ্রতিষ্ঠা
বা চিতিশক্তেরিতি || কৈবল্য ৩৩||
[চিতিশক্তিঃ ইতি বহুসম্মতঃ সূত্রপাঠঃ | ]

বৃত্তিঃ —সমাপ্তভোগাপবর্গলক্ষণপুরুষার্থানাং গুণানাং যঃ
প্রতিপ্রসবঃ প্রতিলোমস্য পরিণামস্য সমাপ্তৌ বিকারানুদ্ভবো যদি
ব চিতিশক্তের্বৃত্তিসারূপ্যনিবৃত্তৌ স্বরূপমাত্রেঽবস্থানং তৎ
কৈবল্যমুচ্যতে || ৩৩||

তদেবং সিদ্ধ্যন্তরেভ্যো বিলক্ষণাং সর্বসিদ্ধিমূলভূতাং
সমাধিসিদ্ধিমভিধায় জাত্যন্তরপরিণামলক্ষণস্য চ
সিদ্ধিবিশেষস্য প্রকৃত্যাপূরণমেব কারণমিত্যুপপাদ্য
ধর্মাদীনাং প্রতিবন্ধকনিবৃত্তমাত্রে এব সামর্থ্যমিতি
প্রদর্শ্য নির্মাণচিত্তানামস্মিতামাত্রাদুদ্ভব ইত্যুক্ত্বা তেষাং
চ যোগিচিত্তমেবাধিষ্ঠাপকমিতি প্রদর্শ্য যোগিচিত্তস্য
চিত্তান্তরবৈলক্ষণ্যমভিধায় তৎকর্মণামলৌকিকৎবং
চোপপাদ্য বিপাকানুগুণানাং বাসনানামভিব্যক্তিসামর্থ্যং
কার্যকারণয়োশ্চৈক্যপ্রতিপাদনেন ব্যবহিতানামপি
বাসনানামানন্তর্যমুপপাদ্য তাসামানন্ত্যেঽপি হেতুফলাদিদ্বারেণ
হানমুপদর্শ্য অতীতাদিষ্বধ্বসু ধর্মাণাং সদ্ভাবমুপপাদ্য
বিজ্ঞানবাদং নিরাকৃত্য সাকারবাদং চ প্রতিষ্ঠাপ্য পুরুষস্য
জ্ঞাতৃৎবমুক্ত্বা চিত্তদ্বারেণ সকলব্যবহারনিষ্পত্তিমুপপাদ্য
পুরুষসত্ত্বে প্রমাণমুপদর্শ্য কৈবল্যনির্ণয়ায় দশভিঃ
সূত্রৈঃ ক্রমেণোপয়োগিনোঽর্থানভিধায় শাস্ত্রান্তরেঽপ্যেতদেব
কৈবল্যমিত্যুপপাদ্য কৈবল্যস্বরূপং নির্ণীতমিতি ব্যাকৃতঃ কৈবল্যপাদঃ
.

[ইহ শ্রীভোজদেবস্য রাজমার্তণ্ডবৃত্তির্বস্তুতঃ সমাপ্তা |
তথাঽপি কতিপয়ানি পৃষ্ঠানি প্রলাপপূর্ণানি সংযোজিতান্যস্মিন্ স্থানে
কেনচিৎ পাষণ্ডেনাঽযৌক্তিকানি তিরস্কৃতানি চ সর্বৈরপি যোগিভিঃ | ন
কেবলং সর্বান্যপি দর্শনানি খণ্ডিতানি কিঞ্চিদ্বেদবিরুদ্ধং মতমপি
তেন প্রচারিতম্ | জিজ্ঞাসোঃ পাঠকস্য কৌতূহলনিবৃত্ত্যর্থমেতানি
পৃষ্ঠান্যত্র সমাবিষ্টানি | ]

[ন কেবলমস্মদ্দর্শনে ক্ষেত্রজ্ঞঃ
কৈবল্যাবস্থায়ামেবংবিধশ্চিদ্রূপঃ যাবদ্দর্শনান্তরেষ্বপি
বিমৃষ্যমাণ এবংরূপোঽবতিষ্ঠতে | তথাহি —সংসারদশায়ামাত্মা
কর্তৃৎবভোক্তৃৎবানুসন্ধাতৃৎবময়ঃ প্রতীয়তেঽন্যথা
যদ্যয়মেকঃ ক্ষেত্রজ্ঞস্তথাবিধো ন স্যাত্তদা জ্ঞানক্ষণানামেব
পূর্বাপরানুসন্ধাতৃশূন্যানামাত্মভাবে নিয়তঃ কর্মফলসম্বন্ধো ন
স্যাৎ কৃতহানাকৃতাভ্যাগমপ্রসঙ্গশ্চ |
যদি যেনৈব শাস্ত্রোপদিষ্টমনুষ্ঠিতং কর্ম তস্যৈব ভোক্তৃৎবং
ভবেত্তদা হিতাহিতপ্রাপ্তিপরিহারায় সর্বস্য প্রবৃত্তির্ঘটেত
সর্বস্যৈব ব্যবহারস্য হানোপাদানলক্ষণস্যানুসন্ধানেনৈব
প্রাপ্তৎবাজ্জ্ঞানক্ষণানাং পরস্পরভেদেনানুসন্ধানশূন্যৎবাৎ
তদনুসন্ধানাভাবে কস্যচিদপি ব্যবহারানুপপত্তেঃ কর্তা
ভোক্তাঽনুসন্ধাতা যঃ স আত্মেতি ব্যবস্থাপ্যতে |
মোক্ষদশায়াং তু
সকলগ্রাহ্যগ্রাহকলক্ষণব্যবহারাভাবাচ্চৈতন্যমাত্রমেব
তস্যাবশিষ্যতে তচ্চৈতন্যং চিতিমাত্রৎবেনৈবোপপদ্যতে
ন পুনরাত্মসংবেদনেন | যস্মাদ্বিষয়গ্রহণসমর্থনমেব
চিতে রূপং নাত্মগ্রাহকৎবম্ | তথাহি —অর্থশ্চিত্যা
গৃহ্যমাণোঽযমিতি গৃহ্যতে স্বরূপং গৃহ্যমাণমহমিতি
ন পুনর্যুগপদ্বহির্মুখতাঽন্তর্মুখতালক্ষণব্যাপারদ্বয়ং
পরস্পরবিরুদ্ধং কর্তুং শক্যম্ | অত একস্মিন্ সময়ে ব্যাপারদ্বয়স্য
কর্তুমশক্যৎবাচ্চিদ্রূপতয়ৈবাবশিষ্যতে | অতো মোক্ষাবস্থায়াং
নিবৃত্তাধিকারেষু গুণেষু চিন্মাত্ররূপ এবাত্মাঽবতিষ্ঠৎ ইত্যেব
যুক্তম্ |
সংসারদশায়াং তু এবম্ভূতস্যৈব কর্তৃৎবং
ভোক্তৃৎবমনুসন্ধাতৃৎবং চ সর্বমুপপদ্যতে |
তথাহি —যোঽযং প্রকৃত্যা সহানাদির্নৈসর্গিকোঽস্য
ভোগ্যভোক্তৃৎবলক্ষণসম্বন্ধোঽবিবেকখ্যাতিমূলঃ | অস্মিন্ সতি
পুরুষার্থকর্তব্যতারূপশক্তিদ্বয়সদ্ভাবে যা মহদাদিভাবেন
পরিণতিস্তস্যাং সংযোগে সতি যদাত্মনোঽধিষ্ঠাতৃৎবং
চিচ্ছায়াসমর্পণসামর্থ্যং বুদ্ধিসত্ত্বস্য চ
সঙ্ক্রান্তচিচ্ছায়াগ্রহণসামর্থ্যং চিদবষ্টব্ধায়াশ্চ বুদ্ধের্যোঽযং
কর্তৃৎবভোক্তৃৎবাধ্যবসায়স্তত এব সর্বস্যানুসন্ধানপূর্বকস্য
ব্যবহারস্য নিষ্পত্তেঃ কিমন্যৈঃ ফল্গুভিঃ কল্পনাজল্পৈঃ |
যদি পুনরেবম্ভূতমার্গব্যতিরেকেণ পারমার্থিকমাত্মনঃ
কর্তৃৎবাদ্যঙ্গীক্রিয়েত তদাঽস্য পরিণামিৎবপ্রসঙ্গঃ |
পরিণামিৎবাচ্চানিত্যৎবে তস্যাঽঽত্মৎবমেব ন স্যাৎ | যথা
হ্যেকস্মিন্নেব সময়ে একেনৈকরূপেণ ন পরস্পরবিরুদ্ধাবস্থানুভবঃ
সম্ভবতি | তথাহি —যস্যামবস্থায়ামাত্মসমবেতে সুখে সমুৎপন্নে
তস্যানুভবিতৃৎবং ন তস্যামেবাবস্থায়াং দুঃখানুভবিতৃৎবম্ |
অতোঽবস্থানানাৎবাৎ তদভিন্নস্যাবস্থাবতো নানাৎবম্ | নানাৎবাচ্চ
পরিণামিৎবান্নাত্মৎবম্ | নাপি নিত্যৎবম্ | অত এব শান্তব্রহ্মবাদিভিঃ
সাঙ্খ্যৈরাত্মনঃ সদৈব সংসারদশায়াং মোক্ষদশায়াং চৈকং
রূপমঙ্গীক্রিয়তে |
যে তু বেদান্তবাদিনশ্চিদানন্দময়ৎবমাত্মনো মোক্ষং
মন্যন্তে তেষাং ন যুক্তঃ পক্ষঃ | তথাহি —আনন্দস্য
সুখস্বরূপৎবাৎ সুখস্য চ সদৈব সংবেদ্যমানতয়ৈব
প্রতিভাসাৎ সংবেদ্যমানৎবং চ সংবেদনব্যতিরেকেণানুপপন্নমিতি
সম্বেদ্যসংবেদনয়োর্দ্বয়োরভ্যুপগমাদদ্বৈতহানিঃ | অথ
সুখাত্মকৎবমেব তস্যোচ্যেত তদ্বিরুদ্ধধর্মাধ্যাসাদনুপপন্নম্ | ন
হি সংবেদনং সংবেদ্যং চৈকং ভবিতুমর্হতীতি |
কিঞ্চাদ্বৈতবাদিভিঃ কর্মাত্মপরমাত্মভেদেনাত্মা দ্বিবিধঃ
স্বীকৃতঃ | ইত্থং চ তত্র যেনৈব রূপেণ সুখদুঃখভোক্তৃৎবং
কর্মাত্মনস্তেনৈব রূপেণ যদি পরমাত্মনঃ স্যাত্তদা কর্মাত্মবৎ
পরমাত্মনঃ পরিণামিৎবমবিদ্যাস্বভাবৎবং চ স্যাৎ | অথ ন তস্য
সাক্ষাদ্ভোক্তৃৎবং কিন্তু তদুপঢৌকিতমুদাসীনতয়াঽধিষ্ঠাতৃৎবেন
স্বীকরোতি তদাঽস্মদ্দর্শনানুপ্রবেশঃ | আনন্দরূপতা চ পূর্বমেব
নিরাকৃতা |
কিঞ্চাবিদ্যাস্বভাবৎবে নিঃস্বভাবৎবাৎ কর্মাত্মনাং কঃ শাস্ত্রাধিকারী |
ন তাবন্নিত্যনির্মুক্তৎবাৎ পরমাত্মা | নাপ্যবিদ্যা স্বভাবৎবাৎ কর্মাত্মা |
ততশ্চ সকলশাস্ত্রবৈয়র্থ্যপ্রসঙ্গঃ | অবিদ্যাময়ৎবে চ
জগতোঽঙ্গীক্রিয়মাণে কস্যাবিদ্যেতি বিচার্যতে | ন তাবৎ পরমাত্মনো
নিত্যমুক্তৎবাদ্বিদ্যারূপৎবাচ্চ | কর্মাত্মনোঽপি পরমার্থতো
নিঃস্বভাবতয়া শশবিষাণপ্রখ্যৎবে কথমবিদ্যাসম্বন্ধঃ |
অথোচ্যতে নম | এতদেবাবিদ্যায়া অবিদ্যাৎবং যদবিচারণীয়ৎবম্ |
যৈব হি বিচারেণ দিনকরস্পৃষ্টনীহারবদ্বিমলমুপয়াতি
সাঽবিদ্যেত্যুচ্যতে | মৈবম্ | যদ্বস্তু কিঞ্চিৎ কার্যং করোতি
তদবশ্যং কুতশ্চিদ্ভিন্নমভিন্নং বা বক্তব্যম্ | অবিদ্যায়াশ্চ
সংসারলক্ষণকার্যকর্তৃৎবমবশ্যমঙ্গীকর্তব্যম্ | তস্মিন্
সত্যপি যদ্যনির্বাচ্যৎবমুচ্যতে তদা কস্যচিদপি বাচ্যৎবং ন স্যাৎ
ব্রহ্মণোঽপ্যবাচ্যৎবপ্রসক্তিঃ | তস্মাদধিষ্ঠাতৃতারূপব্যতিরেকেণ
নান্যদাত্মনো রূপমুপপদ্যতে | অধিষ্ঠাতৃৎবং চ চিদ্রূপৎবমেব
তদ্ব্যতিরিক্তস্য ধর্মস্য কস্যচিৎ প্রমাণানুপপত্তেঃ |
যৈরপি নৈয়ায়িকাদিভিরাত্মা চেতনায়োগাচ্চেতন ইত্যুচ্যতে চেতনাপি
তস্য মনঃসংযোগজা | তথাহি —ইচ্ছাজ্ঞানপ্রয়ত্নাদয়ো
যে গুণাস্তস্য ব্যবহারদশায়ামাত্মমনঃসংযোগাদুৎপদ্যন্তে
তৈরেব চ গুণৈঃ স্বয়ং জ্ঞাতা কর্তা ভোক্তেতি ব্যপদিশ্যতে |
মোক্ষদশায়াং তু মিথ্যাজ্ঞাননিবৃত্তৌ তন্মূলানাং দোষাণামপি
নিবৃত্তিঃ | তেষাং বুদ্ধ্যাদীনাং বিশেষগুণানামত্যন্তোচ্ছিত্তিঃ
স্বরূপমাত্রপ্রতিষ্ঠৎবমাত্মনোঽঙ্গীকৃতং তেষাময়ুক্তঃ পক্ষঃ |
যতস্তস্যাং দশায়াং নিত্যৎবব্যাপকৎবাদয়ো গুণা আকাশাদীনামপি
সন্তি | অতস্তদ্বৈলক্ষণ্যেনাত্মনশ্চিদ্রূপৎবমবশ্যমঙ্গীকার্যম্ |
আত্মৎববিলক্ষণজাতিয়োগ ইতি চেন্ন | সর্বস্যৈব তজ্জাতিয়োগঃ
সম্ভবতি | অতো জাতিভ্যো বৈলক্ষণ্যমাত্মনোঽবশ্যমঙ্গীকর্তব্যম্ |
তস্যাধিষ্ঠাতৃৎবং চিদ্রূপতয়ৈব ঘটতে নান্যথা |
যৈরপি মীমাংসকৈঃ কর্মকর্তৃরূপ আত্মাঽঙ্গীক্রিয়তে তেষামপি
ন যুক্তঃ পক্ষঃ | তথাহি —অহম্প্রত্যয়গ্রাহ্য আত্মেতি তেষাং
প্রতিজ্ঞা | অহম্প্রত্যয়ে চ কর্তৃৎবং কর্মৎবং চাত্মন এব | ন
চৈতদ্বিরুদ্ধৎবাদুপপদ্যতে | কর্তৃৎবং প্রমাতৃৎবং কর্মৎবং
চ প্রমেয়ৎবম্ | ন চৈতদ্বিরুদ্ধধর্মাধ্যাসো যুগপদেকস্য ঘটতে |
যদ্বিরুদ্ধধর্মাধ্যস্তং ন তদেকং যথা ভাবাভাবৌ | বিরুদ্ধে চ
কর্তৃৎবকর্মৎবে | অথোচ্যতে —ন কর্তৃৎবকর্মৎবয়োর্বিরোধঃ
কিন্তু কর্তৃৎবকরণৎবয়োঃ | নৈতদ্যুক্তম্ | বিরুদ্ধধর্মাধ্যাসস্য
তুল্যৎবাৎ কর্তৃৎবকর্মৎবয়োরেব বিরোধো ন কর্তৃৎবকর্মৎবয়োঃ |
তস্মাদহম্প্রত্যয়গ্রাহ্যৎবম্পরিহৃত্যাত্মনোঽধিষ্ঠাতৃৎবমেবোপপন্নম্ |
তচ্চ চেতনৎবমেব |
যৈরপি দ্রব্যবোধপর্যায়ভেদেনাত্মনোঽব্যাপকস্য শরীরপরিমাণস্য
পরিণামিৎবমিষ্যতে তেষামুত্থানপরাহত এব পক্ষঃ | পরিণামিৎবে
চিদ্রূপতাহানিঃ | চিদ্রূপতাঽভাবে কিমাত্মন আত্মৎবম্ | তস্মাদাত্মন
আত্মৎবমিচ্ছতা চিদ্রূপৎবমেবাঙ্গীকর্তব্যম্ | তচ্চাধিষ্ঠাতৃৎবমেব
.
কেচিৎ কর্তৃরূপমেবাত্মানমিচ্ছন্তি | তথাহি —বিষয়সান্নিধ্যে যা
জ্ঞানলক্ষণা ক্রিয়া সমুৎপন্না তস্যা বিষয়সংবিত্তিঃ ফলম্ | তস্যাং
চ ফলরূপায়াং সংবিত্তৌ স্বরূপং প্রকাশরূপতয়া প্রতিভাসতে |
বিষয়শ্চ গ্রাহ্যতয়া | আত্মা চ গ্রাহকতয়া | ঘটমহং
জানামীত্যাকারেণ তস্যাঃ সমুৎপত্তেঃ | ক্রিয়ায়াশ্চ কারণং কর্তেব
ভবতীত্যতঃ কর্তৃৎবং ভোক্তৃৎবং চাত্মনো রূপমিতি | তদনুপপন্নম্ |
যস্মাত্তাসাং সংবিত্তীনাং স কিং কর্তৃৎবং যুগপৎ প্রতিপদ্যতে ক্রমেণ
বা | যুগপৎ কর্তৃৎবে ক্ষণান্তরে তস্য কর্তৃৎবং ন স্যাৎ | অথ
ক্রমেণ কর্তৃৎবং তদৈকরূপস্য ন ঘটতে | একেন রূপেণ চেত্তস্য
কতৃৎবং তদৈকস্য সদৈব সন্নিহিতৎবাৎ সর্বং ফলমেকরূপং
স্যাৎ | অথ নানারূপতয়া তস্য কর্তৃৎবম্ | তদা পরিণামিৎবম্ |
পরিণামিৎবাচ্চ ন চিদ্রূপৎবম্ | অতশ্চিদ্রূপৎবমাত্মন ইচ্ছদ্ভির্ন
সাক্ষাৎকর্তৃৎবমঙ্গীকর্তব্যম্ | যাদৃশমস্মাভিঃ কর্তৃৎবমাত্মনঃ
প্রতিপাদিতং কূটস্থস্য নিত্যস্য চিদ্রূপস্য তদেবোপপন্নম্ |
এতেন স্বপ্রকাশস্যাত্মনো বিষয়সংবিত্তিদ্বারেণ গ্রাহকৎবমভিব্যজ্যত
ইতি যে বদন্তি তেঽপি অনেনৈব নিরাকৃতাঃ |
কেচিদ্বিমর্শাত্মকৎবেনাত্মনশ্চিন্ময়ৎবমিচ্ছন্তি | ত আহুঃ
—ন বিমর্শব্যতিরেকেণ চিদ্রূপৎবমাত্মনো নিরূপয়িতুং
শক্যম্ | জডাদ্বৈলক্ষণ্যমেব চিদ্রূপৎবমুচ্যতে | তচ্চ
বিমর্শব্যতিরেকেণ নিরূপ্যমাণং নান্যথাঽবতিষ্ঠতে | —
তদনুপপন্নম্ | ইদমিত্থমেব রূপমিতি যো বিচারঃ সঃ বিমর্শ
ইত্যুচ্যতে | স চাস্মিতাব্যতিরেকেণ নোত্থানমেব লভতে | তথাহি —
আত্মন্যুপজায়মানো বিমর্শোঽহমেবম্ভূত ইত্যনেনাঽঽকারেণ সংবেদ্যতে |
ততশ্চাহংশব্দসম্ভিন্নস্যাত্মলক্ষণস্যাঅর্থস্য তত্র স্ফুরণান্ন
তত্র বিকল্পস্বরূপতাঽতিক্রমঃ | বিকল্পশ্চাধ্যবসায়াত্মা
বুদ্ধিধর্মো ন চিদ্ধর্মঃ | কূটস্থনিত্যৎবেন চিতেঃ
সদৈকরূপৎবান্নিত্যৎবান্নাহঙ্কারানুপ্রবেশঃ | তদনেন
সবিমর্শৎবমাত্মনঃ প্রতিপাদয়তা বুদ্ধিরেবাত্মৎবেন ভ্রান্ত্যা
প্রতিপাদিতা ন প্রকাশাত্মনঃ পরস্য পুরুষস্য স্বরূপমবগতমিতি |
ইত্থং সর্বেষ্বেব দর্শনেষ্বধিষ্ঠাতৃৎবং বিহায় নান্যদাত্মনো
রূপমুপপদ্যতে | অধিষ্ঠাতৃৎবং চ চিদ্রূপৎবম্ | তচ্চ
জডাদ্বৈলক্ষণ্যমেব | চিদ্রূপতয়া যদধিতিষ্ঠতি তদেব ভোগ্যতাং
নয়তি | যচ্চ চেতনাধিষ্ঠিতং তদেব সকলব্যাপারয়োগ্যং ভবতি |
এবং চ সতি নিত্যৎবাৎ প্রধানস্য ব্যাপারনিবৃত্তৌ যদাত্মনঃ
কৈবল্যমস্মাভিরুক্তং তদ্বিহায় দর্শনান্তরাণাং নান্যা গতিঃ |
তস্মাদিদমেব যুক্তমুক্তং বৃত্তিসারূপ্যপরিহারেণ স্বরূপে প্রতিষ্ঠা
চিতিশক্তেঃ কৈবল্যম্ | ]

সর্বে যস্য বশাঃ প্রতাপবসতেঃ পাদান্তসেবানতিপ্রভ্রশ্যন্মুকুটেষু
মূর্ধসু দধত্যাজ্ঞাং ধরিত্রীভৃতঃ |
যদ্বক্ত্রাম্বুজমাপ্য গর্বমসমং বাগ্দেবতা সংশ্রিতা স শ্রীভোজপতিঃ
ফণাধিপতিকৃৎসূত্রেষু বৃত্তিং ব্যধাৎ ||

ইতি শ্রীধারেশ্বরভোজদেববিরচিতায়াং রাজমার্তণ্ডাভিধায়াং
পাতঞ্জলবৃত্তৌ কৈবল্যপাদশ্চতুর্থঃ |

সমাপ্তশ্চায়ং গ্রন্থঃ |
|| ওঁ শান্তিঃ শান্তিঃ শান্তিঃ ||

অথ পাতঞ্জলয়োগসূত্রাণি |

অথ সমাধিপাদঃ || ১||

অথ যোগানুশাসনম্ || সমাধি ১||
যোগশ্চিত্তবৃত্তিনিরোধঃ || সমাধি ২||
তদা দ্রষ্টুঃ স্বরূপেঽবস্থানম্ || সমাধি ৩||
বৃত্তিসারূপ্যমিতরত্র || সমাধি ৪||
বৃত্তয়ঃ পঞ্চতয়্যঃ ক্লিষ্টাক্লিষ্টাঃ || সমাধি ৫||
প্রমাণবিপর্যয়বিকল্পনিদ্রাস্মৃতয়ঃ || সমাধি ৬||
প্রত্যক্ষানুমানাগমাঃ প্রমাণানি || সমাধি ৭||
বিপর্যয়ো মিথ্যাজ্ঞানমতদ্রূপপ্রতিষ্ঠম্ || সমাধি ৮||
শব্দজ্ঞানানুপাতী বস্তুশূন্যো বিকল্পঃ || সমাধি ৯||
অভাবপ্রত্যয়ালম্বনা বৃত্তির্নিদ্রা || সমাধি ১০||
অনুভূতবিষয়াসম্প্রমোষঃ স্মৃতিঃ || সমাধি ১১||
অভ্যাসবৈরাগ্যাভ্যাং তন্নিরোধঃ || সমাধি ১২||
তত্র স্থিতৌ যত্নোঽভ্যাসঃ || সমাধি ১৩||
স তু দীর্ঘকালাদরনৈরন্তর্যসৎকারাসেবিতো দৃঢভূমিঃ || সমাধি ১৪||
দৃষ্টানুশ্রবিকবিষয়বিতৃষ্ণস্য বশীকারসঞ্জ্ঞা বৈরাগ্যম্ || সমাধি ১৫||
তৎপরং পুরুষখ্যাতের্গুণবৈতৃষ্ণ্যম্ || সমাধি ১৬||
বিতর্কবিচারানন্দাস্মিতারূপানুগমাৎসম্প্রজ্ঞাতঃ || সমাধি ১৭||
বিরামপ্রত্যয়াভ্যাসপূর্বঃ সংস্কারশেষোঽন্যঃ || সমাধি ১৮||
ভবপ্রত্যয়ো বিদেহপ্রকৃতিলয়ানাম্ || সমাধি ১৯||
শ্রদ্ধাবীর্যস্মৃতিসমাধিপ্রজ্ঞাপূর্বক ইতরেষাম্ || সমাধি ২০||
তীব্রসংবেগানামাসন্নঃ || সমাধি ২১||
মৃদুমধ্যাধিমাত্রৎবাত্ততোঽপি বিশেষঃ || সমাধি ২২||
ঈশ্বরপ্রণিধানাদ্বা || সমাধি ২৩||
ক্লেশকর্মবিপাকাশয়ৈরপরামৃষ্টঃ পুরুষবিশেষ ঈশ্বরঃ || সমাধি ২৪||
তত্র নিরতিশয়ং সার্বজ্ঞ্যবীজম্ || সমাধি ২৫||
স পূর্বেষামপি গুরুঃ কালেনানবচ্ছেদাৎ || সমাধি ২৬||
তস্য বাচকঃ প্রণবঃ || সমাধি ২৭||
তজ্জপস্তদর্থভাবনম্ || সমাধি ২৮||
ততঃ প্রত্যক্চেতনাঽধিগমোঽপ্যন্তরায়াভাবশ্চ || সমাধি ২৯||
ব্যাধিস্ত্যানসংশয়প্রমাদালস্যাবিরতিভ্রান্তিদর্শনালব্ধভূমিকৎবানবস্থিতৎবানি
চিত্তবিক্ষেপাস্তেঽন্তরায়াঃ || সমাধি ৩০||
দুঃখদৌর্মনস্যাঙ্গমেজয়ৎবশ্বাসপ্রশ্বাসা বিক্ষেপসহভুবঃ || সমাধি ৩১||
তৎপ্রতিষেধার্থমেকতত্ত্বাভ্যাসঃ || সমাধি ৩২||
মৈত্রীকরুণামুদিতোপেক্ষাণাং সুখদুঃখপুণ্যাপুণ্যবিষয়ানাং
ভাবনাতশ্চিত্তপ্রসাদনম্
|| সমাধি ৩৩||
প্রচ্ছর্দনবিধারণাভ্যাং বা প্রাণস্য || সমাধি ৩৪||
বিষয়বতী বা প্রবৃতিরুৎপন্না স্থিতিনিবন্ধিনী || সমাধি ৩৫||
বিশোকা বা জ্যোতিষ্মতী || সমাধি ৩৬||
বীতরাগবিষয়ং বা চিত্তম্ || সমাধি ৩৭||
স্বপ্ননিদ্রাজ্ঞানালম্বনং বা || সমাধি ৩৮||
যথাভিমতধ্যানাদ্বা || সমাধি ৩৯||
পরমাণুপরমমহত্ত্বান্তোঽস্য বশীকারঃ || সমাধি ৪০||
ক্ষীণবৃত্তেরভিজাতস্যেব মণের্গ্রহীতৃগ্রহণগ্রাহ্যেষু
তৎস্থতদঞ্জনতা সমাপত্তিঃ || সমাধি ৪১||
শব্দার্থজ্ঞানবিকল্পৈঃ সঙ্কীর্ণা সবিতর্কা সমাপত্তিঃ || সমাধি ৪২||
স্মৃতিপরিশুদ্ধৌ স্বরূপশূন্যেবাঽর্থমাত্রনির্ভাসা নির্বিতর্কা || সমাধি ৪৩||
এতয়ৈব সবিচারা নির্বিচারা চ সূক্ষ্মবিষয়া ব্যাখ্যাতা || সমধি ৪৪||
সূক্ষ্মবিষয়ৎবং চালিঙ্গপর্যবসানম্ || সমাধি ৪৫||
তা এব সবীজঃ সমাধিঃ || সমাধি ৪৬||
নির্বিচারবৈশারদ্যেঽধ্যাত্মপ্রসাদঃ || সমাধি ৪৭||
ঋতম্ভরা তত্র প্রজ্ঞা || সমধি ৪৮||
শ্রুতানুমানপ্রজ্ঞাভ্যামন্যবিষয়া বিশেষার্থৎবাৎ || সমাধি ৪৯||
[প্রজ্ঞাভ্যাং সামান্যবিষয়া ইতি পাঠোঽপি দৃশ্যতে | ]
তজ্জঃ সংস্কারোঽন্যসংস্কারপ্রতিবন্ধী || সমাধি ৫০||
তস্যাপি নিরোধে সর্বনিরোধান্নির্বীজঃ সমাধিঃ || সমাধি ৫১||

ইতি সমাধিপাদঃ || ১||

অথ সাধনপাদঃ || ২||

তপঃ স্বাধ্যায়েশ্বরপ্রণিধানানি ক্রিয়ায়োগঃ || সাধন ১||
সমাধিভাবনার্থঃ ক্লেশতনূকরণার্থশ্চ || সাধন ২||
অবিদ্যাঽস্মিতারাগদ্বেষাভিনিবেশাঃ ক্লেশাঃ || সাধন ৩||
অবিদ্যা ক্ষেত্রমুত্তরেষাং প্রসুপ্ততনুবিচ্ছিন্নোদারাণাম্ || সাধন ৪||
অনিত্যাশুচিদুঃখানাত্মসু নিত্যশুচিসুখাত্মখ্যাতিরবিদ্যা || সাধন ৫||
দৃগ্দর্শনশক্ত্যোরেকাত্মতেবাস্মিতা || সাধন ৬||
সুখানুশয়ী রাগঃ || সাধন ৭||
দুঃখানুশয়ী দ্বেষঃ || সাধন ৮||
স্বরসবাহী বিদুষোঽপি তথারূঢোঽভিনিবেশঃ || সাধন ৯||
তে প্রতিপ্রসবহেয়াঃ সূক্ষ্মাঃ || সাধন ১০||
ধ্যানহেয়াস্তদ্বৃত্তয়ঃ || সাধন ১১||
ক্লেশমূলঃ কর্মাশয়ো দৃষ্টাদৃষ্টজন্মবেদনীয়ঃ || সাধন ১২||
সতি মূলে তদ্বিপাকো জাত্যায়ুর্ভোগাঃ || সাধন ১৩||
তে হ্লাদপরিতাপফলাঃ পুণ্যাপুণ্যহেতুৎবাৎ || সাধন ১৪||
পরিণামতাপসংস্কারদুঃখৈর্গুণবৃত্তিবিরোধাচ্চ দুঃখমেব সর্বং
বিবেকিনঃ || সাধন ১৫||
হেয়ং দুঃখমনাগতম্ || সাধন ১৬||
দ্রষ্টৃদৃশ্যয়োঃ সংযোগো হেয়হেতুঃ || সাধন ১৭||
প্রকাশক্রিয়াস্থিতিশীলং ভূতেন্দ্রিয়াত্মকং ভোগাপবর্গার্থং দৃশ্যম্ || সাধন ১৮||
বিশেষাবিশেষলিঙ্গমাত্রালিঙ্গানি গুণপর্বাণি || সাধন ১৯||
দ্রষ্টা দৃশিমাত্রঃ শুদ্ধোঽপি প্রত্যয়ানুপশ্যঃ || সাধন ২০||
তদর্থ এব দৃশ্যস্যাত্মা || সাধন ২১|| [তদর্থঃ এব ]
কৃতার্থং প্রতি নষ্টমপ্যন্ষ্টং তদন্যসাধারণৎবাৎ || সাধন ২২||
স্বস্বামিশক্ত্যোঃ স্বরূপোপলব্ধিহেতুঃ সংযোগঃ || সাধন ২৩||
তস্য হেতুরবিদ্যা || সাধন ২৪||
তদভাবে সংযোগাভাবো হানং তদ্দৃশেঃ কৈবল্যম্ || সাধন ২৫||
বিবেকখ্যাতিরবিপ্লবা হানোপায়ঃ || সাধন ২৬||
তস্য সপ্তধা প্রান্তভূমৌ প্রজ্ঞা || সাধন ২৭||
[তস্য সপ্তধা প্রান্তভূমিঃ প্রজ্ঞা ইতি বা বহুসম্মতঃ সূত্রপাঠঃ
]
যোগাঙ্গানুষ্ঠানাদশুদ্ধিক্ষয়ে জ্ঞানদীপ্তিরাবিবেকখ্যাতেঃ || সাধন
২৮||
যমনিয়মাসনপ্রাণায়ামপ্রত্যাহারধারণাধ্যানসমাধয়োঽষ্টাবঙ্গানি || সাধন ২৯||
অহিংসাসত্যাস্তেয়ব্রহ্মচর্যাপরিগ্রহা যমাঃ || সাধন ৩০||
জাতিদেশকালসময়ানবচ্ছিন্নাঃ সার্বভৌমা মহাব্রতম্ || সাধন ৩১||
শৌচসন্তোষতপঃস্বাধ্যায়েশ্বরপ্রণিধানানি নিয়মাঃ || সাধন ৩২||
বিতর্কবাধনে প্রতিপক্ষভাবনম্ || সাধন ৩৩||
বিতর্কা হিংসাদয়ঃ কৃতকারিতানুমোদিতা লোভক্রোধমোহপূর্বকা
মৃদুমধ্যাধিমাত্রা দুঃখাজ্ঞানানন্তফলা ইতি প্রতিপক্ষভাঅবনম্ || সাধন ৩৪||
অহিংসাপ্রতিষ্ঠায়াং তৎসন্নিধৌ বৈরত্যাগঃ || সাধন ৩৫||
সত্যপ্রতিষ্ঠায়াং ক্রিয়াফলাশ্রয়ৎবম্ || সাধন ৩৬||
অস্তেয়প্রতিষ্ঠায়াং সর্বরত্নোপস্থানম্ || সাধন ৩৭||
ব্রহ্মচর্যপ্রতিষ্ঠায়াং বীর্যলাভঃ || সাধন ৩৮||
অপরিগ্রহস্থৈর্যে জন্মকথন্তাসম্বোধঃ || সাধন ৩৯||
শৌচাৎস্বাঙ্গজুগুপ্সা পরৈরসংসর্গঃ || সাধন ৪০||
সত্ত্বশুদ্ধিসৌমনস্যৈকাগ্রতেন্দ্রিয়জয়াত্মদর্শনয়োগ্যৎবানি চ || সাধন ৪১||
সন্তোষাদনুত্তমঃ সুখলাভঃ || সাধন ৪২||
কায়েন্দ্রিয়সিদ্ধিরশুদ্ধিক্ষয়াত্তপসঃ || সাধন ৪৩||
স্বাধ্যায়াদিষ্টদেবতাসম্প্রয়োগঃ || সাধন ৪৪||
সমাধিসিদ্ধিরীশ্বরপ্রণিধানাৎ || সাধন ৪৫||
স্থিরসুখমাসনম্ || সাধন ৪৬||
প্রয়ত্নশৈথিল্যানন্ত্যসমাপত্তিভ্যাম্ || সাধন ৪৭||
ততো দ্বন্দ্বানভিঘাতঃ || সাধন ৪৮||
তস্মিন্সতি শ্বাসপ্রশ্বাসয়োর্গতিবিচ্ছেদঃ প্রাণায়ামঃ || সাধন ৪৯||
স তু বাহ্যাভ্যন্তরস্তম্ভবৃত্তির্দেশকালসঙ্খ্যাভিঃ পরিদৃষ্টো
দীর্ঘসূক্ষ্মঃ
|| সাধন ৫০||
বাহ্যাভ্যন্তরবিষয়াক্ষেপী চতুর্থঃ || সাধন ৫১||
ততঃ ক্ষীয়তে প্রকাশাবরণম্ || সাধন ৫২||
ধারণাসু চ যোগ্যতা মনসঃ || সাধন ৫৩||
স্ববিষয়াসম্প্রয়োগে চিত্তস্বরূপানুকার ইবেন্দ্রিয়াণাং প্রত্যাহারঃ || সাধন ৫৪||
ততঃ পরমা বশ্যতেন্দ্রিয়াণাম্ || সাধন ৫৫||

ইতি সাধনপাদঃ || ২||

অথ বিভূতিপাদঃ || ৩||

দেশবন্ধশ্চিত্তস্য ধারণা || বিভূতি ১||
তত্র প্রত্যয়ৈকতানতা ধ্যানম্ || বিভূতি ২||
তদেবার্থমাত্রনির্ভাসং স্বরূপশূন্যমিব সমাধিঃ || বিভূতি ৩||
ত্রয়মেকত্র সংযমঃ || বিভূতি ৪ ||
তজ্জয়াৎপ্রজ্ঞালোকঃ || বিভূতি ৫ ||
তস্য ভূমিষু বিনিয়োগঃ || বিভূতি ৬||
ত্রয়মন্তরঙ্গং পূর্বেভ্যঃ || বিভূতি ৭||
তদপি বহিরঙ্গং নির্বীজস্য || বিভূতি ৮||
ব্যুত্থাননিরোধসংস্কারয়োরভিভবপ্রাদুর্ভাবৌ নিরোধক্ষণচিত্তান্বয়ো
নিরোধপরিণামঃ || বিভূতি ৯||
তস্য প্রশান্তবাহিতা সংস্কারাৎ || বিভূতি ১০||
সর্বার্থতৈকাগ্রতয়োঃ ক্ষয়োদয়ৌ চিত্তস্য সমাধিপরিণামঃ || বিভূতি
১১||
শান্তোদিতৌ তুল্যপ্রত্যয়ৌ চিত্তস্যৈকাগ্রতাপরিণামঃ || বিভূতি ১২||
এতেন ভূতেন্দ্রিয়েষু ধর্মলক্ষণাবস্থাপরিণামা ব্যাখ্যাতাঃ || বিভূতি
১৩||
শান্তোদিতাব্যপদেশ্যধর্মানুপাতী ধর্মী || বিভূতি ১৪||
ক্রমান্যৎবং পরিণামান্যৎবে হেতুঃ || বিভূতি ১৫||
পরিণামত্রয়সংযমাদতীতানাগতজ্ঞানম্ || বিভূতি ১৬||
শব্দার্থপ্রত্যয়ানামিতরেতরাধ্যাসাৎসঙ্করস্তৎপ্রবিভাগসংযমাৎসর্বভূতরুতজ্ঞানম্ || বিভূতি ১৭||
সংস্কারসাক্ষাৎকরণাৎপূর্বজাতিজ্ঞানম্ || বিভূতি ১৮||
প্রত্যয়স্য পরচিত্তজ্ঞানম্ || বিভূতি ১৯||
ন চ তৎসালম্বনং তস্যাবিষয়ীভূতৎবাৎ || বিভূতি ২০||
কায়রূপসংযমাত্তদ্গ্রাহ্যশক্তিস্তম্ভে
চক্ষুষ্প্রকাশাসংযোগেঽন্তর্ধানম্ || বিভূতি ২১||
সোপক্রমং নিরুপক্রমং চ কর্ম তৎসংযমাদপরান্তজ্ঞানমরিষ্টেভ্যো
বা || বিভূতি ২২||
মৈত্র্যাদিষু বলানি || বিভূতি ২৩||
বলেষু হস্তিবলাদীনি || বিভূতি ২৪||
প্রবৃত্ত্যালোকন্যাসাৎসূক্ষ্মব্যবহিতবিপ্রকৃষ্টজ্ঞানম্ || বিভূতি ২৫||
ভুবনজ্ঞানং সূর্যে সংযমাৎ || বিভূতি ২৬||
চন্দ্রে তারাব্যূহজ্ঞানম্ || বিভূতি ২৭||
ধ্রুবে তদ্গতিজ্ঞানম্ || বিভূতি ২৮||
নাভিচক্রে কায়ব্যূহজ্ঞানম্ || বিভূতি ২৯||
কণ্ঠকূপে ক্ষুৎপিপাসানিবৃত্তিঃ || বিভূতি ৩০||
কূর্মনাড্যাং স্থৈর্যম্ || বিভূতি ৩১||
মূর্ধজ্যোতিষি সিদ্ধদর্শনম্ || বিভূতি ৩২||
প্রাতিভাদ্বা সর্বম্ || বিভূতি ৩৩||
হৃদয়ে চিত্তসংবিৎ || বিভূতি ৩৪||
সত্ত্বপুরুষয়োরত্যন্তাসঙ্কীর্ণয়োঃ প্রত্যয়াবিশেষো ভোগঃ
পরার্থান্যস্বার্থসংযমাৎপুরুষজ্ঞানম্ || বিভূতি ৩৫||
[পরার্থৎবাৎ স্বার্থসংযমাৎ ইত্যেব বহুসম্মতঃ সূত্রপাঠঃ | ]
ততঃ প্রাতিভশ্রাবণবেদনাদর্শাস্বাদবার্তা জায়ন্তে || বিভূতি ৩৬||
তে সমাধাবুপসর্গা ব্যুত্থানে সিদ্ধয়ঃ || বিভূতি ৩৭||
বন্ধকারণশৈথিল্যাৎপ্রচারসংবেদনাচ্চ চিত্তস্য পরশরীরাবেশঃ || বিভূতি ৩৮||
উদানজয়াজ্জলপঙ্ককণ্টকাদিষ্বসঙ্গ উৎক্রান্তিশ্চ || বিভূতি ৩৯||
সমানজয়াৎপ্রজ্বলনম্ || বিভূতি ৪০||
[জ্বলনম্ ইত্যেব্ বহুসম্মতঃ সূত্রপাঠঃ ]
শ্রোত্রাকাশয়োঃ সম্বন্ধসংযমাদ্দিব্যং শ্রোত্রম্ || বিভূতি ৪১||
কায়াকাশয়োঃ সম্বন্ধসংযমাল্লঘুতূলসমাপত্তেশ্চাকাশগমনম্ || বিভূতি ৪২||
বহিরকল্পিতা বৃত্তির্মহাবিদেহা ততঃ প্রকাশাবরণক্ষয়ঃ || বিভূতি
৪৩||
স্থূলস্বরূপসূক্ষ্মান্বয়ার্থবত্ত্বসংযমাদ্ভূতজয়ঃ || বিভূতি ৪৪||
ততোঽণিমাদিপ্রাদুর্ভাবঃ কায়সম্পত্তদ্ধর্মানভিঘাতশ্চ || বিভূতি
৪৫||
রূপলাবণ্যবলবজ্রসংহননৎবানি কায়সম্পৎ || বিভূতি ৪৬||
গ্রহণস্বরূপাস্মিতান্বয়ার্থবত্ত্বসংযমাদিন্দ্রিয়জয়ঃ || বিভূতি ৪৭||
ততো মনোজবিৎবং বিকরণভাবঃ প্রধানজয়শ্চ || বিভূতি ৪৮||
সত্ত্বপুরুষান্যতাখ্যাতিমাত্রস্য সর্বভাবাধিষ্ঠাতৃৎবং
সর্বজ্ঞাতৃৎবং চ || বিভূতি ৪৯||
তদ্বৈরাগ্যাদপি দোষবীজক্ষয়ে কৈবল্যম্ || বিভূতি ৫০||
স্বাম্যুপনিমন্ত্রণে সঙ্গস্ময়াঽকরণং পুনরনিষ্টপ্রসঙ্গাৎ || বিভূতি
৫১||
ক্ষণতৎক্রময়োঃ সংযমাদ্বিবেকজং জ্ঞানম্ || বিভূতি ৫২||
জাতিলক্ষণদেশৈরন্যতানবচ্ছেদাত্তুল্যয়োস্ততঃ প্রতিপত্তিঃ || বিভূতি
৫৩||
তারকং সর্ববিষয়ং সর্বথাবিষয়মক্রমং চেতি বিবেকজং জ্ঞানম্ || বিভূতি ৫৪||
সত্ত্বপুরুষয়োঃ শুদ্ধিসাম্যে কৈবল্যম্ || বিভূতি ৫৫||

ইতি বিভূতিপাদঃ || ৩||

অথ কৈবল্যপাদঃ || ৪||

জন্মৌষধিমন্ত্রতপঃসমাধিজাঃ সিদ্ধয়ঃ || কৈবল্য ১||
জাত্যন্তরপরিণামঃ প্রকৃত্যাপূরাৎ || কৈবল্য ২||
নিমিত্তমপ্রয়োজকং প্রকৃতীনাং বরণভেদস্তু ততঃ ক্ষেত্রিকবৎ || কৈবল্য ৩||
নির্মাণচিত্তান্যস্মিতামাত্রাৎ || কৈবল্য ৪||
প্রবৃত্তিভেদে প্রয়োজকং চিত্তমেকমনেকেষাম্ || কৈবল্য ৫||
তত্র ধ্যানজমনাশয়ম্ || কৈবল্য ৬||
কর্মাশুক্লাকৃষ্ণং যোগিনস্ত্রিবিধমিতরেষাম্ || কৈবল্য ৭||
ততস্তদ্বিপাকানুগুণানামেবাভিব্যক্তির্বাসনানাম্ || কৈবল্য ৮||
জাতিদেশকালব্যবহিতানামপ্যানন্তর্যং স্মৃতিসংস্কারয়োরেকরূপৎবাৎ || কৈবল্য ৯||
তাসামনাদিৎবং চাঽঽশিষো নিত্যৎবাৎ || কৈবল্য ১০||
হেতুফলাশ্রয়ালম্বনৈঃ সঙ্গৃহীতৎবাদেষামভাবে তদভাবঃ || কৈবল্য
১১||
অতীতানাগতং স্বরূপতোঽস্ত্যধ্বভেদাদ্ধর্মাণাম্ || কৈবল্য ১২||
তে ব্যক্তসূক্ষ্মা গুণাত্মানঃ || কৈবল্য ১৩||
পরিণামৈকৎবাদ্বস্তুতত্ত্বম্ || কৈবল্য ১৪||
বস্তুসাম্যে চিত্তভেদাত্তয়োর্বিবিক্তঃ পন্থাঃ || কৈবল্য ১৫||
তদুপরাগাপেক্ষিৎবাচ্চিত্তস্য বস্তু জ্ঞাতাজ্ঞাতম্ || কৈবল্য ১৬||
সদা জ্ঞাতাশ্চিত্তবৃত্তয়ঃ তৎপ্রভোঃ পুরুষস্যাপরিণামিৎবাৎ || কৈবল্য ১৭||
ন তৎস্বাভাসং দৃশ্যৎবাৎ || কৈবল্য ১৮||
একসময়ে চোভয়ানবধারণম্ || কৈবল্য ১৯||
চিত্তান্তরদৃশ্যে বুদ্ধিবুদ্ধেরতিপ্রসঙ্গঃ স্মৃতিসঙ্করশ্চ || কৈবল্য ২০||
চিত্তেরপ্রতিসঙ্ক্রমায়াস্তদাকারাপত্তৌ স্ববুদ্ধিসংবেদনম্ || কৈবল্য
২১||
দ্রষ্টৃদৃশ্যোপরক্তং চিত্তং সর্বার্থম্ || কৈবল্য ২২||
তদসঙ্খ্যেয়বাসনাভিশ্চিত্রমপি পরার্থং সংহত্যকারিৎবাৎ || কৈবল্য
২৩||
বিশেষদর্শিন আত্মভাবভাবনানিবৃত্তিঃ || কৈবল্য ২৪||
তদা বিবেকনিম্নং কৈবল্যপ্রাগ্ভারং চিত্তম্ || কৈবল্য ২৫||
তচ্ছিদ্রেষু প্রত্যয়ান্তরাণি সংস্কারেভ্যঃ || কৈবল্য ২৬||
হানমেষাং ক্লেশবদুক্তম্ || কৈবল্য ২৭||
প্রসঙ্খ্যানেঽপ্যকুসীদস্য সর্বথা বিবেকখ্যাতের্ধর্মমেঘঃ সমাধিঃ || কৈবল্য ২৮||
ততঃ ক্লেশকর্মনিবৃত্তিঃ || কৈবল্য ২৯||
তদা সর্বাবরণমলাপেতস্য জ্ঞানস্যানন্ত্যাজ্জ্ঞেয়মল্পম্ || কৈবল্য ৩০||
ততঃ কৃতার্থানাং পরিণামক্রমসমাপ্তির্গুণানাম্ || কৈবল্য ৩১||
ক্ষণপ্রতিয়োগী পরিণামাপরান্তনির্গ্রাহ্যঃ ক্রমঃ || কৈবল্য ৩২||
পুরুষার্থশূন্যানাং গুণানাং প্রতিপ্রসবঃ কৈবল্যং স্বরূপপ্রতিষ্ঠা
বা চিতিশক্তেরিতি || কৈবল্য ৩৩||
চিতিশক্তিঃ ইতি বহুসম্মতঃ সূত্রপাঠঃ |

ইতি কৈবল্য পাদঃ || ৪||

ইতি পাতঞ্জলয়োগসূত্রাণি |

প্রমাদাঃ সূর্যাংশু রায়ায় প্রেষিতব্যাঃ |

Leave a Reply

Your email address will not be published. Required fields are marked *