॥ গীতার্থ সঙ্গ্রহ ॥

স্বধর্মজ্ঞানবৈরাগ্যসাধ্যভক্‍ত্যেকগোচরঃ ।
নারায়ণঃ পরং ব্রহ্ম গীতাশাস্ত্রে সমীরিতঃ ॥ ১॥

জ্ঞানকর্মাত্মিকে নিষ্ঠে য়োগলক্ষ্যে সুসংস্কৃতে ।
আত্মানুভূতিসিদ্ধ্যর্থে পূর্বষট্কেন চোদিতে ॥ ২॥

মধ্যমে ভগবত্তত্ত্বয়াথাত্ম্যাবাপ্তিসিদ্ধয়ে ।
জ্ঞানকর্মাভিনির্বর্ত্যো ভক্‍তিয়োগঃ প্রকীর্তিতঃ ॥ ৩॥

প্রধানপুরুষব্যক্‍তসর্বেশ্বরবিবেচনম্ ।
কর্মধীর্ভক্‍তিরিত্যাদিঃ পূর্বশেষোঽন্তিমোদিতঃ ॥ ৪॥

অস্থানস্নেহকারুণ্যধর্মাধর্মধিয়াকুলম্ ।
পার্থং প্রপন্নমুদ্দিশ্য শাস্ত্রাবতরণং কৃতম্ ॥ ৫॥

নিত্যাত্মাসঙ্গকর্মেহাগোচরা সাঙ্খয়য়োগধীঃ ।
দ্বিতীয়ে স্থিতধীলক্ষা প্রোক্‍তা তন্মোহশান্তয়ে ॥ ৬॥

অসক্‍ত্যা লোকরক্ষায়ৈ গুণেষ্বারোপ্য কর্তৃতাম্ ।
সর্বেশ্বরে বা ন্যস্যোক্‍তা তৃতীয়ে কর্মকার্যতা ॥ ৭॥

প্রসঙ্গাত্স্বস্বভাবোক্‍তিঃ কর্মণোঽকর্মতাস্য চ ।
ভেদা জ্ঞানস্য মাহাত্ম্যং চতুর্থাধ্যায় উচ্যতে ॥ ৮॥

কর্ময়োগস্য সৌকর্যং শৈঘ্রয়ং কাশ্চন তদ্বিধাঃ ।
ব্রহ্মজ্ঞানপ্রকারশ্চ পঞ্চমাধ্যায় উচ্যতে ॥ ৯॥

য়োগাভ্যাসবিধির্যোগী চতুর্ধা য়োগসাধনম্ ।
য়োগসিদ্ধিস্স্বয়োগস্য পারম্যং ষষ্ঠ উচ্যতে ॥ ১০॥

স্বয়াথাত্ম্যং প্রকৃত্যাস্য তিরোধিশ্শরণাগতিঃ ।
ভক্‍তভেদঃ প্রবুদ্ধস্য শ্রৈষ্ঠ্যং সপ্তম উচ্যতে ॥ ১১॥

ঐশ্বর্যাক্ষরয়াথাত্ম্যভগবচ্চরণার্থিনাম্ ।
বেদ্যোপাদেয়ভাবানামষ্টমে ভেদ উচ্যতে ॥ ১২॥

স্বমাহাত্ম্যং মনুষ্যত্বে পরত্বং চ মহাত্মনাম্ ।
বিশেষো নবমে য়োগো ভক্‍তিরূপঃ প্রকীর্তিতঃ ॥ ১৩॥

স্বকল্যাণগুণানন্ত্যকৃত্স্নস্বাধীনতামতিঃ ।
ভক্‍ত্যুত্পত্তিবিবৃধ্দ্যর্থা বিস্তীর্ণা দশমোদিতা ॥ ১৪॥

একাদশে স্বয়াথাত্ম্যসাক্ষাত্কারাবলোকনম্ ।
দত্তমুক্‍তং বিদিপ্রাপ্ত্যোর্ভক্‍ত্যেকোপায়তা তথা ॥ ১৫॥

ভক্‍তেশ্শ্রৈষ্ঠয়মুপায়োক্‍তিরশক্‍তস্যাত্মনিষ্ঠতা ।
তত্প্রকারাস্ত্বতিপ্রীতির্ভক্‍তে দ্বাদশ উচ্যতে ॥ ১৬॥

দেহস্বরূপমাত্মাপ্তিহেতুরাত্মবিশোধনম্ ।
বন্ধহেতুর্বি বেকশ্চ ত্রয়োদশ উদীর্যতে ॥ ১৭॥

গুণবন্ধবিধা তেষাং কর্তৃত্বং তন্নিবর্তনম্ ।
গতিত্রয়স্বমূলত্বং চতুর্দশ উদীর্যতে ॥ ১৮॥

অচিন্মিশ্রাদ্বিশুদ্ধাচ্চ চেতনাত্পুরুষোত্তমঃ ।
ব্যাপনাদ্ভরণাত্স্বাম্যদন্যঃ পঞ্চদশোদিতঃ ॥ ১৯॥

দেবাসুরবিভগোক্‍তিপূর্বিকা শাস্ত্রবশ্যতা ।
তত্ত্বানুষ্ঠানবিজ্ঞানস্থেম্নে ষোডশ উচ্যতে ॥ ২০॥

অশাস্ত্রমাসুরং কৃত্স্নং শাস্ত্রীয়ং গুণতঃ পৃথক্ ।
লক্ষণং শাস্ত্রসিদ্ধস্য ত্রিধা সপ্তদশোদিতম্ ॥ ২১॥

ঈশ্বরে কর্তৃতাবুদ্ধিস্সত্ত্বোপাদেয়তান্তিমে ।
স্বকর্মপরিণামশ্চ শাস্ত্রসারার্থ উচ্যতে ॥ ২২॥

কর্ময়োগস্তপস্তীর্থদানয়জ্ঞাদিসেবনম্ ।
জ্ঞানয়োগো জিতস্বান্তৈঃ পরিশুদ্ধাত্মনি স্থিতিঃ ॥ ২৩॥

ভক্‍তিয়োগঃ পরৈকান্তপ্রীত্যা ধ্যানাদিষু স্থিতিঃ ।
ত্রয়াণামপি য়োগানাং ত্রিভিরন্যোন্যসঙ্গমঃ ॥ ২৪॥

নিত্যনৈমিত্তিকানাং চ পরারাধনরূপিণাম্ ।
আত্মদৃষ্টেস্ত্রয়োঽপ্যেতে য়োগদ্বারেণ সাধকাঃ ॥ ২৫॥

নিরস্তনিখিলাজ্ঞানো দৃষ্ট্বাত্মানং পরানুগম্ ।
প্রতিলভ্য পরাং ভক্‍তিং তয়ৈবাপ্নোতি তত্পদম্ ॥ ২৬॥

ভক্‍তিয়োগস্তদর্থী চেত্সমগ্রৈশ্বর্যসাধকঃ ।
আত্মার্থী চেত্ত্রয়োঽপ্যেতে তত্কৈবল্যস্য সাধকাঃ ॥ ২৭॥

ঐকান্ত্যং ভগবত্যেষাং সমানমধিকারিণাম্ ।
য়াবত্প্রাপ্তি পরার্থী চেত্তদেবাত্যন্তমশ্নুতে ॥ ২৮॥

জ্ঞানী তু পরমৈকান্তী তদায়ত্তাত্মজীবনঃ ।
তত্সংশ্লেষবিয়োগৈকসুখদুঃখস্তদেকধীঃ ॥ ২৯॥

ভগবদ্ধ্যানয়োগোক্‍তিবন্দনস্তুতিকীর্তনৈঃ ।
লব্ধাত্মা তদ্গতপ্রাণমনোবুদ্ধীন্দ্রিয়ক্রিয়ঃ ॥ ৩০॥

নিজকর্মাদি ভক্‍ত্যন্তং কুর্যাত্প্রীত্যৈব কারিতঃ ।
উপায়তাং পরিত্যজ্য ন্যস্যেদ্দেবেতু তামভীঃ ॥ ৩১॥

একান্তাত্যন্তদাস্যৈকরতিস্তত্পদমাপ্নুয়াত্ ।
তত্প্রধানমিদং শাস্ত্রমিতি গীতার্থসঙ্গ্রহঃ ॥ ৩২॥