অধ্যাত্ম

.. অধ্যাত্মোপনিষত্ ..
যত্রান্তর্যাম্যাদিভেদস্তত্ত্বতো ন হি যুজ্যতে .
নির্ভেদং পরমাদ্বৈতং স্বমাত্রমবশিষ্যতে ..
ॐ পূর্ণমদঃ পূর্ণমিদং পূর্ণাত্পূর্ণমুদচ্যতে .
পূর্ণস্য পূর্ণমাদায পূর্ণমেবাবশিষ্যতে ..
ॐ শান্তিঃ শান্তিঃ শান্তিঃ ..
হরিঃ ॐ .. অন্তঃশরীরে নিহিতো গুহাযামজ একো নিত্যমস্য
পৃথিবী শরীরং যঃ পৃথিবীমন্তরে সংচরন্যং পৃথিবী ন বেদ .
যস্যাপঃশরীরং যো অপোঽন্তরে সংচরন্যমাপো ন বিদুঃ .
যস্য তেজঃ শরীরং যস্তেজোঽন্তরে সংচরন্যং তেজো ন বেদ .
যস্য বাযুঃ শরীরং যো বাযুমন্তরে সংচরন্যং বাযুর্ন বেদ .
যস্যাকাশঃ শরীরং য আকাশমন্তরে সংচরন্যমাকাশো ন বেদ .
যস্য মনঃ শরীরং যো মনোঽন্তরে সংচরন্যং মনো ন বেদ .
যস্য বুদ্ধিঃ শরীরং যো বুদ্ধিমন্তরে সংচরন্যং বুদ্ধির্ন বেদ .
যস্যাহংকারঃ শরীরং যোঽহংকারমন্তরে সংচরন্যমহংকারো ন বেদ .
যস্য চিত্তং শরীরং যশ্চিত্তমন্তরে সংচরন্যং চিত্তং ন বেদ .
যস্যাব্যক্তং শরীরং যোঽব্যক্তমন্তরে সংচরন্যমব্যক্তং ন বেদ .
যস্যাক্ষরং শরীরং যোঽক্ষরমন্তরে সংচরন্যম্ক্ষরং ন বেদ .
যস্য মৃযুঃ শরীরং যো মৃত্যুমন্তরে সংচরন্যং মৃত্যুর্ন বেদ .
স এষ সর্বভূতান্তরাত্মাপহতপাপ্মা দিব্যো দেব একো নারাযণঃ .
অহং মমেতি যো ভাবো দেহাক্ষাদাবনাত্মনি . অধ্যাসোঽযং নিরস্তব্যো
বিদুষা ব্রহ্মনিষ্ঠযা .. ১..
জ্ঞাত্বা স্বং প্রত্যগাত্মানং বুদ্ধিতদ্বৃত্তিসাক্ষিণম্ .
সোঽহমিত্যেব তদ্বৃত্ত্যা স্বান্যত্রাত্ম্যমাত্মনঃ .. ২..
লোকানুবর্তনং ত্যক্ত্বা ত্যক্ত্বা দেহানুবর্তনম্ .
শাস্ত্রানুবর্তনং ত্যক্ত্বা স্বাধ্যাসাপনযং কুরু .. ৩..
স্বাত্মন্যেব সদা স্থিত্যা মনো নশ্যতি যোগিনঃ .
যুক্ত্যা শ্রুত্যা স্বানুভূত্যা জ্ঞাত্বা সার্বাত্ম্যমাত্মনঃ .. ৪..
নিদ্রাযা লোকবার্তাযাঃ শব্দাদেরাত্মবিস্মৃতেঃ .
ক্বচিন্নবসরং দত্ত্বা চিন্তযাত্মানমাত্মনি .. ৫..
মাতাপিত্রোর্মলোদ্ভূতং মলমাংসমযং বপুঃ .
ত্যক্ত্বা চণ্ডালবদ্দূরং ব্রহ্মভূয কৃতী ভব .. ৬..
ঘটাকাশং মহাকাশ ইবাত্মানং পরাত্মনি .
বিলাপ্যাখণ্ডভাবেন তূষ্ণীং ভব সদা মুনে .. ৭..
স্বপ্রকাশমধিষ্ঠানং স্বযংভূয সদাত্মনা .
ব্রহ্মাণ্ডমপি পিণ্ডাণ্ডং ত্যজ্যতাং মলভাণ্ডবত্ .. ৮..
চিদাত্মনি সদানন্দে দেহরূঢামহংধিযম্ .
নিবেশ্য লিঙ্গমুত্সৃজ্য কেবলো ভব সর্বদা .. ৯..
যত্রৈষ জগদাভাসো দর্পণান্তঃপুরং যথা .
তদ্ব্রহ্মাহমিতি জ্ঞাত্বা কৃতকৃত্যো ভবানঘ .. ১০..
অহংকারগ্রহান্মুক্তঃ স্বরূপমুপপদ্যতে .
চন্দ্রবদ্বিমলঃ পূর্ণঃ সদানন্দঃ স্বযংপ্রভঃ .. ১১..
ক্রিযানাশাদ্ভবেচ্চিন্তানাশোঽস্মাদ্বাসনাক্ষযঃ .
বাসনাপ্রক্ষযো মোক্ষঃ সা জীবন্মুক্তিরিষ্যতে .. ১২..
সর্বত্র সর্বতঃ সর্বব্রহ্মমাত্রাবলোকনম্ .
সদ্ভাবভাবানাদাঢ্যাদ্বাসনালযমশ্নুতে .. ১৩..
প্রমাদো ব্রহ্মনিষ্ঠাযাং ন কর্তব্য৛্ কদাচন .
প্রমাদো মৃত্যুরিত্যাহুর্বিদ্যাযাং ব্রহ্মবাদিনঃ .. ১৪..
যথাপকৃষ্টং শৈবালং ক্ষণমাত্রং ন তিষ্ঠতি .
আবৃণোতি তথা মাযা প্রাজ্ঞং বাপি পরাঙ্মুখম্ .. ১৫..
জীবতো যস্য কৈবল্যং বিদেহোঽপি স কেবলঃ .
সমাধিনিষ্ঠতামেত্য নির্বিকল্পো ভবানঘ .. ১৬..
অজ্ঞানহৃদযগ্রন্থের্নিঃশেষবিলযস্তদা .
সমাধিনা বিকল্পেন যদাদ্বৈতাত্মদর্শনম্ .. ১৭..
অত্রাত্মত্বং দৃঢীকুর্বন্নহমাদিষু সংত্যজন্ .
উদাসীনতযা তেষু তিষ্ঠেদ্ঘটপটাদিবত্ .. ১৮..
ব্রহ্মাদিস্তম্বপর্যন্তং মৃষামাত্রা উপাধযঃ .
ততঃ পূর্ণং স্বমাত্মানং পশ্যেদেকাত্মনা স্থিতম্ .. ১৯..
স্বযং ব্রহ্মা স্বযং বিষ্ণুঃ স্বযমিন্দ্রঃ স্বযং শিবঃ .
স্বযং বিশ্বমিদং সর্বং স্বস্মাদন্যন্ন কিংচন .. ২০..
স্বাত্মন্যারোপিতা শেষাভাসবস্তুনিরাসতঃ .
স্বযমেব পরংব্রহ্ম পূর্ণমদ্বযমক্রিযম্ .. ২১..
অসত্কল্পো বিকল্পোঽযং বিশ্বমিত্যেকবস্তুনি .
নির্বিকারে নিরাকারে নির্বিশেষে ভিদা কুতঃ .. ২২..
দ্রষ্টৃদর্শনদৃশ্যাদিভাবশূন্যে নিরামযে .
কল্পার্ণব ইবাত্যন্তং পরিপূর্ণে চিদাত্মনি .. ২৩..
তেজসীব তমো যত্র বিলীনং ভ্রান্তিকারণম্ .
অদ্বিতীযে পরে তত্ত্বে নির্বিশেষে ভিদা কুতঃ .. ২৪..
একাত্মকে পরে তত্ত্বে ভেদকর্তা কথং বসেত্ .
সুষুপ্তৌ সুখমাত্রাযাং ভেদঃ কেনাবলোকিতঃ .. ২৫..
চিত্তমূলো বিকল্পোঽযং চিত্তাভাবে ন কশ্চন .
অতশ্চিত্তং সমাধেযি প্রত্যগ্রূপে পরাত্মনি .. ২৬..
অখণ্ডানন্দমাত্মানং বিজ্ঞায স্বস্বরূপতঃ .
বহিরন্তঃ সদানন্দরসাস্বাদনমাত্মনি .. ২৭..
বৈরাগ্যস্য ফলং বোধো বোধস্যোপরতিঃ ফলম্ .
স্বানন্দানুভবচ্ছান্তিরেষৈবোপরতেঃ ফলম্ .. ২৮..
যদ্যুত্তরোত্তরাভাবে পূর্বরূপং তু নিষ্ফলম্ .
নিবৃত্তিঃ পরমা তৃপ্তিরানন্দোঽনুপমঃ স্বতঃ .. ২৯..
মাযোপাধির্জগদ্যোনিঃ সর্বজ্ঞত্বাদিলক্ষণঃ .
পারোক্ষ্যশবলঃ সত্যাদ্যাত্মকস্তত্পদাভিধঃ .. ৩০..
আলম্বনতযা ভাতি যোঽস্মত্প্রত্যযশব্দযোঃ .
অন্তঃকরণসংভিন্নবোধঃ স ত্বংপদাভিধঃ .. ৩১..
মাযাবিদ্যে বিহাযৈব উপাধী পরজীবযোঃ .
অখণ্ডং সচ্চিদানন্দং পরং ব্রহ্ম বিলক্ষ্যতে .. ৩২..
ইত্থং বাক্যৈস্তথার্থানুসন্ধানং শ্রবণং ভবেত্ .
যুক্ত্যা সংভাবিতত্বানুসন্ধানং মননং তু তত্ .. ৩৩..
তাভ্যং নির্বিচিকিত্সেঽর্থে চেতসঃ স্থাপিতস্য যত্ .
একতানত্বমেতদ্ধি নিদিধ্যাসনমুচ্যতে .. ৩৪..
ধ্যাতৃধ্যানে পরিত্যজ্য ক্রমাদ্ধ্যেযৈকগোচরম্ .
নিবাতদীপবচ্চিত্তং সমাধিরভিধীযতে .. ৩৫..
বৃত্তযস্তু তদানীমপ্যজ্ঞাতা আত্মগোচরাঃ .
স্মরণাদনুমীযন্তে ব্যুত্থিতস্য সমুত্থিতাঃ .. ৩৬..
অনাদাবিহ সংসারে সংচিতাঃ কর্মকোটযঃ .
অনেন বিলযং যান্তি  শুদ্ধো ধর্মো বিবর্ধতে .. ৩৭..
ধর্মমেঘমিমং প্রাহুঃ সমাধিং যোগবিত্তমাঃ .
বর্ষত্যেষ যথা ধর্মামৃতধারাঃ সহস্রশঃ .. ৩৮..
অমুনা বাসনাজালে নিঃশেষং প্রবিলাপিতে  .
সমূলোন্মূলিতে পুণ্যপাপাখ্যে কর্মসংচযে .. ৩৯..
বাক্যমপ্রতিবদ্ধং সত্প্রাক্পরোক্ষাবভাসিতে .
করামলকমবদ্বোধপরোক্ষং প্রসূযতে .. ৪০..
বাসনানুদযো ভোগ্যে বৈরাগ্যস্য তদাবধিঃ .
অহংভাবোদযাভাবো বোধস্য পরমাবধিঃ .. ৪১..
লীনবৃত্তেরনুত্পত্তির্মর্যাদোপরতেস্তু সা .
স্থিতপ্রজ্ঞো যতিরযং যঃ সদানন্দমশ্নুতে .. ৪২..
ব্রহ্মণ্যেব বিলীনাত্মা নির্বিকারো বিনিষ্ক্রিযঃ .
ব্রহ্মাত্মনোঃ শোধিতযোরেকভাবাবগাহিনি .. ৪৩..
নির্বিকল্পা চ চিন্মাত্রা বৃত্তিঃ প্রজ্ঞেতি কথ্যতে .
সা সর্বদা ভবেদ্যস্য স জীবন্মুক্ত ইষ্যতে .. ৪৪..
দেহেন্দ্রিযেষ্বহংভাব ইদংভাবস্তদন্যকে .
যস্য নো ভবতঃ ক্বাপি স জীবন্মুক্ত ইষ্যতে .. ৪৫..
ন প্রত্যগ্ব্রহ্মণোর্ভেদং কদাপি ব্রহ্মসর্গযোঃ .
প্রজ্ঞযা যো বিজানাতি স জীবন্মুক্ত ইষ্যতে .. ৪৬..
সাধুভিঃ পূজ্যমানেঽস্মিন্পীড্যমানেঽপি দুর্জনৈঃ .
সমভাবো ভবেদ্যস্য স জীবন্মুক্ত ইষ্যতে .. ৪৭..
বিজ্ঞাতব্রহ্মতত্ত্বস্য যথাপূর্বং ন সংসৃতিঃ .
অস্তি চেন্ন স বিজ্ঞাতব্রহ্মভাবো বহির্মুখঃ .. ৪৮..
সুখাদ্যনুভবো যাবত্তাবত্প্রারব্ধমিষ্যতে .
ফলোদযঃ ক্রিযাপূর্বো নিষ্ক্রিযো নহি কুত্রচিত্ .. ৪৯..
অহং ব্রহ্মেতি বিজ্ঞানাত্কল্পকোটিশতার্জিতম্ .
সংচিতং বিলযং যাতি প্রবোধাত্স্বপ্নকর্মবত্ .. ৫০..
স্বমসঙ্গমুদাসীনং পরিজ্ঞায নভো যথা .
ন শ্লিষ্যতে যতিঃ কিংচিত্কদাচিদ্ভাবিকর্মভিঃ .. ৫১..
ন নভো ঘটযোগেন সুরাগন্ধেন লিপ্যতে .
তথাত্মোপাধিযোগেন তদ্ধর্মে নৈব লিপ্যতে .. ৫২..
জ্ঞানোদযাত্পুরারব্ধং কর্ম জ্ঞানান্ন নশ্যতি .
অদত্ত্বা স্বফলং লক্ষ্যমুদ্দিশ্যোত্সৃষ্টবাণবত্ .. ৫৩..
ব্যাঘ্রবুদ্ধ্যা বিনির্মুক্তো বাণঃ পশ্চাত্তু গোমতৌ .
ন তিষ্ঠতি ভিনত্ত্যেব লক্ষ্যং বেগেন নির্ভরম্ .. ৫৪..
অজরোঽস্ম্যমরোঽস্মীতি য আত্মানং প্রপদ্যতে .
তদাত্মনা তিষ্ঠতোঽস্য কুতঃ প্রারব্ধকল্পনা .. ৫৫..
প্রারব্ধং সিদ্ধ্যতি তদা যদা দেহাত্মনা স্থিতিঃ .
দেহাত্মভাবো নৈবেষ্টঃ প্রারব্ধং ত্যজ্যতামতঃ .. ৫৬..
প্রারব্ধকল্পনাপ্যস্য দেহস্য ভ্রান্তিরেব হি .. ৫৭..
অধ্যস্তস্য কুতস্তত্ত্বমসত্যস্য কুতো জনিঃ .
অজাতস্য কুতো নাশঃ প্রারব্ধমসতঃ কুতঃ .. ৫৮..
জ্ঞানেনাজ্ঞানকার্যস্য সমূলস্য লযো যদি .
তিষ্ঠত্যযং কথং দেহ ইতি শঙ্কাবতো জডান্ .
সমাধাতুং বাহ্যদৃষ্ট্যা প্রারব্ধং বদতি শ্রুতিঃ .. ৫৯..
ন তু দেহাদিসত্যত্ববোধনায বিপশ্চিতাম্ .
পরিপূর্ণমনাদ্যন্তমপ্রমেযমবিক্রিযম্ .. ৬০..
সদ্ঘনং চিদ্ঘনং নিত্যমানন্দঘনমব্যযম্ .
প্রত্যগেকরসং পূর্ণমনন্তং সর্বতোমুখম্ .. ৬১..
অহেযমনুপাদেযমনাধেযমনাশ্রযম্ .
নির্গুণং নিষ্ক্রিযং সূক্ষ্মং নির্বিকল্পং নিরঞ্জনম্ .. ৬২..
অনিরূপ্যস্বরূপং যন্মনোবাচামগোচরম্ .
সত্সমৃদ্ধং স্বতঃসিদ্ধং শুদ্ধং বুদ্ধমনোদৃশম্ .. ৬৩..
স্বানুভূত্যা স্বযং জ্ঞাত্বা স্বমাত্মানমখণ্ডিতম্ .
স সিদ্ধঃ সুসুখং তিষ্ঠ নির্বিকল্পাত্মনাত্মনি .. ৬৪..
ক্ব গতং কেন বা নীতং কুত্র লীনমিদং জগত্ .
অধুনৈব মযা দৃষ্টং নাস্তি কিং মহদদ্ভুতম্ .. ৬৫..
কিং হেযং কিমুপাদেযং কিমন্যত্কিং বিলক্ষণম্ .
অখণ্ডানন্দপীযূষপূর্ণব্রহ্মমহার্ণবে .. ৬৬..
ন কিংচিদত্র পশ্যামি ন শৃণোমি ন বেদ্ম্যহম্ .
স্বাত্মনৈব সদানন্দরূপেণাস্মি স্বলক্ষণঃ .. ৬৭..
অসঙ্গোঽহমনঙ্গোঽহমলিঙ্গোঽহং হরিঃ .
প্রশান্তোঽহমনন্তোঽহং পরিপূর্ণশ্চিরন্তনঃ .. ৬৮..
অকর্তাহমভোক্তাহমবিকারোঽহমব্যযঃ .
শুদ্ধ বোধস্বরূপোঽহং কেবলোঽহং সদাশিবঃ .. ৬৯..
এতাং বিদ্যামপান্তরতমায দদৌ . অপান্তরতমো ব্রহ্মণে দদৌ .
ব্রহ্মা ঘোরাঙ্গিরসে দদৌ . ঘোরাঙ্গিরা রৈক্বায দদৌ . রৈক্বো রামায দদৌ .
রামঃ সর্বেভ্যো ভূতেভ্যো দদাবিত্যেতন্নির্বাণানুশাসনং
বেদানুশাসনং বেদানুশাসনমিত্যুপনিষত্ ..
ॐ পূর্ণমদঃ পূর্ণমিদং পূর্ণাত্পূর্ণমুদচ্যতে .
পূর্ণস্য পূর্ণমাদায পূর্ণমেবাবশিষ্যতে ..
ॐ শান্তিঃ শান্তিঃ শান্তিঃ .. হরিঃ ॐ তত্সত্ ..
ইতি অধ্যাত্মোপনিষত্সমাপ্তা ..

Leave a Reply

Your email address will not be published. Required fields are marked *