আদিপর্ব – অধ্যায় ২৩৩

আদিপর্ব – অধ্যায় ২৩৩

॥ শ্রীঃ ॥

১.২৩৩. অধ্যায়ঃ ২৩৩

(অর্থার্জুনবনবাসপর্ব ॥ ১৫ ॥)

Mahabharata – Adi Parva – Chapter Topics

তস্করৈঃ কস্যচিদ্ব্রাহ্মণস্য গোহরণম্॥ ১ ॥ চোরিতানাং গবাং প্রত্যাজিহীর্ষয়া ধনুর্গ্রহণার্থং দ্রৌপদীয়ুধিষ্ঠিরাধিষ্ঠিতে আয়ুধাগারে অর্জুনস্য প্রবেশঃ॥ ২ ॥ চোরেশ্যঃ প্রত্যাহৃতা গাঃ ব্রাহ্মণায় দত্ৎবা যথাসময়ং অর্জুনস্য তীর্থয়াত্রা॥ ৩ ॥

Mahabharata – Adi Parva – Chapter Text

১-২৩৩-০ (১০১০৩)
বৈশম্পায়ন উবাচ। ১-২৩৩-০x (১২৬৪)
এবং তে সময়ং কৃৎবা ন্যবসংস্তত্র পাণ্ডবাঃ।
বশে শস্ত্রপ্রতাপেন কুর্বন্তোঽন্যান্মহীক্ষিতঃ॥ ১-২৩৩-১ (১০১০৪)
তেষাং মনুজসিংহানাং পঞ্চানামমিতৌজসাম্।
বভূব কৃষ্ণা সর্বেষাং পার্থানাং বশবর্তিনী॥ ১-২৩৩-২ (১০১০৫)
তে তয়া তৈশ্চ সা বীরৈঃ পতিভিঃ সহ পঞ্চভিঃ।
বভূব পরমপ্রীতা নাগৈরিব সরস্বতী॥ ১-২৩৩-৩ (১০১০৬)
বর্তমানেষু ধর্মেণ পাণ্ডবেষু মহাত্মসু।
ব্যবর্ধন্কুরবঃ সর্বে হীনদোষাঃ সুখান্বিতাঃ॥ ১-২৩৩-৪ (১০১০৭)
অথ দীর্ঘেণ কালেন ব্রাহ্মণস্য বিশাংপতে।
কস্যচিত্তস্করা জহ্রুঃ কেচিদ্গা নৃপসত্তম॥ ১-২৩৩-৫ (১০১০৮)
হ্রিয়মাণে ধনে তস্মিন্ব্রাহ্মণঃ ক্রোধমূর্চ্ছিতঃ।
আগম্য খাণ্ডবপ্রস্থমুদক্রোশৎস পাণ্ডবান্॥ ১-২৩৩-৬ (১০১০৯)
হ্রিয়তে গোধনং ক্ষুদ্রৈর্নৃশংসৈরকৃতাত্মভিঃ।
প্রসহ্য চাস্মদ্বিষয়াদভ্যধাবত পাণ্ডবাঃ॥ ১-২৩৩-৭ (১০১১০)
ব্রাহ্মণস্য প্রশান্তস্য হবির্ধ্বাঙ্ক্ষৈঃ প্রলুপ্যতে।
শার্দূলস্য গুহাং শূন্যাং নীচঃ ক্রোষ্টাভিমর্দতি॥ ১-২৩৩-৮ (১০১১১)
অরক্ষিতারং রাজানং বলিষদ্ভাগহারিণম্।
তমাহুঃ সর্বলোকস্য সমগ্রং পাপচারিণম্॥ ১-২৩৩-৯ (১০১১২)
ব্রাহ্মণস্বে হৃতে চোরৈর্ধর্মার্থে চ বিলোপিতে।
রোরূয়মাণে চ ময়ি ক্রিয়তাং হস্তধারণা॥ ১-২৩৩-১০ (১০১১৩)
বৈশম্পায়ন উবাচ। ১-২৩৩-১১x (১২৬৫)
রোরূয়মাণস্যাভ্যাশে ভৃশং বিপ্রস্য পাণ্ডবঃ।
তানি বাক্যানি শুশ্রাব কুন্তীপুত্রো ধনঞ্জয়ঃ॥ ১-২৩৩-১১ (১০১১৪)
শ্রুৎবৈব চ মহাবাহুর্মা ভৈরিত্যাহ তং দ্বিজম্।
আয়ুধানি চ যত্রাসন্পাণ্ডবানাং মহাত্মনাং॥ ১-২৩৩-১২ (১০১১৫)
কৃষ্ণয়া সহ তত্রাস্তে ধর্মরাজো যুধিষ্ঠিরঃ।
সংপ্রবেশায় চাশক্তো গমনায় চ পাণ্ডবঃ॥ ১-২৩৩-১৩ (১০১১৬)
তস্য চার্তস্য তৈর্বাক্যৈশ্চোদ্যমানঃ পুনঃপুনঃ।
আক্রন্দে তত্র কৌন্তেয়শ্চিন্তয়ামাস দুঃখিতঃ॥ ১-২৩৩-১৪ (১০১১৭)
হ্রিয়মাণে ধনে তস্মিন্ব্রাহ্মণস্য তপস্বিনঃ।
অশ্রুপ্রমার্জনং তস্য কর্তব্যমিতি নিশ্চয়ঃ॥ ১-২৩৩-১৫ (১০১১৮)
উপর্রেক্ষণজোঽধর্মঃ সুমহান্স্যান্মহীপতেঃ।
যদ্যস্য রুদতো দ্বারি ন করোম্যদ্য রক্ষণম্॥ ১-২৩৩-১৬ (১০১১৯)
অনাস্তিক্যং চ সর্বেষামস্মাকমপি রক্ষণে।
প্রতিতিষ্ঠেত লোকেঽস্মিন্নধর্মশ্চৈব নো ভবেৎ॥ ১-২৩৩-১৭ (১০১২০)
অনাপৃচ্ছয় তু রাজানং গতে ময়ি ন সংশয়ঃ।
অজাতশত্রোর্নৃপতের্ময়ি চৈবানৃতং ভবেৎ॥ ১-২৩৩-১৮ (১০১২১)
অনুপ্রবেশে রাজ্ঞস্তু বনবাসো ভবেন্মম।
সর্বমন্যৎপরিহৃতং ধর্ষণাত্তু মহীপতেঃ॥ ১-২৩৩-১৯ (১০১২২)
অধর্মো বৈ মহানস্তু বনে বা মরণং মম।
শরীরস্য বিনাশেন ধর্ম এব বিশিষ্যতে॥ ১-২৩৩-২০ (১০১২৩)
এবং বিনিশ্চিত্য ততঃ কুন্তীপুত্রো ধনঞ্জয়ঃ।
অনুপ্রবিশ্য রাজানমাপৃচ্ছয় চ বিশাংপতে॥ ১-২৩৩-২১ (১০১২৪)
`মুখমাচ্ছাদ্য নিবিডমুত্তরীয়েণ বাসসা।
অগ্রজং চার্জুনো গেহাদভিবাদ্যাশু নিঃসৃতঃ॥’ ১-২৩৩-২২ (১০১২৫)
ধনুরাদায় সংহৃষ্টো ব্রাহ্মণং প্রত্যভাষত।
ব্রাহ্মণা গম্যতাং শীঘ্রং যাবৎপরধনৈর্ষিণঃ॥ ১-২৩৩-২৩ (১০১২৬)
ন দূরে তে গতাঃ ক্ষুদ্রাস্তাবদ্গচ্ছাবহে সহ।
যাবন্নিবর্তয়াম্যদ্য চোরহস্তাদ্ধনং তব॥ ১-২৩৩-২৪ (১০১২৭)
সোঽনুসৃত্য মহাবাহুর্ধন্বী বর্মী রথী ধ্বজী।
শরৈর্বিধ্বস্য তাংশ্চোরানবজিত্য চ তদ্ধনম্॥ ১-২৩৩-২৫ (১০১২৮)
ব্রাহ্মণং সমুপাকৃত্য যশঃ প্রাপ্য চ পাণ্ডবঃ।
ততস্তদ্গেধনং পার্থো দত্ৎবা তস্মৈ দ্বিজাতয়ে॥ ১-২৩৩-২৬ (১০১২৯)
আজগাম পুরং বীরঃ সব্যসাচী ধনঞ্জয়ঃ।
সোঽভিবাদ্য গুরূন্সর্বান্সর্বৈশ্চাপ্যভিনন্দিতঃ॥ ১-২৩৩-২৭ (১০১৩০)
ধর্মরাজমুবাচেদং ব্রতমাদিশ মে প্রভো।
সময়ঃ সমতিক্রান্তো ভবৎসংদর্শনে ময়া॥ ১-২৩৩-২৮ (১০১৩১)
বনবাসং গমিষ্যামি সময়ো হ্যেষ নঃ কৃতঃ।
ইত্যুক্তো ধর্মরাস্তু সহসা বাক্যমপ্রিয়ম্॥ ১-২৩৩-২৯ (১০১৩২)
কথমিত্যব্রবীদ্বাচা শোকার্তঃ সজ্জমানয়া।
যুধিষ্ঠিরো গুডাকেশং ভ্রাতা ভ্রাতরমচ্যুতম্॥ ১-২৩৩-৩০ (১০১৩৩)
উবাচ দীনো রাজা চ ধনঞ্জয়মিদং বচঃ।
প্রমাণমস্মি যদি তে মত্তঃ শৃণু বচোঽনঘ॥ ১-২৩৩-৩১ (১০১৩৪)
অনুপ্রবেশে যদ্বীর কৃতবাংস্ৎবং মমাপ্রিয়ম্।
সর্বং তদনুজানামি ব্যলীকং ন চ মে হৃদি॥ ১-২৩৩-৩২ (১০১৩৫)
গুরোরনুপ্রবেশো হি নোপঘাতো যবীয়সঃ।
যবীয়সোঽনুপ্রবেশো জ্যেষ্ঠস্য বিধিলোপকঃ॥ ১-২৩৩-৩৩ (১০১৩৬)
নিবর্তস্ব মহাবাহো কুরুষ্ব বচনং মম।
ন হি তে ধর্মলোপোঽস্তি ন চ তে ধর্পণা কৃতা॥ ১-২৩৩-৩৪ (১০১৩৭)
অর্জুন উবাচ। ১-২৩৩-৩৫x (১২৬৬)
ন ব্যাজেন চরেদ্ধর্মমিতি মে ভবতঃ শ্রুতম্।
ন সত্যাদ্বিচলিষ্যামি সত্যেনায়ুধমালভে॥ ১-২৩৩-৩৫ (১০১৩৮)
বৈশম্পায়ন উবাচ। ১-২৩৩-৩৬x (১২৬৭)
সোঽভ্যনুজ্ঞায় রাজানং বনচর্যায় দীক্ষিতঃ।
বনে দ্বাদশ মাসাংস্তু বাসায়ানুজগাম হ॥ ॥ ১-২৩৩-৩৬ (১০১৩৯)

ইতি শ্রীমন্মহাভারতে আদিপর্বণি অর্জুনবনবাসপর্বণি ত্রয়স্ত্রিংশদধিকদ্বিশততমোঽধ্যায়ঃ॥ ২৩৩ ॥

Mahabharata – Adi Parva – Chapter Footnotes

১-২৩৩-৩ নাগৈর্গজবধূরিব ইতি ঙ. পাঠঃ॥ ১-২৩৩-১৬ উপপ্রেক্ষণজ উপেক্ষাজন্যঃ॥ ১-২৩৩-১৭ অনাস্তিক্যমাস্তিক্যাভাবঃ॥ ১-২৩৩-৩০ সজ্জমানয়া স্খলন্ত্যা॥ ১-২৩৩-৩৬ মাসাংস্তু ব্রহ্মচর্যায় দীক্ষিতঃ ইতি ঙ. পাঠঃ॥ ত্রয়স্ত্রিংশদধিকদ্বিশততমোঽধ্যায়ঃ॥ ২৩৩ ॥

Leave a Reply

Your email address will not be published. Required fields are marked *