আদিপর্ব – অধ্যায় ০০৫

আদিপর্ব – অধ্যায় ০০৫

॥ শ্রীঃ ॥

১.৫. অধ্যায়ঃ ০০৫

Mahabharata – Adi Parva – Chapter Topics

ভৃগুবংশকথনম্॥ ১ ॥ পৌলোমোপাখ্যানম্॥ ২ ॥ পুলোমাপহারঃ॥ ৩ ॥ পুলোমাগ্নিসংবাদঃ॥ ৪ ॥

Mahabharata – Adi Parva – Chapter Text

১-৫-০ (৯০০)
শৌনক উবাচ। ১-৫-০x (২৭)
পুরাণমখিলং তাত পিতা তেঽধীতবান্পুরা।
`ভারতাধ্যযনং সর্বং কৃষ্ণদ্বৈপায়নাত্তদা।’
কচ্চিত্ৎবমপি তৎসর্বমধীষে রৌমহর্ষণে॥ ১-৫-১ (৯০১)
পুরাণে হি কথা দিব্যা আদিবংশাশ্চ ধীমতাম্।
কথ্যন্তে যে পুরাঽস্মাভিঃ শ্রুতপূর্বাঃ পিতুস্তব॥ ১-৫-২ (৯০২)
তত্র বংশমহং পূর্বং শ্রোতুমিচ্ছামি ভার্গবম্।
কথয়স্ব কথামেতাং কল্যাঃ স্মঃ শ্রবণে তব॥ ১-৫-৩ (৯০৩)
সৌতিরুবাচ। ১-৫-৪x (২৮)
যদধীতং পুরা সম্যগ্দ্বিজশ্রেষ্ঠৈর্মহাত্মভিঃ।
বৈশম্পায়নবিপ্রাগ্র্যৈস্তৈশ্চাপি কথিতং যথা॥ ১-৫-৪ (৯০৪)
যদধীতং চ পিত্রা মে সম্যক্কৈব ততো ময়া।
তাবচ্ছৃণুষ্ব যো দেবৈঃ সেন্দ্রৈঃ সর্ষিমরুদ্গণৈঃ॥ ১-৫-৫ (৯০৫)
পূজিতঃ প্রবরো বংশো ভার্গবো ভৃগুনন্দন।
ইমং বংশমহং পূর্বং ভার্গবং তে মহামুনে॥ ১-৫-৬ (৯০৬)
নিগদামি যথায়ুক্তং পুরাণাশ্রয়সংয়ুতম্।
ভৃগুর্মহর্ষির্ভগবান্ব্রহ্মণা বৈ স্বয়ংভুবা॥ ১-৫-৭ (৯০৭)
বরুণস্য ক্রতৌ জাতঃ পাবকাদিতি নঃ শ্রুতম্।
ভৃগোঃ সুদয়িতঃ পুত্রশ্চ্যবনো নাম ভার্গবঃ॥ ১-৫-৮ (৯০৮)
চ্যবনস্য চ দায়াদঃ প্রমতির্নাম ধার্মিকঃ।
প্রমতেরপ্যভূৎপুত্রো ঘৃতাচ্যাং রুরুরিত্যুত॥ ১-৫-৯ (৯০৯)
রুরোরপি সুতো জজ্ঞে শুনকো বেদপারগঃ।
প্রমদ্বরায়াং ধর্মাত্মা তব পূর্বপিতামহঃ॥ ১-৫-১০ (৯১০)
তপস্বী চ যশস্বী চ শ্রুতবান্ব্রহ্মবিত্তমঃ।
ধার্মিকঃ সত্যবাদী চ নিয়তো নিয়তাশনঃ॥ ১-৫-১১ (৯১১)
শৌনক উবাচ। ১-৫-১২x (২৯)
সূতপুত্র যথা তস্য ভার্গবস্য মহাত্মনঃ।
চ্যবনৎবং পরিখ্যাতং তন্মমাচক্ষ্ব পৃচ্ছতঃ॥ ১-৫-১২ (৯১২)
সৌতিরুবাচ। ১-৫-১৩x (৩০)
ভৃগোঃ সুদয়িতা ভার্যা পুলোমেত্যভিবিশ্রুতা।
তস্যাং সমভবদ্গর্ভো ভৃগুবীর্যসমুদ্ভবঃ॥ ১-৫-১৩ (৯১৩)
তস্মিন্গর্ভেঽথ সংভূতে পুলোমায়াং ভৃগূদ্বহ।
সময়ে সমশীলিন্যাং ধর্মপত্ন্যাং যশস্বিনঃ॥ ১-৫-১৪ (৯১৪)
অভিষেকায় নিষ্ক্রান্তে ভৃগৌ ধর্মভৃতাং বরে।
আশ্রমং তস্য রক্ষোঽথ পুলোমাঽভ্যাজগাম হ॥ ১-৫-১৫ (৯১৫)
তং প্রবিশ্যাশ্রমং দৃষ্ট্বা ভৃগোর্ভার্যামনিন্দিতাম্।
হৃচ্ছয়েন সমাবিষ্টো বিচেতাঃ সমপদ্যত॥ ১-৫-১৬ (৯১৬)
অভ্যাগতং তু তদ্রক্ষঃ পুলোমা চারুদর্শনা।
ন্যমন্ত্রয়ত বন্যেন ফলমূলাদিনা তদা॥ ১-৫-১৭ (৯১৭)
তাং তু রক্ষস্তদা ব্রহ্মন্হৃচ্ছয়েনাভিপীডিতম্।
দৃষ্ট্বা হৃষ্টমভূদ্রাজঞ্জিহীর্ষুস্তামনিন্দিতাম্॥ ১-৫-১৮ (৯১৮)
জাতমিত্যব্রবীৎকার্যং জিহীর্ষুর্মুদিতঃ শুভাম্।
সা হি পূর্বং বৃতা তেন পুলোম্না তু শুচিস্মিতা॥ ১-৫-১৯ (৯১৯)
তাং তু প্রাদাৎপিতা পশ্চাদ্ভৃগবে শাস্ত্রবত্তদা।
তস্য তৎকিল্বিষং নিত্যং হৃদি বর্ততি ভার্গব॥ ১-৫-২০ (৯২০)
ইদমন্তরমিত্যেবং হর্তুং চক্রে মনস্তদা।
অথাগ্নিশরণেঽপশ্যজ্জ্বলন্তং জাতবেদসম্॥ ১-৫-২১ (৯২১)
তমপৃচ্ছত্ততো রক্ষঃ পাবকং জ্বলিতং তদা।
শংস মে কস্য ভার্যেয়মগ্নে পৃচ্ছে ঋতেন বৈ॥ ১-৫-২২ (৯২২)
মুখং ৎবমসি দেবানাং বদ পাবক পৃচ্ছতে।
ময়া হীয়ং বৃতা পূর্বং ভার্যার্থে বরবর্ণিনী॥ ১-৫-২৩ (৯২৩)
পশ্চাদিমাং পিতা প্রাদাদ্ভৃগবেঽনৃতকারকঃ।
সেয়ং যদি বরারোহা ভৃগোর্ভার্যা রহোগতা॥ ১-৫-২৪ (৯২৪)
তথা সত্যং সমাখ্যাহি জিহীর্ষাম্যাশ্রমাদিমাম্।
স মন্যুস্তত্র হৃদয়ং প্রদহন্নিব তিষ্ঠতি॥ ১-৫-২৫ (৯২৫)
মৎপূর্বভার্যাং যদিমাং ভৃগুরাপ সুমধ্যমাম্।
`অসংমতমিদং মেঽদ্য হরিষ্যাম্যাশ্রমাদিমাম্’॥ ১-৫-২৬ (৯২৬)
সৌতিরুবাচ। ১-৫-২৭x (৩১)
এবং রক্ষস্তমামন্ত্র্য জ্বলিতং জাতবেদসম্।
শঙ্কমানং ভৃগোর্ভার্যাং পুনঃপুনরপৃচ্ছত॥ ১-৫-২৭ (৯২৭)
ৎবমগ্নে সর্বভূতানামন্তশ্চরসি নিত্যদা।
সাক্ষিবৎপুণ্যপাপেষু সত্যং ব্রূহি কবে বচঃ॥ ১-৫-২৮ (৯২৮)
মৎপূর্বভার্যাঽপহৃতা ভৃগুণাঽনৃতকারিণা।
সেয়ং যদি তথা মে ৎবং সত্যমাখ্যাতুমর্হসি॥ ১-৫-২৯ (৯২৯)
শ্রুৎবা ৎবত্তো ভৃগোর্ভার্যাং হরিষ্যাম্যাশ্রমাদিমাম্।
জাতবেদঃ পশ্যতস্তে বদ সত্যাং গিরং মম॥ ১-৫-৩০ (৯৩০)
সৌতিরুবাচ। ১-৫-৩১x (৩২)
তস্যৈতদ্বচনং শ্রুৎবা সপ্তার্চির্দুঃখিতোঽভবৎ।
`সত্যং বদামি যদি মে শাপঃ স্যাদ্ব্রহ্মবিত্তমাৎ॥ ১-৫-৩১ (৯৩১)
অসত্যং চেদহং ব্রূয়াং পতিষ্যে নরকান্ধ্রুবম্।’
ভীতোঽনৃতাচ্চ শাপাচ্চ ভৃগোরিত্যব্রবীচ্ছনৈঃ॥ ১-৫-৩২ (৯৩২)
ৎবয়া বৃতা পুলোমেয়ং পূর্বং দানবনন্দন।
কিং ৎবিয়ং বিধিনা পূর্বং মন্ত্রবন্ন বৃতা ৎবয়া॥ ১-৫-৩৩ (৯৩৩)
পিত্রা তু ভৃগবে দত্তা পুলোমেয়ং যশস্বিনী।
দদাতি ন পিতা তুভ্যং বরলোভান্মহায়শাঃ॥ ১-৫-৩৪ (৯৩৪)
অথেমাং বেদদৃষ্টেন কর্মণা বিধিপূর্বকম্।
ভার্যামৃষির্ভৃগুঃ প্রাপ মাং পুরস্কৃত্য দানব॥ ১-৫-৩৫ (৯৩৫)
সেয়মিত্যবগচ্ছামি নানৃতং বক্তুমুৎসহে।
নানৃতং হি সদা লোকে পূজ্যতে দানবোত্তম॥ ॥ ১-৫-৩৬ (৯৩৬)

ইতি শ্রীমন্মহাভারতে আদিপর্বণি পৌলোমপর্বণি পঞ্চমোঽধ্যায়ঃ॥ ৫ ॥

Mahabharata – Adi Parva – Chapter Footnotes

১-৫-৩ কল্যাঃ সমর্থাঃ। তব ৎবত্তঃ শ্রোতুমিতি সংবন্ধঃ॥ ১-৫-৭ যথায়ুক্তং কথায়ুক্তং ইত্যপি পাঠঃ। পুরাণস্য আশ্রয়ঃ উপোদ্ধাতঃতৎসংয়ুতং॥ ১-৫-১৯ বাল্যে কিল রুদতীং কন্যাং রোদনানিবৃত্ত্যর্থং ভীষয়িতুং পিত্রোক্তং রে রক্ষ এনাং গৃহাণেতি। তাবতৈব গৃহে সন্নিহিতেন রক্ষসা বৃতা মমেয়ং ভার্যেতি॥ ১-৫-২৭ শঙ্কমানং ছলবচনেন পূর্বং মহ্যং দত্তা পশ্চাদ্বিধিপূর্বকং ভৃগবে দত্তাঽতো মম বা ভৃগোর্বা ভার্যেতি সন্দিহানম্॥ ১-৫-২৮ কবে সর্বজ্ঞ॥ পঞ্চমোঽধ্যায়ঃ॥ ৫ ॥

Leave a Reply

Your email address will not be published. Required fields are marked *