আদিপর্ব – অধ্যায় ০০৩

আদিপর্ব – অধ্যায় ০০৩

॥ শ্রীঃ ॥

১.৩. অধ্যায়ঃ ০০৩

(অথ পৌষ্যপর্ব ॥ ৩ ॥)

Mahabharata – Adi Parva – Chapter Topics

জনমেজয়ং প্রতি সরমাখ্যদবেশুনীশাপঃ॥ ১ ॥ শাপনিবারণার্থমৃষেঃ সোমশ্রবসঃ পৌরোহিত্যেন বরণম্॥ ২ ॥ আরুণ্যুপমন্যুবৈদাখ্যানাং ধৌম্যশিষ্যাণামুপাখ্যানম্॥ ৩ ॥ বৈদশিষ্যস্যোত্তঙ্কস্যোপাখ্যানম্॥ ৪ ॥ পৌষ্যস্য রাজ্ঞ উপাখ্যানম্॥ ৫ ॥

Mahabharata – Adi Parva – Chapter Text

১-৩-০ (৬৯৯)
সৌতিরুবাচ। ১-৩-০x (১৬)
জনমেজয়ঃ পারিক্ষিতঃ সহ ভ্রাতৃভিঃ কুরুক্ষেত্রে দীর্ঘসত্রমুপাস্তে।
তস্য ভ্রাতরস্ত্রয়ঃ শ্রুতসেন উগ্রসেনো ভীমসেন ইতি।
তেষু তৎসত্রমুপাসীনেষ্বভ্যাগচ্ছৎসারমেয়ঃ॥ ১-৩-১ (৭০০)
জনমেজয়স্য ভ্রাতৃভিরভিহতো রোরূয়মাণো মাতুঃ সমীপমুপাগচ্ছৎ॥ ১-৩-২ (৭০১)
তং মাতা রোরূয়মাণমুবাচ।
কিং রোদিষি কেনাস্যভিহত ইতি॥ ১-৩-৩ (৭০২)
স এবমুক্তো মাতরং প্রত্যুবাচ জনমেজয়স্য ভ্রাতৃভিরভিহতোঽস্মীতি॥ ১-৩-৪ (৭০৩)
তং মাতা প্রত্যুবাচ ব্যক্তং ৎবয়া তত্রাপরাদ্ধং যেনাস্যভিহত ইতি॥ ১-৩-৫ (৭০৪)
স তাং পুনরুবাচ নাপরাধ্যামি কিংচিন্নাবেক্ষে হবীংষি নাবলিহ ইতি॥ ১-৩-৬ (৭০৫)
তচ্ছ্রুৎবা তস্য মাতা সরমা পুত্রদুঃখার্তা তৎসত্রমুপাগচ্ছদ্যত্র স জনমেজয়ঃ সহ ভ্রাতৃভির্দীর্ঘসত্রমুপাস্তে॥ ১-৩-৭ (৭০৬)
স তয়া ক্রুদ্ধয়া তত্রোক্তোঽয়ং মে পুত্রো ন কিংচিদপরাধ্যতি নাবেক্ষতে হবীংষি নাবলেঢি কিমর্থমভিহত ইতি॥ ১-৩-৮ (৭০৭)
ন কিংচিদুক্তবন্তস্তে সা তানুবাচ যস্মাদয়মভিহতোঽনপকারী তস্মাদদৃষ্টং ৎবাং ভয়মাগমিষ্যতীতি॥ ১-৩-৯ (৭০৮)
জনমেজয় এবমুক্তো দেবশুন্যা সরময়া ভৃশং সংভ্রান্তো বিষণ্ণশ্চাসীৎ॥ ১-৩-১০ (৭০৯)
স তস্মিন্সত্রে সমাপ্তে হাস্তিনপুরং প্রত্যেত্য পুরোহিতমনুরূপমন্বিচ্ছমানঃ পরং যত্নমকরোদ্যো মে পাপকৃত্যাং শময়েদিতি॥ ১-৩-১১ (৭১০)
স কদাচিন্মৃগয়াং গতঃ পারিক্ষিতো জনমেজয়ঃ কস্মিংশ্চিৎস্ববিষয় আশ্রমমপশ্যৎ॥ ১-৩-১২ (৭১১)
তত্র কশ্চিদৃপিরাসাঞ্চক্রে শ্রুতশ্রবা নাম।
তস্য তপস্যভিরতঃ পুত্র আস্তে সোমশ্রবা নাম॥ ১-৩-১৩ (৭১২)
তস্য তং পুত্রমভিগম্য জনমেজয়ঃ পারিক্ষিতঃ পৌরোহিত্যায় বব্রে॥ ১-৩-১৪ (৭১৩)
স নমস্কৃত্য তমৃষিমুবাচ ভগবন্নয়ং তব পুত্রো মম পুরোহিতোঽস্ৎবিতি॥ ১-৩-১৫ (৭১৪)
স এবমুক্তঃ প্রত্যুবাচ জনমেজয়ং ভো জনমেজয় পুত্রোঽয়ং মম সর্প্যাং জাতো মহাতপস্বী স্বাধ্যায়সংপন্নো মত্তপোবীর্যসংভৃতো মচ্ছুক্রং পীতবত্যাস্তস্যাঃ কুক্ষৌ জাতঃ॥ ১-৩-১৬ (৭১৫)
সমর্থোঽয়ং ভবতঃ সর্বাঃ পাপকৃত্যাঃ শময়িতুমন্তরেণ মহাদেবকৃত্যাম্॥ ১-৩-১৭ (৭১৬)
অস্য ৎবেকমুপাংশুব্রতং যদেনং কশ্চিদ্ব্রাহ্মণঃ কংচিদর্থমভিয়াচেত্তং তস্মৈ দদ্যাদয়ং যদ্যেতদুৎসহসে ততো নয়স্বৈনমিতি॥ ১-৩-১৮ (৭১৭)
তেনৈবমুক্তো জনমেজয়স্তং প্রত্যুবাচ ভগবংস্তত্তথা ভবিষ্যতীতি॥ ১-৩-১৯ (৭১৮)
স তং পুরোহিতমুপাদায়োপাবৃত্তো ভ্রাতৃনুবাচ ময়াঽয়ং বৃত উপাধ্যায়ো যদয়ং ব্রূয়াত্তৎকার্যমবিচারয়দ্ভির্ভবদ্ভিরিতি।
তেনৈবমুক্তা ভ্রাতরস্তস্য তথা চক্রুঃ।
স তথা ভ্রাতৄন্সংদিশ্য তক্ষশিলাং প্রত্যভিপ্রতস্থে তং চ দেশং বশে স্থাপয়ামাস॥ ১-৩-২০ (৭১৯)
এতস্মিন্নন্তরে কশ্চিদৃষির্ধৌম্যো নামাপোদস্তস্য শিষ্যাস্ত্রয়ো বভূবুঃ॥ ১-৩-২১ (৭২০)
উপমন্যুরারুণির্বৈদশ্চেতি স একং শিষ্যংমারুণিং পাঞ্চাল্যং প্রেষয়ামাস গচ্ছ কেদারখণ্ডং বধানেতি॥ ১-৩-২২ (৭২১)
স উপাধ্যায়েন সংদিষ্ট আরুণিঃ পাঞ্চাল্যস্তত্র গৎবা তৎকেদারখণ্ডং বদ্ধুং নাশকৎ।
স ক্লিশ্যমানোঽপশ্যদুপায়ং ভবৎবেবং করিষ্যামীতি॥ ১-৩-২৩ (৭২২)
স তত্র সংবিবেশ কেদারখণ্ডে শয়ানে ব তথা তস্মিংস্তদুদকং তস্থৌ॥ ১-৩-২৪ (৭২৩)
ততঃ কদাচিদুপাধ্যায় আপোদো ধৌম্যঃ শিষ্যাবপৃচ্ছৎ ক্ব আরুণিঃ পাঞ্চাল্যো গত ইতি॥ ১-৩-২৫ (৭২৪)
তৌ তং প্রত্যূচতুর্ভগবংস্ৎবয়ৈব প্রেষিতো গচ্ছ কেদারখণ্ডং বধানেতি।
স এবমুক্তস্তৌ শিষ্যৌ প্রত্যুবাচ তস্মাত্তত্র সর্বে গচ্ছামো যত্র স গত ইতি॥ ১-৩-২৬ (৭২৫)
স তত্র গৎবা তস্যাহ্বানায় শব্দং চকারঃ।
ভো আরুণে পাঞ্চাল্য ক্বাসি বৎসৈহীতি॥ ১-৩-২৭ (৭২৬)
স তচ্ছ্রুৎবা আরুণিরুপাধ্যায়বাক্যং তস্মাৎকেদারখণ্ডাৎসহসোত্থায়তমুপাধ্যায়মুপতস্থে॥ ১-৩-২৮ (৭২৭)
প্রোবাচ চৈনময়মস্ম্যত্র কেদারখণ্ডে নিঃসরমাণমুদকমবারণীয়ং সংরোদ্ধুং সংবিষ্টো ভগবচ্ছব্দং শ্রুৎবৈব সহসা বিদার্য কেদারখণ্ডং ভবন্তমুপস্থিতঃ॥ ১-৩-২৯ (৭২৮)
তদভিবাদয়ে ভগবন্তমাজ্ঞাপয়তু ভবান্কমর্থং করবাণীতি॥ ১-৩-৩০ (৭২৯)
স এবমুক্ত উপাধ্যায়ঃ প্রত্যুবাচ যস্মাদ্ভবান্কেদারখণ্ডং বিদার্যোত্থিতস্তস্মাদুদ্দালক এবনাম্না ভবান্ভবিষ্যতীত্যুপাধ্যায়েনানুগৃহীতঃ॥ ১-৩-৩১ (৭৩০)
যস্মাচ্চ ৎবয়া মদ্বচনমনুষ্ঠিতং তস্মাচ্ছ্রেয়োঽবাপ্স্যসি।
সর্বে চ তে বেদাঃ প্রতিভাস্যন্তি সর্বাণি চ ধর্মশাস্ত্রাণীতি॥ ১-৩-৩২ (৭৩১)
স এবমুক্ত উপাধ্যায়েনেষ্টং দেশং জগাম॥ ১-৩-৩৩ (৭৩২)
অথাপরঃ শিষ্যস্তস্যৈবাপোদস্য ধৌম্যস্যোপমন্যুর্নাম।
তং চোপাধ্যায়ঃ প্রেষয়ামাস বৎসোপমন্যো গা রক্ষস্বেতি॥ ১-৩-৩৪ (৭৩৩)
স উপাধ্যায়বচনাদরক্ষদ্গাঃ স চাহনি গা রক্ষিৎবা দিবসক্ষয়ে গুরুগৃহমাগম্যোপাধ্যায়স্যাগ্রতঃ স্থিৎবা নমশ্চক্রে॥ ১-৩-৩৫ (৭৩৪)
তমুপাধ্যায়ঃ পীবানমপশ্যদুবাচ চৈনং বৎসোপমন্যো কেন বৃত্তিং কল্পয়সি পীবানসি দৃঢমিতি॥ ১-৩-৩৬ (৭৩৫)
স উপাধ্যায়ং প্রত্যুবাচ ভো ভৈক্ষ্যেণ বৃত্তিং কল্পয়ামীতি তমুপাধ্যায়ঃ প্রত্যুবাচ॥ ১-৩-৩৭ (৭৩৬)
ময়্যনিবেদ্য বৈক্ষ্যং নীপয়োক্তব্যমিতি।
স তথেত্যুক্তো ভৈক্ষ্যং চরিৎবোণধ্যায়ন্যবেদয়ৎ॥ ১-৩-৩৮ (৭৩৭)
স তস্মাদুপাধ্যায়ঃ সর্বমেব ভৈক্ষ্যমগৃহ্ণাৎ।
স তথেত্যুক্তঃ পুনররক্ষদ্গা অহনি রক্ষিৎবা নিশামুখে গুরুকুলমাগম্য গুরোরগ্রতঃস্থিৎবা নমশ্চক্রে॥ ১-৩-৩৯ (৭৩৮)
তমুপাধ্যায়স্তথাপি পীবানমেব দৃষ্ট্বোবাচ।
বৎসোপমন্যো সর্বমশেষতস্তে ভৈক্ষ্যং গৃহ্ণামি কেনেদানীং বৃত্তিং কল্পয়সীতি॥ ১-৩-৪০ (৭৩৯)
স এবমুক্ত উপাধ্যায়ং প্রত্যুবাচ।
ভগবতে নিবেদ্য পূর্বমপরং চরামি তেন বৃত্তিং কল্পয়ামীতি তমুপাধ্যায়ঃ প্রত্যুবাচ॥ ১-৩-৪১ (৭৪০)
নৈষা ন্যায়্যা গুরুবৃত্তিরন্যেষামপি ভৈক্ষ্যোপজীবিনাং বৃত্ত্যুপরোধং করোষি ইত্যেবং বর্তমানো লুব্ধোঽসীতি॥ ১-৩-৪২ (৭৪১)
স তথেত্যুক্ৎবা গা অরক্ষদ্রক্ষিৎবাচ পুনরুপাধ্যায়গৃহমাগম্যোপাধ্যায়স্যাগ্রতঃ স্থিৎবা নমশ্চক্রে॥ ১-৩-৪৩ (৭৪২)
তমুপাধ্যায়স্তথাপি পীবানমেব দৃষ্ট্বা পুনরুবাচ।
বৎসোপমন্যো অহং তে সর্বং ভৈক্ষ্যং গৃহ্ণামি ন চান্যচ্চরসি পীবানসি ভৃশং কেন বৃত্তিং কল্পয়সীতি॥ ১-৩-৪৪ (৭৪৩)
স এবমুক্তস্তমুপাধ্যায়ং প্রত্যুবাচ।
ভো এতাসাং গবাং পয়সা বৃত্তিং কল্পয়ামীতি।
তমুবাচোপাধ্যায়ো নৈতন্ন্যায়্যং পয় উপয়োক্তুং ভবতো ময়া নাভ্যনুজ্ঞাতমিতি॥ ১-৩-৪৫ (৭৪৪)
স তথেতি প্রতিজ্ঞায় গা রক্ষিৎবা পুনরুপাধ্যায়গৃহমেত্য গুরোরগ্রতঃ স্থিৎবা নমশ্চক্রে॥ ১-৩-৪৬ (৭৪৫)
তমুপাধ্যায়ঃ পীবানমেব দৃষ্ট্বোবাচ।
বৎসোপমন্যো ভৈক্ষ্যং নাশ্নাসি ন চান্যচ্চরসি পয়ো ন পিবসি পীবানসি ভৃশং কেনেদানীং বৃত্তিং কল্পয়সীতি॥ ১-৩-৪৭ (৭৪৬)
স এবমুক্ত উপাধ্যায়ং প্রত্যুবাচ।
ভোঃ ফেনং পিবাপি যমিমে বৎসা মাতৄণাং স্তনাৎপিবন্ত উদ্গিরন্তি॥ ১-৩-৪৮ (৭৪৭)
তমুপাধ্যায়ঃ প্রত্যুবাচ।
এতে ৎবদনুকম্পয়া গুণবন্তো বৎসাঃ প্রভূততরং ফেনমুদ্গিরন্তি।
তদেষামপি বৎসানাং বৃত্ত্যুপরোধং করোষ্যেবং বর্তমানঃ।
ফেনমপি ভবান্ন পাতুমর্হতীতি স তথেতি প্রতিশ্রুত্য নিরাহারঃ পুনররক্ষদ্গাঃ॥ ১-৩-৪৯ (৭৪৮)
তথা প্রতিষিদ্ধো ভৈক্ষ্যং নাশ্নাতি নচান্যচ্চরতি পয়ো ন পিবতি ফেনং নোপয়ুহ্ক্তে স কদাচিদরণ্যে ক্ষুধার্তোঽর্কপত্রাণ্যভক্ষয়ৎ॥ ১-৩-৫০ (৭৪৯)
স তৈরর্কপত্রৈর্ভক্ষিতৈঃ ক্ষারতিক্তকটুরূক্ষৈস্তীক্ষ্ণবিপাকৈশ্চক্ষুষ্যুপহতোঽন্ধো বভূব।
ততঃ সোঽন্ধোঽপি চঙ্ক্রম্যমাণঃ কূপেঽপতৎ॥ ১-৩-৫১ (৭৫০)
অথ তস্মিন্ননাগচ্ছতি সূর্যে চাস্তাচলাবলম্বিনি উপাধ্যায়ঃ শিষ্যানবোচৎ॥ ১-৩-৫২ (৭৫১)
ময়োপমন্যুঃ সর্বতঃ প্রতিষিদ্ধঃ স নিয়তং কুপিতস্ততো নাগচ্ছতি চিরগতস্ৎবিতি।
ততোঽন্বেষ্য ইত্যেবমুক্ৎবা শিষ্যৈঃ সার্ধমরণ্যং গৎবা তস্যাহ্বানায় শব্দং চকার ভো উপমন্যো ক্বাসি বৎসৈহীতি॥ ১-৩-৫৩ (৭৫২)
স উপাধ্যায়স্য আহ্বানবচনং শ্রুৎবা প্রত্যুবাচোচ্চৈরয়মস্মিন্কূপে পতিতোঽহমিতি।
তমুপাধ্যায়ঃ প্রত্যুবাচ কথং ৎবমস্মিন্কূপে পতিত ইতি॥ ১-৩-৫৪ (৭৫৩)
স উপাধ্যায়ং প্রত্যুবাচ অর্কপত্রাণি ভক্ষয়িৎবান্ধীভূতোস্ম্যতশ্চঙ্ক্রম্যমাণঃ কূপে পতিত ইতি।
তমুপাধ্যায়ঃ প্রত্যুবাচ॥ ১-৩-৫৫ (৭৫৪)
অশ্বিনৌ স্তুহি তৌ দেবভিষজৌ ৎবাং চক্ষুষ্মন্তং কর্তারাবিতি।
স এবমুক্ত উপাধ্যায়েনোপমন্যুঃ স্তোতুমুপচক্রমে দেবাবশ্বিনৌ বাগ্ভির্ঋগ্ভিঃ॥ ১-৩-৫৬ (৭৫৫)
প্রপূর্বগৌ পূর্বজৌ চিত্রভানূ
গিরা বাং শংসামি তপসা হ্যনন্তৌ।
দিব্যৌ সুপর্ণৌ বিরজৌ বিমানা-
বধিক্ষিপন্তৌ ভুবনানি বিশ্বা॥ ১-৩-৫৭ (৭৫৬)
হিরণ্ময়ৌ শকুনী সাংপরায়ৌ
নাসত্যদস্রৌ সুনসৌ বৈজয়ন্তৌ।
শুক্লং বয়ন্তৌ তরসা সুবেমা-
বধিব্যযন্তাবসিতং বিবস্বতঃ॥ ১-৩-৫৮ (৭৫৭)
গ্রস্তাং সুপর্ণস্য বলেন বর্তিকা-
মমুঞ্চতামশ্বিনৌ সৌভগায়।
তাবৎসুবৃত্তাবনমং তমায় যা-
বসত্তমা গা অরুণা উদাবহৎ॥ ১-৩-৫৯ (৭৫৮)
ষষ্টিশ্চ গাবস্ত্রিশতাশ্চ ধেনব
একং বৎসং সুবতে তং দুহন্তি।
নানাগোষ্ঠা বিহিতা একদোহনা-
স্তাবশ্বিনৌ দুহতো ঘর্মমুক্থ্যম্॥ ১-৩-৬০ (৭৫৯)
একাং নাভিং সপ্ত সথা অরাঃ শ্রিতাঃ
প্রধিষ্বন্যা বিংশতিরর্পিতা অরাঃ।
অনেমি চক্রং পরিবর্ততেঽজরং
মায়াঽশ্বিনৌ সমনক্তি চর্ষণী॥ ১-৩-৬১ (৭৬০)
একং চক্রং বর্ততে দ্বাদশারং
ষণ্ণাভিমেকাক্ষমমৃতস্য ধারণম্।
যস্মিন্দেবা অধি বিশ্বে বিষক্তা-
স্তাবশ্বিনৌ মুঞ্চতো মা বিষীদতম্॥ ১-৩-৬২ (৭৬১)
অশ্বিনাবিন্দুমমৃতং বৃত্তভূয়ৌ
তিরোধত্তামশ্বিনৌ দাসপত্নী।
হিৎবা গিরিমশ্বিনৌ গামুদাচরন্তৌ
তদ্বৃষ্টিমহ্নাৎপ্রস্থিতৌ বলস্য॥ ১-৩-৬৩ (৭৬২)
যুবাং দিশো জনয়থো দশাগ্রে
সমানং মূর্ধ্নি রথয়ানং বিয়ন্তি।
তাসাং যাতমৃষয়োঽনুপ্রয়ান্তি
দেবা মনুষ্যাঃ ক্ষিতিমাচরন্তি॥ ১-৩-৬৪ (৭৬৩)
যুবাং বর্ণান্বিকুরুথো বিশ্বরূপাং-
স্তেঽধিক্ষিয়ন্তে ভুবনানি বিশ্বা।
তে ভানবোঽপ্যনুসৃতাশ্চরন্তি
দেবা মনুষ্যাঃ ক্ষিতিমাচরন্তি॥ ১-৩-৬৫ (৭৬৪)
তৌ নাসত্যাবশ্বিনৌ বাং মহেঽহং
স্রজং চ যাং বিভৃথঃ পুষ্করস্য।
তৌ নাসৎবাবমৃতাবৃতাবৃধা-
বৃতে দেবাস্তৎপ্রপদে ন সূতে॥ ১-৩-৬৬ (৭৬৫)
মুখেন গর্ভং লভতাং যুবানৌ
গতাসুরেতৎপ্রপদেন সূতে।
সদ্যো জাতো মাতরমত্তি গর্ভ-
স্তাবশ্বিনৌ মুঞ্চথৌ জীবসে গাম্॥ ১-৩-৬৭ (৭৬৬)
স্তোতুং ন শক্নোমি গুণৈর্ভবন্তৌ
চক্ষুর্বিহীনঃ পথি সংপ্রমোহঃ।
দুর্গেঽহমস্মিন্পতিতোঽস্মি কূপে
যুবাং শরণ্যৌ শরণং প্রপদ্যে॥ ১-৩-৬৮ (৭৬৭)
সৌতিরুবাচ। ১-৩-৬৯x (১৭)
এবমৃগ্ভিশ্চান্যৈরস্তুবৎ।
ইত্যেবং তেনাভিষ্টুতাবশ্বিনাবাজগ্মতুরাহতুশ্চৈং প্রীতৌ স্ব এষ তেঽপূপোশানৈনমিতি॥ ১-৩-৬৯ (৭৬৮)
স এবমুক্তঃ প্রত্যুবাচ নানৃতমূচতুর্ভগবন্তৌ নৎবহমেতমপূপমুপয়োক্তুমুৎসহে গুরবেঽনিবেদ্যেতি॥ ১-৩-৭০ (৭৬৯)
ততস্তমশ্বিনাবূচতুঃ।
আবাভ্যাং পুরস্তাদ্ভবত উপাধ্যায়েনৈবমেবাভিষ্টুতাভ্যামপূপোদত্ত উপয়ুক্তঃ স তেনানিবেদ্য গুরবে ৎবমপি তথৈব কুরুষ্ব যথা কৃতমুপাধ্যায়েনেতি॥ ১-৩-৭১ (৭৭০)
স এবমুক্তঃ প্রত্যুবাচ এতৎপ্রত্যনুনয়ে ভবন্তাবশ্বিনৌ নোৎসহেঽহমনিবেদ্য গুরবেঽপূপমুপয়োক্তুমিতি॥ ১-৩-৭২ (৭৭১)
তমশ্বিনাবাহতুঃ প্রীতৌ স্বস্তবানয়া গুরুভক্ত্যা।
উপাধ্যায়স্য তে কার্ষ্ণায়সা দন্তা ভবতোঽপি হিরণ্ময়া ভবিষ্যন্তি চক্ষুষ্মাংশ্চ ভবিষ্যসি শ্রেয়শ্চাবাপ্স্যসীতি॥ ১-৩-৭৩ (৭৭২)
স এবমুক্তোঽশ্বিভ্যাং লব্ধচক্ষুরুপাধ্যায়সকাশমাগম্যাভ্যবাদয়ৎ॥ ১-৩-৭৪ (৭৭৩)
আচচক্ষে চ স চাস্য প্রীতিমান্বভূব॥ ১-৩-৭৫ (৭৭৪)
আহ চৈনং যথাঽশ্বিনাবাহতুস্তথা ৎবং শ্রেয়োঽবাপ্স্যসীতি॥ ১-৩-৭৬ (৭৭৫)
সর্বে চ তে বেদাঃপ্রতিভাস্যন্তি সর্বাণি চ ধর্মশাস্ত্রাণীতি।
এষা তস্যাপি পরীক্ষোপমন্ন্যোঃ॥ ১-৩-৭৭ (৭৭৬)
অথাপরঃ শিষ্যস্তস্যৈবাপোদস্য ধৌম্যস্য বৈদো নাম তমুপাধ্যায়ঃ সমাদিদেশ বৎস বৈদ ইহাস্যতাং তাবন্মম গৃহে কংচিৎকালং শুশ্রূষুণা চ ভবিতব্যং শ্রেয়স্তে ভবিষ্যতীতি॥ ১-৩-৭৮ (৭৭৭)
স তথেত্যুক্ৎবা গুরুকুলে দীর্ঘকালং গুরুশুশ্রূষণপরোঽবসৎ।
গৌরিব নিত্যং গুরুণা ধূর্ষু নিয়োজ্যমানঃ শীতোষ্ণক্ষুত্তৃষ্ণাদুঃখসহঃ সর্বত্রাপ্রতিকূলস্তস্য মহতাৎকালেন গুরুঃ পরিতোষং জগাম॥ ১-৩-৭৯ (৭৭৮)
তৎপরিতোষাচ্চ শ্রেয়ঃ সর্বজ্ঞতাং চাবাপ।
এষা তস্যাপি পরীক্ষা বৈদস্য॥ ১-৩-৮০ (৭৭৯)
স উপাধ্যায়েনানুজ্ঞাতঃ সমাবৃত্তস্তস্মাদ্গুরুকুলবাসাদ্গৃহাশ্রমং প্রত্যপদ্যত।
তস্যাপি স্বগৃহে বসতস্ত্রয়ঃ শিষ্যা বভূবুঃ স শিষ্যান্ন কিংচিদুবাচ কর্ম বা ক্রিয়তাং গুরুশুশ্রূষা বেতি।
দুঃখাভিজ্ঞো হি গুরুকুলবাসস্য শিষ্যান্পরিক্লেশেন যোজয়িতুং নেয়েষ॥ ১-৩-৮১ (৭৮০)
অথ কস্মিংশ্চিৎকালে বৈদং ব্রাহ্মণং জনমেজয়ঃ পৌষ্যশ্চ ক্ষত্রিয়াবুপেত্যোপাধ্যায়ং বরয়াঞ্চক্রতুঃ॥ ১-৩-৮২ (৭৮১)
স কদাচিদ্যাজ্যকার্যেণাভিপ্রস্থিত উত্তঙ্কনামানং শিষ্যং নিয়োজয়ামাস॥ ১-৩-৮৩ (৭৮২)
ভোয়ৎকিংচিদস্মদ্গৃহে পরিহীয়তে তদিচ্ছাম্যহমপরিহীয়মানং ভবতা ক্রিয়মাণমিতি স এবং প্রতিসংদিশ্যোত্তঙ্কং বৈদঃ প্রবাসং জগাম॥ ১-৩-৮৪ (৭৮৩)
অথোত্তঙ্কঃ শুশ্রূষুর্গুরুনিয়োগমনুতিষ্ঠমানো গুরুকুলে বসতি স্ম।
স তত্র বসমান উপাধ্যায়স্ত্রীভিঃ সহিতাভিরাহূয়োক্তঃ॥ ১-৩-৮৫ (৭৮৪)
উপাধ্যায়ানী তে ঋতুমতী উপাধ্যায়শ্চ প্রোষিতোঽস্যা যথাঽয়মৃতুর্বন্ধ্যো ন ভবতি তথা ক্রিয়তামেষা বিষীদতীতি॥ ১-৩-৮৬ (৭৮৫)
এবমুক্তস্তাঃ স্ত্রিয়ঃ প্রত্যুবাচ।
ন ময়া স্ত্রীণাং বচনাদিদমকার্যং করণীয়ম্।
ন হ্যহমুপাধ্যায়েন সংদিষ্টোঽকার্যমপি ৎবয়া কার্যমিতি॥ ১-৩-৮৭ (৭৮৬)
তস্য পুনরুপাধ্যায়ঃ কালান্তরেণ গৃহমাজগাম তস্মাৎপ্রবাসাৎ।
স তু তদ্বৃত্তং তস্যাশেষমুপলভ্য প্রীতিমানভূৎ॥ ১-৩-৮৮ (৭৮৭)
উবাচ চৈনং বৎসোত্তঙ্কং কিং তে প্রিয়ং করবাণীতি।
ধর্মতো হি শুশ্রূষিতোঽস্মি ভবতা তেন প্রীতিঃ পরস্পরেণ নৌ সংবৃদ্ধা তদনুজানে ভবন্তং সর্বানেব কামানবাপ্স্যসি গম্যতামিতি॥ ১-৩-৮৯ (৭৮৮)
স এবমুক্তঃ প্রত্যুবাচ কিং তে প্রিয়ং করবাণীতি এবং হ্যাহুঃ॥ ১-৩-৯০ (৭৮৯)
যশ্চাধর্মেণ বৈ ব্রূয়াদ্যশ্চাধর্মেণ পৃচ্ছতি।
তয়োরন্যতরঃ প্রৈতি বিদ্বেষং চাধিগচ্ছতি॥ ১-৩-৯১ (৭৯০)
সোহমনুজ্ঞাতো ভবতা ইচ্ছামীষ্টং গুর্বর্থমুপহর্তুমিতি।
তেনৈবমুক্ত উপাধ্যায়ঃ প্রত্যুবাচ বৎসোত্তঙ্ক উষ্যতাং তাবদিতি॥ ১-৩-৯২ (৭৯১)
স কদাচিত্তমুপাধ্যায়মাহোত্তঙ্ক আজ্ঞাপয়তু ভবান্কিং তে প্রিয়মুপাহরামি গুর্বর্থমিতি॥ ১-৩-৯৩ (৭৯২)
তমুপাধ্যায়ঃ প্রত্যুবাচ বৎসোত্তঙ্ক বহুশো মাং চোদয়সি গুর্বর্থমুপাহরামীতি তদ্গচ্ছৈনাং প্রবিশ্যোপাধ্যায়ানীং পৃচ্ছ কিমুপাহরামীতি এষা যদ্ব্রবীতি তদুপাহরস্বেতি॥ ১-৩-৯৪ (৭৯৩)
স এবমুক্ত উপাধ্যায়েনোপাধ্যায়ানীমপৃচ্ছদ্ভবত্যুপাধ্যায়েনাস্ম্যনুজ্ঞাতো গৃহং গন্তুমিচ্ছামীষ্টং তে গুর্বর্থমুপহৃত্যানৃণো গন্তুং তদাজ্ঞাপয়তু ভবতী কিমুপাহরামি গুর্বর্থমিতি॥ ১-৩-৯৫ (৭৯৪)
সৈবমুক্তোপাধ্যায়ানী তমুত্তঙ্কং প্রত্যুবাচ গচ্ছ পৌষ্যং প্রতি রাজানং কুণ্ডলে ভিক্ষিতুং তস্য ক্ষত্রিয়যা পিনদ্ধে॥ ১-৩-৯৬ (৭৯৫)
আনয়স্বেতশ্চতুর্থেঽহনি পুণ্যকর্ম ভবিতা তাভ্যামাবদ্ধাভ্যাং শোভমানা ব্রাহ্মণান্পরিবেষ্টুমিচ্ছামি।
তৎসংপাদয়স্ব এবং হি কুর্বতঃ শ্রেয়ো ভবিতাঽন্যথা কুতঃ শ্রেয় ইতি॥ ১-৩-৯৭ (৭৯৬)
স এবমুক্তস্তয়োপাধ্যায়ান্যা প্রাতিষ্ঠতোত্তঙ্কঃ স পথি গচ্ছন্নপশ্যদৃষভমতিপ্রমাণং তমধিরূঢং চ পুরুষমতিপ্রমাণমেব স পুরুষ উত্তঙ্কমভ্যভাষত॥ ১-৩-৯৮ (৭৯৭)
ভোউত্তঙ্কৈতৎপুরীষমস্য ঋষভস্য ভক্ষয়স্বেতি স এবমুক্তো নৈচ্ছৎ॥ ১-৩-৯৯ (৭৯৮)
তমাহ পুরুষো ভূয়ো ভক্ষয়স্বোত্তঙ্ক মা বিচারয়োপাধ্যায়েনাপি তে ভক্ষিতং পূর্বমিতি॥ ১-৩-১০০ (৭৯৯)
স এবমুক্তো বাঢমিত্যুক্ৎবা তদা তদ্বৃপভস্য মূত্রং পুরীষং চ ভক্ষয়িৎবোত্তঙ্কঃ সংভ্রমাঢুত্থিত এবাপোঽনুস্পৃশ্য প্রতস্থে॥ ১-৩-১০১ (৮০০)
যত্র স ক্ষত্রিয়ঃ পৌষ্যস্তমুপেত্যাসীনমপশ্যদুত্তঙ্কঃ।
স উত্তঙ্কস্তমুপেত্যাশীর্ভিরভিনন্দ্যোবাচ॥ ১-৩-১০২ (৮০১)
অর্থী ভবন্তমুপাগতোঽস্মীতি স এনমভিবাদ্যোবাচ।
ভগবন্পৌষ্যঃ খল্বহং কিং করবাণীতি॥ ১-৩-১০৩ (৮০২)
স তমুবাচ গুর্বর্থং কুণ্ডলয়োরর্থেনাভ্যাগতোঽস্মি।
যে বৈ তে ক্ষত্রিয়া পিনদ্ধে কুণ্ডলে তে ভবান্দাতুমর্হতীতি॥ ১-৩-১০৪ (৮০৩)
তং প্রত্যুবাচ পৌষ্যঃ প্রবিশ্যান্তঃপুরং ক্ষত্রিয়া যাচ্যতামিতি।
স তেনৈবমুক্তঃ প্রবিশ্যান্তঃপুরং ক্ষত্রিয়াং নাপশ্যৎ॥ ১-৩-১০৫ (৮০৪)
স পৌষ্যং পুনরুবাচ ন যুক্তং ভবতাঽহমনৃতেনোপচরিতুং ন হি তেঽন্তঃপুরে ক্ষত্রিয়া সন্নিহিতা নৈনাং পশ্যামি॥ ১-৩-১০৬ (৮০৫)
স এবমুক্তঃ পৌষ্যঃ ক্ষণমাত্রং বিমৃশ্যোত্তঙ্কং প্রত্যুবাচ।
নিয়তং ভবানুচ্ছিষ্টঃ স্মর তাবন্ন হি সা ক্ষত্রিয়া উচ্ছিষ্টেনাশুচিনা শক্যা দ্রষ্টুং পতিব্রতাৎবাৎসৈষা নাশুচের্দর্শনমুপৈতীতি॥ ১-৩-১০৭ (৮০৬)
অথৈবমুক্ত উত্তঙ্কঃ স্মৃৎবোবাচাস্তি খলু ময়া তু ভক্ষিতং নোপস্পৃষ্টমাগচ্ছতেতি।
তং পৌষ্যঃ প্রত্যুবাচ এষ তে ব্যতিক্রমো নোত্থিতেনোপস্পৃষ্টং ভবতি শীঘ্রমাগচ্ছতেতি॥ ১-৩-১০৮ (৮০৭)
অথোত্তঙ্কস্তং তথেত্যুক্ৎবা প্রাঙ্মুখ উপাবেশ্য সুপ্রক্ষালিতপাণিপাদবদনো নিঃশব্দাভিরফেনাভিরনুষ্ণাভির্হৃদ্গতাভিরদ্ভিস্ত্রিঃ পীৎবা দ্বিঃ পরিমৃজ্য খান্যদ্ভিরুপস্পৃশ্য চান্তঃপুরং প্রবিবেশ॥ ১-৩-১০৯ (৮০৮)
ততস্তাং ক্ষত্রিয়ামপশ্যৎসা চ দৃষ্ট্বৈবোত্তঙ্কং প্রত্যুত্থায়াভিবাদ্যোবাচ স্বাগতং তে ভগবন্নাজ্ঞাপয় কিং করবাণীতি॥ ১-৩-১১০ (৮০৯)
স তামুবাচৈতে কুণ্ডলে গুর্বর্থং মে ভিক্ষিতে দাতুমর্হসীতি।
সা প্রীতা তেন তস্য সদ্ভাবেন পাত্রময়মনতিক্রমণীয়শ্চেতি মৎবা তে কুণ্ডলে অবমুচ্যাস্মৈ প্রায়চ্ছদাহ চৈনমেতে কুণ্ডলে তক্ষকো নাগরাজঃ সুভৃশং প্রার্থয়ত্যপ্রমত্তো নেতুমর্হসীতি॥ ১-৩-১১১ (৮১০)
স এবমুক্তস্তাং ক্ষত্রিয়াং প্রত্যুবাচ ভবতী সুনির্বৃতা ভবতু।
ন মাং শক্তস্তক্ষকো নাগরাজো ধর্ষয়িতুমিতি॥ ১-৩-১১২ (৮১১)
স এবমুক্ৎবা তাং ক্ষত্রিয়ামামন্ত্র্য পৌষ্যসকাশমাগচ্ছৎ।
আহ চৈনং ভোঃ পৌষ্য প্রীতোঽস্মীতি তমুত্তঙ্কং পৌষ্যঃ প্রত্যুবাচ॥ ১-৩-১১৩ (৮১২)
ভগবংশ্চিরেণ পাত্রমাসাদ্যতে ভবাশ্চ গুণবানতিথিস্তদিচ্ছে শ্রাদ্ধং কর্তুং ক্রিয়তাং ক্ষণ ইতি॥ ১-৩-১১৪ (৮১৩)
তমুত্তঙ্কঃ প্রত্যুবাচ কৃতক্ষণ এবাস্মি শীঘ্রমিচ্ছামি যথোপপন্নমন্নমুপস্কৃতং ভবতেতি স তথেত্যুক্ৎবা যথোপপন্নেনান্নেনৈনং ভোজয়ামাস॥ ১-৩-১১৫ (৮১৪)
অথোত্তঙ্কঃ সকেশং শীতমন্নং দৃষ্ট্বা অশুচ্যেতদিতি মৎবা তং পৌষ্যমুবাচ।
যস্মান্মে অশুচ্যন্নং দদাসি তস্মাদন্ধো ভবিষ্যসীতি॥ ১-৩-১১৬ (৮১৫)
তং পৌষ্যঃ প্রত্যুবাচ।
যস্মাত্ৎবমদুষ্টমন্নংদূষয়সি তস্মাদনপত্যো ভবিষ্যসীতি তমুত্তঙ্কঃ প্রত্যুবাচ॥ ১-৩-১১৭ (৮১৬)
ন যুক্তং ভবতাঽন্নমশুচি দত্ৎবা প্রতিশাপং দাতুং তস্মাদন্নমেব প্রত্যক্ষীকুরু।
ততঃ পৌষ্যস্তদন্নমশুচি দৃষ্ট্বা তস্যাশুচিভাবমপরোক্ষয়ামাস॥ ১-৩-১১৮ (৮১৭)
অথ তদন্নং মুক্তকেশ্যা স্ত্রিয়োপহৃতমনুষ্ণং সকেশং চাশুচ্যেতদিতি মৎবা তমৃষিমুত্তঙ্কং প্রসাদয়ামাস॥ ১-৩-১১৯ (৮১৮)
ভঘবন্নেতদজ্ঞানাদন্নং সকেশমুপাহৃতং শীতং চ।
তৎক্ষাময়ে ভবন্তং ন ভবেয়মন্ধ ইতি।
তমুত্তঙ্কঃ প্রত্যুবাচ॥ ১-৩-১২০ (৮১৯)
ন মৃষা ব্রবীমি ভূৎবা ৎবমন্ধো নচিরাদনন্ধো ভবিষ্যসীতি।
মমাপি শাপো ভবতা দত্তো ন ভবেদিতি॥ ১-৩-১২১ (৮২০)
তং পৌষ্যঃ প্রত্যুবাচ ন চাহং শক্তঃ শাপং প্রত্যাদাতুং ন হি মে মন্যুরদ্যাপ্যুপশমং গচ্ছতি কিং চৈতদ্ভবতা ন জ্ঞায়তে।
যথা॥ ১-৩-১২২ (৮২১)
নবনীতং হৃদয়ং ব্রাহ্মণস্য
বাচি ক্ষুরো নিহিতস্তীক্ষ্ণধারঃ।
তদুভয়মেতদ্বিপরীতং ক্ষত্রিয়স্য
বাঙ্গবনীতং হৃদয়ং তীক্ষ্ণধারম্॥ ইতি॥ ১-৩-১২৩ (৮২২)
তদেবংগতে ন শক্তোঽহং তীক্ষ্ণহৃদয়ৎবাত্তং শাপমন্যথাকর্তুং গম্যতামিতি।
তমুত্তঙ্কঃ প্রত্যুবাচ॥ ১-৩-১২৪ (৮২৩)
ভবতাঽহমন্নস্যাশুচিভাবমালক্ষ্য প্রত্যনুনীতঃ।
প্রাক্ চ তেঽভিহিতং যস্মাদদুষ্টমন্নং দূষয়সি তস্মাদনপত্যো ভবিষ্যসীতি।
দুষ্টে চান্নে নৈষ মম শাপো ভবিষ্যতীতি॥ ১-৩-১২৫ (৮২৪)
সাধয়ামস্তাবদিত্যুক্ৎবা প্রাতিষ্ঠতোত্তঙ্কস্তে কুণ্ডলে গৃহীৎবা।
সোঽপশ্যদথ পথি নগ্নং ক্ষপণকমাগচ্ছন্তং মুহুর্মুহুর্দৃশ্যমানমদৃশ্যমানং চ॥ ১-৩-১২৬ (৮২৫)
অথোত্তঙ্কস্তে কুণ্ডলে সংন্যস্য ভূমাবুদকার্থং প্রচক্রমে।
এতস্মিন্নন্তরে স ক্ষপণকস্ৎবরমাণ উপসৃত্য তে কুণ্ডলে গৃহীৎবা প্রাদ্রবৎ॥ ১-৩-১২৭ (৮২৬)
তমুত্তঙ্কোঽভিসৃত্য কৃতোদককার্যঃ শুচিঃ প্রয়তো নমো দেবেভ্যো গুরুভ্যশ্চ কৃৎবা মহতা জবেন তমন্বয়াৎ॥ ১-৩-১২৮ (৮২৭)
তস্য তক্ষকো দৃঢমাসন্নঃ সতং জগ্রাহ।
গৃহীতমাত্রঃ স তদ্রূপং বিহায় তক্ষকস্বরূপং কৃৎবা সহসা ধরণ্যাং বিবৃতং মহাবিলং প্রবিবেশ॥ ১-৩-১২৯ (৮২৮)
প্রবিশ্য চ নাগলোকং স্বভবনমগচ্ছৎ।
অথোত্তঙ্কস্তস্যাঃ ক্ষত্রিয়ায়া বচঃ স্মৃৎবা তং তক্ষকমন্বগচ্ছৎ॥ ১-৩-১৩০ (৮২৯)
স তদ্বিলং দণ্ডকাষ্ঠেন চখান ন চাশকৎ।
তং ক্লিশ্যমানমিন্দ্রোঽপশ্যৎস বজ্রং প্রেষয়ামাস।
গচ্ছাস্য ব্রাহ্মণস্য সাহায়্যং কুরুষ্বেতি॥ ১-৩-১৩১ (৮৩০)
অথ বজ্রং দণ্ডকাষ্ঠমনুপ্রবিশ্য তদ্বিলমদারয়ৎ॥ ১-৩-১৩২ (৮৩১)
তমুত্তঙ্কোঽনুবিবেশ তেনৈব বিলেন প্রবিশ্য চ তং নাগলোকমপর্যন্তমনেকবিধপ্রাসাদহর্ম্যবলভীনির্যূহশতসংকুলমুচ্চাবচক্রীডাশ্চর্যস্থানাবকীর্ণমপশ্যৎ॥ ১-৩-১৩৩ (৮৩২)
স তত্র নাগাংস্তানস্তুবদেভিঃ শ্লোকৈঃ।
য ঐরাবতরাজানঃ সর্পাঃ সমিতিশোভাঃ।
ক্ষরন্ত ইব জীমূতাঃ সবিদ্যুৎপবনেরিতাঃ॥ ১-৩-১৩৪ (৮৩৩)
সুরূপা বহুরূপাশ্চ তথা কল্মাষকুণ্ডলাঃ।
আদিত্যবন্নাকপৃষ্ঠে রেজুরৈরাবতোদ্ভবাঃ॥ ১-৩-১৩৫ (৮৩৪)
বহূনি নাগবেশ্মানি গঙ্গায়াস্তীর উত্তরে।
তত্রস্থানপি সংস্তৌমি মহতঃ পন্নগানহম্॥ ১-৩-১৩৬ (৮৩৫)
ইচ্ছেৎকোঽর্কাংশুসেনায়াং চর্তুমৈরাবতং বিনা।
শতান্যশীতিরষ্টৌ চ সহস্রাণি চ বিংশতিঃ॥ ১-৩-১৩৭ (৮৩৬)
সর্পাণাং প্রগ্রহা যান্তি ধৃতরাষ্ট্রো যদৈজতি।
যে চৈনমুপসর্পন্তি যে চ দূরপথং গতাঃ॥ ১-৩-১৩৮ (৮৩৭)
অহমৈরাবতজ্যেষ্ঠভ্রাতৃভ্যোঽকরবং নমঃ।
যস্য বাসঃ কুরুক্ষেত্রে খাণ্ডবে চাভবৎপুরা॥ ১-৩-১৩৯ (৮৩৮)
তং নাগরাজমস্তৌষং কুণ্ডলার্থায় তক্ষকম্।
তক্ষকশ্চাশ্বসেনশ্চ নিত্যং সহচরাবুভৌ॥ ১-৩-১৪০ (৮৩৯)
কুরুক্ষেত্রং চ বসতাং নদীমিক্ষুমতীমনু।
জঘন্যজস্তক্ষকস্য শ্রুতসেনেতি যঃ সুতঃ॥ ১-৩-১৪১ (৮৪০)
অবসদ্যো মহদ্দ্যুম্নি প্রার্থয়ন্নাগমুখ্যতাম্।
করবাণি সদা চাহং নমস্তস্মৈ মহাত্মনে॥ ১-৩-১৪২ (৮৪১)
সৌতিরুবাচ। ১-৩-১৪৩x (১৮)
এবং স্তুৎবা স বিপ্রর্ষিরুত্তঙ্কো ভুজগোত্তমান্।
নৈব তে কুণ্ডলে লেভে ততশ্চিন্তামুপাগমৎ॥ ১-৩-১৪৩ (৮৪২)
এবং স্তুবন্নপি নাগান্যদা তে কুণ্ডলে নালভত্তদাঽপশ্যৎস্ত্রিয়ৌ তন্ত্রে অধিরোপ্য সুবেমে পটং বয়ন্ত্যৌ।
তস্মিংস্তন্ত্রে কৃষ্ণাঃ সিতাশ্চ তন্তবশ্চক্রং চাপশ্যদ্দ্বাদশারং ষড্ভিঃ কুমারৈঃ পরিবর্ত্যমানং পুরুষং চাপশ্যদশ্বং চ দর্শনীয়ম্॥ ১-৩-১৪৪ (৮৪৩)
স তান্সর্বাংস্তুষ্টাব এভির্মন্ত্রবাদশ্লোকৈঃ॥ ১-৩-১৪৫ (৮৪৪)
ত্রীণ্যর্পিতান্যত্র শতানি মধ্যে
ষষ্টিশ্চ নিত্যং চরতি ধ্রুবেঽস্মিন্।
চক্রে চতুর্বিংশতিপর্বয়োগে
ষড্বৈ কুমারাঃ পরিবর্তয়ন্তি॥ ১-৩-১৪৬ (৮৪৫)
তন্ত্রং চেদং বিশ্বরূপে যুবত্যৌ
বয়তস্তন্তূন্সততং বর্তয়ন্ত্যৌ।
কৃষ্ণান্সিতাংশ্চৈব বিবর্তয়ন্ত্যৌ
ভূতান্যজস্রং ভুবনানি চৈব॥ ১-৩-১৪৭ (৮৪৬)
বজ্রস্য ভর্তা ভুবনস্য গোপ্তা
বৃত্রস্য হন্তা নমুচের্নিহন্তা।
কৃষ্ণে বসানো বসনে মহাত্মা
সত্যানৃতে যো বিবিনক্তি লোকে॥ ১-৩-১৪৮ (৮৪৭)
যো বাজিনং গর্ভমপাং পুরাণং
বৈশ্বানরং বাহনমভ্যুপৈতি।
নমোঽস্তু তস্মৈ জগদীশ্বরায়
লোকত্রয়েশায় পুরংদরায়॥ ১-৩-১৪৯ (৮৪৮)
ততঃ স এনং পুরুষঃ প্রাহ প্রীতোঽস্মি তেঽহসনেন স্তোত্রেণ কিং তে প্রিয়ং করবাণীতি।
স তমুবাচ নাগা মে বশমীয়ুরিতি॥ ১-৩-১৫০ (৮৪৯)
স চৈনং পুরুষঃ পুনরুবাচ এতমশ্বমপানে ধমস্বেতি॥ ১-৩-১৫১ (৮৫০)
ততোঽশ্বস্যাপানমধমত্ততোঽশ্বাদ্ধম্যমানাৎসর্বস্রোতোভ্যঃ পাবকার্চিষঃ সধূমা নিষ্পেতুঃ॥ ১-৩-১৫২ (৮৫১)
তাভির্নাগলোক উপধূপিতেঽথ সংভ্রান্তস্তক্ষকোঽগ্নেস্তেজোভয়াদ্বিষণ্ণঃ কুণ্ডলে গৃহীৎবা সহসা ভবনান্নিষ্ক্রম্যোত্তঙ্কমুবাচ॥ ১-৩-১৫৩ (৮৫২)
ইমে কুণ্ডলে গৃহ্ণাতু ভবানিতি।
স তে প্রতিজগ্রাহোত্তঙ্কঃ প্রতিগৃহ্য চ কুণ্ডলেঽচিন্তয়ৎ॥ ১-৩-১৫৪ (৮৫৩)
অদ্য তৎপুণ্যকমুপাধ্যায়ান্যা দূরং চাহমভ্যাগতঃ স কথং সংভাবয়েয়মিতি॥ ১-৩-১৫৫ (৮৫৪)
তত এনং চিন্তয়ানমেব স পুরুষ উবাচ।
উত্তঙ্ক এনমেবাশ্বমধিরোহ ৎবাং ক্ষণেনৈবোপাধ্যায়কুলং প্রাপয়িষ্যতীতি॥ ১-৩-১৫৬ (৮৫৫)
স তথেন্যুক্ৎবা তমশ্বমধিরুহ্য প্রত্যাজগামোপাধ্যায়কুলং।
উপাধ্যায়ানী চ স্নাতা কেশানাবাপয়ন্ত্যুপবিষ্টোত্তঙ্কো নাগচ্ছতীতি শাপায়াস্য মনো দধে॥ ১-৩-১৫৭ (৮৫৬)
অথৈতস্মিন্নন্তরে স উত্তঙ্কঃ প্রবিশ্য উপাধ্যায়কুলং উপাধ্যায়ানীমভ্যবাদয়ত্তে চাস্যৈ কুণ্ডলে প্রায়চ্ছৎসা চৈনং প্রত্যুবাচ॥ ১-৩-১৫৮ (৮৫৭)
উত্তঙ্ক দেশে কালেঽভ্যাগতঃ স্বাগতং তে বৎস `ইদানীং যদ্যনাগতোসি কোপিতয়া ময়া শপ্তো ভবিষ্যসি’ শ্রেয়স্তবোপস্থিতং সিদ্ধিমাপ্নুহীতি॥ ১-৩-১৫৯ (৮৫৮)
অথোত্তঙ্ক উপাধ্যায়মভ্যবাদয়ৎ।
তমুপাধ্যায়ঃ প্রত্যুবাচ বৎসোত্তঙ্ক স্বাগতং তে কিং চিরং কৃতমিতি॥ ১-৩-১৬০ (৮৫৯)
তমুত্তঙ্ক উপাধ্যায়ং প্রত্যুবাচ।
ভোস্তক্ষকেণ মে নাগরাজেন বিঘ্নঃ কৃতোঽস্মিন্কর্মণি তেনাস্মি নাগলোকং গতঃ॥ ১-৩-১৬১ (৮৬০)
তত্র চ ময়া দৃষ্টে স্ত্রিয়ৌ তন্ত্রেঽধিরোপ্য পটং বয়ন্ত্যৌ তস্মিংশ্চ কৃষ্ণাঃ সিতাশ্চ তন্তবঃ।
কিং তৎ॥ ১-৩-১৬২ (৮৬১)
তত্র চ ময়া চক্রং দৃষ্টং দ্বাদশারং ষট্চৈনং কুমারাঃ পরিবর্তয়ন্তি তদপি কিং।
পুরুষশ্চাপি ময়া দৃষ্টঃ স চাপি কঃ।
অশ্বশ্চাতিপ্রমাণো দৃষ্টঃ স চাপি কঃ॥ ১-৩-১৬৩ (৮৬২)
পথি গচ্ছতা চ ময়া ঋষভো দৃষ্টস্তং চ পুরুষোঽধিরূঢস্তেনাস্মি সোপচারমুক্ত উত্তঙ্কাস্য ঋষভস্য পুরীষং ভক্ষয় উপাধ্যায়েনাপি তে ভক্ষিতমিতি॥ ১-৩-১৬৪ (৮৬৩)
ততস্তস্য বচনান্ময়া তদৃষভস্য পুরীষমুপয়ুক্তং স চাপি কঃ।
তদেতদ্ভবতোপদিষ্টমিচ্ছেয়ং শ্রোতুং কিং তদিতি।
স তেনৈবমুক্ত উপাধ্যায়ঃ প্রত্যুবাচ॥ ১-৩-১৬৫ (৮৬৪)
যে তে স্ত্রিয়ৌ ধাতা বিধাতা চ যে চ তে কৃষ্ণাঃ সিতাস্তন্তবস্তে রাত্র্যহনী।
যদপি তচ্চক্রং দ্বাদশারং ষট্কুমারাঃ পরিবর্তয়ন্তি তেপি ষড্ঋতবঃ দ্বাদশারা দ্বাদশ মাসাঃ সংবৎসরশ্চক্রম্॥ ১-৩-১৬৬ (৮৬৫)
যঃ পুরুষঃস পর্জন্যঃ যোঽশ্বঃ সোঽগ্নিঃ য ঋষভস্ৎবয়া পথি গচ্ছতা দৃষ্টঃ স ঐরাবতো নাগরাট্॥ ১-৩-১৬৭ (৮৬৬)
যশ্চৈনমধিরূঢঃ পুরুষঃ স চেন্দ্রঃ যদপি তে ভক্ষিতং তস্য ঋষভস্য পুরীষং তদমৃতং তেন খল্বসি তস্মিন্নাগভবনে ন ব্যাপন্নস্ৎবম্॥ ১-৩-১৬৮ (৮৬৭)
স হি ভগবানিন্দ্রো মম সখা ৎবদনুক্রোশাদিমমনুগ্রহং কৃতবান্।
তস্মাৎকুণ্ডলে গৃহীৎবা পুনরাগতোঽসি॥ ১-৩-১৬৯ (৮৬৮)
তৎসৌম্য গম্যতামনুজানে ভবন্তং শ্রেয়োঽবাপ্স্যসীতি।
স উপাধ্যায়েনানুজ্ঞাতো ভগবানুত্তঙ্কঃ ক্রুদ্ধস্তক্ষকং প্রতিচিকীর্ষমাণো হাস্তিনপুরং প্রতস্থে॥ ১-৩-১৭০ (৮৬৯)
স হাস্তিনপুরং প্রাপ্য নচিরাদ্বিপ্রসত্তমঃ।
সমাগচ্ছত রাজানমুত্তঙ্কো জনমেজয়ম্॥ ১-৩-১৭১ (৮৭০)
পুরা তক্ষশিলাসংস্থং নিবৃত্তমপরাজিতম্।
সম্যগ্বিজয়িনং দৃষ্ট্বা সমন্তান্মন্ত্রিভির্বৃতম্॥ ১-৩-১৭২ (৮৭১)
তস্মৈ জয়াশিষঃ পূর্বং যথান্যায়ং প্রয়ুজ্য সঃ।
উবাচৈনং বচঃ কালে শব্দসংপন্নয়া গিরা॥ ১-৩-১৭৩ (৮৭২)
উত্তঙ্ক উবাচ। ১-৩-১৭৪x (১৯)
অন্যস্মিন্করণীয়ে তু কার্যে পার্থিবসত্তম।
অর্চয়িৎবা যথান্যায়ং প্রত্যুবাচ দ্বিজোত্তমম্॥ ১-৩-১৭৪ (৮৭৩)
সৌতিরুবাচ। ১-৩-১৭৫x (২০)
এবমুক্তস্তু বিপ্রেণ স রাজা জনমেজয়ঃ।
অর্চয়িৎবা যথান্যায়ং প্রত্যুবাচ দ্বিজোত্তমম্॥ ১-৩-১৭৫ (৮৭৪)
জনমেজয় উবাচ। ১-৩-১৭৬x (২১)
আসাং প্রজানাং পরিপালনেন
স্বং ক্ষত্রধর্মং পরিপালয়ামি।
প্রব্রূহি মে কিং করণীয়মদ্য
যেনাসি কার্যেণ সমাগতস্ৎবম্॥ ১-৩-১৭৬ (৮৭৫)
সৌতিরুবাচ। ১-৩-১৭৭x (২২)
স এবমুক্তস্তু নৃপোত্তমেন
দ্বিজোত্তমঃ পুণ্যকৃতাং বরিষ্ঠঃ।
উবাচ রাজানমদীনসৎবং
স্বমেব কার্যং নৃপতে কুরুষ্ব॥ ১-৩-১৭৭ (৮৭৬)
উত্তঙ্ক উবাচ। ১-৩-১৭৮x (২৩)
তক্ষকেণ মহীন্দ্রেন্দ্র যেন তে হিংসিতঃ পিতা।
তস্মৈ প্রতিকুরুষ্ব ৎবং পন্নগায় দুরাত্মনে॥ ১-৩-১৭৮ (৮৭৭)
কার্যকালং হি মন্যেঽহং বিধিদৃষ্টস্য কর্মণঃ।
তদ্গচ্ছাপচিতিং রাজন্পিতুস্তস্য মহাত্মনঃ॥ ১-৩-১৭৯ (৮৭৮)
তেন হ্যনপরাধী স দষ্টো দুষ্টান্তরাত্মনা।
পঞ্চৎবমগমদ্রাজা বজ্রাহত ইব দ্রুমঃ॥ ১-৩-১৮০ (৮৭৯)
বলদর্পসমুৎসিক্তস্তক্ষকঃ পন্নগাধমঃ।
অকার্যং কৃতবান্পাপো যোঽদশৎপিতরং তব॥ ১-৩-১৮১ (৮৮০)
রাজর্ষিবংশগোপ্তারমমরপ্রতিমং নৃপম্।
যিয়াসুং কাশ্যপং চৈব ন্যবর্তয়ত পাপকৃৎ॥ ১-৩-১৮২ (৮৮১)
হোতুমর্হসি তং পাপং জ্বলিতে হব্যবাহনে।
সর্পসত্রে মহারাজ ৎবরিতং তদ্বিধীয়তাম্॥ ১-৩-১৮৩ (৮৮২)
এবং পিতুশ্চাপচিতিং কৃতবাংস্ৎবং ভবিষ্যসি।
মম প্রিয়ং চ সুমহৎকৃতং রাজন্ ভবিষ্যতি॥ ১-৩-১৮৪ (৮৮৩)
কর্মণঃ পৃথিবীপাল মম যেন দুরাত্মনা।
বিঘ্নঃ কৃতো মহারাজ গুর্বর্থং চরতোঽনঘ॥ ১-৩-১৮৫ (৮৮৪)
সৌতিরুবাচ। ১-৩-১৮৬x (২৪)
এতচ্ছ্রুৎবা তু নৃপতিস্তক্ষকায় চুকোপ হ।
উত্তঙ্কবাক্যহবিষা দীপ্তোঽগ্নির্হবিষা যথা॥ ১-৩-১৮৬ (৮৮৫)
অপৃচ্ছৎস তদা রাজা মন্ত্রিণঃ স্বান্সুদুঃখিতঃ।
উত্তঙ্কস্যৈব সাংনিধ্যে পিতুঃ স্বর্গগতিং প্রতি॥ ১-৩-১৮৭ (৮৮৬)
তদৈব হি স রাজেন্দ্রো দুঃখশোকাপ্লুতোঽভবৎ।
যদৈব বৃত্তং পিতরমুত্তঙ্কাদশৃণোত্তদা॥ ॥ ১-৩-১৮৮ (৮৮৭)

ইতি শ্রীমন্মহাভারতে আদিপর্বণি পৌষ্যপর্বমি তৃতীয়োঽধ্যায়ঃ॥ ৩ ॥ ॥ সমাপ্তং চ পৌষ্যপর্ব ॥

Mahabharata – Adi Parva – Chapter Footnotes

১-৩-১ পরিক্ষিতোঽপত্য পুমান্পারিক্ষিতঃ। সরমায়াঃ দেবশুন্যাঃ অপত্যং পুমান্সারমেয়ঃ॥ ১-৩-৯ অদৃষ্টং অতর্কিতং॥ ১-৩-১০ সংভ্রান্তঃ সংতপ্ত ইতি পাঠান্তরং॥ ১-৩-১১ পাপকৃত্যাং শাপরূপাং বলায়ুঃ-প্রাণনিকৃন্তনীং দেবতাং। শময়েদক্রোধনাং কুর্যাৎ। ১-৩-১৮ উপাংশুব্রতং গূঢব্রতং॥ ১-৩-২০ তক্ষশিলাং দেশবিশেষং জেতুমিতি শেষঃ॥ ১-৩-২১ অপোত্তীত্যপোদঃ অব্ভক্ষঃ তস্যাপত্যমাপোদঃ॥ ১-৩-২২ কেদারো মহাক্ষেত্রান্তর্গতং চতুরস্রং তস্য খণ্ডো জলনিরোধভিত্তিঃ তং॥ ১-৩-৩৬ পীবানং পুষ্টং। বৃত্তিং জীবিকাং॥ ১-৩-৪২ বৃত্ত্যুপরোধং বৃত্তিপ্রতিবন্ধং॥ ১-৩-৪৪ চরসি ভক্ষয়সি॥ ১-৩-৫১ তীক্ষ্ণবিপাকৈঃ পাককালে উদরেঽগ্নিজ্বালোত্থাপকৈঃ॥ ১-৩-৫৬ কর্তারাবিতি লুডন্তং॥ ১-৩-৫৭ প্রপূর্বগাবিতি। অস্য শ্লোকস্যানন্বয়াদুত্তরশ্লোকস্থং সংবোধনমিহ যোজ্যম্। হে নাসত্যদস্রৌ গিরা বাণ্যা। বাং যুবাং শংসামি স্তৌমি। ব্যবহিতাশ্চেতি গতিসংজ্ঞৎবাৎপ্রশংসামীতি বাঽন্বয়ঃ। কিংভূতৌ বাং। প্রপূর্বগৌ প্রকর্ষেণান্যদেবতাভ্যঃ পূর্বং যজ্ঞং গচ্ছন্তৌ। পূর্বজৌ অশ্বজাত্যাং হি পূর্বং মুখসংয়োগঃ ততঃ সংয়োগাদ্গর্ভোৎপত্তিরিতি তত্র গর্ভোৎপত্তেঃ পূর্বং মুখয়োহগমাত্রাজ্জাতৌ। চিত্রভানূ অগ্নিতুল্যৌ। তপসা সামর্থ্যেন। অনন্তৌ অনন্তরূপধরৌ। দিব্যৌ দিবঃ দ্যোতমানাৎসূর্যাদ্ভবৌ। সুপর্ণৌ শোভনগমনৌ। বিরজৌ বিগতরজোগুণৌ। বিশ্বা বিশ্বানি। ভুবনানি অধি। বিমানৌ স্ববিমানৌ। ক্ষিপন্তৌ প্রেরয়ন্তৌ॥ ১-৩-৫৮ হিরণ্ময়াবিতি। কিংভূতৌ বিমানৌ। হিরণ্ময়ৌ সুবর্ণময়ৌ। শকুনী। লুপ্তোপমমেতৎ। শীঘ্রগামিৎবাৎপক্ষিণাবিব। যদ্বা পদদ্বয়মপ্যশ্বিনোরেব বিশেষণং। হিরণ্ময়ৌ সুবর্ণালঙ্কৃতৌ। শকুনী আরোগ্যকরণেন শকুং শক্তিং নয়তঃ প্রাপয়ত ইতি শকুনী। সাংপরায়ৌ সংপরায়ঃ পরলোকস্তস্মৈ হিতৌ। যদ্বা সাংপরায়ামাপদি অয়ঃ প্রাপ্তির্যযোস্তৌ। ভক্তানামাপদি তদ্রক্ষণায়াগচ্ছন্তৌ। নাসত্যদস্রৌ। নাসত্যৌ অসত্যরহিতৌ। নাসাপুটজাতৌ বা। দস্রৌ দর্শনীয়ৌ। সুসৌ সুনাসিকৌ। বিশেষেণ জয়ন্তৌ বিজয়ন্তৌ। বিজয়ন্তাবেব বৈজয়ন্তৌ। বিবস্বতঃ সূর্যস্য তরসা বলেন অসিতং শ্যামকুষ্ঠং অধিব্যযন্তৌ নিরাকুর্বন্তৌ। শুক্লং দীপ্তিয়ুক্তং বর্মং চক্ষুর্বা। বয়ন্তৌ কুর্বন্তৌ। সূর্যস্য পিতৃৎবাৎ তদ্বলেন যুবয়োরেতৎসামর্থ্যং যুজ্যত ইতি স্তুতিঃ। সুবেমৌ। লুপ্তোপমমেতৎ। যথা বেমধারিণৌ তন্তুবায়ৌ পটাদসিতকেশাদি দূরীকুরুতঃ শুক্লং চ তন্তুং বয়তস্তথেত্যর্থঃ॥ ১-৩-৫৯ গ্রস্তামিতি। হে অশ্বিনৌ। সুপর্ণস্য লুপ্তোপমমেতৎ। সুপর্ণতুল্যপরাক্রমস্য গতের্বা বৃকস্য বলেন গ্রস্তাং অভিভূতাং। বর্তিকাং বর্তিকাখ্যাং পক্ষিণীং। তস্যাঃ সৌভগায় জীবনরূপসুখায়। অমুঞ্চতাং ভবন্তাবিতি শেষঃ। আস্নো বৃকস্যেত্যস্যামৃচি ইয়ং কথা প্রসিদ্ধা। অহং তৌ যুবাং তাবৎ কার্ৎস্ন্যেন অনমং নমস্কৃতবানস্মি। তৌ কৌ। যৌ প্রতি। সুষ্টু বর্তত ইতি সুবৃৎ সোময়াগকর্তা। তমায় তমু গ্লানাবিতি ধাতোঃ গ্লানয়ে। অসত্তমাঃ অসমীচীনা অপি গাঃ উদাবহৎ প্রার্থনাবিষয়ৎবেন প্রাপয়ামাস। গোবিষয়প্রার্থনাং কৃতবানিত্যর্থঃ। কিংভূতৌ যৌ। অরুণা অরুণৌ। ডাদেশশ্ছান্দসঃ। লুপ্তোপমমেতৎ। সোময়াগে হি প্রাতরনুবাকাদাবশ্বিনোঃ স্তুতৎবাৎ যথা দিনারম্ভে অরুণস্তথা সোময়াগারম্ভে যুবামিত্যর্থঃ। অত্রায়মাশয়ঃ। সোময়াগে ইন্দ্রাদিষু দেবতাভূতেষু সৎস্বপি অসমীচীনগোরক্ষণস্যানন্যসাধ্যৎবজ্ঞানেন যজমানেন ভবন্তাবেব প্রার্থিতাবিত্যহমপি যুবামেব স্তৌমীতি॥ ১-৩-৬০ ষষ্টিশ্চ গাব ইতি। জ্যোতিষ্টোমে সন্ত্যুপসদস্তিস্রঃ। তাশ্চ সত্রেঽধিকা ভবন্তি। উপসৎসু চ প্রবর্গ্য উক্তঃ। তত্র মহাবীরাখ্যপাত্রেষু তপ্তে ঘৃতে দুগ্ধং প্রক্ষিপ্যতে তদর্থা চাস্তি ধেনুঃ। ততো ঘৃতং দুগ্ধং চ মিশ্রমশ্বিভ্যাং হূয়তে। এবং সতি যদা গবাময়নাদিসত্রেষু সংবৎসরমুপসদঃ ক্রিয়ন্তে তত্র ঘর্মে সর্বোৎকৃষ্টে অশ্বিনাবেব যষ্টব্যাবিতি স্তুতিরত্র ক্রিয়তে। তাবশ্বিনাবনমমিতি গতেন সংবন্ধঃ। তৌ কৌ যত্তদোর্নিত্যসংবন্ধাদ্যৌ তং ঘর্মং দুহতঃ সাধয়তঃ। প্রসিদ্ধোপি ঘর্মো ভবতোর্ভবতি। ভবতোরেব দেবতাৎবাদিত্যাশয়ঃ। তং কং যত্তদোর্নিত্যসংবন্ধাদ্যং ঘর্মং ত্রিশতাঃ ষষ্টিশ্চ ধেনবো দুগ্ধদাত্র্যো গাবঃ। ঘর্মে দুগ্ধরহিতানাং গবামনুপয়োগাৎ। একং বৎসং বৎসরং। অত্যন্তসংয়োগে দ্বিতীয়া। বৎসরাবধীত্যর্থঃ। সুবতে সাধয়ন্তি। ঘৃতেন। দুহন্তি দুগ্ধেন সাধয়ন্তি। যজ্ঞাদৌ সাবনঃ স্মৃত ইতি বাক্যাদত্র সাবনবর্ষগ্রহণেন ষষ্ট্যধিকশতত্রয়দিনানি ভবন্তি। তেন তাবত্য এব গাবঃ ঘৃতদুগ্ধাভ্যাং ঘর্মং সাধয়ন্তীত্যর্থঃ। কথংভূতা গাবঃ। নানাগোষ্ঠাঃ লুপ্তোপমমেতৎ। দিনানাং গোষ্ঠোপমায়া বিবক্ষিতৎবাৎ নানাগোষ্ঠনিষ্ঠা ইত্যর্তঃ। একদোহনা বিহিতাঃ একোঽধ্বর্যুর্দোহনকর্তা যাসামেবংভূতাঃ শ্রুতাবুক্তা ইত্যর্থঃ। কিংভূত ঘর্মং উক্থ্যং প্রশস্যম্॥ ১-৩-৬১-৬২ একাং নাভিমিতি। সূর্যরথচালকৎবেনাশ্বিনাবত্র স্তূয়েতে। শ্লোকদ্বয়স্যৈকান্বয়ঃ। হে অশ্বিনৌ যুবাং। বিষীদতং বিষীদন্তং। ছান্দসো নুমভাবঃ। মাং মুঞ্চতঃ। লকারব্যত্যযেন মুঞ্চতমিত্যাশংসা। তৌ কৌ। যাবশ্বিনৌ। চর্ষণী লুপ্তোপমং চৈতৎ। চর্ষণিশব্দো নিঘণ্টুষু মনুষ্যপর্যায়ঃ পঠিতঃ। মনুষ্যাবিবেত্যর্থঃ। সূর্যরথচালকৎবেন অশ্বিনোঃ শোভাং বক্তুং সূর্যরথসংবন্ধিচক্রদ্বয়গতিং বর্ণয়তি পাদত্রিকদ্বয়েন। একপদমাবৃত্য যোজ্যং। একং চক্রং ঈদৃশং পরিবর্ততে ভ্রমতি। অন্যদেকং চক্রং ঈদৃশং বর্ততে চলতীত্যর্থঃ। কীদৃশমেকং চক্রং আদ্যস্য একাং নাভিং সপ্তশতাঃ সপ্তশতসঙ্খ্যাঃ অরাঃ অন্যাশ্চ বিংশতিসঙ্খ্যা অরাঃ শ্রিতাঃ সংলগ্নাঃ। চক্রমধ্যস্থনাভৌ বিংশত্যধিকসপ্তশতসংখ্যাঃ অরাঃ তির্যক্ সংলগ্না ইত্যর্থঃ। কিংভূতা অরাঃ। প্রধিষু বাহ্যচক্রাবয়বেষু অর্পিতা অধিনিবেশিতা ইত্যর্থঃ। কীদৃশমন্যচ্চক্রং দ্বাদশারং ষণ্ণাভি। পুংরৎবং ছান্দসম্। কীদৃশং প্রথমচক্রং। অনেমি চলনেমিরহিতমিত্যর্থঃ। অজরং ন জীর্যত ইত্যজরম্। জীর্ণং ন ভবতীত্যর্থঃ। একং চক্রং মধ্যশঙ্কুনিহিতপাশবৎস্বস্থল এব পরিভ্রমৎ। দ্বিতীয়ং তু সমন্ততশ্চরতীত্যাশয়ঃ। দ্বিতীয়চক্রবিশেষণমেকাক্ষমিতি। একং উৎকৃষ্টোঽক্ষোঽস্য অতিদৃঢ ইত্যর্থঃ। অমৃতস্য স্বর্গস্য ধারণং রক্ষণসাধনম্। যস্মিন্স্বচক্রে বিশ্বে সবে দেবাঃ অধিবিষক্তাঃ। প্রাধান্যাদ্দেবগ্রহণম্। তেন তদুপলক্ষিতাঃ সর্বে জীবা ইত্যর্থঃ। সর্বেষাং সূর্যচক্রনিয়োগোদিতৎবাদিত্যর্থঃ। অত্র “পঞ্চারে চক্রে” ইত্যাদিশ্রুতয়ো মানম্॥ ১-৩-৬৩ অশ্বিনাবিতি। হে অশ্বিনৌ দাসপত্নী। সুপাংসুলুগিতি লুপ্ত সপ্তমীবহুবচনৎবেন দাসপত্নীষু অপ্সু। ইন্দুং অমৃতং সোমাখ্যমমৃতং। তিরোধত্তাং কৃতবন্তৌ। কিংভূতাবশ্বিনৌ বৃত্তভূয়ৌ ভূয়োবৃত্তৌ নানাকর্মাণাবিত্যর্থঃ। হিৎবেতি। অশ্বিনৌ যৎ যদা গিরিং মে হিৎবা ত্যক্ৎবা গাং ভুবং উদাচরন্তৌ গচ্ছন্তৌ। তৎ তদা বলস্য প্রাণিনাং সামর্থ্যস্য সংবন্ধিনীং তজ্জনিকাং বৃষ্টিং প্রতি। অহ্নাত শীঘ্রম্। অহ্নাদিতি সুবন্তপ্রতিরূপকমব্যযং। প্রস্থিতৌ কৃতপ্রস্থানৌ ভবথঃ। সুমেরোঃ সকাশাদ্ভুবমাগত্য প্রাণিনামন্নাদিদ্বারেণ বলজনিকাং বৃষ্টিং কুরুথ ইত্যর্থঃ॥ ১-৩-৬৪ যুবামিতি। হে অশ্বিনৌ যুবাং অগ্রে প্রথমং সমানং সম্যক্ আনঃ আগতং গমন যস্মিন্কর্মণি তথা। সোময়াগে প্রথমং গচ্ছন্তাবিতি যাবৎ দশ দিশো জনয়থঃ। দিক্শব্দেন ইন্দ্রাদয়ো দিক্পালা লক্ষ্যন্তে। জনিঃ প্রাদুর্ভাবার্থঃ। সোময়াগে প্রথমগামিৎবেন ইন্দ্রাদিদেবতাপ্রাদুর্ভাবকৎবং। অথ তদনন্তরং যাঃ দিশঃ দিগ্দেবতা মূর্ধ্নি যাগস্য মূর্ধ্নি প্রধানে বিয়ন্তি সংবন্ধ্যন্তে। তাসাং দিগ্দেবতানাং যাতং যানমনু পশ্চাৎ ঋষয়ঃ প্রয়ান্তি মূর্ধ্নীতি পূর্বেণান্বয়ঃ। অতএব যুবয়োঃ দেবা মনুষ্যাশ্চ ক্ষিতিমৈশ্বর্যং ঐশ্বর্য যুক্তাং স্তুতিমাচরন্তি কুর্বন্তি॥ ১-৩-৬৫ যুবাং বর্ণানিতি ত ইতি তচ্ছব্দাৎ যচ্ছব্দো দ্রষ্টব্যঃ। হে অশ্বিনৌ যুবাং বর্ণান্নানাবর্ণান্ বিশ্বরূপান্ সৃষ্ট্যাদিহেতুৎবেন অনেকরূপান্ যানভানূন্ বিকুরুথঃ বিশেষেণ কুরুথঃ সূর্যরথপ্রকাশয়িতৃৎবাদিত্যাশয়ঃ। তে ভানবঃ সূর্যকিরণাঃ বিশ্বা বিশ্বানি সর্বাণি ভুবনানি অধিক্ষিয়ন্তে আবৃণ্বন্তি। ত এব ভানবোঽনুসৃতাশ্চরন্ত্যপি বিচরন্তি চেত্যর্থঃ। অতএব দেবা মনুষ্যাশ্চ যুবয়োঃ ক্ষিতি স্তুতিমাচরন্তীতি পূর্ববদর্থঃ॥ ১-৩-৬৬ তৌ নাসত্যাবিতি হে নাসত্যাবশ্বিনৌ অহং তৌ বাং যুবাং মহে পূজয়ামি। মনসা পূজয়ামীত্যর্থঃ। যাং ছান্দসৎবেন জাত্যভিপ্রায়েণৈকবচনম্। যে। পুষ্করস্য জাত্যভিপ্রায়ৈকবচনং। পুষ্করাণাং পদ্মানাং স্রজং জাত্যেকবচনেন স্রজৌ মালে বিভৃথো ধারয়থঃ। তৌ প্রসিদ্ধৌ অমৃতৌ নাস্তি মৃতং মরণং যয়োস্তৌ তথোক্তৌ ঋতাবৃধৌ ঋতং সত্যং যজ্ঞমুদকং বা বর্ধয়ত ইতি তথা তৌ নাসত্যৌ ঋতে বিনা দেবা ইন্দ্রাদয়ঃ পদে স্থানে সোময়াগাদৌ তদ্দেবসংবন্ধিৎবেন প্রসিদ্ধং হবিঃ ন প্রসূতে বচনব্যত্যযেন ন প্রাপ্নুবন্তি। সোময়াগে অশ্বিনোঃ প্রথমগামিৎবেন তৌ বিনা দেবাঃ স্বাংশং ন স্বীকুর্বন্তীত্যর্থঃ॥ ১-৩-৬৭ মুখেন গর্ভমিতি। হে অশ্বিনৌ তৌ যুবাং জীবসে জীবিতু। অসেন্প্রত্যযান্তমেতৎ। গাং দৃষ্টিং মুঞ্চথঃ লকারব্যত্যযেন মুঞ্চতমিত্যাশংসা। তৌ কৌ যৌ মুখেন কৃৎবা যুবানৌ তরুণাবেব গর্ভং ভাবপ্রধানো নির্দেশঃ। গর্ভৎবং লভতাং অলভতাং। বহুলং ছন্দসীত্যডভাবঃ। ননু নবমাসগর্ভধারণাভাবে কথমাকস্মিকোৎপত্তিঃ কথং চ স্তন্যপানাদ্যভাবে আকস্মিকং তারুণ্যমিত্যত আহ। গতাসুরিত্যাদি। গতা অসবঃ প্রাণা যস্যেতি গতাসুর্মনুষ্যাদিঃ। এতৎ ছান্দসো লিঙ্গব্যত্যযঃ। এনং গর্ভং। প্রপদেন প্রকৃষ্টেন পদেন গমনেন নবমাসরূপেণ প্রসূতে জাতঃ উৎপন্নঃ স গর্ভঃ সদ্যঃ তৎকালে জননীং অত্তি পিবতি। মনুষ্যদেহে এতদুচিতম্। অশ্বিনোস্তু মরণধর্মৎবাভাবান্নৈবমিত্যাশয়ঃ॥ ১-৩-৭৭ এষা তস্যেতি সূতবাক্যং॥ ১-৩-৭৯ গৌর্বলীবর্দঃ॥ ১-৩-৮১ নেয়েষ ন কামিতবান্॥ ১-৩-৮৩ নিয়োজয়ামাস অগ্নিশুশ্রূষাদতবিতি শেষঃ॥ ১-৩-৮৪ পরিহীয়তে ন্যূনং ভবতি॥ ১-৩-৯০ আহুঃ বৃদ্ধা ইতি শেষঃ॥ ১-৩-৯১ ব্রূয়াৎ অধ্যায়পয়েৎ। পৃচ্ছতি অধীতে। অধর্মেণ গুরুদক্ষিণাদিব্যতিরেকেণ॥ ১-৩-৯৬ পিনদ্ধে ধৃতে॥ ১-৩-১০১ অনুপস্পৃশ্য অনাচম্য॥ ১-৩-১০৬ অনৃতেনোপচরিতুং বঞ্চয়িতুং॥ ১-৩-১২৭ উদকার্থং শৌচাচমনাদি কর্তুং॥ ১-৩-১২৯ দৃঢমাসন্নঃ অত্যন্তসন্নিহিতঃ॥ ১-৩-১৩৫ কল্মাষকুণ্ডলাঃ চিত্রকুণ্ডলাঃ॥ ১-৩-১৩৭ অর্কাংশুসেনায়াং সেনাবদ্দুঃসহরশ্মিজালে॥ ১-৩-১৪২ মহদ্দ্যুগ্নি তীর্থবিশেষে॥ ১-৩-১৪৫ মন্ত্রবাদশ্লোকৈঃ মন্ত্রস্বরূপশ্লোকৈঃ॥ ১-৩-১৪৬ ত্রীণ্যর্পিতানীতি। মন্ত্রলিঙ্গমাত্রাবগমাত্তুষ্টাব। বিশেষশানং তু তস্য গুরুমুখাদেব ভবিষ্যতি। অত্র চক্রে। নিত্যং চরতি ভ্রমতি। ধ্রুবে প্রবাহরূপেণ নিত্যে কালরূপে। শতানি ষষ্টিশ্চ অহোরাত্রাণামিতি শেষঃ। চতুর্বিংশতিপর্বণাং শুক্লকৃষ্ণপক্ষরূপাণাং যোগো যুস্মিন্তথাভূতে। মধ্যেঽর্পিতানি। যচ্চ ষট্কুমারাঃ ঋতবঃ পরিবর্তয়ন্তি॥ ১-৩-১৪৭ তন্ত্রং চেদমিতি। তন্ত্রং আতানবিতানরূপং তন্তুসমুদায়ং। বিশ্বরূপে সময়ভেদেন স্ত্রীপুরুষাদিরূপে। যুবত্যৌ ধাতাবিঘাতারৌ। বয়তঃ রচনাং কুরতঃ। সংবৎসররূপং পটমিতিশেষঃ। বর্তয়ন্ত্যৌ সংচারয়ন্ত্যৌ। ভূতানি চ পরিবর্তয়ন্ত্যৌ বয়ত ইতি পূর্বেণান্বয়ঃ॥ ১-৩-১৪৮ ভর্তা ধারকঃ॥ ১-৩-১৪৯ অপাং গর্ভং অদ্ভ্যো জাতং। পুরাণং আদিসর্গভবং। বৈশ্বানরং অগ্নিরূপমশ্ব। বাজিন বাহনং অভ্যুপৈতি। তস্মৈ নম ইত্যন্বয়ঃ॥ ১-৩-১৫২ স্নোতোভ্যঃ শরীররন্ধ্রেভ্যঃ॥ ১-৩-১৫৭ আবাপয়ন্তী বেণীরূপেণ কেশানাং সংগ্রথনং কারয়ন্তী॥ ১-৩-১৫৯ ৎবং মনাগসি ন শপ্তঃ ইতি পাঠে স্বলকালনিমিত্তং ন শপ্তোসি। যদি ক্ষমং নাগতঃ স্যাঃ শপ্তঃ স্যা ইত্যর্থঃ॥ ১-৩-১৬৮ ন ব্যাপন্নো ন মৃতঃ॥ ১-৩-১৮২ কশ্যপ ইত্যপি পাঠো দৃশ্যতে॥ ॥ তৃতীয়োঽধ্যায়ঃ॥ ৩ ॥

Leave a Reply

Your email address will not be published. Required fields are marked *