রামগীতা

 .. রামগীতা ..

           .. শ্রীরামগীতা ..

শ্রীমহাদেব উবাচ ..

ততো জগন্মঙ্গলমঙ্গলাত্মনা
       বিধায রামাযণকীর্তিমুত্তমাম্ .
চচার পূর্বাচরিতং রঘূত্তমো
       রাজর্ষিবর্যৈরভিসেবিতং যথা  .. ১..

সৌমিত্রিণা পৃষ্ট উদারবুদ্ধিনা
       রামঃ কথাঃ প্রাহ পুরাতনীঃ শুভাঃ .
রাজ্ঞঃ প্রমত্তস্য নৃগস্য শাপতো
       দ্বিজস্য তির্যক্ত্বমথাহ রাঘবঃ .. ২..

কদাচিদেকান্ত উপস্থিতং প্রভুং
       রামং রমালালিতপাদপঙ্কজম্ .
সৌমিত্রিরাসাদিতশুদ্ধভাবনঃ
       প্রণম্য ভক্ত্যা বিনযান্বিতোঽব্রবীত্ .. ৩..

ত্বং শুদ্ধবোধোঽসি হি সর্বদেহিনা-
       মাত্মাস্যধীশোঽসি নিরাকৃতিঃ স্বযম্ .
প্রতীযসে জ্ঞানদৃশাং মহামতে
       পাদাব্জভৃঙ্গাহিতসঙ্গসঙ্গিনাম্ .. ৪..

অহং প্রপন্নোঽস্মি পদাম্বুজং প্রভো
       ভবাপবর্গং তব যোগিভাবিতম্ .
যথাঞ্জসাজ্ঞানমপারবারিধিং
       সুখং তরিষ্যামি তথানুশাধি মাম্ .. ৫..

শ্রুত্বাথ সৌমিত্রবচোঽখিলং তদা
       প্রাহ প্রপন্নার্তিহরঃ প্রসন্নধীঃ .
বিজ্ঞানমজ্ঞানতমঃপ্রশান্তযে
       শ্রুতিপ্রপন্নং ক্ষিতিপালভূষণঃ .. ৬..

শ্রীরামচন্দ্র উবাচ ..

আদৌ স্ববর্ণাশ্রমবর্ণিতাঃ ক্রিযাঃ
       কৃত্বা সমাসাদিতশুদ্ধমানসঃ .
সমাপ্য তত্পূর্বমুপাত্তসাধনঃ
       সমাশ্রযেত্সদ্গুরুমাত্মলব্ধযে .. ৭..

ক্রিযা শ্রীরোদ্ভবহেতুরাদৃতা
       প্রিযাপ্রিযৌ তৌ ভবতঃ সুরাগিণঃ .
ধর্মেতরৌ তত্র পুনঃ শরীরকম্
       পুনঃ ক্রিযা চক্রবদীর্যতে ভবঃ .. ৮..

অজ্ঞানমেবাস্য হি মূলকারণং
       তদ্ধানমেবাত্র বিধৌ বিধীযতে .
বিদ্যৈব তন্নাশবিধৌ পটীযসী
       ন কর্ম তজ্জং সবিরোধমীরিতম্ .. ৯..

নাজ্ঞানহানির্ন চ রাগসংক্ষযো
       ভবেত্ততঃ কর্ম সদোষমুদ্ভবেত্ .
ততঃ পুনঃ সংসৃতিরপ্যবারিতা
       তস্মাদ্বুধো জ্ঞানবিচারবান্ভবেত্ .. ১০..

ননু ক্রিযা বেদমুখেন চোদিতা
       তথৈব বিদ্যা পুরুষার্থসাধনম্ .
কর্তব্যতা প্রাণভৃতঃ প্রচোদিতা
       বিদ্যাসহাযত্বমুপৈতি সা পুনঃ .. ১১..

কর্মাকৃতৌ দোষমপি শ্রুতির্জগৌ
       তস্মাত্সদা কার্যমিদং মুমুক্ষুণা .
ননু স্বতন্ত্রা ধ্রুবকার্যকারিণী
       বিদ্য ন কিঞ্চিন্মনসাপ্যপেক্ষতে .. ১২..

ন সত্যকার্যোঽপি হি যদ্বদধ্বরঃ
       প্রকাঙ্ক্ষতেঽন্যানপি কারকাদিকান্ .
তথৈব বিদ্যা বিধিতঃ প্রকাশিতৈ-
       র্বিশিষ্যতে কর্মভিরেব মুক্তযে .. ১৩..

কেচিদ্বদন্তীতি বিতর্কবাদিন-
       স্তদপ্যসদৃষ্টবিরোধকারণাত্ .
দেহাভিমানাদভিবর্ধতে ক্রিযা
       বিদ্যা গতাহঙ্কৃতিতঃ প্রসিধ্দ্যতি .. ১৪..

বিশুদ্ধবিজ্ঞানবিরোচনাঞ্চিতা
      বিদ্যাত্মবৃত্তিশ্চরমেতি ভণ্যতে .
উদেতি কর্মাখিলকারকাদিভি-
       র্নিহন্তি বিদ্যাখিলকারকাদিকম্ .. ১৫..

তস্মাত্ত্যজেত্কার্যমশেষতঃ সুধী-
       র্বিদ্যাবিরোধান্ন সমুচ্চযো ভবেত্ ..
আত্মানুসন্ধানপরাযণঃ সদা
       নিবৃত্তসর্বেন্দ্রিযবৃত্তিগোচরঃ .. ১৬..

যাবচ্ছারীরাদিষু মাযযাত্মধী-
       স্তাবদ্বিধেযো বিধিবাদকর্মণাম্ .
নেতীতি বাক্যৈরখিলং নিষিধ্য তত্
       জ্ঞাত্বা পরাত্মানমথ ত্যজেত্ক্রিযাঃ .. ১৭..

যদা পরাত্মাত্মবিভেদভেদকং
       বিজ্ঞানমাত্মন্যবভাতি ভাস্বরম্ .
তদৈব মাযা প্রবিলীযতেঽঞ্জসা
       সকারকা কারণমাত্মসংসৃতেঃ .. ১৮..

শ্রুতিপ্রমাণাভিবিনাশিতা চ সা
       কথং ভবিষত্যপি কার্যকারিণী .
বিজ্ঞানমাত্রাদমলাদ্বিতীযত-
       স্তস্মাদবিদ্যা ন পুনর্ভবিষ্যতি .. ১৯..

যদি স্ম নষ্টা ন পুনঃ প্রসূযতে
       কর্তাহমস্যেতি মতিঃ কথং ভবেত্ .
তস্মাত্স্বতন্ত্রা ন কিমপ্যপেক্ষতে
       বিদ্য বিমোক্ষায বিভাতি কেবলা .. ২০..

সা তৈত্তিরীযশ্রুতিরাহ সাদরং
       ন্যাসং প্রশস্তাখিলকর্মণাং স্ফুটম্ .
এতাবদিত্যাহ চ বাজিনাং শ্রুতি-
       র্জ্ঞানং বিমোক্ষায ন কর্ম সাধনম্ .. ২১..

বিদ্যাসমত্বেন তু দর্শিতস্ত্বযা
       ক্রতুর্ন দৃষ্টান্ত উদাহৃতঃ সমঃ .
ফলৈঃ পৃথক্ত্বাদ্বহুকারকৈঃ ক্রতুঃ
       সংসাধ্যতে জ্ঞানমতো বিপর্যযম্ .. ২২..

সপ্রত্যবাযো হ্যহমিত্যনাত্মধী-
       রজ্ঞপ্রসিদ্ধা ন তু তত্ত্বদর্শিনঃ .
তস্মাদ্বুধৈস্ত্যাজ্যমবিক্রিযাত্মভি-
       র্বিধানতঃ কর্ম বিধিপ্রকাশিতম্ .. ২৩..

শ্রদ্ধান্বিতস্তত্ত্বমসীতি বাক্যতো
       গুরোঃ প্রসাদাদপি শুদ্ধমানসঃ .
বিজ্ঞায চৈকাত্ম্যমথাত্মজীবযোঃ
       সুখী ভবেন্মেরুরিবাপ্রকম্পনঃ .. ২৪..

আদৌ পদার্থাবগতির্হি কারণং
       বাক্যার্থবিজ্ঞানবিধৌ বিধানতঃ .
তত্ত্বম্পদার্থৌ পরমাত্মজীবকা-
      বসীতি চৈকাত্ম্যমথানযোর্ভবেত্ .. ২৫..

প্রত্যক্পরোক্ষাদি বিরোধমাত্মনো-
       র্বিহায সঙ্গৃহ্য তযোশ্চিদাত্মতাম্ .
সংশোধিতাং লক্ষণযা চ লক্ষিতাং
       জ্ঞাত্বা স্বমাত্মানমথাদ্বযো ভবেত্ .. ২৬..

একাত্মকত্বাজ্জহতী ন সম্ভবে-
       ত্তথাজহল্লক্ষণতা বিরোধতঃ .
সোঽযম্পদার্থাবিব ভাগলক্ষণা
       যুজ্যেত তত্ত্বম্পদযোরদোষতঃ .. ২৭..

রসাদিপঞ্চীকৃতভূতসম্ভবং
       ভোগালযং দুঃখসুখাদিকর্মণাম্ .
শরীরমাদ্যন্তবদাদিকর্মজং
       মাযামযং স্থূলমুপাধিমাত্মনঃ .. ২৮..

সূক্ষ্মং মনোবুদ্ধিদশেন্দ্রিযৈর্যুতং
       প্রাণৈরপঞ্চীকৃতভূতসম্ভবম্ .
ভোক্তুঃ সুখাদেরনুসাধনং ভবেত্
       শরীরমন্যদ্বিদুরাত্মনো বুধাঃ .. ২৯..

অনাদ্যনির্বাচ্যমপীহ কারণং
       মাযাপ্রধানং তু পরং শরীরকম্ .
উপাধিভেদাত্তু যতঃ পৃথক্স্থিতং
       স্বাত্মানমাত্মন্যবধারযেত্ক্রমাত্ .. ৩০..

কোশেষ্বযং তেষু তু তত্তদাকৃতি-
       র্বিভাতি সঙ্গাত্স্ফতিকোপলো যথা .
অসঙ্গরূপোঽযমজো যতোঽদ্বযো
       বিজ্ঞাযতেঽস্মিন্পরিতো বিচারিতে .. ৩১..

বুদ্ধেস্ত্রিধা বৃত্তিরপীহ দৃশ্যতে
       স্বপ্নাদিভেদেন গুণত্রযাত্মনঃ  .
অন্যোন্যতোঽস্মিন্ব্যভিচারিতো মৃষা
       নিত্যে পরে ব্রহ্মণি কেবলে শিবে .. ৩২..

দেহেন্দ্রিযপ্রাণমনশ্চিদাত্মনাং
       সঙ্ঘাদজস্ত্রং পরিবর্ততে ধিযঃ .
বৃত্তিস্তমোমূলতযাজ্ঞলক্ষণা
       যাবদ্ভবেত্তাবদসৌ ভবোদ্ভবঃ .. ৩৩..

নেতিপ্রমাণেন নিরাকৃতাখিলো
       হৃদা সমাস্বাদিতচিদ্ঘনামৃতঃ .
ত্যজেদশেষং জগদাত্তসদ্রসং
       পীত্বা যথাম্ভঃ প্রজহাতি তত্ফলম্ .. ৩৪..

কদাচিদাত্মা ন মৃতো ন জাযতে
       ন ক্ষীযতে নাপি বিবর্ধতেঽনবঃ .
নিরস্তসর্বাতিশযঃ সুখাত্মকঃ
       স্বযংপ্রভঃ সর্বগতোঽযমদ্বযঃ .. ৩৫..

এবংবিধে জ্ঞানমযে সুখাত্মকে
       কথং ভবো দুঃখমযঃ প্রতীযতে .
অজ্ঞানতোঽধ্যাসবশাত্প্রকাশতে
       জ্ঞানে বিলীযেত বিরোধতঃ ক্ষণাত্ .. ৩৬..

যদন্যদন্যত্র বিভাব্যতে ভ্রমা-
      দধ্যাসমিত্যাহুরমুং বিপশ্চিতঃ .
অসর্পভূতেঽহিবিভাবনং যথা
       রজ্জ্বাদিকে তদ্বদপীশ্বরে জগত্ .. ৩৭..

বিকল্পমাযারহিতে চিদাত্মকে-
       . অহঙ্কার এষ প্রথমঃ প্রকল্পিতঃ .
অধ্যাস এবাত্মনি সর্বকারণে
       নিরামযে ব্রহ্মণি কেবলে পরে .. ৩৮..

ইচ্ছাদিরাগাদি সুখাদিধর্মিকাঃ
      সদা ধিযঃ সংসৃতিহেতবঃ পরে .
যস্মাত্প্রসুপ্তৌ তদভাবতঃ পরঃ
       সুখস্বরূপেণ বিভাব্যতে হি নঃ .. ৩৯..

অনাদ্যবিদ্যোদ্ভববুদ্ধিবিম্বিতো
       জীবপ্রকাশোঽযমিতীর্যতে চিতঃ .
আত্মাধিযঃ সাক্ষিতযা পৃথক্স্থিতো
       বুধ্দ্যাপরিচ্ছিন্নপরঃ স এব হি .. ৪০..

চিদ্বিম্বসাক্ষ্যাত্মধিযাং প্রসঙ্গত-
       স্ত্বেকত্র বাসাদনলাক্তলোহবত্ .
অন্যোন্যমধ্যাসবশাত্প্রতীযতে
       জডাজডত্বং চ চিদাত্মচেতসোঃ .. ৪১..

গুরোঃ সকাশাদপি বেদবাক্যতঃ
       সঞ্জাতবিদ্যানুভবো নিরীক্ষ্য তম্ .
স্বাত্মানমাত্মস্থমুপাধিবর্জিতং
       ত্যজেদশেষং জডমাত্মগোচরম্ .. ৪২..

প্রকাশরূপোঽহমজোঽহমদ্বযো-
       . অসকৃদ্বিভাতোঽহমতীব নির্মলঃ .
বিশুদ্ধবিজ্ঞানঘনো নিরামযঃ
       সম্পূর্ণ আনন্দমযোঽহমক্রিযঃ .. ৪৩..

সদৈব মুক্তোঽহমচিন্ত্যশক্তিমা-
       নতীন্দ্রিযজ্ঞানমবিক্রিযাত্মকঃ .
অনন্তপারোঽহমহর্নিশং বুধৈ-
       র্বিভাবিতোঽহং হৃদি বেদবাদিভিঃ .. ৪৪..

এবং সদাত্মানমখণ্ডিতাত্মনা
       বিচারমাণস্য বিশুদ্ধভাবনা .
হন্যাদবিদ্যামচিরেণ কারকৈ
       রসাযনং যদ্বদুপাসিতং রুজঃ .. ৪৫..

বিবিক্ত আসীন উপারতেন্দ্রিযো
       বিনির্জিতাত্মা বিমলান্তরাশযঃ .
বিভাবযেদেকমনন্যসাধনো
       বিজ্ঞানদৃক্কেবল আত্মসংস্থিতঃ .. ৪৬..

বিশ্বং যদেতত্পরমাত্মদর্শনং
       বিলাপযেদাত্মনি সর্বকারণে .
পূর্ণশ্চিদানন্দমযোঽবতিষ্ঠতে
       ন বেদ বাহ্যং ন চ কিঞ্চিদান্তরম্ .. ৪৭..

পূর্বং সমাধেরখিলং বিচিন্তযে-
       দোঙ্কারমাত্রং সচরাচরং জগত্ .
তদেব বাচ্যং প্রণবো হি বাচকো
       বিভাব্যতেঽজ্ঞানবশান্ন বোধতঃ .. ৪৮..

অকারসংজ্ঞঃ পুরুষো হি বিশ্বকো
       হ্যুকারকস্তৈজস ঈর্যতে ক্রমাত্ .
প্রাজ্ঞো মকারঃ পরিপঠ্যতেঽখিলৈঃ
       সমাধিপূর্বং ন তু তত্ত্বতো ভবেত্ .. ৪৯..

বিশ্বং ত্বকারং পুরুষং বিলাপযে-
       দুকারমধ্যে বহুধা ব্যবস্থিতম্ .
ততো মকারে প্রবিলাপ্য তৈজসং
       দ্বিতীযবর্ণং প্রণবস্য চান্তিমে .. ৫০..

মকারমপ্যাত্মনি চিদ্ঘনে পরে
       বিলাপযেত্প্রাজ্ঞমপীহ কারণম্ .
সোঽহং পরং ব্রহ্ম সদা বিমুক্তিম-
       দ্বিজ্ঞানদৃঙ্ মুক্ত উপাধিতোঽমলঃ .. ৫১..

এবং সদা জাতপরাত্মভাবনঃ
       স্বানন্দতুষ্টঃ পরিবিস্মৃতাখিলঃ .
আস্তে স নিত্যাত্মসুখপ্রকাশকঃ
       সাক্ষাদ্বিমুক্তোঽচলবারিসিন্ধুবত্ .. ৫২..

এবং সদাভ্যস্তসমাধিযোগিনো
       নিবৃত্তসর্বেন্দ্রিযগোচরস্য হি .
বিনির্জিতাশেষরিপোরহং সদা
       দৃশ্যো ভবেযং জিতষড্গুণাত্মনঃ .. ৫৩..

ধ্যাত্বৈবমাত্মানমহর্নিশং মুনি-
       স্তিষ্ঠেত্সদা মুক্তসমস্তবন্ধনঃ .
প্রারব্ধমশ্নন্নভিমানবর্জিতো
       ময্যেব সাক্ষাত্প্রবিলীযতে ততঃ .. ৫৪..

আদৌ চ মধ্যে চ তথৈব চান্ততো
       ভবং বিদিত্বা ভযশোককারণম্ .
হিত্বা সমস্তং বিধিবাদচোদিতং
       ভজেত্স্বমাত্মানমথাখিলাত্মনাম্ .. ৫৫..

আত্মন্যভেদেন বিভাবযন্নিদং
       ভবত্যভেদেন মযাত্মনা তদা .
যথা জলং বারিনিধৌ যথা পযঃ
       ক্ষীরে বিযদ্ব্যোম্ন্যনিলে যথানিলঃ .. ৫৬..

ইত্থং যদীক্ষেত হি লোকসংস্থিতো
       জগন্মৃষৈবেতি বিভাবযন্মুনিঃ .
নিরাকৃতত্বাচ্ছ্রুতিযুক্তিমানতো
       যথেন্দুভেদো দিশি দিগ্ভ্রমাদযঃ .. ৫৭..

যাবন্ন পশ্যেদখিলং মদাত্মকং
       তাবন্মদারাধনতত্পরো ভবেত্ .
শ্রদ্ধালুরত্যূর্জিতভক্তিলক্ষণো
       যস্তস্য দৃশ্যোঽহমহর্নিশং হৃদি .. ৫৮..

রহস্যমেতচ্ছ্রুতিসারসঙ্গ্রহং
       মযা বিনিশ্চিত্য তবোদিতং প্রিয .
যস্ত্বেতদালোচযতীহ বুদ্ধিমান্
       স মুচ্যতে পাতকরাশিভিঃ ক্ষণাত্ .. ৫৯..

ভ্রাতর্যদীদং পরিদৃশ্যতে জগ-
       ন্মাযৈব সর্বং পরিহৃত্য চেতসা .
মদ্ভাবনাভাবিতশুদ্ধমানসঃ
       সুখী ভবানন্দমযো নিরামযঃ .. ৬০..

যঃ সেবতে মামগুণং গুণাত্পরং
       হৃদা কদা বা যদি বা গুণাত্মকম্ .
সোঽহং স্বপাদাঞ্চিতরেণুভিঃ স্পৃশন্
       পুনাতি লোকত্রিতযং যথা রবিঃ .. ৬১..

বিজ্ঞানমেতদখিলং শ্রুতিসারমেকং
       বেদান্তবেদচরণেন মযৈব গীতম্ .
যঃ শ্রদ্ধযা পরিপঠেদ্গুরুভক্তিযুক্তো
       মদ্রূপমেতি যদি মদ্বচনেষু ভক্তিঃ .. ৬২..

          .. ইতি শ্রীমদধ্যাত্মরামাযণে উমামহেশ্বরসংবাদে উত্তরকাণ্ডে পঞ্চমঃ সর্গঃ ..