গোবিন্দদামোদরস্তোত্র

.. শ্রীগোবিন্দদামোদরস্তোত্র ..

অগ্রে কুরূণামথ পাণ্ডবানাং দুঃশাসনেনাহৃতবস্ত্রকেশা    .
কৃষ্ণা তদাক্রোশদনন্যনাথা গোবিন্দ দামোদর মাধবেতি     .. ১..

শ্রীকৃষ্ণ বিষ্ণো মধুকৈটভারে ভক্তানুকম্পিন্ ভগবন্ মুরারে    .
ত্রাযস্ব মাং কেশব লোকনাথ গোবিন্দ দামোদর মাধবেতি     .. ২..

বিক্রেতুকামাখিলগোপকন্যা মুরারিপাদার্পিতচিত্তবৃত্তিঃ    .
দধ্যাদিকং মোহবশাদবোচদ্ গোবিন্দ দামোদর মাধবেতি     .. ৩..

উলূখলে সম্ভৃততণ্ডুলাশ্চ সংঘট্টযন্ত্যো মুসলৈঃ প্রমুগ্ধাঃ  .
গাযন্তি গোপ্যো জনিতানুরাগা গোবিন্দ দামোদর মাধবেতি     .. ৪..

কাচিত্করাম্ভোজপুটে নিষণ্ণং ক্রীডাশুকং কিংশুকরক্ততুণ্ডম্ .
অধ্যাপযামাস সরোরুহাক্ষ্হী গোবিন্দ দামোদর মাধবেতি     .. ৫..

গৃহে গৃহে গোপবধূসমূহঃ প্রতিক্ষণং পিঞ্জরসাইরিকাণাম্  .
স্খলদ্গিরম্ বাচযিতুং প্রবৃত্তো গোবিন্দ দামোদর মাধবেতি     .. ৬..

পর্য্যঙ্কিকাভাজমলং কুমারং প্রস্বাপযন্ত্যোঽখিলগোপকন্যাঃ    .
জগুঃ প্রবন্ধং স্বরতালবন্ধং গোবিন্দ দামোদর মাধবেতি     .. ৭..

রামানুজং বীক্ষণকেলিলোলং গোপী গৃহীত্বা নবনীতগোলং  .
আবালকম্ বালকমাজুহাব গোবিন্দ দামোদর মাধবেতি     .. ৮..

বিচিত্রবর্ণাভরণাভিরামেঽভিধেহি বক্ত্রাম্বুজরাজহংসি .
সদা মদীযে রসনেঽগ্ররঙ্গে গোবিন্দ দামোদর মাধবেতি     .. ৯..

অঙ্কাধিরূঢং শিশুগোপগূঢং স্তনং ধযন্তং কমলৈককান্তম্  .
সম্বোধযামাস মুদা যশোদা গোবিন্দ দামোদর মাধবেতি     .. ১০..

ক্রীডন্তমন্তর্ব্রজমাত্মজং স্বং সমং বযস্যৈঃ পশুপালবালৈঃ  .
প্রেম্ণা যশোদা প্রজুহাব কৃষ্ণং গোবিন্দ দামোদর মাধবেতি     .. ১১..

যশোদযা গাঢমুলূখলেন গোকণ্ঠপাশেন নিবধ্যমানঃ .
রুরোদ মন্দং নবনীতভোজী গোবিন্দ দামোদর মাধবেতি        .. ১২..

নিজাঙ্গনে কঙ্কণকেলিলোলং গোপী গৃহীত্বা নবনীতগোলং .
আমর্দযত্পাণিতলেন নেত্রে গোবিন্দ দামোদর মাধবেতি          .. ১৩..

গৃহে গৃহে গোপবধূকদম্বাঃ সর্বে মিলিত্বা সমবাযযোগে .
পুণ্যানি নামানি পঠন্তি নিত্যং গোবিন্দ দামোদর মাধবেতি     .. ১৪..

মন্দারমূলে বদনাভিরামং বিম্বাধরে পূরিতবেণুনাদম্  .
গোগোপগোপীজনমধ্যসংস্থং গোবিন্দ দামোদর মাধবেতি        .. ১৫..

উত্থায গোপ্যোঽপররাত্রভাগে স্মৃত্বা যশোদসুতবালকেলিম্  .
গাযন্তি প্রোচ্চৈর্দধি মন্থযন্ত্যো গোবিন্দ দামোদর মাধবেতি     .. ১৬..

জগ্ধোঽথ দত্তো নবনীতপিণ্ডো গৃহে যশোদা বিচিকিত্সযন্তী  .
উবাচ সত্যং বদ হে মুরারে গোবিন্দ দামোদর মাধবেতি         .. ১৭..

অভ্যর্চ্য গেহং যুবতিঃ প্রবৃদ্ধপ্রেমপ্রবাহা দধি নির্মমন্থ  .
গাযন্তি গোপ্যোঽথ সখীসমেতা গোবিন্দ দামোদর মাধবেতি     .. ১৮..

ক্বচিত্ প্রভাতে দধিপূর্ণপাত্রে নিক্ষিপ্য মন্থং যুবতী মুকুন্দম্   .
আলোক্য গানং বিবিধং করোতি গোবিন্দ দামোদর মাধবেতি     .. ১৯..

ক্রীডাপরং ভোজনমজ্জনার্থং হিতৈষিণী স্ত্রী তনুজং যশোদা  .
আজূহবত্ প্রেমপরিপ্লুতাক্ষী গোবিন্দ দামোদর মাধবেতি       .. ২০..

সুখং শযানং নিলযে চ বিষ্ণুং দেবর্ষিমুখ্যা মুনযঃ প্রপন্নাঃ  .
তেনাচ্যুতে তন্মযতাং ব্রজন্তি গোবিন্দ দামোদর মাধবেতি     .. ২১..

বিহায নিদ্রামরুণোদযে চ বিধায কৃত্যানি চ বিপ্রমুখ্যাঃ  .
বেদাবসানে প্রপঠন্তি নিত্যং গোবিন্দ দামোদর মাধবেতি       .. ২২..

বৃন্দাবনে গোপগণাশ্চ গোপ্যো বিলোক্য গোবিন্দবিযোগখিন্নম্   .
রাধাং জগুঃ সাশ্রুবিলোচনাভ্যাং গোবিন্দ দামোদর মাধবেতি     .. ২৩..

প্রভাতসঞ্চারগতা নু গাবস্তদ্রক্ষণার্থং  তনযং যশোদা  .
প্রাবোধযত্ পাণিতলেন মন্দং গোবিন্দ দামোদর মাধবেতি     .. ২৪..

প্রবালশোভা ইব দীর্ঘকেশা বাতাম্বুপর্ণাশনপূতদেহাঃ    .
মূলে তরূণাং মুনযঃ পঠন্তি গোবিন্দ দামোদর মাধবেতি     .. ২৫..

এবং ব্রুবাণা বিরহাতুরা ভৃশং ব্রজস্ত্রিযঃ কৃষ্ণবিষক্তমানসাঃ    .
বিসৃজ্য লজ্জাং রুরুদুঃ স্ম সুখরং গোবিন্দ দামোদর মাধবেতি     .. ২৬..

গোপী কদাচিন্মণিপিঞ্জরস্থং শুকং বচো বাচযিতুং প্রবৃত্তা    .
আনন্দকন্দ ব্রজচন্দ্র কৃষ্ণ গোবিন্দ দামোদর মাধবেতি     .. ২৭..

গোবত্সবালৈঃ শিশুকাকপক্ষং বধ্নন্তমম্ভোজদলাযতাক্ষম্    .
উবাচ মাতা চিবুকং গৃহীত্বা গোবিন্দ দামোদর মাধবেতি     .. ২৮..

প্রভাতকালে বরবল্লবৌঘা গোরক্ষণার্থং ধৃতবেত্রদণ্ডাঃ    .
আকারযামাসুরনন্তমাদ্যং গোবিন্দ দামোদর মাধবেতি     .. ২৯..

জলাশযে কালিযমর্দনায যদা কদম্বাদপতন্মুরারিঃ    .
গোপাঙ্গনাশ্চুক্রুশুরেত্য গোপা গোবিন্দ দামোদর মাধবেতি     .. ৩০..

অক্রূরমাসাদ্য যদা মুকুন্দশ্চাপোত্সবার্থং মথুরাং প্রবিষ্ঠঃ    .
তদা স পৌরৈর্জযতীত্যভাষি গোবিন্দ দামোদর মাধবেতি     .. ৩১..

কংসস্য দূতেন্ যদৈব নীতৌ বৃন্দাবনান্তাদ্ বসুদেবসূনূ    .
রুরোদ গোপী ভবনস্য মধ্যে গোবিন্দ দামোদর মাধবেতি     .. ৩২..

সরোবরে কালিযনাগবদ্ধং শিশুং যশোদাতনযং নিশম্য    .
চক্রুর্লুঠন্ত্যঃ পথি গোপবালা গোবিন্দ দামোদর মাধবেতি     .. ৩৩..

অক্রূরযানে যদুবংশনাথং সংগচ্ছমানং মথুরাং নিরীক্ষ্য    .
ঊচুর্বিযোগত্ কিলগোপবালা গোবিন্দ দামোদর মাধবেতি     .. ৩৪..

চক্রন্দ গোপী নলিনীবনান্তে কৃষ্ণেন হীনা কুসুমে শযানা     .
প্রফুল্লনীলোত্পললোচনাভ্যাং গোবিন্দ দামোদর মাধবেতি     .. ৩৫..

মাতাপিতৃভ্যাং পরিবার্যমাণা গেহং প্রবিষ্টা বিললাপ গোপী    .
আগত্য মাং পালয বিশ্বনাথ গোবিন্দ দামোদর মাধবেতি     .. ৩৬..

বৃন্দাবনস্থং হরিমাশু বুদ্ধ্বা গোপী গতা কাপি বনং নিশাযাম্    .
তত্রাপ্যদৃষ্ট্বাতিভযাদবোচদ্ গোবিন্দ দামোদর মাধবেতি     .. ৩৭..

সুখং শযানা নিলযে নিজেঽপি নামানি বিষ্ণো প্রবদন্তি মর্ত্যাঃ    .
তে নিশ্চিতং তন্মযতাং ব্রজন্তি গোবিন্দ দামোদর মাধবেতি     .. ৩৮..

সা নীরজাক্ষীমবলোক্য রাধাং রুরোদ গোবিন্দবিযোগখিন্নাম্    .
সখী প্রফুল্লোত্পললোচনাভ্যাং গোবিন্দ দামোদর মাধবেতি     .. ৩৯..

জিহ্বে রসজ্ঞে মধুরপ্রিযা ত্বং সত্যং হিতং ত্বং পরমং বদামি    .
আবর্ণযেথা মধুরাক্ষরাণি গোবিন্দ দামোদর মাধবেতি     .. ৪০..

আত্যন্তিকব্যাধিহরং জনানাং চিকিত্সকং বেদবিদো বদন্তি    .
সংসারতাপত্রযনাশবীজং গোবিন্দ দামোদর মাধবেতি     .. ৪১..

তাতাজ্ঞযা গচ্ছতি রামচন্দ্রে সলক্ষ্মণেঽরণ্যচযে সসীতে    .
চক্রন্দ রামস্য নিজা জনিত্রী গোবিন্দ দামোদর মাধবেতি     .. ৪২..

একাকিনী দণ্ডককাননান্তাত্ সা নীযমানা দশকন্ধরেণ    .
সীতা তদাক্রন্দদনন্যনাথা গোবিন্দ দামোদর মাধবেতি     .. ৪৩..

রামাদ্বিযুক্তা জনকাত্মজা সা বিচিন্তযন্তী হৃদি রামরূপম্    .
রুরোদ সীতা রঘুনাথ পাহি গোবিন্দ দামোদর মাধবেতি     .. ৪৪..

প্রসীদ বিষ্ণো রঘুবংশনাথ সুরাসুরাণাং সুখদুখঃহেতো    .
রুরোদ সীতা তু সমুদ্রমধ্যে গোবিন্দ দামোদর মাধবেতি     .. ৪৫..

অতর্জলে গ্রাহগৃহীতপাদো বিসৃষ্টবিক্লিষ্টসমস্তবন্ধুঃ         .
তদা গজেন্দ্রো নিতরাং জগাদ গোবিন্দ দামোদর মাধবেতি     .. ৪৬..

হংসধ্বজঃ শঙ্খযুতো দদর্শ পুত্রং কটাহে প্রপতন্তমেনম্  .
পুণ্যানি নামানি হরের্জপন্তং গোবিন্দ দামোদর মাধবেতি     .. ৪৭..

দুর্বাসসো বাক্যমুপেত্য কৃষ্ণা সা চাব্রবীত্ কাননবাসিনীশম্  .
অন্তঃপ্রবিষ্টং মনসাজুহাব গোবিন্দ দামোদর মাধবেতি     .. ৪৮..

ধ্যেযঃ সদা যোগিভিরপ্রমেযঃ চিন্তাহরশ্চিন্তিতপারিজতঃ  .
কস্তূরিকাকল্পিতনীলবর্ণো গোবিন্দ দামোদর মাধবেতি     .. ৪৯..

সংসারকূপে পতিতোঽত্যগাধে মোহান্ধপূর্ণে বিষযাভিতপ্তে  .
করাবলম্বং মম দেহি বিষ্ণো গোবিন্দ দামোদর মাধবেতি     .. ৫০..

ত্বামেব যাচে মম দেহি জিহ্বে সমাগতে দণ্ডধরে কৃতান্তে  .
বক্তব্যমেবং মধুরং সুভক্ত্যা গোবিন্দ দামোদর মাধবেতি     .. ৫১..

ভজস্ব মন্ত্রং ভববন্ধমুত্যৈ জিহ্বে রসজ্ঞে সুলভং মনোজ্ঞম্  .
দ্বৈপাযনাদ্যৈর্মুনিভিঃ প্রজপ্তং গোবিন্দ দামোদর মাধবেতি     .. ৫২..

গোপাল বংশীধর রূপসিন্ধো লোকেশ নারাযণ দীনবন্ধো  .
উচ্চস্বরৈস্ত্বং বদ সর্বদৈব গোবিন্দ দামোদর মাধবেতি     .. ৫৩..

জিহ্বে সদৈবং ভজ সুন্দরাণি নামানি কৃষ্ণস্য মনোহরাণি  .
সমস্তভক্তার্তিবিনাশনানি গোবিন্দ দামোদর মাধবেতি     .. ৫৪..

গোবিন্দ গোবিন্দ হরে মুরারে গোবিন্দ গোবিন্দ মুকুন্দ কৃষ্ণ  .
গোবিন্দ গোবিন্দ রথাঙ্গপাণে গোবিন্দ দামোদর মাধবেতি     .. ৫৫..

সুবাবসানে ত্বিদমেব সারং দুঃখাবসানে ত্বিদমেব গেযম্  .
দেহবসানে ত্বিদমেব জাপ্যং গোবিন্দ দামোদর মাধবেতি     .. ৫৬..

দুর্বারবাক্যং পরিগুহ্য কৃষ্ণা মৃগীব ভীতা তু কথং কথঞ্চিত্  .
সভাং প্রবিষ্টা মনসাজুহাব গোবিন্দ দামোদর মাধবেতি     .. ৫৭..

শ্রীকৃষ্ণ রাধাবর গোকুলেশ গোপাল গোবর্ধন নাথ বিষ্ণো  .
জিহ্বে পিবস্বামৃতমেতদেব গোবিন্দ দামোদর মাধবেতি     .. ৫৮..

শ্রীনাথ বিশ্বেশ্বর বিশ্বমূর্তে শ্রীদেবকীনন্দন দৈত্যশত্রো  .
জিহ্বে পিবস্বামৃতমেতদেব গোবিন্দ দামোদর মাধবেতি     .. ৫৯..

গোপীপতে কংসরিপো মুকুন্দ লক্ষ্মীপতে কেশব বাসুদেব  .
জিহ্বে পিবস্বামৃতমেতদেব গোবিন্দ দামোদর মাধবেতি     .. ৬০..

গোপীজনাহ্লাদকর ব্রজেশ গোচারণারণ্যকৃতপ্রবেশ  .
জিহ্বে পিবস্বামৃতমেতদেব গোবিন্দ দামোদর মাধবেতি     .. ৬১..

প্রাণেশ বিশ্বম্ভর কৈটভারে বৈকুণ্ঠ নারাযণ চক্রপাণে  .
জিহ্বে পিবস্বামৃতমেতদেব গোবিন্দ দামোদর মাধবেতি     .. ৬২..

হরে মুরারে মধুসূদনাদ্য শ্রীরাম সীতাবর রাবণারে  .
জিহ্বে পিবস্বামৃতমেতদেব গোবিন্দ দামোদর মাধবেতি     .. ৬৩..

শ্রীযাদবেন্দ্রাদ্রিধরাম্বুজাক্ষ গোগোপগোপীসুখদানদক্ষ  .
জিহ্বে পিবস্বামৃতমেতদেব গোবিন্দ দামোদর মাধবেতি     .. ৬৪..

ধরাভরোত্তারণগোপবেষ বিহারলীলাকৃতবন্ধুশেষ  .
জিহ্বে পিবস্বামৃতমেতদেব গোবিন্দ দামোদর মাধবেতি     .. ৬৫..

বকীবকাঘাসুরধেনুকারে কেশীতৃণাবর্তবিঘাতদক্ষ  .
জিহ্বে পিবস্বামৃতমেতদেব গোবিন্দ দামোদর মাধবেতি     .. ৬৬..

শ্রীজানকীজীবন রামচন্দ্র নিশাচরারে ভরতাগ্রজেশ  .
জিহ্বে পিবস্বামৃতমেতদেব গোবিন্দ দামোদর মাধবেতি     .. ৬৭..

নারাযণানন্ত হরে নৃসিংহ প্রহ্লাদবাধাহর হে কৃপালো  .
জিহ্বে পিবস্বামৃতমেতদেব গোবিন্দ দামোদর মাধবেতি     .. ৬৮..

লীলামনুষ্যাকৃতিরামরূপ প্রতাপদাসীকৃতসর্বভূপ  .
জিহ্বে পিবস্বামৃতমেতদেব গোবিন্দ দামোদর মাধবেতি     .. ৬৯..

শ্রীকৃষ্ণ গোবিন্দ হরে মুরারে হে নাথ নারাযণ বাসুদেব  .
জিহ্বে পিবস্বামৃতমেতদেব গোবিন্দ দামোদর মাধবেতি     .. ৭০..

বক্তুং সমর্থোঽপি ন বক্তি কশ্চিদহোও জনানাং ব্যসনাভিমুখ্যম্  .
জিহ্বে পিবস্বামৃতমেতদেব গোবিন্দ দামোদর মাধবেতি     .. ৭১..

ইতি শ্রী বিল্বমঙ্গলাচার্য বিরচিতং শ্রীগোবিন্দদামোদর স্তোত্রং সম্পূর্ণম্

শ্লোক ৪২- ৪৫ পাঠান্তর
গোবিন্দ দামোদর মাধবেতি
স্থানমে 
হে রাম রঘুনন্দন রাঘবেতি