কৃষ্ণ

.. কৃষ্ণ ..

           .. কৃষ্ণোপনিষত্ ..

          .. শ্রী গুরুভ্যো নমঃ হরিঃ ॐ ..

      যো রামঃ কৃষ্ণতামেত্য সার্বাত্ম্যং প্রাপ্য লীলযা .
      অতোষযদ্দেব্মৌনিপটলং তং নতোঽস্ম্যহম্  .. ১..

          ॐ ভদ্রং কর্ণেভিরিতি শান্তিঃ  .

          .. অথ প্রথম খংডঃ ..

   হরিঃ ॐ . শ্রীমহাবিষ্ণুং সচ্চিদানন্দলক্ষণং রামচন্দ্রং
   দৃষ্ট্বা সর্বাঙ্গসুন্দরং মুনযো বনবাসিনো বিস্মিতা বভূবুঃ  .
   তং হোচুর্নোঽবদ্যমবতারান্বৈ গণ্যন্তে আলিঙ্গামো ভবন্তমিতি .
   ভবান্তরে কৃষ্ণাবতারে যূযং গোপিকা ভূত্ব মামালিঙ্গথ
   অন্যে যেঽবতারাস্তে হি গোপা ন স্ত্রীশ্চ নো কুরু . অন্যোন্যবিগ্রহং
   ধার্যং তবাঙ্গস্পর্শনাদিহ . শাশ্বতস্পর্শযিতাস্মাকং
   গৃণ্হীমোঽবতারান্বযম্   .. ১..

   রুদ্রাদীনাং বচঃ শৃত্বা প্রোবাচ ভগবান্স্বযম্  .
   অঙ্গযঙ্গং করিষ্যামি ভবদ্বাক্যং করোম্যহম্  .. ২..

   মোদিতাস্তে সুরা সর্বে কৃতকৃত্যাধুনা বযম্  .
   যো নন্দঃ পরমানন্দো যশোদো মুক্তিগেহিনী   .. ৩..

   মাযা সা ত্রিবিধা প্রোক্তা সত্ত্বরাজসতামসী  .
   প্রোক্তা চ সাত্ত্বিকী রুদ্রে ভক্তে ব্রহ্মণি রাজসী  .. ৪..

   তামসী দৈত্যপক্ষেষু মাযা ত্রেধা হ্যুদাহৃতা  .
   অজেযা বৈষ্ণবী মাযা জপ্যেন চ সুতা পুরা  .. ৫..

   দেবকী ব্রহ্মপুত্র সা যা বেদৈরুপগীযতে  .
   নিগমো বসুদেবো যো বেদার্থঃ কৃষ্ণরামযোঃ  .. ৬..

   স্তুবতে সততং যস্তু সোঽবতীর্ণো মহীত঳ে  .
   বনে বৃন্দাবনে ক্রীডঙ্গোপগোপীসুরৈঃ সহ   .. ৭..

   গোপ্যো গাব ঋচস্তস্য যষ্টিকা কমলাসনঃ  .
   বংশস্তু ভগবান্ রুদ্রঃ শৃঙ্গমিন্দ্রঃ সগোসুরঃ   .. ৮..

   গোকুলং বনবৈকুণ্ঠং তাপসাস্তত্র তে দ্রুমাঃ  .
   লোভক্রোধাদযো দৈত্যাঃ কলিকালস্তিরস্কৃতঃ   .. ৯..

   গোপরূপো হরিঃ সাক্ষান্মাযাবিগ্রহধারণঃ  .
   দুর্বোধং কুহকং তস্য মাযযা মোহিতং জগত্   .. ১০..

   দুর্জযা সা সুরৈঃ সর্বৈর্ধৃষ্টিরূপো ভবেদ্বিজঃ  .
   রুদ্রো যেন কৃতো বংশস্তস্য মাযা জগত্কথম্   .. ১১..

   বলং জ্ঞানং সুরাণাং বৈ তেষাং জ্ঞানং হৃতং ক্ষণাত্  .
   শেশনাগো ভবেদ্রামঃ কৃষ্ণো ব্রহ্মৈব শাশ্বতম্  .. ১২..

   অষ্টাবষ্টসহস্রে দ্বে শতাধিক্যঃ স্ত্রিযস্তথা  .
   ঋচোপনিষদস্তা বৈ ব্রহ্মরূপা ঋচঃ স্ত্রিযাঃ   .. ১৩..

   দ্বেষাশ্চাণূরমল্লোঽযং মত্সরো মুষ্টিকো জযঃ  .
   দর্পঃ কুবলযাপীডো গর্বো রক্ষঃ খগো বকঃ   .. ১৪..

   দযা সা রোহিণী মাতা সত্যভামা ধরেতি বৈ  .
   অঘাসুরো মাহাব্যাধিঃ কলিঃ কংসঃ স ভূপতিঃ   .. ১৫..

   শমো মিত্রঃ সুদামা চ সত্যাক্রোদ্ধবো দমঃ  .
   যঃ শঙ্খঃ স স্বযং বিষ্ণুর্লক্ষ্মীরুপো ব্যবস্থিতঃ   .. ১৬..

   দুগ্ধসিন্ধৌ সমুত্পন্নো মেঘঘোষস্তু সংস্মৃতঃ  .
   দুগ্দোদধিঃ কৃতস্তেন ভগ্নভাণ্ডো দধিগৃহে   .. ১৭..

   ক্রীডতে বালকো ভূত্বা পূর্ববত্সুমহোদধৌ  .
   সংহারার্থং চ শত্রূণাং রক্ষণায চ সংস্থিতঃ   .. ১৮..

   কৃপার্থে সর্বভূতানাং গোপ্তারং ধর্মমাত্মজম্  .
   যত্স্রষ্টুমীশ্বরেণাসীতচ্চক্রং ব্রহ্মরূপদৃক্   .. ১৯..

   জযন্তীসংভবো বাযুশ্চমরো ধর্মসংজ্ঞিতঃ  .
   যস্যাসৌ জ্বলনাভাসঃ খড্গরূপো মহেশ্বরঃ    .. ২০..

   কশ্যপোলূখলঃ খ্যাতো রজ্জুর্মাতাঽদিতিস্তথা  .
   চক্রং শঙ্খং চ সংসিদ্ধিং বিন্দুং চ সর্বমূর্ধনি   .. ২১..

   যাবন্তি দেবরূপাণি বদন্তি বিভুধা জনাঃ  .
   নমন্তি দেবরূপেভ্য এবমাদি ন সংশযঃ   .. ২২..

   গদা চ কা঳িকা সাক্ষাত্সর্বশত্রুনিবর্হিণী  .
   ধনুঃ শার্ঙ্গং স্বমাযাচ শরত্কালঃ সুভোজনঃ   .. ২৩..

   অব্জকাণ্ডং জগত্বীজং ধৃতং পাণৌ স্বলীলযা  .
   গরুডো বটভাণ্ডীরঃ সুদামা নারদো মুনিঃ   .. ২৪..

   বৃন্দা ভক্তিঃ ক্রিযা বুদ্ধীঃ সর্বজন্তুপ্রকাশিনী  .
   তস্মান্ন ভিন্নং নাভিন্নমাভির্ভিন্নো ন বৈ বিভুঃ  .
   ভূমাবুত্তারিতং সর্বং বৈকুণ্ঠং স্বর্গবাসিনাম্   .. ২৫..

          .. ইতি প্রথম খণ্ডঃ ..

          .. অথ দ্বিতীযঃ খণ্ডঃ ..

শেষো হ বৈ বাসুদেবাত্ সংকর্ষণো নাম জীব আসীত্ .

সোঽকামযত প্রজাঃ সৃজেযেতি .

ততঃ প্রদ্যুম্নসংজ্ঞক আসীত্ .

তস্মাত্ অহংকারনামানিরুদ্ধো হিরণ্যগর্ভোঽজাযত .

তস্মাত্ দশ প্রজাপতযো মরীচ্যাদ্যাঃ
স্থাণুদক্ষকর্দমপ্রিযব্রতোত্তনপাদবাযবো ব্যজাযন্ত .

তেভ্যোঃ সর্বাণি ভূতানি চ .

তস্মাচ্ছেষাদেব সর্বাণি চ ভূতানি সমুত্পদ্যন্তে .

তস্মিন্নেব প্রলীযন্তে .

স এব বহুধা জাযমানঃ সর্বান্ পরিপাতি .

স এব কাদ্রবেযো ব্যাকরণজ্যোতিষাদিশাস্ত্রণি নির্মিমাণো
বহুভির্মুমুক্ষুভিরুপাস্যমানোঽখিলাং ভুবমেকস্মিন্
শীর্ষ্ণ সিদ্ধার্থবদবধ্রিযমাণঃ সর্বৈর্মুনিভিঃ
সংপ্রার্থ্যমানঃ সহস্রশিখরাণি মেরোঃ
শিরোভিরাবার্যমাণো মহাবায্বহংকারং নিরাচকার .

স এব ভগবান্ ভগবন্তং বহুধা বিপ্রীযমাণঃ অখিলেন স্বেন
রুপেণ যুগে যুগে তেনৈব জযমানঃ স এব সৌমিত্রিরৈক্ষ্বাকঃ
সর্বাণি ধানুষশাস্ত্রাণি সর্বাণ্যস্ত্রশাস্ত্রাণি বহুধা
বিপ্রীযমানো রক্ষাংসি সর্বাণি বিনিঘ্নংশ্চাতুর্বর্ণ্যধর্মান্
প্রবর্তযামাস .

স এব ভগবান্ যুগসংধিকালে শারদাভ্রসংনিকাশো
রৌহিনেযো বাসুদেবঃ সর্বাণি গদাদ্যাযুধশাস্ত্রাণি
ব্যাচক্ষাণো নৈকান্ রাজন্যমণ্ডলান্নিরাচিকীর্ষুঃ
ভুভারমখিলং নিচখান .

স এব ভগবান্ যুগে তুরিযেঽপি ব্রহ্মকুলে জাযমানঃ সর্ব
উপনিষদঃ উদ্দিধীর্ষুঃ সর্বাণি ধর্মশাস্ত্রাণি
বিস্তারযিষ্ণুঃ সর্বানপি জনান্ সংতারযিষ্ণুঃ
সর্বানপি বৈষ্ণবান্ ধর্মান্ বিজৃম্ভযন্
সর্বানপি পাষণ্ডান্ নিচখান .

স এষ জগদন্তর্যামী .

স এষ সর্বাত্মকঃ .

স এব মুমুক্ষুভির্ধ্যেযঃ .

স এব মোক্ষপ্রদঃ .

এতং স্মৃত্বা সর্বেভ্যঃ পাপেভ্যো মুচ্যতে .

তন্নাম সংকীর্তযন্ বিষ্ণুসাযুজ্যং গচ্ছতি .

তদেতদ্ দিবা অধীযানঃ রাত্রিকৃতং পাপং নাশযতি .

নক্তমধীযানো দিবসকৃতং পাপং নাশযতি .

তদেতদ্বেদানাং রহস্যং তদেতদুপনিষদাং রহস্যম্
এতদধীযানঃ সর্বত্রতুফলং লভতে
শান্তিমেতি মনঃশুদ্ধিমেতি সর্বতীর্থফলং লভতে
য এবং বেদ দেহবন্ধাদ্বিমুচ্যতে
ইত্যুপনিষত্ ..

          .. ইতি দ্বিতীযঃ খণ্ডঃ ..

          হরিঃ ॐ তত্সত্

          ॐ ভদ্রং কর্ণেভিরিতি শান্তিঃ

          .. ইতি কৃষ্ণোপনিষত্সমাপ্তা ..

          .. ভারতীরমণমুখ্যপ্রাণংতর্গত শ্রীকৃষ্ণার্পণমস্তু ..