.. ধ্বন্যলোক ৩ ..
এবং ব্যঙ্গ্যমুখেনৈব ধ্বনেঃ প্রদর্শিতে সপ্রভেদে স্বরূপে পুনর্ব্যঞ্জক-
মুখেনৈতত্প্রকাশ্যতে – – –
অবিবক্ষিতবাচ্যস্য পদবাক্যপ্রকাশতা .
তদন্যস্যানুরণনরূপব্যঙ্গ্যস্য চ ধ্বনেঃ .. ১..
অবিবক্ষিতবাচ্যস্যাত্যন্ততিরস্কৃতবাচ্যে প্রভেদে পদপ্রকাশতা যথা
মহর্ষের্ব্যাসস্য – – ‘ সপ্তৈতাঃ সমিধঃ শ্রিযঃ ‘ , যথা বা কালিদাসস্য – – ‘ কঃ
সন্নদ্ধে বিরহবিধুরাং ত্বয্যুপেক্ষেত জাযাম্ ‘ , যথা বা – – ‘ কিমিব হি মধু-
রাণাং মণ্ডনং নাকৃতীনাম্’ , এষূদাহরণেষু ‘ সমিধ ‘ ইতি ‘ সন্নদ্ধ’ ইতি
‘ মধুরাণা’ মিতি চ পদানি ব্যঞ্জকত্বাভিপ্রাযেণৈব কৃতানি .
তস্যৈবার্থান্তরসঙ্ক্রমিতবাচ্যে যথা – – ‘ রামেণ প্রিযজীবিতেন তু কৃতং
প্রেম্ণঃ প্রিযে নোচিতম্’ . অত্র রামেণেত্যেতত্পদং সমসাহসৈকরসত্বাদি-
ব্যঙ্গ্যাভিসঙ্ক্রমিতবাচ্যং ব্যঞ্জকম্ .
যথা বা – – –
এবমেব জনস্তস্যা দদাতি কপোলোপমাযাং শশিবিম্বম্ .
পরমার্থবিচারে পুনশ্চন্দ্রশ্চন্দ্র ইব বরাকঃ ..
অত্র দ্বিতীযশ্চন্দ্রশব্দোঽর্থান্তরসঙ্ক্রমিতবাচ্যঃ .
অবিবক্ষিতবাচ্যস্যাত্যন্ততিরস্কৃতবাচ্যে প্রভেদে বাক্যপ্রকাশতা যথা – – –
যা নিশা সর্বভূতানাং তস্যাং জাগর্তি সংযমী .
যস্যাং জাগ্রতি ভূতানি সা নিশা পশ্যতো মুনেঃ ..
অনেন হি বাক্যেন নিশার্থো ন চ জাগরণার্থঃ কশ্চিদ্বিবক্ষিতঃ .
কিং তর্হি ? তত্ত্বজ্ঞানাবহিতত্বমতত্ত্বপরাঙ্মুখত্বং চ মুনেঃ প্রতিপাদ্যত
ইতি তিরস্কৃতবাচ্যস্যাস্য ব্যঞ্জকত্বম্ .
তস্যৈবার্থান্তরসঙ্ক্রমিতবাচ্যস্য বাক্যপ্রকাশতা যথা – – –
বিষমযিতঃ কেষামপি কেষামপি প্রযাত্যমৃতনির্মাণঃ .
কেষামপি বিষামৃতমযঃ কেষামপ্যবিষামৃতঃ কালঃ ..
অত্র হি বাক্যে বিষামৃতশব্দাভ্যাং দুঃখসুখরূপসঙ্ক্রমিতবাচ্যাভ্যাং
ব্যবহার ইত্যর্থান্তরসঙ্ক্রমিতবাচ্যস্য ব্যঞ্জকত্বম্ .
বিবক্ষিতাভিধেযস্যানুরণনরূপব্যঙ্গ্যস্য শব্দশক্ত্যুদ্ভবে প্রভেদে
পদপ্রকাশতা যথা – – –
প্রাতুং ধনৈরর্থিজনস্য বাঞ্ছাং দৈবেন সৃষ্টো যদি নাম নাস্মি .
পথি প্রসন্নাম্বুধরস্তডাগঃ কূপোঽথবা কিং ন জডঃ কৃতোঽহম্ .. ১..
অত্র হি জড ইতি পদং নির্বিণ্ণেন বক্রাত্মসমানাধিকরণতযা
প্রযুক্তমনুরণনরূপতযা কূপসমানাধিকরণতাং স্বশক্ত্যা প্রতিপদ্যতে .
তস্যৈব বাক্যপ্রকাশতা যথা হর্ষচরিতে সিংহনাদবাক্যেষু – – ‘ বৃত্তেঽ
স্মিন্মহাপ্রলযে ধরণীধারণাযাধুনা ত্বং শেষঃ ‘ .
এতদ্ধি বাক্যমনুরণনরূপমর্থান্তরং শব্দশক্ত্যা স্ফুটমেব প্রকাশযতি .
অস্যৈব কবিপ্রৌঢোক্তিমাত্রনিষ্পন্নশরীরস্যার্থশক্ত্যুদ্ভবে প্রভেদে পদ-
প্রকাশতযা যথা হরিবিজযে – – –
চূতাঙ্কুরাবতংসং ক্ষণপ্রসরমহার্ঘমনোহরসুরামোদম্ .
অসমর্পিতমপি গৃহীতং কুসুমশরেণ মধুমাসলক্ষ্মীমুখম্ ..
অত্র হ্যসমর্পিতমপি কুসুমশরেণ মধুমাসলক্ষ্ম্যা মুখং গৃহীতমিত্য-
সমর্পিতমপীত্যেতদবস্থাভিধাযিপদমর্থশক্ত্যা কুসুস্মশরস্য বলাত্কারং
প্রকাশযতি .
অত্রৈব প্রভেদে বাক্যপ্রকাশতা যথোদাহৃতং প্রাক্ ‘ সজ্জযতি সুরভিমাসো ‘
ইত্যাদি . অত্র সজ্জযতি সুরভিমাসো ন তাবদর্পযত্যনঙ্গায শরানিত্যযং
বাক্যার্থঃ কবিপ্রৌঢোক্তিমাত্রনিষ্পন্নশরীরো মন্মথোন্মাথকদনাবস্থাং
বসন্তসমযস্য সূচযতি .
স্বতঃসম্ভবিশরীরার্থশক্ত্যুদ্ভবে প্রভেদে পদপ্রকাশতা যথা – – –
বাণিজক হস্তিদন্তাঃ কুতোঽস্মাকং ব্যাঘ্রকৃত্তযশ্চ .
যাবল্লুলিতালকমুখী গৃহে পরিষ্বক্কতে স্নুষা ..
অত্র লুলিতালকমুখীত্যেতত্পদং ব্যাধবধ্বাঃ স্বতঃসম্ভাবিতশরী-
রার্থশক্ত্যা সুরতক্রীডাসক্তিং সূচযংস্তদীযস্য ভর্তুঃ সততসম্ভোগ-
ক্ষামতাং প্রকাশযতি .
তস্যৈব বাক্যপ্রকাশতা যথা – – –
শিখিপিচ্ছকর্ণপূরা জাযা ব্যাধস্য গর্বিণী ভ্রমতি .
মুক্তাফলরচিতপ্রসাধনানাং মধ্যে সপত্নীনাম্ ..
অনেনাপি বাক্যেন ব্যাধবধ্বাঃ শিখিপিচ্ছিকর্ণপূরাযা নবপরিণী-
তাযাঃ কস্যাশ্চিত্সৌভাগ্যাতিশযঃ প্রকাশ্যতে . তত্সম্ভোগৈকরতো মযূর-
মাত্রমারণসমর্থঃ পতির্জাত ইত্যর্থপ্রকাশনাত্ তদন্যাসাং চিরপরিণীতানাং
মুক্তাফলরচিতপ্রসাধনানাং দৌর্ভাগ্যাতিশযঃ খ্যাপ্যতে . তত্সসম্ভোগ-
কালে স এব ব্যাধঃ করিবরবধব্যাপারসমর্থ আসীদিত্যর্থপ্রকাশনাত্ .
ননু ধ্বনিঃ কাব্যবিশেষ ইত্যুক্তং তত্কথং তস্য পদপ্রকাশতা .
কাব্যবিশেষো হি বিশিষ্তার্থপ্রতিপত্তিহেতুঃ শব্দসন্দর্ভবিশেষঃ . তদ্ভাবশ্চ
পদপ্রকাশত্বে নোপপদ্যতে . পদানাং স্মারকত্বেনাবাচকত্বাত্ . উচ্যতে – – –
স্যাদেষ দোষঃ যদি বাচকত্বং প্রযোজকং ধ্বনিব্যবহারে স্যাত্ . ন
ত্বেবম্ ; তস্য ব্যঞ্জকত্বেন ব্যবস্থানাত্ . কিং চ কাব্যানাং শরীরা-
ণামিব সংস্থানবিশেষাবচ্ছিন্নসমুদাযসাধ্যাপি চারুত্বপ্রতীতিরন্বয-
ব্যতিরেকাভ্যাং ভাগেষু কল্প্যত ইতি পদানামপি ব্যঞ্জকত্বমুখেন ব্যব-
স্থিতো ধ্বনিব্যবহারো ন বিরোধী .
‘ অনিষ্টস্য শ্রুতির্যদ্বদাপাদযতি দুষ্টতাম্ .
শ্রুতিদুষ্টাদিষু ব্যক্তং তদ্বদিষ্টস্মৃতির্গুণম্ ..
পদানাং স্মারকত্বেঽপি পদমাত্রাবভাসিনঃ .
তেন ধ্বনেঃ প্রভেদেষু সর্বেষ্বেবাস্তি রম্যতা ..
বিচ্ছিত্তিশোভিনৈকেন ভূষণেনেব কামিনী .
পদদ্যোত্যেন সুকবের্ধ্বনিনা ভাতি ভারতী .. ‘
ইতি পরিকরশ্লোকাঃ .. ১..
যস্ত্বলক্ষ্যক্রমব্যঙ্গ্যো ধ্বনির্বর্ণপদাদিষু .
বাক্যে সঙ্ঘটনাযাং চ স প্রবন্ধেঽপি দীপ্যতে .. ২..
তত্র বর্ণানামনর্থকত্বাদ্দ্যোতকত্বমসম্ভবীত্যাশঙ্ক্যেদমুচ্যতে – – –
শষৌ সরেফসংযোগো ঢকারশ্চাপি ভূযসা .
বিরোধিনঃ স্যুঃ শৃঙ্গারে তে ন বর্ণা রসচ্যুতঃ .. ৩..
ত এব তু নিবেশ্যন্তে বীভত্সাদৌ রসে যদা .
তদা তং দীপযন্ত্যেব তে ন বর্ণা রসচ্যুতঃ .. ৪..
শ্লোকদ্বযেনান্বযব্যতিরেকাভ্যাং বর্ণানাং দ্যোতকত্বং দর্শিতং ভবতি .
পদে চালক্ষ্যক্রমব্যঙ্গ্যস্য দ্যোতনং যথা – – –
উত্কম্পিনী ভযপরিস্খলিতাংশুকান্তা
তে লোচনে প্রতিদিশং বিধুরে ক্ষিপন্তী .
ক্রূরেণ দারুণতযা সহসৈব দগ্ধা
ধূমান্ধিতেন দহনেন ন বীক্ষিতাসি ..
অত্র হি তে ইত্যেতত্পদং রসমযত্বেন স্ফুটমেবাবভাসতে সহৃদযানাম্ .
পদাবযবেন দ্যোতনং যথা – – –
ব্রীডাযোগান্নতবদনযা সন্নিধানে গুরূণাং
বদ্ধোত্কম্পং কুচকলশযোর্মন্যুমন্তর্নিগৃহ্য .
তিষ্ঠেত্যুক্তং কিমিব ন তযা যত্সমুত্সৃজ্য বাষ্পং
ময্যাসক্তশ্চকিতহরিণীহারিনেত্রত্রিভাগঃ ..
ইত্যত্র ত্রিভাগশব্দঃ .
বাক্যরূপশ্চালক্ষ্যক্রমব্যঙ্গ্যো ধ্বনিঃ শুদ্ধোঽলঙ্কারসঙ্কীর্ণশ্চেতি
দ্বিধা মতঃ . তত্র শুদ্ধস্যোদাহরণং যথা রামাভ্যুদযে – – – ‘ কৃতক-
কুপিতৈঃ ‘ ইত্যাদি শ্লোকঃ . এতদ্ধি বাক্যং পরস্পরানুরাগং পরিপোষ-
প্রাপ্তং প্রদর্শযত্সর্বত এব পরং রসতত্ত্বং প্রকাশযতি .
অলঙ্কারান্তরসঙ্কীর্ণো যথা – – – ‘ স্মরনবনদীপূরেণোঢাঃ ‘ ইত্যাদিশ্লো-
কঃ . অত্র হি রূপকেণ যথোক্তব্যঞ্জকলক্ষণানুগতেন প্রসাধিতো রসঃ
সুতরামভিব্যজ্যতে .. ৩- ৪..
অলক্ষ্যক্রমব্যঙ্গ্যঃ সঙ্ঘটনাযাং ভাসতে ধ্বনিরিত্যুক্তং তত্র সঙ্ঘটনা-
স্বরূপমেব তাবন্নিরূপ্যতে – – –
অসমাসা সমাসেন মধ্যমেন চ ভূষিতা .
তথা দীর্ঘসমাসেতি ত্রিধা সঙ্ঘটনোদিতা .. ৫..
কৈশ্চিত্ – – – তাং কেবলমনূদ্যেদমুচ্যতে – – –
গুণানাশ্রিত্য তিষ্ঠন্তী মাধুর্যাদীন্ব্যনক্তি সা .
রসান্ – – –
সা সঙ্ঘটনা রসাদীন্ ব্যনক্তি গুণানাশ্রিত্য তিষ্ঠন্তীতি . অত্র
চ বিকল্প্যম্ গুণানাং সঙ্ঘটনাযাশ্চৈক্যং ব্যতিরেকো বা . ব্যতিরেকেঽপি
দ্বযী গতিঃ . গুণাশ্রযা সঙ্ঘটনা , সঙ্ঘটনাশ্রযা বা গুণা ইতি . তত্রৈ-
ক্যপক্ষে সঙ্ঘটনাশ্রযগুণপক্ষে চ গুণানাত্মভূতানাধেযভূতান্বাশ্রিত্য
তিষ্ঠন্তী সঙ্ঘটনা রসাদীন্ ব্যনক্তীত্যযমর্থঃ . যদা তু নানাত্বপক্ষে
গুণাশ্রযসঙ্ঘটনাপক্ষঃ তদা গুণানাশ্রিত্য তিষ্ঠন্তী গুণপরতন্ত্রস্বভাবা
ন তু গুণরূপৈবেত্যর্থঃ . কিং পুনরেবং বিকল্পনস্য প্রযোজনমিতি ?
অভিধীযতে – – – যদি গুণাঃ সঙ্ঘটনা চেত্যেকং তত্ত্বং সঙ্ঘটনাশ্রযা
বা গুণাঃ , তদা সঙ্ঘটনাযা ইব গুণানামনিযতবিষযত্বপ্রসঙ্গঃ . গুণা-
নাং হি মাধুর্যপ্রসাদপ্রকর্ষঃ করুণবিপ্রলম্ভশৃঙ্গারবিষয এব . রৌদ্রাদ্ভু-
তাদিবিষযমোজঃ . মাধুর্যপ্রসাদৌ রসভাবতদাভাসবিষযাবেবেতি বিষয-
নিযমো ব্যবস্থিতঃ , সঙ্ঘটনাযাস্তু স বিঘটতে . তথা হি শৃঙ্গারেঽপি
দীর্ঘসমাসা দৃশ্যতে রৌদ্রাদিষ্বসমাসা চেতি .
তত্র শৃঙ্গারে দীর্ঘসমাসা যথা – – – ‘ মন্দারকুসুমরেণুপিঞ্জরিতালকা’
ইতি. যথা বা – – –
অনবরতনযনজললবনিপতনপরিমুষিতপত্ত্রলেখং তে .
করতলনিষণ্ণমবলে বদনমিদং কং ন তাপযতি ..
ইত্যাদৌ . তথা রৌদ্রাদিষ্বপ্যসমাসা দৃশ্যতে. যথা – – ‘ যো যঃ শস্ত্রং
বিভর্তি স্বভুজগুরুমদঃ’ ইত্যাদৌ . তস্মান্ন সঙ্ঘটনাস্বরূপাঃ , ন চ
সঙ্ঘটনাশ্রযা গুণাঃ .
ননু যদি সঙ্ঘটনা গুণানাং নাশ্রযস্তত্কিমালম্বনা এতে পরি-
কল্প্যন্তাম্ . উচ্যতে – – – প্রতিপাদিতমেবৈষামালম্বনম্ .
তমর্থমবলম্বন্তে যেঽঙ্গিনং তে গুণাঃ স্মৃতাঃ .
অঙ্গাশ্রিতাস্ত্বলঙ্কারা মন্তব্যাঃ কটকাদিবত্ .. ইতি .
অথবা ভবন্তু শব্দাশ্রযা এব গুণাঃ , ন চৈষামনুপ্রাসাদিতুল্য-
ত্বম্ . যস্মাদনুপ্রাসাদযোঽনপেক্ষিতার্থশব্দধর্মা এব প্রতিপাদিতাঃ .
গুণাস্তু ব্যঙ্গ্যবিশেষাবভাসিবাচ্যপ্রতিপাদনসমর্থশব্দধর্মা এব .
শব্দধর্মত্বং চৈষামন্যাশ্রযত্বেঽপি শরীরাশ্রযত্বমিব শৌর্যাদীনাম্ .
ননু যদি শব্দাশ্রযা গুণাস্তত্সঙ্ঘটনারূপত্বং তদাশ্রযত্বং বা তেষাং
প্রাপ্তমেব . ন হ্যসঙ্ঘটিতাঃ শব্দা অর্থবিশেষপ্রতিপাদ্যরসাদ্যাশ্রিতানাং
গুণানামবাচকত্বাদাশ্রযা ভবন্তি . নৈবম্ ; বর্ণপদব্যঙ্গ্যত্বস্য
রসাদীনাং প্রতিপাদিতত্বাত্ .
অভ্যুপগতে বা বাক্যব্যঙ্গ্যত্বে রসাদীনাং ন নিযতা কাচিত্স-
ঙ্ঘটনা তেষামাশ্রযত্বং প্রতিপদ্যত ইত্যনিযতসঙ্ঘটনাঃ শব্দা এব গুণানাং
ব্যঙ্গ্যবিশেষানুগতা আশ্রযাঃ . ননু মাধুর্যে যদি নামৈবমুচ্যতে তদুচ্য-
তাম্ ; ওজসঃ পুনঃ কথমনিযতসঙ্ঘটনশব্দাশ্রযত্বম্ . ন হ্যসমাসা
সঙ্ঘটনা কদাচিদোজস আশ্রযতাং প্রতিপদ্যতে. উচ্যতে – – – যদি ন প্রসি-
দ্ধিমাত্রগ্রহদূষিতং চেতস্তদত্রাপি ন ন ব্রূমঃ . ওজসঃ কথমসমাসা
সঙ্ঘটনা নাশ্রযঃ . যতো রৌদ্রাদীন্ হি প্রকাশযতঃ কাব্যস্য দীপ্তিরোজ
ইতি প্রাক্প্রতিপাদিতম্ . তচ্চৌজো যদ্যসমাসাযামপি সঙ্ঘটনাযাং স্যা-
ত্তত্কো দোষো ভবেত্ . ন চাচারুত্বং সহৃদযহৃদযসংবেদ্যমস্তি . তস্মাদনি-
যতসঙ্ঘটনশব্দাশ্রযত্বে গুণানাং ন কাচিত্ক্ষতিঃ . তেষাং তু চক্ষুরাদী-
নামিব যথাস্বং বিষযনিযমিতস্য স্বরূপস্য ন কদাচিদ্ব্যভিচারঃ .
যত্তূক্তম্ – – – ‘ সঙ্ঘটনাবদ্গুণানামপ্যনিযতবিষযত্বং প্রাপ্নোতি .
লক্ষ্যে ব্যভিচারদর্শনাত্’ ইতি . তত্রাপ্যেতদুচ্যতে – যত্র লক্ষ্যে পরিকল্পিত-
বিষযব্যভিচারস্তদ্বিরূপমেবাস্তু . কথমচারুত্বং তাদৃশে বিষযে সহৃদযানাং
নাবভাতীতি চেত্ ? কবিশক্তিতিরোহিতত্বাত্ . দ্বিবিধো হি দোষঃ – –
কবেরব্যুত্পত্তিকৃতোঽশক্তিকৃতশ্চ . তত্রাব্যুত্পত্তিকৃতো দোষঃ শক্তিতির-
স্কৃতত্বাত্ কদাচিন্ন লক্ষ্যতে . যস্ত্বশক্তিকৃতো দোষঃ স ঝটিতি
প্রতীযতে . পরিকরশ্লোকশ্চাত্র – – –
‘ অব্যুত্পত্তিকৃতো দোষঃ শক্ত্যা সংব্রিযতে কবেঃ .
যস্ত্বশক্তিকৃতস্তস্য স ঝটিত্যবভাসতে .. ‘
তথা হি – – – মহাকবীনামপ্যুত্তমদেবতাবিষযপ্রসিদ্ধসংভোগশৃঙ্গারনিব-
ন্ধনাদ্যনৌচিত্যং শক্তিতিরস্কৃতত্বাত্ গ্রাম্যত্বেন ন প্রতিভাসতে . যথা
কুমারসম্ভবে দেবীসম্ভোগবর্ণনম্ . এবমাদৌ চ বিষযে যথৌচিত্যাঅ-
ত্যাগস্তথা দর্শিতমেবাগ্রে . শক্তিকৃতত্বং চান্বযব্যতিরেকাভ্যামব-
সীযতে . তথা হি শক্তিরহিতেন কবিনা এবংবিধে বিষযে শৃঙ্গার উপনি-
বধ্যমানঃ স্ফুটমেব দোষত্বেন প্রতিভাসতে . নন্বস্মিন্ পক্ষে ‘ যো যঃ
শস্ত্রং বিভর্তি’ ইত্যাদৌ কিমচারুত্বম্ ? অপ্রতীযমানমেবারোপযামঃ .
তস্মাদ্ গুণব্যতিরিক্তত্বে গুণরূপত্বে চ সঙ্ঘটনাযা অন্যঃ
কশ্চিন্নিযমহেতুর্বক্তব্য ইত্যুচ্যতে .
– – – তন্নিযমে হেতুরৌচিত্যং বক্তৃবাচ্যযোঃ .. ৬..
তত্র বক্তা কবিঃ কবিনিবদ্ধো বা, কবিনিবদ্ধশ্চাপি রসভাবরহিতো
রসভাবসমন্বিতো বা , রসোঽপি কথানাযকাশ্রযস্তদ্বিপক্ষাশ্রযো বা,
কথানাযকশ্চ ধীরোদাত্তাদিভেদভিন্নঃ পূর্বস্তদনন্তরো বেতি বিকল্পাঃ .
বাচ্যং চ ধ্বন্যাত্মরসাঙ্গং রসাভাসাঙ্গং বা, অভিনেযার্থমনভিনেযার্থং বা,
উত্তমপ্রকৃত্যাশ্রযং তদিতরাশ্রযং বেতি বহুপ্রকারম্ . তত্র যদা কবিরপগত-
রসভাবো বক্তা তদা রচনাযাঃ কামচারঃ . যদাপি কবিনিবদ্ধো বক্তা
রসভাবরহিতস্তদা স এব; যদা তু কবিঃ কবিনিবদ্ধো বা বক্তা রস-
ভাবসমন্বিতো রসশ্চ প্রধানাশ্রিতত্বাদ্ ধ্বন্যাত্মভূতস্তদা নিযমেনৈব
তত্রাসমাসামধ্যসমাসে এব সঙ্ঘটনে . করুণবিপ্রলম্ভশৃঙ্গারযোস্ত্ব-
সমাসৈব সঙ্ঘটনা . কথমিতি চেত্ ; উচ্যতে – – – রসো যদা প্রাধান্যেন
প্রতিপাদ্যস্তদা তত্প্রতীতৌ ব্যবধাযকা বিরোধিনশ্চ সর্বাত্মনৈব পরি-
হার্যাঃ . এবং চ দীর্ঘসমাসা সঙ্ঘটনা সমাসানামনেকপ্রকারসম্ভাবনযা
কদাচিদ্রসপ্রতীতিং ব্যবদধাতীতি তস্যাং নাত্যন্তমভিনিবেশঃ শোভতে .
বিশেষতোঽভিনেযার্থে কাব্যে, ততোঽন্যত্র চ বিশেষতঃ করুণবিপ্রলম্ভশৃঙ্গা-
রযোঃ . তযোর্হি সুকুমারতরত্বাত্ স্বল্পাযামপ্যস্বচ্ছতাযাং শব্দার্থযোঃ
প্রতীতির্মন্থরীভবতি . রসান্তরে পুনঃ প্রতিপাদ্যে রৌদ্রাদৌ মধ্যমসমাসা
সঙ্ঘটনা কদাচিদ্ধীরোদ্ধতনাযকসম্বন্ধব্যাপারেণ দীর্ঘসমাসাপি
বা তদাক্ষেপাবিনাভাবিরসোচিতবাচ্যাপেক্ষযা ন বিগুণা ভবতীতি সাপি
নাত্যন্তং পরিহার্যা . সর্বাসু চ সঙ্ঘটনাসু প্রসাদাখ্যো গুণো ব্যাপী . স
হি সর্বরসসাধারণঃ সর্বসঙ্ঘটনাসাধারণশ্চেত্যুক্তম্ . প্রসাদাতিক্রমে হ্যস-
মাসাপি সঙ্ঘটনা করুণবিপ্রলম্ভশৃঙ্গারৌ ন ব্যনক্তি . তদপরিত্যাগে চ
মধ্যমসমাসাপি ন ন প্রকাশযতি . তস্মাত্সর্বত্র প্রসাদোঽনুসর্তব্যঃ .
অত এব চ ‘ যো যঃ শস্ত্রং বিভর্তি’ ইত্যাদৌ যদ্যোজসঃ স্থিতির্নেষ্যতে
তত্প্রসাদাখ্য এব গুণো ন মাধুর্যম্ . ন চাচারুত্বম্ ; অভিপ্রেতরস-
প্রকাশনাত্ . তস্মাদ্গুণাব্যতিরিক্তত্বে গুণব্যতিরিক্তত্বে বা সঙ্ঘটনাযা
যথোক্তাদৌচিত্যাদ্বিষযনিযমোঽস্তীতি তস্যা অপি রসব্যঞ্জকত্বম্ .
তস্যাশ্চ রসাভিব্যক্তিনিমিত্তভূতাযা যোঽযমনন্তরোক্তো নিযমহেতুঃ স
এব গুণানাং নিযতো বিষয ইতি গুণাশ্রযেণ ব্যবস্থানমপ্যবিরুদ্ধম্ .
বিষযাশ্রযমপ্যন্যদৌচিত্যং তাং নিযচ্ছতি .
কাব্যপ্রভেদাশ্রযতঃ স্থিতা ভেদবতী হি সা .. ৭..
বক্তৃবাচ্যগতৌচিত্যে সত্যপি বিষযাশ্রযমন্যদৌচিত্যং সঙ্ঘটনাং
নিযচ্ছতি. যতঃ কাব্যস্য প্রভেদা মুক্তকং সংস্কৃতপ্রাকৃতাপভ্রংশ-
নিবদ্ধম্ . সন্দানিতকবিশেষককলাপককুলকানি . পর্যাযবন্ধঃ
পরিকথা খণ্ডকথা- সকলকথে সর্গবন্ধোঽভিনেযার্থমাখ্যাযিকা- কথে
ইত্যেবমাদযঃ . তদাশ্রযেণাপি সঙ্ঘটনা বিশেষবতী ভবতি . তত্র মুক্ত-
কেষু রসবন্ধাভিনিবেশিনঃ কবেস্তদাশ্রযমৌচিত্যম্ . তচ্চ দর্শিতমেব .
অন্যত্র কামচারঃ .
মুক্তকেষু প্রবন্ধেষ্বিব রসবন্ধাভিনিবেশিনঃ কবযো দৃশ্যন্তে. যথা
হ্যমরুকস্য কবের্মুক্তকাঃ শৃঙ্গাররসস্যন্দিনঃ প্রবন্ধাযমানাঃ প্রসিদ্ধা
এব . সন্দানিতকাদিষু তু বিকটনিবন্ধনৌচিত্যান্মধ্যমসমাসাদীর্ঘ-
সমাসে এব রচনে . প্রবন্ধাশ্রযেষু যথোক্তপ্রবন্ধৌচিত্যমেবানুসর্তব্যম্ .
পর্যাযবন্ধে পুনরসমাসামধ্যমসমাসে এব সঙ্ঘটনে . কদাচিদর্থৌচিত্যা-
শ্রযেণ দীর্ঘসমাসাযামপি সঙ্ঘটনাযাং পরুষা গ্রাম্যা চ বৃত্তিঃ পরি-
হর্তব্যা . পরিকথাযাং কামচারঃ, তত্রেতিবৃত্তমাত্রোপন্যাসেন নাত্যন্তং
রসবন্ধাভিনিবেশাত্ . খণ্ডকথাসকলকথযোস্তু প্রাকৃতপ্রসিদ্ধযোঃ কুলকা-
দিনিবন্ধনভূযস্ত্বাদ্দীর্ঘসমাসাযামপি ন বিরোধঃ . বৃত্ত্যৌচিত্যং তু যথা-
রসমনুসর্তব্যম্ . সর্গবন্ধে তু রসতাত্পর্যে যথারসমৌচিত্যমন্যথা তু
কামচারঃ, দ্বযোরপি মার্গযোঃ সর্গবন্ধবিধাযিনাং দর্শনাদ্রসতাত্পর্যং
সাধীযঃ . অভিনেযার্থে তু সর্বথা রসবন্ধেঽভিনিবেশঃ কার্যঃ . আখ্যা-
যিকাকথযোস্তু গদ্যনিবন্ধনবাহুল্যাদ্গদ্যে চ ছন্দোবন্ধভিন্নপ্রস্থান-
ত্বাদিহ নিযমে হেতুরকৃতপূর্বোঽপি মনাক্ক্রিযতে .. ৭..
এতদ্যথোক্তমৌচিত্যমেব তস্যা নিযামকম্ .
সর্বত্র গদ্যবন্ধেঽপি ছন্দোনিযমবর্জিতে .. ৮..
যদেতদৌচিত্যং বক্তৃবাচ্যগতং সঙ্ঘটনাযা নিযামকমুক্তমেতদেব
গদ্যে ছন্দোনিযমবর্জিতেঽপি বিষযাপেক্ষং নিযমহেতুঃ . তথা হ্যত্রাপি যদা
কবিঃ কবিনিবদ্ধো বা বক্তা রসভাবরহিতস্তদা কামচারঃ . রসভাব-
সমন্বিতে তু বক্তরি পূর্বোক্তমেবানুসর্তব্যম্ . তত্রাপি চ বিষযৌচিত্য-
মেব . আখ্যাযিকাযাং তু ভূম্না মধ্যমসমাসাদীর্ঘসমাসে এব সঙ্ঘটনে .
গদ্যস্য বিকটবন্ধাশ্রযেণ ছাযাবত্ত্বাত্ . তত্র চ তস্য প্রকৃষ্যমাণ-
ত্বাত্ . কথাযাং তু বিকটবন্ধপ্রাচুর্যেঽপি গদ্যস্য রসবন্ধোক্তমৌচিত্য-
মনুসর্তব্যম্ .. ৮..
রসবন্ধোক্তমৌচিত্যং ভাতি সর্বত্র সংশ্রিতা .
রচনা বিষযাপেক্ষং তত্তু কিঞ্চিদ্বিভেদবত্ .. ৯..
অথবা পদ্যবদ্গদ্যবন্ধেঽপি রসবন্ধোক্তমৌচিত্যং সর্বত্র সংশ্রিতা রচনা
ভবতি . তত্তু বিষযাপেক্ষং কিঞ্চিদ্বিশেষবদ্ভবতি, ন তু সর্বাকারম্ . তথা
হি গদ্যবন্ধেঽপ্যতিদীর্ঘসমাসা রচনা ন বিপ্রলম্ভশৃঙ্গারকরুণযোরাখ্যা-
যিকাযামপি শোভতে . নাটকাদাবপ্যসমাসৈব ন রৌদ্রবীরাদিবর্ণনে .
বিষযাপেক্ষং ত্বৌচিত্যং প্রমাণতোঽপকৃষ্যতে প্রকৃষ্যতে চ . তথা হ্যাখ্যাযি-
কাযাং নাত্যন্তমসমাসা স্ববিষযেঽপি নাটকাদৌ নাতিদীর্ঘসমাসা চেতি
সঙ্ঘটনাযা দিগনুসর্তব্যা .. ৯..
ইদানীমলক্ষ্যক্রমব্যঙ্গ্যো ধ্বনিঃ প্রবন্ধাত্মা রামাযণমহাভার-
তাদৌ প্রকাশমানঃ প্রসিদ্ধ এব . তস্য তু যথা প্রকাশনং তত্প্রতিপাদ্যতে – –
বিভাবভাবানুভাবসঞ্চার্যৌচিত্যচারুণঃ .
বিধিঃ কথাশরীরস্য বৃত্তস্যোত্প্রেক্ষিতস্য বা .. ১০..
ইতিবৃত্তবশাযাতাং ত্যক্ত্বাঽননুগুণাং স্থিতিম্ .
উত্প্রেক্ষ্যাঽপ্যন্তরাভীষ্টরসোচিতকথোন্নযঃ .. ১১..
সন্ধিসন্ধ্যঙ্গঘটনং রসাভিব্যক্ত্যপেক্ষযা .
ন তু কেবলযা শাস্ত্রস্থিতিসম্পাদনেচ্ছযা .. ১২..
উদ্দীপনপ্রশমনে যথাবসরমন্তরা .
রসস্যারব্ধবিশ্রান্তেরনুসন্ধানমঙ্গিনঃ .. ১৩..
অলঙ্কৃতীনাং শক্তাবপ্যানুরূপ্যেণ যোজনম্ .
প্রবন্ধস্য রসাদীনাং ব্যঞ্জকত্বে নিবন্ধনম্ .. ১৪..
প্রবন্ধোঽপি রসাদীনাং ব্যঞ্জক ইত্যুক্তং তস্য ব্যঞ্জকত্বে নিবন্ধ-
নম্ . প্রথমং তাবদ্বিভাবভাবানুভাবসঞ্চার্যৌচিত্যচারুণঃ কথাশরীরস্য
বিধির্যথাযথং প্রতিপিপাদযিষিতরসভাবাদ্যপেক্ষযা য উচিতো বিভাবো
ভাবোঽনুভাবঃ সঞ্চারী বা তদৌচিত্যচারুণঃ কথাশরীরস্য বিধির্ব্য-
ঞ্জকত্বে নিবন্ধনমেকম্ . তত্র বিভাবৌচিত্যং তাবত্প্রসিদ্ধম্ . ভাবৌচি-
ত্যং তু প্রকৃত্যৌচিত্যাত্ . প্রকৃতির্হ্যুত্তমমধ্যমাধমভাবেন দিব্যমানুষাদি-
ভাবেন চ বিভেদিনী . তাং যথাযথমনুসৃত্যাসঙ্কীর্ণঃ স্থাযী ভাব
উপনিবধ্যমান ঔচিত্যভাগ্ ভবতি . অন্যথা তু কেবলমানুষাশ্রযেণ
দিব্যস্য কেবলদিব্যাশ্রযেণ বা কেবলমানুষস্যোত্সাহাদয উপনিবধ্য-
মানা অনুচিতা ভবন্তি . তথা চ কেবলমানুষস্য রাজাদের্বর্ণনে সপ্তা-
র্ণবলঙ্ঘনাদিলক্ষণা ব্যাপারা উপনিবধ্যমানা সৌষ্ঠবভৃতোঽপি নীরসা
এব নিযমেন ভবন্তি, তত্র ত্বনৌচিত্যমেব হেতুঃ .
ননু নাগলোকগমনাদযঃ সাতবাহনপ্রভৃতীনাং শ্রূযন্তে, তদলো-
কসামান্যপ্রভাবাতিশযবর্ণনে কিমনৌচিত্যং সর্বোর্বীভরণক্ষমাণাং ক্ষমা-
ভুজামিতি . ন তদস্তি ; ন বযং ব্রূমো যত্প্রভাবাতিশযবর্ণনমনুচিতং
রাজ্ঞাম্, কিং তু কেবলমানুষাশ্রযেণ যোত্পাদ্যবস্তুকথা ক্রিযতে তস্যাং
দিব্যমৌচিত্যং ন যোজনীযম্ . দিব্যমানুষ্যাযাং তু কথাযামুভযৌচিত্য-
যোজনমবিরুদ্ধমেব . যথা পাণ্ড্বাদিকথাযাম্ . সাতবাহনাদিষু তু যেষু
যাবদপদানং শ্রূযতে তেষু তাবন্মাত্রমনুগম্যমানমনুগুণত্বেন প্রতিভাসতে .
ব্যতিরিক্তং তু তেষামেবোপনিবধ্যমানমনুচিতম্ . তদযমত্র পরমার্থঃ – – –
অনৌচিত্যাদৃতে নান্যদ্রসভন্গস্য কারণম্ .
প্রসিদ্ধৌচিত্যবন্ধস্তু রসস্যোপনিষত্পরা ..
অত এব চ ভরতে প্রখ্যাতবস্তুবিষযত্বং প্রখ্যাতোদাত্তনাযকত্বং
চ নাটকস্যাবশ্যকর্তব্যতযোপন্যস্তম্ . তেন হি নাযকৌচিত্যানৌচি-
ত্যবিষযে কবির্ন ব্যামুহ্যতি . যস্তূত্পাদ্যবস্তু নাটকাদি কুর্যাত্তস্যাপ্র-
সিদ্ধানুচিতনাযকস্বভাববর্ণনে মহান্ প্রমাদঃ .
ননু যদ্যুত্সাহাদিভাববর্ণনে কথঞ্চিদ্দিব্যমানুষ্যাদ্যৌচিত্যপরীক্ষা
ক্রিযতে তত্ক্রিযতাম্, রত্যাদৌ তু কিং তযা প্রযোজনম্ ? রতির্হি ভারত-
বর্ষোচিতেনৈব ব্যবহারেণ দিব্যানামপি বর্ণনীযেতি স্থিতিঃ . নৈবম্ ;
তত্রৌচিত্যাতিক্রমেণ সুতরাং দোষঃ . তথা হ্যধমপ্রকৃত্যৌচিত্যেনোত্তম-
প্রকৃতেঃ শৃঙ্গারোপনিবন্ধনে কা ভবেন্নোপহাস্যতা . ত্রিবিধং প্রকৃত্যৌচি-
ত্যং ভারতে বর্ষেঽপ্যস্তি শৃঙ্গারবিষযম্ . যত্তি দিব্যমৌচিত্যং তত্তত্রানুপ-
কারকমেবেতি চেত্ – – – ন বযং দিব্যমৌচিত্যং শৃঙ্গারবিষযমন্যত্কিঞ্চিদ্-
ব্রূমঃ . কিং তর্হি ? ভারতবর্ষবিষযে যথোত্তমনাযকেষু রাজাদিষু শৃঙ্গা-
রোপনিবন্ধস্তথা দিব্যাশ্রযোঽপি শোভতে . ন চ রাজাদিষু প্রসিদ্ধ-
গ্রাম্যশৃঙ্গারোপনিবন্ধনং প্রসিদ্ধং নাটকাদৌ, তথৈব দেবেষু তত্পরিহর্তব্যম্ .
নাটকাদেরভিনেযার্থত্বাদভিনযস্য চ সম্ভোগশৃঙ্গারবিষযস্যা-
সভ্যত্বাত্তত্র পরিহার ইতি চেত্ – – – ন; যদ্যভিনযস্যৈবংবিষযস্যাসভ্যতা
তত্কাব্যস্যৈবংবিষযস্য সা কেন নিবার্যতে ? তস্মাদভিনেযার্থেঽনভিনেযার্থে
বা কাব্যে যদুত্তমপ্রকৃতে রাজাদেরুত্তমপ্রকৃতিভির্নাযিকাভিঃ সহ গ্রাম্য-
সম্ভোগবর্ণনং তত্পিত্রোঃ সম্ভোগবর্ণনমিব সুতরামসভ্যম্ . তথৈবো-
ত্তমদেবতাদিবিষযম্ .
ন চ সম্ভোগশৃঙ্গারস্য সুরতলক্ষণ এবৈকঃ প্রকারঃ, যাবদন্যে-
ঽপি প্রভেদাঃ পরস্পরপ্রেমদর্শনাদযঃ সম্ভবন্তি, তে কস্মাদুত্তমপ্রকৃতি-
বিষযে ন বর্ণ্যন্তে ? তস্মাদুত্সাহবদ্রতাবপি প্রকৃত্যৌচিত্যমনুসর্তব্যম্ .
তথৈব বিস্মযাদিষু. যত্ত্বেবংবিধে বিষযে মহাকবীনামপ্যসমীক্ষ্যকারিতা
লক্ষ্যে দৃশ্যতে স দোষ এব . স তু শক্তিতিরস্কৃতত্বাত্তেষাং ন লক্ষ্যত
ইত্যুক্তমেব . অনুভাবৌচিত্যং তু ভরতাদৌ প্রসিদ্ধমেব.
ইযত্তূচ্যতে – – ভরতাদিবিরচিতাং স্থিতিং চানুবর্তমানেন মহাকবি-
প্রবন্ধাংশ্চ পর্যালোচযতা স্বপ্রতিভাং চানুসরতা কবিনাবহিতচেতসা
ভূত্বা বিভাবাদ্যৌচিত্যভ্রংশপরিত্যাগে পরঃ প্রযত্নো বিধেযঃ . ঔচি-
ত্যবতঃ কথাশরীরস্য বৃত্তস্যোত্প্রেক্ষিতস্য বা গ্রহো ব্যঞ্জক ইত্যনেনৈতত্
প্রতিপাদযতি – – – যদিতিহাসাদিষু কথাসু রসবতীষু বিবিধাসু সতী-
ষ্বপি যত্তত্র বিভাবাদ্যৌচিত্যবত্কথাশরীরং তদেব গ্রাহ্যং নেতরত্ . বৃত্তা-
দপি চ কথাশরীরাদুত্প্রেক্ষিতে বিশেষতঃ প্রযত্নবতা ভবিতব্যম্ . তত্র
হ্যনবধানাত্স্খলতঃ কবেরব্যুত্পত্তিসম্ভাবনা মহতী ভবতি .
পরিকরশ্লোকশ্চাত্র – – –
কথাশরীরমুত্পাদ্যবস্তু কার্যং তথা তথা .
যথা রসমযং সর্বমেব তত্প্রতিভাসতে ..
তত্র চাভ্যুপাযঃ সম্যগ্বিভাবাদ্যৌচিত্যানুসরণম্ . তচ্চ দর্শি-
তমেব . কিঞ্চ – – –
সন্তি সিদ্ধরসপ্রখ্যা যে চ রামাযণাদযঃ .
কথাশ্রযা ন তৈর্যোজ্যা স্বেচ্ছা রসবিরোধিনী ..
তেষু হি কথাশ্রযেষু তাবত্স্বেচ্ছৈব ন যোজ্যা . যদুক্তম্ – – – ‘ কথা-
মার্গে ন চাল্পোঽপ্যতিক্রমঃ’ . স্বেচ্ছাপি যদি যোজ্যা তদ্রসবিরোধিনী
ন যোজ্যা .
ইদমরং প্রবন্ধস্য রসাভিব্যঞ্জকত্বে নিবন্ধনম্ . ইতিবৃত্তবশা-
যাতাং কথঞ্চিদ্রসাননুগুণাং স্থিতিং ত্যক্ত্বা পুনরুত্প্রেক্ষ্যাপ্যন্তরাভীষ্ট-
রসোচিতকথোন্নযো বিধেযঃ যথা কালিদাসপ্রবন্ধেষু . যথা চ সর্ব-
সেনবিরচিতে হরিবিজযে . যথা চ মদীয এবার্জুনচরিতে মহাকাব্যে .
কবিনা কাব্যমুপনিবধ্নতা সর্বাত্মনা রসপরতন্ত্রেণ ভবিতব্যম্ . তত্রে-
তিবৃত্তে যদি রসাননুগুণাং স্থিতিং পশ্যেত্তদেমাং ভঙ্ক্ত্বাপি স্বতন্ত্রতযা
রসানুগুণং কথান্তরমুত্পাদযেত্ . ন হি কবেরিতিবৃত্তমাত্রনির্বহণেন
কিঞ্চিত্প্রযোজনম্, ইতিহাসাদেব তত্সিদ্ধেঃ .
রসাদিব্যঞ্জকত্বে প্রবন্ধস্য চেদমন্যন্মুখ্যং নিবন্ধনম্, যত্সন্ধীনাং
মুখপ্রতিমুখগর্ভাবমর্শনির্বহণাখ্যানাং তদঙ্গানাং চোপক্ষেপাদীনাং ঘটনং
রসাভিব্যক্ত্যপেক্ষযা, যথা রত্নাবল্যাম্; ন তু কেবলং শাস্ত্রস্থিতি-
সম্পাদনেচ্ছযা . যথা বেণীসংহারে বিলাসাখ্যস্য প্রতিমুখসন্ধ্যঙ্গ-
স্য প্রকৃতরসনিবন্ধাননুগুণমপি দ্বিতীযেঽঙ্কে ভরতমতানুসরণমাত্রেচ্ছযা
ঘটনম্ .
ইদং চাপরং প্রবন্ধস্য রসব্যঞ্জকত্বে নিমিত্তং যদুদ্দীপনপ্রশমনে
যথাবসরমন্তরা রসস্য, যথা রত্নাবল্যামেব . পুনরারব্ধবিশ্রান্তে রস-
স্যাঙ্গিনোঽনুসন্ধিশ্চ . যথা তাপসবত্সরাজে . প্রবন্ধবিশেষস্য নাট-
কাদে রসব্যক্তিনিমিত্তমিদং চাপরমবগন্তব্যং যদলঙ্কৃতীনাং শক্তাবপ্যা-
নুরূপ্যেণ যোজনম্ . শক্তো হি কবিঃ কদাচিদলঙ্কারনিবন্ধনে তদা-
ক্ষিপ্ততযৈবানপেক্ষিতরসবন্ধঃ প্রবন্ধমারভতে তদুপদেশার্থমিদমুক্তম্ .
দৃশ্যন্তে চ কবযোঽলঙ্কারনিবন্ধনৈকরসা অনপেক্ষিতরসাঃ প্রবন্ধেষু .
কিঞ্চ – – –
অনুস্বানোপমাত্মাপি প্রভেদো য উদাহৃতঃ .
ধ্বনেরস্য প্রবন্ধেষু ভাসতে সোঽপি কেষুচিত্ .. ১৫..
অস্য বিবক্ষিতান্যপরবাচ্যস্য ধ্বনেরনুরণনরূপব্যঙ্গ্যোঽপি যঃ
প্রভেদ উদাহৃতো দ্বিপ্রকারঃ সোঽপি প্রবন্ধেষু কেষুচিদ্দ্যোততে . তদ্যথা
মধুমথনবিজযে পাঞ্চজন্যোক্তিষু . যথা বা মমৈব কামদেবস্য সহ-
চরসমাগমে বিষমবাণলীলাযাম্ . যথা চ গৃধ্রগোমাযুসংবাদাদৌ মহা-
ভারতে .. ১৫..
সুপ্তিঙ্বচনসম্বন্ধৈস্তথা কারকশক্তিভিঃ .
কৃত্তদ্ধিতসমাসৈশ্চ দ্যোত্যোঽলক্ষ্যক্রমঃ ক্বচিত্ .. ১৬..
অলক্ষ্যক্রমো ধ্বনেরাত্মা রসাদিঃ সুব্বিশেষৈস্তিঙ্বিশেষৈর্বচনবিশে-
ষৈঃ সম্বন্ধবিশেষৈঃ কারকশক্তিভিঃ কৃদ্বিশেষৈস্তদ্ধিতবিশেষৈঃ সমাসৈশ্চেতি .
চশব্দান্নিপাতোপসর্গকালাদিভিঃ প্রযুক্তৈরভিব্যজ্যমানো দৃশ্যতে .
যথা – – –
ন্যক্কারো হ্যযমেব মে যদরযস্তত্রাপ্যসৌ তাপসঃ
সোঽপ্যত্রৈব নিহন্তি রাক্ষসকুলং জীবত্যহো রাবণঃ .
ধিগ্ধিক্ছক্রজিতং প্রবোধিতবতা কিং কুম্ভকর্ণেন বা
স্বর্গগ্রামটিকাবিলুণ্ঠনবৃথোচ্ছূনৈঃ কিমেভির্ভুজৈঃ ..
অত্র হি শ্লোকে ভূযসা সর্বেষামপ্যেষাং স্ফুটমেব ব্যঞ্জকত্বং দৃশ্য-
তে . তত্র ‘ মে যদরযঃ’ ইত্যনেন সুপ্সম্বন্ধবচনানামভিব্যঞ্জকত্বম্ .
‘ তত্রাপ্যসৌ তাপসঃ’ ইত্যত্র তদ্ধিতনিপাতযোঃ . ‘ সোঽপ্যত্রৈব নিহন্তি
রাক্ষসকুলং জীবত্যহো রাবণঃ’ ইত্যত্র তিঙ্কারকশক্তীনাম্ . ‘ ধিগ্ধি
ক্ছক্রজিতম্’ ইত্যাদৌ শ্লোকার্ধে কৃত্তদ্ধিতসমাসোপসর্গাণাম্ . এবংবি-
ধস্য ব্যঞ্জকভূযস্ত্বে চ ঘটমানে কাব্যস্য সর্বাতিশাযিনী বন্ধ-
চ্ছাযা সমুন্মীলতি . যত্র হি ব্যঙ্গ্যাবভাসিনঃ পদস্যৈকস্যৈব তাব-
দাবির্ভাবস্তত্রাপি কাব্যে কাপি বন্ধচ্ছাযা কিমুত যত্র তেষাং বহূনাং
সমবাযঃ . যথাত্রানন্তরোদিতশ্লোকে . অত্র হি রাবণ ইত্যস্মিন্ পদে-
ঽর্থান্তরসংক্রমিতবাচ্যেন ধ্বনিপ্রভেদেনালঙ্কৃতেঽপি পুনরনন্তরোক্তানাং
ব্যঞ্জকপ্রকারাণামুদ্ভাসনম্ . দৃশ্যন্তে চ মহাত্মনাং প্রতিভাবিশেষভা-
জাং বাহুল্যেনৈবংবিধা বন্ধপ্রকারাঃ .
যথা মহর্ষের্ব্যাসস্য – – –
অতিক্রান্তসুখাঃ কালাঃ প্রত্যুপস্থিতদারুণাঃ .
শ্বঃ শ্বঃ পাপীযদিবসা পৃথিবী গতযৌবনা ..
অত্র হি কৃত্তদ্ধিতবচনৈরলক্ষ্যক্রমব্যঙ্গ্যঃ, ‘ পৃথিবী গতযৌবনা’
ইত্যনেন চাত্যন্ততিরস্কৃতবাচ্যো ধ্বনিঃ প্রকাশিতঃ .
এষাং চ সুবাদীনামেকৈকশঃ সমুদিতানাং চ ব্যঞ্জকত্বং মহাকবী-
নাং প্রবন্ধেষু প্রাযেণ দৃশ্যতে . সুবন্তস্য ব্যঞ্জকত্বং যথা – – –
তালৈঃ শিঞ্জদ্বলযসুভগৈঃ কান্তযা নর্তিতো মে .
যামধ্যাস্তে দিবসবিগমে নীলকণ্ঠঃ সুহৃদ্বঃ ..
তিঙন্তস্য যথা – – –
অপসর রোদিতুমেব নির্মিতে মা পুংসয হতে অক্ষিণী মে .
দর্শনমাত্রোন্মত্তাভ্যাং যাভ্যাং তব হৃদযমেবংরূপং ন জ্ঞাতম্ ..
যথা বা – – –
মা পন্থানং রুধঃ অপেহি বালক অপ্রৌঢ অহো অসি অহ্রীকঃ .
বযং পরতন্ত্রা যতঃ শূন্যগৃহং মামকং রক্ষণীযং বর্ততে ..
সম্বন্ধস্য যথা – – –
অনযত্র ব্রজ বালক স্নান্তীং কিং মাং প্রলোকযস্যেতত্ .
ভো জাযাভীরুকাণাং তটমেব ন ভবতি ..
কৃতকপ্রযোগেষু প্রাকৃতেষু তদ্ধিতবিষযে ব্যঞ্জকত্বমাবেদ্যত এব .
অবজ্ঞাতিশযে কঃ . সমাসানাং চ বৃত্ত্যৌচিত্যেন বিনিযোজনে . নিপা-
তানাং ব্যঞ্জকত্বং যথা – – –
অযমেকপদে তযা বিযোগঃ প্রিযযা চোপনতঃ সুদুঃসহো মে .
নববারিধরোদযাদহোভির্ভবিতব্যং চ নিরাতপার্ধরম্যৈঃ ..
ইত্যত্র চশব্দঃ . যথা বা
মুহুরঙ্গুলিসংবৃতাধরৌষ্ঠং প্রতিষেধাক্ষরবিক্লবাভিরামম্ .
মুখমংসবিবর্তি পক্ষ্মলাক্ষ্যাঃ কথমপ্যুন্নমিতং ন চুম্বিতং তু ..
অত্র তুশব্দঃ . নিপাতানাং প্রসিদ্ধমপীহ দ্যোতকত্বং রসাপেক্ষযোক্ত-
মিতি দ্রষ্টব্যম্ . উপসর্গাণাং ব্যঞ্জকত্বং যথা – – –
নীবারাঃ শুকগর্ভকোটরমুখভ্রষ্টাস্তরূণামধঃ
প্রস্নিগ্ধাঃ ক্বচিদিঙ্গুদীফলভিদঃ সূচ্যন্ত এবোপলাঃ .
বিশ্বাসোপগমাদভিন্নগতযঃ শব্দং সহন্তে মৃগা-
স্তোযাধারপথাশ্চ বল্কলশিখানিষ্যন্দলেখাঙ্কিতাঃ ..
ইত্যাদৌ . দ্বিত্রাণাং চোপসর্গাণামেকত্র পদে যঃ প্রযোগঃ সোঽপি
রসব্যক্ত্যনুগুণতযৈব নির্দোষঃ . যথা – – ‘ প্রভ্রশ্যত্যুত্তরীযত্বিষি
তমসি সমুদ্বীক্ষ্য বীতাবৃতীন্দ্রাগ্জন্তূন্’ ইত্যাদৌ . যথা বা – – –
‘ মনুষ্যবৃত্ত্যা সমুপাচরন্তম্’ ইত্যাদৌ .
নিপাতানামপি তথৈব . যথা – – – ‘ অহো বতাসি স্পৃহণীযবীর্যঃ’
ইত্যাদৌ . যথা বা – – –
যে জীবন্তি ন মান্তি যে স্ম বপুষি প্রীত্যা প্রনৃত্যন্তি চ
প্রস্যন্দিপ্রমদাশ্রবঃ পুলকিতা দৃষ্টে গুণিন্যূর্জিতে .
হা ধিক্কষ্টমহো ক্ব যামি শরণং তেষাং জনানাং কৃতে
নীতানাং প্রলযং শঠেন বিধিনা সাধুদ্বিষঃ পুষ্যতা .
ইত্যাদৌ .
পদপৌনরুক্ত্যং চ ব্যঞ্জকত্বাপেক্ষযৈব কদাচিত্প্রযুজ্যমানং শোভা-
মাবহতি . যথা – – –
যদ্বঞ্চনাহিতমতির্বহুচাটুগর্ভং
কার্যোন্মুখঃ খলজনঃ কৃতকং ব্রবীতি .
তত্সাধবো ন ন বিদন্তি বিদন্তি কিন্তু
কর্তুং বৃথাপ্রণযমস্য ন পারযন্তি .
ইত্যাদৌ .
কালস্য ব্যঞ্জকত্বং যথা – – –
সমবিষমনির্বিশেষাঃ সমন্ততো মন্দমন্দসঞ্চারাঃ .
অচিরাদ্ভবিষ্যন্তি পন্থানো মনোরথানামপি দুর্লঙ্ঘ্যাঃ ..
অত্র হ্যচিরাদ্ভবিষ্যন্তি পন্থান ইত্যত্র ভবিষ্যন্তীত্যস্মিন্ পদে
প্রত্যযঃ কালবিশেষাভিধাযী রসপরিপোষহেতুঃ প্রকাশতে . অযং হি
গাথার্থঃ প্রবাসবিপ্রলম্ভশৃঙ্গারবিভাবতযা বিভাব্যমানো রসবান্ .
যথাত্র প্রত্যযাংশো ব্যঞ্জকস্তথা ক্বচিত্প্রকৃত্যংশোঽপি দৃশ্যতে . যথা – – –
তদ্গেহং নতভিত্তি মন্দিরমিদং লব্ধাবগাহং দিবঃ
সা ধেনুর্জরতী চরন্তি করিণামেতা ঘনাভা ঘটাঃ .
স ক্ষুদ্রো মুসলধ্বনিঃ কলমিদং সঙ্গীতকং যোষিতা-
মাশ্চর্যং দিবসৈর্দ্বিজোঽযমিযতীং ভূমিং সমারোপিতঃ ..
অত্র শ্লোকে দিবসৈরিত্যস্মিন্ পদে প্রকৃত্যংশোঽপি দ্যোতকঃ . সর্ব-
নাম্নাং চ ব্যঞ্জকত্বং যথানন্তরোক্তে শ্লোকে . অত্র চ সর্বনাম্নামেব
ব্যঞ্জকত্বং হৃদি ব্যবস্থাপ্য কবিনা ক্বেত্যাদিশব্দপ্রযোগো ন কৃতঃ .
অনযা দিশা সহৃদযৈরন্যেঽপি ব্যঞ্জকবিশেষাঃ স্বযমুত্প্রেক্ষণীযাঃ . এত-
চ্চ সর্বং পদবাক্যরচনাদ্যোতনোক্ত্যৈব গতার্থমপি বৈচিত্র্যেণ ব্যুত্পত্তযে
পুনরুক্তম্ .
ননু চার্থসামর্থ্যাক্ষেপ্যা রসাদয ইত্যুক্তম্, তথা চ সুবাদীনাং
ব্যঞ্জকত্ববৈচিত্র্যকথনমনন্বিতমেব . উক্তমত্র পদানাং ব্যঞ্জকত্বো-
ক্ত্যবসরে . কিঞ্চার্থবিশেষাক্ষেপ্যত্বেঽপি রসাদীনাং তেষামর্থবিশেষাণাং ব্য-
ঞ্জকশব্দাবিনাভাবিত্বাদ্যথাপ্রদর্শিতং ব্যঞ্জকস্বরূপপরিজ্ঞানং বিভজ্যো-
পযুজ্যত এব . শব্দবিশেষাণাং চান্যত্র চ চারুত্বং যদ্বিভাগেনোপদর্শিতং
তদপি তেষাং ব্যঞ্জকত্বেনৈবাবস্থিতমিত্যবগন্তব্যম্ .
যত্রাপি তত্সম্প্রতি ন প্রতিভাসতে তত্রাপি ব্যঞ্জকে রচনান্তরে
যদ্ দৃষ্টং সৌষ্ঠবং তেষাং প্রবাহপতিতানাং তদেবাভ্যাসাদপোদ্ধৃতানামপ্যব-
ভাসত ইত্যবসাতব্যম্ . কোঽন্যথা তুল্যে বাচকত্বে শব্দানাং চারুত্ব-
বিষযো বিশেষঃ স্যাত্ .
অন্য এবাসৌ সহৃদযসংবেদ্য ইতি চেত্, কিমিদং সহৃদযত্বং
নাম ? কিং রসভাবানপেক্ষকাব্যাশ্রিতসমযবিশেষাভিজ্ঞত্বম্, উত
রসভাবাদিমযকাব্যস্বরূপপরিজ্ঞাননৈপুণ্যম্ . পূর্বস্মিন্ পক্ষে তথা-
বিধসহৃদযব্যবস্থাপিতানাং শব্দবিশেষাণাং চারুত্বনিযমো ন স্যাত্ .
পুনঃ সমযান্তরেণান্যথাপি ব্যবস্থাপনসম্ভবাত্ . দ্বিতীযস্মিংস্তু পক্ষে
রসজ্ঞতৈব সহৃদযত্বমিতি . তথাবিধৈঃ সহৃদযৈঃ সংবেদ্যো রসাদিসমর্পণ-
সামর্থ্যমেব নৈসর্গিকং শব্দানাং বিশেষ ইতি ব্যঞ্জকত্বাশ্রয্যেব তেষাং
মুখ্যং চারুত্বম্ . বাচকত্বাশ্রযাণান্তু প্রসাদ এবার্থাপেক্ষাযাং তেষাং
বিশেষঃ . অর্থানপেক্ষাযাং ত্বনুপ্রাসাদিরেব .. ১৫- ১৬..
এবং রসাদীনাং ব্যঞ্জকস্বরূপমভিধায তেষামেব বিরোধিরূপং লক্ষ-
যিতুমিদমুপক্রম্যতে – – –
প্রবন্ধে মুক্তকে বাপি রসাদীন্বন্দ্ধুমিচ্ছতা .
যত্নঃ কার্যঃ সুমতিনা পরিহারে বিরোধিনাম্ .. ১৭..
প্রবন্ধে মুক্তকে বাপি রসভাবনিবন্ধনং প্রত্যাদৃতমনাঃ কবির্বিরো-
ধিপরিহারে পরং যত্নমাদধীত . অন্যথা ত্বস্য রসমযঃ শ্লোক একোঽপি
সম্যঙ্ন সম্পদ্যতে .. ১৭..
কানি পুনস্তানি বিরোধীনি যানি যত্নতঃ কবেঃ পরিহর্তব্যানীত্যুচ্যতে – – –
বিরোধিরসসম্বন্ধিবিভাবাদিপরিগ্রহঃ .
বিস্তরেণান্বিতস্যাপি বস্তুনোঽন্যস্য বর্ণনম্ .. ১৮..
অকাণ্ড এব বিচ্ছিত্তিরকাণ্ডে চ প্রকাশনম্ .
পরিপোষং গতস্যাপি পৌনঃপুন্যেন দীপনম্ .
রসস্য স্যাদ্বিরোধায বৃত্ত্যনৌচিত্যমেব চ .. ১৯..
প্রস্তুতরসাপেক্ষযা বিরোধী যো রসস্তস্য সম্বন্ধিনাং বিভাবভাবা-
নুভাবানাং পরিগ্রহো রসবিরোধহেতুকঃ সম্ভবনীযঃ . তত্র বিরোধিরস-
বিভাবপরিগ্রহো যথা শান্তরসবিভাবেষু তদ্বিভাবতযৈব নিরূপিতেষ্বনন্ত-
রমেব শৃঙ্গারাদিবিভাববর্ণনে . বিরোধিরসভাবপরিগ্রহো যথা প্রিযং প্রতি
প্রণযকলহকুপিতাসু কামিনীষু বৈরাগ্যকথাভিরনুনযে . বিরোধিরসানু-
ভাবপরিগ্রহো যথা প্রণযকুপিতাযাং প্রিযাযামপ্রসীদন্ত্যাং নাযকস্য কো-
পাবেশবিবশস্য রৌদ্রানুভাববর্ণনে .
অযং চান্যো রসভঙ্গহেতুর্যত্প্রস্তুতরসাপেক্ষযা বস্তুনোঽন্যস্য কথ-
ঞ্চিদন্বিতস্যাপি বিস্তরেণ কথনম্ . যথা বিপ্রলম্ভশৃঙ্গারে নাযকস্য
কস্যচিদ্বর্ণযিতুমুপক্রান্তে কবের্যমকাদ্যলঙ্কারনিবন্ধনরসিকতযা মহতা
প্রবন্ধেন পর্বতাদিবর্ণনে . অযং চাপরো রসভঙ্গহেতুরবগন্তব্যো যদকাণ্ড-
এব বিচ্ছিত্তিঃ রসস্যাকণ্ড এব চ প্রকাশনম্ . তত্রানবসরে বিরামো
রসস্য যথা নাযকস্য কস্যচিত্স্পৃহণীযসমাগমযা নাযিকযা কযা-
চিত্পরাং পরিপোষপদবীং প্রাপ্তে শৃঙ্গারে বিদিতে চ পরস্পরানুরাগে সমাগ-
মোপাযচিন্তোচিতং ব্যবহারমুত্সৃজ্য স্বতন্ত্রতযা ব্যাপারান্তরবর্ণনে .
অনবসরে চ প্রকাশনং রসস্য যথা প্রবৃত্তে প্রবৃত্তবিবিধবীরসঙ্ক্ষযে কল্প-
সঙ্ক্ষযকল্পে সঙ্গ্রামে রামদেবপ্রাযস্যাপি তাবন্নাযকস্যানুপক্রান্তবিপ্রল-
ম্ভশৃঙ্গারস্য নিমিত্তমুচিতমন্তরেণৈব শৃঙ্গারকথাযামবতারবর্ণনে . ন
চৈবংবিধে বিষযে দৈবব্যামোহিতত্বং কথাপুরুষস্য পরিহারো যতো রসবন্ধ
এব কবেঃ প্রাধান্যেন প্রবৃত্তিনিবন্ধনং যুক্তম্ . ইতিবৃত্তবর্ণনং তদুপায
এবেত্যুক্তং প্রাক্ ‘ আলোকার্থি যথা দীপশিখাযাং যত্নবাঞ্জনঃ’ ইত্যাদিনা .
অত এব চেতিবৃত্তমাত্রবর্ণনপ্রাধান্যেঽঙ্গাঙ্গিভাবরহিতরসভাবনিব-
ন্ধেন চ কবীনামেবংবিধানি স্খলিতানি ভবন্তীতি রসাদিরূপব্যঙ্গ্য-
তাত্পর্যমেবৈষাং যুক্তমিতি যত্নোঽস্মাভিরারব্ধো ন ধ্বনিপ্রতিপাদন-
মাত্রাভিনিবেশেন . পুনশ্চাযমন্যো রসভঙ্গহেতুরবধারণীযো যত্পরিপোষং
গতস্যাপি রসস্য পৌনঃপুন্যেন দীপনম্ . উপভুক্তো হি রসঃ স্বসামগ্রী-
লব্ধপরিপোষঃ পুনঃ পুনঃ পরামৃশ্যমানঃ পরিম্লানকুসুমকল্পঃ কল্পতে .
তথা বৃত্তের্ব্যবহারস্য যদনৌচিত্যং তদপি রসভঙ্গহেতুরেব . যথা নাযকং
প্রতি নাযিকাযাঃ কস্যাশ্চিদুচিতাং ভঙ্গিমন্তরেণ স্বযং সম্ভোগাভিলা-
ষকথনে . যদি বা বৃত্তীনাং ভরতপ্রসিদ্ধানাং কৈশিক্যাদীনাং কাব্যা-
লঙ্কারান্তরপ্রসিদ্ধানামুপনাগরিকাদ্যানাং বা যদনৌচিত্যমবিষযে নিবন্ধনং
তদপি রসভঙ্গহেতুঃ . এবমেষাং রসবিরোধিনামন্যেষাং চানযা দিশা স্বযমু-
ত্প্রেক্ষিতানাং পরিহারে সত্কবিভিরবহিতৈর্ভবিতব্যম্ . পরিকরশ্লোকাশ্চাত্র – – –
মুখ্যা ব্যাপারবিষযাঃ সুকবীনাং রসাদযঃ .
তেষাম্ নিবন্ধনে ভাব্যে তৈঃ সদৈবাপ্রমাদিভিঃ ..
নীরসস্তু প্রবন্ধো যঃ সোঽপশব্দো মহান্ কবেঃ .
স তেনাকবিরেব স্যাদন্যেনাস্মৃতলক্ষণঃ ..
পূর্বে বিশৃঙ্খলগিরঃ কবযঃ প্রাপ্যকীর্তযঃ .
তান্সমাশ্রিত্য ন ত্যাজ্যা নীতিরেষা মনীষিণা ..
বাল্মীকিব্যাসমুখ্যাশ্চ যে প্রখ্যাতাঃ কবীশ্বরাঃ .
তদভিপ্রাযবাহ্যোঽযং নাস্মাভির্দর্শিতো নযঃ .. ইতি .. ১৯..
বিবক্ষিতে রসে লব্ধপ্রতিষ্ঠে তু বিরোধিনাম্ .
বাধ্যানামঙ্গভাবং বা প্রাপ্তানামুক্তিরচ্ছলা .. ২০..
স্বসামগ্র্যা লব্ধপরিপোষে তু বিবক্ষিতে রসে বিরোধিনাং বিরোধি-
রসাঙ্গানাং বাধ্যানামঙ্গভাবং বা প্রাপ্তানাং সতামুক্তিরদোষা . বাধ্যত্বং হি
বিরোধিনাং শক্যাভিভবত্বে সতি নান্যথা . তথা চ তেষামুক্তিঃ প্রস্তুত-
রসপরিপোষাযৈব সম্পদ্যতে . অঙ্গভাবং প্রাপ্তানাং চ তেষাং বিরোধিত্বমেব
নিবর্ততে . অঙ্গভাবপ্রাপ্তির্হি তেষাং স্বাভাবিকী সমারোপকৃতা বা . তত্র
যেষাং নৈসর্গিকী তেষাং তাবদুক্তাববিরোধ এব . যথা বিপ্রলম্ভশৃঙ্গারে তদ-
ঙ্গানাং ব্যাধ্যাদীনাং তেষাঞ্চ তদঙ্গানাংএবাদোষো নাতদঙ্গানাম্ . তদঙ্গত্বে
চ সম্ভবত্যপি মরণস্যোপন্যাসো ন জ্যাযান্ . আশ্রযবিচ্ছেদে রসস্যা-
ত্যন্তবিচ্ছেদপ্রাপ্তেঃ . করুণস্য তু তথাবিধে বিষযে পরিপোষো ভবিষ্য-
তীতি চেত্ ন ; তস্যাপ্রস্তুতত্বাত্ প্রস্তুতস্য চ বিচ্ছেদাত্ . যত্র তু
করুণরসস্যৈব কাব্যার্থত্বং তত্রাবিরোধঃ . শৃঙ্গারে বা মরণস্যাদীর্ঘকাল-
প্রত্যাপত্তিসম্ভবে কদাচিদুপনিবন্ধো নাত্যন্তবিরোধী . দীর্ঘকাল-
প্রত্যাপত্তৌ তু তস্যান্তরা প্রবাহবিচ্ছেদ এবেত্যেবংবিধেতিবৃত্তোপনিবন্ধনং
রসবন্ধপ্রধানেন কবিনা পরিহর্তব্যম্ .
তত্র লব্ধপ্রতিষ্ঠে তু বিবক্ষিতে রসে বিরোধিরসাঙ্গানাং বাধ্যত্বেনোক্তা-
বদোষো যথা – – –
ক্বাকর্যং শশলক্ষ্মণঃ ক্ব চ কুলং ভূযোঽপি দৃশ্যেত সা
দোষাণাং প্রশমায মে শ্রুতমহো কোপেঽপি কান্তং মুখম্ .
কিং বক্ষ্যন্ত্যপকল্মষাঃ কৃতধিযঃ স্বপ্নেঽপি সা দুর্লভা
চেতঃ স্বাস্থ্যমুপৈহি কঃ খলু যুবা ধন্যোঽধরং পাস্যতি ..
যথা বা পুণ্ডরীকস্য মহাশ্বেতাং প্রতি প্রবৃত্তনির্ভরানুরাগস্য দ্বিতীয-
মুনিকুমারোপদেশবর্ণনে . স্বাভাবিক্যামঙ্গভাবপ্রাপ্তাবদোষো যথা – – –
ভ্রমিমরতিমলসহৃদযতাং প্রলযং মূর্চ্ছাং তমঃ শরীরসাদম্ .
মরণং চ জলদভুজগজং প্রসহ্য কুরুতে বিষং বিযোগিনীনাম্ ..
ইত্যাদৌ . সমারোপিতাযামপ্যবিরোধো যথা – – – ‘ পাণ্ডুক্ষামম্’ ইত্যাদৌ .
ইযং চাঙ্গভাবপ্রাপ্তিরন্যা যদাধিকারিকত্বাত্প্রধান একস্মিন্বাক্যার্থে
রসযোর্ভাবযোর্বা পরস্পরবিরোধিনোর্দ্বযোরঙ্গভাবগমনং তস্যামপি
ন দোষঃ . যথোক্তং ‘ ক্ষিপ্তো হাস্তাবলগ্নঃ’ ইত্যাদৌ . কথং তত্রাবিরোধ
ইতি চেত্, দ্বযোরপি তযোরন্যপরত্বেন ব্যবস্থানাত্ . অন্যপরত্বেঽপি
বিরোধিনোঃ কথং বিরোধনিবৃত্তিরিতি চেত্, উচ্যতে – – – বিধৌ বিরুদ্ধ-
সমাবেশস্য দুষ্টত্বং নানুবাদে .
যথা – – –
এহি গচ্ছ পতোত্তিষ্ঠ বদ মৌনং সমাচর .
এবমাশাগ্রহগ্রস্তৈঃ ক্রীডন্তি ধনিনোঽর্থিভিঃ ..
ইত্যাদৌ . অত্র হি বিধিপ্রতিষেধযোরনূদ্যমানত্বেন সমাবেশে ন
বিরোধস্তথেহাপি ভবিষ্যতি . শ্লোকে হ্যস্মিন্নীর্ষ্যাবিপ্রলম্ভশৃঙ্গারকরুণ-
বস্তুনোর্ন বিধীযমানত্বম্ . ত্রিপুররিপুপ্রভাবাতিশযস্য বাক্যার্থত্বা-
ত্তদঙ্গত্বেন চ তযোর্ব্যবস্থানাত্ .
ন চ রসেষু বিধ্যনুবাদব্যবহারো নাস্তীতি শক্যং বক্তুম্, তেষাং
বাক্যার্থত্বেনাভ্যুপগমাত্ . বাক্যার্থস্য বাচ্যস্য চ যৌ বিধ্যনুবাদৌ
তৌ তদাক্ষিপ্তানাং রসানাং কেন বার্যতে . যৈর্বা সাক্ষাত্কাব্যার্থতা রসাদীনাং
নাভ্যুপগম্যতে, তৈস্তেষাং তন্নিমিত্ততা তাবদবশ্যমভ্যুপগন্তব্যা .
তথাপ্যত্র শ্লোকে ন বিরোধঃ . যস্মাদনূদ্যমানাঙ্গনিমিত্তোভযরসবস্তু-
সহকারিণো বিধীযমানাংশাদ্ভাববিশেষপ্রতীতিরুত্পদ্যতে ততশ্চ ন
কশ্চিদ্বিরোধঃ . দৃশ্যতে হি বিরুদ্ধোভযসহকারিণঃ কারণাত্কার্যবিশেষো-
ত্পত্তিঃ . বিরুদ্ধফলোত্পাদনহেতুত্বং হি যুগপদেকস্য কারণস্য বিরুদ্ধং
ন তু বিরুদ্ধোভযসহকারিত্বম্ . এবংবিধবিরুদ্ধপদার্থবিষযঃ কথমভিনযঃ
প্রযোক্তব্য ইতি চেত্, অনূদ্যমানৈবংবিধবাচ্যবিষযে যা বার্তা সাত্রাপি
ভবিষ্যতি . এবং বিধ্যনুবাদনযাশ্রযেণাত্র শ্লোকে পরিহৃতস্তাবদ্বিরোধঃ .
কিং চ নাযকস্যাভিনন্দনীযোদযস্য কস্যচিত্প্রভাবাতিশয-
বর্ণনে তত্প্রতিপক্ষাণাং যঃ করুণো রসঃ স পরীক্ষকাণাং ন বৈক্লব্যমাদ-
ধাতি প্রত্যুত প্রীত্যতিশযনিমিত্ততাং প্রতিপদ্যত ইত্যতস্তস্য কুণ্ঠশক্তি-
কত্বাত্তদ্বিরোধবিধাযিনো ন কশ্চিদ্দোষঃ . তস্মাদ্বাক্যার্থীভূতস্য
রসস্য ভাবস্য বা বিরোধী রসবিরোধীতি বক্তুং ন্যায্যঃ, ন ত্বঙ্গ-
ভূতস্য কস্যচিত্ .
অথবা বাক্যার্থীভূতস্যাপি কস্যচিত্করুণরসবিষযস্য তাদৃশেন
শৃঙ্গারবস্তুনা ভঙ্গিবিশেষাশ্রযেণ সংযোজনং রসপরিপোষাযৈব জাযতে .
যতঃ প্রকৃতিমধুরাঃ পদার্থাঃ শোচনীযতাং প্রাপ্তাঃ প্রাগবস্থাভাবিভিঃ
সংস্মর্যমাণৈর্বিলাসৈরধিকতরং শোকাবেশমুপজনযন্তি . যথা – – –
অযং স রশনোত্কর্ষী পীনস্তনবিমর্দনঃ .
নাভ্যূরুজঘনস্পর্শী নীবীবিস্রংসনঃ করঃ ..
ইত্যাদৌ . তদত্র ত্রিপুরযুবতীনাং শাম্ভবঃ শরাগ্নিরার্দ্রাপরাধঃ
কামী যথা ব্যবহরতি স্ম তথা ব্যবহৃতবানিত্যনেনাপি প্রকারেণাস্ত্যেব
নির্বিরোধত্বম্ . তস্মাদ্যথা যথা নিরূপ্যতে তথা তথাত্র দোষাভাবঃ .
ইত্থং চ – – –
ক্রামন্ত্যঃ ক্ষতকোমলাঙ্গুলিগলদ্রক্তৈঃ সদর্ভাঃ স্থলীঃ
পাদৈঃ পাতিতযাবকৈরিব পতদ্বাষ্পাম্বুধৌতাননাঃ .
ভীতা ভর্তৃকরাবলম্বিতকরাস্ত্বদ্বৈরিনাথোঽধুনা
দাবাগ্নিং পরিতো ভ্রমন্তি পুনরপ্যুদ্যদ্বিবাহা ইব ..
ইত্যেবমাদীনাং সর্বেষামেব নির্বিরোধত্বমবগন্তব্যম্ .
এবং তাবদ্রসাদীনাং বিরোধিরসাদিভিঃ সমাবেশাসমাবেশযোর্বিষয-
বিভাগো দর্শিতঃ .. ২০..
ইদানীং তেষামেকপ্রবন্ধবিনিবেশনে ন্যায্যো যঃ ক্রমস্তং প্রতিপাদযিতু-
মুচ্যতে – – –
প্রসিদ্ধেঽপি প্রবন্ধানাং নানারসনিবন্ধনে .
একো রসোঽঙ্গীকর্তব্যস্তেষামুত্কর্ষমিচ্ছতা .. ২১..
প্রবন্ধেষু মহাকাব্যাদিষু নাটকাদিষু বা বিপ্রকীর্ণতযাঙ্গাঙ্গিভাবেন
বহবো রসা উপনিবধ্যন্ত ইত্যত্র প্রসিদ্ধৌ সত্যামপি যঃ প্রবন্ধানাং
ছাযাতিশযযোগমিচ্ছতি তেন তেষাং রসানামন্যতমঃ কশ্চিদ্বিবক্ষিতো
রসোঽঙ্গিত্বেন বিনিবেশযিতব্য ইত্যযং যুক্ততরো মার্গঃ .. ২১..
ননু রসান্তরেষু বহুষু প্রাপ্তপরিপোষেষু সত্সু কথমেকস্যাঙ্গিতা ন
বিরুধ্যত ইত্যাশঙ্ক্যেদমুচ্যতে – – –
রসান্তরসমাবেশঃ প্রস্তুতস্য রসস্য যঃ .
নোপহন্ত্যঙ্গিতাং সোঽস্য স্থাযিত্বেনাবভাসিনঃ .. ২২..
প্রবন্ধেষু প্রথমতরং প্রস্তুতঃ সন্ পুনঃ পুনরনুসন্ধীযমানত্বেন
স্থাযী যো রসস্তস্য সকলবন্ধব্যাপিনো রসান্তরৈরন্তরালবর্তিভিঃ
সমাবেশো যঃ স নাঙ্গিতামুপহন্তি .
এতদেবোপপাদযিতুমুচ্যতে – – –
কার্যমেকং যথা ব্যাপি প্রবন্ধস্য বিধীযতে .
তথা রসস্যাপি বিধৌ বিরোধো নৈব বিদ্যতে .. ২৩..
সন্ধ্যাদিমযস্য প্রবন্ধশরীরস্য যথা কার্যমেকমনুযাযি ব্যাপকং
কল্প্যতে ন চ তত্কার্যান্তরৈর্ন সঙ্কীর্যতে, ন চ তৈঃ সঙ্কীর্যমাণস্যাপি
তস্য প্রাধান্যমপচীযতে, তথৈব রসস্যাপ্যেকস্য সন্নিবেশে ক্রিযমাণে
বিরোধো ন কশ্চিত্ . প্রত্যুত প্রত্যুদিতবিবেকানামনুসন্ধানবতাং সচেতসাং
তথাবিধে বিষযে প্রহ্লাদাতিশযঃ প্রবর্ততে .. ২৩..
ননু যেষাং রসানাং পরস্পরাবিরোধঃ যথা – – – বীরশৃঙ্গারযোঃ শৃঙ্গার-
হাস্যযোঃ রৌদ্রশৃঙ্গারযোর্বীরাদ্ভুতযোর্বীররৌদ্রযো রৌদ্রকরুণযোঃ শৃঙ্গারাদ্ভুত-
যোর্বা তত্র ভবত্বঙ্গাঙ্গিভাবঃ . তেষাং তু স কথং ভবেদ্যেষাং পরস্পরং বাধ্য-
বাধকভাবঃ . যথা – – – শৃঙ্গারবীভত্সযোর্বীরভযানকযোঃ শান্তরৌদ্রযোঃ
শন্তশৃঙ্গারযোর্বা ইত্যাশঙ্ক্যেদমুচ্যতে – – –
অবিরোধী বিরোধী বা রসোঽঙ্গিনি রসান্তরে .
পরিপোষং ন নেতব্যস্তথা স্যাদবিরোধিতা .. ২৪..
অঙ্গিনি রসান্তরে শৃঙ্গারাদৌ প্রবন্ধব্যঙ্গ্যে সতি অবিরোধী বিরোধী
বা রসঃ পরিপোষং ন নেতব্যঃ . তত্রাবিরোধিনো রসস্যাঙ্গিরসাপেক্ষযা-
ত্যন্তমাধিক্যং ন কর্তব্যমিত্যযং প্রথমঃ পরিপোষপরিহারঃ . উত্কর্ষ-
সাম্যেঽপি তযোর্বিরোধাসম্ভবাত্ .
যথা – – –
একতো রোদিতি প্রিযা অন্যতঃ সমরতূর্যনির্ঘোষঃ .
স্নেহেন রণরসেন চ ভটস্য দোলাযিতং হৃদযম্ .
যথা বা – – –
কণ্ঠাচ্ছিত্বাক্ষমালাবলযমিব করে হারমাবর্তযন্তী
কৃত্বা পর্যঙ্কবন্ধং বিষধরপতিনা মেখলাযা গুণেন .
মিথ্যামন্ত্রাভিজাপস্ফুরদধরপুটব্যঞ্জিতাব্যক্তহাসা
দেবী সন্ধ্যাভ্যসূযাহসিতপশুপতিস্তত্র দৃষ্টা তু বোঽব্যাত্ ..
ইত্যত্র .
অঙ্গিরসবিরুদ্ধানাং ব্যভিচারিণাং প্রাচুর্যেণানিবেশনম্, নিবেশনে
বা ক্ষিপ্রমেবাঙ্গিরসব্যভিচার্যনুবৃত্তিরিতি দ্বিতীযঃ .
অঙ্গত্বেন পুনঃ পুনঃ প্রত্যবেক্ষা পরিপোষং নীযমানস্যাপ্যঙ্গভূতস্য
রসস্যেতি তৃতীযঃ . অনযা দিশান্যেঽপি প্রকারা উত্প্রেক্ষণীযাঃ .
বিরোধিনস্তু রসস্যাঙ্গিরসাপেক্ষযা কস্যচিন্ন্যূনতা সম্পাদনীযা .
যথা শান্তেঽঙ্গিনি শৃঙ্গারস্য শৃঙ্গারে বা শান্তস্য . পরিপোষরহিতস্য
রসস্য কথং রসত্বমিতি চেত্ – – – উক্তমত্রাঙ্গিরসাপেক্ষযেতি . অঙ্গিনো হি
রসস্য যাবান্ পরিপোষস্তাবাংস্তস্য ন কর্তব্যঃ, স্বতস্তু সম্ভবী
পরিপোষঃ কেন বার্যতে . এতচ্চাপেক্ষিকং প্রকর্ষযোগিত্বমেকস্য রসস্য
বহুরসেষু প্রবন্ধেষু রসানামঙ্গাঙ্গিভাবমনভ্যুপগচ্ছতাপ্যশক্যপ্রতিক্ষেপ-
মিত্যনেন প্রকারেণাবিরোধিনাং বিরোধিনাং চ রসানামঙ্গাঙ্গিভাবেন সমাবেশে
প্রবন্ধেষু স্যাদবিরোধঃ . এতচ্চ সর্বং যেষাং রসো রসান্তরস্য ব্যভিচারী-
ভবতি ইতি দর্শনং তন্মতেনোচ্যতে . মতান্তরেঽপি রসানাং স্থাযিনো
ভাবা উপচারাদ্রসশব্দেনোক্তাস্তেষামঙ্গত্বং নির্বিরোধমেব .. ২৪..
এবমবিরোধিনাং বিরোধিনাং চ প্রবন্ধস্থেনাঙ্গিনা রসেন সমাবেশে
সাধারণমবিরোধোপাযং প্রতিপাদ্যেদানীং বিরোধিবিষযমেব তং প্রতিপাদ-
যিতুমিদমুচ্যতে – – –
বিরুদ্ধৈকাশ্রযো যস্তু বিরোধী স্থাযিনো ভবেত্ .
স বিভিন্নাশ্রযঃ কার্যস্তস্য পোষেঽপ্যদোষতা .. ২৫..
একাধিকরণ্যবিরোধী নৈরন্তর্যবিরোধী চেতি দ্বিবিধো বিরোধী .
তত্র প্রবন্ধস্থেন স্থাযিনাঙ্গিনা রসেনৌচিত্যাপেক্ষযা বিরুদ্ধৈকাশ্রযো
যো বিরোধী যথা বীরেণ ভযানকঃ স বিভিন্নাশ্রযঃ কার্যঃ . তস্য
বীরস্য য আশ্রযঃ কথানাযকস্তদ্বিপক্ষবিষযে সন্নিবেশযিতব্যঃ .
তথা সতি চ তস্য বিরোধিনোঽপি যঃ পরিপোষঃ স নির্দোষঃ . বিপক্ষ-
বিষযে হি ভযাতিশযবর্ণনে নাযকস্য নযপরাক্রমাদিসম্পত্সুতরামু-
দ্দ্যোতিতা ভবতি . এতচ্চ মদীযেঽর্জুনচরিতেঽর্জুনস্য পাতালাবতরণ-
প্রসঙ্গে বৈশদ্যেন প্রদর্শিতম্ .
এবমৈকাধিকরণ্যবিরোধিনঃ প্রবন্ধস্থেন স্থাযিনা রসেনাঙ্গভাব-
গমনে নির্বিরোধত্বং যথা তথা তদ্দর্শিতম্ . দ্বিতীযস্য তু তত্প্রতিপাদ-
যিতুমুচ্যতে – – –
একাশ্রযত্বে নির্দোষো নৈরন্তর্যে বিরোধবান্ .
রসান্তরব্যবধিনা রসো ব্যঙ্গ্যঃ সুমেধসা .. ২৬..
যঃ পুনরেকাধিকরণত্বে নির্বিরোধো নৈরন্তর্যে তু বিরোধী স রসান্ত-
রব্যবধানেন প্রবন্ধে নিবেশযিতব্যঃ . যথা শান্তশৃঙ্গারৌ নাগানন্দে
নিবেশিতৌ .
শান্তশ্চ তৃষ্ণাক্ষযসুখস্য যঃ পরিপোষস্তল্লক্ষণো রসঃ প্রতীযত
এব . তথা চোক্তম্ – – –
যচ্চ কামসুখং লোকে যচ্চ দিব্যং মহত্সুখম্ .
তৃষ্ণাক্ষযসুখস্যৈতে নার্হতঃ ষোডশীং কলাম্ ..
যদি নাম সর্বজনানুভবগোচরতা তস্য নাস্তি নৈতাবতাসা-
বলোকসামান্যমহানুভাবচিত্তবৃত্তিবিশেষঃ প্রতিক্ষেপ্তুং শক্যঃ . ন চ
বীরে তস্যান্তর্ভাবঃ কর্তুং যুক্তঃ . তস্যাভিমানমযত্বেন ব্যবস্থাপনাত্ .
অস্য চাহঙ্কারপ্রশমৈকরূপতযা স্থিতেঃ . তযোশ্চৈবংবিধবিশেষসদ্ভাবেঽপি
যদ্যৈক্যং পরিকল্প্যতে তদ্বীররৌদ্রযোরপি তথা প্রসঙ্গঃ . দযাবীরাদীনাং
চ চিত্তবৃত্তিবিশেষাণাং সর্বাকারমহঙ্কাররহিতত্বেন শান্তরসপ্রভেদত্বম্,
ইতরথা তু বীরপ্রভেদত্বমিতি ব্যবস্থাপ্যমানে ন কশ্চিদ্বিরোধঃ .
তদেবমস্তি শান্তো রসঃ . তস্য চাবিরুদ্ধরসব্যবধানেন প্রবন্ধে বিরোধি-
রসসমাবেশে সত্যপি নির্বিরোধত্বম্ . যথা প্রদর্শিতে বিষযে .
এতদেব স্থিরীকর্তুমিদমুচ্যতে – – –
রসান্তরান্তরিতযোরেকবাক্যস্থযোরপি .
নিবর্ততে হি রসযোঃ সমাবেশে বিরোধিতা .. ২৭..
রসান্তরব্যবহিতযোরেকপ্রবন্ধস্থযোর্বিরোধিতা নিবর্তত ইত্যত্র ন
কাচিদ্ভ্রান্তিঃ . যস্মাদেকবাক্যস্থযোরপি রসযোরুক্তযা নীত্যা
বিরুদ্ধতা নিবর্ততে . যথা – – –
ভূরেণুদিগ্ধান্নবপারিজাতমালারজোবাসিতবাহুমধ্যাঃ .
গাঢং শিবাভিঃ পরিরভ্যমাণান্সুরাঙ্গনাশ্লিষ্টভুজান্তরালাঃ ..
সশোণিতৈঃ ক্রব্যভুজাং স্ফুরদ্ভিঃ পক্ষৈঃ খগানামুপবীজ্যমানান্ .
সংবীজিতাশ্চন্দনবারিসেকৈঃ সুগন্ধিভিঃ কল্পলতাদুকূলৈঃ ..
বিমানপর্যঙ্কতলে নিষণ্ণাঃ কুতূহলাবিষ্টতযা তদানীম্ .
নির্দিশ্যমানাংল্ললনাঙ্গুলীভির্বীরাঃ স্বদেহান্ পতিতানপশ্যন্ ..
ইত্যাদৌ . অত্র হি শৃঙ্গারবীভত্সযোস্তদঙ্গযোর্বা বীররসব্যবধানেন
সমাবেশো ন বিরোধী .
বিরোধমবিরোধং চ সর্বত্রেত্থং নিরূপযেত্ .
বিশেষতস্তু শৃঙ্গারে সুকুমারতমা হ্যসৌ .. ২৮..
যথোক্তলক্ষণানুসারেণ বিরোধাবিরোধৌ সর্বেষু রসেষু প্রবন্ধেঽন্যত্র
চ নিরূপযেত্সহৃদযঃ; বিশেষতস্তু শৃঙ্গারে . স হি রতিপরিপোষাত্মকত্বাদ্
রতেশ্চ স্বল্পেনাপি নিমিত্তেন ভঙ্গসম্ভবাত্সুকুমারতমঃ সর্বেভ্যো রসেভ্যো
মনাগপি বিরোধিসমাবেশং ন সহতে .
অবধানাতিশযবান্ রসে তত্রৈব সত্কবিঃ .
ভবেত্তস্মিন্ প্রমাদো হি ঝটিত্যেবোপলক্ষ্যতে .. ২৯..
তত্রৈব চ রসে সর্বেভ্যোঽপি রসেভ্যঃ সৌকুমার্যাতিশযযোগিনি
কবিরবধানবান্ প্রযত্নবান্ স্যাত্ . তত্র হি প্রমাদ্যতস্তস্য সহৃদযমধ্যে
ক্ষিপ্রমেবাবজ্ঞানবিষযতা ভবতি . শৃঙ্গাররসো হি সংসারিণাং নিযমেনা-
নুভববিষযত্বাত্ সর্বরসেভ্যঃ কমনীযতযা প্রধানভূতঃ .
এবং চ সতি – – –
বিনেযানুন্মুখীকর্তুং কাব্যশোভার্থমেব বা .
তদ্বিরুদ্ধরসস্পর্শস্তদঙ্গানাং ন দুষ্যতি .. ৩০..
শৃঙ্গারবিরুদ্ধরসস্পর্শঃ শৃঙ্গারাঙ্গানাং যঃ স ন কেবলমবিরোধলক্ষ-
ণযোগে সতি ন দুষ্যতি যাবদ্বিনেযানুন্মুখীকর্তুং কাব্যশোভার্থমেব বা
ক্রিযমাণো ন দুষ্যতি . শৃঙ্গাররসাঙ্গৈরুন্মুখীকৃতাঃ সন্তো হি বিনেযাঃ
সুখং বিনযোপদেশান্ গৃহ্ণন্তি . সদাচারোপদেশরূপা হি নাটকাদিগোষ্ঠী
বিনেযজনহিতার্থমেব মুনিভিরবতারিতা .
কিং চ শৃঙ্গারস্য সকলজনমনোহরাভিরামত্বাত্তদঙ্গসমাবেশঃ
কাব্যে শোভাতিশযং পুষ্যতীত্যনেনাপি প্রকারেণ বিরোধিনি রসে শৃঙ্গারা-
ঙ্গসমাবেশো ন বিরোধী . ততশ্চ – – –
সত্যং মনোরমা রামাঃ সত্যং রম্যা বিভূতযঃ .
কিং তু মত্তাঙ্গনাপাঙ্গভঙ্গলোলং হি জীবিতম্ ..
ইত্যাদিষু নাস্তি রসবিরোধদোষঃ .
বিজ্ঞাযেত্থং রসাদীনামবিরোধবিরোধযোঃ .
বিষযং সুকবিঃ কাব্যং কুর্বন্মুহ্যতি ন ক্বচিত্ .. ৩১..
ইত্থমনেনানন্তরোক্তেন প্রকারেণ রসাদীনাং রসভাবতদাভাসানাং
পরস্পরং বিরোধস্যাবিরোধস্য চ বিষযং বিজ্ঞায সুকবিঃ কাব্যবিষযে
প্রতিভাতিশযযুক্তঃ কাব্যং কুর্বন্ন ক্বচিন্মুহ্যতি .
এবং রসাদিষু বিরোধাবিরোধনিরূপণস্যোপযোগিত্বং প্রতিপাদ্য
ব্যঞ্জকবাচ্যবাচকনিরূপণস্যাপি তদ্বিষযস্য তত্প্রতিপাদ্যতে – – –
বাচ্যানাং বাচকানাং চ যদৌচিত্যেন যোজনম্ .
রসাদিবিষযেণৈতত্কর্ম মুখ্যং মহাকবেঃ .. ৩২..
বাচ্যানামিতিবৃত্তবিশেষাণাং বাচকানাং চ তদ্বিষযাণাং রসাদি-
বিষযেণৌচিত্যেন যদ্যোজনমেতন্মহাকবের্মুখ্যং কর্ম . অযমেব হি মহাক-
বের্মুখ্যো ব্যাপারো যদ্রসাদীনামেব মুখ্যতযা কাব্যার্থীকৃত্য তদ্ব্যক্ত্য-
নুগুণত্বেন শব্দানামর্থানাং চোপনিবন্ধনম্ .
এতচ্চ রসাদিতাত্পর্যেণ কাব্যনিবন্ধনং ভরতাদাবপি সুপ্রসিদ্ধ-
মেবেতি প্রতিপাদযিতুমাহ – – –
রসাদ্যনুগুণত্বেন ব্যবহারোঽর্থশব্দযোঃ .
ঔচিত্যবান্যস্তা এতা বৃত্তযো দ্বিবিধাঃ স্থিতাঃ .. ৩৩..
ব্যবহারো হি বৃত্তিরিত্যুচ্যতে . তত্র রসানুগুণ ঔচিত্যবান্
বাচ্যাশ্রযো যো ব্যবহারস্তা এতাঃ কৈশিক্যাদ্যা বৃত্তযঃ . বাচকাশ্রযা-
শ্চোপনাগরিকাদ্যাঃ . বৃত্তযো হি রসাদিতাত্পর্যেণ সংনিবেশিতাঃ কামপি
নাট্যস্য কাব্যস্য চ ছাযামাবহন্তি . রসাদযো হি দ্বযোরপি
তযোর্জীবভূতাঃ . ইতিবৃত্তাদি তু শরীরভূতমেব .
অত্র কেচিদাহুঃ – – – ‘ গুণগুণিব্যবহারো রসাদীনামিতিবৃত্তাদিভিঃ
সহ যুক্তঃ, ন তু জীবশরীরব্যবহারঃ . রসাদিমযং হি বাচ্যং প্রতিভাসতে
ন তু রসাদিভিঃ পৃথগ্ভূতম্’ ইতি . অত্রোচ্যতে – – – যদি রসাদিমযমেব
বাচ্যং যথা গৌরত্বমযং শরীরম্ . এবং সতি যথা শরীরে প্রতিভাসমানে
নিযমেনৈব গৌরত্বং প্রতিভাসতে সর্বস্য তথা বাচ্যেন সহৈব রসাদযোঽপি
সহৃদযস্যাসহৃদযস্য চ প্রতিভাসেরন্ . ন চৈবম্; তথা চৈতত্প্রতিপাদি-
তমেব প্রথমোদ্দ্যোতে .
স্যান্মতম্ ; রত্নানামিব জাত্যত্বং প্রতিপত্তৃবিশেষতঃ সংবেদ্যং বাচ্যানাং
রসাদিরূপত্বমিতি . নৈবম্ ; যতো যথা জাত্যত্বেন প্রতিভাসমানে রত্নে
রত্নস্বরূপানতিরিক্তত্বমেব তস্য লক্ষ্যতে তথা রসাদীনামপি বিভাবা-
নুভাবাদিরূপবাচ্যাব্যতিরিক্তত্বমেব লক্ষ্যেত . ন চৈবম্; ন হি
বিভাবানুভাবব্যভিচারিণ এব রসা ইতি কস্যচিদবগমঃ . অত এব
চ বিভাবাদিপ্রতীত্যবিনাভাবিনী রসাদীনাং প্রতীতিরিতি তত্প্রতীত্যোঃ
কার্যকারণভাবেন ব্যবস্থানাত্ক্রমোঽবশ্যম্ভাবী . স তু লাঘবান্ন
প্রকাশ্যতে ‘ ইত্যলক্ষ্যক্রমা এব সন্তো ব্যঙ্গ্যা রসাদযঃ’ ইত্যুক্তম্ .
ননু শব্দ এব প্রকরণাদ্যবচ্ছিন্নো বাচ্যব্যঙ্গ্যযোঃ সমমেব
প্রতীতিমুপজনযতীতি কিং তত্র ক্রমকল্পনযা . ন হি শব্দস্য বাচ্য-
প্রতীতিপরামর্শ এব ব্যঞ্জকত্বে নিবন্ধনম্ . তথা হি গীতাদিশব্দেভ্যো-
ঽপি রসাভিব্যক্তিরস্তি . ন চ তেষামন্তরা বাচ্যপরামর্শঃ . অত্রাপি
ব্রূমঃ – – – প্রকরণাদ্যবচ্ছেদেন ব্যঞ্জকত্বং শব্দানামিত্যনুমতমেবৈতদস্মা-
কম্ . কিং তু তদ্ব্যঞ্জকত্বং তেষাং কদাচিত্স্বরূপবিশেষনিবন্ধনং কদাচি-
দ্বাচকশক্তিনিবন্ধনম্ . তত্র যেষাং বাচকশক্তিনিবন্ধনং তেষাং যদি
বাচ্যপ্রতীতিমন্তরেণৈব স্বরূপপ্রতীত্যা নিষ্পন্নং তদ্ভবেন্ন তর্হি বাচক-
শক্তিনিবন্ধনম্ . অথ তন্নিবন্ধনং তন্নিযমেনৈব বাচ্যবাচকভাব-
প্রতীত্যুত্তরকালত্বং ব্যঙ্গ্যপ্রতীতেঃ প্রাপ্তমেব .
স তু ক্রমো যদি লাঘবান্ন লক্ষ্যতে তত্কিং ক্রিযতে . যদি চ
বাচ্যপ্রতীতিমন্তরেণৈব প্রকরণাদ্যবচ্ছিন্নশব্দমাত্রসাধ্যা রসাদিপ্রতীতিঃ
স্যাত্তদনবধারিতপ্রকরণানাং বাচ্যবাচকভাবে চ স্বযমব্যুত্পন্নানাং
প্রতিপত্তৄণাং কাব্যমাত্রশ্রবণাদেবাসৌ ভবেত্ . সহভাবে চ বাচ্যপ্রতীতে-
রনুপযোগঃ, উপযোগে বা ন সহভাবঃ . যেষামপি স্বরূপবিশেষপ্রতীতি-
নিমিত্তং ব্যঞ্জকত্বং যথা গীতাদিশব্দানাং তেষামপি স্বরূপপ্রতীতের্ব্যঙ্গ্য-
প্রতীতেশ্চ নিযমভাবী ক্রমঃ . তত্তু শব্দস্য ক্রিযাপৌর্বাপর্যমনন্যসাধ্য-
তত্ফলঘটনাস্বাশুভাবিনীষু বাচ্যেনাবিরোধিন্যভিধেযান্তরবিলক্ষণে
রসাদৌ ন প্রতীযতে .
ক্বচিত্তু লক্ষ্যত এব . যথানুরণনরূপব্যঙ্গ্যপ্রতীতিষু . তত্রাপি
কথমিতি চেদুচ্যতে – – – অর্থশক্তিমূলানুরণনরূপব্যঙ্গ্যে ধ্বনৌ তাবদ-
ভিধেযস্য তত্সামর্থ্যাক্ষিপ্তস্য চার্থস্যাভিধেযান্তরবিলক্ষণতযাত্যন্ত-
বিলক্ষণে যে প্রতীতী তযোরশক্যনিহ্নবো নিমিত্তনিমিত্তিভাব ইতি
স্ফুটমেব তত্র পৌর্বাপর্যম্ . যথা প্রথমোদ্দ্যোতে প্রতীযমানার্থসিদ্ধ্যর্থ-
মুদাহৃতাসু গাথাসু . তথাবিধে চ বিষযে বাচ্যব্যঙ্গ্যযোরত্যন্ত-
বিলক্ষণত্বাদ্যৈব একস্য প্রতীতিঃ সৈবেতরস্যেতি ন শক্যতে বক্তুম্ .
শব্দশক্তিমূলানুরণনরূপব্যঙ্গ্যে তু ধ্বনৌ – – –
গাবো বঃ পাবনানাং পরমপরিমিতাং প্রীতিমুত্পাদযন্তু
ইত্যাদাবর্থদ্বযপ্রতীতৌ শাব্দ্যামর্থদ্বযস্যোপমানোপমেযভাবপ্রতীতি-
রুপমাবাচকপদবিরহে সত্যর্থসামর্থ্যাদাক্ষিপ্তেতি, তত্রাপি সুলক্ষমভিধেয-
ব্যঙ্গ্যালঙ্কারপ্রতীত্যোঃ পৌর্বাপর্যম্ .
পদপ্রকাশশব্দশক্তিমূলানুরণনরূপব্যঙ্গ্যেঽপি ধ্বনৌ বিশেষণপদ-
স্যোভযার্থসম্বন্ধযোগ্যস্য যোজকং পদমন্তরেণ যোজনমশাব্দমপ্যর্থা-
দবস্থিতমিত্যত্রাপি পূর্ববদভিধেযতত্সামর্থ্যাক্ষিপ্তালঙ্কারমাত্রপ্রতীত্যোঃ
সুস্থিতমেব পৌর্বাপর্যম্ . আর্থ্যপি চ প্রতিপত্তিস্তথাবিধে বিষযে
উভযার্থসম্বন্ধযোগ্যশব্দসামর্থ্যপ্রসাবিতেতি শব্দশক্তিমূলা কল্প্যতে .
অবিবক্ষিতবাচ্যস্য তু ধ্বনেঃ প্রসিদ্ধস্ববিষযবৈমুখ্যপ্রতীতিপূর্বকমেবার্থা-
ন্তরপ্রকাশনমিতি নিযমভাবী ক্রমঃ . তত্রাবিবক্ষিতবাচ্যত্বাদেব
বাচ্যেন সহ ব্যঙ্গ্যস্য ক্রমপ্রতীতিবিচারো ন কৃতঃ .
তস্মাদভিধানাভিধেযপ্রতীত্যোরিব বাচ্যব্যঙ্গ্যপ্রতীত্যোর্নিমিত্তনি-
মিত্তিভাবান্নিযমভাবী ক্রমঃ . স তূক্তযুক্ত্যা ক্বচিল্লক্ষ্যতে ক্বচিন্ন
লক্ষ্যতে .
তদেবং ব্যঞ্জকমুখেন ধ্বনিপ্রকারেষু নিরূপিতেষু কশ্চিদ্ব্রূযাত্ – – –
কিমিদং ব্যঞ্জকত্বং নাম ব্যঙ্গ্যার্থপ্রকাশনম্ , ন হি ব্যঞ্জকত্বং
ব্যঙ্গ্যত্বং চার্থস্য ব্যঞ্জকসিদ্ধ্যধীনং ব্যঙ্গ্যত্বম্, ব্যঙ্গ্যাপেক্ষযা চ
ব্যঞ্জকত্বসিদ্ধিরিত্যন্যোন্যসংশ্রযাদব্যবস্থানম্ . ননু বাচ্যব্যতি-
রিক্তস্য ব্যঙ্গ্যস্য সিদ্ধিঃ প্রাগেব প্রতিপাদিতা তত্সিদ্ধ্যধীনা চ
ব্যঞ্জকসিদ্ধিরিতি কঃ পর্যনুযোগাবসরঃ . সত্যমেবৈতত্; প্রাগুক্তযুক্তি-
ভির্বাচ্যব্যতিরিক্তস্য বস্তুনঃ সিদ্ধিঃ কৃতা, স ত্বর্থো ব্যঙ্গ্যতযৈব
কস্মাদ্ব্যপদিশ্যতে যত্র চ প্রাধান্যেনানবস্থানং তত্র বাচ্যতযৈবাসৌ
ব্যপদেষ্টুং যুক্তঃ, তত্পরত্বাদ্বাক্যস্য . অতশ্চ তত্প্রকাশিনো বাক্যস্য
বাচকত্বমেব ব্যাপারঃ . কিং তস্য ব্যাপারান্তরকল্পনযা ? তস্মা-
ত্তাত্পর্যবিষযো যোঽর্থঃ স তাবন্মুখ্যতযা বাচ্যঃ . যা ত্বন্তরা
তথাবিধে বিষযে বাচ্যান্তরপ্রতীতিঃ সা তত্প্রতীতেরুপাযমাত্রং পদার্থপ্রতী-
তিরিব বাক্যার্থপ্রতীতেঃ .
অত্রোচ্যতে – – – যত্র শব্দঃ স্বার্থমভিদধানোঽর্থান্তরমবগমযতি তত্র
যত্তস্য স্বার্থাভিধাযিত্বং যচ্চ তদর্থান্তরাবগমহেতুত্বং তযোরবিশেষো
বিশেষো বা . ন তাবদবিশেষঃ; যস্মাত্তৌ দ্বৌ ব্যাপারৌ ভিন্নবিষযৌ
ভিন্নরূপৌ চ প্রতীযেতে এব . তথাহি বাচকত্বলক্ষণো ব্যাপারঃ
শব্দস্য স্বার্থবিষযঃ গমকত্বলক্ষণস্ত্বর্থান্তরবিষযঃ . ন চ
স্বপরব্যবহারো বাচ্যব্যঙ্গ্যযোরপহ্নোতুং শক্যঃ, একস্য সম্বন্ধিত্বেন
প্রতীতেরপরস্য সম্বন্ধিসম্বন্ধিত্বেন . বাচ্যো হ্যর্থঃ সাক্ষাচ্ছব্দস্য
সম্বন্ধী তদিতরস্ত্বভিধেযসামর্থ্যাক্ষিপ্তঃ সম্বন্ধিসম্বন্ধী . যদি
চ স্বসম্বন্ধিত্বং সাক্ষাত্তস্য স্যাত্তদার্থান্তরত্বব্যবহার এব ন স্যাত্ .
তস্মাদ্বিষযভেদস্তাবত্তযোর্ব্যাপারযোঃ সুপ্রসিদ্ধঃ . রূপভেদোঽপি প্রসিদ্ধ
এব . ন হি যৈবাভিধানশক্তিঃ সৈবাবগমনশক্তিঃ . অবাচকস্যাপি
গীতশব্দাদে রসাদিলক্ষণার্থাবগমদর্শনাত্ . অশব্দস্যাপি চেষ্টাদেরর্থ-
বিশেষপ্রকাশনপ্রসিদ্ধেঃ . তথা হি ‘ ব্রীডাযোগান্নতবদনযা’ ইত্যাদিশ্লোকে
চেষ্টাবিশেষঃ সুকবিনার্থপ্রকাশনহেতুঃ প্রদর্শিত এব . তস্মাদ্ভিন্নবিষয-
ত্বাদ্ভিন্নরূপত্বাচ্চ স্বার্থাভিধাযিত্বমর্থান্তরাবগমহেতুত্বং চ শব্দস্য
যত্তযোঃ স্পষ্ট এব ভেদঃ . বিশেষশ্চেন্ন তর্হীদানীমবগমনস্যাভিধেযসা-
মর্থ্যাক্ষিপ্তস্যার্থান্তরস্য বাচ্যত্বব্যপদেশ্যতা . শব্দব্যাপারগোচরত্বং
তু তস্যাস্মাভিরিষ্যত এব, তত্তু ব্যঙ্গ্যত্বেনৈব ন বাচ্যত্বেন . প্রসিদ্ধা-
ভিধানান্তরসম্বন্ধযোগ্যত্বেন চ তস্যার্থান্তরস্য প্রতীতেঃ শব্দান্ত-
রেণ স্বার্থাভিধাযিনা যদ্বিষযীকরণং তত্র প্রকাশনোক্তিরেব যুক্তা .
ন চ পদার্থবাক্যার্থন্যাযো বাচ্যব্যঙ্গ্যযোঃ . যতঃ পদার্থপ্রতী-
তিরসত্যৈবেতি কৈশ্চিদ্বিদ্বদ্ভিরাস্থিতম্ . যৈরপ্যসত্যত্বমস্যা নাভ্যুপেযতে
তৈর্বাক্যার্থপদার্থযোর্ঘটতদুপাদানকারণন্যাযোঽভ্যুপগন্তব্যঃ . যথাহি
ঘটে নিষ্পন্নে তদুপাদানকারণানাং ন পৃথগুপলম্ভস্তথৈব বাক্যে তদর্থে
বা প্রতীতে পদতদর্থানাং তেষাং তদা বিভক্ততযোপলম্ভে বাক্যার্থবুদ্ধিরেব
দূরীভবেত্. ন ত্বেষ বাচ্যব্যঙ্গ্যযোর্ন্যাযঃ, ন হি ব্যঙ্গ্যে প্রতীযমানে
বাচ্যবুদ্ধির্দূরীভবতি, বাচ্যাবভাসাবিনাভাবেন তস্য প্রকাশনাত্ .
তস্মাদ্ ঘটপ্রদীপন্যাযস্তযোঃ, যথৈব হি প্রদীপদ্বারেণ ঘটপ্রতীতাবুত্পন্না-
যাং ন প্রদীপপ্রকাশো নিবর্ততে তদ্ব্যঙ্গ্যপ্রতীতৌ বাচ্যাবভাসঃ . যত্তু
প্রথমোদ্দ্যোতে ‘ যথা পদার্থদ্বারেণ’ ইত্যাদ্যুক্তং তদুপাযত্বমাত্রাত্সাম্য-
বিবক্ষযা .
নন্বেবং যুগপদর্থদ্বযযোগিত্বং বাক্যস্য প্রাপ্তং তদ্ভাবে চ তস্য বা-
ক্যতৈব বিঘটতে, তস্যা ঐকার্থ্যলক্ষণত্বাত্ ; নৈষ দোষঃ ; গুণপ্রধানভা-
বেন তযোর্ব্যবস্থানাত্ . ব্যঙ্গ্যস্য হি ক্বচিত্প্রাধান্যং বাচ্যস্যোপস-
র্জনভাবঃ ক্বচিদ্বাচ্যস্য প্রাধান্যমপরস্য গুণভাবঃ . তত্র ব্যঙ্গ্যপ্রা-
ধান্যে ধ্বনিরিত্যুক্তমেব ; বাচ্যপ্রাধান্যে তু প্রকারান্তরং নির্দেক্ষ্যতে .
তস্মাত্ স্থিতমেতত্ – – – ব্যঙ্গ্যপরত্বেঽপি কাব্যস্য ন ব্যঙ্গ্যস্যাভিধে-
যত্বমপি তু ব্যঙ্গ্যত্বমেব .
কিং চ ব্যঙ্গ্যস্য প্রাধান্যেনাবিবক্ষাযাং বাচ্যত্বং তাবদ্ভবদ্ভির্না-
ভ্যুপগন্তব্যমতত্পরত্বাচ্ছব্দস্য . তদস্তি তাবদ্ব্যঙ্গ্যঃ শব্দানাং কশ্চি-
দ্বিষয ইতি . যত্রাপি তস্য প্রাধান্যং তত্রাপি কিমিতি তস্য স্বরূপম-
পহ্নূযতে . এবং তাবদ্বাচকত্বাদন্যদেব ব্যঞ্জকত্বম্ ; ইতশ্চ বাচকত্বা-
দ্ব্যঞ্জকত্বস্যান্যত্বং যদ্বাচকত্বং শব্দৈকাশ্রযমিতরত্তু শব্দাশ্রযমর্থাশ্রযং
চ শব্দার্থযোর্দ্বযোরপি ব্যঞ্জকত্বস্য প্রতিপাদিতত্বাত্ .
গুণবৃত্তিস্তূপচারেণ লক্ষণযা চোভযাশ্রযাপি ভবতি . কিন্তু
ততোঽপি ব্যঞ্জকত্বং স্বরূপতো বিষযতশ্চ ভিদ্যতে . রূপভেদস্তাবদযম্ – –
যদমুখ্যতযা ব্যাপারো গুণবৃত্তিঃ প্রসিদ্ধা . ব্যঞ্জকত্বং তু মুখ্যতযৈব
শব্দস্য ব্যাপারঃ . ন হ্যর্থাদ্ব্যঙ্গ্যত্রযপ্রতীতির্যা তস্যা অমুখ্যত্বং
মনাগপি লক্ষ্যতে .
অযং চান্যঃ স্বরূপভেদঃ – – – যদ্গুণবৃত্তিরমুখ্যত্বেন ব্যবস্থিতং বাচ-
কত্বমেবোচ্যতে . ব্যঞ্জকত্বং তু বাচকত্বাদত্যন্তং বিভিন্নমেব . এতচ্চ
প্রতিপাদিতম্ . অযং চাপরো রূপভেদো যদ্গুণবৃত্তৌ যদার্থোঽর্থান্তরমুপল-
ক্ষযতি তদোপলক্ষণীযার্থাত্মনা পরিণত এবাসৌ সম্পদ্যতে . যথা ‘ গঙ্গা-
যাং ঘোষঃ’ ইত্যাদৌ . ব্যঞ্জকত্বমার্গে তু যদার্থোঽর্থান্তরং দ্যোতযতি তদা
স্বরূপং প্রকাশযন্নেবাসাবন্যস্য প্রকাশকঃ প্রতীযতে প্রদীপবত্ . যথা – – –
‘ লীলাকমলপত্রাণি গণযামাস পার্বতী’ ইত্যাদৌ . যদি চ যত্রাতি-
রস্কৃতস্বপ্রতীতিরর্থোঽর্থান্তরং লক্ষযতি তত্র লক্ষণাব্যবহারঃ ক্রিযতে, ত-
দেবং সতি লক্ষণৈব মুখ্যঃ শব্দব্যাপার ইতি প্রাপ্তম্ . যস্মাত্প্রাযেণ
বাক্যানাং বাচ্যব্যতিরিক্ততাত্পর্যবিষযার্থাবভাসিত্বম্ .
ননু ত্বত্পক্ষেঽপি যদার্থো ব্যঙ্গ্যত্রযং প্রকাশযতি তদা শব্দস্য
কীদৃশো ব্যাপারঃ . উচ্যতে – – – প্রকরণাদ্যবচ্ছিন্নশব্দবশেনৈবার্থস্য তথা-
বিধং ব্যঞ্জকত্বমিতি শব্দস্য তত্রোপযোগঃ কথমপহ্নূযতে . বিষযভেদোঽপি
গুণবৃত্তিব্যঞ্জকত্বযোঃ স্পষ্ট এব . যতো ব্যঞ্জকত্বস্য রসাদযোঽল
ঙ্কারবিশেষা ব্যঙ্গ্যরূপাবচ্ছিন্নং বস্তু চেতি ত্রযং বিষযঃ . তত্র রসাদি-
প্রতীতির্গুণবৃত্তিরিতি ন কেনচিদুচ্যতে ন চ শক্যতে বক্তুম্ . ব্যঙ্গ্যা-
লঙ্কারপ্রতীতিরপি তথৈব . বস্তুচারুত্বপ্রতীতযে স্বশব্দানভিধেযত্বেন
যত্প্রতিপিপাদযিতুমিষ্যতে তদ্ব্যঙ্গ্যম্ . তচ্চ ন সর্বং গুণবৃত্তের্বিষযঃ
প্রসিদ্ধ্যনুরোধাভ্যামপি গৌণানাং শব্দানাং প্রযোগদর্শনাত্ . তথোক্তং
প্রাক্ . যদপি চ গুণবৃত্তের্বিষযস্তদপি চ ব্যঞ্জকত্বানুপ্রবেশেন . তস্মা-
দ্গুণবৃত্তেরপি ব্যঞ্জকত্বস্যাত্যন্তবিলক্ষণত্বম্ . বাচকত্বগুণবৃত্তিবি-
লক্ষণস্যাপি চ তস্য তদুভযাশ্রযত্বেন ব্যবস্থানম্ .
ব্যঞ্জকত্বং হি ক্বচিদ্বাচকত্বাশ্রযেণ ব্যবতিষ্ঠতে, যথা বিবক্ষিতা-
ন্যপরবাচ্যে ধ্বনৌ . ক্বচিত্তু গুণবৃত্ত্যাশ্রযেণ যথা অবিবক্ষিতবাচ্যে
ধ্বনৌ . তদুভযাশ্রযত্বপ্রতিপাদনাযৈব চ ধ্বনেঃ প্রথমতরং দ্বৌ প্রভেদাবুপ-
ন্যস্তৌ . তদুভযাশ্রিতত্বাচ্চ তদেকরূপত্বং তস্য ন শক্যতে বক্তুম্ .
যস্মান্ন তদ্বাচকত্বৈকরূপমেব, ক্বচিল্লক্ষণাশ্রযেণ বৃত্তেঃ . ন চ লক্ষণৈ-
করূপমেবান্যত্র বাচকত্বাশ্রযেণ ব্যবস্থানাত্ . ন চোভযধর্মত্বেনৈব
তদেকৈকরূপং ন ভবতি . যাবদ্বাচকত্বলক্ষণাদিরূপরহিতশব্দধর্মত্বেনা-
পি . তথাহি গীতধ্বনীনামপি ব্যঞ্জকত্বমস্তি রসাদিবিষযম্ . ন চ
তেষাং বাচকত্বং লক্ষণা বা কথঞ্চিল্লক্ষ্যতে . শব্দাদন্যত্রাপি বিষযে ব্য-
ঞ্জকত্বস্য দর্শনাদ্বাচকত্বাদিশব্দধর্মপ্রকারত্বমযুক্তং বক্তুম্ . যদি চ
বাচকত্বলক্ষণাদীনাং শব্দপ্রকারাণাং প্রসিদ্ধপ্রকারবিলক্ষণত্বেঽপি ব্যঞ্জ-
কত্বং প্রকারত্বেন পরিকল্প্যতে তচ্ছব্দস্যৈব প্রকারত্বেন কস্মান্ন পরিক-
ল্প্যতে . তদেবং শাব্দে ব্যবহারে ত্রযঃ প্রকারাঃ – – – বাচকত্বং গুণবৃত্তির্ব্য-
ঞ্জকত্বং চ . তত্র ব্যঞ্জকত্বে যদা ব্যঙ্গ্যপ্রাধান্যং তদা ধ্বনিঃ, তস্য
চাবিবক্ষিতবাচ্যো বিবক্ষিতান্যপরবাচ্যশ্চেতি দ্বৌ প্রভেদাবনুক্রান্তৌ
প্রথমতরং তৌ সবিস্তরং নির্ণীতৌ .
অন্যো ব্রূযাত্ – – – ননু বিবক্ষিতান্যপরবাচ্যে ধ্বনৌ গুণবৃত্তিতা
নাস্তীতি যদুচ্যতে তদ্যুক্তম্ . যস্মাদ্বাচ্যবাচকপ্রতীতিপূর্বিকা যত্রার্থা-
ন্তরপ্রতিপত্তিস্তত্র কথং গুণবৃত্তিব্যবহারঃ, ন হি গুণবৃত্তৌ যদা নিমি-
ত্তেন কেনচিদ্বিষযান্তরে শব্দ আরোপ্যতে অত্যন্ততিরস্কৃতস্বার্থঃ যথা – –
‘ অগ্নির্মাণবকঃ’ ইত্যাদৌ, যদা বা স্বার্থমংশেনাপরিত্যজংস্তত্সম্বন্ধদ্বা-
রেণ বিষযান্তরমাক্রামতি, যথা ‘ গঙ্গাযাং ঘোষঃ’ ইত্যাদৌ . তদাবি-
বক্ষিতবাচ্যত্বমুপপদ্যতে . অত এব চ বিবক্ষিতান্যপরবাচ্যে ধ্বনৌ বা-
চ্যবাচকযোর্দ্বযোরপি স্বরূপপ্রতীতিরর্থাবগমনং চ দৃশ্যত ইতি ব্যঞ্জ-
কত্বব্যবহারো যুক্ত্যনুরোধী . স্বরূপং প্রকাশযন্নেব পরাবভাসকো ব্য-
ঞ্জক ইত্যুচ্যতে, তথাবিধে বিষযে বাচকত্বস্যৈব ব্যঞ্জকত্বমিতি গুণ-
বৃত্তিব্যবহারো নিযমেনৈব ন শক্যতে কর্তুম্ .
অবিবক্ষিতবাচ্যস্তু ধ্বনির্গুণবৃত্তেঃ কথং ভিদ্যতে . তস্য
প্রভেদদ্বযে গুণবৃত্তিপ্রভেদদ্বযরূপতা লক্ষ্যত এব যতঃ . অযমপি
ন দোষঃ . যস্মাদবিবক্ষিতবাচ্যো ধ্বনির্গুণবৃত্তিমার্গাশ্রযোঽপি
ভবতি ন তু গুণবৃত্তিরূপ এব . গুণবৃত্তির্হি ব্যঞ্জকত্বশূন্যাপি
দৃশ্যতে . ব্যঞ্জকত্বং চ যথোক্তচারুত্বহেতুং ব্যঙ্গ্যং বিনা ন
ব্যবতিষ্ঠতে . গুণবৃত্তিস্তু বাচ্যধর্মাশ্রযেণৈব ব্যঙ্গ্যমাত্রাশ্রযেণ চাভে-
দোপচাররূপা সম্ভবতি, যথা – – – তীক্ষ্ণত্বাদগ্নির্মাণবকঃ, আহ্লাদ-
কত্বাচ্চন্দ্র এবাস্যা মুখমিত্যাদৌ . যথা চ ‘ প্রিযে জনে নাস্তি পুন-
রুক্তম্’ ইত্যাদৌ . যাপি লক্ষণরূপগুণবৃত্তিঃ সাপ্যুপলক্ষণীযার্থসংব-
ন্ধমাত্রাশ্রযেণ চারুরূপব্যঙ্গ্যপ্রতীতিং বিনাপি সম্ভবত্যেব, যথা – – –
মঞ্চাঃ ক্রোশন্তীত্যাদৌ বিষযে .
যত্র তু সা চারুরূপব্যঙ্গ্যপ্রতীতিহেতুস্তত্রাপি ব্যঞ্জকত্বানুপ্রবেশে-
নৈব বাচকত্ববত্ . অসম্ভবিনা চার্থেন যত্র ব্যবহারঃ, যথা – – –
‘ সুবর্ণপুষ্পাং পৃথিবীম্’ ইত্যাদৌ তত্র চারুরূপব্যঙ্গ্যপ্রতীতিরেব প্রযোজি-
কেতি তথাবিধেঽপি বিষযে গুণবৃত্তৌ সত্যামপি ধ্বনিব্যবহার এব
যুক্ত্যনুরোধী . তস্মাদবিবক্ষিতবাচ্যে ধ্বনৌ দ্বযোরপি প্রভেদযোর্ব্যঞ্জ-
কত্ববিশেষাবিশিষ্টা গুণবৃত্তির্ন তু তদেকরূপা সহৃদযহৃদযাহ্লাদিনী
প্রতীযমানা প্রতীতিহেতুত্বাদ্বিষযান্তরে তদ্রূপশূন্যাযা দর্শনাত্ . এতচ্চ
সর্বং প্রাক্সূচিতমপি স্ফুটতরপ্রতীতযে পুনরুক্তম্ .
অপি চ ব্যঞ্জকত্বলক্ষণো যঃ শব্দার্থযোর্ধর্মঃ স প্রসিদ্ধসম্ব-
ন্ধানুরোধীতি ন কস্যচিদ্বিমতিবিষযতামর্হতি . শব্দার্থযোর্হি প্রসিদ্ধো
যঃ সম্বন্ধো বাচ্যবাচকভাবাখ্যস্তমনুরুন্ধান এব ব্যঞ্জকত্বলক্ষণো
ব্যাপারঃ সামগ্র্যন্তরসম্বন্ধাদৌপাধিকঃ প্রবর্ততে . অত এব বাচক-
ত্বাত্তস্য বিশেষঃ . বাচকত্বং হি শব্দবিশেষস্য নিযত আত্মা ব্যু-
ত্পত্তিকালাদারভ্য তদবিনাভাবেন তস্য প্রসিদ্ধত্বাত্ . স ত্বনিযতঃ,
ঔপাধিকত্বাত্ . প্রকরণাদ্যবচ্ছেদেন তস্য প্রতীতেরিতরথা ত্বপ্রতীতেঃ .
ননু যদ্যনিযতস্তত্কিং তস্য স্বরূপপরীক্ষযা . নৈষ দোষঃ ; যতঃ
শব্দাত্মনি তস্যানিযতত্বম্, ন তু স্বে বিষযে ব্যঙ্গ্যলক্ষণে . লিঙ্গ-
ত্বন্যাযশ্চাস্য ব্যঞ্জকভাবস্য লক্ষ্যতে, যথা লিঙ্গত্বমাশ্রযেষ্বনিযতা-
বভাসম্, ইচ্ছাধীনত্বাত্ ; স্ববিষযাব্যভিচারি চ . তথৈবেদং যথা
দর্শিতং ব্যঞ্জকত্বম্ . শব্দাত্মন্যনিযতত্বাদেব চ তস্য বাচকত্বপ্র-
কারতা ন শক্যা কল্পযিতুম্ . যদি হি বাচকত্বপ্রকারতা তস্য
ভবেত্তচ্ছব্দাত্মনি নিযততাপি স্যাদ্বাচকত্ববত্ . স চ তথাবিধ
ঔপাধিকো ধর্মঃ শব্দানামৌত্পত্তিকশব্দার্থসম্বন্ধবাদিনা বাক্যতত্ত্ব-
বিদা পৌরুষাপৌরুষেযযোর্বাক্যযোর্বিশেষমভিদধতা নিযমেনাভ্যুপগন্তব্যঃ,
তদনভ্যুপগমে হি তস্য শব্দার্থসম্বন্ধনিত্যত্বে সত্যপ্যপৌরুষেযপৌরুষে-
যযোর্বাক্যযোরর্থপ্রতিপাদনে নির্বিশেষত্বং স্যাত্ . তদভ্যুপগমে তু পৌরু-
ষেযাণাং বাক্যানাং পুরুষেচ্ছানুবিধানসমারোপিতৌপাধিকব্যাপারান্তরাণাং
সত্যপি স্বাভিধেযসম্বন্ধাপরিত্যাগে মিথ্যার্থতাপি ভবেত্ .
দৃশ্যতে হি ভাবানামপরিত্যক্তস্বস্বভাবানামপি সামগ্র্যন্তর-
সম্পাতসম্পাদিতৌপাধিকব্যাপারান্তরাণাং বিরুদ্ধক্রিযত্বম্ . তথা হি – –
হিমমযূখপ্রভৃতীনাং নির্বাপিতসকলজীবলোকং শীতলত্বমুদ্বহতামেব
প্রিযাবিরহদহনদহ্যমানমানসৈর্জনৈরালোক্যমানানাং সতাং সন্তাপকারিত্বং
প্রসিদ্ধমেব . তস্মাত্পৌরুষেযাণাং বাক্যানাং সত্যপি নৈসর্গিকেঽর্থসম্বন্ধে
মিথ্যার্থত্বং সমর্থযিতুমিচ্ছতা বাচকত্বব্যতিরিক্তং কিংচিদ্রূপমৌপাধিকং
ব্যক্তমেবাভিধানীযম্ . তচ্চ ব্যঞ্জকত্বাদৃতে নান্যত্ . ব্যঙ্গ্যপ্রকাশনং
হি ব্যঞ্জকত্বম্ . পৌরুষেযাণি চ বাক্যানি প্রাধান্যেন পুরুষাভিপ্রায-
মেব প্রকাশযন্তি . স চ ব্যঙ্গ্য এব ন ত্বভিধেযঃ, তেন সহাভিধান-
স্য বাচ্যবাচকভাবলক্ষণসম্বন্ধাভাবাত্ . নন্বনেন ন্যাযেন সর্বেষা-
মেব লৌকিকানাং বাক্যানাং ধ্বনিব্যবহারঃ প্রসক্তঃ . সর্বেষামপ্যনেন
ন্যাযেন ব্যঞ্জকত্বাত্ . সত্যমেতত্; কিং তু বক্ত্রভিপ্রাযপ্রকাশনেন
যদ্ ব্যঞ্জকত্বং তত্সর্বেষামেব লৌকিকানাং বাক্যানামবিশিষ্টম্ . তত্তু
বাচকত্বান্ন ভিদ্যতে ব্যঙ্গ্যম্ হি তত্র নান্তরীযকতযা ব্যবস্থিতম্ .
ন তু বিবক্ষিতত্বেন . যস্য তু বিবক্ষিতত্বেন ব্যঙ্গ্যস্য স্থিতিঃ
তদ্ব্যঞ্জকত্বং ধ্বনিব্যবহারস্য প্রযোজকম্ .
যত্ত্বভিপ্রাযবিশেষরূপং ব্যঙ্গ্যং শব্দার্থাভ্যাং প্রকাশতে তদ্ভবতি
বিবক্ষিতং তাত্পর্যেণ প্রকাশ্যমানং সত্ . কিন্তু তদেব কেবলমপরিমিতবি-
ষযস্য ধ্বনিব্যবহারস্য ন প্রযোজকমব্যাপকত্বাত্ . তথা দর্শিতভেদ-
ত্রযরূপং তাত্পর্যেণ দ্যোত্যমানমভিপ্রাযরূপমনভিপ্রাযরূপং চ সর্বমেব
ধ্বনিব্যবহারস্য প্রযোজকমিতি যথোক্তব্যঞ্জক্ত্ববিশেষে ধ্বনিলক্ষণে
নাতিব্যাপ্তির্ন চাব্যাপ্তিঃ . তস্মাদ্বাক্যতত্ত্ববিদাং মতেন তাবদ্ব্যঞ্জক-
ত্বলক্ষণঃ শাব্দো ব্যাপারো ন বিরোধী প্রত্যুতানুগুণ এব লক্ষ্যতে .
পরিনিশ্চিতনিরপভ্রংশশব্দব্রহ্মণাং বিপশ্চিতাং মতমাশ্রিত্যৈব প্রবৃত্তোঽযং
ধ্বনিব্যবহার ইতি তৈঃ সহ কিং বিরোধাবিরোধৌ চিন্ত্যেতে . কৃত্রিম-
শব্দার্থসম্বন্ধবাদিনাং তু যুক্তিবিদামনুভবসিদ্ধ এবাযং ব্যঞ্জকভাবঃ
শব্দানামর্থান্তরাণামিবাবিরোধশ্চেতি ন প্রতিক্ষেপ্যপদবীমবতরতি .
বাচকত্বে হি তার্কিকাণাং বিপ্রতিপত্তযঃ প্রবর্তন্তাম্, কিমিদং স্বা-
ভাবিকং শব্দানামাহোস্বিত্সামযিকমিত্যাদ্যাঃ . ব্যঞ্জকত্বে তু তত্পৃ-
ষ্ঠভাবিনি ভাবান্তরসাধারণে লোকপ্রসিদ্ধ এবানুগম্যমানে কো বিম-
তীনামবসরঃ . অলৌকিকে হ্যর্থে তার্কিকাণাং বিমতযো নিখিলাঃ প্রব-
র্তন্তে ন তু লৌকিকে . ন হি নীলমধুরাদিষ্বশেষলোকেন্দ্রিযগোচরে
বাধারহিতে তত্ত্বে পরস্পরং বিপ্রতিপন্না দৃশ্যন্তে . ন হি বাধারহিতং
নীলং নীলমিতি ব্রুবন্নপরেণ প্রতিষিধ্যতে নৈতন্নীলং পীতমেতদিতি .
তথৈব ব্যঞ্জকত্বং বাচকানাং শব্দানামবাচকানাং চ গীতধ্বনীনাম-
শব্দরূপাণাং চ চেষ্টাদীনাং যত্সর্বেষামনুভবসিদ্ধমেব তত্কেনাপহ্নূযতে .
অশব্দমর্থং রমণীযং হি সূচযন্তো ব্যাহারাস্তথা ব্যাপারা নিবদ্ধা-
শ্চানিবদ্ধাশ্চ বিদগ্ধপরিষত্সু বিবিধা বিভাব্যন্তে . তানুপহাস্যতা-
মাত্মনঃ পরিহরন্ কোঽতিসন্দধীত সচেতাঃ . ব্রূযাত্, অস্ত্যতিসন্ধা-
নাবসরঃ ব্যঞ্জকত্বং শব্দানাং গমকত্বং তচ্চ লিঙ্গত্বমতশ্চ ব্যঙ্গ্য-
প্রতীতির্লিঙ্গিপ্রতীতিরেবেতি লিঙ্গিলিঙ্গভাব এব তেষাং ব্যঙ্গ্যব্যঞ্জকভাবো
নাপরঃ কশ্চিত্ . অতশ্চৈতদবশ্যমেব বোদ্ধব্যং যস্মাদ্বক্ত্রভিপ্রাযাপেক্ষযা
ব্যঞ্জকত্বমিদানীমেব ত্বযা প্রতিপাদিতং বক্ত্রভিপ্রাযশ্চানুমেযরূপ এব .
অত্রোচ্যতে – – – নন্বেবমপি যদি নাম স্যাত্তত্কিং নশ্ছিন্নম্ . বাচ-
কত্বগুণবৃত্তিব্যতিরিক্তো ব্যঞ্জকত্বলক্ষণঃ শব্দব্যাপারোঽস্তীত্যস্মা-
ভিরভ্যুপগতম্ . তস্য চৈবমপি ন কাচিত্ ক্ষতিঃ . তদ্ধি ব্যঞ্জকত্বং
লিঙ্গত্বমস্তু অন্যদ্বা . সর্বথা প্রসিদ্ধশাব্দপ্রকারবিলক্ষণত্বং শব্দব্যা-
পারবিষযত্বং চ তস্যাস্তীতি নাস্ত্যেবাবযোর্বিবাদঃ . ন পুনরযং
পরমার্থো যদ্ব্যঞ্জকত্বং লিঙ্গত্বমেব সর্বত্র ব্যঙ্গ্যপ্রতীতিশ্চ লিঙ্গিপ্রতী-
তিরেবেতি .
যদপি স্বপক্ষসিদ্ধযেঽস্মদুক্তমনূদিতং ত্বযা বক্ত্রভিপ্রাযস্য ব্যঙ্গ্য-
ত্বেনাভ্যুপগমাত্তত্প্রকাশনে শব্দানাং লিঙ্গত্বমেবেতি তদেতদ্যথাস্মাভির-
ভিহিতং তদ্বিভজ্যং প্রতিপাদ্যতে শ্রূযতাম্ – – – দ্বিবিধো বিষযঃ শব্দানাং – – –
অনুমেযঃ প্রতিপাদ্যশ্চ . তত্রানুমেযো বিবক্ষালক্ষণঃ . বিবক্ষা চ শব্দ-
স্বরূপপ্রকাশনেচ্ছা শব্দেনার্থপ্রকাশনেচ্ছা চেতি দ্বিপ্রকারা . তত্রাদ্যা ন
শাব্দব্যবহারাঙ্গম্ . সা হি প্রাণিত্বমাত্রপ্রতিপত্তিফলা . দ্বিতীযা তু
শব্দবিশেষাবধারণাবসিতব্যবহিতাপি শব্দকরণব্যবহারনিবন্ধনম্ .
তে তু দ্বে অপ্যনুমেযো বিষযঃ শব্দানাম্ . প্রতিপাদ্যস্তু প্রযোক্তুরর্থপ্রতি-
পাদনসমীহাবিষযীকৃতোঽর্থঃ .
স চ দ্বিবিধঃ – – – বাচ্যো ব্যঙ্গ্যশ্চ . প্রযোক্তা হি কদাচিত্স্বশ-
ব্দেনার্থং প্রকাশযিতুং সমীহতে কদাচিত্স্বশব্দানভিধেযত্বেন প্রযোজনা-
পেক্ষযা কযাচিত্ . স তু দ্বিবিধোঽপি প্রতিপাদ্যো বিষযঃ শব্দানাং ন
লিঙ্গিতযা স্বরূপেণ প্রকাশতে, অপি তু কৃত্রিমেণাকৃত্রিমেণ বা সম্বন্ধা-
ন্তরেণ . বিবক্ষাবিষযত্বং হি তস্যার্থস্য শব্দৈর্লিঙ্গিতযা প্রতীযতে ন তু
স্বরূপম্ . যদি হি লিঙ্গিতযা তত্র শব্দানাং ব্যাপারঃ স্যাত্তচ্ছব্দার্থে
সম্যঙ্মিথ্যাত্বাদি বিবাদা এব ন প্রবর্তেরন্ ধূমাদিলিঙ্গানুমিতানু-
মেযান্তরবত্ . ব্যঙ্গ্যশ্চার্থো বাচ্যসামর্থ্যাক্ষিপ্ততযা বাচ্যবচ্ছব্দস্য
সম্বন্ধী ভবত্যেব . সাক্ষাদসাক্ষাদ্ভাবো হি সম্বন্ধস্যাপ্রযোজকঃ .
বাচ্যবাচকভাবাশ্রযত্বং চ ব্যঞ্জকত্বস্য প্রাগেব দর্শিতম্ . তস্মাদ্বক্ত্র-
ভিপ্রাযরূপ এব ব্যঙ্গ্যে লিঙ্গতযা শব্দানাং ব্যাপারঃ . তদ্বিষযীকৃতে তু
প্রতিপাদ্যতযা . প্রতীযমানে তস্মিন্নভিপ্রাযরূপেঽনভিপ্রাযরূপে চ বাচকত্বে
নৈব ব্যাপারঃ সম্বন্ধান্তরেণ বা . ন তাবদ্বাচকত্বেন যথোক্তং প্রাক্ .
সম্বন্ধান্তরেণ ব্যঞ্জকত্বমেব . ন চ ব্যঞ্জকত্বং লিঙ্গত্বরূপমেব
আলোকাদিষ্বন্যথা দৃষ্টত্বাত্ . তস্মাত্প্রতিপাদ্যো বিষযঃ শব্দানাং ন
লিঙ্গিত্বেন সম্বন্ধী বাচ্যবত্ . যো হি লিঙ্গিত্বেন তেষাং সম্বন্ধী
যথা দর্শিতো বিষযঃ স ন বাচ্যত্বেন প্রতীযতে, অপি তূপাধিত্বেন .
প্রতিপাদ্যস্য চ বিষযস্য লিঙ্গিত্বে তদ্বিষযাণাং বিপ্রতিপত্তীনাং লৌকি-
কৈরেব ক্রিযমাণানামভাবঃ প্রসজ্যেতেতি . এতচ্চোক্তমেব .
যথা চ বাচ্যবিষযে প্রমাণান্তরানুগমেন সম্যক্ত্বপ্রতীতৌ ক্বচি-
ত্ক্রিযমাণাযাং তস্য প্রমাণান্তরবিষযত্বে সত্যপি ন শব্দব্যাপার-
বিষযতাহানিস্তদ্ব্যঙ্গ্যস্যাপি . কাব্যবিষযে চ ব্যঙ্গ্যপ্রতীতীনাং সত্যা
সত্যনিরূপণস্যাপ্রযোজকত্বমেবেতি তত্র প্রমাণান্তরব্যাপারপরীক্ষোপ-
হাসাযৈব সম্পদ্যতে . তস্মাল্লিঙ্গিপ্রতীতিরেব সর্বত্র ব্যঙ্গ্যপ্রতীতিরিতি ন
শক্যতে বক্তুম্ .
যত্ত্বনুমেযরূপব্যঙ্গ্যবিষযং শব্দানাং ব্যঞ্জকত্বং তদ্ধ্বনিব্যবহার-
স্যাপ্রযোজকম্ . অপি তু ব্যঞ্জকত্বলক্ষণঃ শব্দানাং ব্যাপার ঔত্প-
ত্তিকশব্দার্থসম্বন্ধবাদিনাপ্যভ্যুপগন্তব্য ইতি প্রদর্শনার্থমুপন্যস্তম্ .
তদ্ধি ব্যঞ্জকত্বং কদাচিল্লিঙ্গত্বেন কদাচিদ্রূপান্তরেণ শব্দানাং
বাচকানামবাচকানাং চ সর্ববাদিভিরপ্রতিক্ষেপ্যমিত্যযমস্মাভির্যত্ন
আরব্ধঃ . তদেবং গুণবৃত্তিবাচকত্বাদিভ্যঃ শব্দপ্রকারেভ্যো নিযমেনৈব
তাবদ্বিলক্ষণং ব্যঞ্জকত্বম্ . তদন্তঃপাতিত্বেঽপি তস্য হঠাদভিধীয-
মানে তদ্বিশেষস্য ধ্বনের্যত্প্রকাশনং বিপ্রতিপত্তিনিরাসায সহৃদযব্যুত্পত্তযে
বা তত্ক্রিযমাণমনতিসন্ধেযমেব . ন হি সামান্যমাত্রলক্ষণেনোপযোগি-
বিশেষলক্ষণানাং প্রতিক্ষেপঃ শক্যঃ কর্তুম্ . এবং হি সতি সত্তামাত্রল-
ক্ষণে কৃতে সকলসদ্বস্তুলক্ষণানাং পৌনরুক্ত্যপ্রসঙ্গঃ . তদেবম্ – – –
বিমতিবিষযো য আসীন্মনীষিণাং সততমবিদিতসতত্ত্বঃ .
ধ্বনিসঞ্জ্ঞিতঃ প্রকারঃ কাব্যস্য ব্যঞ্জিতঃ সোঽযম্ ..
প্রকারোঽন্যো গুণীভূতব্যঙ্গ্যঃ কাব্যস্য দৃশ্যতে .
যত্র ব্যঙ্গ্যান্বযে বাচ্যচারুত্বং স্যাত্প্রকর্ষবত্ .. ৩৪..
ব্যঙ্গ্যোঽর্থো ললনালাবণ্যপ্রখ্যো যঃ প্রতিপাদিতস্তস্য প্রাধান্যে
ধ্বনিরিত্যুক্তম্ . তস্য তু গুণীভাবেন বাচ্যচারুত্বপ্রকর্ষে গুণীভূত-
ব্যঙ্গ্যো নাম কাব্যপ্রভেদঃ প্রকল্প্যতে . তত্র বস্তুমাত্রস্য ব্যঙ্গ্যস্য
তিরস্কৃতবাচ্যেভ্যঃ প্রতীযমানস্য কদাচিদ্বাচ্যরূপবাক্যার্থাপেক্ষযা
গুণীভাবে সতি গুণীভূতব্যঙ্গ্যতা .
যথা – – –
লাবণ্যসিন্ধুরপরৈব হি কেযমত্র
যত্রোত্পলানি শশিনা সহ সম্প্লবন্তে .
উন্মজ্জতি দ্বিরদকুম্ভতটী চ যত্র
যত্রাপরে কদলিকাণ্ডমৃণালদণ্ডাঃ ..
অতিরস্কৃতবাচ্যেভ্যোঽপি শব্দেভ্যঃ প্রতীযমানস্য ব্যঙ্গ্যস্য
কদাচিদ্বাচ্যপ্রাধান্যেন কাব্যচারুত্বাপেক্ষযা গুণীভাবে সতি গুণী-
ভূতব্যঙ্গ্যতা, যথোদাহৃতম্ – – ‘ অনুরাগবতী সন্ধ্যা’ ইত্যেবমাদি .
তস্যৈব স্বযমুক্ত্যা প্রকাশীকৃতত্বেন গুণীভাবঃ, যথোদাহৃতম্ – – –
‘ সঙ্কেতকালমনসম্’ ইত্যাদি . রসাদিরূপব্যঙ্গ্যস্য গুণীভাবো রসবদ-
লঙ্কারে দর্শিতঃ ; তত্র চ তেষামাধিকারিকবাক্যাপেক্ষযা গুণীভাবো
বিবহনপ্রবৃত্তভৃত্যানুযাযিরাজবত্ . ব্যঙ্গ্যালঙ্কারস্য গুণীভাবে
দীপকাদিবিষযঃ .
তথা – – –
প্রসন্নগম্ভীরপদাঃ কাব্যবন্ধাঃ সুখাবহাঃ .
যে চ তেষু প্রকারোঽযমেব যোজ্যাঃ সুমেধসা .. ৩৫..
যে চৈতেঽপরিমিতস্বরূপা অপি প্রকাশমানাস্তথাবিধার্থরমণীযাঃ
সন্তো বিবেকিনাং সুখাবহাঃ কাব্যবন্ধাস্তেষু সর্বেষ্বেবাযং প্রকারো গুণী-
ভূতব্যঙ্গ্যো নাম যোজনীযঃ . যথা – – –
লক্ষ্মী দুহিতা জামাতা হরিঃ তথা গৃহিণী গঙ্গা .
অমৃতমৃগাঙ্কৌ চ সুতৌ অহো কুটুম্বং মহোদধেঃ ..
বাচ্যালঙ্কারবর্গোঽযং ব্যঙ্গ্যাংশানুগমে সতি .
প্রাযেণৈব পরাং ছাযাং বিভ্রল্লক্ষ্যে নিরীক্ষ্যতে .. ৩৬..
বাচ্যালঙ্কারবর্গোঽযং ব্যঙ্গ্যাংশস্যালঙ্কারস্য বস্তুমাত্রস্য বা
যথাযোগমনুগমে সতি চ্ছাযাতিশযং বিভ্রল্লক্ষণকারৈরেকদেশেন দর্শিতঃ .
স তু তথারূপঃ প্রাযেণ সর্ব এব পরীক্ষ্যমাণো লক্ষ্যে নিরীক্ষ্যতে .
তথা হি – – দীপকসমাসোক্ত্যাদিবদন্যেঽপ্যলঙ্কারাঃ প্রাযেণ ব্যঙ্গ্যালঙ্কা-
রান্তরবস্ত্বন্তরসংস্পর্শিনো দৃশ্যন্তে . যতঃ প্রথমং তাবদতিশযোক্তি-
গর্ভতা সর্বালঙ্কারেষু শক্যক্রিযা . কৃতৈব চ সা মহাকবিভিঃ কামপি
কাব্যচ্ছবিং পুষ্যতি, কথং হ্যতিশযযোগিতা স্ববিষযৌচিত্যেন ক্রিযমাণা
সতী কাব্যে নোত্কর্ষমাবহেত্ . ভামহেনাপ্যতিশযোক্তিলক্ষণে যদুক্তম্ – – –
সৈষা সর্বৈব বক্রোক্তিরনযার্থো বিভাব্যতে .
যত্নোঽস্যাং কবিনা কার্যঃ কোঽলঙ্কারোঽনযা বিনা .. ইতি .
তত্রাতিশযোক্তির্যমলঙ্কারমধিতিষ্ঠতি কবিপ্রতিভাবশাত্তস্য
চারুত্বাতিশযযোগোঽন্যস্য ত্বলঙ্কারমাত্রতৈবেতি সর্বালঙ্কারশরীরস্বী-
করণযোগ্যত্বেনাভেদোপচারাত্সৈব সর্বালঙ্কাররূপেত্যযমেবার্থোঽবগ-
ন্তব্যঃ . তস্যাশ্চালঙ্কারান্তরসংকীর্ণত্বং কদাচিদ্বাচ্যত্বেন কদচিদ্ব্য-
ঙ্গ্যত্বেন . ব্যঙ্গ্যত্বমপি কদাচিত্প্রাধান্যেন কদাচিদ্গুণভাবেন .
তত্রাদ্যে পক্ষে বাচ্যালঙ্কারমার্গঃ . দ্বিতীযে তু ধ্বনাবন্তর্ভাবঃ .
তৃতীযে তু গুণীভূতব্যঙ্গ্যরূপতা .
অযং চ প্রকারোঽন্যেষামপ্যলঙ্কারাণামস্তি, তেষাং তু ন সর্ববিষযঃ .
অতিশযোক্তেস্তু সর্বালঙ্কারবিষযোঽপি সম্ভবতীত্যযং বিশেষঃ . যেষু
চালঙ্কারেষু সাদৃশ্যমুখেন তত্ত্বপ্রতিলম্ভঃ যথা রূপকোপমাতুল্যযোগিতা-
নিদর্শনাদিষু তেষু গম্যমানধর্মমুখেনৈব যত্সাদৃশ্যং তদেব শোভাতিশয-
শালি ভবতীতি তে সর্বেঽপি চারুত্বাতিশযযোগিনঃ সন্তো গুণীভূতব্য-
ঙ্গ্যস্যৈব বিষযাঃ . সমাসোক্ত্যাক্ষেপপর্যাযোক্তাদিষু তু গম্যমানাংশাবি-
নাভাবেনৈব তত্ত্বব্যবস্থানাদ্গুণীভূতব্যঙ্গ্যতা নির্বিবাদৈব . তত্র চ
গুণীভূতব্যঙ্গ্যতাযামলঙ্কারাণাং কেষাঞ্চিদলঙ্কারবিশেষগর্ভতাযাং নিযমঃ .
যথা ব্যাজস্তুতেঃ প্রেযোঽলঙ্কারগর্ভত্বে . কেষাঞ্চিদলঙ্কারমাত্রগর্ভতাযাং
নিযমঃ . যথা সন্দেহাদীনামুপমাগর্ভত্বে . কেষাঞ্চিদলঙ্কারাণাং পরস্প-
রগর্ভতাপি সম্ভবতি . যথা দীপকোপমযোঃ . তত্র দীপকমুপমাগর্ভত্বেন
প্রসিদ্ধম্ . উপমাপি কদাচিদ্দীপকচ্ছাযানুযাযিনী . যথা মালোপমা .
তথা হি ‘ প্রভামহত্যা শিখযেব দীপঃ’ ইত্যাদৌ স্ফুটৈব দীপকচ্ছাযা
লক্ষ্যতে .
তদেবং ব্যঙ্গ্যাংশসংস্পর্শে সতি চারুত্বাতিশযযোগিনো রূপকাদযোঽ
লঙ্কারাঃ সর্ব এব গুণীভূতব্যঙ্গ্যস্য মার্গঃ . গুণীভূতব্যঙ্গ্যত্বং চ
তেষাং তথাজাতীযানাং সর্বেষামেবোক্তানুক্তানাং সামান্যম্ . তল্লক্ষণে সর্ব
এবৈতে সুলক্ষিতা ভবন্তি . একৈকস্য স্বরূপবিশেষকথনেন তু সামান্য-
লক্ষণরহিতেন প্রতিপাদপাঠেনেব শব্দা ন শক্যন্তে তত্ত্বতো নির্জ্ঞাতুম্,
আনন্ত্যাত্ . অনন্তা হি বাগ্বিকল্পাস্তত্প্রকারা এব চালঙ্কারাঃ .
গুণীভূতব্যঙ্গ্যস্য চ প্রকারান্তরেণাপি ব্যঙ্গ্যার্থানুগমলক্ষণেন
বিষযত্বমস্ত্যেব . তদযং ধ্বনিনিষ্যন্দরূপো দ্বিতীযোঽপি মহাকবিবিষ-
যোঽতিরমণীযো লক্ষণীযঃ সহৃদযৈঃ . সর্বথা নাস্ত্যেব সহৃদযহৃদযহা-
রিণঃ কাব্যস্য স প্রকারো যত্র ন প্রতীযমানার্থসংস্পর্শেন সৌভাগ্যম্ .
তদিদং কাব্যরহস্যং পরমিতি সূরিভির্ভাবনীযম্ .
মুখ্যা মহাকবিগিরামলঙ্কৃতিভৃতামপি .
প্রতীযমানচ্ছাযৈষা ভূষা লজ্জেব যোষিতাম্ .. ৩৭..
অনযা সুপ্রসিদ্ধোঽপ্যর্থঃ কিমপি কামনীযকমানীযতে .
তদ্যথা – – –
বিশ্রম্ভোত্থা মন্মথাজ্ঞাবিধানে যে মুগ্ধাক্ষ্যাঃ কেঽপি লীলাবিশেষাঃ .
অক্ষুণ্ণাস্তে চেতসা কেবলেন স্থিত্বৈকান্তে সন্ততং ভাবনীযাঃ ..
ইত্যত্র কেঽপীত্যনেন পদেন বাচ্যমস্পষ্টমভিদধতা প্রতীযমানং
বস্ত্বক্লিষ্টমনন্তমর্পযতা কা ছাযা নোপপাদিতা .
অর্থান্তরগতিঃ কাক্বা যা চৈষা পরিদৃশ্যতে .
সা ব্যঙ্গ্যস্য গুণীভাবে প্রকারমিমমাশ্রিতা .. ৩৮..
যা চৈষা কাক্বা ক্বচিদর্থান্তরপ্রতীতির্দৃশ্যতে স ব্যঙ্গ্যস্যার্থস্য
গুণীভাবে সতি গুণীভূতব্যঙ্গ্যলক্ষণং কাব্যপ্রভেদমাশ্রযতে . যথা – – –
‘ স্বস্থা ভবন্তি মযি জীবতি ধার্তরাষ্ট্রাঃ’ .
যথা বা – – –
আম্ অসত্যঃ উপরম পতিব্রতে ন ত্বযা মলিনিতং শীলম্ .
কিং পুনর্জনস্য জাযেব নাপিতং তং ন কামযামহে ..
শব্দশক্তিরেব হি স্বাভিধেযসামর্থ্যাক্ষিপ্তকাকুসহাযা সত্যর্থ-
বিশেষপ্রতিপত্তিহেতুর্ন কাকুমাত্রম্ . বিষযান্তরে স্বেচ্ছাকৃতাত্কাকুমাত্রা-
ত্তথাবিধার্থপ্রতিপত্ত্যসম্ভবাত্ . স চার্থঃ কাকুবিশেষসহাযশব্দব্যাপা-
রোপারূঢোঽপ্যর্থসামর্থ্যলভ্য ইতি ব্যঙ্গ্যরূপ এব . বাচকত্বানুগমেনৈব
তু যদা তদ্বিশিষ্টবাচ্যপ্রতীতিস্তদা গুণীভূতব্যঙ্গ্যতযা তথাবিধার্থ-
দ্যোতিনঃ কাব্যস্য ব্যপদেশঃ . ব্যঙ্গ্যবিশিষ্টবাচ্যাভিধাযিনো হি
গুণীভূতব্যঙ্গ্যত্বম্ .
প্রভেদস্যাস্য বিষযো যশ্চ যুক্ত্যা প্রতীযতে .
বিধাতব্যা সহৃদযৈর্ন তত্র ধ্বনিযোজনা .. ৩৮..
সঙ্কীর্ণো হি কশ্চিদ্ধ্বনের্গুণীভূতব্যঙ্গ্যস্য চ লক্ষ্যে দৃশ্যতে
মার্গঃ . তত্র যস্য যুক্তিসহাযতা তত্র তেন ব্যপদেশঃ কর্তব্যঃ . ন
সর্বত্র ধ্বনিরাগিণা ভবিতব্যম্ . যথা
পত্যুঃ শিরশ্চন্দ্রকলামনেন স্পৃশেতি সখ্যা পরিহাসপূর্বম্ .
সা রঞ্জযিত্বা চরণৌ কৃতাশীর্মাল্যেন তাং নির্বচনং জঘান ..
যথা চ – – –
প্রযচ্ছতোচ্চৈঃ কুসুমানি মানিনী বিপক্ষগোত্রং দযিতেন লম্ভিতা .
ন কিঞ্চিদূচে চরণেন কেবলং লিলেখ বাষ্পাকুললোচনা ভুবম্ ..
ইত্যত্র ‘ নির্বচনং জঘান’ ‘ ন কিঞ্চিদূচে’ ইতি প্রতিষেধমুখেন ব্য-
ঙ্গ্যস্যার্থস্যোক্ত্যা কিঞ্চিদ্বিষযীকৃতত্বাদ্ গুণীভাব এব শোভতে . যদা
বক্রোক্তিং বিনা ব্যঙ্গ্যোঽর্থস্তাত্পর্যেণ প্রতীযতে তদা তস্য প্রাধান্যম্ .
যথা ‘ এবং বাদিনি দেবর্ষৌ’ ইত্যাদৌ . ইহ পুনরুক্তির্ভঙ্গ্যাস্তীতি বাচ্য-
স্যাপি প্রাধান্যম্ . তস্মান্নাত্রানুরণনরূপব্যঙ্গ্যধ্বনিব্যপদেশো বিধেযঃ .
প্রকারোঽযং গুণীভূতব্যঙ্গ্যোঽপি ধ্বনিরূপতাম্ .
ধত্তে রসাদিতাত্পর্যপর্যালোচনযা পুনঃ .. ৪০..
গুণীভূতব্যঙ্গ্যোঽপি কাব্যপ্রকারো রসভাবাদিতাত্পর্যালোচনে
পুনর্ধ্বনিরেব সম্পদ্যতে . যথাত্রৈবানন্তরোদাহৃতে শ্লোকদ্বযে . যথা চ – – –
দুরারাধা রাধা সুভগ যদনেনাপি মৃজত-
স্তবৈতত্প্রাণেশাজঘনবসনেনাশ্রু পতিতম্ .
কঠোরং স্ত্রীচেতস্তদলমুপচারৈর্বিরম হে
ক্রিযাত্কল্যাণং বো হরিরনুনযেষ্বেবমুদিতঃ ..
এবং স্থিতে চ ‘ ন্যক্কারো হ্যযমেব’ ইত্যাদিশ্লোকনির্দিষ্টানাং
পদানাং ব্যঙ্গ্যবিশিষ্টবাচ্যপ্রতিপাদনেঽপ্যেতদ্বাক্যার্থীভূতরসাপেক্ষযা
ব্যঞ্জকত্বমুক্তম্ . নে তেষাং পদানামর্থান্তরসংক্রমিতবাচ্যধ্বনিভ্রমো
বিধাতব্যঃ, বিবক্ষিতবাচ্যত্বাত্তেষাম্ . তেষু হি ব্যঙ্গ্যবিশিষ্টত্বং
বাচ্যস্য প্রতীযতে ন তু ব্যঙ্গ্যরূপপরিণতত্বম্ . তস্মাদ্বাক্যং তত্র
ধ্বনিঃ, পদানি তু গুণীভূতব্যঙ্গ্যানি . ন চ কেবলং গুণীভূতব্যঙ্গ্যা-
ন্যেব পদান্যলক্ষ্যক্রমব্যঙ্গ্যধ্বনের্ব্যঞ্জকানি যাবদর্থান্তরসংক্রমিত-
বাচ্যানি ধ্বনিপ্রভেদরূপাণ্যপি . যথাত্রৈব শ্লোকে রাবণ ইত্যস্য প্রভেদা-
ন্তররূপব্যঞ্জকত্বম্ . যত্র তু বাক্যে রসাদিতাত্পর্যং নাস্তি গুণীভূত-
ব্যঙ্গ্যৈঃ পদৈরুদ্ভাসিতেঽপি তত্র গুণীভূতব্যঙ্গ্যতৈব সমুদাযধর্মঃ .
যথা – – –
রাজানমপি সেবন্তে বিষমমপ্যুপযুঞ্জতে .
রমন্তে চ সহ স্ত্রীভিঃ কুশলাঃ খলু মানবাঃ ..
ইত্যাদৌ . বাচ্যব্যঙ্গ্যযোঃ প্রাধান্যাপ্রাধান্যবিবেকে পরঃ প্রযত্নো
বিধাতব্যঃ, যেন ধ্বনিগুণীভূতব্যঙ্গ্যযোরলঙ্কারাণাং চাসঙ্কীর্ণো বিষযঃ
সুজ্ঞাতো ভবতি . অন্যথা তু প্রসিদ্ধালঙ্কারবিষয এব ব্যামোহঃ প্রব-
র্ততে . যথা – – –
লাবণ্যদ্রবিণব্যযো ন গণিতঃ ক্লেশো মহান্ স্বীকৃতঃ
স্বচ্ছন্দস্য সুখং জনস্য বসতশ্চিন্তানলো দীপিতঃ .
এষাপি স্বযমেব তুল্যরমণাভাবাদ্বরাকী হতা
কোঽর্থশ্চেতসি বেধসা বিনিহিতস্তন্ব্যাস্তনুং তন্বতা ..
ইত্যত্র ব্যাজস্তুতিরলঙ্কার ইতি ব্যাখ্যাযি কেনচিত্তন্ন চতুরস্রম্,
যতোঽস্যাভিধেযস্যৈতদলঙ্কারস্বরূপমাত্রপর্যবসাযিত্বে ন সুশ্লিষ্টা .
যতো ন তাবদযং রাগিণঃ কস্যচিদ্বিকল্পঃ . তস্য ‘ এষাপি স্বযমেব
তুল্যরমণাভাবাদ্বরাকী হতা’ ইত্যেবংবিধোক্ত্যনুপপত্তেঃ . নাপি নীরাগস্য;
তস্যৈবংবিধবিকল্পপরিহারৈকব্যাপারত্বাত্ . ন চাযং শ্লোকঃ
ক্বচিত্প্রবন্ধ ইতি শ্রূযতে, যেন তত্প্রকরণানুগতার্থতাস্য পরিকল্প্যতে .
তস্মাদপ্রস্তুতপ্রশংসেযম্ . যস্মাদনেন বাচ্যেন গুণীভূতাত্মনা নিস্সা-
মান্যগুণাবলোপাধ্মাতস্য নিজমহিমোত্কর্ষজনিতসমত্সরজনজ্বরস্য
বিশেষজ্ঞমাত্মনো ন কঞ্চিদেবাপরং পশ্যতঃ পরিদেবিতমেতদিতি প্রকাশ্যতে .
তথা চাযং ধর্মকীর্তেঃ শ্লোক ইতি প্রসিদ্ধিঃ . সম্ভাব্যতে চ তস্যৈব .
যস্মাত্ – – –
অনধ্যবসিতাবগাহনমনল্পধীশক্তিনা-
প্যদৃষ্টপরমার্থতত্ত্বমধিকাভিযোগৈরপি .
মতং মম জগত্যলব্ধসদৃশপ্রতিগ্রাহকং
প্রযাস্যতি পযোনিধেঃ পয ইব স্বদেহে জরাম্ ..
ইত্যনেনাপি শ্লোকেনৈবংবিধোঽভিপ্রাযঃ প্রকাশিত এব . অপ্রস্তুত-
প্রশংসাযাং চ যদ্বাচ্যং তস্য কদাচিদ্বিবক্ষিতত্বং, কদাচিদবিবক্ষিতত্বং,
কদাচিদ্বিবক্ষিতাবিবক্ষিতত্বমিতি ত্রযী বন্ধচ্ছাযা . তত্র বিবক্ষিত-
ত্বং যথা – – –
পরার্থে যঃ পীডামনুভবতি ভঙ্গেঽপি মধুরো
যদীযঃ সর্বেষামিহ খলু বিকারোঽপ্যভিমতঃ .
ন সম্প্রাপ্তো বৃদ্ধিং যদি স ভৃশমক্ষেত্রপতিতঃ
কিমিক্ষোর্দোষোঽসৌ ন পুনরগুণাযা মরুভুবঃ ..
যথা বা মমৈব – – –
অমী যে দৃশ্যন্তে ননু সুভগরূপাঃ সফলতা
ভবত্যেষাং যস্য ক্ষণমুপগতানাং বিষযতাম্ .
নিরালোকে লোকে কথমিদমহো চক্ষুরধুনা
সমং জাতং সর্বৈর্ন সমমথবান্যৈরবযবৈঃ ..
অনযোর্হি দ্বযোঃ শ্লোকযোরিক্ষুচক্ষুষী বিবক্ষিতস্বরূপে এব ন চ
প্রস্তুতে . মহাগুণস্যাবিষযপতিতত্বাদপ্রাপ্তপরভাগস্য কস্যচিত্স্বরূপ-
মুপবর্ণযিতুং দ্বযোরপি শ্লোকযোস্তাত্পর্যেণ প্রস্তুতত্বাত্ . অবিবক্ষিত-
ত্বং যথা – – –
কস্ত্বং ভোঃ কথযামি দৈবহতকং মাং বিদ্ধি শাখোটকং
বৈরাগ্যাদিব বক্ষি, সাধু বিদিতং কস্মাদিদং কথ্যতে .
বামেনাত্র বটস্তমধ্বগজনঃ সর্বাত্মনা সেবতে
ন চ্ছাযাপি পরোপকারকরিণী মার্গস্থিতস্যাপি মে ..
ন হি বৃক্ষবিশেষেণ সহোক্তিপ্রত্যুক্তী সম্ভবত ইত্যবিবক্ষিতাভিধে-
যেনৈবানেন শ্লোকেন সমৃদ্ধাসত্পুরুষসমীপবর্তিনো নির্ধনস্য কস্যচি-
ন্মনস্বিনঃ পরিদেবিতং তাত্পর্যেণ বাক্যার্থীকৃতমিতি প্রতীযতে .
বিবক্ষিতত্বাবিবক্ষিতত্বং যথা – – –
উত্পথজাতাযা অশোভনাযা ফলকুসুমপত্ররহিতাযাঃ .
বদর্যা বৃত্তিং দদত্পামারঃ ভোঃ হসিষ্যসে ..
অত্র হি বাচ্যার্থো নাত্যন্তং সম্ভবী ন চাসম্ভবী . তস্মাদ্বা-
চ্যব্যঙ্গ্যযোঃ প্রাধান্যাপ্রাধান্যে যত্নতো নিরূপণীযে .
প্রধানগুণভাবাভ্যাং ব্যঙ্গ্যস্যৈবং ব্যবস্থিতে .
কাব্যে উভে ততোঽন্যদ্যত্তচ্চিত্রমভিধীযতে .. ৪১
চিত্রং শব্দার্থভেদেন দ্বিবিধং চ ব্যবস্থিতম্ .
তত্র কিঞ্চিচ্ছব্দচিত্রং বাচ্যচিত্রমতঃ পরম্ .. ৪২..
ব্যঙ্গ্যস্যার্থস্য প্রাধান্যে ধ্বনিসংজ্ঞিতকাব্যপ্রকারঃ গুণভাবে তু
গুণীভূতব্যঙ্গ্যতা . ততোঽন্যদ্রসভাবাদিতাত্পর্যরহিতং ব্যঙ্গ্যার্থবিশে-
ষপ্রকাশনশক্তিশূন্যং চ কাব্যং কেবলবাচ্যবাচকবৈচিত্র্যমাত্রাশ্রযেণো-
পনিবদ্ধমালেখ্যপ্রখ্যং যদাভাসতে তচ্চিত্রম্ . ন তন্মুখ্যং কাব্যম্ .
কাব্যানুকারো হ্যসৌ . তত্র কিঞ্চিচ্ছব্দচিত্রং যথা দুষ্করযমকাদি .
বাচ্যচিত্রং ততঃ শব্দচিত্রাদন্যদ্ব্যঙ্গ্যার্থসংস্পর্শরহিতং প্রাধান্যেন
বাক্যার্থতযা স্থিতং রসাদিতাত্পর্যরহিতমুত্প্রেক্ষাদি .
অথ কিমিদং চিত্রং নাম ? যত্র ন প্রতীযমানার্থসংস্পর্শঃ . প্রতী-
যমানো হ্যর্থস্ত্রিভেদঃ প্রাক্প্রদর্শিতঃ . তত্র যত্র বস্ত্বলঙ্কারান্তরং বা
ব্যঙ্গ্যং নাস্তি স নাম চিত্রস্য কল্প্যতাং বিষযঃ . যত্র তু রসাদীনা-
মবিষযত্বং স কাব্যপ্রকারো ন সম্ভবত্যেব . যস্মাদবস্তুসংস্পর্শিতা
কাব্যস্য নোপপদ্যতে . বস্তু চ সর্বমেব জগদ্গতমবশ্যং কস্যচিদ্র-
সস্য ভাবস্য বাঙ্গত্বং প্রতিপদ্যতে অন্ততো বিভাবত্বেন . চিত্তবৃত্তিবি-
শেষা হি রসাদযঃ, ন চ তদস্তি বস্তু কিঞ্চিদ্যন্ন চিত্তবৃত্তিবিশেষ-
মুপজনযতি তদনুত্পাদনে বা কবিবিষযতৈব তস্য ন স্যাত্ কবিবিষ-
যশ্চ চিত্রতযা কশ্চিন্নিরূপ্যতে .
অত্রোচ্যতে – – – সত্যং ন তাদৃক্কাব্যপ্রকারোঽস্তি যত্র রসাদীনাম-
প্রতীতিঃ . কিং তু যদা রসভাবাদিবিবক্ষাশূন্যঃ কবিঃ শব্দালঙ্কার-
মর্থালঙ্কারং বোপনিবধ্নাতি তদা তদ্বিবক্ষাপেক্ষযা রসাদিশূন্যতার্থস্য
পরিকল্প্যতে . বিবক্ষোপারূঢ এব হি কাব্যে শব্দানামর্থঃ . বাচ্যসাম-
র্থ্যবশেন বা কবিবিবক্ষাবিরহেঽপি তথাবিধে বিষযে রসাদিপ্রতীতির্ভবন্তী
পরিদুর্বলা ভবতীত্যনেনাপি প্রকারেণ নীরসত্বং পরিকল্প্য চিত্রবিষযো
ব্যবস্থাপ্যতে . তদিদমুক্তম্ – – –
‘ রসভাবাদিবিষযবিবক্ষাবিরহে সতি .
অলঙ্কারনিবন্ধো যঃ স চিত্রবিষযো মতঃ ..
রসাদিষু বিবক্ষা তু স্যাত্তাত্পর্যবতী যদা .
তদা নাস্ত্যেব তত্কাব্যং ধ্বনের্যত্র ন গোচরঃ .. ‘
এতচ্চ চিত্রং কবীনাং বিশৃঙ্খলগিরাং রসাদিতাত্পর্যমনপেক্ষ্যৈব কাব্য-
প্রবৃত্তিদর্শনাদস্মাভিঃ পরিকল্পিতম্ . ইদানীন্তনানাং তু ন্যায্যে
কাব্যনযব্যবস্থাপনে ক্রিযমাণে নাস্ত্যেব ধ্বনিব্যতিরিক্তঃ কাব্য-
প্রকারঃ . যতঃ পরিপাকবতাং কবীনাং রসাদিতাত্পর্যবিরহে ব্যাপার
এব ন শোভতে . রসাদিতাত্পর্যে চ নাস্ত্যেব তদ্বস্তু যদভিমতরসাঙ্গতাং
নীযমানং ন প্রগুণীভবতি . অচেতনা পি হি ভাবা যথাযথমুচিত-
রসবিভাবতযা চেতনবৃত্তান্তযোজনযা বা ন সন্ত্যেব তে যে যান্তি ন
রসাঙ্গতাম্ . তথা চেদমুচ্যতে – – –
অপারে কাব্যসংসারে কবিরেকঃ প্রজাপতিঃ .
যথাস্মৈ রোচতে বিশ্বং তথেদং পরিবর্ততে ..
শৃঙ্গারী চেত্কবিঃ কাব্যে জাতং রসমযং জগত্ .
স এব বীতরাগশ্চেন্নীরসং সর্বমেব তত্ ..
ভাবানচেতনানপি চেতনবচ্চেতনানচেতনবত্ .
ব্যবহারযতি যথেষ্টং সুকবিঃ কাব্যে স্বতন্ত্রতযা ..
তস্মান্নাস্ত্যেব তদ্বস্তু যত্সর্বাত্মনা রসতাত্পর্যবতঃ কবেস্তদি-
চ্ছযা তদভিমতরসাঙ্গতাং ন ধত্তে . তথোপনিবধ্যমানং বা ন চারুত্বা-
তিশযং পুষ্ণাতি . সর্বমেতচ্চ মহাকবীনাং কাব্যেষু দৃশ্যতে . অস্মাভি-
রপি স্বেষু কাব্যপ্রবন্ধেষু যথাযথং দর্শিতমেব . স্থিতে চৈবং সর্ব এব
কাব্যপ্রকারো ন ধ্বনিধর্মতামতিপততি রসাদ্যপেক্ষাযাং কবের্গুণীভূতব্য-
ঙ্গ্যলক্ষণোঽপি প্রকারস্তদঙ্গতামবলম্বত ইত্যুক্তং প্রাক্ . যদা তু
চাটুষু দেবতাস্তুতিষু বা রসাদীনামঙ্গতযা ব্যবস্থানং হৃদযবতীষু চ
সুপ্রজ্ঞকগাথাসু কাসুচিদ্ব্যঙ্গ্যবিশিষ্টবাচ্যে প্রাধান্যং তদপি গুণীভূত-
ব্যঙ্গ্যস্য ধ্বনিনিষ্পন্দভূতত্বমেবেত্যুক্তং প্রাক্ . তদেবমিদানীংতনকবি-
কাব্যনযোপদেশে ক্রিযমাণে প্রাথমিকানামভ্যাসার্থিনাং যদি পরং চিত্রেণ
ব্যবহারঃ, প্রাপ্তপরিণতীনাং তু ধ্বনিরেব কাব্যমিতি স্থিতমেতত্ .
তদযমত্র সংগ্রহঃ – – –
যস্মিন্ রসো বা ভাবো বা তাত্পর্যেণ প্রকাশতে .
সংবৃত্ত্যাভিহিতৌ বস্তু যত্রালঙ্কার এব বা ..
কাব্যাধ্বনি ধ্বনির্ব্যঙ্গ্যপ্রাধান্যৈকনিবন্ধনঃ .
সর্বত্র তত্র বিষযী জ্ঞেযঃ সহৃদযৈর্জনৈঃ ..
সগুণীভূতব্যঙ্গ্যৈঃ সালঙ্কারৈঃ সহ প্রভেদৈঃ স্বৈঃ .
সঙ্করসংসৃষ্টিভ্যাং পুনরপ্যুদ্দ্যোততে বহুধা .. ৪৩..
তস্য চ ধ্বনেঃ স্বপ্রভেদৈর্গুণীভূতব্যঙ্গ্যেন বাচ্যালঙ্কারৈশ্চ সঙ্কর-
সংসৃষ্টিব্যবস্থাযাং ক্রিযমাণাযাং বহুপ্রভেদতা লক্ষ্যে দৃশ্যতে . তথাহি
স্বপ্রভেদসঙ্কীর্ণঃ, স্বপ্রভেদসংসৃষ্টো গুণীভূতব্যঙ্গ্যসঙ্কীর্ণো গুণীভূতব্য-
ঙ্গ্যসংসৃষ্টো বাচ্যালঙ্কারান্তরসঙ্কীর্ণো বাচ্যালঙ্কারান্তরসংসৃষ্টঃ সংসৃষ্টা-
লঙ্কারসঙ্কীর্ণঃ সংসৃষ্টালঙ্কারসংসৃষ্টশ্চেতি বহুধা ধ্বনিঃ প্রকাশতে .
তত্র স্বপ্রভেদসঙ্কীর্ণত্বং কদাচিদনুগ্রাহ্যানুগ্রাহকভাবেন . যথা – – –
‘ এবংবাদিনি দেবর্ষৌ’ ইত্যাদৌ . অত্র হ্যর্থশক্ত্যুদ্ভবানুরণনরূপব্যঙ্গ্য-
ধ্বনিপ্রভেদেনালক্ষ্যক্রমব্যঙ্গ্যধ্বনিপ্রভেদোঽনুগৃহ্যমাণঃ প্রতীযতে . এবং
কদাচিত্প্রভেদদ্বযসম্পাতসন্দেহেন . যথা – – –
ক্ষণপ্রাঘুণিকা দেবর এষা জাযযা কিমপি তে ভণিতা .
রোদিতি শূন্যবলভীগৃহেঽনুনীযতাং বরাকী ..
অত্র হ্যনুনীযতামিত্যেতত্পদমর্থান্তরসঙ্ক্রমিতবাচ্যত্বেন বিব-
ক্ষিতান্যপরবাচ্যত্বেন চ সম্ভাব্যতে . ন চান্যতরপক্ষনির্ণযে প্রমাণ-
মস্তি . একব্যঞ্জকানুপ্রবেশেন তু ব্যঙ্গ্যত্বমলক্ষ্যক্রমব্যঙ্গ্যস্য
স্বপ্রভেদান্তরাপেক্ষযা বাহুল্যেন সম্ভবতি . যথা – – – ‘ স্নিগ্ধশ্যামল’
ইত্যাদৌ . স্বপ্রভেদসংসৃষ্টত্বং চ যথা পূর্বোদাহরণ এব . অত্র হ্যর্থান্তর-
সংক্রমিতবাচ্যস্যাত্যন্ততিরস্কৃতবাচ্যস্য চ সংসর্গঃ . গুণীভূতব্যঙ্গ্য-
সঙ্কীর্ণত্বং যথা – – – ‘ ন্যক্কারো হ্যযমেব মে যদরযঃ’ ইত্যাদৌ . যথা বা – – –
কর্তা দ্যূতচ্ছলানাং জতুমযশরণোদ্দীপনঃ সোঽভিমানী
কৃষ্ণাকেশোত্তরীযব্যপনযনপটুঃ পাণ্ডবা যস্য দাসাঃ .
রাজা দুঃশাসনাদের্গুরুরনুজশতস্যাঙ্গরাজস্য মিত্রং
ক্বাস্তে দুর্যোধনোঽসৌ কথযত ন রুষা দ্রষ্টুমভ্যাগতৌ স্বঃ ..
অত্র হ্যলক্ষ্যক্রমব্যঙ্গ্যস্য বাক্যার্থীভূতস্য ব্যঙ্গ্যবিশিষ্টবাচ্যা-
ভিধাযিভিঃ পদৈঃ সম্মিশ্রতা . অত এব চ পদার্থাশ্রযত্বে গুণীভূতব্য-
ঙ্গ্যস্য বাক্যার্থাশ্রযত্বে চ ধ্বনেঃ সঙ্কীর্ণতাযামপি ন বিরোধঃ
স্বপ্রভেদান্তরবত্ . যথাহি ধ্বনিপ্রভেদান্তরাণি পরস্পরং সঙ্কীর্যন্তে
পদার্থবাক্যার্থাশ্রযত্বেন চ ন বিরুদ্ধানি .
কিং চৈকব্যঙ্গ্যাশ্রযত্বে তু প্রধানগুণভাবো বিরুধ্যতে ন তু ব্যঙ্গ্য-
ভেদাপেক্ষযা, ততোঽপ্যস্য ন বিরোধঃ . অযং চ সঙ্করসংসৃষ্টিব্যবহারো
বহূনামেকত্র বাচ্যবাচকভাব ইব ব্যঙ্গ্যব্যঞ্জকভাবেঽপি নির্বিরোধ এব
মন্তব্যঃ . যত্র তু পদানি কানিচিদবিবক্ষিতবাচ্যান্যনুরণনরূপ-
ব্যঙ্গ্যবাচ্যানি বা তত্র ধ্বনিগুণীভূতব্যঙ্গ্যযোঃ সংসৃষ্টত্বম্ . যথা – –
‘ তেষাং গোপবধূবিলাসসুহৃদাম্’ ইত্যাদৌ . অত্র হি ‘ বিলাসসুহৃদাম্’
‘ রাধারহঃসাক্ষিণাম্’ ইত্যেতে পদে ধ্বনিপ্রভেদরূপে ‘ তে’ ‘ জানে’ ইত্যেতে চ
পদে গুণীভূতব্যঙ্গ্যরূপে .
বাচ্যালঙ্কারসঙ্কীর্ণত্বমলক্ষ্যক্রমব্যঙ্গ্যাপেক্ষযা রসবতি
সালঙ্কারে কাব্যে সর্বত্র সুব্যবস্থিতম্ . প্রভেদান্তরাণামপি কদাচি-
ত্সঙ্কীর্ণত্বং ভবত্যেব . যথা মমৈব – – –
যা ব্যাপারবতী রসান্ রসযিতুং কাচিত্কবীনাং নবা
দৃষ্টির্যা পরিনিষ্ঠিতার্থবিষযোন্মেষা চ বৈপশ্চিতী .
তে দ্বে অপ্যবলম্ব্য বিশ্বমনিশং নির্বর্ণযন্তো বযং
শ্রান্তা নৈব চ লব্ধমব্ধিশযন ত্বদ্ভক্তিতুল্যং সুখম্ ..
ইত্যত্র বিরোধালঙ্কারেণার্থান্তরসংক্রমিতবাচ্যস্য ধ্বনিপ্রভেদস্য
সঙ্কীর্ণত্বম্ .
বাচ্যালঙ্কারসংসৃষ্টত্বং চ পদাপেক্ষযৈব . যত্র হি কানিচিত্পদানি
বাচ্যালঙ্কারভাঞ্জি কানিচিচ্চ ধ্বনিপ্রভেদযুক্তানি . যথা – – –
দীর্ঘীকুর্বন্ পটু মদকলং কূজিতং সারসানাং
প্রত্যূষেষু স্ফুটিতকমলামোদমৈত্ত্রীকষাযঃ .
যত্র স্ত্রীণাং হরতি সুরতগ্লানিমঙ্গানুকূলঃ
সিপ্রাবাতঃ প্রিযতম ইব প্রার্থনাচাটুকারঃ ..
অত্র হি মৈত্রীপদমবিবক্ষিতবাচ্যো ধ্বনিঃ . পদান্তরেষ্বলঙ্কারান্ত-
রাণি .
সংসৃষ্টালঙ্কারান্তরসঙ্কীর্ণো ধ্বনির্যথা – – –
দন্তক্ষতানি করজৈশ্চ বিপাটিতানি
প্রোদ্ভিন্নসান্দ্রপুলকে ভবতঃ শরীরে .
দত্তানি রক্তমনসা মৃগরাজবধ্বা
জাতস্পৃহৈর্মুনিভিরপ্যবলোকিতানি ..
অত্র হি সমাসোক্তিসংসৃষ্টেন বিরোধালঙ্কারেণ সঙ্কীর্ণস্যালক্ষ্য-
ক্রমব্যঙ্গ্যস্য ধ্বনেঃ প্রকাশনম্ . দযাবীরস্য পরমার্থতো বাক্যার্থী-
ভূতত্বাত্ .
সংসৃষ্টালঙ্কারসংসৃষ্টত্বং চ ধ্বনের্যথা – – –
অভিনবপযোধররসিতেষু পথিকশ্যামাযিতেষু দিবসেষু .
শোভতে প্রসারিতগ্রীবাণাং নৃত্তং মযূরবৃন্দানাম্ ..
অত্র হ্যুপমারূপকাভ্যাং শব্দশক্ত্যুদ্ভবানুরণনরূপব্যঙ্গ্যস্য ধ্বনেঃ
সংসৃষ্টত্বম্ .
এবং ধ্বনেঃ প্রভেদাঃ প্রভেদভেদাশ্চ কেন শক্যন্তে .
সঙ্খ্যাতুং দিঙ্মাত্রং তেষামিদমুক্তমস্মাভিঃ .. ৪৪..
অনন্তা হি ধ্বনেঃ প্রকারাঃ সহৃদযানাং ব্যুত্পত্তযে তেষাং দিঙ্মাত্রং
কথিতম্ .
ইত্যুক্তলক্ষণো যো ধ্বনির্বিবেচ্যঃ প্রযত্নতঃ সদ্ভিঃ
সত্কাব্যং কর্তুং বা জ্ঞাতুং বা সম্যগভিযুক্তৈঃ .. ৪৫..
উক্তস্বরূপধ্বনিনিরূপণনিপুণা হি সত্কবযঃ সহৃদযাশ্চ নিযতমেব
কাব্যবিষযে পরাং প্রকর্ষপদবীমাসাদযন্তি .
অস্ফুটস্ফুরিতং কাব্যতত্ত্বমেতদ্যথোদিতম্ .
অশক্নুবদ্ভির্ব্যাকর্তুং রীতযঃ সম্প্রবর্তিতাঃ .. ৪৬..
এতদ্ধ্বনিপ্রবর্তনেন নির্ণীতং কাব্যতত্ত্বমস্ফুটস্ফুরিতং সদশক্নু-
বদ্ভিঃ প্রতিপাদযিতুং বৈদর্ভী গৌডী পাঞ্চালী চেতি রীতযঃ প্রবর্তিতাঃ .
রীতিলক্ষণবিধাযিনাং হি কাব্যতত্ত্বমেতদস্ফুটতযা মনাক্স্ফুরিতমাসী-
দিতি লক্ষ্যতে তদত্র স্ফুটতযা সম্প্রদর্শিতেনান্যেন রীতিলক্ষণেন ন
কিঞ্চিত্ .
শব্দতত্ত্বাশ্রযাঃ কাশ্চিদর্থতত্ত্বযুজোঽপরাঃ .
বৃত্তযোঽপি প্রকাশন্তে জ্ঞাতেঽস্মিন্ কাব্যলক্ষণে .. ৪৭..
অস্মিন্ ব্যঙ্গ্যব্যঞ্জকভাববিবেচনমযে কাব্যলক্ষণে জ্ঞাতে সতি
যাঃ কাশ্চিত্প্রসিদ্ধা উপনাগরিকাদ্যাঃ শব্দতত্ত্বাশ্রযাঃ বৃত্তযো যাশ্চার্থ-
তত্ত্বসম্বদ্ধাঃ কৈশিক্যাদযস্তাঃ সম্যগ্রীতিপদবীমবতরন্তি . অন্যথা
তু তাসামদৃষ্টার্থানামিব বৃত্তীনামশ্রদ্ধেযত্বমেব স্যান্নানুভবসিদ্ধত্বম্ .
এবং স্ফুটতযৈব লক্ষণীযং স্বরূপমস্য ধ্বনেঃ . যত্র শব্দানামর্থানাং চ
কেষাঞ্চিত্প্রতিপত্তৃবিশেষসংবেদ্যং জাত্যত্বমিব রত্নবিশেষাণাং চারুত্বমনা-
খ্যেযমবভাসতে কাব্যে তত্র ধ্বনিব্যবহার ইতি যল্লক্ষণং ধ্বনেরুচ্যতে
কেনচিত্তদযুক্তমিতি নাভিধেযতামর্হতি . যতঃ শব্দানাং স্বরূপাশ্রয-
স্তাবদক্লিষ্টত্বে সত্যপ্রযুক্তপ্রযোগঃ . বাচকাশ্রযস্তু প্রসাদো ব্যঞ্জকত্বং
চেতি বিশেষঃ . অর্থানাং চ স্ফুটত্বেনাবভাসনং ব্যঙ্গ্যপরত্বং ব্যঙ্গ্যাংশ-
বিশিষ্টত্বম্ চেতি বিশেষঃ .
তৌ চ বিশেষৌ ব্যাখ্যাতুং শক্যেতে ব্যাখ্যাতৌ চ বহুপ্রকারম্ .
তদ্ব্যতিরিক্তানাখ্যেযবিশেষসম্ভাবনা তু বিবেকাবসাদভাবমূলৈব . যস্মা-
দনাখ্যেযত্বং সর্বশব্দাগোচরত্বেন ন কস্যচিত্সম্ভবতি . অন্ততোঽনা-
খ্যেযশব্দেন তস্যাভিধানসম্ভবাত্ . সামান্যসংস্পর্শিবিকল্পশব্দা-
গোচরত্বে সতি, প্রকাশমানত্বং তু যদনাখ্যেযত্বমুচ্যতে ক্বচিত্
তদপি কাব্যবিশেষাণাং রত্নবিশেষাণামিব ন সম্ভবতি . তেষাং
লক্ষণকারৈব্যাকৃতরূপত্বাত্ . রত্নবিশেষাণাং চ সামান্যসম্ভাবনযৈব
মূল্যস্থিতিপরিকল্পনাদর্শনাচ্চ . উভযেষামপি তেষাং প্রতিপত্তৃবিশেষসংবে-
দ্যত্বমস্ত্যেব . বৈকটিকা এব হি রত্নতত্ত্ববিদঃ, সহৃদযা এব হি
কাব্যানাং রসজ্ঞা ইতি কস্যাত্র বিপ্রতিপত্তিঃ .
যত্ত্বনির্দেশ্যত্বং সর্বলক্ষণবিষযং বৌদ্ধানাং প্রসিদ্ধং তত্তন্মতপরীক্ষাযাং
গ্রন্থান্তরে নিরূপযিষ্যামঃ . ইহ তু গ্রন্থান্তরশ্রবণলবপ্রকাশনং সহৃদয-
বৈমনস্যপ্রদাযীতি ন প্রক্রিযতে . বৌদ্ধমতেন বা যথা প্রত্যক্ষাদিলক্ষণং
তথাস্মাকং ধ্বনিলক্ষণং ভবিষ্যতি . তস্মাল্লক্ষণান্তরস্যাঘটনাদশব্দা-
র্থত্বাচ্চ তস্যোক্তমেব ধ্বনিলক্ষণং সাধীযঃ . তদিদমুক্তম্ – – –
অনাখ্যেযাংশভাসিত্বং নির্বাচ্যার্থতযা ধ্বনেঃ .
ন লক্ষণং, লক্ষণং তু সাধীযোঽস্য যথোদিতম্ ..
ইতি শ্রীরাজানকানন্দবর্ধনাচার্যবিরচিতে ধ্বন্যালোকে তৃতীয উদ্দ্যোতঃ ..
Leave a Reply