আদিপর্ব – অধ্যায় ২৫৪

আদিপর্ব – অধ্যায় ২৫৪

॥ শ্রীঃ ॥

১.২৫৪. অধ্যায়ঃ ২৫৪

(অথ ময়দর্শনপর্ব ॥ ১৯ ॥)

Mahabharata – Adi Parva – Chapter Topics

দেবেষু পরাজিতেষু অশরীরবাণীশ্রবণেন ইন্দ্রস্য নিবৃত্তিঃ॥ ১ ॥ পলায়মানং ময়ং হন্তুমুদ্যুক্তে শ্রীকৃষ্ণে আত্মানং শরণাগতস্য ময়স্য অর্জুনেনাভয়দানম্॥ ২ ॥ খাণ্ডবদাহেঽপি অশ্বসেনাদীনামদাহস্য বৈশম্পায়নেন কথনম্॥ ৩ ॥

Mahabharata – Adi Parva – Chapter Text

১-২৫৪-০ (১১০৪৩)
বৈশম্পায়ন উবাচ। ১-২৫৪-০x (১৩৩১)
তথা শৈলনিপাতেন ভীষিতাঃ খাণ্ডবালয়াঃ।
দানবা রাক্ষসা নাগাস্তরক্ষ্বৃক্ষবনৌকসঃ॥ ১-২৫৪-১ (১১০৪৪)
দ্বিপাঃ প্রভিন্নাঃ শার্দূলাঃ সিংহাঃ কেসরিণস্তথা।
মৃগাশ্চ মহিষাশ্চৈব শতশঃ পক্ষিণস্তথা॥ ১-২৫৪-২ (১১০৪৫)
সমুদ্বিগ্না বিসসৃপুস্তথান্যা ভূতজাতয়ঃ।
তং দাবং সমুদৈক্ষন্ত কৃষ্ণৌ চাভ্যুদ্যতায়ুধৌ॥ ১-২৫৪-৩ (১১০৪৬)
উৎপাতনাদশব্দেন ত্রাসিতা ইব চাভবন্।
তে বনং প্রসমীক্ষ্যাথ দহ্যমানমনেকধা॥ ১-২৫৪-৪ (১১০৪৭)
কৃষ্ণমভ্যুদ্যতাস্ত্রং চ নাদং মুমুচুরুল্বণম্।
তেন নাদেন রৌদ্রেণ নাদেন চ বিভাবসোঃ॥ ১-২৫৪-৫ (১১০৪৮)
ররাস গগনং কৃৎস্নমুৎপাতজলদৈরিব।
ততঃ কৃষ্ণো মহাবাহুঃ স্বতেজোভাস্বরং মহৎ॥ ১-২৫৪-৬ (১১০৪৯)
চক্রং ব্যসৃজদত্যুগ্রং তেষাং নাশায় কেশবঃ।
তেনার্তা জাতয়ঃ ক্ষুদ্রাঃ সদানবনিশাচরাঃ॥ ১-২৫৪-৭ (১১০৫০)
নিকৃত্তাঃ শতশঃ সর্বা নিপেতুরনলং ক্ষণাৎ।
তত্রাদৃশ্যন্ত তে দৈত্যাঃ কৃষ্ণচক্রবিদারিতাঃ॥ ১-২৫৪-৮ (১১০৫১)
বসারুধিরসংপৃক্তাঃ সন্ধ্যায়ামিব তোয়দাঃ।
পিশাচান্পক্ষিণো নাগান্পশূংশ্চৈব সহস্রশঃ॥ ১-২৫৪-৯ (১১০৫২)
নিঘ্নংশ্চরতি বার্ষ্ণেয়ঃ কালবত্তত্র ভারত।
ক্ষিপ্তং ক্ষিপ্তং পুনশ্চক্রং কৃষ্ণস্যামিত্রঘাতিনঃ॥ ১-২৫৪-১০ (১১০৫৩)
ছিত্ৎবানেকানি সৎবানি পাণিমেতি পুনঃ পুনঃ।
তথা তু নিঘ্নতস্তস্য পিশাচোরগরাক্ষসান্॥ ১-২৫৪-১১ (১১০৫৪)
বভূব রূপমত্যুগ্রং সর্বভূতাত্মনস্তদা।
সমেতানাং চ সর্বেষাং দানবানাং চ সর্বশঃ॥ ১-২৫৪-১২ (১১০৫৫)
বিজেতা নাভবৎকশ্চিৎকৃষ্ণপাণ্ডবয়োর্মৃধে।
তয়োর্বলাৎপরিত্রাতুং তং চ দাবং যদা সুরাঃ॥ ১-২৫৪-১৩ (১১০৫৬)
নাশক্নুবঞ্শময়িতুং তদাঽভূবন্পরাঙ্মুখাঃ।
শতক্রতুস্তু সংপ্রেক্ষ্য বিমুখানমরাংস্তথা॥ ১-২৫৪-১৪ (১১০৫৭)
বভূব মুদিতো রাজন্প্রশংসন্কেশবার্জুনৌ।
নিবৃত্তেষ্বথ দেবেষু বাগুবাচাশরীরিণী॥ ১-২৫৪-১৫ (১১০৫৮)
শতক্রতুং সমাভাষ্য মহাগম্ভীরনিঃস্বনা।
ন তে সখা সন্নিহিতস্তক্ষকো ভুজগোত্তমঃ॥ ১-২৫৪-১৬ (১১০৫৯)
দাহকালে খাণ্ডবস্য কুরুক্ষেত্রং গতো হ্যসৌ।
ন চ শক্যৌ যুধা জেতুং কথংচিদপি বাসব॥ ১-২৫৪-১৭ (১১০৬০)
বাসুদেবার্জুনাবেতৌ নিবোধ বচনান্মম।
নরনারায়ণাবেতৌ পূর্বদেবৌ দিবি শ্রুতৌ॥ ১-২৫৪-১৮ (১১০৬১)
ভবানপ্যভিজানাতি যদ্বীর্যৌ যৎপরাক্রমৌ।
নৈতৌ শক্যৌ দুরাধর্ষৌ বিজেতুমজিতৌ যুধি॥ ১-২৫৪-১৯ (১১০৬২)
অপি সর্বেষু লোকেষু পুরাণাবৃষিসত্তমৌ।
পূজনীয়তমাবেতাবপি সর্বৈঃ সুরাসুরৈঃ॥ ১-২৫৪-২০ (১১০৬৩)
যক্ষরাক্ষসগন্ধর্বনরকিন্নরপন্নগৈঃ।
তস্মাদিতঃ সুরৈঃ সার্ধং গন্তুমর্হসি বাসব॥ ১-২৫৪-২১ (১১০৬৪)
দিষ্টং চাপ্যনুপশ্যৈতৎখাণ্ডবস্য বিনাশনম্।
ইতি বাক্যমুপশ্রুত্য তথ্যমিত্যমরেশ্বরঃ॥ ১-২৫৪-২২ (১১০৬৫)
ক্রোধামর্ষৌ সমুৎসৃজ্য সংপ্রতস্থে দিবং তদা।
তং প্রস্থিতং মহাত্মানং সমবেক্ষ্য দিবৌকসঃ॥ ১-২৫৪-২৩ (১১০৬৬)
সহিতাঃ সেনয়া রাজন্ননুজগ্মুঃ পুরন্দরম্।
দেবরাজং তদা যান্তং সহ দেবৈরবেক্ষ্য তু॥ ১-২৫৪-২৪ (১১০৬৭)
বাসুদেবার্জুনৌ বীরৌ সিংহনাদং বিনেদতুঃ।
দেবরাজে গতে রাজন্প্রহৃষ্টৌ কেশবার্জুনৌ॥ ১-২৫৪-২৫ (১১০৬৮)
নির্বিশঙ্কং বনং বীরৌ দাহয়ামাসতুস্তদা।
স মারুত ইবাভ্রাণি নাশয়িৎবাঽর্জুনঃ সুরান্॥ ১-২৫৪-২৬ (১১০৬৯)
ব্যধমচ্ছরসঙ্ঘাতৈর্দেহিনঃ খাণ্ডবালয়ান্।
ন চ স্ম কিংচিচ্ছক্নোতি ভূতং নিশ্চরিতুং ততঃ॥ ১-২৫৪-২৭ (১১০৭০)
সংছিদ্যমানমিষুভিরস্যতা সব্যসাচিনা।
নাশক্নুবংশ্চ ভূতানি মহান্ত্যপি রণেঽর্জুনম্॥ ১-২৫৪-২৮ (১১০৭১)
নিরীক্ষিতুমমোঘাস্ত্রং যোদ্ধুং চাপি কুতো রণে।
শতং চৈকেন বিব্যাধ শতেনৈকং পতত্রিণাম্॥ ১-২৫৪-২৯ (১১০৭২)
ব্যসবস্তেঽপতন্নগ্নৌ সাক্ষাৎকালহতা ইব।
ন চালভন্ত তে শর্ম রোধঃসু বিষমেষু চ॥ ১-২৫৪-৩০ (১১০৭৩)
পিতৃদেবনিবাসেষু সন্তাপশ্চাপ্যজায়ত।
ভূতসঙ্ঘাশ্চ বহবো দীনাশ্চক্রুর্মহাস্বনম্॥ ১-২৫৪-৩১ (১১০৭৪)
রুরুদুর্বারণাশ্চৈব তথা মৃগতরক্ষবঃ।
তেন শব্দেন বিত্রেসুর্গঙ্গোদধিচরা ঝষাঃ॥ ১-২৫৪-৩২ (১১০৭৫)
বিদ্যাধরগণাশ্চৈব যে চ তত্র বনৌকসঃ।
ন ৎবর্জুনং মহাবাহো নাপি কৃষ্ণং জনার্দনম্॥ ১-২৫৪-৩৩ (১১০৭৬)
নিরীক্ষিতুং বৈ শক্নোতি কশ্চিদ্যোদ্ধুং কুতঃ পুনঃ।
একায়নগতা যেঽপি নিষ্পেতুস্তত্র কেচন॥ ১-২৫৪-৩৪ (১১০৭৭)
রাক্ষসা দানবা নাগা জঘ্নে চক্রেণ তান্হরিঃ।
তে তু ভিন্নশিরোদেহাশ্চক্রবেগাদ্গতাসবঃ॥ ১-২৫৪-৩৫ (১১০৭৮)
পেতুরন্যে মহাকায়াঃ প্রদীপ্তে বসুরেতসি।
সমাংসরুধিরৌধৈশ্চ বসাভিশ্চাপি তর্পিতঃ॥ ১-২৫৪-৩৬ (১১০৭৯)
উপর্যাকাশগো ভূৎবা বিধূমঃ সমপদ্যত।
দীপ্তাক্ষো দীপ্তজিহ্বশ্চ সংপ্রদীপ্তমহাননঃ॥ ১-২৫৪-৩৭ (১১০৮০)
দীপ্তোর্ধ্বকেশঃ পিঙ্গাক্ষঃ পিবন্প্রাণভৃতাং বসাম্।
তাং স কৃষ্ণার্জুনকৃতাং সুধাং প্রাপ্য হুতাশনঃ॥ ১-২৫৪-৩৮ (১১০৮১)
বভূব মুদিতস্তৃপ্তঃ পরাং নির্বৃতিমাগতঃ।
তথাঽসুরং ময়ং নাম তক্ষকস্য নিবেশনাৎ॥ ১-২৫৪-৩৯ (১১০৮২)
বিপ্রদ্রবন্তং সহসা দদর্শ মধুসূদনঃ।
তমগ্নিঃ প্রার্থয়ামাস দিধক্ষুর্বাতসারথিঃ॥ ১-২৫৪-৪০ (১১০৮৩)
শরীরবাঞ্জটী ভূৎবা নদন্নিব বলাহকঃ।
বিজ্ঞায় দানবেন্দ্রাণাং ময়ং বৈ শিল্পিনাং বরম্॥ ১-২৫৪-৪১ (১১০৮৪)
জিঘাংসুর্বাসুদেবস্তং চক্রমুদ্যম্য ধিষ্ঠিতঃ।
স চক্রমুদ্যতং দৃষ্ট্বা দিধক্ষন্তং চ পাবকম্॥ ১-২৫৪-৪২ (১১০৮৫)
অভিধাবার্জুনেত্যেবং ময়স্ত্রাহীতি চাব্রবীৎ।
তস্য ভীতস্বনং শ্রুৎবা মা ভৈরিতি ধনংজয়ঃ॥ ১-২৫৪-৪৩ (১১০৮৬)
প্রত্যুবাচ ময়ং পার্থো জীবয়ন্নিব ভারত।
তং ন ভেতব্যমিত্যাহ ময়ং পার্থো দয়াপরঃ॥ ১-২৫৪-৪৪ (১১০৮৭)
তং পার্থেনাভয়ে দত্তে নমুচের্ভ্রাতরং ময়ম্।
ন হন্তুমৈচ্ছদ্দাশার্হঃ পাবকো ন দদাহ চ॥ ১-২৫৪-৪৫ (১১০৮৮)
তদ্বনং পাবকো ধীমান্দিনানি দশ পঞ্চ চ।
দদাহ কৃষ্ণপার্থাভ্যাং রক্ষিতঃ পাকশাসনাৎ॥ ১-২৫৪-৪৬ (১১০৮৯)
তস্মিন্বনে দহ্যমানে ষডগ্নির্ন দদাহ চ।
অশ্বসেনং ময়ং চৈব চতুরঃ শার্ঙ্গকাংস্তথা॥ ॥ ১-২৫৪-৪৭ (১১০৯০)

ইতি শ্রীমন্মহাভারতে আদিপর্বণি ময়দর্শনপর্বণি চতুঃপঞ্চাশদধিকদ্বিশততমোঽধ্যায়ঃ॥ ২৫৪ ॥