আদিপর্ব – অধ্যায় ২৫২

আদিপর্ব – অধ্যায় ২৫২

॥ শ্রীঃ ॥

১.২৫২. অধ্যায়ঃ ২৫২

Mahabharata – Adi Parva – Chapter Topics

খাণ্ডবদাহং দৃষ্ট্বা ত্রস্তৈর্দেবৈঃ প্রার্থিতেনেন্দ্রেণ জলবর্ষণম্॥ ১ ॥

Mahabharata – Adi Parva – Chapter Text

১-২৫২-০ (১০৯৬৭)
বৈশম্পায়ন উবাচ। ১-২৫২-০x (১৩২৭)
তৌ রথাভ্যাং রথশ্রেষ্ঠৌ দাবস্যোভয়তঃ স্থিতৌ।
দিক্ষু সর্বাসু ভূতানাং চক্রাতে কদনং মহৎ॥ ১-২৫২-১ (১০৯৬৮)
যত্র যত্র চ দৃশ্যন্তে প্রাণিনঃ খাণ্ডবালয়াঃ।
পলায়ন্তঃ প্রবীরৌ তৌ তত্রতত্রাভ্যধাবতাম্॥ ১-২৫২-২ (১০৯৬৯)
ছিদ্রং ন স্ম প্রপশ্যন্তি রথয়োরাশুচারিণোঃ।
আবিদ্ধাবেব দৃশ্যেতে রথিনৌ তৌ রথোত্তমৌ॥ ১-২৫২-৩ (১০৯৭০)
খাণ্ডবে দহ্যমানে তু ভূতান্যথ সহস্রশঃ।
উৎপেতুর্ভৈরবান্নাদান্বিনদন্তঃ সমন্ততঃ॥ ১-২৫২-৪ (১০৯৭১)
দগ্ধৈকদেশা বহবো নিষ্টপ্তাশ্চ তথাঽপরে।
স্ফুটিতাক্ষা বিশীর্ণাশ্চ বিপ্লুতাশ্চ তথাঽপরে॥ ১-২৫২-৫ (১০৯৭২)
সমালিঙ্গ্য সুতানন্যে পিতৄন্ভ্রাতৄনথাঽপরে।
ত্যক্তুং ন শেকুঃ স্নেহেন তত্রৈব নিধনং গতাঃ॥ ১-২৫২-৬ (১০৯৭৩)
সন্দষ্টদশনাশ্চান্যে সমুৎপেতুরনেকশঃ।
ততস্তেঽতীব ঘূর্ণন্তঃ পুনরগ্নৌ প্রপেদিরে॥ ১-২৫২-৭ (১০৯৭৪)
দগ্ধপক্ষাক্ষিচরণা বিচেষ্টন্তো মহীতলে।
তত্রতত্র স্ম দৃশ্যন্তে বিনশ্যন্তঃ শরীরিণঃ॥ ১-২৫২-৮ (১০৯৭৫)
জলাশয়েষু তপ্তেষু ক্বাথ্যমানেষু বহ্নিনা।
গতসৎবাঃ স্ম দৃশ্যন্তে কূর্মমৎস্যাঃ সমন্ততঃ॥ ১-২৫২-৯ (১০৯৭৬)
শরীরৈরপরে দীপ্তৈর্দেহবন্ত ইবাগ্নয়ঃ।
অদৃশ্যন্ত বনে তত্র প্রাণিনঃ প্রাণিসংক্ষয়ে॥ ১-২৫২-১০ (১০৯৭৭)
কাংশ্চিদুৎপততঃ পার্থঃ শরৈঃ সংছিদ্য খণ্ডশঃ।
পাতয়ামাস বিহগান্প্রদীপ্তে বসুরেতসি॥ ১-২৫২-১১ (১০৯৭৮)
তে শরাচিতসর্বাঙ্গা নিনদন্তো মহারবান্।
ঊর্ধ্বমুৎপত্য বেগেন নিপেতুঃ খাণ্ডবে পুনঃ॥ ১-২৫২-১২ (১০৯৭৯)
শরৈরভ্যাহতানাং চ সঙ্ঘশঃ স্ম বনৌকসাম্।
বিরাবঃ শুশ্রুবে ঘোরঃ সমুদ্রস্যেব মথ্যতঃ॥ ১-২৫২-১৩ (১০৯৮০)
বহ্নেশ্চাপি প্রদীপ্তস্য খমুৎপেতুর্মহার্চিষঃ।
জনয়ামাসুরুদ্বেগং সুমহান্তং দিবৌকসাম্॥ ১-২৫২-১৪ (১০৯৮১)
তেনার্চিষা সুসন্তপ্তা দেবাঃ সর্ষিপুরোগমাঃ।
ততো জগ্মুর্মহাত্মানঃ সর্ব এব দিবৌকসঃ।
শতক্রতুং সহস্রাক্ষং দেবেশমসুরার্দনম্॥ ১-২৫২-১৫ (১০৯৮২)
দেবা ঊচুঃ। ১-২৫২-১৬x (১৩২৮)
কিং ন্বিমে মানবাঃ সর্বে দহ্যন্তে চিত্রভানুনা।
কচ্চিন্ন সংক্ষয়ঃ প্রাপ্তো লোকানামমরেশ্বর॥ ১-২৫২-১৬ (১০৯৮৩)
বৈশম্পায়ন উবাচ। ১-২৫২-১৭x (১৩২৯)
তচ্ছ্রুৎবা বৃত্রহা তেভ্যঃ স্বয়মেবান্ববেক্ষ্য চ।
খাণ্ডবস্য বিমোক্ষার্থং প্রয়যৌ হরিবাহনঃ॥ ১-২৫২-১৭ (১০৯৮৪)
মহতা রথবৃন্দেন নানারূপেণ বাসবঃ।
আকাশং সমবাকীর্য প্রববর্ষ সুরেশ্বরঃ॥ ১-২৫২-১৮ (১০৯৮৫)
ততোঽক্ষমাত্রা ব্যসৃজন্ধারাঃ শতসহস্রশঃ।
চোদিতা দেবরাজেন জলদাঃ খাণ্ডবং প্রতি॥ ১-২৫২-১৯ (১০৯৮৬)
অসংপ্রাপ্তাস্তু তা ধারাস্তেজসা জাতবেদসঃ।
খ এব সমুশুষ্যন্ত নকাশ্চিৎপাবকং গতাঃ॥ ১-২৫২-২০ (১০৯৮৭)
ততো নমুচিহা ক্রুদ্ধো ভৃশমর্চিষ্মতস্তদা।
পুনরেব মহামেঘৈরম্ভাংসি ব্যসৃজদ্বহু॥ ১-২৫২-২১ (১০৯৮৮)
অর্চির্ধারাভিসংবদ্ধং ধূমবিদ্যুৎসমাকুলম্।
বভূব তদ্বনং ঘোরং স্তনয়িত্নুসমাকুলম্॥ ॥ ১-২৫২-২২ (১০৯৮৯)

ইতি শ্রীমন্মহাভারতে আদিপর্বণি খাণ্ডবদাহপর্বণি দ্বিপঞ্চাশদধিকদ্বিশততমোঽধ্যায়ঃ॥ ২৫২ ॥

Mahabharata – Adi Parva – Chapter Footnotes

১-২৫২-৩ আবিদ্ধাবেব অলাতচক্রবদ্ভ্রামিতাবেব॥ দ্বিপঞ্চাশদধিকদ্বিশততমোঽধ্যায়ঃ॥ ২৫২ ॥