আদিপর্ব – অধ্যায় ২৪৮
॥ শ্রীঃ ॥
১.২৪৮. অধ্যায়ঃ ২৪৮
(অথ খাণ্ডবদাহপর্ব ॥ ১৮ ॥)
Mahabharata – Adi Parva – Chapter Topics
যুধিষ্ঠিরস্য রাজ্যপরিপালনপ্রকারবর্ণনম্॥ ১ ॥ তত্রৈব নিবসতা শ্রীকৃষ্ণেন সহার্জুনস্য জলক্রীডার্থং যমুনাং প্রতি গমনম্॥ ২ ॥ সস্ত্রীকয়োস্তয়োর্জলক্রীডাবর্ণনম্॥ ৩ ॥ ব্রাহ্মণরূপস্যাগ্নেস্তত্রাগমনম্॥ ৪ ॥
Mahabharata – Adi Parva – Chapter Text
১-২৪৮-০ (১০৭৭৪)
বৈশম্পায়ন উবাচ। ১-২৪৮-০x (১৩১৪)
ইন্দ্রপ্রস্থে বসন্তস্তে জঘ্রুরন্যান্নরাধিপান্।
শাসনাদ্ধৃতরাষ্ট্রস্য রাজ্ঞঃ শান্তনবস্য চ॥ ১-২৪৮-১ (১০৭৭৫)
আশ্রিত্য ধর্মরাজানং সর্বলোকোঽবসৎসুখম্।
পুণ্যলক্ষণকর্মাণং স্বদেহমিব দেহিনঃ॥ ১-২৪৮-২ (১০৭৭৬)
স সমং ধর্মকামার্থান্সিষেবে ভরতর্ষভ।
ত্রীনিবাত্মসমান্বন্ধূন্নীতিমানিব মানয়ন্॥ ১-২৪৮-৩ (১০৭৭৭)
তেষাং সমবিভক্তানাং ক্ষিতৌ দেহবতামিব।
বভৌ ধর্মার্থকামানাং চতুর্থ ইব পার্থিবঃ॥ ১-২৪৮-৪ (১০৭৭৮)
অধ্যেতারং পরং বেদান্প্রয়োক্তারং মহাধ্বরে।
রক্ষিতারং শুভাঁল্লোকাঁল্লোভিরে তং জনাধিপম্॥ ১-২৪৮-৫ (১০৭৭৯)
অধিষ্ঠানবতী লক্ষ্মীঃ পরায়ণবতী মতিঃ।
বর্ধমানোঽখিলো ধর্মস্তেনাসীৎপৃথিবীক্ষিতাম্॥ ১-২৪৮-৬ (১০৭৮০)
ভ্রাতৃভিঃ সহিতৌ রাজা চতুর্ভিরধিকং বভৌ।
প্রয়ুজ্যমানৈর্বিততো বেদৈরিব মহাধ্বরঃ॥ ১-২৪৮-৭ (১০৭৮১)
তং তু ধৌম্যাদয়ো বিপ্রাঃ পরিবার্যোপতস্থিরে।
বৃহস্পতিসমা মুখ্যাঃ প্রজাপতিমিবামরাঃ॥ ১-২৪৮-৮ (১০৭৮২)
ধর্মরাজে হ্যতিপ্রীত্যা পূর্ণচন্দ্র ইবামলে।
প্রজানাং রেমিরে তুল্যং নেত্রাণি হৃদয়ানি চ॥ ১-২৪৮-৯ (১০৭৮৩)
ন তু কেবলদৈবেন প্রজা ভাবেন রেমিরে।
যদ্বভূব মনঃকান্তং কর্মণা স চকার তৎ॥ ১-২৪৮-১০ (১০৭৮৪)
ন হ্যযুক্তং ন চাসত্যং নাসহ্যং ন চ বাঽপ্রিয়ম্।
ভাষিতং চারুভাষস্য জজ্ঞে পার্থস্য ধীমতঃ॥ ১-২৪৮-১১ (১০৭৮৫)
স হি সর্বস্য লোকস্য হিতমাত্মন এব চ।
চিকীর্ষন্সুমহাতেজা রেমে ভরতসত্তম॥ ১-২৪৮-১২ (১০৭৮৬)
তথা তু মুদিতাঃ সর্বে পাণ্ডবা বিগতজ্বরাঃ।
অবসন্পৃথিবীপালাঁস্তাপয়ন্তঃ স্বতেজসা॥ ১-২৪৮-১৩ (১০৭৮৭)
ততঃ কতিপয়াহস্য বীভৎসুঃ কৃষ্ণমব্রবীৎ।
উষ্ণানি কৃষ্ণ বর্তন্তে গচ্ছাবো যমুনাং প্রতি॥ ১-২৪৮-১৪ (১০৭৮৮)
সুহৃজ্জনবৃতৌ তত্র বিহৃত্য মধুসূদন।
সায়াহ্নে পুনরেষ্যাবো রোচতাং তে জনার্দন॥ ১-২৪৮-১৫ (১০৭৮৯)
বাসুদেব উবাচ। ১-২৪৮-১৬x (১৩১৫)
কুন্তীমাতর্মমাপ্যেতদ্রোচতে যদ্বয়ং জলে।
সুহৃজ্জনবৃতাঃ পার্থ বিহরেম যথাসুখম্॥ ১-২৪৮-১৬ (১০৭৯০)
বৈশম্পায়ন উবাচ। ১-২৪৮-১৭x (১৩১৬)
আমন্ত্র্য তৌ ধর্মরাজমনুজ্ঞাপ্য চ ভারত।
জগ্মতুঃ পার্থগোবিন্দৌ সুহৃজ্জনবৃতৌ ততঃ॥ ১-২৪৮-১৭ (১০৭৯১)
`বিহরন্খাণ্ডবপ্রস্থে কাননেষু চ মাধবঃ।
পুষ্পিতোপবনাং দিব্যাং দদর্শ যমুনাং নদীম্॥ ১-২৪৮-১৮ (১০৭৯২)
তস্যাস্তীরে বনং দিব্যং সর্বর্তুসুমনোহরম্।
আলয়ং সর্বভূতানাং খাণ্ডবং খড্গচর্মভৃৎ॥ ১-২৪৮-১৯ (১০৭৯৩)
দদর্শ কৃৎস্নং তং দেশং সহিতঃ সব্যসাচিনা।
ঋক্ষগোমায়ুশার্দূলবৃককৃষ্ণমৃগান্বিতম্॥ ১-২৪৮-২০ (১০৭৯৪)
শাখামৃগগণৈর্জুষ্টং গজদ্বীপিনিষেবিতম্।
শকবর্হিণদাত্যূহহংসসারসনাদিতম্॥ ১-২৪৮-২১ (১০৭৯৫)
নানামৃগসহস্রৈশ্চ পক্ষিভিশ্চ সমাবৃতম্।
মানার্হং তচ্চ সর্বেষাং দেবদানবরক্ষসাম্॥ ১-২৪৮-২২ (১০৭৯৬)
আলয়ং পন্নগেন্দ্রস্য তক্ষকস্য মহাত্মনঃ।
বেণুশাল্মলিবিল্বাতিমুক্তজংব্বাম্রচম্পকৈঃ॥ ১-২৪৮-২৩ (১০৭৯৭)
অঙ্কোলপনসাশ্বত্থতালজম্বীরবঞ্জুলৈঃ।
একপদ্মকতালৈশ্চ শতশশ্চৈব রৌহিণৈঃ॥ ১-২৪৮-২৪ (১০৭৯৮)
নানাবৃক্ষৈঃ সমায়ুক্তং নানাগুল্মসমাবৃতম্।
বেত্রকীচকসংয়ুক্তমাশীবিষনিষেবিতম্॥ ১-২৪৮-২৫ (১০৭৯৯)
বিগতার্কং মহাভোগবিততদ্রুমসঙ্কটম্।
ব্যালদংষ্ট্রিগণাকীর্ণং বর্জিতং সর্বমানুষৈঃ॥ ১-২৪৮-২৬ (১০৮০০)
রক্ষসাং ভুজগেন্দ্রাণাং পক্ষিণাং চ মহালয়ম্।
খাণ্ডবং সুমহাপ্রাজ্ঞঃ সর্বলোকবিভাগবিৎ॥ ১-২৪৮-২৭ (১০৮০১)
দৃষ্টবান্সর্বলোকেশ অর্জুনেন সমন্বিতঃ।
পীতাম্বরধরো দেবস্তদ্বনং বহুধা চরন্॥ ১-২৪৮-২৮ (১০৮০২)
সদ্রুমস্য সয়ক্ষস্য সভূতগণপক্ষিণঃ।
খাণ্ডবস্য বিনাশং তং দদর্শ মধুসূদনঃ॥’ ১-২৪৮-২৯ (১০৮০৩)
বিহারদেশং সংপ্রাপ্য নানাদ্রুমমনুত্তমম্।
গৃহৈরুচ্চাবচৈর্যুক্তং পুরন্দরপুরোপমম্॥ ১-২৪৮-৩০ (১০৮০৪)
ভক্ষ্যৈর্ভোজ্যৈশ্চ পেয়ৈশ্চ রসবদ্বির্মহাধনৈঃ।
মাল্যৈশ্চ বিবিধৈর্গন্ধৈস্তথা বার্ষ্মেয়পাণ্ডবৌ॥ ১-২৪৮-৩১ (১০৮০৫)
তদা বিবিশতুঃ পূর্ণং রত্নৈরুচ্চাবচৈঃ শুভৈঃ।
যথোপজোষং সর্বশ্চ জনশ্চিক্রীড ভারত॥ ১-২৪৮-৩২ (১০৮০৬)
স্ত্রিয়শ্চ বিপুলশ্রোষ্ণ্যশ্চারুপীনপয়োধরাঃ।
মদস্খলিতগামিন্যশ্চিক্রীডুর্বামলোচনাঃ॥ ১-২৪৮-৩৩ (১০৮০৭)
বনে কাশ্চিজ্জলে কাশ্চিৎকাশ্চিদ্বেশ্মসু চাঙ্গনাঃ।
যথাদেশং যথাপ্রীতি চিক্রীডুঃ পার্থকৃষ্ণয়োঃ॥ ১-২৪৮-৩৪ (১০৮০৮)
বাসুদেবপ্রিয়া নিত্যং সত্যভামা চ ভামিনী।
দ্রৌপদী চ সুভদ্রা চ বাসাংস্যাভরণানি চ।
প্রায়চ্ছন্ত মহারাজ স্ত্রীণাং তাঃ স্ম মদোৎকটাঃ॥ ১-২৪৮-৩৫ (১০৮০৯)
কাশ্চিৎপ্রহৃষ্টা ননৃতুশ্চুক্রুশুশ্চ তথা পরাঃ।
জহসুশ্চ পরা নার্যঃ পপুশ্চান্যা বরাসবম্॥ ১-২৪৮-৩৬ (১০৮১০)
রুরুধুশ্চাপরাস্তত্র প্রজঘ্নুশ্চ পরস্পরম্।
মন্ত্রয়ামাসুরন্যাশ্চ রহস্যানি পরস্পরম্॥ ১-২৪৮-৩৭ (১০৮১১)
বেণুবীণামৃদঙ্গানাং মনোজ্ঞানাং চ সর্বশঃ।
শব্দেন পূর্যতে হর্ম্যং তদ্বনং সুমহর্দ্ধিমৎ॥ ১-২৪৮-৩৮ (১০৮১২)
তস্মিংস্তদা বর্তমানো কুরুদাশার্হনন্দনৌ।
সমীপং জগ্মতুঃ কংচিদুদ্দেশং সুমনোহরম্॥ ১-২৪৮-৩৯ (১০৮১৩)
তত্র গৎবা মহাত্মানৌ কৃষ্ণৌ পরপুরঞ্জয়ৌ।
মহার্হাসনয়ো রাজংস্ততস্তৌ সন্নিষীদতুঃ॥ ১-২৪৮-৪০ (১০৮১৪)
তত্র পূর্বব্যতীতানি বিক্রান্তানীতরাণি চ।
বহূনি কথয়িৎবা তৌ রেমাতে পার্থমাধবৌ॥ ১-২৪৮-৪১ (১০৮১৫)
তত্রোপবিষ্টৌ মুদিতৌ নাকপৃষ্ঠেঽশ্বিনাবিব।
অভ্যাগচ্ছত্তদা বিপ্রো বাসুদেবধনঞ্জয়ৌ॥ ১-২৪৮-৪২ (১০৮১৬)
বৃহচ্ছালপ্রতীকাশঃ প্রতপ্তকনকপ্রভঃ।
হরিপিঙ্গোজ্জ্বলশ্মশ্রুঃ প্রমাণায়ামতঃ সমঃ॥ ১-২৪৮-৪৩ (১০৮১৭)
তরুণাদিত্যসঙ্কাশশ্চীরবাসা জটাধরঃ।
পদ্মপত্রাননঃ পিঙ্গস্তেজসা প্রজ্বলন্নিব॥ ১-২৪৮-৪৪ (১০৮১৮)
জগাম তৌ কৃষ্ণপার্থৌ দিধক্ষুঃ খাণ্ডবং বনম্।
উপসৃষ্টং তু তং কৃষ্ণো ভ্রাজমানং দ্বিজোত্তমম্।
অর্জনো বাসুদেবশ্চ তূর্ণমুৎপত্য তস্থতুঃ॥ ॥ ১-২৪৮-৪৫ (১০৮১৯)
ইতি শ্রীমন্মহাভারতে আদিপর্বণি খাণ্ডবদাহপর্বণি অষ্টচৎবারিংশদধিকদ্বিশততমোঽধ্যায়ঃ॥ ২৪৮ ॥
Mahabharata – Adi Parva – Chapter Footnotes
১-২৪৮-১৪ উষ্ণানি নিধাধদিনানি॥ ১-২৪৮-১৬ কুন্তী মাতা যস্যেতি নেকুন্তামাতর্হেঽর্জুন॥ ১-২৪৮-৩০ গৃহৈঃ মধ্যেয়মুনং নির্মিতৈঃ ক্রীডাবাপ্যাদিয়ুক্তৈঃ॥ ১-২৪৮-৩৯ উদ্দেশং প্রদেশম্॥ ১-২৪৮-৪৩ হরিপিঙ্গঃ নীলপীতাখিলাঙ্গঃ। জ্বলশ্মশ্রুঃ জ্বালাবৎপীতশ্মশ্রুঃ॥ অষ্টচৎবারিংশদধিকদ্বিশততমোঽধ্যায়ঃ॥ ২৪৮ ॥