আদিপর্ব – অধ্যায় ২৩৯

আদিপর্ব – অধ্যায় ২৩৯

॥ শ্রীঃ ॥

১.২৩৯. অধ্যায়ঃ ২৩৯

(অথ সুভদ্রাহরণপর্ব ॥ ১৬ ॥)

Mahabharata – Adi Parva – Chapter Topics

রবৈতকপর্বতংপ্রতি উৎসবার্থং কৃষ্ণাদীনাং গমনম্॥ ১ ॥ তত্র কৃষ্ণস্য পরিব্রাজকরূপার্জুনদর্শনম্॥ ২ ॥ সুভদ্রাদর্শনেন তস্যাং সংজাতহৃচ্ছয়স্যার্জুনস্য যতিরূপেণ সুভদ্রাহরণে কুষ্ণানুজ্ঞালাভঃ॥ ৩ ॥ দূতেনিবেদিতৈতদ্বৃত্তান্তেন সপরিবারেণ যুধিষ্ঠিরেণাভ্যনুজ্ঞানম্॥ ৪ ॥

Mahabharata – Adi Parva – Chapter Text

১-২৩৯-০ (১০৩১৩)
বৈশম্পায়ন উবাচ। ১-২৩৯-০x (১২৮৫)
ততঃ কতিপয়াহস্য তস্মিন্রৈবতকে গিরৌ।
বৃষ্ণ্যন্ধকানামভবদুৎসবো নৃপসত্তম॥ ১-২৩৯-১ (১০৩১৪)
তত্র দানং দদুর্বীরা ব্রাহ্মণেভ্যঃ সহস্রশঃ।
ভোজবৃষ্ণ্যন্ধকাশ্চৈব মহে তস্য গিরেস্তদা॥ ১-২৩৯-২ (১০৩১৫)
প্রসাদৈ রত্নচিত্রৈশ্চ গিরেস্তস্য সমন্ততঃ।
স দেশঃ শোভিতো রাজন্কল্পবৃক্ষৈশ্চ সর্বশঃ॥ ১-২৩৯-৩ (১০৩১৬)
বাদিত্রাণি চ তত্রান্যে বাদকাঃ সমবাদয়ন্।
ননৃতুর্নর্তকাশ্চৈব জগুর্গেয়ানি গায়নাঃ॥ ১-২৩৯-৪ (১০৩১৭)
অলঙ্কৃতাঃ কুমারাশ্চ বৃষ্ণীনাং সুমহৌজসাম্।
যানৈর্হাটকচিত্রৈশ্চ চঞ্চূর্যন্তে স্ম সর্বশঃ॥ ১-২৩৯-৫ (১০৩১৮)
পৌরাশ্চ পাদচারেণ যানৈরুচ্চাবচৈস্তথা।
সদারাঃ সানুয়াত্রাশ্চ শতশোঽথ সহস্রশঃ॥ ১-২৩৯-৬ (১০৩১৯)
ততো হলধরঃ ক্ষীবো রেবতীসহিতঃ প্রভুঃ।
অনুগম্যমানো গন্ধর্বৈরচরত্রত্র ভারত॥ ১-২৩৯-৭ (১০৩২০)
তথৈব রাজা বৃষ্ণীনামুগ্রসেনঃ প্রতাপবান্।
অনুগীয়মানো গন্ধর্বৈঃ স্ত্রীসহস্রসহায়বান্॥ ১-২৩৯-৮ (১০৩২১)
রৌক্মিণেয়শ্চ সাম্বশ্চ ক্ষীবৌ সমরদুর্মদৌ।
দিব্যমাল্যাম্বরধরৌ বিজহ্বাতেঽমরাবিব॥ ১-২৩৯-৯ (১০৩২২)
অক্রূরঃ সারণশ্চৈব গদো বভ্রুর্বিদূরথঃ।
নিশঠশ্চারুদেষ্ণশ্চ পৃথুর্বিপৃথুরেব চ॥ ১-২৩৯-১০ (১০৩২৩)
সত্যকঃ সাত্যকিশ্চৈব ভঙ্গকারমহারবৌ।
হার্দিক্য উদ্ধবশ্চৈব যে চান্যে নানুকীর্তিতাঃ॥ ১-২৩৯-১১ (১০৩২৪)
এতে পরিবৃতাঃ স্ত্রীভির্গন্ধর্বৈশ্চ পৃথক্পৃথক্।
তমুৎসবং রৈবতকে শোভয়াঞ্চক্রিরে তদা॥ ১-২৩৯-১২ (১০৩২৫)
`বাসদেবো যয়ৌ তত্র সহ স্ত্রীভির্মুদান্বিতঃ।
দত্ৎবা দানং দ্বিজাতিভ্যঃ পরিব্রাজমপশ্যত॥’ ১-২৩৯-১৩ (১০৩২৬)
চিত্রকৌতূহলে তস্মিন্বর্তমানে মহাদ্ভুতে।
বাসুদেবশ্চ পার্থশ্চ সহিতৌ পরিজগ্মতুঃ॥ ১-২৩৯-১৪ (১০৩২৭)
তত্র চঙ্ক্রমমাণৌ তৌ বসুদেবসুতাং শুভাম্।
অলঙ্কৃতাং সখীমধ্যে ভদ্রাং দদৃশতুস্তদা॥ ১-২৩৯-১৫ (১০৩২৮)
দৃষ্ট্বৈব তামর্জুনস্য কন্দর্পঃ সমজায়ত।
তং তদৈকাগ্রমনসং কৃষ্ণঃ পার্থমলক্ষয়ৎ॥ ১-২৩৯-১৬ (১০৩২৯)
অব্রবীৎপুরুষব্যাঘ্রঃ প্রসহন্নিব ভারত।
বনেচরস্য কিমিদং কামেনালোড্যতে মনঃ॥ ১-২৩৯-১৭ (১০৩৩০)
মমৈষা ভগিনী পার্থ সারণস্য সহোদরী।
সুভদ্রা নাম ভদ্রং তে পিতুর্মে দয়িতা সুতা।
যদি তে বর্ততে বুদ্ধির্বক্ষ্যামি পিতরং স্বয়ম্॥ ১-২৩৯-১৮ (১০৩৩১)
অর্জুন উবাচ। ১-২৩৯-১৯x (১২৮৬)
দুহিতা বসুদেবস্য বাসুদেবস্য চ স্বসা।
রূপেণ চৈষা সংপন্না কমিবৈষা ন মোহয়েৎ॥ ১-২৩৯-১৯ (১০৩৩২)
কৃতমেব তু কল্যাণং সর্বং মম ভবেদ্ধ্রুবম্।
যদি স্যান্মম বার্ষ্ণেয়ী মহিষীয়ং স্বসা তব॥ ১-২৩৯-২০ (১০৩৩৩)
প্রাপ্তৌ তু ক উপায়ঃ স্যাত্তং ব্রবীহি জনার্দন।
আস্থাস্যামি তদা সর্বং যদি শক্যং নরেণ তৎ॥ ১-২৩৯-২১ (১০৩৩৪)
বাসুদেব উবাচ। ১-২৩৯-২২x (১২৮৭)
স্বয়ং বরঃ ক্ষত্রিয়াণাং বিবাহঃ পুরুষর্ষভ।
স চ সংশয়িতঃ পার্থ স্বভাবস্যানিমিত্ততঃ॥ ১-২৩৯-২২ (১০৩৩৫)
প্রসহ্য হরণং চাপি ক্ষত্রিয়াণাং প্রশস্যতে।
বিবাহহেতুঃ শূরাণামিতি ধর্মবিদো বিদুঃ॥ ১-২৩৯-২৩ (১০৩৩৬)
স ৎবমর্জুন কল্যাণীং প্রসহ্য ভগিনীং মম।
`যতিরূপধরস্তং তু যথা কালবিপাকতা।’
হর স্বয়ংবরে হ্যস্যাঃ কো বৈ বেদ চিকীর্ষিতম্॥ ১-২৩৯-২৪ (১০৩৩৭)
বৈশম্পায়ন উবাচ। ১-২৩৯-২৫x (১২৮৮)
ততোঽর্জুনশ্চ কৃষ্ণশ্চ বিনিশ্চিত্যেতিকৃত্যতাম্।
শীঘ্রগান্পুরুষানন্প্রেষয়ামাসতুস্তদা॥ ১-২৩৯-২৫ (১০৩৩৮)
ধর্মরাজায় তৎসর্বমিন্দ্রপ্রস্থগতায় বৈ।
শ্রুৎবৈব চ মহাবাহুরনুজজ্ঞে সমাতৃকঃ॥ ১-২৩৯-২৬ (১০৩৩৯)
`ভীমসেনস্তু তচ্ছ্রুৎবা কৃতকৃত্যং স্ম মন্যতে।
ইত্যেবং মনুজৈরুক্তং কৃষ্ণঃ শ্রুৎবা মহামতিঃ॥ ১-২৩৯-২৭ (১০৩৪০)
অনুজ্ঞাপ্য তদা পার্থং হৃদি স্থাপ্য চিকীর্ষিতম্।
ইত্যেবং মনুজৈঃ সার্ধং দ্বারকাং সমুপেয়িবান্॥ ॥ ১-২৩৯-২৮ (১০৩৪১)

ইতি শ্রীমন্মহাভারতে আদিপর্বণি সুভদ্রাহরণপর্বণি ঊনচৎবারিংশদধিকদ্বিশততমোঽধ্যায়ঃ॥ ২৩৯ ॥

Mahabharata – Adi Parva – Chapter Footnotes

১-২৩৯-৫ চঞ্চূর্যন্তে দেদীপ্যন্তে॥ ১-২৩৯-৭ ক্ষীবো মধুমত্তঃ॥ ১-২৩৯-২২ স্বভাবস্যানিমিত্ততঃ স্ত্রীচিত্তস্য শৌর্যপাণ্ডিত্যাদ্যনপেক্ষৎবাৎ। স্ত্রিয়ো হ্যপরীক্ষিতেপি পুংসি আপাততো রমণীয়ে সদ্যঃ সকামা ভবন্তীতি ভাবঃ॥ ঊনচৎবারিংশদধিকদ্বিশততমোঽধ্যায়ঃ॥ ২৩৯ ॥