আদিপর্ব – অধ্যায় ২৩৪

আদিপর্ব – অধ্যায় ২৩৪

॥ শ্রীঃ ॥

১.২৩৪. অধ্যায়ঃ ২৩৪

Mahabharata – Adi Parva – Chapter Topics

ব্রাহ্মণৈঃ সহ তীর্থান্যটতোঽর্জুনস্য স্নানার্থং গঙ্গায়ামবতরণম্॥ ১ ॥ তত্র উলূপ্যা নাগকন্যযা গৃহীতস্যার্জুনস্য নাগলোকগমনম্॥ ২ ॥ সংবাদপূর্বকমুলূপ্যাঃ পরিগ্রহঃ॥ ৩ ॥ ইরাবত উৎপত্তিঃ॥ ৪ ॥ অর্জুনং পুনর্গঙ্গাদ্বারমুপনীয় উলূপ্যা স্বলোকগমনম্॥ ৫ ॥

Mahabharata – Adi Parva – Chapter Text

১-২৩৪-০ (১০১৪০)
বৈশম্পায়ন উবাচ। ১-২৩৪-০x (১২৬৮)
তং প্রয়ান্তং মহাবাহুং কৌরবাণাং যশস্করম্।
অনুজগ্মুর্মহাত্মানো ব্রাহ্মণা বেদপারগাঃ॥ ১-২৩৪-১ (১০১৪১)
বেদবেদাঙ্গবিদ্বাসস্তথৈবাধ্যাত্মচিন্তকাঃ।
ভৈক্ষাশ্চ ভগবদ্ভক্তাঃ সূতাঃ পৌরাণিকাশ্চ যে॥ ১-২৩৪-২ (১০১৪২)
কথকাশ্চাপরে রাজঞ্শ্রমণাশ্চ বনৌকসঃ।
দিব্যাখ্যানানি যে চাপি পঠন্তি মধুরং দ্বিজাঃ॥ ১-২৩৪-৩ (১০১৪৩)
এতৈশ্চান্যৈশ্চ বহুভিঃ সহায়ৈঃ পাণ্ডুনন্দনঃ।
বৃতঃ শ্লক্ষ্ণকথৈঃ প্রায়ান্মরুদ্ভিরিব বাসবঃ॥ ১-২৩৪-৪ (১০১৪৪)
রমণীয়ানি চিত্রাণি বনানি চ সরাংসি চ।
সরিতঃ সাগরাংশ্চৈব দেশানপি চ ভারত॥ ১-২৩৪-৫ (১০১৪৫)
পুণ্যান্যপি চ তীর্থানি দদর্শ ভরতর্ষভঃ।
স গঙ্গাদ্বারমাশ্রিত্য নিবেশমকরোৎপ্রভুঃ॥ ১-২৩৪-৬ (১০১৪৬)
তত্র তস্যাদ্ভুতং কর্ম শৃণু ৎবং জনমেজয়।
কৃতবান্যদ্বিশুদ্ধাত্মা পাণ্ডূনাং প্রবরো হি সঃ॥ ১-২৩৪-৭ (১০১৪৭)
নিবিষ্টে তত্র কৌন্তেয়ে ব্রাহ্মণেষু চ ভারত।
অগ্নিহোত্রাণি বিপ্রাস্তে প্রাদুশ্চক্রুরনেকশঃ॥ ১-২৩৪-৮ (১০১৪৮)
তেষু প্রবোধ্যমানেষু জ্বলিতেষু হুতেষু চ।
কৃতপুষ্পোপহারেষু তীরান্তরগতেষু চ॥ ১-২৩৪-৯ (১০১৪৯)
কৃতাভিষেকৈর্বিদ্বদ্ভির্নিয়তৈঃ সৎপথে স্থিতৈঃ।
শুশুভেঽতীব তদ্রাজন্গঙ্গাদ্বারং মহাত্মভিঃ॥ ১-২৩৪-১০ (১০১৫০)
তথা পর্যাকুলে তস্মিন্নিবেশে পাণ্ডবর্ষভঃ।
অভিষেকায় কৌন্তেয়ো গঙ্গামবততার হ॥ ১-২৩৪-১১ (১০১৫১)
তত্রাভিষেকং কৃৎবা স তর্পয়িৎবা পিতামহান্।
উত্তিতীর্ষুর্জলাদ্রাজন্নগ্নিকার্যচিকীর্ষয়া॥ ১-২৩৪-১২ (১০১৫২)
অপকৃষ্টো মহাবাহুর্নাগরাজস্য কন্যযা।
অন্তর্জলে মহারাজ উলূপ্যা কাময়ানয়া॥ ১-২৩৪-১৩ (১০১৫৩)
দদর্শ পাণ্ডবস্তত্র পাবকং সুসমাহিতঃ।
কৌরব্যস্যাথ নাগস্য ভবনে পরমার্চিতে॥ ১-২৩৪-১৪ (১০১৫৪)
তত্রাগ্নিকার্যং কৃতবান্কুন্তীপুত্রো ধনঞ্জয়ঃ।
অশঙ্কমানেন হুতস্তেনাতুষ্যদ্ধুতাশনঃ॥ ১-২৩৪-১৫ (১০১৫৫)
অগ্নিকার্যং স কৃৎবা তু নাগরাজসুতাং তদা।
প্রসহন্নিব কৌন্তেয় ইদং বচনমব্রবীৎ॥ ১-২৩৪-১৬ (১০১৫৬)
কিমিদং সাহসং ভীরু কৃতবত্যসি ভামিনি।
কশ্চায়ং সুভগে দেশঃ কা চ ৎবং কস্য বাত্মজা॥ ১-২৩৪-১৭ (১০১৫৭)
উলূপ্যুবাচ। ১-২৩৪-১৮x (১২৬৯)
ঐরাবতকুলে জাতঃ কৌরব্যো নাম পন্নগঃ।
তস্যাস্মি দুহিতা রাজন্নুলূপী নাম পন্নগী॥ ১-২৩৪-১৮ (১০১৫৮)
সাঽহং ৎবামভিষেকার্থমবতীর্ণং সমুদ্গাম্।
দৃষ্ট্বৈব পুরুষব্যাঘ্র কন্দর্পেণাভিমূর্চ্ছিতা॥ ১-২৩৪-১৯ (১০১৫৯)
তাং মামনঙ্গগ্লপিতাং ৎবৎকৃতে কুরুনন্দন।
অনন্যাং নন্দয়স্বাদ্য প্রদানেনাত্মনোঽনঘ॥ ১-২৩৪-২০ (১০১৬০)
অর্জুন উবাচ। ১-২৩৪-২১x (১২৭০)
ব্রহ্মচর্যমিদং ভদ্রে মম দ্বাদশমাসিকম্।
ধর্মরাজেন চাদিষ্টং নাহমস্মি স্বয়ং বশঃ॥ ১-২৩৪-২১ (১০১৬১)
তব চাপি প্রিয়ং কর্তুমিচ্ছামি জলচারিণি।
অনৃতং নোক্তপূর্বং চ ময়া কিংচন কর্হিচিৎ॥ ১-২৩৪-২২ (১০১৬২)
কথং চ নানৃতং মে স্যাত্তব চাপি প্রিয়ং ভবেৎ।
ন চ পীড্যেত মে ধর্মস্তথা কুর্যা ভুজঙ্গমে॥ ১-২৩৪-২৩ (১০১৬৩)
উলূপ্যুবাচ। ১-২৩৪-২৪x (১২৭১)
জানাম্যহং পাণ্ডবেয় যথা চরসি মেদিনীম্।
যথা চ তে ব্রহ্মচর্যমিদমাদিষ্টবান্গুরুঃ॥ ১-২৩৪-২৪ (১০১৬৪)
পরস্পরং বর্তমানান্দ্রুপদস্যাত্মজাং প্রতি।
যো নোঽনুপ্রবিশেন্মোহাৎস বৈ দ্বাদশমাসিকম্॥ ১-২৩৪-২৫ (১০১৬৫)
বনে চরেদ্ব্রহ্মচর্যমিতি বঃ সময়ঃ কৃতঃ।
তদিদং দৌপদীহেতোরন্যোন্যস্য প্রবাসনম্॥ ১-২৩৪-২৬ (১০১৬৬)
কৃতবাংস্তত্র ধর্মার্থমত্র ধর্মো ন দুষ্যতি।
পরিত্রাণং চ কর্তব্যমার্তানাং পৃথুলোচন॥ ১-২৩৪-২৭ (১০১৬৭)
কৃৎবা মম পরিত্রাণং তব ধর্মো ন লুপ্যতে।
যদি বাপ্যস্য ধর্মস্য সূক্ষ্মোঽপি স্যাদ্ব্যতিক্রমঃ॥ ১-২৩৪-২৮ (১০১৬৮)
স চ তে ধর্ম এব স্যাদ্দৎবা প্রাণান্মমার্জুন।
ভক্তাং চ ভজ মাং পার্থ সতামেতন্মতং প্রভো॥ ১-২৩৪-২৯ (১০১৬৯)
ন করিষ্যসি চেদেবং মৃতাং মামুপধারয়।
প্রাণদানান্মহাবাহো চর ধর্মমনুত্তমম্॥ ১-২৩৪-৩০ (১০১৭০)
শরণং চ প্রপন্নাস্মি ৎবামদ্য পুরুষোত্তম।
দীনাননাথান্কৌন্তেয় পরিরক্ষসি নিত্যশঃ॥ ১-২৩৪-৩১ (১০১৭১)
সাঽহং শর়ণমভ্যেমি রোরবীমি চ দুঃখিতা।
যাচে ৎবাং চাভিকামাহং তস্মাৎকুরু মম প্রিয়ম্।
স ৎবমাত্মপ্রদানেন সকামাং কর্তুমর্হসি॥ ১-২৩৪-৩২ (১০১৭২)
বৈশম্পায়ন উবাচ। ১-২৩৪-৩৩x (১২৭২)
এবমুক্তস্তু কৌন্তেয়ঃ পন্নগেশ্বরকন্যযা।
কৃতবাংস্তত্তথা সর্বং ধর্মমুদ্দিশ্য কারণম্॥ ১-২৩৪-৩৩ (১০১৭৩)
স নাগভবনে রাত্রিং তামুষিৎবা প্রতাপবান্।
`পুত্রমুৎপাদয়ামাস স তস্যাং সুমনোহরম্॥ ১-২৩৪-৩৪ (১০১৭৪)
ইরাবন্তং মহাভাগং মহাবলপরাক্রমম্।’
উদিতেঽভ্যুত্থিতঃ সূর্যে কৌরব্যস্য নিবেশনাৎ॥ ১-২৩৪-৩৫ (১০১৭৫)
আগতস্তু পুনস্তত্র গঙ্গাদ্বারং তয়া সহ।
পরিত্যজ্য গতা সাধ্বী উলূপী নিজমন্দিরং॥ ১-২৩৪-৩৬ (১০১৭৬)
দত্ৎবা বরমজেয়ৎবং জলে সর্বত্র ভারত।
সাধ্যা জলচরাঃ সর্বে ভবিষ্যন্তি ন সংশয়ঃ॥ ॥ ১-২৩৪-৩৭ (১০১৭৭)

ইতি শ্রীমন্মহাভারতে আদিপর্বণি অর্জুনবনবাসপর্বণি চতুস্ত্রিংশদধিকদ্বিশততমোঽধ্যায়ঃ॥ ২৩৪ ॥

Mahabharata – Adi Parva – Chapter Footnotes

১-২৩৪-৩৬ পরিষ্বজ্যেতি খ. পাঠঃ॥ চতুস্ত্রিংশদধিকদ্বিশততমোঽধ্যায়ঃ॥ ২৩৪ ॥