আদিপর্ব – অধ্যায় ২২৮

আদিপর্ব – অধ্যায় ২২৮

॥ শ্রীঃ ॥

১.২২৮. অধ্যায়ঃ ২২৮

Mahabharata – Adi Parva – Chapter Topics

পাণ্ডবানাং সমীপে নারদাগমনম্॥ ১ ॥

Mahabharata – Adi Parva – Chapter Text

১-২২৮-০ (৯৯১৯)
জনমেজয় উবাচ। ১-২২৮-০x (১২৫১)
এবং সংপ্রাপ্য রাজ্যং তদিন্দ্রপ্রস্থে তপোধন।
অত ঊর্ধ্বং নরব্যাঘ্রাঃ কিমকুর্বত পাণ্ডবাঃ॥ ১-২২৮-১ (৯৯২০)
সর্ব এব মহাত্মানঃ সর্বে মম পিতামহাঃ।
দ্রৌপদী ধর্মপত্নী চ কথং তানন্ববর্তত॥ ১-২২৮-২ (৯৯২১)
কথমাসুশ্চ কৃষ্ণায়ামেকস্যাং তে নরর্ষভাঃ।
বর্তমানা মহাভাগা নাভিদ্যন্ত পরস্পরম্॥ ১-২২৮-৩ (৯৯২২)
শ্রোতুমিচ্ছাম্যহং তত্র বিস্তরেণ যথাতথম্।
তেষাং চেষ্টিতমন্যোন্যং যুক্তানাং কৃষ্ণয়া সহ॥ ১-২২৮-৪ (৯৯২৩)
বৈশম্পায়ন উবাচ। ১-২২৮-৫x (১২৫২)
ধৃতরাষ্ট্রাভ্যনুজ্ঞাতা ইন্দ্রপ্রস্থং প্রবিশ্য তৎ।
রেমিরে পুরুষব্যাঘ্রাঃ কৃষ্ণয়া সহ পাণ্ডবাঃ॥ ১-২২৮-৫ (৯৯২৪)
প্রাপ্য রাজ্যং মহাতেজাঃ সত্যসন্ধো যুধিষ্ঠিরঃ।
পালয়ামাস ধর্মেণ পৃথিবীং ভ্রাতৃভিঃ সহ॥ ১-২২৮-৬ (৯৯২৫)
জিতারয়ো মহাত্মানঃ সত্যধর্মপরায়ণাঃ।
এবং পুরমিদং প্রাপ্য তত্রোষুঃ পাণ্ডুনন্দনাঃ॥ ১-২২৮-৭ (৯৯২৬)
কুর্বাণাঃ পৌরকার্যাণি সর্বাণি ভরতর্ষভাঃ।
আসাংচক্রুর্মহার্হেষু পার্থিবেষ্বাসনেষু চ॥ ১-২২৮-৮ (৯৯২৭)
তেষু তত্রোপবিষ্টেষু পাণ্ডবেষু মহাত্মসু।
আয়যৌ ধর্মরাজং তু দ্রষ্টুকামোঽথ নারদঃ॥ ১-২২৮-৯ (৯৯২৮)
`পথা নক্ষত্রজুষ্টেন সুপর্ণাচরিতেন চ।
চন্দ্রসূর্যপ্রকাশেন সেবিতেন মহর্ষিভিঃ॥ ১-২২৮-১০ (৯৯২৯)
নভস্স্থলেন দিব্যেন দুর্লভেনাতপস্বিনাম্।
ভূতার্চিতো ভূতধরাং রাষ্ট্রমন্দিরভূষিতাম্॥ ১-২২৮-১১ (৯৯৩০)
অবেক্ষমাণো দ্যুতিমানাজগাম মহাতপাঃ।
সর্ববেদান্তগো বিপ্রঃ সর্ববেদাঙ্গপারগঃ॥ ১-২২৮-১২ (৯৯৩১)
পরেণ তপসা যুক্তো ব্রাহ্মেণ তপসা বৃতঃ।
নয়ে নীতৌ চ নিস্তো বিশ্রুতশ্চ মহামুনিঃ॥ ১-২২৮-১৩ (৯৯৩২)
পরাৎপরতরং প্রাপ্তো ধর্মান্সমভিজগ্মিবান্।
ভাবিতাত্মা গতরজাঃ শান্তো মৃদুর্ঋজুর্দিবজঃ॥ ১-২২৮-১৪ (৯৯৩৩)
ধর্মেণাধিগতঃ সর্বৈর্দেবদানবমানুষৈঃ।
ক্ষীণকর্মসু পাপেষু ভূতেষু বিবিধেষু চ॥ ১-২২৮-১৫ (৯৯৩৪)
সর্বথা কৃতমর্যাদো বেদেষু বিবিধেষু চ।
শতশঃ সোমপা যজ্ঞে পুণ্যে পুণ্যকৃদগ্নিচিৎ॥ ১-২২৮-১৬ (৯৯৩৫)
ঋক্সাময়জুষাং বেত্তা ন্যায়দৃগ্ধর্মকোবিদঃ।
ঋজুরারোহবান্বৃদ্ধো ভূয়িষ্ঠপথিকোঽনঘঃ॥ ১-২২৮-১৭ (৯৯৩৬)
শ্লক্ষ্ণয়া শিখয়োপেতঃ সংপন্নঃ পরমৎবিষা।
অবদাতে চ সূক্ষ্মে চ দিব্যে চ রচিতে শুভে॥ ১-২২৮-১৮ (৯৯৩৭)
মহেন্দ্রদত্তে মহতী বিভ্রৎপরমবাসসী।
জাম্বূনদময়ে দিব্যে গণ্ডূপদমুখে নবে॥ ১-২২৮-১৯ (৯৯৩৮)
অগ্ন্যর্কসদৃশে দিব্যে ধারয়ন্কুণ্ডলে শুভে।
রাজতচ্ছত্রমুচ্ছ্রিত্য চিত্রং পরমবর্চসম্॥ ১-২২৮-২০ (৯৯৩৯)
প্রাপ্য দুষ্প্রাপমন্যেন ব্রহ্মবর্চসমুত্তমম্।
ভবনে ভূমিপালস্য বৃহস্পতিরিবাপ্লুতঃ॥ ১-২২৮-২১ (৯৯৪০)
সংহিতায়াং চ সর্বেষাং স্থিতস্যোপস্থিতস্য চ।
দ্বিপদস্য চ ধর্মস্য ক্রমধর্মস্য পারগঃ॥ ১-২২৮-২২ (৯৯৪১)
গাধা সামানুসামজ্ঞঃ সাম্নাং পরমবল্গুনাম্।
আত্মনঃ সর্বমোক্ষিভ্যঃ কৃতিমান্কৃত্যবিৎসদা॥ ১-২২৮-২৩ (৯৯৪২)
যজুর্ধর্মৈর্বহুবিধৈর্মতো মতিমতাং বরঃ।
বিদিতার্থঃ সমশ্চৈব চ্ছেত্তা নিগমসংশয়ান্॥ ১-২২৮-২৪ (৯৯৪৩)
অর্থনির্বচনে নিত্যং সংশয়চ্ছিদসংশয়ঃ।
প্রকৃত্যা ধর্মকুশলো দাতা ধর্মবিশারদঃ॥ ১-২২৮-২৫ (৯৯৪৪)
লোপেনাগমধর্মেণ সংক্রমেণ চ বৃত্তিষু।
একশব্দাংশ্চ নানার্থানেকার্থাংশ্চ পৃথক্কৃতান্॥ ১-২২৮-২৬ (৯৯৪৫)
পৃথগর্থাভিধানাংশ্চ প্রয়োগানন্ববেক্ষিতা।
প্রমাণভূতো লোকেষু সর্বাধিকরণেষু চ॥ ১-২২৮-২৭ (৯৯৪৬)
সর্ববর্ণবিকারেষু নিত্যং কুশলপূজিতঃ।
স্বরেঽস্বরে চ বিবিধে বৃত্তেষু বিবিধেষু চ॥ ১-২২৮-২৮ (৯৯৪৭)
সমস্থানেষু সর্বেষু সমাম্নায়েষু ধাতুষু।
উদ্দেশ্যানাং সমাখ্যাতা সর্বমাখ্যাতমুদ্দিশন্॥ ১-২২৮-২৯ (৯৯৪৮)
অভিসন্ধিষু তত্ৎবজ্ঞঃ পদান্যঙ্গান্যনুস্মরন্।
কালধর্মেণ নির্দিষ্টং যথার্থং চ বিচারয়ন্॥ ১-২২৮-৩০ (৯৯৪৯)
চিকীর্ষিতং চ যো বেত্তা যথা লোকেন সংবৃতম্।
বিভাষিতং চ সময়ং ভাষিতং হৃদয়ংগমম্॥ ১-২২৮-৩১ (৯৯৫০)
আত্মনে চ পরস্মৈ চ স্বরসংস্কারয়োগবিৎ।
এষাং স্বরাণাং জ্ঞাতা চ বোদ্ধা প্রবচনঃ স্বরাট্॥ ১-২২৮-৩২ (৯৯৫১)
বিজ্ঞাতা চোক্তবাক্যানামেকতাং বহুতাং তথা।
বোদ্ধা হি পরমার্থাংশ্চ বিবিধাংশ্চ ব্যতিক্রমান্॥ ১-২২৮-৩৩ (৯৯৫২)
অভেদতশ্চ বহুশো বহুশশ্চাপি ভেদতঃ।
বক্তা বিবিধবাক্যানাং নানাদেশসমীক্ষিতা॥ ১-২২৮-৩৪ (৯৯৫৩)
পঞ্চাগমাংশ্চ বিবিধানাদেশাংশ্চ সমীক্ষিতা।
নানার্থকুশলস্তত্র তদ্ধিতেষু চ কৃৎস্নশঃ॥ ১-২২৮-৩৫ (৯৯৫৪)
পরিভূষয়িতা বাচাং বর্ণতঃ স্বরতোঽর্থতঃ।
প্রত্যযং চ সমাখ্যাতা নিয়তং প্রতিধাতুকম্॥ ১-২২৮-৩৬ (৯৯৫৫)
পঞ্চ চাক্ষরজাতানি স্বরসংজ্ঞানি যানি চ।
তমাগতমৃষিং দৃষ্ট্বা প্রত্যুদ্গম্যাভিবাদ্য চ॥’ ১-২২৮-৩৭ (৯৯৫৬)
আসনং রুচিরং তস্মৈ প্রদদৌ স যুধিষ্ঠিরঃ।
`কৃষ্ণাজিনোত্তরে তস্মিন্নুপবিষ্টো মহানৃষিঃ॥’ ১-২২৮-৩৮ (৯৯৫৭)
দেবর্ষেরুপবিষ্টস্য স্বয়মর্ধ্যং যথাবিধি।
প্রাদাদ্যুধিষ্ঠিরো ধীমান্রাজ্যং তস্মৈ ন্যবেদয়ৎ।
প্রতিগৃহ্য তু তাং পূজামৃষিঃ প্রীতমনাস্তদা॥ ১-২২৮-৩৯ (৯৯৫৮)
আশীর্ভির্বর্ধয়িৎবা চ তমুবাচাস্যতামিতি।
নিষসাদাভ্যনুজ্ঞাতস্ততো রাজা যুধিষ্ঠিরঃ॥ ১-২২৮-৪০ (৯৯৫৯)
প্রেষয়ামাস কৃষ্ণায়ৈ ভগবন্তমুপস্থিতম্।
শ্রুৎবৈতদ্দ্রৌপদী চাপি শুচির্ভূৎবা সমাহিতা॥ ১-২২৮-৪১ (৯৯৬০)
জগাম তত্র যত্রাস্তে নারদঃ পাণ্ডবৈঃ সহ।
তস্যাভিবাদ্য চরণৌ দেবর্ষের্ধর্মচারিণী॥ ১-২২৮-৪২ (৯৯৬১)
কৃতাঞ্জলিঃ সুসংবীতা স্থিতাঽথ দ্রুপদাত্মজা।
তস্যাশ্চাপি স ধর্মাত্মা সত্যবাগৃষিসত্তমঃ॥ ১-২২৮-৪৩ (৯৯৬২)
আশিষো বিবিধাঃ প্রোচ্য রাজপুত্র্যাস্তু নারদঃ।
গম্যতামিতি হোবাচ ভগবাংস্তামনিন্দিতাম্॥ ১-২২৮-৪৪ (৯৯৬৩)
গতায়ামথ কৃষ্ণায়াং যুধিষ্ঠিরপুরোগমান্।
বিবিক্তে পাণ্ডবান্সর্বানুবাচ ভগবানৃষিঃ॥ ১-২২৮-৪৫ (৯৯৬৪)
পাঞ্চালী ভবতামেকা ধর্মপত্নী যশস্বিনী।
যথা বো নাত্র ভেদঃ স্যাত্তথা নীতির্বিধীয়তাং॥ ১-২২৮-৪৬ (৯৯৬৫)
সুন্দোপসুন্দৌ হি পুরা ভ্রাতরৌ সহিতাবুভৌ।
আস্তামবধ্যাবন্যেষাং ত্রিষু লোকেষু বিশ্রুতৌ॥ ১-২২৮-৪৭ (৯৯৬৬)
একরাজ্যাবেকগৃহাবেকশয়্যাসনাশনৌ।
তিলোত্তমায়াস্তৌ হেতোরন্যোন্যমভিজঘ্নতুঃ॥ ১-২২৮-৪৮ (৯৯৬৭)
রক্ষ্যতাং সৌহৃদং তস্মাদন্যোন্যপ্রীতিভাবকম্।
যথা বো নাত্র ভেদঃ স্যাত্তৎকুরুষ্ব যুধিষ্ঠির॥ ১-২২৮-৪৯ (৯৯৬৮)
যুধিষ্ঠির উবাচ। ১-২২৮-৫০x (১২৫৩)
সুন্দোপসুন্দাবসুরৌ কস্য পুত্রৌ মহামুনে।
উৎপন্নশ্চ কথং ভেদঃ কথং চান্যোন্যমঘ্নতাম্॥ ১-২২৮-৫০ (৯৯৬৯)
অপ্সরা দেবকন্যা বৈ কস্য চৈষা তিলোত্তমা।
যস্যাঃ কামেন সংমত্তৌ জঘ্নতুস্তৌ পরস্পরম্॥ ১-২২৮-৫১ (৯৯৭০)
এতৎসর্বং যথা বৃত্তং বিস্তরেণ তপোধন।
শ্রোতুমিচ্ছামহে ব্রহ্মন্পরং কৌতূহলং হি মে॥ ॥ ১-২২৮-৫২ (৯৯৭১)

ইতি শ্রীমন্মহাভারতে আদিপর্বণি বিদুরাগমনরাজ্যলাভপর্বণি অষ্টাবিংশত্যধিকদ্বিশততমোঽধ্যায়ঃ॥ ২২৮ ॥