আদিপর্ব – অধ্যায় ২১৬
॥ শ্রীঃ ॥
১.২১৬. অধ্যায়ঃ ২১৬
Mahabharata – Adi Parva – Chapter Topics
দ্রৌপদীংপ্রতি কুন্ত্যা আশীর্বাদঃ॥ ১ ॥ শ্রীকৃষ্ণপ্রেষিতালংকারাদীনাং পাণ্ডবৈঃ স্বীকারঃ॥ ২ ॥
Mahabharata – Adi Parva – Chapter Text
১-২১৬-০ (৯৪২৬)
বৈশম্পায়ন উবাচ। ১-২১৬-০x (১২০৬)
পাণ্ডবৈঃ সহ সংয়োগং গতস্য দ্রুপদস্য হ।
ন বভূব ভয়ং কিংচিদ্দেবেভ্যোঽপি কথংচন॥ ১-২১৬-১ (৯৪২৭)
কুন্তীমাসাদ্য তা নার্যো দ্রুপদস্য মহাত্মনঃ।
নাম সংকীর্তয়ন্ত্যোঽস্যা জগ্মুঃ পাদৌ স্বমূর্ধভিঃ॥ ১-২১৬-২ (৯৪২৮)
কৃষ্ণা চ ক্ষৌমসংবীতা কৃতকৌতুকমঙ্গলা।
কৃতাভিবাদনা শ্বশ্র্বাস্তস্থৌ প্রহ্বা কৃতাঞ্জলিঃ॥ ১-২১৬-৩ (৯৪২৯)
রূপলক্ষণসংপন্নাং শীলাচারসমন্বিতাম্।
দ্রৌপদীমবদৎপ্রেম্ণা পৃথাশীর্বচনং স্নুষাম্॥ ১-২১৬-৪ (৯৪৩০)
যথেন্দ্রাণী হরিহয়ে স্বাহা চৈব বিভাবসৌ।
রোহিণী চ যথা সোমে দময়ন্তী যথা নলে॥ ১-২১৬-৫ (৯৪৩১)
যথা বৈশ্রবণে ভদ্রা বসিষ্ঠে চাপ্যরুন্ধতী।
যথা নারায়ণে লক্ষ্মীস্তথা ৎবং ভব ভর্তৃষু॥ ১-২১৬-৬ (৯৪৩২)
জীবসূর্বীরসূর্ভদ্রে বহুসৌখ্যসমন্বিতা।
সুভগা ভোগসংপন্না যজ্ঞপত্নী পতিব্রতা॥ ১-২১৬-৭ (৯৪৩৩)
অতিথীনাগতান্সাধূন্বৃদ্দান্বালাংস্তথা গুরূন্।
পূজয়ন্ত্যা যথান্যায়ং শশ্বদ্গচ্ছন্তু তে সমাঃ॥ ১-২১৬-৮ (৯৪৩৪)
কুরুজাঙ্গলমুখ্যেষু রাষ্ট্রেষু নগরেষু চ।
অনু ৎবমভিষিচ্যস্ব নৃপতিং ধর্মবৎসলা॥ ১-২১৬-৯ (৯৪৩৫)
পতিভির্নির্জিতামুর্বীং বিক্রমেণ মহাবলৈঃ।
কুরু ব্রাহ্মণসাৎসর্বামশ্বমেধে মহাক্রতৌ॥ ১-২১৬-১০ (৯৪৩৬)
পৃথিব্যাং যানি রত্নানি গুণবন্তি গুণান্বিতে।
তান্যাপ্নুহি ৎবং কল্যাণি সুখিনী শরদাং শতং॥ ১-২১৬-১১ (৯৪৩৭)
যথা চ ৎবাঽভিনন্দামি বধ্বদ্য ক্ষৌমসংবৃতাম্।
তথা ভূয়োঽভিনন্দিষ্যে জাতপুত্রাং গুণান্বিতাং॥ ১-২১৬-১২ (৯৪৩৮)
বৈশম্পায়ন উবাচ। ১-২১৬-১৩x (১২০৭)
ততস্তু কৃতদারেভ্যঃ পাণ্ডুভ্যঃ প্রাহিণোদ্ধরিঃ।
বৈদূর্যমণিচিত্রাণি হৈমান্যাভরণানি চ॥ ১-২১৬-১৩ (৯৪৩৯)
বাসাংসি চ মহার্হাণি নানাদেশ্যানি মাধবঃ।
কম্বলাজিনরত্নানি স্পর্শবন্তি শুভানি চ॥ ১-২১৬-১৪ (৯৪৪০)
শয়নাসনয়ানানি বিবিধানি মহান্তি চ।
বৈদূর্যবজ্রচিত্রাণি শতশো ভাজনানি চ॥ ১-২১৬-১৫ (৯৪৪১)
রূপয়ৌবনদাক্ষিণ্যৈরুপেতাশ্চ স্বলঙ্কৃতাঃ।
প্রেষ্যাঃ সংপ্রদদৌ কৃষ্ণো নানাদেশ্যাঃ স্বলঙ্কৃতাঃ॥ ১-২১৬-১৬ (৯৪৪২)
গজান্বিনীতান্ভদ্রাংশ্চ সদশ্বাংশ্চ স্বলঙ্কৃতান্।
রথাংশ্চ দান্তান্সৌবর্ণৈঃ শুভ্রৈঃ পট্টৈরলঙ্কৃতান্॥ ১-২১৬-১৭ (৯৪৪৩)
কোটিশশ্চ সুবর্ণং চ তেষামকৃতকং তথা।
বীথীকৃতমমেয়াত্মা প্রাহিণোন্মধুসূদনঃ॥ ১-২১৬-১৮ (৯৪৪৪)
তৎসর্বং প্রতিজগ্রাহ ধর্মরাজো যুধিষ্ঠিরঃ।
মুদা পরময়া যুক্তো গোবিন্দপ্রিয়কাম্যযা॥ ॥ ১-২১৬-১৯ (৯৪৪৫)
ইতি শ্রীমন্মহাভারতে আদিপর্বণি বৈবাহিকপর্বণি ষোডশাধিকদ্বিশততমোঽধ্যায়ঃ॥ ২১৬ ॥ ॥ সমাপ্তং বৈবাহিকপর্ব ॥
Mahabharata – Adi Parva – Chapter Footnotes
১-২১৬-১২ হে বধু অদ্য॥ ষোডশাধিকদ্বিশততমোঽধ্যায়ঃ॥ ২১৬ ॥