আদিপর্ব – অধ্যায় ২০৩

আদিপর্ব – অধ্যায় ২০৩

॥ শ্রীঃ ॥

১.২০৩. অধ্যায়ঃ ২০৩

Mahabharata – Adi Parva – Chapter Topics

ধনুরারোপণার্থমুত্থিতমর্জুনংপ্রতি ব্রাহ্মণানাং শুভাশংসনম্॥ ১ ॥ অর্জুনেন ধনুরারোপণপূর্বকং লক্ষ্যবেধঃ॥ ২ ॥ দ্রৌপদ্যা অর্জুনকণ্ঠে মালাপ্রক্ষেপঃ॥ ৩ ॥

Mahabharata – Adi Parva – Chapter Text

১-২০৩-০ (৮৯৭৮)
বৈশম্পায়ন উবাচ। ১-২০৩-০x (১১৩৪)
যদা নিবৃত্তা রাজানো ধনুষঃ সজ্যকর্মণঃ।
অথোদতিষ্ঠদ্বিপ্রাণাং মধ্যাজ্জিষ্ণুরুদারধীঃ॥ ১-২০৩-১ (৮৯৭৯)
উদক্রোশন্বিপ্রমুখ্যা বিধুন্বন্তোঽজিনানি চ।
দৃষ্ট্বা সংপ্রস্থিতং পার্থমিন্দ্রকেতুসমপ্রভম্॥ ১-২০৩-২ (৮৯৮০)
কেচিদাসন্বিমনসঃ কেচিদাসন্মুদান্বিতাঃ।
আহুঃ পরস্পরং কেচিন্নিপুণা বুদ্ধিজীবিনঃ॥ ১-২০৩-৩ (৮৯৮১)
যৎকর্ণশল্যপ্রমুখৈঃ ক্ষত্রিয়ৈর্লোকবিশ্রুতৈঃ।
নানতং বলবদ্ভির্হি ধনুর্বেদপরায়ণৈঃ॥ ১-২০৩-৪ (৮৯৮২)
তৎকথং ৎবকৃতাস্ত্রেণ প্রাণতো দুর্বলীয়সা।
বটুমাত্রেণ শক্যং হি সজ্যং কর্তুং ধনুর্দ্বিজাঃ॥ ১-২০৩-৫ (৮৯৮৩)
অবহাস্যা ভবিষ্যন্তি ব্রাহ্মণাঃ সর্বরাজসু।
কর্মণ্যস্মিন্নসংসিদ্ধে চাপলাদপরীক্ষিতে॥ ১-২০৩-৬ (৮৯৮৪)
যদ্যেষ দর্পাদ্ধর্ষাদ্বাপ্যথ ব্রাহ্মণচাপলাৎ।
প্রস্থিতো ধনুরায়ন্তুং বার্যতাং সাধু মা গমৎ॥ ১-২০৩-৭ (৮৯৮৫)
নাবহাস্যা ভবিষ্যামো ন চ লাঘবমাস্থিতাঃ।
ন চ বিদ্বিষ্টতাং লোকে গমিষ্যামো মহীক্ষিতাম্॥ ১-২০৩-৮ (৮৯৮৬)
কেচিদাহুর্যুবা শ্রীমান্নাগরাজকরোপমঃ।
পীনস্কন্ধোরুবাহুশ্চ ধৈর্যেণ হিমবানিব॥ ১-২০৩-৯ (৮৯৮৭)
সিংহখেলগতিঃ শ্রীমান্মত্তনাগেন্দ্রবিক্রমঃ।
সংভাব্যমস্মিন্কর্মেদমুৎসাহাচ্চানুমীয়তে॥ ১-২০৩-১০ (৮৯৮৮)
শক্তিরস্য মহোৎসাহা ন হ্যশক্তঃ স্বয়ং ব্রজেৎ।
ন চ তদ্বিদ্যতে কিংচিৎকর্ম লোকেষু যদ্ভবেৎ॥ ১-২০৩-১১ (৮৯৮৯)
ব্রাহ্মণানামসাধ্যং চ নৃষু সংস্থানচারিষু।
অব্ভক্ষা বায়ুভক্ষাশ্চ ফলাহারা দৃঢব্রতাঃ॥ ১-২০৩-১২ (৮৯৯০)
দুর্বলা অপি বিপ্রা হি বলীয়াংসঃ স্বেতজসা।
ব্রাহ্মণো নাবমন্তব্যঃ সদসদ্বা সমাচরন্॥ ১-২০৩-১৩ (৮৯৯১)
সুখং দুঃখং মহদ্ধ্রস্বং কর্ম যৎসমুপাগতম্।
জামদগ্ন্যেন রামেণ নির্জিতাঃ ক্ষত্রিয়া যুধি॥ ১-২০৩-১৪ (৮৯৯২)
পীতঃ সমুদ্রোঽগস্ত্যেন অগাধো ব্রহ্মতেজসা।
তস্মাদ্ব্রুবন্তু সর্বেঽত্র বটুরেষ ধনুর্মহান্॥ ১-২০৩-১৫ (৮৯৯৩)
আরোপয়তু শীঘ্রং বৈ তথেত্যূচুর্দ্বিজর্ষভাঃ। ১-২০৩-১৬ (৮৯৯৪)
বৈশম্পায়ন উবাচ।
এবং তেষাং বিলপতাং বিপ্রাণাং বিবিধা গিরঃ॥ ১-২০৩-১৬x (১১৩৫)
অর্জুনো ধনুষোঽভ্যাশে তস্থৌ গিরিরিবাচলঃ।
`অর্জুনঃ পাণ্ডবশ্রেষ্ঠো ধৃষ্টদ্যুম্নমথাব্রবীৎ॥ ১-২০৩-১৭ (৮৯৯৫)
এতদ্ধনুর্ব্রাহ্মণানাং সজ্যং কর্তুমলং তু কিম্। ১-২০৩-১৮ (৮৯৯৬)
বৈশম্পায়ন উবাচ।
তস্য তদ্বচনং শ্রুৎবা ধৃষ্টদ্যুম্নোঽব্রবীদ্বচঃ॥ ১-২০৩-১৮x (১১৩৬)
ব্রাহ্মণো বাথ রাজন্যো বৈশ্যো বা শূদ্র এব বা।
এতেষাং যো ধনুঃশ্রেষ্ঠং সজ্যং কুর্যাদ্দ্বিজোত্তম॥ ১-২০৩-১৯ (৮৯৯৭)
তস্মৈ প্রদেয়া ভগিনী সত্যমুক্তং ময়া বচঃ॥ ১-২০৩-২০ (৮৯৯৮)
বৈশম্পায়ন উবাচ। ১-২০৩-২১x (১১৩৭)
ততঃ পশ্চান্মহাতেজাঃ পাণ্ডবো রণদুর্জয়ঃ।’
স তদ্ধনুঃ পরিক্রম্য প্রদক্ষিণমথাকরোৎ॥ ১-২০৩-২১ (৮৯৯৯)
প্রণম্য শিরসা দেবমীনং বরদং প্রভুম্।
কৃষ্ণং চ মনসা কৃৎবা জগৃহে চার্জুনো ধনুঃ॥ ১-২০৩-২২ (৯০০০)
যৎপার্থিবৈ রুক্মসুনীথবক্রৈ
রাধেয়দুর্যোধনশল্যসাল্বৈঃ।
তদা ধনুর্বেদপরৈর্নৃসিংহৈঃ
কৃতং ন সজ্যং মহতোঽপি যত্নাৎ॥ ১-২০৩-২৩ (৯০০১)
তদর্জুনো বীর্যবতাং সদর্প-
স্তদৈন্দ্রিরিন্দ্রাবরজপ্রভাবঃ।
সজ্যং চ চক্রে নিমিষান্তরেণ
শরাংশ্চ জগ্রাহ দশার্দসঙ্খ্যান্॥ ১-২০৩-২৪ (৯০০২)
বিব্যাধ লক্ষ্যং নিপপাত তচ্চ
ছিদ্রেণ ভূমৌ সহসাতিবিদ্ধম্।
ততোঽন্তরিক্ষে চ বভূব নাদঃ
সমাজমধ্যে চ মহান্নিনাদঃ॥ ১-২০৩-২৫ (৯০০৩)
পুষ্পাণি দিব্যানি ববর্ষ দেবঃ
পার্থস্য মূর্ধ্নি দ্বিষতাং নিহন্তুঃ॥ ১-২০৩-২৬ (৯০০৪)
চেলানি বিব্যধুস্তত্র ব্রাহ্মণাশ্চ সহস্রশঃ।
বিলক্ষিতাস্ততশ্চক্রুর্হাহাকারাংশ্চ সর্বশঃ।
ন্যপতংশ্চাত্র নভসঃ সমন্তাৎপুষ্পবৃষ্টয়ঃ॥ ১-২০৩-২৭ (৯০০৫)
শতাঙ্গানি চ তূর্যাণি বাদকাঃ সমবাদয়ন্।
সূতমাগধসঙ্ঘাশ্চাপ্যস্তুবংস্তত্র সুস্বরাঃ॥ ১-২০৩-২৮ (৯০০৬)
তং দৃষ্ট্বা দ্রুপদঃ প্রীতো বভূব রিপুসূদনঃ।
সহ সৈন্যৈশ্চ পার্থস্য সাহায়্যার্থমিয়েষ সঃ॥ ১-২০৩-২৯ (৯০০৭)
তস্মিংস্তু শব্দে মহতি প্রবৃদ্ধে
যুধিষ্ঠিরো ধর্মভৃতাং বরিষ্ঠঃ।
আবাসমেবোপজগাম শীঘ্রং
সার্ধং যমাভ্যাং পুরুষোত্তমাভ্যাম্॥ ১-২০৩-৩০ (৯০০৮)
বিদ্ধং তু লক্ষ্যং প্রসমীক্ষ্য কৃষ্ণা
পার্থং চ শক্রপ্রতিমং নিরীক্ষ্য।
`স্বভ্যস্তরূপাপি নবেব নিত্যং
বিনাপি হাসং হসতীব কন্যা॥ ১-২০৩-৩১ (৯০০৯)
মদাদৃতেঽপি স্খলতীব ভাবৈ-
র্বাচা বিনা ব্যাহরতীব দৃষ্ট্যা।
আদায় শুক্লং বরমাল্যদাম
জগাম কুন্তীসুতমুৎস্ময়ন্তী॥ ১-২০৩-৩২ (৯০১০)
গৎবা চ পশ্চাৎপ্রসমীক্ষ্য কৃষ্ণা
পার্থস্য বক্ষস্যবিশঙ্কমানা।
ক্ষিপ্ৎবা স্রজং পার্থিববীরমধ্যে
বরায় বব্রে দ্বিজসঙ্ঘমধ্যে॥ ১-২০৩-৩৩ (৯০১১)
শচীব দেবেন্দ্রমথাগ্নিদেবং
স্বাহেব লক্ষ্মীশ্চ যথা মুকুন্দম্।
উষেব সূর্যং মদনং রতীব
মহেশ্বরং পর্বতরাজপুত্রী॥’ ১-২০৩-৩৪ (৯০১২)
স তামুপাদায় বিজিত্য রঙ্গে
দ্বিজাতিভিস্তৈরভিপূজ্যমানঃ।
রঙ্গান্নিরক্রামদচিন্ত্যকর্মা
পত্ন্যা তয়া চাপ্যনুগম্যমানঃ॥ ॥ ১-২০৩-৩৫ (৯০১৩)

ইতি শ্রীমন্মহাভারতে আদিপর্বণি স্বয়ংবরপর্বণি ত্র্যধিকদ্বিশততমোঽধ্যায়ঃ॥ ২০৩ ॥

Mahabharata – Adi Parva – Chapter Footnotes

১-২০৩-২৯ সাহায়্যার্থং দ্রৌপদ্যলাভাৎ ক্ষুব্ধৈর্নৃপান্তরৈর্যুদ্ধপ্রসক্তৌ সত্যাম্॥ ত্র্যধিকদ্বিশততমোঽধ্যায়ঃ॥ ২০৩ ॥