আদিপর্ব – অধ্যায় ২০০

আদিপর্ব – অধ্যায় ২০০

॥ শ্রীঃ ॥

১.২০০. অধ্যায়ঃ ২০০

(অথ স্বয়ংবরপর্ব ॥ ১২ ॥)

Mahabharata – Adi Parva – Chapter Topics

মধ্যেমার্গং আগতস্য ব্যাসস্য আজ্ঞয়া পাণ্ডবানাং দ্রুপদপুরপ্রবেশঃ॥ ১ ॥ তেষাং কুম্ভকারগৃহে বাসঃ, ভৈক্ষবৃত্তিশ্চ॥ ২ ॥ দ্রৌপদ্যাঃ স্বয়ংবরনির্মাণকারণকথনং॥ ৩ ॥ দ্রুপদেন কৃতাং স্বয়ংবরঘোষণাং শ্রুতবতাং ক্ষত্রিয়াদীনাং আগমনং॥ ৪ ॥ সর্বেষাং উচিতে স্থানে উপবেশনং পাণ্ডবানাং ব্রাহ্মণমধ্যে উপবেশনং॥ ৫ ॥ মঙ্গলস্নাতায়াঃ স্বলঙ্কৃতায়া দ্রৌপদ্যা রঙ্গমধ্যে আগমনং॥ ৬ ॥ ধৃষ্টদ্যুম্নেন লক্ষ্যবেধপণকথনম্॥ ৭ ॥

Mahabharata – Adi Parva – Chapter Text

১-২০০-০ (৮৮৪৮)
বৈশম্পায়ন উবাচ। ১-২০০-০x (১১২৯)
ততস্তে নরশার্দূলা ভ্রাতরঃ পঞ্চ পাণ্ডবাঃ।
তং ব্রাহ্মণং পুরস্কৃত্য পাঞ্চাল্যাশ্চ স্বয়ংবরম্।
প্রয়যুর্দ্রৌপদীং দ্রষ্টুং তং চ দেশং মহোৎসবম্॥ ১-২০০-১ (৮৮৪৯)
ততস্তে তং মহাত্মানং শুদ্ধাত্মানমকল্মষম্।
দদৃশুঃ পাণ্ডবা বীরাঃ পথি দ্বৈপায়নং তদা॥ ১-২০০-২ (৮৮৫০)
তস্মৈ যথাবৎসৎকারং কৃৎবা তেন চ সৎকৃতাঃ।
কথান্তে চাভ্যনুজ্ঞাতাঃ প্রয়যুর্দ্রুপদক্ষয়ম্॥ ১-২০০-৩ (৮৮৫১)
পশ্যন্তো রমণীয়ানি বনানি চ সরাংসি চ।
তত্রতত্র বসন্তশ্চ শনৈর্জগ্মুর্মহরাথাঃ॥ ১-২০০-৪ (৮৮৫২)
স্বাধ্যায়বন্তঃ শুচয়ো মধুরাঃ প্রিয়বাদিনঃ।
আনুপূর্ব্যেণ সংপ্রাপ্তাঃ পাঞ্চালান্পাণ্ডুনন্দনাঃ॥ ১-২০০-৫ (৮৮৫৩)
তে তু দৃষ্ট্বা পুরং তচ্চ স্কন্ধাবারং চ পাণ্ডবাঃ।
কুম্ভকারস্য শালায়াং নিবাসং চক্রিরে তদা॥ ১-২০০-৬ (৮৮৫৪)
তত্র ভৈক্ষং সমাজহ্রুর্ব্রাহ্মণীং বৃত্তিমাশ্রিতাঃ।
তান্সংপ্রাপ্তাংস্তথা বীরাঞ্জজ্ঞিরে ন নরাঃ ক্বচিৎ॥ ১-২০০-৭ (৮৮৫৫)
`যজ্ঞসেনস্তু পাঞ্চালো ভীষ্মদ্রোমকৃতাগসম্।
জ্ঞাৎবাঽঽত্মানং তদারেভে ত্রাণায়াত্মক্রিয়াং ক্ষমাং॥ ১-২০০-৮ (৮৮৫৬)
অবাপ্য ধৃষ্টদ্যুম্নং হি ন স দ্রোণমচিন্তয়ৎ।
স তু বৈরপ্রসঙ্গাচ্চ ভীষ্মাদ্ভয়মচিন্তয়ৎ॥ ১-২০০-৯ (৮৮৫৭)
কন্যাদানাত্তু শরণং সোঽমন্যত মহীপতিঃ।’
যজ্ঞসেনস্য কামস্তু পাণ্ডবায় কিরীটিনে॥ ১-২০০-১০ (৮৮৫৮)
দাস্যামি কৃষ্মামিতি বৈ ন চৈনং বিবৃণোতি সঃ।
`জামাতৃবলসংয়োগং মেনে হি বলবত্তরম্॥’ ১-২০০-১১ (৮৮৫৯)
সোঽন্বেষমাণঃ কৌন্তেয়ান্পাঞ্চালো জনমেজয়।
দৃঢং ধনুরথানম্যং কারয়ামাস ভারত॥ ১-২০০-১২ (৮৮৬০)
`বৈয়াঘ্রপদ্যস্যোগ্রং বৈ সৃঞ্জয়স্য মহীপতিঃ।
তদ্ধনুঃ কিন্ধুরং নাম দেবদত্তমুপানয়ৎ॥ ১-২০০-১৩ (৮৮৬১)
আয়সী তস্য চ জ্যাঽঽসীৎপ্রতিবদ্ধা মহাবলা।
ন তু জ্যাং প্রসহেদন্যস্তদ্ধনুঃপ্রবরং মহৎ॥ ১-২০০-১৪ (৮৮৬২)
শঙ্করেণ বরং দত্তং প্রীতেন চ মহাত্মনা।
তন্নিষ্ফলং স্যান্ন তু মে ইতি প্রামাণ্যমাগতঃ॥ ১-২০০-১৫ (৮৮৬৩)
ময়া কর্তব্যমধুনা দুষ্করং লক্ষ্যবেধনম্।
ইতি নিশ্চিত্য মনসা কারিতং লক্ষ্যমুত্তমম্॥’ ১-২০০-১৬ (৮৮৬৪)
যন্ত্রং বৈহায়সং চাপি কারয়ামাস কৃত্রিমম্।
তেন যন্ত্রেণ সহিতং রাজঁল্লক্ষ্যং চ কাঞ্চনম্॥ ১-২০০-১৭ (৮৮৬৫)
দ্রুপদ উবাচ। ১-২০০-১৮x (১১৩০)
ইদং সজ্যং ধনুঃ কৃৎবা সজ্জৈরেভিশ্চ সায়কৈঃ।
অতীত্য লক্ষ্য যো বেদ্ধা স লব্ধা মৎসুতামিতি॥ ১-২০০-১৮ (৮৮৬৬)
বৈশম্পায়ন উবাচ। ১-২০০-১৯x (১১৩১)
ইতি স দ্রুপদো রাজা স্বয়ংবরমঘোষয়ৎ।
তচ্ছ্রুৎবা পার্থিবাঃ সর্বে সমীয়ুস্তত্র ভারত॥ ১-২০০-১৯ (৮৮৬৭)
ঋষয়শ্চ মহাত্মানঃ স্বয়ংবরদিদৃক্ষবঃ।
দুর্যোধনপুরোগাশ্চ সকর্ণাঃ কুরবো নৃপ॥ ১-২০০-২০ (৮৮৬৮)
`যাদবা বাসুদেবেন সার্ধমন্ধকবৃষ্ণয়ঃ।’
ততোঽর্চিতা রাজগুণা দ্রুপদেন মহাত্মনা॥ ১-২০০-২১ (৮৮৬৯)
উপোপবিষ্টা মঞ্চেষু দ্রষ্টুকামাঃ স্বয়ংবরম্।
`ব্রাহ্মণাশ্চ মহাভাগা দেশেভ্যঃ সমুপাগমন্॥ ১-২০০-২২ (৮৮৭০)
ব্রাহ্মণৈরেব সহিতাঃ পাণ্ডবাঃ সমুপাবিশন্।
ত্রয়স্ত্রিংশৎসুরাঃ সর্বে বিমানৈর্ব্যোম্ন্যবস্থিতাঃ॥ ১-২০০-২৩ (৮৮৭১)
ততঃ পৌরজনাঃ সর্বে সাগরোদ্ধূতনিঃস্বনাঃ।
শিংশুমারশিরঃ প্রাপ্য ন্যবিশংস্তে স্ম পার্থিবাঃ॥ ১-২০০-২৪ (৮৮৭২)
প্রাগুত্তরেণ নগরাদ্ভূমিভাগে সমে শুভে।
সমাজবাটঃ শুশুভে ভবনৈঃ সর্বতো বৃতঃ॥ ১-২০০-২৫ (৮৮৭৩)
প্রাকারপরিখোপেতো দ্বারতোরণমণ্ডিতঃ।
বিতানেন বিচিত্রেণ সর্বতঃ সমলঙ্কৃতঃ॥ ১-২০০-২৬ (৮৮৭৪)
তূর্যৌঘশতসঙ্কীর্ণঃ পরার্ধ্যাগুরুধূপিতঃ।
চন্দনোদকসিক্তশ্চ মাল্যদামোপশোভিতঃ॥ ১-২০০-২৭ (৮৮৭৫)
কৈলাসশিখরপ্রখ্যৈর্নভস্তলবিলেখিভিঃ।
সর্বতঃ সংবৃতঃ শুভ্রৈঃ প্রাসাদৈঃ সুকৃতোচ্ছ্রয়ৈ॥ ১-২০০-২৮ (৮৮৭৬)
সুবর্ণজালসংবীতৈর্মণিকুট্টিমভূষণৈঃ।
সুখারোহণসোপানৈর্মহাসনপরিচ্ছদৈঃ॥ ১-২০০-২৯ (৮৮৭৭)
স্রগ্দামসমবচ্ছন্নৈরগুরূত্তমবাসিতৈঃ।
হংসাংশুবর্ণৈর্বহুভিরায়োজনসুগন্ধিভিঃ॥ ১-২০০-৩০ (৮৮৭৮)
অসংবাধশতদ্বারৈঃ শয়নাসনশোভিতৈঃ।
বহুধাতুপিনদ্ধাঙ্গৈর্হিমবচ্ছিখরৈরিব॥ ১-২০০-৩১ (৮৮৭৯)
তত্র নানাপ্রকারেষু বিমানেষু স্বলঙ্কৃতাঃ।
স্পর্ধমানাস্তদাঽন্যোন্যং নিষেদুঃ সর্বপার্থিবাঃ॥ ১-২০০-৩২ (৮৮৮০)
তত্রোপবিষ্টান্দদৃশুর্মহাসৎবান্পৃথগ্জনাঃ।
রাজসিংহান্মহাভাগান্কৃষ্ণাগুরুবিভূষিতান্॥ ১-২০০-৩৩ (৮৮৮১)
মহাপ্রসাদান্ব্রাহ্মণ্যান্স্বরাষ্ট্রপরিরক্ষিণঃ।
প্রিয়ান্সর্বস্য লোকস্য সুকৃতৈঃ কর্মভিঃ শুভৈঃ॥ ১-২০০-৩৪ (৮৮৮২)
মঞ্চেষু চ পরার্দ্ধ্যেষু পৌরজানপদা জনাঃ।
কৃষ্ণাদর্শনসিদ্ধ্যর্থং সর্বতঃ সমুপাবিশন্॥ ১-২০০-৩৫ (৮৮৮৩)
ব্রাহ্মণৈস্তে চ সহিতাঃ পাণ্ডবাঃ সমুপাবিশন্।
ঋদ্ধিং পঞ্চালরাজস্য পশ্যন্তস্তামনুত্তমাম্॥ ১-২০০-৩৬ (৮৮৮৪)
ততঃ সমাজো ববৃধে স রাজন্দিবসান্বহূন্।
রত্নপ্রদানবহুলঃ শোভিতো নটনর্তকৈঃ॥ ১-২০০-৩৭ (৮৮৮৫)
বর্তমানে সমাজে তু রমণীয়েঽহ্নি ষোডশে।
`মৈত্রে মুহূর্তে তস্যাশ্চ রাজদারাঃ পুরাবিদঃ।
পুত্রবত্যঃ সুবসনাঃ প্রতিকর্মোপচক্রমুঃ॥ ১-২০০-৩৮ (৮৮৮৬)
বৈডূর্যময়পীঠে তু নিবিষ্টাং দ্রৌপদীং তদা।
সতূর্যং স্নাপয়াঞ্চক্রুঃ স্বর্ণকুম্ভস্থিতৈর্জলৈঃ॥ ১-২০০-৩৯ (৮৮৮৭)
তাং নিবৃত্তাভিষেকাং চ দুকূলদ্বয়ধারিণীম্।
নিন্যুর্মণিস্তম্ভবতীং বেদিং বৈ সুপরিষ্কৃতাম্॥ ১-২০০-৪০ (৮৮৮৮)
নিবেশ্য প্রাঙ্মুখীং হৃষ্টাং বিস্মিতাক্ষ্যঃ প্রসাধিকাঃ।
কেনালঙ্করণেনেমামিত্যন্যোন্যং ব্যলোকয়ন্॥ ১-২০০-৪১ (৮৮৮৯)
ধূপোষ্মণা চ কেশানামার্দ্রভাবং ব্যপোহয়ন্।
ববন্ধুরস্যা ধম্মিল্লং মাল্যৈঃ সুরভিগন্ধিভিঃ॥ ১-২০০-৪২ (৮৮৯০)
দূর্বামধূকরচিতং মাল্যং তস্যা দদুঃ করে।
চক্রুশ্চ কৃষ্ণাগরুণা পত্রসঙ্গং কুচদ্বয়ে॥ ১-২০০-৪৩ (৮৮৯১)
রেজে সা চক্রবাকাঙ্কা স্বর্ণদীর্ঘা সরিদ্বরা।
অলকৈঃ কুটিলৈস্তস্যা মুখং বিকসিতং বভৌ॥ ১-২০০-৪৪ (৮৮৯২)
আসক্তভৃঙ্গং কুসুমং শশিম্বিম্বং জিগায় তৎ।
কালাঞ্জনং নয়নয়োরাচারার্থং সমাদধুঃ॥ ১-২০০-৪৫ (৮৮৯৩)
ভূষণং রত্নখচিতৈরলংচক্রুর্যথোচিতম্।
মাতা চ তস্যাঃ পৃষতী হরিতালমনশ্শিলাম্॥ ১-২০০-৪৬ (৮৮৯৪)
অঙ্গুলীভ্যামুপাদায় তিলকং বিদধে মুখে।
অলঙ্কৃতাং বধূং দৃষ্ট্বা যোষিতো মুদমায়যুঃ॥ ১-২০০-৪৭ (৮৮৯৫)
মাতা ন মুমুদে তস্যাঃ পতিঃ কীদৃগ্ভবিষ্যতি।
সৌবিদল্লাঃ সমাগম্য দ্রুপদস্যাজ্ঞয়া ততঃ॥ ১-২০০-৪৮ (৮৮৯৬)
এনামারোপয়ামাসুঃ করিণীং কুচভূষিতাম্।
ততোঽবাদ্যন্ত বাদ্যানি মঙ্গলানি দিবি স্পৃশন্॥ ১-২০০-৪৯ (৮৮৯৭)
বিলাসিনীজনাশ্চাপি প্রবরং করিণীশতম্।
মাঙ্গল্যগীতং গায়ন্ত্যঃ পার্স্বয়োরুভয়োর্যযুঃ॥ ১-২০০-৫০ (৮৮৯৮)
জনাপসরণে ব্যগ্রাঃ প্রতিহার্যঃ পুরা যয়ুঃ।
কোলাহলো মহানাসীত্তস্মিন্পুরবরে তদা॥ ১-২০০-৫১ (৮৮৯৯)
ধৃষ্টদ্যুম্নো যয়াবগ্রে হয়মারুহ্য ভারত।
দ্রুপদো রঙ্গদেশে তু বলেন মহতা যুতঃ॥ ১-২০০-৫২ (৮৯০০)
তস্থৌ ব্যূহ্য মহানীকং পালিতং দৃঢধন্বিভিঃ।’
আপ্লুতাঙ্গীং সুবসনাং সর্বাভরণভূষিতাম্॥ ১-২০০-৫৩ (৮৯০১)
মালাং চ সমুপাদায় কাঞ্চনীং সমলঙ্কৃতাম্।
`আগতাং দদৃশুঃ সর্বে রঙ্গভূমিমলঙ্কৃতাম্॥’ ১-২০০-৫৪ (৮৯০২)
অবতীর্ণা ততো রঙ্গং দ্রৌপদী ভরতর্ষভ।
`তস্থৌ প্রমুদিতান্সর্বান্নৃপতীন্রঙ্গমণ্ডলে।
প্রেক্ষন্তী ব্রীডিতাপাঙ্গী দ্রষ্টৃণাং সুমনোহরা॥’ ১-২০০-৫৫ (৮৯০৩)
পুরোহিতঃ সোমকানাং মন্ত্রবিদ্ব্রাহ্মণঃ শুচিঃ।
পরিস্তীর্য জুহাবাগ্নিমাজ্যেন বিধিবত্তদা॥ ১-২০০-৫৬ (৮৯০৪)
সংতর্পয়িৎবা জ্বলনং ব্রাহ্মণান্স্বস্তি বাচ্য চ।
বারয়ামাস সর্বাণি বাদিত্রাণি সমন্ততঃ॥ ১-২০০-৫৭ (৮৯০৫)
নিঃশব্দে তু কৃতে তস্মিন্ধৃষ্টদ্যুম্নো বিশাংপতে।
কৃষ্ণামাদায় বিধিবন্মেঘদুন্দুভিনিঃস্বনঃ॥ ১-২০০-৫৮ (৮৯০৬)
রঙ্গমধ্যং গতস্তত্র মেঘগম্ভীরয়া গিরা।
বাক্যমুচ্চৈর্জগাদেদং শ্লক্ষ্ণমর্থবদুত্তমম্॥ ১-২০০-৫৯ (৮৯০৭)
ইদং ধনুর্লক্ষ্যমিমে চ বাণাঃ
শৃণ্বন্তু মে ভূপতয়ঃ সমেতাঃ।
ছিদ্রেণ যন্ত্রস্য মসর্পয়ধ্বং
শরৈঃ শিতৈর্ব্যোমচরৈর্দশার্ধৈঃ॥ ১-২০০-৬০ (৮৯০৮)
এতন্মহৎকর্ম করোতি যো বৈ
কুলেন রূপেণ বলেন যুক্তঃ।
তস্যাদ্য ভার্যা ভগিনী মমেয়ং
কৃষ্ণা ভবিত্রী ন মৃষা ব্রবীমি॥ ১-২০০-৬১ (৮৯০৯)
তানেবমুক্ৎবা দ্রুপদস্য পুত্রঃ
পশ্চাদিদং তাং ভগিনীমুবাচ।
নাম্না চ গোত্রেণ চ কর্মণা চ
সংকীর্তয়ন্ভূমিপতীন্সমেতান্॥ ॥ ১-২০০-৬২ (৮৯১০)

ইতি শ্রীমন্মহাভারতে আদিপর্বণি স্বয়ংবরপর্বণি দ্বিশততমোঽধ্যায়ঃ॥ ২০০ ॥

Mahabharata – Adi Parva – Chapter Footnotes

১-২০০-৭ জজ্ঞিরে জ্ঞাতবন্তঃ॥ ১-২০০-১৭ বৈহায়সমন্তরিক্ষগতম্॥ ১-২০০-২৪ শিংশুমারো জলজন্তুস্তদাকারস্তারাসমূহাত্মকো বিষ্ণুস্তস্য শিরঃপ্রদেশে ঐশান্যাং দিশি। অতএব সা অপরাজিতাদিক্ তাং দিশং প্রাপ্য ন্যবিশন্॥ ১-২০০-২৫ তামেব দিশমাত্র প্রাগিতি॥ দ্বিশততমোঽধ্যায়ঃ॥ ২০০ ॥