আদিপর্ব – অধ্যায় ১৯৫

আদিপর্ব – অধ্যায় ১৯৫

॥ শ্রীঃ ॥

১.১৯৫. অধ্যায়ঃ ১৯৫

Mahabharata – Adi Parva – Chapter Topics

ব্রাহ্মণীবাক্যেন ঔর্বংপ্রতি শরণাগতানাং ক্ষত্রিয়াণাং চক্ষুঃপ্রাপ্তিঃ॥ ১ ॥ লোকবিনাশার্থং তপস্যত ঔর্বস্য তৎপিতৃকৃততপোনিবারণম্॥ ২ ॥

Mahabharata – Adi Parva – Chapter Text

১-১৯৫-০ (৮৭৩০)
ব্রাহ্মণ্যুবাচ। ১-১৯৫-০x (১১১৬)
নাহং গৃহ্ণামি বস্তাতা দৃষ্টীর্নাস্মি রুষান্বিতা।
অয়ং তু ভার্গবো নূনমূরুজঃ কুপিতোঽদ্য বঃ॥ ১-১৯৫-১ (৮৭৩১)
তেন চক্ষূংষি বস্তাতা ব্যক্তং কোপান্মহাত্মনা।
স্মরতা নিহতান্বন্ধূনাদত্তানি ন সংশয়ঃ॥ ১-১৯৫-২ (৮৭৩২)
গর্ভানপি যদা যূয়ং ভৃগূণাং ঘ্নত পুত্রকাঃ।
তদায়মূরুণা গর্ভো ময়া বর্ষশতং ধৃতঃ॥ ১-১৯৫-৩ (৮৭৩৩)
ষডঙ্গশ্চাখিলো বেদ ইমং গর্ভস্থমেব হ।
বিবেশ ভৃগুবংশস্য ভূয়ঃ প্রিয়চিকীর্ষয়া॥ ১-১৯৫-৪ (৮৭৩৪)
সোঽয়ং পিতৃবধাদ্ব্যক্তং ক্রোধাদ্বো হন্তুমিচ্ছতি।
তেজসা তস্য দিব্যেন চক্ষূংষি মুষিতানি বঃ॥ ১-১৯৫-৫ (৮৭৩৫)
তমেব যূয়ং যাচধ্বমৌর্বং মম সুতোত্তমম্।
অয়ং বঃ প্রণিপাতেন তুষ্টো দৃষ্টীঃ প্রদাস্যতি॥ ১-১৯৫-৬ (৮৭৩৬)
বসিষ্ঠ উবাচ। ১-১৯৫-৭x (১১১৭)
এবমুক্তাস্ততঃ সর্বে রাজানস্তে তমূরুজম্।
ঊচুঃ প্রসীদেতি তদা প্রসাদং চ চকার সঃ॥ ১-১৯৫-৭ (৮৭৩৭)
অনেনৈব চ বিখ্যাতো নাম্না লোকেষু সত্তমঃ।
স ঔর্ব ইতি বিপ্রর্ষিরূরুং ভিত্ৎবা ব্যজায়ত॥ ১-১৯৫-৮ (৮৭৩৮)
চক্ষূংষি প্রতিলভ্যাথ প্রতিজগ্মুস্ততো নৃপাঃ।
ভার্গবস্তু মুনির্মেনে সর্বলোকপরাভবম্॥ ১-১৯৫-৯ (৮৭৩৯)
স চক্রে তাত লোকানাং বিনাশায় মতিং তদা।
সর্বেষামেব কার্ৎস্ন্যেন মনঃ প্রবণমাত্মনঃ॥ ১-১৯৫-১০ (৮৭৪০)
ইচ্ছন্নপচিতিং কর্তুং ভৃগূণাং ভৃগুনন্দনঃ।
সর্বলোকবিনাশায় তপসা সহতৈধিতঃ॥ ১-১৯৫-১১ (৮৭৪১)
তাপয়ামাস তাঁল্লোকান্সদেবাসুরমানুষান্।
তপসোগ্রেণ মহতা নন্দয়িষ্যন্পিতামহান্॥ ১-১৯৫-১২ (৮৭৪২)
ততস্তং পিতরস্তাত বিজ্ঞায় কুলনন্দনম্।
পিতৃলোকাদুপাগম্য সর্ব ঊচুরিদং বচঃ॥ ১-১৯৫-১৩ (৮৭৪৩)
ঔর্ব দৃষ্টঃ প্রভাবস্তে তপসোগ্রস্য পুত্রক।
প্রসাদং কুরু লোকানাং নিয়চ্ছ ক্রোধমাত্মনঃ॥ ১-১৯৫-১৪ (৮৭৪৪)
নানীশৈর্হি তদা তাত ভৃগুভির্ভাবিতাত্মভিঃ।
বধো হ্যুপেক্ষিতঃ সর্বৈঃ ক্ষত্রিয়াণাং বিহিংসতাম্॥ ১-১৯৫-১৫ (৮৭৪৫)
আয়ুষা বিপ্রকৃষ্টেন যদা নঃ খেদ আবিশৎ।
তদাঽস্মাভির্বধস্তাত ক্ষত্রিয়ৈরীপ্সিতঃ স্বয়ম্॥ ১-১৯৫-১৬ (৮৭৪৬)
নিখাতং যচ্চ বৈ বিত্তং কেনচিদ্গৃগুবেশ্মনি।
বৈরায়ৈব তদা ন্যস্তং ক্ষত্রিয়ান্কোপয়িষ্ণুভিঃ॥ ১-১৯৫-১৭ (৮৭৪৭)
কিং হি বিত্তেন নঃ কার্যং স্বর্গেপ্সূনাং দ্বিজোত্তম।
যদস্মাকং ধনাধ্যক্ষঃ প্রভূতং ধনমাহরৎ॥ ১-১৯৫-১৮ (৮৭৪৮)
যদা তু মৃত্যুরাদাতুং ন নঃ শক্নোতি সর্বশঃ।
তদাঽস্মাভিরয়ং দৃষ্ট উপায়স্তাত সংমতঃ॥ ১-১৯৫-১৯ (৮৭৪৯)
আত্মহা চ পুমাংস্তাত ন লোকাঁল্লভতে শুভান্।
ততোঽস্মাভিঃ সমীক্ষ্যৈবং নাত্মনাত্মা নিপাতিতঃ॥ ১-১৯৫-২০ (৮৭৫০)
ন চৈতন্নঃ প্রিয়ং তাত যদিদং কর্তুমিচ্ছসি।
নিয়চ্ছেদং মনঃ পাপাৎসর্বলোকপরাভবাৎ॥ ১-১৯৫-২১ (৮৭৫১)
মা বধীঃ ক্ষত্রিয়াংস্তাত ন লোকান্সপ্ত পুত্রক।
দূষয়ন্তং তপস্তেজঃ ক্রোধমুৎপতিতং জহি॥ ॥ ১-১৯৫-২২ (৮৭৫২)

ইতি শ্রীমন্মহাভারতে আদিপর্বণি চৈত্ররথপর্বণি পঞ্চনবত্যধিকশততমোঽধ্যায়ঃ॥ ১৯৫ ॥

Mahabharata – Adi Parva – Chapter Footnotes

১-১৯৫-২০ আত্মহেতি এতেন ভৃগুপতনাদিনা মরণং ব্রাহ্মণেতরবিষয়ং দর্শিতম্॥ ১-১৯৫-২২ মাবধীরিতি ক্ষত্রিয়ান্ তদনিয়ন্তৃৎবেনানপরাধিনঃ। সপ্তলোকান্ ভূরাদীংশ্চ মাবধীঃ কিংতু তপঃসংভৃতং তেজো দূষয়ন্তং ক্রোধং জহি॥ পঞ্চনবত্যধিকশততমোঽধ্যায়ঃ॥ ১৯৫ ॥