আদিপর্ব – অধ্যায় ১৯৩

আদিপর্ব – অধ্যায় ১৯৩

॥ শ্রীঃ ॥

১.১৯৩. অধ্যায়ঃ ১৯৩

Mahabharata – Adi Parva – Chapter Topics

পূর্বোপায়ৈরপি দুস্ত্যজপ্রাণস্য বসিষ্ঠস্য পুনর্গঙ্গাপতনাদিনাপি প্রাণত্যাগাসংভবে আশ্রমং প্রত্যাগমনম্॥ ১ ॥ তত্র শক্তিভার্যামদৃশ্যন্তীনাম্নী গর্ভবতীং জ্ঞাৎবা আত্মঘাতান্নিবর্তনং॥ ২ ॥ অদৃশ্যন্ত্যা সহ গচ্ছন্তং বসিষ্ঠং ভক্ষয়িতুমাগতস্য কল্মাষপাদস্য বসিষ্ঠেন শাপান্মোক্ষণং॥ ৩ ॥ সৌদাসপত্ন্যা বসিষ্ঠাদ্গর্ভসংভবঃ॥ ৪ ॥ অশ্মকনামকপুত্রোৎপত্তিঃ॥ ৫ ॥

Mahabharata – Adi Parva – Chapter Text

১-১৯৩-০ (৮৬৫০)
গন্ধর্ব উবাচ। ১-১৯৩-০x (১১০৫)
ততো দৃষ্ট্বাশ্রমপদং রহিতং তৈঃ সুতৈর্মুনিঃ।
নির্জগাম সুদুঃখার্তঃ পুনরপ্যাশ্রমাত্ততঃ॥ ১-১৯৩-১ (৮৬৫১)
সোঽপশ্যৎসরিতং পূর্ণাং প্রাবৃট্কালে নবাম্ভসা।
বৃক্ষান্বহুবিধান্পার্থ হরন্তীং তীরজান্বহূন্॥ ১-১৯৩-২ (৮৬৫২)
অথ চিন্তাং সমাপেদে পুনঃ কৌরবনন্দন।
অম্ভস্যস্যা নিমজ্জেয়মিতি দুঃখসমন্বিতঃ॥ ১-১৯৩-৩ (৮৬৫৩)
ততঃ পাশৈস্তদাত্মানং গাঢং বদ্ধ্বা মহামুনিঃ।
তস্যা জলে মহানদ্যা নিমমজ্জ সুদুঃখিতঃ॥ ১-১৯৩-৪ (৮৬৫৪)
অথ চ্ছিত্ৎবা নদী পাশাংস্তস্যারিবলসূদন।
স্থলস্থং তমৃষিং কৃৎবা বিপাশং সমবাসৃজৎ॥ ১-১৯৩-৫ (৮৬৫৫)
উত্ততার ততঃ পাশৈর্বিমুক্তঃ স মহানৃষিঃ।
বিপাশেতি চ নামাস্যা নদ্যাশ্চক্রে মহানৃষিঃ॥ ১-১৯৩-৬ (৮৬৫৬)
`সা বিপাশেতি বিখ্যাতা নদী লোকেষু ভারত।
ঋষেস্তস্য নরব্যাঘ্র বচনাৎসত্যবাদিনঃ।
উত্তীর্য চ তদা রাজন্দুঃখিতো ভগবানৃষিঃ॥’ ১-১৯৩-৭ (৮৬৫৭)
শোকে বুদ্ধিং তদা চক্রে ন চৈকত্র ব্যতিষ্ঠত।
সোঽগচ্ছৎপর্বতাংশ্চৈব সরিতশ্চ সরাংসি চ॥ ১-১৯৩-৮ (৮৬৫৮)
দৃষ্ট্বা স পুনরেবর্ষির্নদীং হৈমবতীং তদা।
চণ্ডগ্রাহবতীং ভীমাং তস্যাঃ স্রোতস্যপাতয়ৎ॥ ১-১৯৩-৯ (৮৬৫৯)
সা তমগ্নিসং বিপ্রমনুচিন্ত্য সরিদ্বরা।
শতধা বিদ্রুতা তস্মাচ্ছতদ্রুরিতি বিশ্রুতা॥ ১-১৯৩-১০ (৮৬৬০)
ততঃ স্থলগতং দৃষ্ট্বা তত্রাপ্যাত্মানমাত্মনা।
মর্তুং ন শক্যমিত্যুক্ৎবা পুবরেবাশ্রমং যয়ৌ॥ ১-১৯৩-১১ (৮৬৬১)
স গৎবা বিবিধাঞ্শৈলান্দেশান্বহুবিধাংস্তথা।
অদৃশন্ত্যাখ্যযা বধ্বাথাশ্রমেনুসৃতোঽভবৎ॥ ১-১৯৩-১২ (৮৬৬২)
অথ শুশ্রাব সংগত্যা বেদাধ্যযননিঃস্বনম্।
পৃষ্ঠতঃ পরিপূর্ণার্থং ষড্মিরঙ্গৈরলঙ্কৃতম্॥ ১-১৯৩-১৩ (৮৬৬৩)
অনুব্রজতি কোন্বেষ মামিত্যেবাথ সোঽব্রবীৎ।
অদৃশ্যন্ত্যেবমুক্তা বৈ তং স্নুষা প্রত্যভাষত॥ ১-১৯৩-১৪ (৮৬৬৪)
শক্তোভার্যা মহাভাগ তপোয়ুক্তা তপস্বিনম্।
অহমেকাকিনী চাপি ৎবয়া গচ্ছামি নাপরঃ॥ ১-১৯৩-১৫ (৮৬৬৫)
বসিষ্ঠ উবাচ। ১-১৯৩-১৬x (১১০৬)
পুত্রি কস্যৈষ সাঙ্গস্য বেদস্যাধ্যযনস্বনঃ।
পুরা সাঙ্গস্য বেদস্য শক্তেরিব ময়া শ্রুতঃ॥ ১-১৯৩-১৬ (৮৬৬৬)
অদৃশ্যন্ত্যুবাচ। ১-১৯৩-১৭x (১১০৭)
অয়ং কুক্ষৌ সমুৎপন্নঃ শক্তের্গর্ভঃ সুতস্য তে।
সমা দ্বাদশ তস্যেহ বেদানভ্যস্যতো মুনে॥ ১-১৯৩-১৭ (৮৬৬৭)
গন্ধর্ব উবাচ। ১-১৯৩-১৮x (১১০৮)
এবমুক্তস্তয়া হৃষ্টো বসিষ্ঠঃ শ্রেষ্ঠভাগৃষিঃ।
অস্তি সন্তানমিত্যুক্ৎবা মৃত্যোঃ পার্থ ন্যবর্তত॥ ১-১৯৩-১৮ (৮৬৬৮)
ততঃ প্রতিনিবৃত্তঃ স তয়া বধ্বা সহানঘ।
কল্মাষপাদমাসীনং দদর্শ বিজনে বনে॥ ১-১৯৩-১৯ (৮৬৬৯)
স তু দৃষ্ট্বৈব তং রাজা ক্রুদ্ধ উত্থায় ভারত।
আবিষ্টো রক্ষসোগ্রেণ ইয়েষাত্তুং তদা মুনিম্॥ ১-১৯৩-২০ (৮৬৭০)
অদৃশ্যন্তী তু তং দৃষ্ট্বা ক্রূরকর্মাণমগ্রতঃ।
ভয়সংবিগ্নয়া বাচা বসিষ্ঠমিদমব্রবীৎ॥ ১-১৯৩-২১ (৮৬৭১)
অসৌ মৃত্যুরিবোগ্রেণ দণ্ডেন ভগবন্নিতঃ।
প্রগৃহীতেন কাষ্ঠেন রাক্ষসোঽভ্যেতি দারুণঃ॥ ১-১৯৩-২২ (৮৬৭২)
তং নিবারয়িতুং শক্তো নান্যোঽস্তি ভুবি কশ্চন।
স্বদৃতেঽদ্য মহাভাগ সর্ববেদবিদাং বর॥ ১-১৯৩-২৩ (৮৬৭৩)
পাহি মাং ভগবন্পাপাদস্মাদ্দারুণদর্শনাৎ।
রাক্ষসোঽয়মিহাত্তুং বৈ নূনমাবাং সমীহতে॥ ১-১৯৩-২৪ (৮৬৭৪)
বসিষ্ঠ উবাচ। ১-১৯৩-২৫x (১১০৯)
মাভৈঃ পুত্রি ন ভেতব্যং রাক্ষসাত্তু কথংচন।
নৈতদ্রক্ষো ভয়ং যস্মাৎপশ্যসি ৎবমুপস্থিতম্॥ ১-১৯৩-২৫ (৮৬৭৫)
রাজা কল্মাষপাদোঽয়ং বীর্যবান্প্রথিতো ভুবি।
স এষোঽস্মিন্বনোদ্দেশে নিবসত্যতিভীষণঃ॥ ১-১৯৩-২৬ (৮৬৭৬)
গন্ধর্ব উবাচ। ১-১৯৩-২৭x (১১১০)
তমাপতন্তং সংপ্রেক্ষ্য বসিষ্ঠো ভগবানৃষিঃ।
বারয়ামাস তেজস্বী হুঙ্কারেণৈব ভারত॥ ১-১৯৩-২৭ (৮৬৭৭)
মন্ত্রপূতেন চ পুনঃ স তমভ্যুক্ষ্য বারিণা।
মোক্ষয়ামাস বৈ শাপাত্তস্মাদ্যোগান্নরাধিপম্॥ ১-১৯৩-২৮ (৮৬৭৮)
স হি দ্বাদশ বর্ষাণি বাসিষ্ঠস্যৈব তেজসা।
গ্রস্ত আসীদ্গ্রহেণেব পর্বকালে দিবাকরঃ॥ ১-১৯৩-২৯ (৮৬৭৯)
রক্ষসা বিপ্রমুক্তোঽথ স নৃপস্তদ্বনং মহৎ।
তেজসা রঞ্জয়ামাস ন্ধ্যাভ্রমিব ভাস্করঃ॥ ১-১৯৩-৩০ (৮৬৮০)
প্রতিলভ্য ততঃ সংজ্ঞামভিবাদ্য কৃতাঞ্জলিঃ।
উবাচ নৃপতিঃ কালে বসিষ্ঠমৃষিসত্তমম্॥ ১-১৯৩-৩১ (৮৬৮১)
সৌদাসোঽহং মহাভাগ যাজ্যস্তে মুনিসত্তম।
অস্মিন্কালে যদিষ্টং তে ব্রূহি কিং করবাণি তে॥ ১-১৯৩-৩২ (৮৬৮২)
বসিষ্ঠ উবাচ। ১-৯৩-৩৩x (১১১১)
বৃত্তমেতদ্যথাকালং গচ্ছ রাজ্যং প্রশাধি বৈ।
ব্রাহ্মণং তু মনুষ্যেন্দ্র মাঽবমংস্থাঃ কদাচন॥ ১-১৯৩-৩৩ (৮৬৮৩)
রাজোবাচ। ১-১৯৩-৩৪x (১১১২)
নাবমংস্যে মহাভাগ কদাচিদ্ব্রাহ্মণর্ষভান্।
ৎবন্নিদেশে স্থিতঃ সম্যক্ পূজয়িষ্যাম্যহং দ্বিজান্॥ ১-১৯৩-৩৪ (৮৬৮৪)
ইক্ষ্বাকূণাং চ যেনাহমনৃণঃ স্যাং দ্বিজোত্তম।
তত্ৎবত্তঃ প্রাপ্তুমিচ্ছামি সর্ববেদবিদাং বর॥ ১-১৯৩-৩৫ (৮৬৮৫)
অপত্যায়েপ্সিতায় ৎবং মহিষীং গন্তুমর্হসি।
শীলরূপগুণোপেতামিক্ষ্বাকুকুলবৃদ্ধয়ে॥ ১-১৯৩-৩৬ (৮৬৮৬)
গন্ধর্ব উবাচ। ১-১৯৩-৩৭x (১১১৩)
দদানীত্যেব তং তত্র রাজানং প্রত্যুবাচ হ।
বসিষ্ঠঃ পরমেষ্বাসং সত্যসন্ধো দ্বিজোত্তমঃ॥ ১-১৯৩-৩৭ (৮৬৮৭)
ততঃ প্রতিয়যৌ কালে বসিষ্ঠঃ সহ তেন বৈ।
খ্যাতাং পুরীমিমাং লোকেষ্বয়োধ্যাং মনুজেশ্বর॥ ১-১৯৩-৩৮ (৮৬৮৮)
তং প্রজাঃ প্রতিমোদন্ত্যঃ সর্বাঃ প্রত্যুদ্গতাস্তদা।
বিপাপ্মানং মহাত্মানং দিবৌকস ইবেশ্বরম্॥ ১-১৯৩-৩৯ (৮৬৮৯)
সুচিরায় মনুষ্যেন্দ্রো নগরীং পুণ্যলক্ষণাম্।
বিবেশ সহিতস্তেন বসিষ্ঠেন মহর্ষিণা॥ ১-১৯৩-৪০ (৮৬৯০)
দদৃশুস্তং মহীপালময়োধ্যাবাসিনো জনাঃ।
পুরোহিতেন সহিতং দিবাকরমিবোদিতম্॥ ১-১৯৩-৪১ (৮৬৯১)
স চ তাং পূরয়ামাস লক্ষ্ম্যা লক্ষ্মীবতাং বরঃ।
অয়োধ্যাং ব্যোম শীতাংশুঃ শরৎকাল ইবোদিতঃ॥ ১-১৯৩-৪২ (৮৬৯২)
সংসক্তিমৃষ্টপন্থানং পতাকাধ্বজশোভিতম্।
মনঃ প্রহ্লাদয়ামাস তস্য তৎপুরমুত্তমম্॥ ১-১৯৩-৪৩ (৮৬৯৩)
তুষ্টপুষ্টজনাকীর্ণা সা পুরী কুরুনন্দন।
অশোভত তদা তেন শক্রেণেবামরাবতী॥ ১-১৯৩-৪৪ (৮৬৯৪)
ততঃ প্রবিষ্টে রাজর্ষৌ তস্মিংস্তৎপুরমুত্তমম্।
রাজ্ঞস্তস্যাজ্ঞয়া দেবী বসিষ্ঠমুপচক্রমে॥ ১-১৯৩-৪৫ (৮৬৯৫)
ঋতাবথ মহর্ষিস্তু সংবভূব তয়া সহ।
দেব্যা দিব্যেন বিধিনা বসিষ্ঠঃ শ্রেষ্ঠভাগৃষিঃ॥ ১-১৯৩-৪৬ (৮৬৯৬)
ততস্তস্যাং সমুৎপন্নে গর্ভে স মুনিসত্তমঃ।
রাজ্ঞাভিবাদিতস্তেন জগাম মুনিরাশ্রমম্॥ ১-১৯৩-৪৭ (৮৬৯৭)
দীর্ঘকালেন সা গর্ভং সুষুবে ন তু তং যদা।
তদা দেব্যশ্মনা কুক্ষিং নির্বিভেদ যশস্বিনী॥ ১-১৯৩-৪৮ (৮৬৯৮)
ততো দ্বাদশমে বর্ষে স জজ্ঞে পুরষর্ষভঃ।
অশ্মকো নাম রাজর্ষিঃ পৌদন্যং যো ন্যবেশয়ৎ॥ ॥ ১-১৯৩-৪৯ (৮৬৯৯)

ইতি শ্রীমন্মহাভারতে আদিপর্বণি চৈত্ররথপর্বণি ত্রিনবত্যধিকশততমোঽধ্যায়ঃ॥ ১৯৩ ॥

Mahabharata – Adi Parva – Chapter Footnotes

১-১৯৩-১২ বধ্বা স্নুষয়া॥ ১-১৯৩-৪৮ নিষ্পিপেষ মনস্বিনীতি ঙ. পাঠঃ॥ ত্রিনবত্যধিকশততমোঽধ্যায়ঃ॥ ১৯৩ ॥