আদিপর্ব – অধ্যায় ১৮৮

আদিপর্ব – অধ্যায় ১৮৮

॥ শ্রীঃ ॥

১.১৮৮. অধ্যায়ঃ ১৮৮

Mahabharata – Adi Parva – Chapter Topics

ভূতলে পতিতং রাজানং দৃষ্ট্বা তৎসমীপে তপত্যা আগমনম্॥ ১ ॥ তয়োঃ সংবাদঃ॥ ২ ॥

Mahabharata – Adi Parva – Chapter Text

১-১৮৮-০ (৮৪৩০)
গন্ধর্ব উবাচ। ১-১৮৮-০x (১০৭৪)
অথ তস্যামদৃশ্যায়াং নৃপতিঃ কামমোহিতঃ।
পাতনঃ শত্রুসঙ্ঘানাং পপাত ধরণীতলে॥ ১-১৮৮-১ (৮৪৩১)
তস্মিন্নিপতিতে ভূমাবথ সা চারুহাসিনী।
পুনঃ পীনায়তশ্রোণী দর্শয়ামাস তং নৃপম্॥ ১-১৮৮-২ (৮৪৩২)
অথাবভাষে কল্যাণী বাচা মধুরয়া নৃপম্।
তং কুরূণাং কুলকরং কামাভিহতচেতসম্॥ ১-১৮৮-৩ (৮৪৩৩)
উবাচ মধুরং বাক্যং তপতী হসতীব সা।
উত্তিষ্ঠোত্তিষ্ঠ ভদ্রং তে ন ৎবমর্হস্যরিন্দম॥ ১-১৮৮-৪ (৮৪৩৪)
মোহং নৃপতিশার্দূল গন্তুমাবিষ্কৃতঃ ক্ষিতৌ।
এবমুক্তোঽথ নৃপতির্বাচা মধুরয়া তদা॥ ১-১৮৮-৫ (৮৪৩৫)
দদর্শ বিপুলশ্রোণীং তামেবাভিমুখে স্থিতাম্।
অথ তামসিতাপাঙ্গীমাবভাষে স পার্থিবঃ॥ ১-১৮৮-৬ (৮৪৩৬)
মন্মথাগ্নিপরীতাত্মা সন্দিগ্ধাক্ষরয়া গিরা।
সাধু ৎবমসিতাপাঙ্গি কামার্তং মত্তকাশিনি॥ ১-১৮৮-৭ (৮৪৩৭)
ভজস্ব ভজমানং মাং প্রাণা হি প্রজহন্তি মাম্।
ৎবদর্থং হি বিশালাক্ষি মাময়ং নিশিতৈঃ শরৈঃ॥ ১-১৮৮-৮ (৮৪৩৮)
কামঃ কমলগর্ভাভে প্রতিবিধ্যন্ন শাম্যতি।
দষ্টমেবমনাক্রন্দে ভদ্রে কামমহাহিনা॥ ১-১৮৮-৯ (৮৪৩৯)
সা ৎবং পীনায়তশ্রোণী মামাপ্নুহি বরাননে।
ৎবদধীনা হি মে প্রাণাঃ কিন্নরোদ্গীতভাষিণি॥ ১-১৮৮-১০ (৮৪৪০)
চারুসর্বানবদ্যাঙ্গি পদ্মেন্দুপ্রতিমাননে।
ন হ্যহং ৎবদৃতে ভীরু শক্ষ্যামি খলু জীবিতুম্॥ ১-১৮৮-১১ (৮৪৪১)
কামঃ কমলপত্রাক্ষি প্রতিবিধ্যতি মাময়ম্।
তস্মাৎকুরু বিশালাক্ষি ময়্যনুক্রোশমঙ্গনে॥ ১-১৮৮-১২ (৮৪৪২)
ভক্তং মামসিতাপাঙ্গি ন পরিত্যক্তুমর্হসি।
ৎবং হি মাং প্রীতিয়োগেন ত্রাতুমর্হসি ভামিনি॥ ১-১৮৮-১৩ (৮৪৪৩)
ৎবদ্দর্শনকৃতস্নেহং মনশ্চলতি মে ভৃশম্।
ন ৎবাং দৃষ্ট্বা পুনশ্চান্যাং দ্রষ্টুং কল্যাণি রোচতে॥ ১-১৮৮-১৪ (৮৪৪৪)
প্রসীদ বশগোঽহং তে ভক্তং মাং ভজ ভামিনি।
দৃষ্ট্বৈব ৎবাং বরারোহে মন্মথো ভৃশমঙ্গনে॥ ১-১৮৮-১৫ (৮৪৪৫)
অন্তর্গতং বিশালাক্ষি বিধ্যতি স্ম পতত্ত্রিভিঃ।
মন্মথাগ্নিসমুদ্ভূতং দাহং কমললোচনে॥ ১-১৮৮-১৬ (৮৪৪৬)
প্রীতিসংয়োগয়ুক্তাভিরদ্ভিঃ প্রহ্লাদয়স্ব মে।
পুষ্পায়ুধং দুরাধর্ষং প্রচণ্ডশরকার্মুকম্॥ ১-১৮৮-১৭ (৮৪৪৭)
ৎবদ্দর্শনসমুদ্ভূতং বিধ্যন্তং দুঃসহৈঃ শরৈঃ।
উপশাময় কল্যাণি আত্মদানেন ভামিনি॥ ১-১৮৮-১৮ (৮৪৪৮)
গান্ধর্বেণ বিবাহেন মামুপৈহি বরাঙ্গনে।
বিবাহানাং হি রম্ভোরু গান্ধর্বঃ শ্রেষ্ঠ উচ্যতে॥ ১-১৮৮-১৯ (৮৪৪৯)
তপত্যুবাচ। ১-১৮৮-২০x (১০৭৫)
নাহমীশাঽঽত্মনো রাজন্কন্যা পিতৃমতী হ্যহম্।
ময়ি চেদস্তি তে প্রীতির্যাচস্ব পিতরং মম॥ ১-১৮৮-২০ (৮৪৫০)
যথা হি তে ময়া প্রাণাঃ সংভৃতাশ্চ নরেশ্বর।
দর্শনাদেব ভূয়স্ৎবং তথা প্রাণান্মমাহরঃ॥ ১-১৮৮-২১ (৮৪৫১)
ন চাহমীশা দেহস্য তস্মান্নৃপতিসত্তম।
সমীপং নোপগচ্ছামি ন স্বতন্ত্রা হি যোষিতঃ॥ ১-১৮৮-২২ (৮৪৫২)
কা হি সর্বেষু লোকেষু বিশ্রুতাভিজনং নৃপম্।
কন্যা নাভিলষেন্নাথং ভার্তারং ভক্তবৎসলম্॥ ১-১৮৮-২৩ (৮৪৫৩)
তস্মাদেবং গতে কালে যাচস্ব পিতরং মম।
আদিত্যং প্রণিপাতেন তপসা নিয়মেন চ॥ ১-১৮৮-২৪ (৮৪৫৪)
স চেৎকাময়তে দাতুং তব মামরিসূদন।
ভবিষ্যাম্যদ্য তে রাজন্সততং বশবর্তিনী॥ ১-১৮৮-২৫ (৮৪৫৫)
অহং হি তপতী নাম সাবিত্র্যবরজা সুতা।
অস্য লোকপ্রদীপস্য সবিতুঃ ক্ষত্রিয়র্ষভ॥ ॥ ১-১৮৮-২৬ (৮৪৫৬)

ইতি শ্রীমন্মহাভারতে আদিপর্বণি চৈত্ররথপর্বণি অষ্টাশীত্যধিকশততমোঽধ্যায়ঃ॥ ১৮৮ ॥

Mahabharata – Adi Parva – Chapter Footnotes

১-১৮৮-৮ প্রজহন্তি প্রজহতি॥ ১-১৮৮-৯ অনাক্রন্দে অত্রাতরি কালে॥ অষ্টাশীত্যধিকশততমোঽধ্যায়ঃ॥ ১৮৮ ॥