আদিপর্ব – অধ্যায় ১৮৭

আদিপর্ব – অধ্যায় ১৮৭

॥ শ্রীঃ ॥

১.১৮৭. অধ্যায়ঃ ১৮৭

Mahabharata – Adi Parva – Chapter Topics

সূর্যকন্যায়াঃ তপত্যা উপাখ্যানম্–স্বভক্তায় সংবরণায় স্বকন্যাং দাতুং সবিতুর্নিশ্চয়ঃ॥ ১ ॥ মৃগয়ার্থং গতস্য সংবরণস্য গিরৌ তপতীদর্শনেন কামোৎপত্তিঃ॥ ২ ॥ রাজনি তয়া সহ ভাষিতুং প্রবৃত্তে তপ্ত্যা অন্তর্ধানম্॥ ৩ ॥

Mahabharata – Adi Parva – Chapter Text

১-১৮৭-০ (৮৩৮৫)
অর্জুন উবাচ। ১-১৮৭-০x (১০৭২)
তাপত্য ইতি যদ্বাক্যমুক্তবানসি মামিহ।
তদহং জ্ঞাতুমিচ্ছামি তাপত্যার্থং বিনিশ্চিতম্॥ ১-১৮৭-১ (৮৩৮৬)
তপতী নাম কা চৈষা তাপত্যা যৎকৃতে বয়ম্।
কৌন্তেয়া হি বয়ং সাধো তত্ৎবমিচ্ছামি বেদিতুম্॥ ১-১৮৭-২ (৮৩৮৭)
বৈশম্পায়ন উবাচ। ১-১৮৭-৩x (১০৭৩)
এবমুক্তঃ স গন্ধর্বঃ কুন্তীপুত্রং ধনঞ্জয়ম্।
বিশ্রুতং ত্রিষু লোকেষু শ্রাবয়ামাস বৈ কথাম্॥ ১-১৮৭-৩ (৮৩৮৮)
হন্ত তে কথয়িষ্যামি কথামেতাং মনোরমাম্।
যথাবদখিলাং পার্থ সর্ববুদ্ধিমতাং বর॥ ১-১৮৭-৪ (৮৩৮৯)
উক্তবানস্মি যেন ৎবাং তাপত্য ইতি যদ্বচঃ।
তত্তেঽহং কথয়িষ্যামি শৃণুষ্বৈকমনা ভব॥ ১-১৮৭-৫ (৮৩৯০)
য এষ দিবি ধিষ্ণ্যেন নাকং ব্যাপ্নোতি তেজসা।
এতস্য তপতী নাম বভূব সদৃশী সুতা॥ ১-১৮৭-৬ (৮৩৯১)
বিবস্বতো বৈ দেবস্য সাবিত্র্যবরজা বিভো।
বিশ্রুতা ত্রিষু লোকেষু তপতী তপসা যুতা॥ ১-১৮৭-৭ (৮৩৯২)
ন দেবী নাসুরী চৈব ন যক্ষী ন চ রাক্ষসী।
নাপ্সরা ন চ গন্ধর্বী তথা রূপেণ কাচন॥ ১-১৮৭-৮ (৮৩৯৩)
সুবিভক্তানবদ্যাঙ্গী স্বসিতায়তলোচনা।
স্বাচারা চৈব সাধ্বী চ সুবেষা চৈব ভামিনী॥ ১-১৮৭-৯ (৮৩৯৪)
ত তস্যাঃ সদৃশং কংচিত্ত্রিষু লোকেষু ভারত।
ভর্তারং সবিতা মেনে রূপশীলগুণশ্রুতৈঃ॥ ১-১৮৭-১০ (৮৩৯৫)
সংপ্রাপ্তয়ৌবনাং পশ্যন্দেয়াং দুহিতরং তু তাম্।
`দ্ব্যষ্টবর্ষাং তু তাং শ্যামাং সবিতা রূপশালিনীম্।’
নোপলেভে ততঃ শান্তিং সংপ্রদানং বিচিন্তয়ন্॥ ১-১৮৭-১১ (৮৩৯৬)
অথর্ক্ষপুত্রঃ ক্রান্তেয় কুরূণামৃষভো বলী।
সূর্যমারাধয়ামাস নৃপঃ সংবরণস্তদা॥ ১-১৮৭-১২ (৮৩৯৭)
অর্ধ্যমাল্যোপহারাদ্যৈর্গন্ধৈশ্চ নিয়তঃ শুচিঃ।
নিয়মৈরুপবাসৈশ্চ তপোভির্বিবিধৈরপি॥ ১-১৮৭-১৩ (৮৩৯৮)
সুশ্রূষুরনহংবাদী শুচিঃ পৌরবনন্দন।
অংশুমন্তং সমুদ্যন্তং পূজয়ামাস ভক্তিমান্॥ ১-১৮৭-১৪ (৮৩৯৯)
ততঃ কৃতজ্ঞং ধর্মজ্ঞং রূপেণাসদৃশং ভুবি।
তপত্যাঃ সদৃশং মেনে সূর্যঃ সংবরণং পতিম্॥ ১-১৮৭-১৫ (৮৪০০)
দাতুমৈচ্ছত্ততঃ কন্যাং তস্মৈ সংবরণায় তাম্।
নৃপোত্তমায় কৌরব্য বিশ্রুতাভিজনায় চ॥ ১-১৮৭-১৬ (৮৪০১)
যথা হি দিবি দীপ্তাংশুঃ প্রভাসয়তি তেজসা।
তথা ভুবি মহিপালো দীপ্ত্যা সংবরণোঽভবৎ॥ ১-১৮৭-১৭ (৮৪০২)
যথাঽর্চয়ন্তি চাদিত্যমুদ্যন্তং ব্রহ্মবাদিনঃ।
তথা সংবরণং পার্থ ব্রাহ্মণাবরজাঃ প্রজাঃ॥ ১-১৮৭-১৮ (৮৪০৩)
স সোমমতি কান্তৎবাদাদিত্যমতি তেজসা।
বভূব নৃপতিঃ শ্রীমান্সুহৃদাং দুর্হৃদামপি॥ ১-১৮৭-১৯ (৮৪০৪)
এবংগুণস্য নৃপতেস্তথাবৃত্তস্য কৌরব।
তস্মৈ দাতুং মনশ্চক্রে তপতীং তপনঃ স্বয়ম্॥ ১-১৮৭-২০ (৮৪০৫)
স কদাচিদথো রাজা শ্রীমানমিতবিক্রমঃ।
চচার মৃগয়াং পার্থ পর্বতোপবনে কিল॥ ১-১৮৭-২১ (৮৪০৬)
চরতো মৃগয়াং তস্য ক্ষুৎপিপাসাসমন্বিতঃ।
মমার রাজ্ঞঃ কৌন্তেয় গিরাবপ্রতিমো হয়ঃ॥ ১-১৮৭-২২ (৮৪০৭)
স মৃতাশ্বশ্চরন্পার্থ পদ্ভ্যামেব গিরৌ নৃপঃ।
দদর্শাসদৃশীং লোকে কন্যামায়তলোচনাম্॥ ১-১৮৭-২৩ (৮৪০৮)
স এব একামাসাদ্য কন্যাং পরবলার্দনঃ।
তস্থৌ নৃপতিশার্দূলঃ পশ্যন্নবিচলেক্ষণঃ॥ ১-১৮৭-২৪ (৮৪০৯)
স হি তাং তর্কয়ামাস রূপতো নৃপতিঃ শ্রিয়ম্।
পুনঃ সংতর্কয়ামাস রবের্ভ্রষ্টামিব প্রভাম্॥ ১-১৮৭-২৫ (৮৪১০)
বপুষা বর্চসা চৈব শিখামিব বিভাবসোঃ।
প্রসন্নৎবেন কান্ত্যা চ চন্দ্ররেখামিবামলাম্॥ ১-১৮৭-২৬ (৮৪১১)
গিরিপৃষ্ঠে তু সা যস্মিন্স্থিতা স্বসিতলোচনা।
বিভ্রাজমানা শুশুভে প্রতিমেব হিরণ্ময়ী॥ ১-১৮৭-২৭ (৮৪১২)
তস্যা রূপেণ স গিরির্বেষেণ চ বিশেষতঃ।
সসবৃক্ষক্ষুপলতো হিরণ্ময় ইবাভবৎ॥ ১-১৮৭-২৮ (৮৪১৩)
অবমেনে চ তাং দৃষ্ট্বা সর্বলোকেষু যোষিতঃ।
অবাপ্তং চাত্মনো মেনে স রাজা চক্ষুষঃ ফলং॥ ১-১৮৭-২৯ (৮৪১৪)
জন্মপ্রভৃতি যৎকিচিংদ্দৃষ্টবান্স মহীপতিঃ।
রূপং ন সদৃশং তস্যাস্তর্কয়ামাস কিংচন॥ ১-১৮৭-৩০ (৮৪১৫)
তয়া বদ্ধমনশ্চক্ষুঃ পাশৈর্গুণময়ৈস্তদা।
ন চচাল ততো দেশাদ্বুবুধে ন চ কিংচন॥ ১-১৮৭-৩১ (৮৪১৬)
অস্যা নূনং বিশালাক্ষ্যাঃ সদেবাসুরমানুষম্।
লোকং নির্মথ্য ধাত্রেদং রূপমাবিষ্কৃতং কৃতম্॥ ১-১৮৭-৩২ (৮৪১৭)
এবং সংতর্কয়ামাস রূপদ্রবিণসংপদা।
কন্যামসদৃশীং লোকে নৃপঃ সংবরণস্তদা॥ ১-১৮৭-৩৩ (৮৪১৮)
তাং চ দৃষ্ট্বৈব কল্যাণীং কল্যাণাভিজনো নৃপঃ।
জগাম মনসা চিন্তাং কামবাণেন পীডিতঃ॥ ১-১৮৭-৩৪ (৮৪১৯)
দহ্যমানঃ স তীব্রেণ নৃপতির্মন্মথাগ্নিনা।
অপ্রগল্ভাং প্রগল্ভস্তাং তদোবাচ মনোহরাম্॥ ১-১৮৭-৩৫ (৮৪২০)
কাঽসি কস্যাসি রম্ভোরু কিমর্থং চেহ তিষ্ঠসি।
কথং চ নির্জনেঽরণ্যে চরস্যেকা শুচিস্মিতে॥ ১-১৮৭-৩৬ (৮৪২১)
ৎবং হি সর্বানবদ্যাঙ্গী সর্বাভরণভূষিতা।
বিভূষণমিবৈতেষাং ভূষণানামভীপ্সিতম্॥ ১-১৮৭-৩৭ (৮৪২২)
ন দেবীং নাসুরীং চৈব ন যক্ষীং ন চ রাক্ষসীম্।
ন চ ভোগবতীং মন্যে ন গন্ধবীং ন মানুষীম্॥ ১-১৮৭-৩৮ (৮৪২৩)
যা হি দৃষ্টা ময়া কাশ্চিচ্ছ্রুতা বাঽপি বরাঙ্গনাঃ।
ন তাসাং সদৃশীং মন্যে ৎবামহং মত্তকাশিনি॥ ১-১৮৭-৩৯ (৮৪২৪)
দৃষ্ট্বৈব চারুবদনে চন্দ্রাৎকান্ততরং তব।
বদনং পদ্মপত্রাক্ষং মাং মথ্নাতীব মন্মথঃ॥ ১-১৮৭-৪০ (৮৪২৫)
এবং তাং স মহীপালো বভাষে ন তু সা তদা।
কামার্তং নির্জনেঽরণ্যে প্রত্যবাষথ কিংচন॥ ১-১৮৭-৪১ (৮৪২৬)
ততো লালপ্যমানস্য পার্থিবস্যায়তেক্ষণা।
সৌদামিনীব চাভ্রেষু তত্রৈবান্তরধীয়ত॥ ১-১৮৭-৪২ (৮৪২৭)
তামন্বেষ্টুং স নৃপতিঃ পরিচক্রাম সর্বতঃ।
বনং বনজপত্রাক্ষীং ভ্রমন্নুন্মত্তবত্তদা॥ ১-১৮৭-৪৩ (৮৪২৮)
অপশ্যমানঃ স তু তাং বহু তত্র বিলপ্য চ।
নিশ্চেষ্টঃ পার্থিবশ্রেষ্ঠো মুহূর্তং স ব্যতিষ্ঠত॥ ॥ ১-১৮৭-৪৪ (৮৪২৯)

ইতি শ্রীমন্মহাভারতে আদিপর্বণি চৈত্ররথপর্বণি সপ্তাশীত্যধিকশততমোঽধ্যায়ঃ॥ ১৮৭ ॥

Mahabharata – Adi Parva – Chapter Footnotes

১-১৮৭-১ যৎ যস্মাৎ তৎ তস্মাৎ। তাপত্যার্থং তাপত্যশব্দার্থম্॥ সপ্তাশীত্যধিকশততমোঽধ্যায়ঃ॥ ১৮৭ ॥