আদিপর্ব – অধ্যায় ১৮১

আদিপর্ব – অধ্যায় ১৮১

॥ শ্রীঃ ॥

১.১৮১. অধ্যায়ঃ ১৮১

Mahabharata – Adi Parva – Chapter Topics

দ্রোণহন্তৃপুত্রোৎপাদনেচ্ছয়া যাজকান্বেষণার্থমতটো দ্রুপদস্য উপয়াজবচনেন যাজসমীপগমনম্॥ ১ ॥ পুত্রার্থং যজ্ঞে আরব্ধে অগ্নিকুণ্ডাদ্ধৃষ্টদ্যুম্নস্যোৎপত্তিস্তচ্চরিতমাকাশবাণী চ॥ ২ ॥ পাঞ্চাল্যা উৎপত্তিঃ॥ ৩ ॥ তয়োর্নামকরণম্॥ ৪ ॥ দ্রোণেন ধৃষ্টদ্যুম্নস্যাস্ত্রশিক্ষণম্॥ ৫ ॥

Mahabharata – Adi Parva – Chapter Text

১-১৮১-০ (৮১৫১)
ব্রাহ্মণ উবাচ। ১-১৮১-০x (১০৪০)
অমর্ষী দ্রুপদো রাজা কর্মসিদ্ধান্দ্বিজর্ষভান্।
অন্বিচ্ছন্পরিচক্রাম ব্রাহ্মণাবসথান্বহূন্॥ ১-১৮১-১ (৮১৫২)
পুত্রজন্ম পরীপ্সন্বৈ শোকোপহতচেতনঃ।
`দ্রোণেন বৈরং দ্রুপদো ন সুষ্বাপ স্মরন্সদা।’
নাস্তি শ্রেষ্ঠমপত্যং ম ইতি নিত্যমচিন্তয়ৎ॥ ১-১৮১-২ (৮১৫৩)
জাতান্পুত্রান্স নির্বেদাদ্ধিগ্বন্ধূনিতি চাব্রবীৎ।
নিঃশ্বাসপরমশ্চাসীদ্দ্রোণং প্রতিচিকীর্ষয়া॥ ১-১৮১-৩ (৮১৫৪)
প্রভাবং বিনয়ং শিক্ষাং দ্রোণস্য চরিতানি চ।
ক্ষাত্রেণ চ বলেনাস্য চিন্তয়ন্নাধ্যগচ্ছত॥ ১-১৮১-৪ (৮১৫৫)
প্রতিকর্তুং নৃপশ্রেষ্ঠো যতমানোঽপি ভারত।
অভিতঃ সোঽথ কল্মাষীং গঙ্গাকূলে পরিভ্রমন্॥ ১-১৮১-৫ (৮১৫৬)
ব্রাহ্মণাবসথং পুম্যমাসসাদ মহীপতিঃ।
তত্র নাস্নাতকঃ কশ্চিন্ন চাসীদব্রতী দ্বিজঃ॥ ১-১৮১-৬ (৮১৫৭)
অধীয়ানৌ মহাভাগৌ সোঽপশ্যৎসংশিতব্রতৌ।
যাজোপয়াজৌ ব্রহ্মর্ষী শাম্যন্তৌ পরমেষ্ঠিনৌ॥ ১-১৮১-৭ (৮১৫৮)
সংহিতাধ্যযনে যুক্তৌ গোত্রতশ্চাপি কাশ্যপৌ।
তারণেয়ৌ যুক্তরূপৌ ব্রাহ্মণাবৃষিসত্তমৌ॥ ১-১৮১-৮ (৮১৫৯)
স তাবামন্ত্রয়ামাস সর্বকামৈরতন্দ্রিতঃ।
বুদ্ধ্বা বলং তয়োস্তত্র কনীয়াংসমুপহ্বরে॥ ১-১৮১-৯ (৮১৬০)
প্রপেদে চ্ছন্দয়ন্কামৈরুপয়াজং ধৃতব্রতম্।
পাদশুশ্রূষণে যুক্তঃ প্রিয়বাক্সর্বকামদঃ॥ ১-১৮১-১০ (৮১৬১)
অর্চয়িৎবা যথান্যায়মুপয়াজমুবাচ সঃ।
যেন মে কর্মণা ব্রহ্মন্পুত্রঃ স্যাদ্দ্রোণমৃত্যবে॥ ১-১৮১-১১ (৮১৬২)
`অর্জুনস্য ভবেদ্ভার্যা ভবেদ্যা বরবর্ণিনী।’
উপয়াজ কৃতে তস্মিন্ গবাং দাতাঽস্মি তেঽর্বুদং॥ ১-১৮১-১২ (৮১৬৩)
যদ্বা তেঽন্যদ্দ্বিজশ্রেষ্ঠ মনসঃ সুপ্রিয়ং ভবেৎ।
সর্বং তত্তে প্রদাতাঽহং ন হি মেঽত্রাস্তি সংশয়ঃ॥ ১-১৮১-১৩ (৮১৬৪)
ইত্যুক্তো নাহমিত্যেবং তমৃষিঃ প্রত্যভাষত।
আরাধয়িষ্যন্দ্রুপদঃ স তং পর্যচরৎপুনঃ॥ ১-১৮১-১৪ (৮১৬৫)
ততঃ সংবৎসরস্যান্তে দ্রুপদং স দ্বিজোত্তমঃ।
উপয়াজোঽব্রবীৎকালে রাজন্মধুরয়া গিরা॥ ১-১৮১-১৫ (৮১৬৬)
জ্যেষ্ঠো ভ্রাতা মমাগৃহ্মাদ্বিচরন্ গহনে বনে।
অপরিজ্ঞাতশৌচায়াং ভূমৌ নিপতিতং ফলম্॥ ১-১৮১-১৬ (৮১৬৭)
তদপশ্যমহং ভ্রাতুরসাম্প্রতমনুব্রজন্।
বিমর্শং সংকরাদানে নায়ং কুর্যাৎকদাচন॥ ১-১৮১-১৭ (৮১৬৮)
দৃষ্ট্বা ফলস্য নাপশ্যদ্দোষান্পাপানুবন্ধকান্।
বিবিনক্তি ন শৌচং যঃ সোঽন্যত্রাপি কথং ভবেৎ॥ ১-১৮১-১৮ (৮১৬৯)
সংহিতাধ্যযনং কুর্বন্বসন্গুরুকুলে চ যঃ।
ভৈক্ষমুৎসৃষ্টমন্যেষাং ভুঙ্ক্তে স্ম চ যদা তদা॥ ১-১৮১-১৯ (৮১৭০)
কীর্তয়ন্গুণমন্নানামঘৃণী চ পুনঃ পুনঃ।
তং বৈ ফলার্থিনং মন্যে ভ্রাতরং তর্কচক্ষুষা॥ ১-১৮১-২০ (৮১৭১)
তং বৈ গচ্ছস্ব নৃপতে স ৎবাং সংয়াজয়িষ্যতি।
জুগুপ্সমানো নৃপতির্মনসেদং বিচিন্তয়ন্॥ ১-১৮১-২১ (৮১৭২)
উপয়াজবচঃ শ্রুৎবা যাজস্যাশ্রমমভ্যগাৎ।
অভিসম্পূজ্য পূজার্হমথ যাজমুবাচ হ॥ ১-১৮১-২২ (৮১৭৩)
অয়ুতানি দদান্যষ্টৌ গবাং যাজয় মাং বিভো।
দ্রোণবৈরাভিসন্তপ্তং প্রহ্লাদয়িতুমর্হসি॥ ১-১৮১-২৩ (৮১৭৪)
স হি ব্রহ্মবিদাং শ্রেষ্ঠো ব্রহ্মাস্ত্রে চাপ্যনুত্তমঃ।
তস্মাদ্দ্রোণঃ পরাজৈষ্ট মাং বৈ স সখিবিগ্রহে॥ ১-১৮১-২৪ (৮১৭৫)
ক্ষত্রিয়ো নাস্তি তস্যাস্যাং পৃথিব্যাং কশ্চিদগ্রণীঃ।
কৌরবাচায়র্মুখ্যস্য ভারদ্বাজস্য ধীমতঃ॥ ১-১৮১-২৫ (৮১৭৬)
দ্রোণস্য শরজালানি প্রাণিদেহহরাণি চ।
ষডরত্নি ধনুশ্চাস্য দৃশ্যতে পরমং মহৎ॥ ১-১৮১-২৬ (৮১৭৭)
স হি ব্রাহ্মণবেষেণ ক্ষাত্রং বেগমশংসয়ম্।
প্রতিহন্তি মহেষ্বাসো ভারদ্বাজো মহামনাঃ॥ ১-১৮১-২৭ (৮১৭৮)
ক্ষত্রোচ্ছেদায় বিহিতো জামদগ্ন্য ইবাস্থিতঃ।
তস্য হ্যস্ত্রবলং ঘোরমপ্রধৃষ্যং নরৈর্ভুবি॥ ১-১৮১-২৮ (৮১৭৯)
ব্রাহ্মং সন্ধারয়ংস্তেজো হুতাহুতিরিবানলঃ।
সমেত্য স দহত্যাজৌ ক্ষাত্রধর্মপুরঃসরঃ॥ ১-১৮১-২৯ (৮১৮০)
ব্রহ্মক্ষত্রে চ বিহিতে ব্রাহ্মং তেজো বিশিষ্যতে।
সোঽহং ক্ষাত্রাদ্বলাদ্ধীনো ব্রাহ্মং তেজঃ প্রপেদিবান্॥ ১-১৮১-৩০ (৮১৮১)
দ্রোণাদ্বিশিষ্টমাসাদ্য ভবন্তং ব্রহ্মবিত্তমম্।
দ্রোণান্তকমহং পুত্রং লভেয়ং যুধি দুর্জয়ম্॥ ১-১৮১-৩১ (৮১৮২)
তৎকর্ম কুরু মে মে যাজ বিতরাম্যর্বুদং গবাম্।
তথেত্যুক্ৎবা তু তং যাজো যাজ্যার্থমুপকল্পয়ৎ॥ ১-১৮১-৩২ (৮১৮৩)
গুর্বর্থ ইতি চাকামমুপয়াজমচোদয়ৎ।
যাজো দ্রোণবিনাশায় প্রতিজজ্ঞে তথা চ সঃ॥ ১-১৮১-৩৩ (৮১৮৪)
ততস্তস্য নরেন্দ্রস্য উপয়াজো মহাতপাঃ।
আচখ্যৌ কর্ম বৈতানং তদা পুত্রফলায় বৈ॥ ১-১৮১-৩৪ (৮১৮৫)
স চ পুত্রো মহাবীর্যো মহাতেজা মহাবলঃ।
ইষ্যতে যদ্বিধো রাজন্ভবিতা তে তথাবিধঃ॥ ১-১৮১-৩৫ (৮১৮৬)
ভারদ্বাজস্য হন্তারং সোঽভিসন্ধায় ভূপতিঃ।
আজহ্বে তত্তথা সর্বং দ্রুপদঃ কর্মসিদ্ধয়ে॥ ১-১৮১-৩৬ (৮১৮৭)
যাজস্তু হবনস্যান্তে দেবীমাজ্ঞাপয়ত্তদা।
প্রেহি মাং রাজ্ঞি পৃষতি মিথুনং ৎবামুপস্থিতম্॥ ১-১৮১-৩৭ (৮১৮৮)
রাজ্ঞ্যুবাচ। ১-১৮১-৩৮x (১০৪১)
অবলিপ্তং মুখং ব্রহ্মন্দিব্যান্গন্ধান্বিভর্মি চ।
সূতার্থে নোপলব্ধাঽস্মি তিষ্ঠ যাজ মম প্রিয়ে॥ ১-১৮১-৩৮ (৮১৮৯)
যাজ উবাচ। ১-১৮১-৩৯x (১০৪২)
যাজেন শ্রপিতং হব্যমুপয়াজাভিমন্ত্রিতম্।
কথং কামং ন সন্দধ্যাৎসা ৎবং বিপ্রেহি তিষ্ঠ বা॥ ১-১৮১-৩৯ (৮১৯০)
ব্রাহ্মণ উবাচ। ১-১৮১-৪০x (১০৪৩)
এবমুক্ৎবা তু যাজেন হুতে হবিষি সংস্কৃতে।
উত্তস্থৌ পাবকাত্তস্মাৎকুমারো দেবসন্নিভিঃ॥ ১-১৮১-৪০ (৮১৯১)
জ্বালাবর্ণো ঘোররূপঃ কিরীটী বর্ম চোত্তমম্।
বিভ্রৎসখঙ্গঃ সশরো ধনুষ্মান্বিনদন্মুহুঃ॥ ১-১৮১-৪১ (৮১৯২)
সোঽধ্যারোদদ্রথবরং তেন চ প্রয়যৌ তদা।
ততঃ প্রণেদুঃ পঞ্চালাঃ প্রহৃষ্টাঃ সাধুসাধ্বিতি॥ ১-১৮১-৪২ (৮১৯৩)
হর্ষাবিষ্টাংস্ততশ্চৈতান্নেয়ং সেহে বসুন্ধরা।
ভয়াপহো রাজপুত্রঃ পঞ্চালানাং যশস্করঃ॥ ১-১৮১-৪৩ (৮১৯৪)
রাজ্ঞঃ শোকাপহো জাত এষ দ্রোণবধায় বৈ।
ইত্যুবাচ মহদ্ভূতমদৃশ্যং খেচরং তদা॥ ১-১৮১-৪৪ (৮১৯৫)
কুমারী চাপি পাঞ্চালী বেদীমধ্যাৎসমুত্থিতা।
সুভগা দর্শনীয়াঙ্গী স্বসিতায়তলোচনা॥ ১-১৮১-৪৫ (৮১৯৬)
শ্যামা পদ্মপলাশাক্ষী নীলকুঞ্চিতমূর্ধজা।
তাম্রতুঙ্গনখী সুভ্রূশ্চারুপীনপয়োধরা॥ ১-১৮১-৪৬ (৮১৯৭)
মানুষং বিগ্রহং কৃৎবা সাক্ষাদমরবর্ণিনী।
নীলোৎপলসমো গন্ধো যস্যাঃ ক্রোশাৎপ্রধাবতি॥ ১-১৮১-৪৭ (৮১৯৮)
যা বিভর্তি পরং রূপং যস্যা নাস্ত্যুপমা ভুবি।
দেবদানবয়ক্ষাণামীপ্সিতাং দেবরূপিণীম্॥ ১-১৮১-৪৮ (৮১৯৯)
`সদৃশী পাণ্ডুপুত্রস্য অর্জুনস্যেতি ভারত।
ঊচুঃ প্রহৃষ্টমনসো রাজভক্তিপুরস্কৃতাঃ॥’ ১-১৮১-৪৯ (৮২০০)
তাং চাপি জাতাং সুশ্রোণীং বাগুবাচাশরীরিণী।
সর্বয়োষিদ্বরা কৃষ্ণা নিনীষুঃ ক্ষত্রিয়ান্ক্ষয়ম্॥ ১-১৮১-৫০ (৮২০১)
সুরকার্যমিয়ং কালে করিষ্যতি সুমধ্যমা।
অস্যা হেতোঃ কৌরবাণাং মহদুৎপৎস্যতে ভয়ম্॥ ১-১৮১-৫১ (৮২০২)
তচ্ছ্রুৎবা সর্বপঞ্চালাঃ প্রণেদুঃ সিংহসঙ্ঘবৎ।
ন চৈতান্হর্ষসম্পূর্ণানিয়ং সেহে বসুন্ধরা॥ ১-১৮১-৫২ (৮২০৩)
`পাঞ্চালরাজস্তাং দৃষ্ট্বা হর্ষাদশ্রূণ্যবর্তয়ৎ।
পরিষ্বজ্য চ তাং কৃষ্ণাং স্নুষা পাণ্ডোরিতি ব্রুবন্।
অঙ্কমারোপ্য পাঞ্চালীং রাজা হর্ষমবাপ সঃ॥’ ১-১৮১-৫৩ (৮২০৪)
তৌ দৃষ্ট্বা পার্ষতী যাজং প্রপেদে বৈ সুতার্থিনী।
ন বৈ মদন্যাং জননীং জানীয়াতামিমাবিতি॥ ১-১৮১-৫৪ (৮২০৫)
তথেত্যুবাচ তাং যাজো রাজ্ঞঃ প্রিয়চিকীর্ষয়া।
তয়োশ্চ নামনী চক্রুর্দ্বিজাঃ সম্পূর্ণমানসাঃ॥ ১-১৮১-৫৫ (৮২০৬)
ধৃষ্টৎবাদত্যমর্ষিৎবাদ্দ্যুম্নাদ্যুৎসংভবাদপি।
ধৃষ্টদ্যুম্নঃ কুমারোঽয়ং দ্রুপদস্য ভবৎবিতি॥ ১-১৮১-৫৬ (৮২০৭)
কৃষ্ণেত্যেবাব্রুবকন্কৃষ্ণাং কৃষ্ণা।ঞভূৎসা হি বর্ণতঃ।
তথা তন্মিথুনং জজ্ঞে দ্রুপদস্য মহামখে॥ ১-১৮১-৫৭ (৮২০৮)
`বৈদিকাধ্যযনে পারং ধৃষ্টদ্যুম্নো গতঃ পরম্॥’ ১-১৮১-৫৮ (৮২০৯)
ধৃষ্টদ্যুম্নং তু পাঞ্চাল্যমানীয় স্বং নিবেশনম্।
উপাকরোদস্ত্রহেতোর্ভারদ্বাজঃ প্রতাপবান্॥ ১-১৮১-৫৯ (৮২১০)
অমোক্ষণীয়ং দৈবং হি ভাবি মৎবা মহামতিঃ।
তথা তৎকৃতবান্দ্রোণ আত্মকীর্ত্যনুরক্ষণাৎ॥ ॥ ১-১৮১-৬০ (৮২১১)

ইতি শ্রীমন্মহাভারতে আদিপর্বণি চৈত্ররথপর্বমি একাশীত্যধিকশততমোঽধ্যায়ঃ॥ ১৮১ ॥

Mahabharata – Adi Parva – Chapter Footnotes

১-১৮১-৭ পরমে ব্রহ্মণি বেদে বা স্থাতুং শীলং যয়োস্তৌ॥ ১-১৮১-৮ তারণেয়ৌ কুমারীপ্রভবৌ সূর্যভক্তৌ বা॥ ১-১৮১-১৭ সংকরাদানে দোষয়ুক্তবস্ৎবাদানে॥ ১-১৮১-১৯ উৎসৃষ্টং উচ্ছিষ্টম্॥ ১-১৮১-২০ অঘৃণী লজ্জাহীনঃ॥ ১-১৮১-২১ ইদং যাজচরিতং জুগুপ্সমানো নিন্দন্। বিচিন্তয়ন্ স্বকার্যং চেতি শেষঃ॥ ১-১৮১-২৩ অষ্টাবয়ুতানি দদানি। রিক্তপাণির্ন পশ্যেত রাজানং দেবতাং গুরুমিতি স্মৃতেরুপায়নমাত্রমেতৎ ন দক্ষিণা অর্বুদপ্রতিজ্ঞানাৎ॥ ১-১৮১-২৪ পরাজৈষ্ট পরাজিতবান্॥ ১-১৮১-২৫ তস্য তস্মাৎ। অগ্রণীঃ শ্রেষ্ঠঃ॥ ১-১৮১-৫৬ ধৃষ্টৎবাৎ প্রগল্ভৎবাৎ। অত্যন্তমমর্ষঃ শত্রৎকর্ষাসহিষ্ণুৎবং তদ্বত্ৎবাৎ। দ্যুম্নং বিত্তং তচ্চ রাজ্ঞাং বলমেব কবচকুণ্ডলাদিকং বা সহোৎপন্নং তদাদির্যস্য শস্ত্রাস্ত্রশৌর্যোৎসাহাদেস্তদ্দ্যুম্নাদি তস্যোৎসংভবাদুৎকর্ষেণোৎপত্তেশ্চ॥ একাশীত্যধিকশততমোঽধ্যায়ঃ॥ ১৮১ ॥