আদিপর্ব – অধ্যায় ১৮০

আদিপর্ব – অধ্যায় ১৮০

॥ শ্রীঃ ॥

১.১৮০. অধ্যায়ঃ ১৮০

Mahabharata – Adi Parva – Chapter Topics

ধৃষ্টদ্যুম্নাদ্যুৎপত্তিকথনার্থং দ্রোণদ্রুপদয়োরুৎপত্তিকথনপূর্বকং দ্রুপদবৃত্তান্তকথনম্॥ ১ ॥

Mahabharata – Adi Parva – Chapter Text

১-১৮০-০ (৮১১৮)
ব্রাহ্মণ উবাচ। ১-১৮০-০x (১০৩২)
গঙ্গাদ্বারং প্রতি মহান্বভূবর্ষির্মহাতপাঃ।
ভরদ্বাজো মহাপ্রাজ্ঞঃ সততং সংশিতব্রতঃ॥ ১-১৮০-১ (৮১১৯)
সোঽভিষেক্তুং গতো গঙ্গাং পূর্বমেবাগতাং সতীম্।
দদর্শাপ্সরসং তত্র ঘৃতাচীমাপ্লুতামৃষিঃ॥ ১-১৮০-২ (৮১২০)
তস্যা বায়ুর্নদীতীরে বসনং ব্যহরত্তদা।
অপকৃষ্টাম্বরাং দৃষ্ট্বা তামৃষিশ্চকমে তদা॥ ১-১৮০-৩ (৮১২১)
তস্যাং সংসক্তমনসঃ কৌমারব্রহ্মচারিণঃ।
চিরস্য রেতশ্চস্কন্দ তদৃষির্দ্রোণ আদধে॥ ১-১৮০-৪ (৮১২২)
ততঃ সমভবদ্দ্রোণঃ কুমারস্তস্য ধীমতঃ।
অধ্যগীষ্ট স বেদাংশ্চ বেদাঙ্গানি চ সর্বশঃ॥ ১-১৮০-৫ (৮১২৩)
ভরদ্বাজস্য তু সখা পৃষতো নাম পার্থিবঃ।
তস্যাপি দ্রুপদো নাম তদা সমভবৎসুতঃ॥ ১-১৮০-৬ (৮১২৪)
স নিত্যমাশ্রমং গৎবা দ্রোণেন সহ পার্ষতঃ।
চিক্রীডাধ্যযনং চৈব চকার ক্ষত্রিয়র্ষভঃ॥ ১-১৮০-৭ (৮১২৫)
ততস্তু পৃষতেঽতীতে স রাজা দ্রুপদোঽভবৎ।
দ্রোণোঽপি রামং শুশ্রাব দিৎসন্তং বসু সর্বশঃ॥ ১-১৮০-৮ (৮১২৬)
বনং তু প্রস্থিতং রামং ভরদ্বাজসুতোঽব্রবীৎ।
আগতং বিত্তকামং মাং বিদ্ধি দ্রোণং দ্বিজোত্তম॥ ১-১৮০-৯ (৮১২৭)
রাম উবাচ। ১-১৮০-১০x (১০৩৩)
শরীরমাত্রমেবাদ্য ময়া সমবশেষিতম্।
অস্ত্রাণি বা শরীরং বা ব্রহ্মন্নেকতমং বৃণু॥ ১-১৮০-১০ (৮১২৮)
দ্রোণ উবাচ। ১-১৮০-১১x (১০৩৪)
অস্ত্রাণি চৈব সর্বাণি তেষাং সংহারমেব চ।
প্রয়োগং চৈব সর্বেষাং দাতুমর্হতি মে ভবান্॥ ১-১৮০-১১ (৮১২৯)
ব্রাহ্মণ উবাচ। ১-১৮০-১২x (১০৩৫)
তথেত্যুক্ৎবা ততস্তস্মৈ প্রদদৌ ভৃগুনন্দনঃ।
প্রতিগৃহ্য তদা দ্রোণঃ কৃতকৃত্যোঽভবত্তদা॥ ১-১৮০-১২ (৮১৩০)
সংপ্রহৃষ্টমনা দ্রোণো রামাৎপরমসম্মতম্।
ব্রহ্মাস্ত্রং সমনুজ্ঞাপ্য নরেষ্বভ্যধিকোঽভবৎ॥ ১-১৮০-১৩ (৮১৩১)
ততো দ্রুপদমাসাদ্য ভারদ্বাজঃ প্রতাপবান্।
অব্রবীৎপুরুষব্যাঘ্রঃ সখায়ং বিদ্ধি মামিতি॥ ১-১৮০-১৪ (৮১৩২)
দ্রুপদ উবাচ। ১-১৮০-১৫x (১০৩৬)
নাশ্রোত্রিয়ঃ শ্রোত্রিয়স্য নারথী রথিনঃ সখা।
নারাজা পার্থিবস্যাপি সখিপূর্বং কিমিষ্যতে॥ ১-১৮০-১৫ (৮১৩৩)
ব্রাহ্মণ উবাচ। ১-১৮০-১৬x (১০৩৭)
স বিনিশ্চিত্য মনসা পাঞ্চাল্যং প্রতি বুদ্ধিমান্।
জগাম কুরুমুখ্যানাং নগরং নাগসাহ্বয়ম্॥ ১-১৮০-১৬ (৮১৩৪)
তস্মৈ পৌত্রান্সমাদায় বসূনি বিবিধানি চ।
প্রাপ্তায় প্রদদৌ ভীষ্মঃ শিষ্যান্দ্রোণায় ধীমতে॥ ১-১৮০-১৭ (৮১৩৫)
দ্রোণঃ শিষ্যাংস্ততঃ পার্থানিদং বচনমব্রবীৎ।
সমানীয় তু তাঞ্শিষ্যান্দ্রুপদস্যাসুখায় বৈ॥ ১-১৮০-১৮ (৮১৩৬)
আচার্যবেতনং কিংচিদ্ধৃদি যদ্বর্ততে মম।
কৃতাস্ত্রৈস্তৎপ্রদেয়ং স্যাত্তদৃতং বদতানঘাঃ।
সোঽর্জুনপ্রমুখৈরুক্তস্তথাঽস্ৎবিতি গুরুস্তদা॥ ১-১৮০-১৯ (৮১৩৭)
যদা চ পাণ্ডবাঃ সর্বে কৃতাস্ত্রাঃ কৃতনিশ্চয়াঃ।
ততো দ্রোণোঽব্রবীদ্ভূয়ো বেতনার্থমিদং বচঃ॥ ১-১৮০-২০ (৮১৩৮)
পার্ষতো দ্রুপদো নাম ছত্রবত্যাং নরেশ্বরঃ।
তস্মাদাকৃষ্য তদ্রাজ্যং মম শীঘ্রং প্রদীয়তাম্॥ ১-১৮০-২১ (৮১৩৯)
`ধার্তরাষ্ট্রাশ্চ তে ভীতাঃ পাঞ্চালান্পাণ্ডবাদয়ঃ।
ধার্তরাষ্ট্রৈশ্চ সহিতাঃ পুনর্দ্রোণেন চোদিতাঃ॥ ১-১৮০-২২ (৮১৪০)
যজ্ঞসেনেন সংগম্য কর্ণদুর্যোধনাদয়ঃ।
নির্জিতাঃ সংন্যবর্তন্ত তথা তে ক্ষত্রিয়র্ষভাঃ॥’ ১-১৮০-২৩ (৮১৪১)
ততঃ পাণ্ডুসুতাঃ পঞ্চ নির্জিত্য দ্রুপদং যুধি।
দ্রোণায় দর্শয়ামাসুর্বদ্ধ্বা সসচিবং তদা॥ ১-১৮০-২৪ (৮১৪২)
`মহেন্দ্র ইব দুর্ধর্ষো মহেন্দ্র ইব দানবম্।
মহেন্দ্রপুত্রঃ পাঞ্চালং জিতবানর্জুনস্তদা॥ ১-১৮০-২৫ (৮১৪৩)
তদ্দৃষ্ট্বা তু মহাবীর্যং ফল্গুনস্য মহৌজসঃ।
ব্যস্ময়ন্ত জনাঃ সর্বে যজ্ঞসেনস্য বান্ধবাঃ। ১-১৮০-২৬ (৮১৪৪)
দ্রোণ উবাচ। ১-১৮০-২৭x (১০৩৮)
প্রার্থয়ামি ৎবয়া সখ্যং পুনরেব নরাধিপ।
অরাজা কিল নো রাজ্ঞঃ সখা ভবিতুমর্হতি॥ ১-১৮০-২৭ (৮১৪৫)
অতঃ প্রয়তিতং রাজ্যে যজ্ঞসেন ৎবয়া সহ।
রাজাঽসি দক্ষিণে কূলে ভাগীরথ্যাহমুত্তরে॥ ১-১৮০-২৮ (৮১৪৬)
ব্রাহ্মণ উবাচ। ১-১৮০-২৯x (১০৩৯)
এবমুক্তো হি পাঞ্চাল্যো ভারদ্বাজেন ধীমতা।
উবাচাস্ত্রবিদাং শ্রেষ্ঠং দ্রোণং ব্রাহ্মণসত্তমম্॥ ১-১৮০-২৯ (৮১৪৭)
এবং ভবতু ভদ্রং তে ভারদ্বাজ মহামতে।
সখ্যং তদেব ভবতু শশ্বদ্যদভিমন্যসে॥ ১-১৮০-৩০ (৮১৪৮)
এবমন্যোন্যমুক্ৎবা তৌ কৃৎবা সখ্যমনুত্তমম্।
জগ্মতুর্দ্রোণপাঞ্চাল্যৌ যথাগতমরিন্দমৌ॥ ১-১৮০-৩১ (৮১৪৯)
অসৎকারঃ স তু মহান্মুহূর্তমপি তস্য তু।
নাপৈতি হৃদয়াদ্রাজ্ঞো দুর্মনাঃ স কৃশোঽভবৎ॥ ॥ ১-১৮০-৩২ (৮১৫০)

ইতি শ্রীমন্মহাভারতে আদিপর্বণি চৈত্ররথপর্বণি অশীত্যধিকশততমোঽধ্যায়ঃ॥ ১৮০ ॥

Mahabharata – Adi Parva – Chapter Footnotes

১-১৮০-১০ একতমমেকতরম্॥ ১-১৮০-১৩ সমনুজ্ঞপ্য নিশম্য। প্রাপ্যেত্যপি পঠন্তি॥ ১-১৮০-২১ ছত্রবত্যামহিচ্ছত্রে॥ ১-১৮০-২৮ ভাগীরথ্যাহমিতি সংধিরার্ষঃ॥ অশীত্যধিকশততমোঽধ্যায়ঃ॥ ১৮০ ॥