আদিপর্ব – অধ্যায় ১৬৬
॥ শ্রীঃ ॥
১.১৬৬. অধ্যায়ঃ ১৬৬
Mahabharata – Adi Parva – Chapter Topics
কুন্তীহিডিম্বাসংবাদঃ॥ ১ ॥ হিডিম্বাবার্তয়া ভীমং হিডিম্বেন যুদ্ধ্যমানং জ্ঞাতবতাং কুন্ত্যাদীনাং তত্র গমনম্॥ ২ ॥ হিডিম্ববধঃ॥ ৩ ॥
Mahabharata – Adi Parva – Chapter Text
১-১৬৬-০ (৭৫৭৭)
বৈশম্পায়ন উবাচ। ১-১৬৬-০x (৯৭০)
প্রবুদ্ধাস্তে হিডিম্বায়া রূপং দৃষ্ট্বাতিমানুষম্।
বিস্মিতাঃ পুরুষব্যাঘ্রা বভূবুঃ পৃথয়া সহ॥ ১-১৬৬-১ (৭৫৭৮)
ততঃ কুন্তী সমীক্ষ্যৈনাং বিস্মিতা রূপসংপদা।
উবাচ মধুরং বাক্যং সান্ৎবপূর্বমিদং শৈনঃ॥ ১-১৬৬-২ (৭৫৭৯)
কস্য ৎবং সুরগর্ভাভে কাবাঽসি বরবর্ণিনি।
কেন কার্যেণ সংপ্রাপ্তা কুতশ্চাগমনং তব॥ ১-১৬৬-৩ (৭৫৮০)
যদি বাঽস্য বনস্য ৎবং দেবতা যদি বাঽপ্সরাঃ।
আচক্ষ্ব মম তৎসর্বং কিমর্থং চেহ তিষ্ঠসি॥ ১-১৬৬-৪ (৭৫৮১)
হিডিম্বোবাচ। ১-১৬৬-৫x (৯৭১)
যদেতৎপশ্যসি বনং নীলমেঘনিং মহৎ।
নিবাসো রাক্ষসস্যৈষ হিডিম্বস্য মমৈব চ॥ ১-১৬৬-৫ (৭৫৮২)
তস্য মাং রাক্ষসেন্দ্রস্য ভগিনীং বিদ্দি ভামিনি।
ভ্রাত্রা সংপ্রেষিতামার্যে ৎবাং সপুত্রাং জিঘাংসতা॥ ১-১৬৬-৬ (৭৫৮৩)
ক্রূরবুদ্ধেরহং তস্য বচনাদাগতা ৎবিহ।
অদ্রাক্ষং নবহেমাভং তব পুত্রং মহাবলম্॥ ১-১৬৬-৭ (৭৫৮৪)
ততোঽহং সর্বভূতানাং ভাবে বিচরতা শুভে।
চোদিতা তব পুত্রার্থং মন্মথেন বশানুগা॥ ১-১৬৬-৮ (৭৫৮৫)
ততো বৃতো ময়া ভর্তা তব পুত্রো মহাবলঃ।
অপনেতুং চ যতিতো ন চৈব শকিতো ময়া॥ ১-১৬৬-৯ (৭৫৮৬)
চিরায়মাণাং মাং জ্ঞাৎবা ততঃ স পুরুষাদকঃ।
স্বয়মেবাগতো হন্তুমিমান্সর্বাংস্তবাত্মজান্॥ ১-১৬৬-১০ (৭৫৮৭)
স তেন মম কান্তেন তব পুত্রেণ ধীমতা।
বলাদিতো বিনিষ্পিষ্য ব্যপনীতো মহাত্মনা॥ ১-১৬৬-১১ (৭৫৮৮)
বিকর্ষন্তৌ মহাবেগৌ গর্জমানৌ পরস্পরম্।
পশ্যৈবং যুধি বিক্রান্তাবেতৌ চ নররাক্ষসৌ॥ ১-১৬৬-১২ (৭৫৮৯)
বৈশম্পায়ন উবাচ। ১-১৬৬-১৩x (৯৭২)
তস্যাঃ শ্রুৎবৈব বচনমুৎপপাত যুধিষ্ঠিরঃ।
অর্জুনো নকুলশ্চৈব সহদেবশ্চ বীর্যবান্॥ ১-১৬৬-১৩ (৭৫৯০)
তৌ তে দদৃশুরাসক্তৌ বিকর্ষন্তৌ পরস্পরম্।
কাঙ্ক্ষমাণৌ জয়ং চৈব সিংহাবিব বলোৎকটৌ॥ ১-১৬৬-১৪ (৭৫৯১)
অথান্যোন্যং সমাশ্লিষ্য বিকর্ষন্তৌ পুনঃপুনঃ।
দাবাগ্নিধূমসদৃশং চক্রতুঃ পার্থিবং রজঃ॥ ১-১৬৬-১৫ (৭৫৯২)
বসুধারেণুসংবীতৌ বসুধাধরসন্নিভৌ।
বভ্রাজতুর্যথা শৈলৌ নীহারেণাভিসংবৃতৌ॥ ১-১৬৬-১৬ (৭৫৯৩)
রাক্ষসেন তদা ভীমং ক্লিশ্যমানং নিরীক্ষ্য চ।
উবাচেদং বচঃ পার্থঃ প্রহসঞ্ছনকৈরিব॥ ১-১৬৬-১৭ (৭৫৯৪)
ভীম মাভৈর্মহাবাহো ন ৎবাং বুধ্যামহে বয়ম্।
সমেতং ভীমরূপেণ রক্ষসা শ্রমকর্শিতাঃ॥ ১-১৬৬-১৮ (৭৫৯৫)
সাহায়্যেঽস্মি স্থিতঃ পার্থ পাতয়িষ্যামি রাক্ষসম্।
নকুলঃ সহদেবশ্চ মাতরং গোপয়িষ্যতঃ॥ ১-১৬৬-১৯ (৭৫৯৬)
ভীম উবাচ। ১-১৬৬-২০x (৯৭৩)
উদাসীনো নিরীক্ষস্ব ন কার্যঃ সংভ্রমস্ৎবয়া।
ন জাৎবয়ং পুনর্জীবেন্মদ্বাহ্বন্তরমাগতঃ॥ ১-১৬৬-২০ (৭৫৯৭)
`ভুজয়োরন্তরং প্রাপ্তো ভীমসেনস্য রাক্ষসঃ।
অমৃৎবা পার্থবীর্যেণ মৃতো মা ভূদিতি ধ্বনিঃ॥ ১-১৬৬-২১ (৭৫৯৮)
অয়মস্মাংস্তু নো হন্যাজ্জাতু পার্থ রাক্ষসঃ।
জীবন্তং ন প্রমোক্ষ্যামি মা ভৈষীর্ভরতর্ষভ॥’ ১-১৬৬-২২ (৭৫৯৯)
অর্জুন উবাচ। ১-১৬৬-২৩x (৯৭৪)
`পূর্বরাত্রে প্রয়ুক্তোঽসি ভীম ক্রূরেণ রক্ষসা।
ক্ষপা ব্যুষ্টা ন চেদানীং সমাপ্তোসীন্মহারণঃ॥’ ১-১৬৬-২৩ (৭৬০০)
কিমেনন চিরং ভীম জীবতা পাপরক্ষসা।
গন্তব্যে ন চিরং স্থাতুমিহ শক্যমরিন্দম॥ ১-১৬৬-২৪ (৭৬০১)
পুরা সংরজ্যতে প্রাচী পুরা সন্ধ্যা প্রবর্ততে।
রৌদ্রে মুহূর্তে রক্ষাংসি প্রবলানি ভবন্ত্যুত॥ ১-১৬৬-২৫ (৭৬০২)
ৎবরস্ব ভীম মা ক্রীড জহি রক্ষো বিভীষণম্।
পুরা বিকুরুতে মায়াং ভুজয়োঃ সারমর্পয়॥ ১-১৬৬-২৬ (৭৬০৩)
`মাহাত্ম্যমাত্মনো বেত্থ নরাণাং হিতকাম্যযা।
রক্ষো জহি যথা শক্রঃ পুরা বৃত্রং মহাবলম্॥ ১-১৬৬-২৭ (৭৬০৪)
অথবা মন্যসে ভারং ৎবমিমং রাক্ষসং যুধি।
আতিষ্ঠে তব সাহায়্যং শীঘ্রমেব তু হন্যতাম্॥ ১-১৬৬-২৮ (৭৬০৫)
অথবা ৎবহমেবৈনং হনিষ্যামি বৃকোদর।
কৃতকর্মা পরিশ্রান্তঃ সাধু তাবদুপারম॥’ ১-১৬৬-২৯ (৭৬০৬)
বৈশম্পায়ন উবাচ। ১-১৬৬-৩০x (৯৭৫)
অর্জুনেনৈবমুক্তস্তু ভীমো রোষাজ্জ্বলন্নিব।
বলমাহারয়ামাস যদ্বায়োর্জগতঃ ক্ষয়ে॥ ১-১৬৬-৩০ (৭৬০৭)
ততস্তস্যাম্বুদাভস্য ভীমো রোষাত্তু রক্ষসঃ।
অৎক্ষিপ্যাভ্রাময়দ্দেহং তূর্ণং শতগুণং তদা॥ ১-১৬৬-৩১ (৭৬০৮)
`ইতি চোবাচ সংক্রুদ্ধো ভ্রাময়ন্রাক্ষসীং তনুম্।
ভীমসেনো মহাবাহুরভিগর্জন্মুহুর্মুহুঃ॥’ ১-১৬৬-৩২ (৭৬০৯)
ভীম উবাচ। ১-১৬৬-৩৩x (৯৭৬)
নরমাংসৈর্বৃথা পুষ্টো বৃথা বৃদ্ধো বৃথামতিঃ।
বৃথামরণমর্হস্ৎবং বৃথাদ্য ন ভবিষ্যসি॥ ১-১৬৬-৩৩ (৭৬১০)
ক্ষেমমদ্য করিষ্যামি যথা বনমকণ্টকম্।
ন পুনর্মানুষান্হৎবা ভক্ষয়িষ্যসি রাক্ষস॥ ১-১৬৬-৩৪ (৭৬১১)
বৈশম্পায়ন উবাচ। ১-১৬৬-৩৫x (৯৭৭)
ইত্যুক্ৎবা ভীমসেনস্তং নিষ্পিষ্য ধরণীতলে।
বাহুভ্যামবপীড্যাশু পশুমারমমারয়ৎ॥ ১-১৬৬-৩৫ (৭৬১২)
স মার্যমাণো ভীমেন ননাদ বিপুলং স্বনম্।
পূরয়ংস্তদ্বনং সর্বং জলার্দ্রে ইব দুন্দুভিঃ॥ ১-১৬৬-৩৬ (৭৬১৩)
বাহুভ্যাং যোক্ত্রয়িৎবা তং বলবান্পাণ্ডুনন্দনঃ।
`সমুদ্ধাম্য শিরশ্চাস্য সগ্রীবং তদপাহরৎ॥ ১-১৬৬-৩৭ (৭৬১৪)
ততো ভিত্ৎবা শিরশ্চাস্য সগ্রীবং তদুদাক্ষিপৎ।
তস্য নিষ্কর্ণনয়নং নির্জিহ্বং রুধিরোক্ষিতম্॥ ১-১৬৬-৩৮ (৭৬১৫)
প্রাবিদ্ধং ভীমসেনেন শিরো বিদশনং বভৌ।
প্রসারিতভুজোদ্ধৃষ্টো ভিন্নমাংসৎবগন্তরঃ॥ ১-১৬৬-৩৯ (৭৬১৬)
কবন্ধভূতস্তত্রাসীদ্দনুর্বজ্রহতো তথা।
হিডিম্বং নিহতং দৃষ্ট্বা সংহৃষ্টাস্তে তরস্বিনঃ॥ ১-১৬৬-৪০ (৭৬১৭)
হিডিম্বা সা চ সংপ্রেক্ষ্য নিহতং রাক্ষসং রণে।
অদৃশ্যাশ্চৈব যে স্বস্স্থাঃ সমেতাঃ সর্ষিচারণাঃ॥ ১-১৬৬-৪১ (৭৬১৮)
পূজয়ন্তি স্ম তং হৃষ্টাঃ সাধুসাধ্বিতি পাণ্ডবম্।
ভ্রাতরশ্চাপি সংহৃষ্টা যুধিষ্ঠিরপুরোগমাঃ॥ ১-১৬৬-৪২ (৭৬১৯)
অপূজয়ন্নরব্যাঘ্রং ভীমসেনমরিন্দমম্।’
অভিপূজ্য মহাত্মানং ভীমং ভীমপরাক্রমম্।
পুনরেবার্জুনো বাক্যমুবাচেদং বৃকোদরম্॥ ১-১৬৬-৪৩ (৭৬২০)
অদূরে নগরং মন্যে বনাদস্মাদহং বিভো।
শীঘ্রং গচ্ছাম ভদ্রং তে ন নো বিদ্যাৎসুয়োধনঃ॥ ১-১৬৬-৪৪ (৭৬২১)
ততঃ সর্বে তথেত্যুক্ৎবা মাত্রা সহ মহারথাঃ।
প্রয়যুঃ পুরুষব্যাঘ্রা হিডিম্বা চৈব রাক্ষসী॥ ॥ ১-১৬৬-৪৫ (৭৬২২)
ইতি শ্রীমন্মহাভারতে আদিপর্বণি হিডিম্ববধপর্বমি ষট্ষষ্ট্যধিকশততমোঽধ্যায়ঃ॥ ১৬৬ ॥
Mahabharata – Adi Parva – Chapter Footnotes
১-১৬৬-৮ ভাবে চিত্তে॥ ১-১৬৬-১১ ব্যপনীতো দূরে নীতঃ॥ ১-১৬৬-২১ ইতিধ্বনির্মাভূদিতি সংবন্ধঃ॥ ১-১৬৬-২৪ গন্তব্যে সতি চিরং স্থাতুং ন শক্যম্॥ ১-১৬৬-২৮ অথবেতি দ্বয়ং প্রোৎসাহনার্থং॥ ১-১৬৬-৩৩ বৃথামরণং স্বর্গাদ্যপ্রয়োজকং মরণম্॥ ষট্ষষ্ট্যধিকশততমোঽধ্যায়ঃ॥ ১৬৬ ॥