আদিপর্ব – অধ্যায় ১৬৪

আদিপর্ব – অধ্যায় ১৬৪

॥ শ্রীঃ ॥

১.১৬৪. অধ্যায়ঃ ১৬৪

(অথ হিডিম্ববধপর্ব ॥ ৯ ॥)

Mahabharata – Adi Parva – Chapter Topics

হিডিম্বপ্রেরিতায়াঃ তদ্ভগিন্যা হিডিম্বায়াঃ পাণ্ডবসমীপগমনম্॥ ১ ॥ ভীমং দৃষ্ট্বা কামার্তায়া হিডিম্বায়াঃ ভীমং প্রতি বাক্যম্॥ ২ ॥ ভীমহিডিম্বাসংবাদঃ॥ ৩ ॥

Mahabharata – Adi Parva – Chapter Text

১-১৬৪-০ (৭৪৬৩)
বৈশম্পায়ন উবাচ। ১-১৬৪-০x (৯৫৪)
তত্র তেষু শয়ানেষু হিডিম্বো নাম রাক্ষসঃ।
অবিদূরে বনাত্তস্মাচ্ছালবৃক্ষং সমাশ্রিতঃ॥ ১-১৬৪-১ (৭৪৬৪)
ক্রূরো মানুষমাংসাদো মহাবীর্যপরাক্রমঃ।
প্রাবৃড্জলধরশ্যামঃ পিঙ্গাক্ষো দারুণাকৃতিঃ॥ ১-১৬৪-২ (৭৪৬৫)
দষ্ট্রাকরালবদনঃ করালো ভীমদর্শনঃ।
লম্বস্ফিগ্লম্বজঠরো রক্তশ্মশ্রুশিরোরুহঃ॥ ১-১৬৪-৩ (৭৪৬৬)
মহাবৃক্ষগলস্কন্ধঃ শঙ্কর্ণো বিভীষণঃ।
যদৃচ্ছয়া তানপশ্যৎপাণ্ডুপুত্রান্মহারথান্॥ ১-১৬৪-৪ (৭৪৬৭)
বিরূপরূপঃ পিঙ্গাক্ষঃ করালো ঘোরদর্শনঃ।
পিশিতেপ্সুঃ ক্ষুধার্তশ্চ জিঘ্রন্গন্ধং যদৃচ্ছয়া॥ ১-১৬৪-৫ (৭৪৬৮)
ঊর্ধ্বাঙ্গুলিঃ স কণ্ডূয়ন্ধুন্বন্রূক্ষাঞ্শিরোরুহান্।
জৃম্ভমাণো মহাবক্ত্রঃ পুনঃপুনরবেক্ষ্য চ॥ ১-১৬৪-৬ (৭৪৬৯)
হৃষ্টো মানুষমাংসস্য মহাকায়ো মহাবলঃ।
আঘ্রায় মানুষং গন্ধং ভগিনীমিদমব্রবীৎ॥ ১-১৬৪-৭ (৭৪৭০)
উপপন্নং চিরস্যাদ্য ভক্ষ্যং মম মনঃপ্রিয়ম্।
জিঘ্রতঃ প্রস্রুতা স্নেহাজ্জিহ্বা পর্যেতি মে মুখাৎ॥ ১-১৬৪-৮ (৭৪৭১)
অষ্টৌ দংষ্ট্রাঃ সুতীক্ষ্ণাগ্রাশ্চিরস্যাপাতদুঃসহাঃ।
দেহেষু মজ্জয়িষ্যামি স্নিগ্ধেষু পিশিতেষু চ॥ ১-১৬৪-৯ (৭৪৭২)
আক্রম্য মানুষং কণ্ঠমাচ্ছিদ্য ধমনীমপি।
উষ্ণং নবং প্রপাস্যামি ফেনলিং রুধিরং বহু॥ ১-১৬৪-১০ (৭৪৭৩)
গচ্ছ জানীহি কে ৎবেতে শেরতে বনমাশ্রিতাঃ।
মানুষো বলবান্গন্ধো ঘ্রাণং তর্পয়তীব মে॥ ১-১৬৪-১১ (৭৪৭৪)
হৎবৈতান্মানুষান্সর্বানানয়স্ব মমান্তিকম্।
অস্মদ্বিষয়সুপ্তেভ্যো নৈতেভ্যো ভয়মস্তি তে॥ ১-১৬৪-১২ (৭৪৭৫)
এষামুৎকৃত্য মাংসানি মানুষাণাং যথেষ্টতঃ।
ভক্ষয়িষ্যাব সহিতৌ কুরু পূর্ণং বচো মম॥ ১-১৬৪-১৩ (৭৪৭৬)
ভক্ষয়িৎবা চ মাংসানি মানুষাণাং প্রকামতঃ।
নৃত্যাব সহিতাবাবাং দত্ততালাবনেকশঃ॥ ১-১৬৪-১৪ (৭৪৭৭)
বৈশম্পায়ন উবাচ। ১-১৬৪-১৫x (৯৫৫)
এবমুক্তা হিডিম্বা তু হিডিম্বেন মহাবনে।
ভ্রাতুর্বচনমাজ্ঞায় ৎবরমাণেব রাক্ষসী॥ ১-১৬৪-১৫ (৭৪৭৮)
`আপ্লুত্যাপ্লুত্য চ তরূনগচ্ছৎপাণ্ডবান্প্রতি।’
জগাম তত্র যত্র স্ম শেরতে পাণ্ডবা বনে॥ ১-১৬৪-১৬ (৭৪৭৯)
দদর্শ তত্র সা গৎবা পাণ্ডবান্পৃথয়া সহ।
শয়ানান্ভীমসেনং চ জাগ্রতং ৎবপরাজিতম্॥ ১-১৬৪-১৭ (৭৪৮০)
`উপাস্যমানান্ভীমেন রূপয়ৌবনশালিনঃ।
সুকুমারাংশ্চ পার্থান্সা ব্যায়ামেন চ কর্শিতান্॥ ১-১৬৪-১৮ (৭৪৮১)
দুঃখেন সংপ্রয়ুক্তাংশ্চ সহজ্যেষ্ঠান্প্রমাথিনঃ।
রৌদ্রী সতী রাজপুত্রং দর্শনীয়প্রদর্শনম্॥’ ১-১৬৪-১৯ (৭৪৮২)
দৃষ্ট্বৈব ভীমসেনং সা সালস্কন্ধমিবোদ্যতম্।
রাক্ষসী কাময়ামাস রূপেণাপ্রতিমং ভুবি॥ ১-১৬৪-২০ (৭৪৮৩)
`অন্তর্গতেন মনসা চিন্তয়ামাস রাক্ষসী’।
অয়ং শ্যামো মহাবাহুঃ সিংহস্কন্ধো মহাদ্যুতিঃ॥ ১-১৬৪-২১ (৭৪৮৪)
কম্বুগ্রীবঃ পুষ্করাক্ষো ভর্তা যুক্তো ভবেন্মম।
নাহং ভ্রাতৃবচো জাতু কুর্যাং ক্রূরমসাংপ্রতম্॥ ১-১৬৪-২২ (৭৪৮৫)
পতিস্নেহোঽতিবলবান্ন তথা ভ্রাতৃসৌহৃদম্।
মুহূর্তমিব তৃপ্তিশ্চ ভবেদ্ধাতুর্মমৈব চ॥ ১-১৬৪-২৩ (৭৪৮৬)
হতৈরেতৈরহৎবা তু মোদিষ্যে শাশ্বতীঃ সমাঃ।
`নিশ্চিত্যেত্থং হিডিম্বা সা ভীমং দৃষ্ট্বা মহাভুজং॥ ১-১৬৪-২৪ (৭৪৮৭)
উৎসৃজ্য রাক্ষসং রূপং মানুষং রূপমাস্থিতা।’
সা কামরূপিণী রূপং কৃৎবা মদনমোহিতা॥ ১-১৬৪-২৫ (৭৪৮৮)
উপতস্থে মহাত্মানং ভীমসেনমনিন্দিতা।
`ইঙ্গিতাকারকুশলা সোপাসর্পচ্ছনৈঃ শনৈঃ॥ ১-১৬৪-২৬ (৭৪৮৯)
বিনম্যমানেব লতা দিব্যাভরণভূষিতা।
শনৈঃ শনৈশ্চ তাং ভীমঃ সমীপমুপসর্পতীম্॥ ১-১৬৪-২৭ (৭৪৯০)
হর্ষমাণাং তদা পশ্যত্তন্বীং পীনপয়োধরাম্।
চন্দ্রাননাং পদ্মনেত্রাং নীলকুঞ্চিতমূর্ধজাম্॥ ১-১৬৪-২৮ (৭৪৯১)
কৃষ্ণাং সুপাণ্ডুরৈর্দন্তৈর্বিম্বোষ্ঠীং চারুদর্শনাম্।
দৃষ্ট্বা তাং রূপসংপন্নাং ভীমো বিস্ময়মাগতঃ॥ ১-১৬৪-২৯ (৭৪৯২)
উপচারগুণৈর্যুক্তাং ললিতৈর্হাসসংমিতৈঃ।
সমীপমুপসংপ্রাপ্য ভীমং সাথ বরানতা॥ ১-১৬৪-৩০ (৭৪৯৩)
বচো বচনবেলায়াং ভীমং প্রোবাচ ভামিনী।’
লজ্জয়া নম্যমানেব সর্বাভরণভূষিতা॥ ১-১৬৪-৩১ (৭৪৯৪)
স্মিতপূর্বমিদং বাক্যং ভীমসেনমথাব্রবীৎ।
কুতস্ৎবমসি সংপ্রাপ্তঃ কশ্চাসি পুরুষর্ষভ॥ ১-১৬৪-৩২ (৭৪৯৫)
ক ইমে শেরতে চেহ পুরুষা দেবরূপিণঃ।
কেয়ং বৈ বৃহতী শ্যামা সুকুমারী তবানঘ॥ ১-১৬৪-৩৩ (৭৪৯৬)
শেতে বনমিদং প্রাপ্য বিশ্বস্তা স্বগৃহে যথা।
নেদং জানীথ গহনং বনং রাক্ষসসেবিতম্॥ ১-১৬৪-৩৪ (৭৪৯৭)
বসতি হ্যত্র পাপাত্মা হিডিম্বো নাম রাক্ষসঃ॥ ১-১৬৪-৩৫ (৭৪৯৮)
তেনাহং প্রেষিতা ভ্রাত্রা দুষ্টভাবেন রক্ষসা।
বিভক্ষয়িষতা মাংসং যুষ্মাকমমরোপমাঃ॥ ১-১৬৪-৩৬ (৭৪৯৯)
সাঽহং ৎবমভিসংপ্রেক্ষ্য দেবগর্ভসমপ্রভম্।
নান্যং ভর্তারমিচ্ছামি সত্যমেতদ্ব্রবীমি তে॥ ১-১৬৪-৩৭ (৭৫০০)
এতদ্বিজ্ঞায় ধর্মজ্ঞ যুক্তং ময়ি সমাচর।
কামোপহতচিত্তাং হি ভজমানাং ভজস্ব মাম্॥ ১-১৬৪-৩৮ (৭৫০১)
ত্রাস্যামি ৎবাং মহাবাহো রাক্ষসাৎপুরুষাদকাৎ।
বৎস্যাবো গিরিদুর্গেষু ভর্তা ভব মমানঘ॥ ১-১৬৪-৩৯ (৭৫০২)
`ইচ্ছামি বীর ভদ্রং তে মা মে প্রাণান্বিহাসিষঃ।
ৎবয়া হ্যহং পরিত্যক্তা ন জীবেয়মরিন্দম॥’ ১-১৬৪-৪০ (৭৫০৩)
অন্তরিক্ষচরী হ্যস্মি কামতো বিচরামি চ।
অতুলামাপ্নুহি প্রীতিং তত্র তত্র ময়া সহ॥ ১-১৬৪-৪১ (৭৫০৪)
ভীমসেন উবাচ। ১-১৬৪-৪২x (৯৫৬)
`এষ জ্যেষ্ঠো মম ভ্রাতা মান্যঃ পরমকো গুরুঃ।
অনিবিষ্টো হি তন্নাহং পরিবিদ্যাং কথংচন॥’ ১-১৬৪-৪২ (৭৫০৫)
মাতরং ভ্রাতরং জ্যেষ্ঠং কনিষ্ঠানপরানপি।
পরিত্যজেত কোন্বদ্য প্রভবন্নিহ রাক্ষসি॥ ১-১৬৪-৪৩ (৭৫০৬)
কো হি সুপ্তানিমান্ভ্রাতৄন্দত্ৎবা রাক্ষসভোজনম্।
মাতরং চ নরো গচ্ছেৎকামার্ত ইব মদ্বিধঃ॥ ১-১৬৪-৪৪ (৭৫০৭)
রাক্ষস্যুবাচ। ১-১৬৪-৪৫x (৯৫৭)
`একং ৎবাং মোক্ষয়িষ্যামি সহ মাত্রা পরন্তপ।
সোদরানুৎসৃজৈনাংস্ৎবমারোহ জঘনং মম॥ ১-১৬৪-৪৫ (৭৫০৮)
ভীম উবাচ। ১-১৬৪-৪৬x (৯৫৮)
নাহং জীবিতুমাশংসে ভ্রাতৄনুৎসৃজ্য রাক্ষসি।
যথাশ্রদ্ধং ব্রজৈকা হি বিপ্রিয়ং মে প্রভাষসে॥ ১-১৬৪-৪৬ (৭৫০৯)
রাক্ষস্যুবাচ।’ ১-১৬৪-৪৭x (৯৫৯)
যত্তে প্রিয়ং তৎকরিষ্যে সর্বানেতান্প্রবোধয়।
মোক্ষয়িষ্যাম্যহং কামং রাক্ষসাৎপুরুষাদকাৎ॥ ১-১৬৪-৪৭ (৭৫১০)
ভীমসেন উবাচ। ১-১৬৪-৪৮x (৯৬০)
সুখসুপ্তান্বনে ভ্রাতৄন্মাতরং চৈব রাক্ষসি।
ন ভয়াদ্বোধয়িষ্যামি ভ্রাতুস্তব দুরাত্মনঃ॥ ১-১৬৪-৪৮ (৭৫১১)
ন হি মে রাক্ষসা ভীরু সোঢুং শক্তাঃ পরাক্রমম্।
ন মনুষ্যা ন গন্ধর্বা ন যক্ষাশ্চারুলোচনে॥ ১-১৬৪-৪৯ (৭৫১২)
গচ্ছ বা তিষ্ঠ বা ভদ্রে যদ্বা পীচ্ছসি তৎকুরু।
তং বা প্রেষয় তন্বঙ্গি ভ্রাতরং পুরুষাদকম্॥ ॥ ১-১৬৪-৫০ (৭৫১৩)

ইতি শ্রীমন্মহাভারতে আদিপর্বণি হিডিম্ববধপর্বণি চতুঃষষ্ট্যধিকশততমোঽধ্যায়ঃ॥ ১৬৪ ॥

Mahabharata – Adi Parva – Chapter Footnotes

১-১৬৪-৪ যদৃচ্ছয়া সালবৃক্ষং সমাশ্রিত ইত্যন্বয়ঃ॥ ১-১৬৪-১০ ধমনীং নাডীম্॥ ১-১৬৪-২১ শ্যামঃ তরুণঃ॥ ১-১৬৪-৩৬ বিভক্ষয়িষতা ভক্ষয়িতুমিচ্ছতা॥ চতুঃষষ্ট্যধিকশততমোঽধ্যায়ঃ॥ ১৬৪ ॥