আদিপর্ব – অধ্যায় ১৫৪

আদিপর্ব – অধ্যায় ১৫৪

॥ শ্রীঃ ॥

১.১৫৪. অধ্যায়ঃ ১৫৪

(অথ জতুগৃহপর্ব ॥ ৮ ॥)

Mahabharata – Adi Parva – Chapter Topics

সংগ্রহেণ জতুগৃহদাহকথনম্॥ ১ ॥ পুনর্বিস্তরেণ জতুগৃহদাহকথনারম্ভঃ॥ ২ ॥ দুর্যোধনধৃতরাষ্ট্রসংবাদঃ॥ ৩ ॥

Mahabharata – Adi Parva – Chapter Text

১-১৫৩৪-০ (৭০৭৭)
বৈশম্পায়ন উবাচ। ১-১৫৩৪-০x (৯১৩)
কণিকস্য মতং শ্রুৎবা কার্ৎস্ন্যেন ভরতর্ষভ।
দুর্যোধনশ্চ কর্ণশ্চ শকুনিশ্চাপি সৌবলঃ।
দুশাসনচতুর্থাস্তে মন্ত্রয়ামাসুরেকদা॥ ১-১৫৪-১ (৭০৭৮)
তে কৌরব্যমনুজ্ঞাপ্য ধৃতরাষ্ট্রং নরাধিপম্।
দহনে তু সপুত্রায়াঃ কুন্ত্যা বুদ্ধিমকারয়ন্॥ ১-১৫৪-২ (৭০৭৯)
তেষামিঙ্গিতভাবজ্ঞো বিদুরস্তত্ৎবদর্শিবান্।
আকারেণ চ তং মন্ত্রং বুবুধে দুষ্টচেতসাম্॥ ১-১৫৪-৩ (৭০৮০)
ততো বিদিতবেদ্যাত্মা পাণ্ডবানাং হিতে রতঃ।
পলায়নে মতিং চক্রে কুন্ত্যাঃ পুত্রৈঃ সহানঘঃ॥ ১-১৫৪-৪ (৭০৮১)
ততো বাতসহাং নাবং যন্ত্রয়ুক্তাং পতাকিনীম্।
ঊর্মিক্ষমাং দৃঢাং কৃৎবা কুন্তীমিদমুবাচ হ॥ ১-১৫৪-৫ (৭০৮২)
এষ জাতঃ কুলস্যাস্য কীর্তিবংশপ্রণাশনঃ।
ধৃতরাষ্ট্রঃ পরীতাত্মা ধর্মং ত্যজতি শাশ্বতম্॥ ১-১৫৪-৬ (৭০৮৩)
ইয়ং বারিপথে যুক্তা তরঙ্গপবনক্ষমা।
নৌর্যযা মৃত্যুপাশাত্ৎবং সপুত্রা মোক্ষ্যসে শুভে॥ ১-১৫৪-৭ (৭০৮৪)
তচ্ছ্রুৎবা ব্যথিতা কুন্তী পুত্রৈঃ সহ যশস্বিনী।
নাবমারুহ্য গঙ্গায়াং প্রয়যৌ ভরতর্ষভ॥ ১-১৫৪-৮ (৭০৮৫)
ততো বিদুরবাক্যেন নাবং বিক্ষিপ্য পাণ্ডবাঃ।
ধনং চাদায় তৈর্দত্তমরিষ্টং প্রাবিশন্বনম্॥ ১-১৫৪-৯ (৭০৮৬)
নিষাদী পঞ্চপুত্রা তু জাতেষু তত্র বেশ্মনি।
কারণাভ্যাগতা দগ্ধা সহ পুত্রৈরনাগসা॥ ১-১৫৪-১০ (৭০৮৭)
স চ ম্লেচ্ছাধমঃ পাপো দগ্ধস্তত্র পুরোচনঃ।
বঞ্চিতাশ্চ দুরাত্মানো ধার্তরাষ্ট্রাঃ সহানুগাঃ॥ ১-১৫৪-১১ (৭০৮৮)
অবিজ্ঞাতা মহাত্মনো জনানামক্ষতাস্তথা।
জনন্যা সহ কৌন্তেয়া মুক্তা বিদুরমন্ত্রিতাঃ॥ ১-১৫৪-১২ (৭০৮৯)
ততস্তস্মিন্পুরে লোকা নগরে বারণাবতে।
দৃষ্ট্বা জতুগৃহং দগ্ধমন্বশোচন্ত দুঃখিতাঃ॥ ১-১৫৪-১৩ (৭০৯০)
প্রেষয়ামাসূ রাজানং যথাবৃত্তং নিবেদিতুম্।
সংবৃতস্তে মহান্কামঃ পাণ্ডবান্দগ্ধবানসি॥ ১-১৫৪-১৪ (৭০৯১)
সকামো ভব কৌরব্য ভুঙ্ক্ষ্ব রাজ্যং সপুত্রকঃ।
তচ্ছ্রুৎবা ধৃতরাষ্ট্রস্তু সহপুত্রেণ শোচয়ন্॥ ১-১৫৪-১৫ (৭০৯২)
প্রেতকার্যাণি চ তথা চকার সহ বান্ধবৈঃ।
পাণ্ডবানাং তথা ক্ষত্তা ভীষ্মশ্চ কুরুসত্তমঃ॥ ১-১৫৪-১৬ (৭০৯৩)
জনমেজয় উবাচ। ১-১৫৪-১৭x (৯১৪)
পুনর্বিস্তরশঃ শ্রোতুমিচ্ছামি দ্বিজসত্তম।
দাহং জতুগৃহস্যৈব পাণ্ডবানাং চ মোক্ষণম্॥ ১-১৫৪-১৭ (৭০৯৪)
সুনৃশংসমিদং কর্ম তেষাং ক্রূরোপসংহিতম্।
কীর্তয়স্ব যথাবৃত্তং পরং কৌতূহলং মম॥ ১-১৫৪-১৮ (৭০৯৫)
বৈশম্পায়ন উবাচ। ১-১৫৪-১৯x (৯১৫)
শৃণু বিস্তরশো রাজন্বদতো মে পরন্তপ।
দাহং জতুগৃহস্যৈতৎপাণ্ডবানাং চ মোক্ষণম্॥ ১-১৫৪-১৯ (৭০৯৬)
বৈশম্পায়ন উবাচ। ১-১৫৪-২০x (৯১৬)
ততো দুর্যোধনো রাজা ধৃতরাষ্ট্রমভাষত।
পাণ্ডবেভ্যো ভয়ং নঃ স্যাত্তান্বিবাসয়তাং ভবান্।
নিপুণেনাভ্যুপায়েন নগরং বারণাবতম্॥ ১-১৫৪-২০ (৭০৯৭)
ধৃতরাষ্ট্রস্তু পুত্রেণ শ্রুৎবা বচনমীরিতম্।
মুহূর্তমিব সংচিন্ত্য দুর্যোধনমথাব্রবীৎ॥ ১-১৫৪-২১ (৭০৯৮)
ধর্মনিত্যঃ সদা পাণ্ডুস্তথা ধর্মপরায়ণঃ।
সর্বেষু জ্ঞাতিষু তথা ময়ি ৎবাসীদ্বিশেষতঃ॥ ১-১৫৪-২২ (৭০৯৯)
নাসৌ কিংচিদ্বিজানাতি ভোজনাদিচিকীর্ষিতম্।
নিবেদয়তি নিত্যং হি মম রাজ্যং ধৃতব্রতঃ॥ ১-১৫৪-২৩ (৭১০০)
তস্য পুত্রো যথা পাণ্ডুস্তথা ধর্মপরায়ণঃ।
গুণবান্লোকবিখ্যাতঃ পৌরবাণাং সুসংমতঃ॥ ১-১৫৪-২৪ (৭১০১)
স কথং শক্যতেঽস্মাভিরপাকর্তুং বলাদিতঃ।
পিতৃপৈতামাহাদ্রাজ্যাৎসসহায়ো বিশেষতঃ॥ ১-১৫৪-২৫ (৭১০২)
ভৃতা হি পাণ্ডুনাঽমাত্যা বলং চ সততং ভৃতম্।
ভৃতাঃ পুত্রাশ্চ পৌত্রাশ্চ তেষামপি বিশেষতঃ॥ ১-১৫৪-২৬ (৭১০৩)
তে পুরা সৎকৃতাস্তাত পাণ্ডুনা নাগরা জনাঃ।
কথং যুধিষ্ঠিরস্যার্থে ন নো হন্যুঃ সবান্ধবান্॥ ১-১৫৪-২৭ (৭১০৪)
দুর্যোধন উবাচ। ১-১৫৪-২৮x (৯১৭)
এবমেতন্ময়া তাত ভাবিতং দোষমাত্মনি।
দৃষ্ট্বা প্রকৃতয়ঃ সর্বা অর্থমানেন পূজিতাঃ॥ ১-১৫৪-২৮ (৭১০৫)
ধ্রুবমস্মৎসহায়াস্তে ভবিষ্যন্তি প্রধানতঃ।
অর্থবর্গঃ সহামাত্যো মৎসংস্থোঽদ্য মহীপতে॥ ১-১৫৪-২৯ (৭১০৬)
স ভবান্পাণ্ডবানাশু বিবাসয়িতুমর্হতি।
মৃদুনৈবাভ্যুপায়েন নগরং বারণাবতম্॥ ১-১৫৪-৩০ (৭১০৭)
যদা প্রতিষ্ঠিতং রাজ্যং ময়ি রাজন্ভবিষ্যতি।
তদা কুন্তী সহাপত্যা পুনরেষ্যতি ভারত॥ ১-১৫৪-৩১ (৭১০৮)
ধৃতরাষ্ট্র উবাচ। ১-১৫৪-৩২x (৯১৮)
দুর্যোধন মমাপ্যেতদ্ধৃদি সংপরিবর্ততে।
অভিপ্রায়স্য পাপৎবান্নৈবং তু বিবৃণোম্যহম্॥ ১-১৫৪-৩২ (৭১০৯)
ন চ ভীষ্মো ন চ দ্রোণো ন চ ক্ষত্তা ন গৌতমঃ।
বিবাস্যমানান্কৌন্তেয়াননুমংস্যন্তি কর্হিচিৎ॥ ১-১৫৪-৩৩ (৭১১০)
সমা হি কৌরবেয়াণাং বয়ং তে চৈব পুত্রক।
নৈতে বিষমমিচ্ছেয়ুর্ধর্ময়ুক্তা মনস্বিনঃ॥ ১-১৫৪-৩৪ (৭১১১)
তে বয়ং কৌরবেয়াণামেতেষাং চ মহাত্মনাম্।
কথং ন বধ্যতাং তাত গচ্ছাম জগতস্তথা॥ ১-১৫৪-৩৫ (৭১১২)
দুর্যোধন উবাচ। ১-১৫৪-৩৬x (৯১৯)
মধ্যস্থঃ সততং ভীষ্মো দ্রোণপুত্রো ময়ি স্থিতঃ।
যতঃ পুত্রস্ততো দ্রোণো ভবিতা নাত্র সংশয়ঃ॥ ১-১৫৪-৩৬ (৭১১৩)
কৃপঃ শারদ্বতশ্চৈব যত এতৌ ততো ভবেৎ।
দ্রোণং চ ভাগিনেয়ং চ ন স ত্যক্ষ্যতি কর্হিচিৎ॥ ১-১৫৪-৩৭ (৭১১৪)
ক্ষত্তাঽর্থবদ্ধস্ৎবস্মাকং প্রচ্ছন্নং সংয়তঃ পরৈঃ।
ন চৈকঃ স সমর্থোঽস্মান্পাম্ডবার্থেঽধিবাধিতুম্॥ ১-১৫৪-৩৮ (৭১১৫)
সুবিস্রব্ধঃ পাণ্ডুপুত্রান্সহ মাত্রা প্রবাসয়।
বারণাবতমদ্যৈব যথা যান্তি যথা কুরু॥ ১-১৫৪-৩৯ (৭১১৬)
বিনিদ্রকরণং ঘোরং হৃদি শল্যমিবার্পিতম্।
শোকপাবকমুদ্ভূতং কর্মণৈতেন নাশয়॥ ॥ ১-১৫৪-৪০ (৭১১৭)

ইতি শ্রীমন্মহাভারতে আদিপর্বণি জতুগৃহপর্বণি চতুঃপঞ্চাশদধিকশততমোঽধ্যায়ঃ॥ ১৫৪ ॥

Mahabharata – Adi Parva – Chapter Footnotes

১-১৫৪-২ অনুজ্ঞাপ্য পৃষ্ট্বা॥ ১-১৫৪-৩ ইঙ্গিতং চেষ্টিতং তেন ভাবং চিত্তাভিপ্রায়ং জানাতীতি ইঙ্গিতভাবজ্ঞঃ॥ ১-১৫৪-৪ বিদিতবেদ্যো জ্ঞাততত্ৎব আত্মা চিত্তং যস্য॥ ১-১৫৪-৫ যন্ত্রয়ুক্তাং যন্ত্রং মহত্যপি বাতে জলাশয়ে নৌকাস্তম্ভকং লোহলঙ্গলময়ম্॥ ১-১৫৪-৯ অরিষ্টং নির্বিঘ্নম্॥ ১-১৫৪-১৮ ক্রূরেণ কণিকেনোপসংহিতমুপদিষ্টম্॥ চতুঃপঞ্চাশদধিকশততমোঽধ্যায়ঃ॥ ১৫৪ ॥