আদিপর্ব – অধ্যায় ১৪৫

আদিপর্ব – অধ্যায় ১৪৫

॥ শ্রীঃ ॥

১.১৪৫. অধ্যায়ঃ ১৪৫

Mahabharata – Adi Parva – Chapter Topics

অর্জুনস্য পরীক্ষা॥ ১ ॥ কর্ণস্য রঙ্গপ্রবেশঃ॥ ২ ॥

Mahabharata – Adi Parva – Chapter Text

১-১৪৫-০ (৬৫৮৬)
বৈশম্পায়ন উবাচ। ১-১৪৫-০x (৮৫৭)
কুরুরাজে হি রঙ্গস্থে ভীমে চ বলিনাং বরে।
পক্ষপাতকৃতস্নেহঃ স দ্বিধেবাভবজ্জনঃ॥ ১-১৪৫-১ (৬৫৮৭)
জয় হে কুরুরাজেতি জয় হে ভীম ইত্যুত।
পুরুষাণাং সুবিপুলাঃ প্রণাদাঃ সহসোত্থিতাঃ॥ ১-১৪৫-২ (৬৫৮৮)
ততঃ ক্ষুব্ধার্ণবনিভং রঙ্গমালোক্য বুদ্ধিমান্।
ভারদ্বাজঃ প্রিয়ং পুত্রমশ্বত্থামানমব্রবীৎ॥ ১-১৪৫-৩ (৬৫৮৯)
বারয়ৈতৌ মহাবীর্যৌ কৃতয়োগ্যাবুভাবপি।
মা ভূদ্রঙ্গপ্রকোপোঽয়ং ভীমদুর্যোধনোদ্ভবঃ॥ ১-১৪৫-৪ (৬৫৯০)
বৈশম্পায়ন উবাচ। ১-১৪৫-৫x (৮৫৮)
`তত উত্থায় বেগেন অশ্বত্থামা ন্যবারয়ৎ।
গুরোরাজ্ঞা ভীম ইতি গান্ধারে গুরুশাসনম্।
অলং শিক্ষাকৃতং বেগমলং সাহসমিত্যুত॥’ ১-১৪৫-৫ (৬৫৯১)
ততস্তাবুদ্যতগতৌ গুরুপুত্রেণ বারিতৌ।
যুগান্তানিলসংক্ষুব্ধৌ মহাবেলাবিবার্ণবৌ॥ ১-১৪৫-৬ (৬৫৯২)
ততো রঙ্গাঙ্গণগতো দ্রোণো বচনমব্রবীৎ।
নিবার্য বাদিত্রগণং মহামেঘনিভস্বনম্॥ ১-১৪৫-৭ (৬৫৯৩)
যো মে পুত্রাৎপ্রিয়তরঃ সর্বশস্ত্রবিশারদঃ।
ঐন্দ্রিরিন্দ্রানুজসমঃ স পার্থো দৃশ্যতামিতি॥ ১-১৪৫-৮ (৬৫৯৪)
আচার্যবচনেনাথ কৃতস্বস্ত্যযনো যুবা।
বদ্ধগোধাঙ্গুলিত্রাণঃ পূর্ণতূণঃ সকার্মুকঃ॥ ১-১৪৫-৯ (৬৫৯৫)
কাঞ্চনং কবচং বিভ্রৎপ্রত্যদৃশ্য ফাল্গুনঃ।
সার্কঃ সেন্দ্রায়ুধতডিৎসসন্ধ্য ইব তোয়দঃ॥ ১-১৪৫-১০ (৬৫৯৬)
ততঃ সর্বস্য রঙ্গস্য সমুৎপিঞ্জলকোঽভবৎ।
প্রাবাদ্যন্ত চ বাদ্যানি সশঙ্খানি সমন্ততঃ॥ ১-১৪৫-১১ (৬৫৯৭)
প্রেক্ষকা ঊচুঃ। ১-১৪৫-১২x (৮৫৯)
এষ কুন্তীসুতঃ শ্রীমানেষ মধ্যমপাণ্ডবঃ।
এষ পুত্রো মহেন্দ্রস্য কুরূণামেষ রক্ষিতা॥ ১-১৪৫-১২ (৬৫৯৮)
এষোঽস্ত্রবিদুষাং শ্রেষ্ঠ এষ ধর্মভৃতাং বরঃ।
এষ শীলবতাং চাপি শীলজ্ঞাননিধিঃ পরঃ॥ ১-১৪৫-১৩ (৬৫৯৯)
বৈশম্পায়ন উবাচ। ১-১৪৫-১৪x (৮৬০)
ইত্যেবং তুমুলা বাচঃ শুশ্রুবুঃ প্রেক্ষকেরিতাঃ।
কুন্ত্যাঃ প্রস্রবসংয়ুক্তৈরস্রৈঃ ক্লিন্নমুরোঽভবৎ॥ ১-১৪৫-১৪ (৬৬০০)
তেন শব্দেন মহতা পূর্ণশ্রুতিরথাব্রবীৎ।
ধৃতরাষ্ট্রো নরশ্রেষ্ঠো বিদুরং হৃষ্টমানসঃ॥ ১-১৪৫-১৫ (৬৬০১)
ক্ষত্তঃ ক্ষুব্ধার্ণবনিভঃ কিমেষ সুমহাস্বনঃ।
সহসৈবোত্থিতো রঙ্গে ভিন্দন্নিব নভস্তলম্॥ ১-১৪৫-১৬ (৬৬০২)
বিদুর উবাচ। ১-১৪৫-১৭x (৮৬১)
এষ পার্থো মহারাজ ফাল্গুনঃ পাণ্ডুনন্দনঃ।
অবতীর্ণঃ সকবচস্তত্রৈব সুমিহাস্বনঃ॥ ১-১৪৫-১৭ (৬৬০৩)
ধৃতরাষ্ট্র উবাচ। ১-১৪৫-১৮x (৮৬২)
ধন্যোঽস্ম্যনুগৃহীতোঽস্মি রক্ষিতোঽস্মি মহামতে।
পৃথারণিসমুদ্ভূতৈস্ত্রিভিঃ পাণ্ডববহ্নিভিঃ॥ ১-১৪৫-১৮ (৬৬০৪)
বৈশম্পায়ন উবাচ। ১-১৪৫-১৯x (৮৬৩)
তস্মিন্প্রমুদিতে রঙ্গে কথংচিৎপ্রত্যুপস্থিতে।
দর্শয়ামাস বীভৎসুরাচার্যায়াস্ত্রলাঘবম্॥ ১-১৪৫-১৯ (৬৬০৫)
আগ্নেয়েনাসৃজদ্বহ্নিং বারুণেনাসৃজৎপয়ঃ।
বায়ব্যেনাসৃজদ্বহ্নিং পার্জন্যেনাসৃজদ্ধনান্॥ ১-১৪৫-২০ (৬৬০৬)
ভৌমেন প্রাসৃজদ্ভূমিং পার্বতেনাসৃজদ্গিরীন্।
অন্তর্ধানেন চাস্ত্রেণ পুনরন্তর্হিতোঽভবৎ॥ ১-১৪৫-২১ (৬৬০৭)
ক্ষণাৎপ্রাংশুঃ ক্ষণাদ্ধ্রস্বঃ ক্ষণাচ্চ রথধূর্গতঃ।
ক্ষণেন রথমধ্যস্থঃ ক্ষণেনাবতরন্মহীম্॥ ১-১৪৫-২২ (৬৬০৮)
সুকুমারং চ সূক্ষ্মং চ গুরু চাপি গুরুপ্রিয়ঃ।
সৌষ্ঠবেনাভিসংয়ুক্তঃ সোঽবিধ্যদ্বিবিধৈঃ শরৈঃ॥ ১-১৪৫-২৩ (৬৬০৯)
ভ্রমতশ্চ বরাহস্য লোহস্য প্রমুখে সমম্।
পঞ্চবাণানসংক্তান্সংমুমোচৈকবাণবৎ॥ ১-১৪৫-২৪ (৬৬১০)
গব্যে বিষাণকোশে চ চলে রজ্জ্ববলম্বিনি।
নিচখান মহাবীর্যঃ সায়কানেকবিংশতিম্॥ ১-১৪৫-২৫ (৬৬১১)
ইত্যেবমাদি সুমহৎখড্গে ধনুষি চানঘ।
গদায়াং শস্ত্রকুশলো মণ্ডলানি হ্যদর্শয়ৎ॥ ১-১৪৫-২৬ (৬৬১২)
ততঃ সমাপ্তভূয়িষ্ঠে তস্মিন্কর্মণি ভারত।
মন্দীভূতে সমাজে চ বাদিত্রস্য চ নিঃস্বনে॥ ১-১৪৫-২৭ (৬৬১৩)
দ্বারদেশাৎসমুদ্ভূতো মাহাত্ম্যবলসূচকঃ।
বজ্রনিষ্পেষসদৃশঃ শুশ্রুবে ভুজনিঃস্বনঃ॥ ১-১৪৫-২৮ (৬৬১৪)
দীর্যন্তে কিং নু গিরয়ঃ কিংস্বিদ্ভূমির্বিদীর্যতে।
কিংস্বিদাপূর্যতে ব্যোম জলধারাঘনৈর্ঘনৈঃ॥ ১-১৪৫-২৯ (৬৬১৫)
রঙ্গস্যৈবং মতিরভূৎক্ষণেন বসুধাধিপ।
দ্বারং চাভিমুখাঃ সর্বে বভূবুঃ প্রেক্ষকাস্তদা॥ ১-১৪৫-৩০ (৬৬১৬)
পঞ্চভির্ভ্রাতৃভিঃ পার্থৈর্দ্রোণঃ পরিবৃতো বভৌ।
পঞ্চতারেণ সংয়ুক্তঃ সাবিত্রেণেব চন্দ্রমাঃ॥ ১-১৪৫-৩১ (৬৬১৭)
অশ্বত্থাম্না চ সহিতং ভ্রাতৄণাং শতমূর্জিতম্।
দুর্যোধনমমিত্রঘ্নমুত্থিতং পর্যবারয়ৎ॥ ১-১৪৫-৩২ (৬৬১৮)
স তৈস্তদা ভ্রাতৃভিরুদ্যতায়ুধৈ-
র্গদাগ্রপাণিঃ সমবস্থিতৈর্বৃতঃ।
বভৌ যথা দানবসংক্ষয়ে পুরা
পুনন্দরো দেবগণৈঃ সমাবৃতঃ॥ ॥ ১-১৪৫-৩৩ (৬৬১৯)

ইতি শ্রীমন্মহাভারতে আদিপর্বণি সংভবপর্বণি পঞ্চচৎবারিংশদধিকশততমোঽধ্যায়ঃ॥ ১৪৫ ॥

Mahabharata – Adi Parva – Chapter Footnotes

১-১৪৫-৪ কৃতয়োগ্যৌ সুশিক্ষিতৌ॥ ১-১৪৫-১০ তূণকার্মুককবচানাং তৎপ্রভাজালস্যার্জুনস্য চ ক্রমাদর্কেন্দ্রায়ুধতডিৎসংধ্যাতোয়দৈরুপমা॥ ১-১৪৫-১১ সমুৎপিঞ্জলক উৎফুল্লতা॥ ১-১৪৫-১৪ অস্রৈঃ প্রেমাশ্রুভিঃ॥ ১-১৪৫-২৩ সুকুমারং পূর্ণঘটকুক্কুটাণ্ডাদীনি লক্ষ্যাণ্যবিচাল্যাবিধ্যৎ। সূক্ষ্মং গুঞ্জাদি লক্ষ্যং, গুরু ঘনাবয়বং চ সোঽবিধ্যৎ॥ ১-১৪৫-২৫ ভূতাশ্বেভবরাহাণাং সিংহর্ক্ষকপিসংমুখান্। বাণান্সপ্তাসমায়ুক্তান্স মুমোচৈকবাণবৎ। ইতি ঘপাঠঃ। গব্যে গোসংবন্ধিনি॥ ১-১৪৫-৩১ সাবিত্রেণ হস্তনক্ষত্রেণ॥ ১-১৪৫-৩৩ গদা অগ্রং আলম্বনং যস্য তাদৃশঃ পাণির্যস্য স গাদাগ্রপাণিঃ॥ পঞ্চচৎবারিংশদধিকশততমোঽধ্যায়ঃ॥ ১৪৫ ॥