আদিপর্ব – অধ্যায় ১৪৪
॥ শ্রীঃ ॥
১.১৪৪. অধ্যায়ঃ ১৪৪
Mahabharata – Adi Parva – Chapter Topics
কুমারাণাং অস্ত্রশিক্ষাপরীক্ষার্থং রঙ্গনির্মাণম্॥ ১ ॥ শিক্ষাদর্শনার্থং ভীষ্মাদীনাং প্রেক্ষাগারপ্রবেশঃ॥ ২ ॥ যুধিষ্ঠিরাদীনাং পরীক্ষা॥ ৩ ॥ ভীমদুর্যোধনয়োঃ গদায়ুদ্ধপরীক্ষা॥ ৪ ॥
Mahabharata – Adi Parva – Chapter Text
১-১৪৪-০ (৬৫৩৯)
বৈশম্পায়ন উবাচ। ১-১৪৪-০x (৮৫৫)
কৃতাস্ত্রান্ধার্তরাষ্ট্রাংশ্চ পাণ্ডুপুত্রাংশ্চ ভারত।
দৃষ্ট্বা দ্রোণোঽব্রবীদ্রাজন্ধৃতরাষ্ট্রং জনেশ্বরম্॥ ১-১৪৪-১ (৬৫৪০)
কৃপস্য সোমদত্তস্য বাহ্লীকস্য চ ধীমতঃ।
গাঙ্গেয়স্য চ সান্নিধ্যে ব্যাসস্য বিদুরস্য চ॥ ১-১৪৪-২ (৬৫৪১)
রাজন্সংপ্রাপ্তবিদ্যাস্তে কুমারাঃ কুরুসত্তম।
তে দর্শয়েয়ুঃ স্বাং শিক্ষাং রাজন্ননুমতে তব॥ ১-১৪৪-৩ (৬৫৪২)
ততোঽব্রবীন্মহারাজঃ প্রহৃষ্টেনান্তরাত্মনা। ১-১৪৪-৪ (৬৫৪৩)
ধৃতরাষ্ট্র উবাচ।
ভারদ্বাজ মহৎকর্ম কৃতং তে দ্বিজসত্তম॥ ১-১৪৪-৪x (৮৫৬)
যদানুমন্যসে কালং যস্মিন্দেশে যথায়থা।
তথাতথা বিধানায় স্বয়মাজ্ঞাপয়স্ব মাম্॥ ১-১৪৪-৫ (৬৫৪৪)
স্পৃহয়াম্যদ্য নির্বেদান্পুরুষাণাং সচক্ষুষাম্।
অস্ত্রহেতোঃ পরাক্রান্তান্যে মে দ্রক্ষ্যন্তি পুত্রকান্॥ ১-১৪৪-৬ (৬৫৪৫)
ক্ষত্তর্যদ্গুরুরাচার্যো ব্রবীতি কুরু তত্তথা।
ন হীদৃশং প্রিয়ং মন্যে ভবিতা ধর্মবৎসল॥ ১-১৪৪-৭ (৬৫৪৬)
ততো রাজানমামন্ত্র্য বিদুরানুমতোপি হি।
ভারদ্বাজো মহাপ্রাজ্ঞো মাপয়ামাস মেদিনীম্॥ ১-১৪৪-৮ (৬৫৪৭)
সমামবৃক্ষাং নির্গুলমামুদক্প্রবণসংস্থিতাম্।
তস্যাং ভূমৌ বলিং চক্রে তিথৌ নক্ষত্রপূজিতে॥ ১-১৪৪-৯ (৬৫৪৮)
অবঘুষ্টং পুরং চাপি তদর্থং ভরতর্ষভ।
রঙ্গভূমৌ সুবিপুলং শাস্ত্রদৃষ্টং যথাবিধি॥ ১-১৪৪-১০ (৬৫৪৯)
প্রেক্ষাগারং সুবিহিতং চক্রস্তে তস্য শিল্পিনঃ।
রক্ষাং সর্বায়ুধোপেতাং স্ত্রীণাং চৈব নরর্ষভ॥ ১-১৪৪-১১ (৬৫৫০)
মঞ্চাংশ্চ কারয়ামাসুর্যত্র জানপদা জনাঃ।
বিপুলানুচ্ছ্রয়োপেতাঞ্শিবিকাশ্চ মহাধনাঃ॥ ১-১৪৪-১২ (৬৫৫১)
তস্মিংস্ততোঽহনি প্রাপ্তে রাজা সসচিবস্তদা।
`সান্তঃপুরঃ সহামাত্যো ব্যাসস্যানুমতে তদা।’
ভীষ্মং প্রমুখতঃ কৃৎবা কৃপং চাচার্যসত্তমম্॥ ১-১৪৪-১৩ (৬৫৫২)
`বাহ্লীকং সোমদত্তং চ ভূরিশ্রবসমেব চ।
কুরূনন্যাংশ্চ সচিবানাদায় নগরাদ্বহিঃ॥ ১-১৪৪-১৪ (৬৫৫৩)
রঙ্গভূমিং সমাসাদ্য ব্রাহ্মণৈঃ সহিতো নৃপঃ॥’ ১-১৪৪-১৫ (৬৫৫৪)
মুক্তাজালপরিক্ষিপ্তং বৈদূর্যমমিশোভিতম্।
শাতকুম্ভময়ং দিব্যং প্রেক্ষাগারমুপাগমৎ॥ ১-১৪৪-১৬ (৬৫৫৫)
গান্ধারী চ মহাভাগা কুন্তী চ জয়তাং বর।
স্ত্রিয়শ্চ রাজ্ঞঃ সর্বাস্তাঃ সপ্রেষ্যাঃ সপরিচ্ছদাঃ॥ ১-১৪৪-১৭ (৬৫৫৬)
হর্ষাদারুরুহুর্মঞ্চান্মেরুং দেবস্ত্রিয়ো যথা।
ব্রাহ্মণক্ষত্রিয়াদ্যং চ চাতুর্বর্ণ্যং পুরাদ্দ্রুতম্॥ ১-১৪৪-১৮ (৬৫৫৭)
দর্শনেপ্সুঃ সমভ্যাগাৎকুমারাণাং কৃতাস্ত্রতাম্।
ক্ষণেনৈকস্থতাং তত্র দর্শনেপ্সুর্জগাম হ॥ ১-১৪৪-১৯ (৬৫৫৮)
প্রবাদিতৈশ্চ বাদিত্রৈর্জনকৌতূহলেন চ।
মহার্ণব ইব ক্ষুব্ধঃ সমাজঃ সোঽভবত্তদা॥ ১-১৪৪-২০ (৬৫৫৯)
ততঃ শুক্লাম্বরধরঃ শুক্লয়জ্ঞোপবীতবান্।
শুক্লকেশঃ সিতশ্মশ্রুঃ শুক্লাল্যানুলেপনঃ॥ ১-১৪৪-২১ (৬৫৬০)
রঙ্গমধ্যং তদাচার্যঃ সপুত্রঃ প্রবিবেশ হ।
নভো জলধরৈর্হীনং সাঙ্গারক ইবাংশুমান্॥ ১-১৪৪-২২ (৬৫৬১)
ব্যাসস্যানুমতে চক্রে বলিং বলবতাং বরঃ।
ব্রাহ্মণাংস্তু সুমন্ত্রজ্ঞান্কারয়ামাস মঙ্গলম্॥ ১-১৪৪-২৩ (৬৫৬২)
`সুবর্ণমণিরত্নানি বস্ত্রাণি বিবিধানি চ।
প্রদদৌ দক্ষিণাং রাজা দ্রোণায় চ কৃপায় চ॥’ ১-১৪৪-২৪ (৬৫৬৩)
সুখপুণ্যাহঘোষস্য পুণ্যস্য সমনন্তরম্।
বিবিশুর্বিবিধং গৃহ্য শস্ত্রোপকরণং নরাঃ॥ ১-১৪৪-২৫ (৬৫৬৪)
ততো বদ্ধাঙ্গুলিত্রাণা বদ্ধকক্ষ্যা মহারথাঃ।
বদ্ধথূণাঃ সধনুষো বিবিশুর্ভরতর্ষভাঃ॥ ১-১৪৪-২৬ (৬৫৬৫)
`রঙ্গমধ্যে স্থিতং দ্রোণমভিবাদ্য নরর্ষভাঃ।
চক্রুঃ পূজাং যথান্যায়ং দ্রোণস্য চ কৃপস্য চ॥ ১-১৪৪-২৭ (৬৫৬৬)
আশীর্ভিশ্চ প্রয়ুক্তাভিঃ সর্বে সংহৃষ্টমানসাঃ।
অভিবাদ্য পুনঃ শস্ত্রান্বলিপুষ্পৈঃ সমর্চিতান্॥ ১-১৪৪-২৮ (৬৫৬৭)
রক্তচন্দনসংমিশ্রৈঃ স্বয়মর্চন্তি কৌরবাঃ।
রক্তচন্দনদিগ্ধাশ্চ রক্তমাল্যানুধারিণঃ॥ ১-১৪৪-২৯ (৬৫৬৮)
সর্বে রক্তপতাকাশ্চ সর্বে রক্তান্তলোচনাঃ।
দ্রোণেন সমনুজ্ঞাতা গৃহ্য শস্ত্রং পরন্তপাঃ॥ ১-১৪৪-৩০ (৬৫৬৯)
ধনূংষি পূর্ব সংগৃহ্য তপ্তকাঞ্চনভূষিতাঃ।
সজ্যানি বিবিধাকারাঃ শরৈঃ সন্ধায় কৌরবা॥ ১-১৪৪-৩১ (৬৫৭০)
জ্যাঘোষং তলঘোষং চ কৃৎবা ভূতান্যমোহয়ন্॥’ ১-১৪৪-৩২ (৬৫৭১)
অনুজ্যেষ্ঠং চ তে তত্র যুধিষ্ঠিরপুনরোগমাঃ।
চক্রুরস্ত্রং মহাবীর্যাঃ কুমারাঃ পরমাদ্ভুতম্॥ ১-১৪৪-৩৩ (৬৫৭২)
`কেষাংচিত্তত্র মাল্যেষু শরা নিপতিতা নৃপ।
কেষাংচিৎপুষ্পমুকুটে নিপতন্তি স্ম সায়কাঃ॥ ১-১৪৪-৩৪ (৬৫৭৩)
কেচিল্লক্ষ্যাণি বিবিধৈর্বাণৈরাহিতলক্ষণৈঃ।
বিভিদুর্লাঘবোৎসৃষ্টৈর্গুরূণি চ লঘূনি চ॥’ ১-১৪৪-৩৫ (৬৫৭৪)
কেচিচ্ছরাক্ষেপভয়াচ্ছিরাংস্যবননামিরে।
মনুজা ধৃষ্টমপরে বীক্ষাঞ্চক্রুঃ সুবিস্মিতাঃ॥ ১-১৪৪-৩৬ (৬৫৭৫)
তে স্ম লক্ষ্যাণি বিভিদুর্বাণৈর্নামাঙ্কশোভিতৈঃ।
বিবিধৈর্লাঘবোৎসৃষ্টৈরুহ্যন্তো বাজিভির্দ্রুতম্॥ ১-১৪৪-৩৭ (৬৫৭৬)
তৎকুমারবলং তত্র গৃহীতশরকার্মুকম্।
গন্ধর্বনগরাকারং প্রেক্ষ্য তে বিস্মিতাভবন্॥ ১-১৪৪-৩৮ (৬৫৭৭)
সহসা চুক্রুশুশ্চান্যে নরাঃ শতসহস্রশঃ।
বিস্ময়োৎফুল্লনয়নাঃ সাধুসাধ্বিতি ভারত॥ ১-১৪৪-৩৯ (৬৫৭৮)
কৃৎবা ধনুষি তে মার্গান্রথচর্যাসু চাসকৃৎ।
গজপৃষ্ঠেঽশ্বপৃষ্ঠে চ নিয়ুদ্ধে চ মহাবলাঃ॥ ১-১৪৪-৪০ (৬৫৭৯)
গৃহীতখড্গচর্মাণস্ততো ভূয়ঃ প্রহারিণঃ।
ৎসরুমার্গান্যথোদ্দিষ্টাংশ্চেরুঃ সর্বাসু ভূমিষু॥ ১-১৪৪-৪১ (৬৫৮০)
লাঘবং সৌষ্ঠবং শোভাং স্থিরৎবং দৃঢমুষ্টিতাম্।
দদৃশুস্তত্র সর্বেষাং প্রয়োগং খড্গচর্মণোঃ॥ ১-১৪৪-৪২ (৬৫৮১)
অথ তৌ নিত্যসংহৃষ্টৌ সুয়োধনবৃকোদরৌ।
অবতীর্ণৌ গদাহস্তাবেকশৃঙ্গাবিবাচলৌ॥ ১-১৪৪-৪৩ (৬৫৮২)
বদ্ধকক্ষ্যৌ মহাবাহূ পৌরুষে পর্যবস্থিতৌ।
বৃংহন্তৌ বাসিতাহেতোঃ সমদাবিব কুঞ্জরৌ॥ ১-১৪৪-৪৪ (৬৫৮৩)
তৌ প্রদক্ষিণসব্যানি মণ্ডলানি মহাবলৌ।
চেরতুর্মণ্ডলগতৌ সমদাবিব কুঞ্জরৌ॥ ১-১৪৪-৪৫ (৬৫৮৪)
বিদুরো ধৃতরাষ্ট্রায় গান্ধার্যাঃ পাণ্ডবারণিঃ।
ন্যবেদয়েতাং তৎসর্বং কুমারাণাং বিচেষ্টিতম্॥ ॥ ১-১৪৪-৪৬ (৬৫৮৫)
ইতি শ্রীমন্মহাভারতে আদিপর্বণি সংভবপর্বণি চতুশ্চৎবারিংশদধিকশততমোঽধ্যায়ঃ॥ ১৪৪ ॥
Mahabharata – Adi Parva – Chapter Footnotes
১-১৪৪-১৯ দর্শনেপ্সুঃ জন ইতি শেষঃ॥ ১-১৪৪-২২ অংশুমান্ চন্দ্রঃ॥ ১-১৪৪-৩৮ গন্ধর্বনগরাকারমদ্ভুতরূপম্॥ ১-১৪৪-৪৩ সংহৃষ্টৌ পরস্পরং জেতুং সকামৌ॥ ১-১৪৪-৪৪ বৃংহন্তৌ শব্দং কুর্বাণৌ। বাসিতা হস্তিনী॥ ১-১৪৪-৪৫ মণ্ডলগতাবলাতচক্রবদ্ভ্রাম্যমাণগদাপরিবেষান্তর্গতৌ॥ ১-১৪৪-৪৬ পাণ্ডবারণিঃ কুন্তী॥ চতুশ্চৎবারিংশদধিকশততমোঽধ্যায়ঃ॥ ১৪৪ ॥