আদিপর্ব – অধ্যায় ০৯২

আদিপর্ব – অধ্যায় ০৯২

॥ শ্রীঃ ॥

১.৯২. অধ্যায়ঃ ০৯২

Mahabharata – Adi Parva – Chapter Topics

কণ্বাশ্রমে দুষ্যন্তশকুন্তলাসংবাদঃ॥ ১ ॥ শকুন্তলায়াঃ স্বজন্মবৃত্তান্তকথনারম্ভঃ॥ ২ ॥

Mahabharata – Adi Parva – Chapter Text

১-৯২-০ (৩৯৬৫)
বৈশম্পায়ন উবাচ। ১-৯২-০x (৫৭২)
ততো গচ্ছন্মহাবাহুরেকোঽমাত্যান্বিসৃজ্য তান্।
নাপশ্যচ্চাশ্রমে তস্মিংস্তমৃষিং সংশিতব্রতম্॥ ১-৯২-১ (৩৯৬৬)
সোঽপশ্যমানস্তমৃষিং শূন্যং দৃষ্ট্বা তথাঽঽশ্রমম্।
উবাচ ক ইহেত্যুচ্চৈর্বনং সন্নাদয়ন্নিব॥ ১-৯২-২ (৩৯৬৭)
শ্রুৎবাঽথ তস্য তং শব্দং কন্যা শ্রীরিব রূপিণী।
নিশ্চক্রামাশ্রমাত্তস্মাত্তাপসীবেষধারিণী॥ ১-৯২-৩ (৩৯৬৮)
সা তং দৃষ্ট্বৈব রাজানং দুষ্যন্তমসিতেক্ষণা।
`সুপ্রীতাঽভ্যাগতং তং তু পূজ্যং প্রাপ্তমথেশ্বরম্॥ ১-৯২-৪ (৩৯৬৯)
রূপয়ৌবনসংপন্না শীলাচারবতী শুভা।
সা তমায়তপদ্মাক্ষং ব্যূঢোরস্কং মহাভুজম্॥ ১-৯২-৫ (৩৯৭০)
সিংহস্কন্ধং দীর্ঘবাহুং সর্বলক্ষণপূজিতম্।
স্পৃষ্টং মধুরয়া বাচা সাঽব্রবীজ্জনমেজয়া॥’ ১-৯২-৬ (৩৯৭১)
স্বাগতং ত ইতি ক্ষিপ্রমুবাচ প্রতিপূজ্য চ।
আসনেনার্চয়িৎবা চ পাদ্যেনার্ঘ্যেণ চৈব হি॥ ১-৯২-৭ (৩৯৭২)
পপ্রচ্ছানাময়ং রাজন্কুশলং চ নরাধিপম্।
যথাবদর্চয়িৎবাঽথ পৃষ্ট্বা চানাময়ং তদা॥ ১-৯২-৮ (৩৯৭৩)
উবাচ স্ময়মানেব কিং কার্যং ক্রিয়তামিতি।
`আশ্রমস্যাভিগমনে কিং ৎবং কার্যং চিকীর্ষসি॥ ১-৯২-৯ (৩৯৭৪)
কস্ৎবমদ্যেহ সংপ্রাপ্তো মহর্ষেরাশ্রমং শুভম্।’
তামব্রবীত্ততো রাজা কন্যাং মধুরভাষিণীম্॥ ১-৯২-১০ (৩৯৭৫)
দৃষ্ট্বা সর্বানবদ্যাঙ্গীং যথাবৎপ্রতিপূজিতঃ।
`রাজর্ষেস্তস্য পুত্রোঽহমিলিনস্য মহাত্মনঃ॥ ১-৯২-১১ (৩৯৭৬)
দুষ্যন্ত ইতি মে নাম সত্যং পুষ্করলোচনে।’
আগতোঽহং মহাভাগমৃষিং কণ্বমুপাসিতুম্॥ ১-৯২-১২ (৩৯৭৭)
ক্ব গতো ভগবান্ভদ্রে গন্মমাচক্ষ্ব শোভনে। ১-৯২-১৩ (৩৯৭৮)
শকুন্তলোবাচ।
গতঃ পিতা মে ভগবান্ফলান্যাহর্তুমাশ্রমাৎ।
মুহূর্তং সংপ্রতীক্ষস্ব দ্রষ্টাস্যেনমুপাগতম্॥ ১-৯২-১৩x (৫৭৩)
বৈশম্পায়ন উবাচ। ১-৯২-১৪x (৫৭৪)
অপশ্যমানস্তমৃষিং তথা চোক্তস্তয়া চ সঃ।
তাং দৃষ্ট্বা চ বরারোহাং শ্রীমতীং চারুহাসিনীম্॥ ১-৯২-১৪ (৩৯৭৯)
বিভ্রাজমানাং বপুষা তপসা চ দমেন চ।
রূপয়ৌবনসংপন্নামিত্যুবাচ মহীপতিঃ॥ ১-৯২-১৫ (৩৯৮০)
কা ৎবং কস্যাসি সুশ্রোণি কিমর্থং চাগতা বনম্।
এবংরূপগুণোপেতা কুতস্ৎবমসি শোভনে॥ ১-৯২-১৬ (৩৯৮১)
দর্শনাদেব হি শুভে ৎবয়া মেঽপহৃতং মনঃ।
ইচ্ছামি ৎবামহং জ্ঞাতুং তন্মমাচক্ষ্ব শোভনে॥ ১-৯২-১৭ (৩৯৮২)
`স্থিতোস্ম্যমিতসৌভাগ্যে বিবক্ষুশ্চাস্মি কিংচন।
শৃণু মে নাগনাসোরু বচনং মত্তকাশিনি॥ ১-৯২-১৮ (৩৯৮৩)
রাজর্ষেরন্বয়ে জাতঃ পূরোরস্মি বিশেষতঃ।
বৃণ্বে ৎবামদ্য সুশ্রোণি দুষ্যন্তো বরবর্ণিনি॥ ১-৯২-১৯ (৩৯৮৪)
ন মেঽন্যত্র ক্ষত্রিয়ায়া মনো জাতু প্রবর্ততে।
ঋষিপুত্রীষু চান্যাসু নাবরাসু পরাসু চ॥ ১-৯২-২০ (৩৯৮৫)
তস্মাৎপ্রণিহিতাত্মানং বিদ্দি মাং কলভাষিণি।
যস্যাং মে ৎবয়ি ভাবোঽস্তি ক্ষত্রিয়া হ্যসি কা বদা॥ ১-৯২-২১ (৩৯৮৬)
ন হি মে ভীরু বিপ্রায়াং মনঃ প্রসহতে গতিম্।
ভজে ৎবামায়তাপাঙ্গে ভক্তং ভজিতুমর্হসি।
ভুঙ্ক্ষ রাজ্যং বিশালাক্ষি বুদ্ধিং মাৎবন্যথা কৃথাঃ’॥ ১-৯২-২২ (৩৯৮৭)
এবমুক্তা তু সা কন্যা তেন রাজ্ঞা তমাশ্রমে।
উবাচ হসতী বাক্যমিদং সুমধুরাক্ষরম্॥ ১-৯২-২৩ (৩৯৮৮)
কণ্বস্যাহং ভগবতো দুষ্যন্ত দুহিতা মতা।
তপস্বিনো ধৃতিমতো ধর্মজ্ঞস্য মহাত্মনঃ॥ ১-৯২-২৪ (৩৯৮৯)
`অস্বতন্ত্রাস্মি রাজেন্দ্র কাশ্যপো মে গুরুঃ পিতা।
তমেব প্রার্থয় স্বার্থং নায়ুক্তং কর্তুমর্হসি॥’ ১-৯২-২৫ (৩৯৯০)
দুষ্যন্ত উবাচ। ১-৯২-২৬x (৫৭৫)
ঊর্ধ্বরেতা মহাভাগে ভগবাঁল্লোকপূজিতঃ।
চলেদ্ধি বৃত্তাদ্ধর্মোপি ন চলেৎসংশিতব্রতঃ॥ ১-৯২-২৬ (৩৯৯১)
কথং ৎবং তস্য দুহিতা সংভূতা বরবর্ণিনী।
সংশয়ো মে মহানত্র তন্মে ছেত্তুমিহার্হসি॥ ১-৯২-২৭ (৩৯৯২)
শকুন্তলোবাচ। ১-৯২-২৮x (৫৭৬)
যথাঽয়মাগমো মহ্যং যথা চেদমভূৎপুরা।
`অন্যথা সন্তমাত্মানমন্যথা সৎসু ভাষতে॥ ১-৯২-২৮ (৩৯৯৩)
স পাপেনাবৃতো মূর্খস্তেন আত্মাপহারকঃ।’
শৃণু রাজন্যথাতত্ৎবং যথাঽস্মি দুহিতা মুনেঃ॥ ১-৯২-২৯ (৩৯৯৪)
ঋষিঃ কশ্চিদিহাগম্য মম জন্মাভ্যচোদয়ৎ।
`ঊর্ধ্বরেতা যথাসি ৎবং কুতস্ৎবেয়ং শকুন্তলা॥ ১-৯২-৩০ (৩৯৯৫)
পুত্রী ৎবত্তঃ কথং জাতা তত্ৎবং মে ব্রূহি কাশ্যপ।’
তস্মৈ প্রোবাচ ভগবান্যথা তচ্ছৃণু পার্থিবা॥ ১-৯২-৩১ (৩৯৯৬)
কণ্ব উবাচ। ১-৯২-৩২x (৫৭৭)
তপ্যমানঃ কিল পুরা বিশ্বামিত্রো মহত্তপঃ।
সুভৃশং তাপয়ামাস শক্রং সুরগণেশ্বরম্॥ ১-৯২-৩২ (৩৯৯৭)
তপসা দীপ্তবীর্যোঽয়ং স্থানান্মাং চ্যাবয়েদিতি।
ভীতঃ পুরন্দরস্তস্মান্মেনকামিদমব্রবীৎ॥ ১-৯২-৩৩ (৩৯৯৮)
গুণৈরপ্সরসাং দিব্যৈর্মেনকে ৎবং বিশিষ্যসে।
শ্রেয়ো মে কুরু কল্যাণি যত্ৎবাং বক্ষ্যামি তচ্ছৃণু॥ ১-৯২-৩৪ (৩৯৯৯)
অসাবাদিত্যশঙ্কাশো বিশ্বামিত্রো মহাতপাঃ।
তপ্যমানস্তপো ঘোরং মম কম্পয়তে মনঃ॥ ১-৯২-৩৫ (৪০০০)
মেনকে তব ভারোঽয়ং বিশ্বামিত্রঃ সুমধ্যমে।
শংসিতাত্মা সুদুর্ধর্ষ উগ্রে তপসি বর্ততে॥ ১-৯২-৩৬ (৪০০১)
স মাং ন চ্যাবয়েৎস্থানাত্তং বৈ গৎবা প্রলোভয়।
চর তস্য তপোবিঘ্নং কুরু মে প্রিয়মুত্তমম্॥ ১-৯২-৩৭ (৪০০২)
রূপয়ৌবনমাধুর্যচেষ্টিতস্মিতভাষণৈঃ।
লোভয়িৎবা বরারোহে তপসস্তং নিবর্তয়॥ ১-৯২-৩৮ (৪০০৩)
মেনকোবাচ। ১-৯২-৩৯x (৫৭৮)
মহাতেজাঃ স ভগবাংস্তথৈব চ মহাতপাঃ।
কোপনশ্চ তথা হ্যেনং জানাতি ভগবানপি॥ ১-৯২-৩৯ (৪০০৪)
তেজস্তপসশ্চৈব কোপস্য চ মহাত্মনঃ।
ৎবমপ্যুদ্বিজসে যস্য নোদ্বিজেয়মহং কথম্॥ ১-৯২-৪০ (৪০০৫)
মহাভাগং বসিষ্ঠং যঃ পুত্রৈরিষ্টৈর্ব্যযোজয়ৎ।
ক্ষত্রজাতশ্চ যঃ পূর্বমভবদ্ব্রাহ্মণো বলাৎ॥ ১-৯২-৪১ (৪০০৬)
শৌচার্থং যো নদীং চক্রে দুর্গমাং বহুভির্জলৈঃ।
যাং তাং পুণ্যতমাং লোকে কৌশিকীতি বিদুর্জনাঃ॥ ১-৯২-৪২ (৪০০৭)
বভার যত্রাস্য পুরা কালে দুর্গে মহাত্মনঃ।
দারান্মতঙ্গো ধর্মাত্মা রাজর্ষির্ব্যাধতাং গতঃ॥ ১-৯২-৪৩ (৪০০৮)
অতীতকালে দুর্ভিক্ষে অভ্যেত্য পুনরাক্ষমম্।
মুনিঃ পারেতি নদ্যা বৈ নাম চক্রে তদা প্রভুঃ॥ ১-৯২-৪৪ (৪০০৯)
মতঙ্গং যাজয়াঞ্চক্রে যত্র প্রীতমনাঃ স্বয়ম্।
ৎবং চ সোমং ভয়াদ্যস্য গতঃ পাতুং সুরেশ্বর॥ ১-৯২-৪৫ (৪০১০)
চকারান্যং চ লোকং বৈ ক্রুদ্ধো নক্ষত্রসংপদা।
প্রতিশ্রবণপূর্বাণি নক্ষত্রাণি চকার যঃ।
গুরুশাপহতস্যাপি ত্রিশঙ্কোঃ শরণং দদৌ॥ ১-৯২-৪৬ (৪০১১)
ব্রহ্মর্ষিশাপং রাজর্ষিঃ কথং মোক্ষ্যতি কৌশিকঃ।
অবমত্য তদা দেবৈর্যজ্ঞাঙ্গং তদ্বিনাশিতম্॥ ১-৯২-৪৭ (৪০১২)
অন্যানি চ মহাতেজা যজ্ঞাঙ্গান্যসৃজৎপ্রভুঃ।
নিনায় চ তদা স্বর্গং ত্রিশঙ্কুং স মহাতপাঃ॥ ১-৯২-৪৮ (৪০১৩)
এতানি যস্য কর্মাণি তস্যাহং ভৃশমুদ্বিজে।
যথাঽসৌ ন দহেৎক্রুদ্ধস্তথাঽঽজ্ঞাপয় মাং বিভো॥ ১-৯২-৪৯ (৪০১৪)
তেজসা নির্দহেল্লোকান্কম্পয়েদ্ধরণীং পদা।
সংক্ষিপেচ্চ মহামেরুং তূর্ণমাবর্তয়েদ্দিশঃ॥ ১-৯২-৫০ (৪০১৫)
তাদৃশং তপসা যুক্তং প্রদীপ্তমিব পাবকম্।
কথমস্মদ্বিধা নারী জিতেন্দ্রিয়মভিস্পৃশেৎ॥ ১-৯২-৫১ (৪০১৬)
হুতাশনমুখং দীপ্তং সূর্যচন্দ্রাক্ষিতারকম্।
কালজিহ্বং সুরশ্রেষ্ঠ কথমস্মদ্বিধা স্পৃশেৎ॥ ১-৯২-৫২ (৪০১৭)
যমশ্চ সোমশ্চ মহর্ষয়শ্চ
সাধ্যা বিশ্বে বালস্বিল্যাশ্চ সর্বে।
এতেঽপি যস্যোদ্বিজন্তে প্রভাবা-
ত্তস্মাৎকস্মান্মাদৃশী নোদ্বিজেত॥ ১-৯২-৫৩ (৪০১৮)
ৎবয়ৈবমুক্তা চ কথং সমীপ-
মৃষের্ন গচ্ছেয়মহং সুরেন্দ্র।
রক্ষাং চ মে চিন্তয় দেবরাজ
যথা ৎবদর্থং রক্ষিতাঽহং চরেয়ম্॥ ১-৯২-৫৪ (৪০১৯)
কামং তু মে মারুতস্তত্র বাসঃ
প্রক্রীডিতায়া বিবৃণোতু দেব।
ভবেচ্চ মে মন্মথস্তত্র কার্যে
সহায়ভূতস্তু তব প্রসাদাৎ॥ ১-৯২-৫৫ (৪০২০)
বনাচ্চ বায়ুঃ সুরভিঃ প্রবায়া-
ত্তস্মিন্কালে তমৃষিং লোভয়ন্ত্যাঃ।
তথেত্যুক্ৎবা বিহিতে চৈব তস্মিং-
স্ততো যয়ৌ সাঽঽশ্রমং কৌশিকস্য॥ ॥ ১-৯২-৫৬ (৪০২১)

ইতি শ্রীমন্মহাভারতে আদিপর্বণি সংভবপর্বণি দ্বিনবতিতমোঽধ্যায়ঃ॥ ৯২ ॥

Mahabharata – Adi Parva – Chapter Footnotes

১-৯২-২৩ হসতী হসন্তী॥ ১-৯২-৩০ অভ্যচোদয়ৎ পৃষ্টবান্॥ ১-৯২-৪৩ বভার পোষিতবান্। মতঙ্গস্ত্রিশঙ্কুঃ॥ ১-৯২-৪৪ আশ্রমমভ্যেত্য তপস্তপ্ৎবেতি শেষঃ। নদ্যাঃ কৌশিক্যাঃ॥ ১-৯২-৪৯ তস্য তস্মাৎ॥ ১-৯২-৫০ আবর্তয়েদেকীকুর্যাৎ॥ ১-৯২-৫২ সূর্যচন্দ্রাবেবাক্ষ্ণোঃ সংবন্ধিনী তারকে যস্য তাবপি ভ্রূভঙ্গমাত্রেণ স্রষ্টুং সমর্থ ইত্যর্থঃ॥ ১-৯২-৫৫ প্রক্রীডিতায়াঃ প্রকৃষ্টং ক্রীডিতং যস্যাঃ। বিবৃণোতু অপসারয়তু॥ দ্বিনবতিতমোঽধ্যায়ঃ॥ ৯২ ॥