আদিপর্ব – অধ্যায় ০৮৯
॥ শ্রীঃ ॥
১.৮৯. অধ্যায়ঃ ০৮৯
Mahabharata – Adi Parva – Chapter Topics
শকুন্তলোপাখ্যানারম্ভঃ॥ ১ ॥
Mahabharata – Adi Parva – Chapter Text
১-৮৯-০ (৩৮৬৪)
জনমেজয় উবাচ। ১-৮৯-০x (৫৬৭)
ভগবন্বিস্তরেণেহ ভরতস্য মহাত্মনঃ।
জন্ম কর্ম চ সুশ্রূষোস্তন্মে শংসিতুমর্হসি॥ ১-৮৯-১ (৩৮৬৫)
বৈশম্পায়ন উবাচ। ১-৮৯-২x (৫৬৮)
পৌরবাণাং বংশকরো দুষ্যন্তো নাম বীর্যবান্।
পৃথিব্যাশ্চতুরন্তায়া গোপ্তা ভরতসত্তম॥ ১-৮৯-২ (৩৮৬৬)
চতুর্ভাগং ভুবঃ কৃৎস্নং যো ভুঙ্ক্তে মনুজেশ্বরঃ।
সমুদ্রাবরণাংশ্চাপি দেশান্স সমিতিংজয়ঃ॥ ১-৮৯-৩ (৩৮৬৭)
আম্লেচ্ছাবধিকান্সর্বান্স ভুঙ্ক্তে রিপুমর্দনঃ।
রত্নাকরসমুদ্রান্তাংশ্চাতুর্বর্ণ্যজনাবৃতান্॥ ১-৮৯-৪ (৩৮৬৮)
ন বর্ণসঙ্করকরো ন কৃষ্যাকরকৃজ্জনঃ।
ন পাপকৃৎকশ্চিদাসীত্তস্মিন্রাজনি শাসতি॥ ১-৮৯-৫ (৩৮৬৯)
ধর্মে রতিং সেবমানা ধর্মার্থাবভিপেদিরে।
তদা নরা নরব্যাঘ্র তস্মিঞ্জনপদেশ্বরে॥ ১-৮৯-৬ (৩৮৭০)
নাসীচ্চোরভয়ং তাত ন ক্ষুধাভয়মণ্বপি।
নাসীদ্ব্যাধিভয়ং চাপি তস্মিঞ্জনপদেশ্বরে॥ ১-৮৯-৭ (৩৮৭১)
স্বধর্মৈ রেমিরে বর্ণা দৈবে কর্মণি নিঃস্পৃহাঃ।
তমাশ্রিত্য মহীপালমাসংশ্চৈবাকুতোভয়াঃ॥ ১-৮৯-৮ (৩৮৭২)
কালবর্ষী চ পর্জন্যঃ সস্যানি রসবন্তি চ।
সর্বরত্নসমৃদ্ধা চ মহী পশুমতী তথা॥ ১-৮৯-৯ (৩৮৭৩)
স্বকর্মনিরতা বিপ্রা নানৃতং তেষু বিদ্যতে।
স চাদ্ভুতমহাবীর্যো বজ্রসংহননো যুবা॥ ১-৮৯-১০ (৩৮৭৪)
উদ্যম্য মন্দরং দোর্ভ্যাং বহেৎসবনকাননম্।
চতুষ্পথগদায়ুদ্ধে সর্বপ্রহরণেষু চ॥ ১-৮৯-১১ (৩৮৭৫)
নাগপৃষ্ঠেঽশ্বপৃষ্ঠে চ বভূব পরিনিষ্ঠতঃ।
বলে বিষ্ণুসমশ্চাসীত্তেজসা ভাস্করোপমঃ॥ ১-৮৯-১২ (৩৮৭৬)
অক্ষোভ্যৎবেঽর্ণবসমঃ সহিষ্ণুৎবে ধরাসমঃ।
সংমতঃ স মহীপালঃ প্রসন্নপুররাষ্ট্রবান্॥ ১-৮৯-১৩ (৩৮৭৭)
ভূয়ো ধর্মপরৈর্ভাবৈর্মুদিতং জনমাদিশৎ॥ ॥ ১-৮৯-১৪ (৩৮৭৮)
ইতি শ্রীমন্মহাভারতে আদিপর্বণি সংভবপর্বণি একোননবতিতমোঽধ্যায়ঃ॥ ৮৯ ॥
Mahabharata – Adi Parva – Chapter Footnotes
১-৮৯-৫ ন কৃষ্যাকরকৃৎ কৃষিকৃন্ন ভুবোঽকৃষ্টপচ্যৎবাৎ। আকরঃ সুবর্ণাদিধাতূৎপত্তিস্থানং তত্রাপি যত্নং ন করোতি পৃথিব্যা রত্নৈর্ধাতুভিশ্চ পূর্ণৎবাৎ॥ ১-৮৯-৮ দৈবে কর্মণি বৃষ্ট্যাদ্যর্থে কারীর্যাদিকাম্যকর্মণি॥ ১-৮৯-৯ তদেবাহ কালেতি॥ ১-৮৯-১০ বজ্রসংহননো দৃঢদেহঃ॥ ১-৮৯-১১ সবনকাননং বনং জলমুপবনং বা॥ ১-৮৯-১৪ আদিশৎ শশাস॥ একোননবতিতমোঽধ্যায়ঃ॥ ৮৯ ॥