আদিপর্ব – অধ্যায় ০৪৪
॥ শ্রীঃ ॥
১.৪৪. অধ্যায়ঃ ০৪৪
Mahabharata – Adi Parva – Chapter Topics
পরীক্ষিন্মরণোত্তরং তৎপুত্রস্য জনমেজয়স্য রাজ্যাভিষেকঃ॥ ১ ॥ বপুষ্টমাবিবাহঃ॥ ২ ॥
Mahabharata – Adi Parva – Chapter Text
১-৪৪-০ (১৯৩০)
সৌতিরুবাচ। ১-৪৪-০x (২১৬)
তং তথা মন্ত্রিণো দৃষ্ট্বা ভোগেন পরিবেষ্টিতম্।
বিষণ্ণবদনাঃ সর্বে রুরুদুর্ভৃশদুঃখিতাঃ॥ ১-৪৪-১ (১৯৩১)
তং তু নাগং ততো দৃষ্ট্বা মন্ত্রিণস্তে প্রদুদ্রুবুঃ।
অপশ্যন্ত তথা যান্তমাকাশে নাগমদ্ভুতম্॥ ১-৪৪-২ (১৯৩২)
সীমন্তমিব কুর্বাণং নভসঃ পদ্মবর্চসম্।
তক্ষকং পন্নগশ্রেষ্ঠং ভৃশং শোকপরায়ণাঃ॥ ১-৪৪-৩ (১৯৩৩)
ততস্তু তে তদ্গৃহমগ্নিনা বৃতং
প্রদীপ্যমানং বিষজেন ভোগিনঃ।
ভয়াৎপরিত্যজ্য দিশঃ প্রপেদিরে
পপাত তচ্চাশনিতাডিতং যথা॥ ১-৪৪-৪ (১৯৩৪)
ততো নৃপে তক্ষকতেজসাহতে
প্রয়ুজ্য সর্বাঃ পরলোকসৎক্রিয়াঃ।
শুচির্দিজো রাজপুরোহিতস্তদা
তথৈব তে তস্য নৃপস্য মন্ত্রিণঃ॥ ১-৪৪-৫ (১৯৩৫)
নৃপং শিশুং তস্য সুতং প্রচক্রিরে
সমেত্য সর্বে পুরবাসিনো জনাঃ।
নৃপং যমাহুস্তমমিত্রঘাতিনং
কুরুপ্রবীরং জনমেজয়ং জনাঃ॥ ১-৪৪-৬ (১৯৩৬)
স বাল এবার্যমতির্নৃপোত্তমঃ
সহৈব তৈর্মন্ত্রিপুরোহিতৈস্তদা।
শশাস রাজ্যং কুরুপুংগবাগ্রজো
যথাঽস্য বীরঃ প্রপিতামহস্তথা॥ ১-৪৪-৭ (১৯৩৭)
ততস্তু রাজানমমিত্রতাপনং
সমীক্ষ্য তে তস্য নৃপস্য মন্ত্রিণঃ।
সুবর্ণবর্মাণমুপেত্য কাশিপ
বপুষ্টমার্থং বরয়াংপ্রচক্রমুঃ॥ ১-৪৪-৮ (১৯৩৮)
ততঃ স রাজা প্রদদৌ বপুষ্টমাং
কুরুপ্রবীরায় পরীক্ষ্য ধর্মতঃ।
স চাপি তাং প্রাপ্য মুদা যুতোঽভব-
ন্ন চান্যনারীষু মনো দধে ক্বচিৎ॥ ১-৪৪-৯ (১৯৩৯)
সরঃসু ফুল্লেষু বনেষু চৈব
প্রসন্নচেতা বিজহার বীর্যবান্।
তথা স রাজন্যবরো বিজহ্রিবান্
যথোর্বশীং প্রাপ্য পুরা পুরূরবাঃ॥ ১-৪৪-১০ (১৯৪০)
বপুষ্টমা চাপি বরং পতিব্রতা
প্রতীতরূপা সমবাপ্য ভূপতিম্।
ভাবেন রামা রময়াংবভূব তং
বিহারকালেষ্ববরোধসুন্দরী॥ ॥ ১-৪৪-১১ (১৯৪১)
ইতি শ্রীমন্মহাভারতে আদিপর্বণি আস্তীকপর্বণি চতুশ্চৎবারিংশোঽধ্যায়ঃ॥ ৪৪ ॥
Mahabharata – Adi Parva – Chapter Footnotes
১-৪৪-২ দহ্যমানং ততো দৃষ্ট্বা ইতি পাঠান্তরম্॥ ১-৪৪-৭ প্রপিতামহো যুধিষ্ঠিরঃ॥ ১-৪৪-৮ বপুষ্টমা কাশিরাজকন্যা॥ ১-৪৪-১১ বরং বরণীয়ম্। প্রতীতরূপা হৃষ্টরূপা॥ চতুশ্চৎবারিংশোঽধ্যায়ঃ॥ ৪৪ ॥