আদিপর্ব – অধ্যায় ০৩৪

আদিপর্ব – অধ্যায় ০৩৪

॥ শ্রীঃ ॥

১.৩৪. অধ্যায়ঃ ০৩৪

Mahabharata – Adi Parva – Chapter Topics

ইন্দ্রস্য গরুডসখ্যলাভঃ॥ ১ ॥ ইন্দ্রাদ্গরুডস্য বরলাভঃ॥ ২ ॥ বিনতায়া দাস্যমোচনম্॥ ৩ ॥ সর্পাণাং দ্বিজিহ্বৎবপ্রাপ্তিঃ॥ ৪ ॥

Mahabharata – Adi Parva – Chapter Text

১-৩৪-০ (১৬৩১)
সৌতিরুবাচ। ১-৩৪-০x (১৪৯)
`ইত্যেবমুক্তো গরুডঃ প্রত্যুবাচ শচীপতিম্’। ১-৩৪-১ (১৬৩২)
গরুড উবাচ।
সখ্যং মেঽস্তু ৎবয়া দেব যথেচ্ছসি পুরংদর।
বলং তু মম জানীহি মহচ্চাসহ্যমেব চ॥ ১-৩৪-১x (১৫০)
কামং নৈতৎপ্রশংসন্তি সন্তঃ স্ববলসংস্তবম্।
`অনিমিত্তং সুরশ্রেষ্ঠ সদ্যঃ প্রাপ্নোতি গর্হণাম্॥ ১-৩৪-২ (১৬৩৩)
গুণসংকীর্তনং চাপি পৃষ্টেনান্যেন গোপতে।
বক্তব্যং ন তু বক্তব্যং স্বয়মেব শতক্রতো॥’ ১-৩৪-৩ (১৬৩৪)
সখেতি কৃৎবা তু সখে পৃষ্টো বক্ষ্যাম্যহং ৎবয়া।
ন হ্যাত্মস্তবসংয়ুক্তং বক্তব্যমনিমিত্ততঃ॥ ১-৩৪-৪ (১৬৩৫)
সপর্বতবনামুর্বীং সসাগরজলামিমাম্।
বহে পক্ষেণ বৈ শক্র ৎবামপ্যত্রাবলম্বিনম্॥ ১-৩৪-৫ (১৬৩৬)
সর্বান্সংপিণ্ডিতান্বাপি লোকান্সস্থাণুজঙ্গমান্।
বহেয়মপরিশ্রান্তো বিদ্ধীদং মে মহদ্বলম্॥ ১-৩৪-৬ (১৬৩৭)
সৌতিরুবাচ। ১-৩৪-৭x (১৫১)
ইত্যুক্তবচনং বীরং কিরীটী শ্রীমতাং বরঃ।
আহ শৌনক দেবেন্দ্রঃ সর্বলোকহিতঃ প্রভুঃ॥ ১-৩৪-৭ (১৬৩৮)
এবমেব যথাত্থ ৎবং সর্বং সংভাব্যতে ৎবয়ি।
সংগৃহ্যতামিদানীং মে সখ্যমত্যন্তমুত্তমম্॥ ১-৩৪-৮ (১৬৩৯)
ন কার্যং যদি সোমেন মম সোমঃ প্রদীয়তাম্।
অস্মাংস্তে হি প্রবাধেয়ুর্যেভ্যো দদ্যাদ্ভবানিমম্॥ ১-৩৪-৯ (১৬৪০)
গরুড উবাচ। ১-৩৪-১০x (১৫২)
কিংচিৎকারণমুদ্দিশ্য সোমোঽয়ং নীয়তে ময়া।
ন দাস্যামি সমাপাতুং সোমং কস্মৈচিদপ্যহম্॥ ১-৩৪-১০ (১৬৪১)
যত্রেমং তু সহস্রাক্ষ নিক্ষিপেয়মহং স্বয়ম্।
ৎবমাদায় ততস্তৃর্ণং হরেথাস্ত্রিদিবেশ্বর॥ ১-৩৪-১১ (১৬৪২)
শক্র উবাচ। ১-৩৪-১২x (১৫৩)
বাক্যেনানেন তুষ্টোঽহং যত্ৎবয়োক্তমিহাণ্ডজ।
যমিচ্ছসি বরং মত্তস্তং গৃহাণ খগোত্তম॥ ১-৩৪-১২ (১৬৪৩)
সৌতিরুবাচ। ১-৩৪-১৩x (১৫৪)
ইত্যুক্তঃ প্রত্যুবাচেদং কদ্রূপুত্রাননুস্মরন্।
ভবেয়ুর্ভুজগাঃ শক্র মম ভক্ষ্যা মহাবলাঃ॥ ১-৩৪-১৩ (১৬৪৪)
গরুড উবাচ। ১-৩৪-১৪x (১৫৫)
ঈশোঽহমপি সর্বস্য করিষ্যামি তু তেঽর্থিতাম্।
ভবেয়ুর্ভুজগাঃ শক্র মম ভক্ষ্যা মহাবলাঃ॥ ১-৩৪-১৪ (১৬৪৫)
সৌতিরুবাচ। ১-৩৪-১৫x (১৫৬)
তথেত্যুক্ৎবাঽন্বগচ্ছত্তং ততো দানবসূদনঃ।
দেবদেবং মহাত্মানং যোগিনামীশ্বরং হরিম্॥ ১-৩৪-১৫ (১৬৪৬)
স চান্বমোদত্তং চার্থং যথোক্তং গরুডেন বৈ।
ইদং ভূয়ো বচঃ প্রাহ ভগবাংস্ত্রিদশেশ্বরঃ॥ ১-৩৪-১৬ (১৬৪৭)
হরিষ্যামি বিনিক্ষিপ্তং সোমমিত্যনুভাষ্য তম্।
আজগাম ততস্তূর্ণং সুপর্ণী মাতুরন্তিকম্॥ ১-৩৪-১৭ (১৬৪৮)
`বিনয়াবনতো ভূৎবা বচনং চেদমব্রবীৎ।
ইদমানীতমমৃতং দেবানাং ভবনান্ময়া॥ ১-৩৪-১৮ (১৬৪৯)
প্রশাধি কিমিতো মাতঃ করিষ্যামি শুভব্রতে। ১-৩৪-১৯ (১৬৫০)
বিনতোবাচ।
পরিতুষ্টাঽহমেতেন কর্মণা তব পুত্রক॥ ১-৩৪-১৯x (১৫৭)
অজরশ্চাভরশ্চৈব দেবানাং সুপ্রিয়ো ভব। ১-৩৪-২০ (১৬৫১)
সৌতিরুবাচ।’
অথ সর্পানুবাচেদং সর্বান্পরমহৃষ্টবৎ। ১-৩৪-২০x (১৫৮)
গরুড উবাচ।
ইদমানীতমমৃতং নিক্ষেপ্স্যামি কুশেষু বঃ॥ ১-৩৪-২০x (১৫৯)
স্নাতা মঙ্গলসংয়ুক্তাস্ততঃ প্রাশ্নীত পন্নগাঃ।
ভবদ্ভিরিদমাসীনৈর্যদুক্তং তদ্বচস্তদা॥ ১-৩৪-২১ (১৬৫২)
অদাসী চৈব মাতেয়মদ্যপ্রভৃতি চাস্তু মে।
যথোক্তং ভবতামেতদ্বচো মে প্রতিপাদিতম্॥ ১-৩৪-২২ (১৬৫৩)
সৌতিরুবাচ। ১-৩৪-২৩x (১৬০)
ততঃ স্নাতুং গতাঃ সর্পাঃ প্রত্যুক্ৎবা তং তথেত্যুত।
শক্রোঽপ্যমৃতমাক্ষিপ্য জগাম ত্রিদিবং পুনঃ॥ ১-৩৪-২৩ (১৬৫৪)
অথাগতাস্তমুদ্দেশং সর্পাঃ সোমার্থিনস্তদা।
স্নাতাশ্চ কুতজপ্যাশ্চ প্রহৃষ্টাঃ কৃতমঙ্গলাঃ॥ ১-৩৪-২৪ (১৬৫৫)
`পরস্পরকৃতদ্বেষাঃ সোমপ্রাশনকর্মণি।
অহং পূর্বমহং পূর্বমিত্যুক্ৎবা তে সমাদ্রবন্॥’ ১-৩৪-২৫ (১৬৫৬)
যত্রৈতদমৃতং চাপি স্থাপিতং কুশসংস্তরে।
তদ্বিজ্ঞায় হৃতং সর্পাঃ প্রতিমায়াকৃতং চ তৎ॥ ১-৩৪-২৬ (১৬৫৭)
সোমস্থানমিদং চেতি দর্ভাংস্তে লিলিহুস্তদা।
ততো দ্বিধা কৃতা জিহ্বাঃ সর্পাণাং তেন কর্মণা॥ ১-৩৪-২৭ (১৬৫৮)
অভবংশ্চামৃতস্পর্শাদ্দর্ভাস্তেঽথ পবিত্রিণঃ।
`নাগাশ্চ বঞ্চিতা ভূৎবা বিসৃজ্য বিনতাং ততঃ।
বিষাদমগমংস্তীব্রং গরুডস্য বলাৎপ্রভো॥’ ১-৩৪-২৮ (১৬৫৯)
এবং তদমৃতং তেন হৃতমাহৃতমেব চ।
দ্বিজিহ্বাশ্চ কৃতাঃ সর্পা গরুডেন মহাত্মনা॥ ১-৩৪-২৯ (১৬৬০)
ততঃ সুপর্ণঃ পরমপ্রহর্ষবা-
ন্বিহৃত্য মাত্রা সহ তত্র কাননে।
ভুজংগভক্ষঃ পরমার্চিতঃ খগৈ-
রহীনকীর্তির্বিনতামনন্দয়ৎ॥ ১-৩৪-৩০ (১৬৬১)
ইমাং কথাং যঃ শৃণুয়ান্নরঃ সদা
পঠেত বা দ্বিজগণমুখ্যসংসদি।
অসংশয়ং ত্রিদিবমিয়াৎস পুণ্যভা-
ঙ্মহাত্মনঃ পতগপতেঃ প্রকীর্তনাৎ॥ ॥ ১-৩৪-৩১ (১৬৬২)

ইতি শ্রীমন্মহাভারতে আদিপর্বণি আস্তীকপর্বণি চতুস্ত্রিংশোঽধ্যায়ঃ॥ ৩৪ ॥

Mahabharata – Adi Parva – Chapter Footnotes

১-৩৪-৬ সংপিণ্ডিতান্ একীকৃতান্। স্থাণু স্থাবরম্॥ ১-৩৪-৭ কিরীটী ইন্দ্রঃ॥ ১-৩৪-১৩ উপধিকৃতং ছলকৃতম্॥ ১-৩৪-১৪ ঈশঃ সমর্থঃ। অর্থিতাং অন্যস্মৈ অমৃতং ন দেয়মিত্যর্থেপ্সুতাম্॥ ১-৩৪-১৭ অনুভাষ্য হে গরুডেতি সংবোধ্য॥ ১-৩৪-২০ ইদং বঃ যুষ্মাকমমৃতং ন তু মম॥ ১-৩৪-২৬ প্রতিমায়াকৃতং যথা দাস্যং মায়াকৃতং তথা অমৃতদানমপি ইতরেণ কৃতমিত্যর্থঃ॥ চতুস্ত্রিংশোঽধ্যায়ঃ॥ ৩৪ ॥