আদিপর্ব – অধ্যায় ০১৪
॥ শ্রীঃ ॥
১.১৪. অধ্যায়ঃ ০১৪
Mahabharata – Adi Parva – Chapter Topics
বাসুকিভগিন্যা জরৎকারোর্বিবাহঃ॥ ১ ॥
Mahabharata – Adi Parva – Chapter Text
১-১৪-০ (১১১৩)
সৌতিরুবাচ। ১-১৪-০x (৬৭)
ততো নিবেশায় তদা স বিপ্রঃ সংশিতব্রতঃ।
মহীং চচার দারার্থী ন চ দারানবিন্দত॥ ১-১৪-১ (১১১৪)
স কদাচিদ্বনং গৎবা বিপ্রঃ পিতৃবচঃ স্মরন্।
চুক্রোশ কন্যাভিক্ষার্থী তিস্রো বাচঃ শনৈরিব॥ ১-১৪-২ (১১১৫)
তং বাসুকিঃ প্রত্যগৃহ্ণাদুদ্যম্য ভগিনীং তদা।
ন স তাং প্রতিজগ্রাহ ন সনাম্নীতি চিন্তয়ন্॥ ১-১৪-৩ (১১১৬)
সনাম্নীং চোদ্যতাং ভার্যাং গৃহ্ণীয়ামিতি তস্য হি।
মনো নিবিষ্টমভবজ্জরৎকারোর্মহাত্মনঃ॥ ১-১৪-৪ (১১১৭)
তমুবাচ মহাপ্রাজ্ঞো জরৎকারুর্মহাতপাঃ।
কিংনাম্নী ভগিনীয়ং তে ব্রূহি সত্যং ভুজংগম॥ ১-১৪-৫ (১১১৮)
বাসুকিরুবাচ। ১-১৪-৬x (৬৮)
জরৎকারো জরৎকারুঃ স্বসেয়মনুজা মম।
প্রতিগৃহ্ণীষ্ব ভার্যার্থে ময়া দত্তাং সুমধ্যমাম্।
ৎবদর্থং রক্ষিতা পূর্বং প্রতীচ্ছেমাং দ্বিজোত্তম॥ ১-১৪-৬ (১১১৯)
সৌতিরুবাচ। ১-১৪-৭x (৬৯)
এবমুক্ৎবা ততঃ প্রাদাদ্ভার্যার্থে বরবর্ণিনীম্।
স চ তাং প্রতিজগ্রাহ বিধিদৃষ্টেন কর্মণা॥ ॥ ১-১৪-৭ (১১২০)
ইতি শ্রীমন্মহাভারতে আদিপর্বণি আস্তীকপর্বণি চতুর্দশোঽধ্যায়ঃ॥ ১৪ ॥
Mahabharata – Adi Parva – Chapter Footnotes
১-১৪-১ নিবেশায় দারসংগ্রহায়॥ চতুর্দশোঽধ্যায়ঃ॥ ১৪ ॥