সৌপ্তিকপর্ব – অধ্যায় ০৬

সৌপ্তিকপর্ব – অধ্যায় 006
॥ শ্রীঃ ॥
10.6. অধ্যায়ঃ 006
Mahabharata – Sauptika Parva – Chapter Topics
অশ্বত্থাম্নঃ শিবিরদ্বারস্থমহাভূতদর্শনম্॥ 1 ॥ ভূতজিগীষয়া দ্রৌণিবিসৃষ্টানামস্ত্রশস্ত্রাণাং ভূতেন গ্রসনম্॥ 2 ॥ ততশ্চিংতাতান্তশ্চ দ্রৌণের্মহাদেবোপাসনাধ্যবসায়ঃ॥ 3 ॥
Mahabharata – Sauptika Parva – Chapter Text

10-6-0(64168)
ধৃতরাষ্ট্র উবাচ। 10-6-0x(5270)
দ্বারদেশে ততো দ্রৌণিমবস্থিতমবেক্ষ্য তৌ।
অকুর্বতাং ভোজকৃপৌ কিং সঞ্জয় বদস্ব মে॥ 10-6-1(64169)
স়ঞ্জয় উবাচ। 10-6-2x(5271)
কৃতবর্মাণমামন্ত্র্য কৃপং চ স মহারথঃ।
দ্রৌণির্মন্যুপরীতাত্মা শিবিরদ্বারমাসদৎ॥ 10-6-2(64170)
তত্র ভূতং মহাকায়ং চন্দ্রার্কসদৃশদ্যুতিম্।
সোঽপশ্যদ্দ্বারমাবৃত্য তিষ্ঠন্তং রোমহর্ষণম্॥ 10-6-3(64171)
বসানং চর্ম বৈয়াঘ্রং বসারুধিরবিস্রবম্।
কৃষ্ণাজিনোত্তরাসঙ্গং নাগয়জ্ঞোপবীতিনম্॥ 10-6-4(64172)
বাহুভিঃ স্বায়তৈর্ভীমৈর্নানাপ্রহরণোদ্যতৈঃ।
বদ্ধাঙ্গদমহাসর্পং জ্বালামালাকুলাননম্॥ 10-6-5(64173)
দংষ্ট্রাকরালবদনং ব্যাদিতাস্যং ভয়ানকম্।
নয়নানাং সহস্রৈশ্চ বিচিত্রৈরভিভূষিতম্॥ 10-6-6(64174)
নৈব তস্য বপুঃ শক্যং প্রবক্তুং বেষ এব চ।
সর্বথা তু তদালক্ষ্য স্ফুটেয়ুরপি পর্বতাঃ॥ 10-6-7(64175)
তস্যাস্যনাসিকাভ্যাং চ শ্রবণাভ্যাং চ সর্বশঃ।
তেভ্যশ্চাক্ষিসহস্রেভ্যঃ প্রাদুরাসন্মহার্চিষঃ॥ 10-6-8(64176)
তথা তেজোমরীচিভ্যঃ শঙ্খচক্রগদাধরাঃ।
প্রাদুরাসন্হৃষীকেশাঃ শতশোঽথ সহস্রশঃ॥ 10-6-9(64177)
তদত্যদ্ভুতমালোক্য ভূতং লোকভয়ঙ্করম্।
দ্রৌণিরব্যথিতো দিব্যৈরস্ত্রবর্ষৈরবাকিরৎ॥ 10-6-10(64178)
দ্রৌণিমুক্তাঞ্ছরাংস্তাংস্তু তদ্ভূতং মহদগ্রসৎ।
উদধেরিব বার্যোঘান্পাবকো বডবামুখঃ॥ 10-6-11(64179)
অশ্বত্থামা তু সম্প্রেক্ষ্য শরৌঘাংস্তান্নিরর্থকান্।
রথশক্তিং মুমোচাস্মৈ দীপ্তামগ্নিশিখামিব॥ 10-6-12(64180)
সা তমাহত্য দীপ্তাগ্রা রথশক্তিরদীর্যত।
যুগান্তে সূর্যমাহত্য মহোল্কেব দিবশ্চ্যুতা॥ 10-6-13(64181)
অথ হেমৎসরুং দিব্যং খঙ্গমাকাশবর্চসম্॥
কোশাৎসমুদ্ববর্হাশু বিলাদ্দীপ্তমিবোরগম্॥ 10-6-14(64182)
ততঃ খঙ্গবরং ধীমান্ভূতায় প্রাহিণোত্তদা।
স তদাসাদ্য ভূতং বৈ বিলয়ং তূলবদ্যযৌ॥ 10-6-15(64183)
ততঃ স কুপিতো দ্রৌণিরিন্দ্রকেতুনিভাং গদাম্।
জ্বলন্তীং প্রাহিণোত্তস্মৈ ভূতং তামপি চাগ্রসৎ॥ 10-6-16(64184)
ততঃ সর্বায়ুধাভাবে বীক্ষমাণস্ততস্ততঃ।
অপশ্যৎকৃতমাকাশমনাকাশং জনার্দনৈঃ॥ 10-6-17(64185)
তদদ্ভুততমং দৃষ্ট্বা দ্রোণপুত্রো নিরায়ুধঃ।
অচিন্তয়ৎসুসন্ত্রস্তঃ কৃপভোজবচঃ স্মরন্॥ 10-6-18(64186)
ব্রুবতামপ্রিয়ং পথ্যং সুহৃদাং ন শৃমোতি যঃ।
স শোচত্যাপদং প্রাপ্য থাঽহমবমত্য তৌ॥ 10-6-19(64187)
শাস্ত্রদৃষ্টানবিদ্বান্যঃ সমতীত্য জিঘাংসতি।
স পথঃ প্রচ্যুতো ধর্ম্যাৎকুপথে প্রতিহন্যতে॥ 10-6-20(64188)
গোব্রাহ্মণনৃপস্ত্রীষু সখ্যুর্মাতুর্গুরোস্তথা।
বৃদ্ধবালজডান্ধেষু সুপ্তভীতোত্থিতেষু চ॥ 10-6-21(64189)
মত্তোন্মত্তপ্রমত্তেষু ন শস্ত্রাণি চ মাতয়েৎ।
ইত্যেবং গুরুভিঃ পূর্বমুপদিষ্টং নৃণাং সদা॥ 10-6-22(64190)
সোঽহমুৎক্রম্য পন্থানং শাস্ত্রদৃষ্টং সনাতনম্।
অমার্গেণৈবমারভ্য ঘোরামাপদমাগতঃ॥ 10-6-23(64191)
তাং চাপদং ঘোরতরাং প্রবদন্তি মনীষিণঃ।
যদুদ্যম্য মহৎকৃত্যং ভয়াদপি নিবর্ততে॥ 10-6-24(64192)
অশক্যং চৈব কঃ কর্তুং শক্তঃ শক্তিবলাদিহ।
ন হি দৈবাদ্গরীয়ো বৈ মানুষ্যং কিঞ্চিদিষ্যতে॥ 10-6-25(64193)
মানুষ্যং কুর্বতঃ কর্ম যদি দৈবান্ন সিধ্যতি।
স পথঃ প্রচ্যুতো ধর্ম্যাদ্বিপদং প্রতিপদ্যতে॥ 10-6-26(64194)
প্রতিজ্ঞানং হ্যবিজ্ঞানং প্রবদন্তি মনীষিণঃ।
যদারভ্য ক্রিয়াং কাঞ্চিদ্ভয়াদিহ নিবর্ততে॥ 10-6-27(64195)
তদিদং দুষ্প্রণীতেন ভয়ং মা সমুপস্থিতম্।
ন হি দ্রোণসুতঃ সঙ্খ্যে নিবর্তেত কথঞ্চন॥ 10-6-28(64196)
ইদং চ সুমহদ্ভূতং দৈবদণ্ডমিবোদ্যতম্।
ন চৈতদভিজানামি চিন্তয়ন্নপি সর্বথা॥ 10-6-29(64197)
ধ্রুবং যেয়মধর্মেণ প্রহিতা কলুষা মতিঃ।
তস্যাঃ ফলমিদং ঘোরং প্রতিঘাতায় কল্পতে॥ 10-6-30(64198)
তদিদং দৈববিহিতং মম সঙ্খ্যে নিবর্তনম্।
নান্যত্র দৈবাদুদ্যন্তুমিহ শক্যং কথঞ্চন॥ 10-6-31(64199)
সোঽহমদ্য মহাদেবং প্রপদ্যে শরণং বিভুম্।
দৈবদণ্ডমিমং ঘোরং স হি মে নাশয়িষ্যতি॥ 10-6-32(64200)
কপর্দিনং প্রপদ্যেঽহং দেবদেবমুমাপতিম্।
কপালমালিনং রুদ্রং ভগনেত্রহরং হরম্॥ 10-6-33(64201)
স হি দেবোঽত্যগাদ্দেবাংস্তপসা বিক্রমেণ চ।
তস্মাচ্ছরণমভ্যেষ্যে গিরিশং শূলপাণিনম্॥ ॥ 10-6-34(64202)

ইতি শ্রীমন্মহাভারতে সৌপ্তিকপর্বণি ষষ্ঠোঽধ্যায়ঃ॥ 6 ॥

Mahabharata – Sauptika Parva – Chapter Footnotes
10-6-12 রথশক্তিং চক্রম্॥ 10-6-13 যুগ্মান্তে সূর্যমিতি ঝ.পাঠঃ তত্র যুগ্মান্তে মিথুনরাশেরন্তে অতিদীপ্তং ইত্যর্থঃ॥ 10-6-15 বিলং নকুলবদ্যযৌ ইতি ঝ.পাঠঃ॥ 10-6-17 অনাকাশং নিরবকাশম্॥ 10-6-6 ষষ্ঠোঽধ্যায়ঃ॥