স্ত্রীপর্ব – অধ্যায় 025

স্ত্রীপর্ব – অধ্যায় 025
॥ শ্রীঃ ॥
11.25. অধ্যায়ঃ 025
Mahabharata – Strii Parva – Chapter Topics
কৃষ্ণম্প্রতি গান্ধার্যা কুরুপাণ্ডবসংক্ষয়স্য কৃষ্ণোপেক্ষণহেতুকৎবকথনপূর্বকং সর্ববন্ধুসংক্ষয়ায় শাপদানম্॥ 1 ॥
Mahabharata – Strii Parva – Chapter Text

11-25-0(65516)
গান্ধার্যুবাচ। 11-25-0x(5360)
কাম্ভোজং পশ্য দুর্ধর্ষং কাম্ভোজাস্তরণোচিতম্।
শয়ানমৃষভস্কন্ধং হতং পাংসুষু মাধব॥ 11-25-1(65517)
অস্য ক্ষতজসন্দিগ্ধৌ বাহূ চন্দনরূষিতৌ।
অবেক্ষ্য কৃপণং ভার্যা বিলপত্যতিদুঃখিতা॥ 11-25-2(65518)
ইমৌ তৌ পরিঘপ্রখ্যৌ বাহূ চন্দনরূষিতৌ।
যয়োর্বিবরমাপন্নাং ন রতির্মাং পুরাঽজহাৎ॥ 11-25-3(65519)
কাং গতিং তু গমিষ্যামি ৎবয়া হীনা জনেশ্বর।
দূরবন্ধুরনাথা চ বেপন্তী মধুরস্বরা॥ 11-25-4(65520)
আতপে ক্লাম্যমানানাং বিবিধানামিব স্রুজাম্।
ক্লান্তানামপি নারীণাং জহাতি শ্রীর্ন বৈ তনূঃ॥ 11-25-5(65521)
শয়ানমভিতঃ শূরং কালিঙ্গং মধুসূদন।
পশ্য দীপ্তাঙ্গদয়ুতং প্রতিমানং ধনুষ্মতাম্॥ 11-25-6(65522)
মাগধানামধিপতিং জয়ৎসেনং জনার্দন।
পরিবার্য প্ররুদিতা মাগধ্যঃ পশ্য যোষিতঃ॥ 11-25-7(65523)
হরিণায়তনেত্রাণাং সুস্বরাণাং জনার্দন।
মনঃ শ্রুতিহরো নাদো মনো মোহয়তীব মে॥ 11-25-8(65524)
প্রকীর্ণবস্ত্রাভরণা রুদত্যঃ শোককর্শিতাঃ।
স্বাস্তীর্ণশয়নোপেতা মাগধ্যঃ শেরতে ভুবি॥ 11-25-9(65525)
কোসলানামধিপতিং রাজপুত্রং বৃহদ্বলম্।
ভর্তারং পরিবার্যৈতাঃ পৃথক্প্ররুদিতাঃ স্ত্রিয়ঃ॥ 11-25-10(65526)
অস্য গাত্রগতান্বাণান্কার্ষ্ণিবাহুবলেরিতান্।
উদ্ধরন্ত্যসুখাবিষ্টা মূর্চ্ছমানাঃ পুনঃ পুনঃ॥ 11-25-11(65527)
আসাং সর্বানবদ্যানামাতপেন পরিশ্রমাৎ।
প্রম্লাননলিনাভানি ভান্তি বক্ত্রাণি মাধব॥ 11-25-12(65528)
দ্রোণেন নিহতাঃ শূরা শেরতে রুচিরাঙ্গদাঃ।
ধৃষ্টদ্যুম্নসুতাঃ সর্বে শিশবো হেমমালিনঃ॥ 11-25-13(65529)
রথাগ্ন্যগারং চাপার্চিং শরশক্তিগদেন্ধনম্।
দ্রোণমাসাদ্য নির্দগ্ধাঃ শলভা ইব পাবকম্॥ 11-25-14(65530)
তথৈব নিহতাঃ শূরাঃ শেরতে রুচিরাঙ্গদাঃ।
দ্রোণেনাভিমুখাঃ সঙ্খ্যে ভ্রাতরঃ পঞ্চ কেকয়াঃ॥ 11-25-15(65531)
তপ্তকাঞ্চনবর্মাণস্তালধ্বজস্থব্রজাঃ।
ভাসয়ন্তি মহীং ভাসা জ্বলিতা ইব পাবকাঃ॥ 11-25-16(65532)
দ্রোণেন দ্রুপদং সঙ্খ্যে পশ্য মাধব পাতিতম্।
মহাদ্বিপমিবারণ্যে সিংহেন মহতা হতম্॥ 11-25-17(65533)
পাঞ্চালরাজ্ঞো বিমলং পুণ্ডরীকাক্ষ পাণ্ডুরম্।
আতপত্রং সমাভাতি শরদীব নিশাকরঃ॥ 11-25-18(65534)
এতাস্তু দ্রুপদং বৃদ্ধং স্নুষা ভার্যাশ্চ দুঃখিতাঃ।
দগ্ধ্বা গচ্ছন্তি পাঞ্চালরাজানমপসব্যতঃ॥ 11-25-19(65535)
ধৃষ্টকেতুং মহাত্মানং চেদিপুঙ্গবমঙ্গনাঃ।
দ্রোণেন নিহতং শূরং হরন্তি হৃতচেতসঃ॥ 11-25-20(65536)
দ্রোণাস্ত্রমভিহত্যৈষ বিমর্দে মধুসূদন।
মহেষ্বাসো হতঃ শেতে বজ্রাহত ইব দ্রুমঃ॥ 11-25-21(65537)
এষ চেদিপতিঃ শূরো ধৃষ্টকেতুর্মহারথঃ।
শেতে বিনিহতঃ সঙ্খ্যে হৎবা শত্রূন্সহস্রশঃ॥ 11-25-22(65538)
বিতুদ্যমানং বিহগৈস্তং ভার্যাঃ পর্যুপাশ্রিতাঃ।
চেদিরাজং হৃষীকেশ হতং সবলবান্ধবম্॥ 11-25-23(65539)
দাশার্হপুত্রজং বীরং শয়ানং সত্যবিক্রমম্।
আরোপ্যাঙ্কে রুদন্ত্যেতাশ্চেদিরাজ বরাঙ্গনাঃ॥ 11-25-24(65540)
অস্য পুত্রং হৃষীকেশ সুবক্ত্রং চারুকুণ্ডলম্।
দ্রোণেন সমরে পশ্য নিকৃত্তং বহুধা শরৈঃ॥ 11-25-25(65541)
পিতরং নূনমাজিস্থং যুধ্যমানং পরৈঃ সহ।
নাজহাৎপিতরং বীরমদ্যাপি মধুসূদন॥ 11-25-26(65542)
এবং মমাপি পুত্রস্য পুত্রঃ পিতরমন্বগাৎ।
দুর্যোধনং মহাবাহো লক্ষ্মণঃ পরবীরহা॥ 11-25-27(65543)
বিন্দানুবিন্দাবাবন্ত্যৌ পতিতৌ পশ্য মাধব।
হিমান্তে পুষ্পিতৌ শালৌ মরুতা গলিতাবিব॥ 11-25-28(65544)
কাঞ্চনাঙ্গদবর্মাণৌ বাণখঙ্গধনুর্ধরৌ।
ঋষভপ্রতিরূপাক্ষৌ শয়ানৌ বিমলস্রজৌ॥ 11-25-29(65545)
অবধ্যাঃ পাণ্ডবাঃ কৃষ্ণ সর্ব এব ৎবয়া সহ।
যে মুক্তা দ্রোণভীষ্মাভ্যাং কর্ণাদ্বৈকর্তনাৎকৃপাৎ॥ 11-25-30(65546)
দুর্যোধনাদ্দ্রোণসুতাৎসৈন্ধবাচ্চ জয়দ্রথাৎ।
সোমদত্তাদ্বিকর্ণাচ্চ শূরাচ্চ কৃতবর্মণঃ॥ 11-25-31(65547)
যে হন্যুঃ শস্ত্রবেগেন দেবানপি নরর্ষভাঃ।
ত ইমে নিহতাঃ সঙ্খ্যে পশ্য কালস্য পর্যযম্॥ 11-25-32(65548)
নাতিভারোঽস্তি দৈবস্য ধ্রুবং মাধব কশ্চন।
যদিমে নিহতাঃ শূরাঃ ক্ষত্রিয়ৈঃ ক্ষত্রিয়র্ষভাঃ।
`শূরাশ্চ কৃতবিদ্যাশ্চ মম পুত্রা মনস্বিনঃ’॥ 11-25-33(65549)
তদৈব নিহতাঃ কৃষ্ণ মম পুত্রাস্তরস্বিনঃ।
যদৈবাকৃতকামস্ৎবমুপপ্লাব্যং গতঃ পুনঃ॥ 11-25-34(65550)
শন্তনোশ্চৈব পুত্রেণ প্রাজ্ঞেন বিদুরেণ চ।
তদৈবোক্তাস্মি মা স্নেহং কুরুষ্বাত্মসুতেষ্বিতি॥ 11-25-35(65551)
তয়োর্হি দর্শনং নৈতন্মিথ্যা ভবিতুমর্হতি।
অচিরেণৈব মে পুত্রা ভস্মীভূতা জনার্দন॥ 11-25-36(65552)
বৈশম্পায়ন উবাচ। 11-25-37x(5361)
ইত্যুক্ৎবা ন্যপতদ্ভূমৌ গান্ধারী শোকমূর্চ্ছিতা।
দুঃখোপহতবিজ্ঞানা ধৈর্যমুৎসৃজ্য ভারত॥ 11-25-37(65553)
ততঃ কোপপরীতাঙ্গী পুত্রশোকপরিপ্লুতা।
জগাদ শৌরিং দোষেণ গান্ধারী ব্যথিতেন্দ্রিয়া॥ 11-25-38(65554)
গান্ধার্যুবাচ। 11-25-39x(5362)
পাণ্ডবাঃ ধার্তরাষ্ট্রাশ্চ ক্রুদ্ধাঃ কৃষ্ণ পরস্পরম্।
উপেক্ষিতা বিনশ্যন্তস্ৎবয়া কস্মাজ্জনার্দন ॥ 11-25-39(65555)
শক্তেন বহুভৃত্যেন বিপুলে তিষ্ঠতা বলে।
উভয়ত্র সমর্থেন শ্রুতবাক্যেন চৈব হ॥ 11-25-40(65556)
ইচ্ছতোপেক্ষিতো নাশঃ কুরূণাং মধুসূদন।
যস্মাত্ৎবয়া মহাবাহো ফলং তস্মাদবাপ্নুহি॥ 11-25-41(65557)
পতিশুশ্রূষয়া যন্মে তপঃ কিঞ্চিদুপার্জিতম্।
তেন ৎবাং দুরবাপেন শপে চক্রগদাধরম্॥ 11-25-42(65558)
যস্মাৎপরস্পরং ঘ্নন্তো জ্ঞাতয়ঃ কুরুপাণ্ডবাঃ।
উপেক্ষিতাস্তে গোবিন্দ তস্মাজ্জ্ঞাতীন্বধিষ্যসি॥ 11-25-43(65559)
ৎবমপ্যুপস্থিতে বর্ষে ষট্ত্রিংশে মধুসূদন।
হতজ্ঞাতির্হতামাত্যো হতপুত্রো বনেচরঃ॥ 11-25-44(65560)
অনাথবদবিজ্ঞাতো লোকেষ্বনভিলক্ষিতঃ।
কুৎসিতেনাভ্যুপায়েন নিধনং সমবাপ্স্যসি॥ 11-25-45(65561)
তবাপ্যেবং হতসুতা নিহতজ্ঞাতিবান্ধবাঃ।
স্ত্রিয়ঃ পরিপতিষ্যন্তি যথৈতা ভরতস্ত্রিয়ঃ॥ 11-25-46(65562)
বৈশম্পয়ন উবাচ। 11-25-47x(5363)
তচ্ছ্রুৎবা বচনং ঘোরং বাসুদেবো মহামনাঃ।
উবাচ দেবীং গান্ধারীমীষদভ্যুৎস্ময়ন্নিব॥ 11-25-47(65563)
জানেঽহমেতদপ্যেবং চীর্ণং চরসি ক্ষত্রিয়ে।
দৈবাদেব বিনশ্যন্তি বৃষ্ণয়ো নাত্র সংশয়ঃ॥ 11-25-48(65564)
সংহর্তা বৃষ্ণিচক্রস্য নান্যো মদ্বিদ্যতে শুভে।
অবধ্যাস্তে নরৈরন্যৈরপি বা দেবদানবৈঃ॥ 11-25-49(65565)
পরস্পরকৃতং নাশং যতঃ প্রাপ্স্যন্তি যাদবাঃ।
ইত্যুক্তবতি দাশার্হে পাণ্ডবাস্ত্রস্তচেতসঃ।
বভূবুর্ভৃশসংবিগ্না নিরাশাশ্চাপি জীবিতে॥ ॥ 11-25-50(65566)

ইতি শ্রীমন্মহাভারতে স্ত্রীপর্বণি স্ত্রীবিলাপপর্বণি পঞ্চবিংশোঽধ্যায়ঃ॥ 25 ॥

Mahabharata – Strii Parva – Chapter Footnotes
11-25-1 কাম্ভোজাস্তরণং কম্বলবিশেষঃ॥ 11-25-3 বাহূ শুভতলাঙ্গুলী ইতি ঝ.পাঠঃ॥ 11-25-6 দীপ্তাঙ্গদয়ুগপ্রতিনদ্ধমহাভুজমিতি ঝ.পাঠঃ॥ 11-25-24 দাশার্হপুত্রজমিত্যত্র পুত্র্যামপি পুত্রশব্দঃ॥ 11-25-26 পিতরমিতি পিতৃপদস্যাবৃত্তিঃ শোকাকুলৎবান্ন দোষায়॥ 11-25-36 তয়োর্ভীষ্মবিদুরয়োঃ দর্শনং অনাগতাবেক্ষণম্॥ 11-25-38 জগাদশৌরিং রোষণেতি ট.পাঠঃ॥ 11-25-47 অভ্যুৎস্ময়ন্নীষদ্ধ্বংসয়ন্॥ 11-25-48 চীর্ণং চরসি মদনুষ্টিতমেবানুতিষ্ঠসি। স্বতপোনাশার্থমিতি ভাবঃ॥ 11-25-25 পঞ্চবিংশোঽধ্যায়ঃ॥