স্ত্রীপর্ব – অধ্যায় 015

স্ত্রীপর্ব – অধ্যায় 015
॥ শ্রীঃ ॥
11.15. অধ্যায়ঃ 015
Mahabharata – Strii Parva – Chapter Topics
যুধিষ্ঠিরাদিভির্গান্ধারীকুন্ত্যোরভিবাদনম্॥ 1 ॥ সকুন্ত্যা গান্ধার্যা দ্রৌপদীসমাশ্বাসনম্॥ 2 ॥
Mahabharata – Strii Parva – Chapter Text

11-15-0(65199)
বৈশম্পায়ন উবাচ। 11-15-0x(5348)
তমেবমুক্ৎবা গান্ধারী যুধিষ্ঠিরমপৃচ্ছত।
ক্ব স রাজেতি সক্রোধা পুত্রপৌত্রবধার্দিতা॥ 11-15-1(65200)
তামভ্যগচ্ছৎকৌন্তেয়ো বেপমানঃ কৃতাঞ্জলিঃ।
যুধিষ্ঠিরস্তু গান্ধারীং মধুরং বাক্যমব্রবীৎ॥ 11-15-2(65201)
পুত্রহন্তা নৃশংসোঽহং তব দেবি যুধিষ্ঠিরঃ।
শাপার্হঃ পৃথিবীনাশে হেতুভূতঃ শপস্ব মাম্॥ 11-15-3(65202)
নহি মে জীবিতেনার্থো ন রাজ্যেন সুখেন বা।
তাদৃশান্সুহৃদো হৎবা প্রমূঢস্য সুহৃদ্দ্রুহঃ॥ 11-15-4(65203)
তমেবংবাদিনং ভীতং সন্নিকর্ষাগতং তদা।
নোবাচ কিঞ্চিদ্গান্ধারী নিঃশ্বাসপরমা নৃপ॥ 11-15-5(65204)
তস্মাবনতদেহস্য পাদয়োর্নিপতিষ্যতঃ।
যুধিষ্ঠিরস্য নৃপতের্ধর্মজ্ঞা দীর্ঘদর্শিনী॥ 11-15-6(65205)
অঙ্গুল্যগ্রাণি দদৃশে দেবী পট্টান্তরেণ সা।
ততঃ স কুনখীভূতো দর্শনীয়নখো নৃপঃ॥ 11-15-7(65206)
তং দৃষ্ট্বা চার্জুনোঽগচ্ছদ্বাসুদেবস্য পৃষ্ঠতঃ॥ 11-15-8(65207)
এবং সঞ্চেষ্টমানাংস্তানিতশ্চেতশ্চ ভারত।
গান্ধারী বিগতক্রোধা সাংৎবয়ামাস মাতৃবৎ॥ 11-15-9(65208)
তে পাণ্ডবা অনুজ্ঞাতা মাতরং বীতমৎসরাঃ।
অভ্যগচ্ছন্ত সহিতাঃ পৃথাং পৃথুবলক্ষসঃ॥ 11-15-10(65209)
চিরস্য দৃষ্ট্বা পুত্রান্সা পুত্রাধিভিরভিপ্লুতা।
বাষ্পমাহারয়দ্দেবী বস্ত্রেণাবৃত্য বৈ মুখম্॥ 11-15-11(65210)
ততো বাষ্পং সমুৎসৃজ্য সহ পুত্রৈস্তদা পৃথা।
অপশ্যদেনাঞ্শস্ত্রৌঘৈর্বহুধা পরিবিক্ষতান্॥ 11-15-12(65211)
সা তানেকৈকশঃ পুত্রান্সংস্পৃশন্তী পুনঃপুনঃ।
অন্বশোচত দুঃখার্তা দ্রৌপদীং নিহতাত্মজাম্।
রুদন্তীমথ পাঞ্চালীং দদর্শ পতিতাং ভুবি॥ 11-15-13(65212)
দ্রৌপদ্যুবাচ। 11-15-14x(5349)
আর্যে পৌত্রাস্তু তে সর্বে সৌভদ্রসহিতা গতাঃ।
ন ৎবাং তেঽদ্যাভিগচ্ছন্তি চিরং দৃষ্ট্বা অনিন্দিতে।
কিন্নু রাজ্যেন মে কার্যং বিহীনায়াঃ সুতৈর্বরৈঃ॥ 11-15-14(65213)
তাং সমাশ্বাসয়ামাস পৃথা পৃথললোচনা।
উত্থাপ্যাঙ্কেন সুদতীং রুদতীং শোককর্শিতাম্॥ 11-15-15(65214)
তয়ৈব সহিতা চাপি পুত্রৈরনুগতা পৃথা।
অভ্যগচ্ছত গান্ধারীমার্তামার্ততরা স্বয়ম্॥ 11-15-16(65215)
বৈশম্পায়ন উবাচ। 11-15-17x(5350)
তামুবাচাথ গান্ধারী সহ কুন্ত্যা যশস্বিনীম্।
মৈবং পুত্রীতি শোকার্তা পশ্য মামপি দুঃখিতাং॥ 11-15-17(65216)
মন্যে লোকবিনাশোঽয়ং কালপর্যায়নোদিতঃ।
অবশ্যভাবী সম্প্রাপ্তঃ স্বভাবাদ্রোমহর্ষণঃ॥ 11-15-18(65217)
ইদং তৎসমনুপ্রাপ্তং বিদুরস্য বচো মহৎ।
অসিদ্ধানুনয়ে কৃষ্ণে যদুবাচ মহামতিঃ॥ 11-15-19(65218)
তস্মিন্নপরিহার্যেঽর্থে ব্যতীতে চ বিশেষতঃ।
মা শুচো ন হি শোচ্যাস্তে সঙ্গ্রামে নিধনং গতাঃ॥ 11-15-20(65219)
যথৈবাহং তথৈব ৎবং কো বামাশ্বাসয়িষ্যতি।
মমৈব হ্যপরাধেন কুলমগ্র্যং বিনাশিতম্॥ ॥ 11-15-21(65220)

ইতি শ্রীমন্মহাভারতে স্ত্রীপর্বণি জলপ্রদানিকপর্বণি পঞ্চদশোঽধ্যায়ঃ॥ 15 ॥

Mahabharata – Strii Parva – Chapter Footnotes
11-15-7 কুনখীভূতো হস্তদেশ ইতি শেষঃ॥ 11-15-14 আর্যে পৌত্রা হতাঃ সর্বে ইতি ক.ছ.পাঠঃ॥ 11-15-21 বাং আবাম্॥ 11-15-15 পঞ্চদশোঽধ্যায়ঃ॥