আশ্রমবাসিকপর্ব – অধ্যায় 036

আশ্রমবাসিকপর্ব – অধ্যায় 036
॥ শ্রীঃ ॥
16.36. অধ্যায়ঃ 036
অথ পুত্রদর্শনপর্ব ॥ 2 ॥
Mahabharata – AshramaVasika Parva – Chapter Topics
ত্যক্তদেহানামপি কুরুপাণ্ডবপক্ষীয়াণাং কথং পুনরাগমনমিতি জনমেজয়প্রশ্নস্য সোপপত্তিকমুত্তরদানম্॥ 1 ॥
Mahabharata – AshramaVasika Parva – Chapter Text


সৌতিরুবাচ।

এতচ্ছ্রুৎবা নৃপো বিদ্বান্হৃষ্টোঽভূজ্জনমেজয়ঃ।
পিতামহানাং সর্বেষাং গমনাগমনং তদা॥ 16-36-1(98134)
অব্রবীচ্চ মুদা যুক্তঃ পুনরাগমনং প্রতি।
কথং ন ত্যক্তদেহানাং পুনস্তদ্রূপদর্শনম্॥ 16-36-2(98135)
ইত্যুক্তঃ স দ্বিজশ্রেষ্ঠো ব্যাসশিষ্যঃ প্রতাপবান্।
প্রোবাচ বদতাংশ্রেষ্ঠস্তং নৃপং জনমেজয়ম্॥ 16-36-3(98136)
বৈশম্পায়ন উবাচ। 16-36-4x(8061)
অবিপ্রণাশঃ সর্বেষাং কর্মণামিতি নিশ্চয়ঃ।
কর্মজানি শরীরাণি শরীরাকৃতয়স্তথা॥ 16-36-4(98137)
মহাভূতানি নিত্যানি ভূতাধিপতিসংশ্রয়াৎ।
তেষাং চ নিত্যসংবাসো ন বিনাশো বিয়ুজ্যতাম্॥ 16-36-5(98138)
অনাশয়া কৃতং কর্ম তস্য চেষ্টঃ ফলাগমঃ।
আত্মা চৈভিঃ সমায়ুক্তঃ সুখদুঃখমুপাশ্নুতে॥ 16-36-6(98139)
অবিনাশ্যস্তথা নিত্যং ক্ষেত্রজ্ঞ ইতি নিশ্চয়ঃ।
ভূতানামাত্মভাবো যো ধ্রুবোসৌ সংবিজানতাম্॥ 16-36-7(98140)
যাবন্ন ক্ষীয়তে কর্ম তাবত্তস্য স্বরূপতা।
ক্ষীণকর্মা নরো লোকে রূপান্যৎবমুপাশ্নুতে॥ 16-36-8(98141)
নানাভূতাস্তথৈকৎবং শরীরং প্রাপ্য সংহতাঃ।
ভবন্তি তে তথা নিত্যাঃ পৃথগ্ভাবং বিজানতাম্॥ 16-36-9(98142)
অশ্বমেধশ্রুতিশ্চেয়মশ্বসংজ্ঞপনং প্রতি।
লোকান্তরগতা নিত্যং প্রাণা নিত্যা হি বাজিনঃ॥ 16-36-10(98143)
অহং হিতং বদাম্যেতৎপ্রিয়ং চেত্তব পার্থিব।
দেবয়ানা হি পন্থানঃ শ্রুতাস্তে যজ্ঞসংস্তরে॥ 16-36-11(98144)
সুকৃতো যত্র যজ্ঞস্তে তত্র দেবা হিতাস্তব।
যদা সমন্বিতা দেবাঃ পশূনাং গমনেশ্বরাঃ॥ 16-36-12(98145)
গমিমন্তশ্চ তেনেষ্ট্বা নান্যে নিত্যা ভবন্ত্যুত।
নিত্যেঽস্মিন্পঞ্চকে বর্গে নিত্যে চাত্মনি পূরুষঃ॥ 16-36-13(98146)
অস্য নাশং সমায়োগং যঃ পশ্যতি বৃথামতিঃ।
বিয়োগে শোচতেঽত্যর্থং স বাল ইতি মে মতিঃ॥ 16-36-14(98147)
বিয়োগে দোষদর্শী যঃ সংয়োগং স বিসর্জয়েৎ।
অসঙ্গে সঙ্গমো নাস্তি দুঃখং ভাবি বিয়োগজম॥ 16-36-15(98148)
পরাপরজ্ঞস্ৎবপরো নাভিমানাদুদীক্ষিতঃ।
অপরজ্ঞঃ পরাং বুদ্ধিং স্পৃষ্ট্বা মোহাদ্বিমুচ্যতে॥ 16-36-16(98149)
অদর্শনাদাপতিতঃ পুনশ্চাদর্শনং গতঃ।
নাহং তং বেদ্মি নাসৌ মাং ন চ মেঽস্তি বিরাগতা॥ 16-36-17(98150)
যেনয়েন শরীরেণি করোত্যযমনীশ্বরঃ।
তেনতেন শরীরেণ তদবশ্যমুপাশ্নুতে।
মানসং মনসাঽঽপ্নোতি শরীরং চ শরীরবান্॥ ॥ 16-36-18(98151)

ইতি শ্রীমন্মহাভারতে আশ্রমবাসিকপর্বণি পুত্রদর্শনপর্বণি ষট্ত্রিংশোঽধ্যায়ঃ॥ 36 ॥

Mahabharata – AshramaVasika Parva – Chapter Footnotes
7-36-10 সংজ্ঞপনং মারণম্॥ 7-36-11 নাসৌ মানাদহঙ্কারান্ন চ বেতি বিরাগতামিতি ক.পাঠঃ॥