আশ্রমবাসিকপর্ব – অধ্যায় 015

আশ্রমবাসিকপর্ব – অধ্যায় 015
॥ শ্রীঃ ॥
16.15. অধ্যায়ঃ 015
অথাশ্রমবাসপর্ব ॥ 1 ॥
Mahabharata – AshramaVasika Parva – Chapter Topics
ধৃতরাষ্ট্রেণ ভীষ্মদুর্যোধনাদ্যুদ্দেশ্যকশ্রাদ্ধে ধনবস্রান্নাদিনা ব্রাহ্মণাদিসংতর্পণম্॥ 1 ॥
Mahabharata – AshramaVasika Parva – Chapter Text


বৈশম্পায়ন উবাচ।

বিদুরেণৈবমুক্তস্তু ধৃতরাষ্ট্রো জনাধিপঃ।
প্রীতিমানভবদ্রাজন্রাজ্ঞো জিষ্ণোশ্চ কর্মণা॥ 16-15-1(97620)
ততোঽভিরূপান্ভীষ্মায় ব্রাহ্মণানৃষিসত্তমান্।
পুত্রার্থে সুহৃদাং চৈব স সমীক্ষ্য সহস্রশঃ॥ 16-15-2(97621)
কারয়িৎবাঽন্নপানানি যানান্যাচ্ছাদনানি চ।
সুবর্ণমণিরত্নানি দাসীদাসপরিচ্ছদান্॥ 16-15-3(97622)
কংবলানি চ রত্নানি গ্রামান্ক্ষেত্রং তথা ধনম্।
সালঙ্কারান্গজানশ্বান্কন্যাশ্চৈব বরস্ত্রিয়ঃ॥ 16-15-4(97623)
আদিশ্যাদিশ্য সর্বেভ্যো দদৌ স নৃপসত্তমঃ।
দ্রোণং সংকীর্ত্য ভীষ্মং চ সোমদত্তং চ বাহ্লিকম্॥ 16-15-5(97624)
দুর্যোধনং চ রাজানং পুত্রাংশ্চৈব পৃথক্পৃথক্।
জয়দ্রথপুরোগাংশ্চ সুহৃদশ্চাপি সর্বশঃ॥ 16-15-6(97625)
স শ্রাদ্ধয়জ্ঞো ববৃতে বহুগোধনদক্ষিণঃ।
অনেকধনরত্নৌঘো যুধিষ্ঠিরমতে তদা॥ 16-15-7(97626)
অনিশং যত্র পুরুষা গণকা লেখকাস্তদা।
যুধিষ্ঠিরস্য বচনাদপৃচ্ছন্ত স্ম তং নৃপম্॥ 16-15-8(97627)
আজ্ঞাপয় কিমেতেভ্যঃ প্রদেয়ং দীয়তামিতি।
তদুপস্থিতমেবাত্র বচনান্তে দদুস্তদা॥ 16-15-9(97628)
শতে দেয়ে দশশতং সহস্রং চায়ুতং তথা।
দীয়তে বচনাদ্রাজ্ঞঃ কুন্তীপুত্রস্য ধীমতঃ॥ 16-15-10(97629)
এবং স বসুধারাভির্বর্ষমাণো নৃপাংবুদঃ।
তপ্রয়ামাস বিপ্রাংস্তান্বর্ষন্ভূমিমিবাংবুদঃ॥ 16-15-11(97630)
ততোঽন্তন্তরমেবাত্র সর্ববর্ণান্মহামতে।
অন্নপানরসৌঘেণ প্লাবয়ামাস পার্থিবঃ॥ 16-15-12(97631)
সবস্ত্রধনরত্নৌঘো মৃদঙ্গনিনদস্বনঃ।
গবাশ্বমকরাবর্তো নানারত্নমহাকরঃ॥ 16-15-13(97632)
গ্রামাগ্রহারদ্বীপাঢ্যো মণিহেমজলার্ণবঃ।
জগৎসংপ্লাবয়ামাস ধৃতরাষ্ট্রোডুপোদ্ধতঃ॥ 16-15-14(97633)
এবং স পুত্রপৌত্রাণাং পিতৄণামাত্মনস্তথা।
গান্ধার্যাশ্চ মহারাজ প্রদদাবৌর্দ্বদেহিকম্॥ 16-15-15(97634)
পরিশ্রান্তো যদাসীৎস দদদ্দানান্যনেকশঃ।
নিবর্তয়ামাস তদা দানয়জ্ঞং নরাধিপঃ॥ 16-15-16(97635)
এবং স রাজা কৌরব্যশ্চক্রে দানমহাক্রতুম্।
নটনর্তকলাস্যাঢ্যং বহ্বন্নরসদক্ষিণম্॥ 16-15-17(97636)
দশাহমেবং দানানি দত্ৎবা রাজাংঽবিকাসুতঃ।
বভূব পুত্রপৌত্রাণামনৃণো ভরতর্ষভ॥ ॥ 16-15-18(97637)

ইতি শ্রীমন্মহাভারতে আশ্রমবাসিকপর্বণি আশ্রমবাসপর্বণি পঞ্চদশোঽধ্যায়ঃ॥ 15 ॥

Mahabharata – AshramaVasika Parva – Chapter Footnotes
7-15-13 সবস্ত্রফেনরতৌঘ ইতি ক.থ.পাঠঃ॥