আশ্রমবাসিকপর্ব – অধ্যায় 001

আশ্রমবাসিকপর্ব – অধ্যায় 001
॥ শ্রীঃ ॥
16.1. অধ্যায়ঃ 001
অথাশ্রমবাসপর্ব ॥ 1 ॥
Mahabharata – AshramaVasika Parva – Chapter Topics
যুধিষ্ঠিরেণ রাজ্যপরিপালনম্॥ 1 ॥ কুন্তীদ্রৌপদ্যাদিভির্গান্ধার্যাং শ্বশ্রূবদ্বর্তনম্॥ 2 ॥ ভীমবর্জমর্জুনাদিভির্যুধিষ্ঠিরশাসনেন বিশেষতো ধৃতরাষ্ট্রানুবর্তনম্॥ 3 ॥
Mahabharata – AshramaVasika Parva – Chapter Text


শ্রীবেদব্যাসায় নমঃ।

নারায়ণং নমস্কৃত্য নরং চৈব নরোত্তমম্।
দেবীং সরস্বতীং ব্যাসং ততো জয়মুদীরয়েৎ॥ 16-1-1(97215)
জনমেজয় উবাচ। 16-1-1x(8029)
প্রাপ্য পৈতামহং রাজ্যং মম পূর্বপিতামহাঃ।
কথমাসন্মহারাজে ধৃতরাষ্ট্রে মহাত্মনি॥ 16-1-1(97216)
স তু রাজা হতামাত্যো হতপুত্রো নিরাশ্রয়ঃ।
কথমাসীদ্ধতৈশ্বর্যো গান্ধারী চ তপস্বিনী॥ 16-1-2(97217)
কিয়ন্তং চৈব কালং তে মম পূর্বপিতামহাঃ।
স্থিতা রাজ্যে মহাত্মানস্তন্মে ব্যাখ্যাতুমর্হসি॥ 16-1-3(97218)
বৈশম্পায়ন উবাচ। 16-1-4x(8030)
প্রাপ্য রাজ্যং মহাত্মানঃ পাণ্ডবা হতশত্রবঃ।
ধৃতরাষ্ট্রং পুরস্কৃত্য পৃথিবীং পর্যপালয়ন্॥ 16-1-4(97219)
ধৃতরাষ্ট্রমুপাতিষ্ঠদ্বিদুরঃ সংজয়স্তথা।
বৈশ্যাপুত্রশ্চ মেধাবী যুয়ুৎসুঃ কুরুসত্তম॥ 16-1-5(97220)
পাণ্ডবাঃ সর্বকার্যেষু পর্যপৃচ্চন্ত তং নৃপম্।
চক্রুস্তেনাভ্যনুজ্ঞাতা বর্ষাণি দশ পঞ্চ চ॥ 16-1-6(97221)
সদাঽভিগম্য তে বীরাঃ পর্যুপাসন্ত তং নৃপম্।
পাদাভিবাদনং কৃৎবা ধর্মিরাজমতে স্থিতাঃ॥ 16-1-7(97222)
তে মূর্ধ্নি সমুপাঘ্রাতাঃ সর্বকার্যাণি চক্রিরে।
কুন্তিভোজসুতা চৈব গান্ধারীমন্ববর্তত॥ 16-1-8(97223)
দ্রৌপদী চ সুভদ্রা চ যাশ্চান্যাঃ পাণ্ডবস্ত্রিয়ঃ।
সমাং বৃত্তিমবর্তন্ত তয়োঃ শ্বশ্র্বোর্যথাবিধি॥ 16-1-9(97224)
শয়নানি মহার্হাণি বাসাংস্যাভরণানি চ।
রাজার্হাণি চ সর্বাণি ভক্ষ্যভোজ্যান্যনেকশঃ॥ 16-1-10(97225)
যুধিষ্ঠিরো মহারাজ ধৃতরাষ্ট্রেঽভ্যুপাহরৎ।
তথৈব কুন্তী গান্ধার্যাং গুরুবৃত্তিমবর্তত॥ 16-1-11(97226)
বিদুরঃ সংজয়শ্চৈব যুয়ুৎসুশ্চৈব কৌরব।
উপাসতে স্ম তং বৃদ্ধং হতপুত্রং জনাধিপম্॥ 16-1-12(97227)
শ্যালো দ্রোণস্য যশ্চাসীদ্দয়িতো ব্রাহ্মমো মহান্।
স চ তস্মিন্মহেষ্বাসঃ কৃপঃ সমভবত্তদা॥ 16-1-13(97228)
ব্যাসশ্চ ভগবান্নিত্যমাসাংচক্রে নৃপেণ হ।
কথাঃ কুর্বন্পুরাণর্ষির্দেবর্ষিপিতৃরক্ষসাম্॥ 16-1-14(97229)
ধর্ময়ুক্তানি কার্যাণি ব্যবহারান্বিতানি চ।
ধৃতরাষ্ট্রাভ্যনুজ্ঞাতো বিদুরস্তান্যকারয়ৎ॥ 16-1-15(97230)
সামন্তেভ্যঃ প্রিয়াণ্যস্য কার্যাণি সুবহূন্যপি।
প্রাপ্যন্তেঽর্থেঃ সুলঘুভিঃ সুনয়াদ্বিদুরস্য বৈ॥ 16-1-16(97231)
অকরোদ্বন্ধমোক্ষং চ বধ্যানাং মোক্ষণং তথা।
ন চ ধর্মসুতো রাজা কদাচিৎকিঞ্চিদব্রবীৎ॥ 16-1-17(97232)
বিহারয়াত্রাসু পুনঃ কুরুরাজো যুধিষ্ঠিরঃ।
সর্বান্কামানুপস্থাপ্য ধৃতরাষ্ট্রে ন্যবেদয়ৎ॥ 16-1-18(97233)
আরালিকাঃ সূপকারা রাগষাডবিকাস্তথা।
উপাতিষ্ঠন্ত রাজানং ধৃতরাষ্ট্রং যথাপুরম্॥ 16-1-19(97234)
বাসাংসি চ মহার্হাণি মাল্যানি বিবিধানি চ।
উপাজহ্রুর্যথাকালং ধৃতরাষ্ট্রস্য পাণ্ডবাঃ॥ 16-1-20(97235)
মৈরেয়মধুমাংসানি পানকানি লঘূনি চ।
চিত্রান্ভক্ষ্যবিকারাংশ্চ চক্রুস্তস্য যথা পুরা॥ 16-1-21(97236)
যে চাপি পৃথিবীপালাঃ সমাজগ্মুস্ততস্ততঃ।
উপাতিষ্ঠন্ত তে সর্বে কৌরবেন্দ্রং যথাপুরা॥ 16-1-22(97237)
কুন্তী চ দ্রৌপদী চৈব সাৎবতী চ যশস্বিনী।
উলূপী নাগকন্যা চ দেবী চিত্রাঙ্গদা তথা॥ 16-1-23(97238)
ধৃষ্টকেতোশ্চ ভগিনী জরাসন্ধসুতা তথা।
এতাশ্চান্যাশ্চ বহ্ব্যো বৈ যোষিতঃ পুরুষর্ষভ।
কিংকরাঃ পর্যুপাতিষ্ঠন্সর্বাঃ সুবলজাং তথা॥ 16-1-24(97239)
যথা পুত্রবিয়ুক্তোঽয়ং ন কিঞ্চিদ্দুঃখমাপ্নুয়াৎ।
ইতি তানন্বশাদ্ভাতৄন্নিত্যমেব যুধিষ্ঠিরঃ॥ 16-1-25(97240)
এবং তে ধর্মরাজস্য শ্রুৎবা বচনমর্থবৎ।
সবিশেষমবর্তন্তি ভীমমেকং তদা বিনা॥ 16-1-26(97241)
ন হি তত্তস্য বীরস্য হৃদয়াদপসর্পতি।
ধৃতরাষ্ট্রস্য দুর্বুদ্ধ্যা যদ্বৃত্তং দ্যূতমণ্ডলে॥ ॥ 16-1-27(97242)

ইতি শ্রীমন্মহাভারতে আশ্রমবাসিকপর্বণি আশ্রমবাসপর্বণি প্রথমোঽধ্যায়ঃ॥ 1 ॥

Mahabharata – AshramaVasika Parva – Chapter Footnotes
7-1-2 গান্ধারী চ যশস্বিনীতি ঝ.থ.পাঠঃ॥ 7-1-5 উপাতিষ্ঠদারাধিতবান্॥ 7-1-9 সতাং বৃত্তিমবর্তন্তেতি থ.পাঠঃ॥ 7-1-13 তস্মিন্ধৃতরাষ্ট্রে সমভবত্তন্নিকটে অভবৎ॥ 7-1-14 বাসং চক্রে নৃপেণ হেতি ক.থ.পাঠঃ॥ 7-1-16 প্রভাবাদ্বিদুরস্য বৈ ইতি ক.থ.পাঠঃ॥ 7-1-19 অরয়া শস্ত্রবিশেষেণ লূনং ছিন্নং শাকাদি অরালু তৎসংস্কুর্বন্তি তে আরালিকাঃ শাকবিশেষকর্তারঃ রাগখাণ্ডবিকাস্তথেতি ঝ.পাঠঃ। রাগষাডবং পিপ্পলীশুঠীশর্করোপেতো মুদ্গয়ূষস্তৎকর্তারো রাগষাডবিকাঃ॥