স্বর্গারোহণপর্ব – অধ্যায় ৬

স্বর্গারোহণপর্ব – অধ্যায় 006
॥ শ্রীঃ ॥
18.6. ভারতশ্রবণব…
ভারতশ্রবণবিধ্যধ্যায়ঃ।
Mahabharata – SwargarohaNa Parva – Chapter Text


জনমেজয় উবাচ।

ভগবন্কেন বিধিনা শ্রোতব্যং ভারতং বুধৈঃ।
ফলং কিং কে চ দেবাশ্চ পূজ্যা বৈ পারণেষ্বিহ॥ 18-6-1(98661)
দেয়ং সমাপ্তে ভগবন্কিং চ পর্বণিপর্বণি।
বাচকঃ কীদৃশশ্চাত্র এষ্টব্যস্তদ্ব্রবীহি মে॥ 18-6-2(98662)
বৈশম্পায়ন উবাচ। 18-6-3x(8102)
শৃণু রাজন্বিধিমিমং ফলং যচ্চাপি ভারতাৎ।
শ্রুতাদ্ভবতি রাজেন্দ্র যত্ৎবং মামনুপৃচ্ছসি॥ 18-6-3(98663)
দিবি দেবা মহীপাল ক্রীডার্থমবনিং গতাঃ।
কৃৎবা কার্যমিদং চৈব ততশ্চ দিবমাগতাঃ॥ 18-6-4(98664)
হন্ত যত্তে প্রবক্ষ্যামি তচ্ছৃণুষ্ব সমাহিতঃ।
ঋষীণাং দেবতানাং চ সম্ভবং বসুধাতলে॥ 18-6-5(98665)
অত্র রুদ্রাস্তথা সাধ্যা বিশ্বেদেবাশ্চ শাশ্বতাঃ।
আদিত্যাশ্চাশ্বিনৌ দেবৌ লোকপালা মহর্ষয়ঃ॥ 18-6-6(98666)
গুহ্যকাশ্চ সগন্ধর্বা নাগা বিদ্যাধরাস্তথা।
সিদ্ধা ধর্মঃ স্বয়ংভূশ্চ মুনিঃ কাত্যায়নো বরঃ॥ 18-6-7(98667)
গিরয়ঃ সাগরা নদ্যস্তথৈবাপ্সরসাং গণাঃ।
গ্রহাঃ সংবৎসরাশ্চৈব অয়নান্যৃতবস্তথা॥ 18-6-8(98668)
স্থাবরং জঙ্গমং চৈব জগৎসর্বং সুরাসুরম্।
ভাতরে ভরতশ্রেষ্ঠ একস্থমিহ দৃশ্যতে॥ 18-6-9(98669)
তেষাং শ্রুৎবা প্রতিষ্ঠানং নামকর্মানুকীর্তনাৎ।
কৃৎবাঽপি পাতকং ঘোরং সদ্যো মুচ্যেত মানবঃ॥ 18-6-10(98670)
ইতিহাসমিমং শ্রুৎবা যথাবদনুপূর্বশঃ।
সংয়তাত্মা শুচির্ভূৎবা পারং গৎবা চ ভারতে॥ 18-6-11(98671)
তেষাং শ্রাদ্ধানি দেয়ানি শ্রুৎবা ভারত ভারতম্।
ব্রাহ্মণেভ্যো যথাশক্ত্যা ভক্ত্যা চ ভরতর্ষভ॥ 18-6-12(98672)
মহাদানানি দেয়ানি রত্নানি বিবিধানি চ।
গাবঃ কাংস্যোপদোহাশ্চ কন্যাশ্চৈব স্বলঙ্কৃতাঃ॥ 18-6-13(98673)
সর্বকামগুণোপেতা যানানি বিবিধানি চ।
কভবনানি বিচিত্রাণি ভূমির্বাসাংসি কাঞ্চনম্॥ 18-6-14(98674)
বাহনানি চ দেয়ানি হয়া মত্তাশ্চ বারণাঃ।
শয়নং শিবিকাশ্চৈব স্যন্দনাশ্চ স্বলংকৃতাঃ॥ 18-6-15(98675)
যদ্যদ্গৃহে বরং কিঞ্চিদ্যদ্যদস্তি মহদ্বসু।
তত্তদ্দেয়ং দ্বিজাতিভ্য আত্মা দারাশ্চ সূনবঃ॥ 18-6-16(98676)
শ্রদ্ধয়া পরয়া যুক্তং ক্রমশস্তস্য পারগঃ।
শক্তিতঃ সুমনা হৃষ্টঃ সুশ্রূষুরবিকল্পকঃ॥ 18-6-17(98677)
সত্যার্জবরতো দান্তঃ শুচিঃ শৌচসমন্বিতঃ।
শ্রদ্ধধানো জিতক্রোধো যথা সিদ্ধ্যতি তচ্ছৃণু॥ 18-6-18(98678)
শুচিঃ শীলান্বিতাচারঃ শুক্লবাসা জিতেন্দ্রিয়ঃ।
সংস্কৃতঃ সর্বশাস্ত্রজ্ঞঃ শ্রদ্দধানোঽনসূয়কঃ॥ 18-6-19(98679)
রূপবান্সুভগো দান্তঃ সত্যবাদী জিতেন্দ্রিয়ঃ।
দানমানগৃহীতশ্চ কার্যো ভবতি বাচকঃ॥ 18-6-20(98680)
অবিলম্বমনায়স্তমদ্রুতং ধীরমুর্জিতম্।
অসংসক্তাক্ষরপদং স্বরভাবসমন্বিতম্॥ 18-6-21(98681)
ত্রিষষ্টিবর্ণসংয়ুক্তমষ্টস্থানসমীরিতম্।
বাচয়েদ্বাচকঃ স্বস্থঃ স্বাসীনঃ সুসমাহিতঃ॥ 18-6-22(98682)
নারায়ণং নমস্কৃত্য নরং চৈব নরোত্তমম্।
দেবীং সরস্বতীং(ব্যাসং) চৈব ততো জয়মুদীরয়েৎ॥ 18-6-23(98683)
ঈদৃশাদ্বাচকাদ্রাজঞ্শ্রুৎবা ভারত ভারতম্।
নিয়মস্থঃ শুচিঃ শ্রোতা শৃণ্বন্স ফলমশ্নুতে॥ 18-6-24(98684)
পারণং প্রথমং প্রাপ্য দ্বিজান্কামৈশ্চ তর্পয়ন্।
আগ্নিষ্টোমস্য যজ্ঞস্য ফলং বৈ লভতে নরঃ॥ 18-6-25(98685)
অপ্সরোগণসংকীর্ণং বিমানং লভতে মহৎ।
প্রহৃষ্টঃ স তু দেবৈশ্চ দিবং যাতি সমাহিতঃ॥ 18-6-26(98686)
দ্বিতীয়ং পারণং প্রাপ্য সোতিরাত্রফলং লভেৎ।
সর্বরত্নময়ং দিব্যং বিমানমধিরোহতি॥ 18-6-27(98687)
দিব্যমাল্যাংবরধরো দিব্যগন্ধবিভূষিতঃ।
দিব্যাঙ্গদধরো নিত্যং দেবলোকে মহীয়তে॥ 18-6-28(98688)
তৃতীয়ং পারণং প্রাপ্য দ্বাদশাহফলং লভেৎ।
বসত্যমরসংকাশো বর্ষাণ্যযুতশো দিবি॥ 18-6-29(98689)
চতুর্থে বাজপেয়স্য পঞ্চমে দ্বিগুণং ফলম্।
উদিতাদিত্যসংকাশং জ্বলন্তমনলোপমম্॥ 18-6-30(98690)
বিমানং বিবুধৈঃ সার্ধমারুহ্য দিবি গচ্ছতি।
বর্ষায়ুতানি ভনে শক্রস্য দিবি মোদতে॥ 18-6-31(98691)
ষষ্ঠে দ্বিগুণমস্তীতি সপ্তমে ত্রিগুণং ফলম্।
কৈলাসশিখরাকারং বৈদূর্যমণিবেদিকম্॥ 18-6-32(98692)
পরিক্ষিপ্তং চ বহুধা মণিবিদ্রুমভূষিতম্।
বিমানং সমধিষ্ঠায় কামগং সাপ্সরোগণম্॥ 18-6-33(98693)
সর্বাংল্লোকান্বিচরতে দ্বিতীয় ইব ভাস্করঃ।
অষ্টমে রাজসূয়স্য পারণে লভতে ফলম্॥ 18-6-34(98694)
চন্দ্রোদয়নিভং রম্যং বিমানমধিরোহতি।
চন্দ্ররশ্মিপ্রতীকাশৈর্হয়ৈর্যুক্তং মনোজবৈঃ॥ 18-6-35(98695)
সেব্যমানো বরস্ত্রীণাং চন্দ্রাৎকান্ততরৈর্মুখৈঃ।
মেখলানাং নিনাদেন নূপুরাণাং চ নিঃস্বনৈঃ॥ 18-6-36(98696)
অঙ্কে পরমনারীণাং সুখসুপ্তো বিবুধ্যতে।
নবমে ক্রতুরাজস্য বাজিমেধস্য ভারত॥ 18-6-37(98697)
কাঞ্চনস্তংভনির্যূহবৈদূর্যকৃতবেদিকম্।
জাংবূনদময়ৈর্দিব্যৈর্গবাক্ষৈঃ সর্বতো বৃতম্॥ 18-6-38(98698)
সেবিতং চাপ্সরঃসঙ্ঘৈর্গন্ধর্বৈর্দিবিচারিভিঃ।
বিমানং সমধিষ্ঠায় শ্রিয়া পরময়া জ্বলন্॥ 18-6-39(98699)
দিব্যমাল্যাংবরধরো দিব্যচন্দনরূষিতঃ।
মোদতে দৈবতৈঃ সার্ধং দিবি দেব ইবাপরঃ॥ 18-6-40(98700)
দশমং পারণং প্রাপ্য দ্বিজাতীনভিবন্দ্য চ।
কিঙ্কিণীজালনির্ঘোষং পতাকাধ্বজশোভিতম্॥ 18-6-41(98701)
রত্নবেদিকসম্বাদ্যং বৈদূর্যমণিতোরণম্।
হেমজালপরিক্ষিপ্তং প্রবালবলভীমুখম্॥ 18-6-42(98702)
গন্ধর্বৈর্গীতকুশলৈরপ্সরোভিশ্চ শোভিতম্।
বিমানং সুকৃতাবাসং সুখেনৈবোপপদ্যতে॥ 18-6-43(98703)
মুকুটেনাগ্নিবর্ণেন জাংবূনদবিভূষিণা।
দিব্যচন্দনদিগ্ধাঙ্গো দিব্যমাল্যবিভূষিতঃ॥ 18-6-44(98704)
দিব্যাঁল্লোকান্বিচরতি দিব্যৈর্ভোগৈঃ সমন্বিতঃ।
বিবুধানাং প্রসাদেন শ্রিয়া পরময়া যুতঃ॥ 18-6-45(98705)
অথ বর্ষগণানেবং স্বর্গলোকে মহীয়তে।
ততো গন্ধর্বসহিতঃ সহস্রাণ্যেকবিংশতিম্॥ 18-6-46(98706)
পুরংদরপুরে রম্যে শক্রেণ সহ মোদতে।
দিব্যযানবিমানেষু লোকেষু বিবিধেষু চ॥ 18-6-47(98707)
দিব্যনারীগণাকীর্ণো নিবসত্যমরো যথা।
ততঃ সূর্যস্য ভবনে চন্দ্রস্য ভবনে তথা॥ 18-6-48(98708)
শিবস্য ভবনে রাজন্বিষ্ণোর্যাতি সলোকতাম্।
এবমেতন্মহারাজ নাত্র কার্যা বিচারণা। 18-6-49(98709)
শ্রদ্দধানেন বৈ ভাব্যমেবমাহ গুরুর্মম।
বাচকস্য তু দাতব্যং মনসা যদ্যদিচ্ছতি॥ 18-6-50(98710)
হস্ত্যশ্বরথয়ানানি বাহনানি বিশেষতঃ।
কটকে কুণ্ডলে চৈব ব্রহ্মসূত্রং তথা পরম্॥ 18-6-51(98711)
বস্ত্রং চৈব বিচিত্রং চ গন্ধং চৈব বিশেষতঃ।
দেববৎপূজয়েত্তং তু বিষ্ণুলোকমবাপ্নুয়াৎ॥ 18-6-52(98712)
অতঃ পরং প্রবক্ষ্যামি যানি দেয়ানি ভারতে।
বাচ্যমানে তু বিপ্রেভ্যো রাজন্পর্বণিপর্বণি॥ 18-6-53(98713)
জাতিং দেশং চ সত্যং চ মাহাত্ম্যং ভরতর্ষভ।
ধর্মং বৃত্তিং চ বিজ্ঞায় ক্ষত্রিয়াণাং নরাধিপ॥ 18-6-54(98714)
স্বস্তি বাচ্য দ্বিজানাদৌ ততঃ কার্যে প্রবর্তিতে।
সমাপ্তে পর্বণি ততঃ স্বশক্ত্যা পূজয়েদ্দ্বিজান্॥ 18-6-55(98715)
আদৌ তু বাচকং চৈব বস্ত্রগন্ধসমন্বিতম্।
বিধিবদ্বোজয়েদ্রাজন্মধুপায়সমুত্তমম্॥ 18-6-56(98716)
ততো মূলফলপ্রায়ং পায়সং মধুসর্পিষা।
আস্তীকে ভোজয়েদ্রাজন্দদ্যাচ্চৈব গুডৌদনম্॥ 18-6-57(98717)
অপূপৈশ্চৈব পূপৈশ্চ মোদকৈশ্চ সমন্বিতম্।
সভাপর্বণি রাজেন্দ্র হবিষ্যং ভোজয়েদ্দ্বিজান্॥ 18-6-58(98718)
আরণ্যকে মূলফলৈস্তর্পয়েত্তু দ্বিজোত্তমান্।
অরণীপর্ব চাসাদ্য জলকুম্ভান্প্রদাপয়েৎ॥ 18-6-59(98719)
তর্পণানি চ মুখ্যানি বন্যমূলফলানি চ।
সর্বকামগুণোপেতং বিপ্রেভ্যোঽন্নং প্রদাপয়েৎ॥ 18-6-60(98720)
বিরাটপর্বণি তথা বাসাংসি বিবিধানি চ।
উদ্যোগে ভরতশ্রেষ্ঠ সর্বকামগুণান্বিতম্॥ 18-6-61(98721)
ভোজনং ভোজয়েদ্বিপ্রান্গন্ধমাল্যৈরলঙ্কৃতান্।
ভীষ্মপর্বণি রাজেন্দ্র দত্ৎবা যানমনুত্তমম্॥ 18-6-62(98722)
ততঃ সর্বগুণোপেতমন্নং দদ্যাৎসুসংস্কৃতম্।
দ্রোণপর্বণি বিপ্রেভ্যো ভোজনং পরমার্চিতম্॥ 18-6-63(98723)
শরাশ্চ দেয়া রাজেন্দ্র চাপান্যসিবরাস্তথা।
কর্ণপর্বণ্যপি তথা ভোজনং সার্বকামিকম্॥ 18-6-64(98724)
বিপ্রেভ্যঃ সংস্কৃতং সম্যগ্দদ্যাৎসংয়তমানসঃ।
শল্যপর্বণি রাজেন্দ্র মোদকৈঃ সগুডৌদনৈঃ॥ 18-6-65(98725)
অপূপৈস্তর্পণৈশ্চৈব সর্বমন্নং প্রদাপয়েৎ।
গদাপর্বণ্যপি তথা মুদ্গমিশ্রং প্রদাপয়েৎ॥ 18-6-66(98726)
স্ত্রীপর্বণি তথা রত্নৈস্তর্পয়েত্তু দ্বিজোত্তমান্।
ঘৃতৌদনং পুরস্তাচ্চ ঐষীকে দাপয়েৎপুনঃ॥ 18-6-67(98727)
ততঃ সর্বগুণোপেতমন্নং দদ্যাৎসুসংস্কৃতম্।
শান্তিপর্বণ্যপি তথা হবিষ্যং ভোজয়েদ্দ্বিজান্॥ 18-6-68(98728)
আশ্বমেধিকমাসাদ্য ভোজনং সার্বকামিকম্।
তথাঽঽশ্রমনিবাসে তু হবিষ্যং ভোজয়েদ্দ্বিজান্॥ 18-6-69(98729)
মৌসলে সার্বগুণিকং গন্ধমাল্যানুলেপনম্।
মহাপ্রাস্থানিকে তদ্বৎসর্বকামগুণান্বিতম্॥ 18-6-70(98730)
স্বর্গপর্বণ্যপি তথা হবিষ্যং ভোজয়েদ্দ্বিজান্।
হরিবংশসমাপ্তৌ তু সহস্রং ভোজয়েদ্দ্বিজান্॥ 18-6-71(98731)
গামেকাং নিষ্কসংয়ুক্তাং ব্রাহ্মণায় নিবেদয়েৎ।
তদর্ধেনাপি দাতব্যা দরিদ্রেণাপি পার্থিব॥ 18-6-72(98732)
প্রতিপর্বসমাপ্তৌ তু পুস্তকং বৈ বিচক্ষণঃ।
সুবর্ণেন চ সংয়ুক্তং বাচকায় নিবেদয়েৎ॥ 18-6-73(98733)
হরিবংশে পর্বণি চ পায়সং তত্র ভোজয়েৎ।
পারণেপারণে রাজন্যথাবদ্ভরতর্ষভ॥ 18-6-74(98734)
সমাপ্য সর্বাঃ প্রয়তঃ সংহিতাঃ শাস্ত্রকোবিদঃ।
শুভে দেশে নিবেশ্যাথ ক্ষৌমবস্ত্রাভিসংবৃতাঃ॥ 18-6-75(98735)
শুক্লাংবরধরঃ স্রগ্বী সুচির্ভূৎবা স্বলঙ্কৃতঃ।
অর্চয়েৎ যথান্যায়ং গন্ধমাল্যৈঃ পৃথক্পৃথক্। 18-6-76(98736)
সংহিতাপুস্তকান্রাজন্প্রয়তঃ সুসমাহিতঃ।
ভক্ষ্যৈর্মাল্যৈস্চ পেয়ৈশ্চ কামৈশ্চ বিবিধৈঃ শুভৈঃ॥ 18-6-77(98737)
হিরণ্যং চ সুবর্ণং চ দক্ষিণামথ দাপয়েৎ।
সর্বত্র ত্রিপলং স্বর্ণং দাতব্যং প্রয়তাত্মনা॥ 18-6-78(98738)
তদর্ধং পাদশেষং বা বিত্তশাঠ্যবিবর্জিতম্।
যদ্যদেবাত্মনোঽভীষ্টং তত্তদ্দেয়ং দ্বিজাতয়ে॥ 18-6-79(98739)
সর্বথা তোষয়েদ্ভক্ত্যা বাচকং গুরুমাত্মনঃ।
দেবতাঃ কীর্তয়েৎসর্বা নরনারায়ণৌ তথা॥ 18-6-80(98740)
ততো গন্ধৈশ্চ মাল্যৈশ্চ স্বলঙ্কৃত্য দ্বিজোত্তমান্।
তর্পয়েদ্বিবিধৈঃ কানৈর্দানৈশ্চোচ্চাবচৈস্তথা॥ 18-6-81(98741)
অতিরাত্রস্য যজ্ঞস্য ফলং প্রাপ্নোতি মানবঃ।
প্রাপ্নুয়াচ্চ ক্রতুফলং তথা পর্বণিপর্বণি॥ 18-6-82(98742)
বাচকো ভরতশ্রেষ্ঠ ব্যক্তাক্ষরপদস্বরঃ।
ভবিষ্যং শ্রাবয়েদ্বিদ্বাঞ্ভারতং ভরতর্ষভ॥ 18-6-83(98743)
ভুক্তবৎসু দ্বিজেন্দ্রেষু যথাবৎসম্প্রদাপয়েৎ।
বাচকং ভরতশ্রেষ্ঠ ভোজয়িৎবা স্বলংকৃতম্॥ 18-6-84(98744)
বাচকে পরিতুষ্টে তু শুভা প্রীতিরনুত্তমা।
ব্রাহ্মণেষু তু তুষ্টেষু প্রসন্নাঃ সর্বদেবতাঃ॥ 18-6-85(98745)
ততো হি বরণং কার্যং দ্বিজানাং ভরতর্ষভ।
সর্বকামৈর্যথান্যায়ং সাধুভিশ্চ পৃথগ্বিধৈঃ॥ 18-6-86(98746)
ইত্যেষি বিধিরুদ্দিষ্টো ময়া তে দ্বিপদাংবর।
শ্রদ্দধানেন বৈ ভাব্যং যন্মাং ৎবং পরিপৃচ্ছসি॥ 18-6-87(98747)
ভারশ্রবণে রাজন্পারণে চ নৃপোত্তম।
সদা যত্নবতা ভাব্যং শ্রেয়স্তু পরমিচ্ছতা॥ 18-6-88(98748)
ভারতং শৃণুয়ান্নিত্যং ভারতং পরিকীর্তয়েৎ।
ভারতং ভবনে যস্য তস্য হস্তগতো জয়ঃ॥ 18-6-89(98749)
ভারতং পরমং পুণ্যং ভারতে বিবিধাঃ কথাঃ।
ভারতং সেব্যতে দেবৈর্ভারতং পরমং পদম্॥ 18-6-90(98750)
ভারতং সর্বশাস্ত্রাণামুত্তমং ভরতর্ষভ।
ভারতাৎপ্রাপ্যতে মোক্ষস্তত্ৎবমেতদ্ব্রবীমি তৎ॥ 18-6-91(98751)
মহাভারতমাখ্যানং ক্ষিতিং গাং চ সরস্বতীম্।
ব্রাহ্মণান্কেশবং চৈব কীর্তয়ন্নাবসীদতি॥ 18-6-92(98752)
বেদে রামায়ণে পুণ্যে ভারতে ভরতর্ষভ।
আদৌ চান্তে চ মধ্যে চ হরিঃ সর্বত্র গীয়তে॥ 18-6-93(98753)
যত্র বিষ্ণুকথা দিব্যাঃ শ্রুতয়শ্চ সনাতনাঃ।
তচ্ছ্রোতব্যং মনুষ্যেণ পরং পদমিহেচ্ছতা॥ 18-6-94(98754)
এতৎপবিত্রং পরমমেতদ্ধর্মনিদর্শনম্।
এতৎসর্বগুণোপেতং শ্রোতব্যং ভূতিমিচ্ছতা॥ 18-6-95(98755)
কায়িকং বাচিকং চৈব মনসা সমুপার্জিতম্।
তৎসর্বং নাশমায়াতি তমঃ সূর্যোদয়ে যথা॥ 18-6-96(98756)
অষ্টাদশপুরাণানাং শ্রবণাদ্যৎফলং ভবেৎ।
তৎফলং সমবাপ্নোতি বৈষ্ণবো নাত্র সংশয়ঃ॥ 18-6-97(98757)
স্ত্রিয়শ্চ পুরুষাশ্চৈব বৈষ্ণবং পদমাপ্নুয়ুঃ।
স্ত্রীভিশ্চ পুত্রকামাভিঃ শ্রোতব্যং বৈষ্ণবং যশঃ॥ 18-6-98(98758)
দক্ষিণা চাত্র দেয়া বৈ নিষ্কপঞ্চসুবর্ণকম্।
বাচকায় যথাশক্ত্যা যথোক্তং ফলমিচ্ছতা॥ 18-6-99(98759)
স্বর্ণশৃঙ্গীং চ কপিলাং সবৎসাং বস্ত্রসংবৃতাম্।
বাচকায় চ দদ্যাদ্ধি আত্মনঃ শ্রেয় ইচ্ছতা॥ 18-6-100(98760)
অলঙ্কারং প্রদদ্যাচ্চ পাণ্যোর্বৈ ভরতর্ষভ।
কর্ণস্যাভরণং দদ্যাদ্ধনং চৈব বিশেষতঃ॥ 18-6-101(98761)
ভূমিদানং সমাদদ্যাদ্বাচকায় নরাধিপ।
ভূমিদানসমং দানং ন ভূতং ভবিষ্যতি॥ 18-6-102(98762)
শৃণোতি শ্রাবয়েদ্বাঽপি সততং চৈব যো নরঃ।
সর্বপাপবিনির্মুক্তো বৈষ্ণবং পদমাপ্নুয়াৎ॥ 18-6-103(98763)
পিতৄনুদ্ধরতে সর্বানেকাদশসমুদ্ধবান্।
আত্মানং সসুতং চৈব স্ত্রিয়ং চ ভরতর্ষভ॥ 18-6-104(98764)
দশাংশশ্চৈব হোমোপি কর্তব্যোত্র নরাধিপ।
ইদং ময়া তবাগ্নে চ প্রোক্তং সর্বং নরর্ষভ॥ ॥ 18-6-105(98765)

ইতি শ্রীমন্মহাভারতে শতসাহস্র্যাং সংহিতায়াং বৈয়াসিক্যাং হরিবংশোক্তভারতশ্রবণবিধাবধ্যায়ঃ॥ স্বর্গারোহণপর্ব সম্পূর্ণম্॥ 18 ॥ শ্রীমন্মহাভারতং সম্পূর্ণম্॥


———-
ইদং স্বর্গারোহণপর্ব কুম্ভঘোণস্থেন টী.আর্.কৃষ্ণাচার্যেণ টী.আর্.ব্যাসাচার্যেণ চ মুম্বয়্যাং নির্ণয়সাগরমুদ্রায়ন্ত্রে মুদ্রাপিতম্। শকাব্দাঃ 1832 সন 1910. অনেন মুদ্রণেন শ্রীমদ্ধনুমদ্ভীমমধ্বান্তর্গতরামকৃষ্ণবেদব্যাসাত্মকলক্ষ্মীহয়গ্রীবঃ প্রীয়তাম্।
———–

Mahabharata – SwargarohaNa Parva – Chapter Footnotes


18-6-1x যদ্যপ্যযধ্যায়ো দাক্ষিণাত্যকোশেষু ক্বাপি ন দৃশ্যতে তথাপি “ভগবন্নিত্যাদিঃ পলাধ্যায়ো ব্যাসেন হরিবংশান্তে উক্তঃ অত্র শ্রোতৃপ্ররোচনার্থমুক্ত” ইতি নীলকণ্ঠীয়ব্যাখ্যানোক্তপ্রয়োজনায়ৈবাস্মাভিরপীহ স্থাপিতঃ॥