স্বর্গারোহণপর্ব – অধ্যায় ১

স্বর্গারোহণপর্ব – অধ্যায় 001
॥ শ্রীঃ ॥
18.1. অধ্যায়ঃ 001
Mahabharata – SwargarohaNa Parva – Chapter Topics
স্বর্গং গতেন যুধিষ্ঠিরেণ তত্র মহাসমুচ্ছ্রয়েণ শোভমানদুর্যোধনদর্শনম্॥ 1 ॥ তথা তদুস্কর্ষাসহিষ্ণুতয়া তদীয়দোষো দ্ধাটনেন তেন সহ স্বন স্বর্গবাসানভিরোচননিবেদনপূর্বকং নারদংপ্রতি স্বস্য ভ্রাত্রাদিদিদৃক্ষানিবেদনম্॥ 2 ॥
Mahabharata – SwargarohaNa Parva – Chapter Text


শ্রীবেদব্যাসায় নমঃ।

নারায়ণং নমস্কৃত্য নরং চৈব নরোত্তমম্।
দেবীং সরস্বতীং ব্যাসং ততো জয়মুদীরয়েৎ॥ 18-1-1(98428)
জনমেজয় উবাচ। 18-1-1x(8094)
স্বর্গং ত্রিবিষ্টপং প্রাপ্য মম পূর্বপিতামহাঃ।
পাণ্ডবা ধার্তরাষ্ট্রাশ্চ কানি স্থানানি ভেজিরে॥ 18-1-1(98429)
এতদিচ্ছাম্যহং শ্রোতুং সর্ববিচ্চাসি মে মতঃ।
মহর্ষিণাঽভ্যনুজ্ঞাতো ব্যাসেনাদ্ভুতকর্মণা॥ 18-1-2(98430)
বৈশম্পায়ন উবাচ। 18-1-3x(8095)
স্বর্গং ত্রিবিষ্টপং প্রাপ্য তব পূর্বপিতামহাঃ।
যুধিষ্ঠিরপ্রভৃতয়ো যদকুর্বত তচ্ছৃণু॥ 18-1-3(98431)
স্বর্গং ত্রিবিষ্টপং প্রাপ্য ধর্মরাজো যুধিষ্ঠিরঃ।
দুর্যোধনং শ্রিয়া জুষ্টং দদর্শাসীনমাসনে॥ 18-1-4(98432)
ভ্রাজমানমিবাদিত্যং বীরলক্ষ্ম্যাঽভিসংবৃতম্।
দেবৈর্ভ্রাজিষ্ণুভিঃ সাধ্যৈঃ সহিতং পুণ্যকর্মভিঃ॥ 18-1-5(98433)
ততো যুধিষ্ঠিরো রাজা দুর্যোধনমমর্ষিতঃ।
সহসা সন্নিবৃত্তোঽভূচ্ছ্রিয়ং দৃষ্ট্বা সুয়োধনে॥ 18-1-6(98434)
ব্রুবন্নুচ্চৈর্বচস্তান্বৈ নাহং দুর্যোধনেন বৈ।
সহিতঃ কাময়ে লোকাঁল্লব্ধেনাদীর্ঘদর্শিনা॥ 18-1-7(98435)
যৎকৃতে পৃথিবী সর্বা সুহৃদো বান্ধবাস্তথা।
হতাস্মাভিঃ প্রসহ্যাজৌ কিল্ষ্টৈঃ পূর্বং মহাবনে॥ 18-1-8(98436)
দ্রৌপদী চ সভামধ্যে পাঞ্চালী ধর্মচারিণী।
পর্যাকৃষ্টাঽনবদ্যাঙ্গী পত্নী নো গুরুসন্নিধৌ॥ 18-1-9(98437)
অস্তি দেবা ন মে কামঃ সুয়োধনমুদীক্ষিতুম্।
তত্রাহং গন্তুমিচ্ছামি যত্র তে ভ্রাতরো মম॥ 18-1-10(98438)
নৈবমিত্যব্রবীত্তং তু নারদঃ প্রহসন্নিব।
স্বর্গে নিবাসে রাজেন্দ্র বিরুদ্ধং চাপি নশ্যতি॥ 18-1-11(98439)
যুধিষ্ঠির মহাবাহো মৈবং বোচঃ কথঞ্চন।
দুর্যোধনং প্রতি নৃপং শৃণু চেদং বচো মম॥ 18-1-12(98440)
এষ দুর্যোধনো রাজা পূজ্যতে ত্রিদশৈঃ সহ।
সদ্ভিশ্চ রাজপ্রবরৈতে ইমে স্বর্গবাসিনঃ। 18-1-13(98441)
বীরলোকগতিং প্রাপ্তা যুদ্ধে হুৎবাঽঽত্মনস্তনুম্।
যূয়ং সর্বে সুরসমা যেন যুদ্ধেন বাধিতাঃ॥ 18-1-14(98442)
স এষ ক্ষত্রধর্মেণ স্থানমেতদবাপ্তবান্।
ভয়ে মহতি যোঽভীতো বভূব পৃথিবীপতিঃ॥ 18-1-15(98443)
ন তন্মনসি কর্তব্যং পুত্র যদ্দ্যূতকারিতম্।
দ্রৌপদ্যাশ্চ পরিক্লেশং ন চিন্তয়িতুমর্হসি॥ 18-1-16(98444)
যে চান্যেঽপি পরিক্লেশা যুষ্মাকং জ্ঞাতিকারিতাঃ।
সংগ্রামেষ্বথবাঽন্যত্র ন তান্সংস্মর্তুমর্হসি॥ 18-1-17(98445)
সমাগচ্ছ যথান্যায়ং রাজ্ঞা দুর্যোধনেন বৈ।
স্বর্গোঽয়ং নেহ বৈরাণি ভন্তি মনুজাধিপ॥ 18-1-18(98446)
নারদেনৈবমুক্তস্তু কুরুরাজো যুধিষ্ঠিরঃ।
ভ্রাতৄন্পপ্রচ্ছ মেধাবী বাক্যমেতদুবাচ হ॥ 18-1-19(98447)
যদি দুর্যোধনস্যৈতে বীরলোকাঃ সনাতনাঃ।
অধর্মজ্ঞস্য পাপস্য পৃথিবীসুহৃদদ্রুহঃ॥ 18-1-20(98448)
যৎকৃতে পৃথিবী নষ্টা সহসা সনরদ্বিপা।
বয়ং চ মন্যুনা দগ্ধা বৈরং প্রতিচিকীর্ষবঃ॥ 18-1-21(98449)
যে তে বীরী মহাত্মানো ভ্রাতরো মে মহাব্রতাঃ।
সত্যপ্রতিজ্ঞা লোকস্য শূরা বৈ সত্যবাদিনঃ।
তেষামিদানীং কে লোকা দ্রষ্টুমিচ্ছামি তানহম্॥ 18-1-22(98450)
কর্ণং চৈব মহাত্মানং কৌন্তেয়ং সত্যসঙ্গরম্।
ধৃষ্টদ্যুম্নং সাত্যকিং চ ধৃষ্টদ্যুম্নস্য চাত্মজান্॥ 18-1-23(98451)
যে চ শস্ত্রৈর্বধং প্রাপ্তাঃ ক্ষত্রধর্মেণ পার্থিবাঃ।
ক্বনু তে পার্থিবান্ব্রহ্মন্নৈতান্পশ্যামি নারদ॥ 18-1-24(98452)
বিরাটদ্রুপদৌ চৈব ধৃষ্টকেতুমুখাংশ্চ তান্।
শিখণ্ডিনং চ পাঞ্চাল্যং দ্রৌপদেয়াংশ্চ সর্বশঃ।
অভিমন্যুং চ দুর্ধর্ষং দ্রষ্টুমিচ্ছামি নারদ॥ ॥ 18-1-25(98453)

ইতি শ্রীমন্মহাভারতে স্বর্গারোহণপর্বণি প্রথমোঽধ্যায়ঃ॥ 1 ॥

Mahabharata – SwargarohaNa Parva – Chapter Footnotes
7-1-1 ত্রীণি বিষ্টপানি ভুবনানি ফলোৎকর্ষবশাদ্যত্রান্তর্ভবন্তি তাদৃশং স্বর্গং প্রাপ্য॥ 7-1-6 তত ইতি। স্বর্গেঽপ্যমর্ষো দুস্ত্যজ ইতি সংস্কারাণাং প্রাবল্যমুক্তম্॥ 7-1-9 হতাঃ অস্মাভিঃ সংধিরার্ষঃ॥ 7-1-11 বিরুদ্ধং বৈরাদিকং নশ্যতি অন্তর্ধীয়তে॥ 7-1-20 সুহৃদ ইত্যদন্তঃ শব্দঃ॥